पुणे- पुणे-सातारा रस्त्यावर पीएमपी बसच्या धडकेत एका अनोळखी पादचाऱ्याचा मृत्यू झाला आहे. श्री शंकरमहाराज मठासमोर ही घटना घडली. अपघातानंतर बसचालक घटनास्थळावरून पळून गेला.

पोलिसांनी दिलेल्या माहितीनुसार, पुणे-सोलापूर रस्त्यावरील श्री शंकरमहाराज मठासमोरील बीआरटी मार्गातून जात असलेल्या एका पादचाऱ्याला भरधाव वेगात आलेल्या पीएमपी बसने धडक दिली. पादचारी गंभीर जखमी झाला होता.

जखमी पादचाऱ्याला तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला. अद्याप मृताची ओळख पटलेली नाही. या प्रकरणी पोलीस शिपाई अकिल तडवी यांनी सहकारनगर पोलीस ठाण्यात फिर्याद दिली आहे. पीएमपी बस चालकाविरुद्ध गुन्हा दाखल करण्यात आला असून, पोलीस उपनिरीक्षक एन. काळे पुढील तपास करत आहेत.

पुणे स्मार्त सिटीतील आयटी हब म्हणून ओळखल्या जाणाऱ्या हिंजवडी परिसरामध्ये एक धक्कादायक घटना उघडकीस आली आहे. अंगणवाडी क्रमांक 3 मध्ये वीस निरागस लहानग्यांना आत बंद करून सेविका आणि मदतनीस अंगणवाडीत कुलूप टाकून बाहेर गेल्याचा गंभीर प्रकार समोर आला आहे. मुलं आतमध्ये भयभीत होऊन रडत असल्याचा व्हिडिओ समोर आल्यानंतर पालक आणि स्थानिक नागरिक प्रचंड संतापले आहेत. या व्हिडिओमध्ये मुलांचा गोंधळ, आक्रोश आणि भीतीचा स्पष्ट आवाज ऐकू येत आहे. हा प्रकार काही क्षणासाठी नव्हे तर जवळपास एक तास घडल्याचे सांगितले जाते. शिक्षण आणि संरक्षणासाठी असलेल्या अंगणवाडीतच मुलांना धोका निर्माण झाल्याने सर्वत्र तिव्र निषेध व्यक्त केला जात आहे.

मिळालेल्या माहितीनुसार, अंगणवाडीतील सेविका सविता शिंदे आणि मदतनीस शिल्पा साखरे यांना ग्रामपंचायतीतील एका माजी सरपंचाने बोलावलेल्या बैठकीसाठी जावे लागणार होते. त्यामुळे या दोघींनी अंगणवाडीतील सुमारे 20 मुलांना आतच बंद केले आणि स्वतः बाहेर जाऊन कुलूप लावले. उद्देश काहीही असो पण एवढ्या लहान मुलांना संपूर्णतः एकटे सोडणे ही अत्यंत निष्काळजीपणाची आणि कायदेशीरदृष्ट्या धोकादायक कृती असल्याचे पालकांचे मत आहे. मुलांना काही अपघात झाला असता, आगीत अडकले असते किंवा कोणी आजारी पडले असते, तर त्याची जबाबदारी कोणाची? हा प्रश्न आता सर्वत्र उपस्थित केला जात आहे.

घटनास्थळी असलेल्या एका व्यक्तीने मुलांची सततची हाक आणि रडण्याचे आवाज ऐकले. त्यानंतर ही बाब त्वरित मुळशी पंचायत समितीचे बाल विकास प्रकल्प अधिकारी धनराज गिराम यांना कळविण्यात आली. त्यांनी परिस्थितीची गांभीर्याने दखल घेत दोन्ही सेविकांना लगेच बैठक सोडून येण्याचे आदेश दिले. काही वेळाने कुलूप उघडल्यानंतर आतून मुलं पूर्णपणे घाबरलेली, काहींना घाम फुटलेला तर काही मुलं थरथरत असल्याचे दृश्य पाहायला मिळाले. पालकांना ही माहिती मिळताच ते संतापाने अंगणवाडीत धावत पोहोचले आणि संबंधित सेविका व प्रशासनाला जाब विचारला.

ही घटना समोर आल्यानंतर संपूर्ण परिसरात संतापाचे वातावरण आहे. आमच्या चिमुकल्यांना अशा धोकादायक स्थितीत कोणत्या परवानगीने ठेवले गेले? ज्यांच्यावर मुलांची काळजी घेण्याची जबाबदारी आहे त्यांनीच असा निष्काळजीपणा का केला? असे प्रश्न पालकांकडून विचारले जात आहेत. अनेक पालकांनी या दोघींविरुद्ध कठोर कारवाईची मागणी केली आहे. काही पालकांनी हे अंगणवाडी व्यवस्थापनाचं अपयश असल्याचे म्हटले असून, संपूर्ण चौकशी करण्यात यावी आणि भविष्यात पुन्हा अशी घटना घडू नये यासाठी कडक नियम आणावेत अशी मागणी त्यांनी केली आहे.

या घटनेनंतर आता बाल विकास विभागाकडून अधिकृत चौकशी सुरू करण्यात आली असून मुलांच्या सुरक्षेला सर्वोच्च प्राधान्य देण्याचा संदेश देण्यात आला आहे. व्हिडिओच्या आधारे तपास वेगाने सुरू असून निष्काळजीपणा सिद्ध झाल्यास संबंधित सेविका आणि मदतनीस यांच्यावर निलंबनासह कठोर कारवाई होण्याची शक्यता आहे. पालकांनी मुलांना विश्वास देत त्यांना सांभाळले असले तरी त्या चिमुकल्यांच्या मनावर बसलेली ही भीतीची कायमची छाप किती मोठी आहे हे शब्दांत सांगणे कठीण आहे. या घटनेने पुन्हा एकदा बाल सुरक्षा आणि सरकारी व्यवस्थेतील त्रुटी यावर मोठा प्रश्नचिन्ह उभे केले आहे.

पुणे –

राजकीय लोकशाही टिकवण्यासाठी सामाजिक लोकशाही, बंधुता टिकवणे महत्वाचे आहे कारण, लोकशाहीत बंधुत्व अपरिहार्य आहे. स्वातंत्र्य, समता, बंधुता आणि न्याय यांचे नाते एकमेकांशी सुसंगत आहे. आपल्या अवतीभोवती गरीब-श्रीमंत असे विषमता वातावरण दिसून येते पण आपण ते सहन करतो कारण, आपले अज्ञान आणि सहनशीलता उच्चकोटीची आहे. भौतिक सर्व आविर्भाव बाजूला करून मनुष्य हा समान आहे हे तत्व अंगिकारून त्यात समानता आली पाहिजे असे मत ज्येष्ठ विचारवंत प्रा. गौतमीपुत्र कांबळे यांनी व्यक्त केले.

महाराष्ट्र गांधी स्मारक निधी आयोजित संविधान दिनानिमित्त विशेष कार्यक्रमाचे आयोजन एस.एम.जोशी फाऊंडेशन सभागृह येथे करण्यात आले होते. यावेळी ज्येष्ठ विचारवंत आणि सेक्यूलर मूव्हमेंटचे प्रणेते प्रा. गौतमीपुत्र कांबळे यांनी ‘सामाजिक लोकशाहीविना राजकीय लोकशाहीला अर्थ नाही’, ज्येष्ठ पत्रकार श्रीराम पवार यांनी ‘संविधानाच्या परिप्रेक्षात भारतीय लोकशाहीची वाटचाल – नेहरु ते मोदी’ आणि माजी अ.भा.मराठी साहित्य संमेलनाध्यक्ष आणि महाराष्ट्र गांधी स्मारक निधीचे विश्वस्त लक्ष्मीकांत देशमुख यांनी ‘बी.एन.रावना संविधानाचे शिल्पकारत्व देण्याचा प्रयत्न’ या विषयावर व्याख्यान दिले. यावेळी कार्यक्रमाचे अध्यक्ष आणि महाराष्ट्र गांधी स्मारक निधीचे विश्वस्त अन्वर राजन यांच्यासह उद्घाटक अॅड.अभय छाजेड उपस्थित होते.

प्रा. कांबळे म्हणाले, आपल्या आजूबाजूला वाईट गोष्टी घडत असताना आपण नेमके काय करतो असा प्रश्न स्वतःला विचारला पाहिजे. वाईटाचे चार अंग असून ते म्हणजे भय, श्रद्धा, स्वार्थ, अज्ञान या पायावर ते उभे आहे. बौद्धिक चर्चा करून जर कृती नाही केली तर केवळ चर्चांला अर्थ नाही. त्यामुळे प्रत्यक्ष कृती आवश्यक आहे. सामाजिक विषमता देशात मोठ्या प्रमाणात असून हे चित्र बदलण्याची गरज आहे. ठराविक जात आणि धर्म आधारित प्राबल्य हे समूह हुकुमशाहीकडे वाटचाल करणारे आहे. ज्यांनी जात आणि धर्म विचारांची चौकट मोडून वाटचाल केली ते महापुरुष झाले. जाती नष्ट करण्यासाठी जातीची बंधने मोडली पाहिजे. याकरिता जातिनिर्मुलन कायदा अंमलबजावणी केली पाहिजे. प्रचलित निवडणूक पद्धत ही बदलली पाहिजे. आपल्याकडे मताला कोणते महत्व नाही याबाबत गंभीरपणे विचार करण्याची गरज निर्माण झाली आहे. लोकशाहीचे चार खांब आज जाती,धर्म आणि भ्रष्टाचार यांनी पोखरलेले आहे त्यामुळे पाचवा खांब “सेक्युलरिझम” निर्माण झाला पाहिजे कारण तो समाजाचा डोलारा पेलू शकतो. अनुदानित शाळा मध्ये कोणतेच धर्म आधारित शिक्षण दिले नाही पाहिजे कारण ते सर्व समाजाच्या विरोधातील आहे.

राव यांना संविधान शिल्पकार म्हणणे चुकीचे

लक्ष्मीकांत देशमुख म्हणाले, मसुदा समितीचे सहा सदस्य होते आणि त्याचे अध्यक्ष डॉ.बाबासाहेब आंबेडकर होते. डॉ.आंबेडकर हे घटनेचे शिल्पकार असून सल्लागार बी.एन.राव यांचे नाव त्याकाळी निर्माते म्हणून कोणी घेतले नसल्याचे दिसून येते आणि ते प्रशासकीय सेवक होते. १३ विविध कमिट्यांचे अहवाल एकत्र करून त्यांनी संविधानाचा कच्चा मसुदा तयार केला. त्यात चार महिने आवश्यक ते बदल डॉ.आंबेडकर यांनी अभ्यासपूर्ण केले आणि त्यानंतर पुढे आवश्यक ते मोठे २० बदल करून अंतिम ड्राफ्ट काम केले. सहा महिने काम केल्यावर राव यांची संयुक्त राष्ट्रसंघात बदली झाली पुढे संविधान निर्मितीचे काम दीड ते दोन वर्ष सुरू होते त्यामुळे राव यांना संविधान शिल्पकार म्हणणे चुकीचे आहे.

लोकशाही मूल्यांचा ऱ्हास सध्या होतो

श्रीराम पवार म्हणाले, स्वातंत्र्यानंतर ज्याप्रकारे लोकशाही गणराज्य निर्माण झाले तसे चित्र पुर्वी कधी दिसत नव्हते. घटनेने त्याला चांगल्याप्रकारे आकार दिला आणि देशाने पुढे प्रगतीकडे वाटचाल केली. लोकशाहीचे स्वप्न सर्वसामान्य यांच्या हातात घटनेने दिले. पंडित नेहरू यांच्या काळात सर्वाधिक घटनेचे मजबुतीकरण काम झाले कारण त्यांना लोकशाही तत्वांचा प्रचंड आदर होता. नेहरू यांच्याकडे बहुमत असल्याने त्याकाळी हुकुमशाह झाले असते परंतु त्यांनी लोकशाहीची तत्वे देशात रुजवली. मात्र, आता केवळ दोनच लोक देश सध्या चालवत आहे असे चित्र निर्माण झाले आहे. त्यातून लोकशाही मूल्यांचा ऱ्हास होत आहे. देश कसा चालवावा हे घटनेने सांगितले आहे त्याची अंमलबजावणी राज्यसत्ता करत असते. परंतु ज्यांच्यावर जी जबाबदारी आहे त्याची अंमलबजावणी योग्यप्रकारे होत नाही.आता निवडणुकीत मते दिल्यावर सत्तेत सर्वसामान्य नागरिकांचा लोकसहभाग दिसत नाही. आज देशात ३० ते ३५ टक्के मते मिळाल्यावर निर्विवाद सत्ता मनमानी पद्धतीने करण्यात येत आहे. लोकशाही सोईने वापरणे पद्धत देशात सुरू आहे. धर्मनिरपेक्ष आज कोणता नेता जाहीर म्हणू शकत नाही. सरकार विरोधात कोणती गोष्ट करू नये असा नकळत संकेत आज रुजला आहे तो चिंताजनक आहे.

संविधानाची मोडतोड प्रकार सध्या सुरू

अॅड छाजेड म्हणाले, जगातील विविध गोष्टींचा अभ्यास करून देशात सर्वोत्तम संविधान तयार करण्यात आले. लोकशाही मध्ये संसद महत्वपूर्ण असून त्यात संविधान मूल्यांचे पालन होते का असा प्रश्न आज निर्माण होत आहे. संविधानाचा आपल्या सोयीनुसार अर्थ लावणे अशी पद्धत सध्या रुढ होत आहे. अभिव्यक्ती स्वातंत्र्य आणि वेगवेगळे स्वातंत्र्य या हक्कावर गदा येत आहे. केशवानंद भारती खटला मध्ये संविधानाचा मूळ ढाचाला धक्का लावता येत नाही असे सांगितले, तरी सध्या विविध प्रकारे संविधानाची मोडतोड प्रकार सुरू आहे. देशात विरोधी पक्षाची राज्य ज्याठिकाणी आहे तिथे राज्यपाल मार्फत सरकारी यंत्रणेवर प्रहार करणे सुरू आहे.

या कार्यक्रमाचे सूत्रसंचालन सविता कुरुंदवाडकर यांनी केले तर गायिका मोहिनी पवार यांनी विविध गाण्यांचे गायन यावेळी केले. अध्यक्षीय समारोप विश्वस्त सचिव अन्वर राजन यांनी केल्यावर कार्यक्रमाचे आभार प्रदर्शन राजेश तोंडे यांनी केले.

पुणे- स्वतःच्या नावाची दहशत पसरविण्यासाठी तोडफोड करणारा फरार आरोपी समीर शब्बीर शेख,( वय-२७, रा-जयजवाननगर, येरवडा, पुणे )याला अखेर पोलिसांनी गजाआड केला .
येरवडा पोलीस स्टेशन गु.र.नं.७०६/२०२५ भा.न्या.सं.क ११८ (१),१८९ (२),१९०,१९१ (२) सह भारतीय हत्यार कायदा ४ (२५) क्रिमीनल लॉ अमेंडमेंट ३, ७ अन्वये गुन्हा दाखल झाला होता. दाखल गुन्ह्यातील हा आरोपी येरवडा पोलीस स्टेशन रेकार्डवरील असुन यापुर्वी एमपीडीए, मकोका अंतर्गत कारवाई होऊन जामीनावर बाहेर आला होता. जामीनावर बाहेर आल्यानंतर येरवडा परीसरात तोडफोड करुन दहशत निर्माण करण्याचा प्रयत्न केला होता. या घटनेची दखल घेवुन गुन्हा दाखल करुन आरोपींचा शोध सुरु केला असताना, आरोपींना तात्त्काळ ताब्यात घेणेबाबत वरीष्ठांनी सुचना दिल्या होत्या.
या सुचनांच्या अनुषंगाने वरीष्ठ पोलीस निरीक्षक अंजुम बागवान यांचे मार्गदर्शनाखाली येरवडा पोलीस स्टेशन तपास पथकाचे पोलीस अंमलदार अमोल गायकवाड यांना त्यांच्या खास बातमीदारामार्फत बातमी मिळाली की दाखल गुन्ह्यातील आरोपी हा पवार वस्ती, लोहगाव भागात त्याच्या मित्राकडे येणार असलेबाबत खात्रीलायक माहिती प्राप्त झाल्याने तपास पथकाचे प्रभारी पोलीस उप निरीक्षक महेश फटांगरे, पोलीस अंमलदार शैलेश वाबळे, नटराज सुतार, अमोल गायकवाड यांनी मिळालेल्या बातमीच्या ठिकाणी जाऊन सापळा रचुन समीर शेख हा त्याठिकाणी आल्यानंतर त्यास ताब्यात घेवुनअटक केली समीर स्वःतच्या नावाची दहशत करण्यासाठी गुन्हेगारी कृत्ये करत .
संबधित कामगिरी अप्पर पोलीस आयुक्त, पुर्व प्रादेशिक विभाग मनोज पाटील, पोलीस उपायुक्त, परिमंडळ ०४ सोमय मुंडे, सहा. पोलीस आयुक्त, येरवडा विभाग श्रीमती प्रांजली सोनवणे, वरीष्ठ पोलीस निरीक्षक, येरवडा पोलीस स्टेशन अंजुम बागवान, पोलीस निरीक्षक (गुन्हे), विजय ठाकर, येरवडा यांचे मार्गदर्शनाखाली तपास पथकाचे प्रभारी पोलीस उप निरीक्षक महेश फटांगरे, पोउनि प्रदिप सुर्वे, पोलीस अंमलदार महेद्र शिंदे, मुकुंद कोकणे, शैलेश वाबळे, बालाजी सोगे, भीमराव कांबळे, नटराज सुतार, अतुल जाधव, अक्षय शिंदे, अमोल गायकवाड, संदीप जायभाय यांनी केलेली आहे.

पुणे :

‘होता भीमराव म्हणून माय तुझ्या बोटाला लागली शाई ..’, ‘फक्त पायदळ सेना होती माझ्या भीमाकडे..’, ‘माझ्या भिमाने घटनेला हिऱ्या मोत्यांनी सजविलं..’, ‘जगातली देखणी बाई मी भीमाची लेखणी..’ अशी एकासरस एक बहारदार शाहीरी सादर करत संविधान मूल्ये, सामाजिक समता आणि लोकशाहीची ताकद लोककलेद्वारे पुणेकरांना अनुभवायला मिळाली. 

निमित्त होते डॉ. बाबासाहेब आंबेडकर सांस्कृतिक महोत्सव समितीच्या वतीने आयोजित  ‘संविधान लोककला शाहिरी जलसा’ कार्यक्रमाचे. भारतीय संविधान दिनाचे औचित्य साधून  “माझे संविधान – माझा अभिमान” या उपक्रमांतर्गत या कार्यक्रमाचे आयोजन करण्यात आले होते. या कार्यक्रमात शाहीर शीतल साठे, सचिन माळी, सदाशिव निकम, पृथ्वीराज माळी आदी कलाकारांनी शाहीरी सादर केली. यावेळी सावित्रीबाई फुले पुणे विद्यापीठाचे प्र कुलगुरू डॉ. पराग काळकर,  रिपब्लिकन पार्टी ऑफ इंडिया (आठवले) पक्ष युवक प्रदेशाध्यक्ष पप्पू कागदे, पुणे शहर अध्यक्ष संजय सोनवणे,  डॉ. बाबासाहेब आंबेडकर सांस्कृतिक महोत्सव समितीचे अध्यक्ष परशुराम वाडेकर, रिपाइं पश्चिम महाराष्ट्र युवक आघाडीचे  प्रमुख शैलेंद्र चव्हाण,  अशोक शिरोळे, डॉ विजय खरे, सरिता वाडेकर, पुण्याच्या माजी उपमहापौर सुनीता वाडेकर, अविनाश कदम  आदी उपस्थित होते.

संविधानाच्या उद्देशीकेचे सामुहिक वाचन करून कार्यक्रमाला सुरूवात झाली. त्यानंतर ‘भीमराया वंदाया कवन शाहिरी…’ हे गाणे सादर झाले. त्यानंतर ‘सामर्थ्य पाहिले मी आंबेडकरामध्ये..’,  छत्रपती शिवाजी महाराज यांच्यावरील पोवाडा, राजर्षी शाहू महाराज, महात्मा फुले यांच्यावरील बहारदार लोकगीतं सादर होत कार्यक्रमाला रंग चढला. त्यानंतर ‘कुणी नाही केलं  माय माझ्या भिमाने केलं ..’, ‘माझी मैना गावाकड राहिली..’, ‘देश उभा केला संविधानाने..’, ‘ माझ्या भिमान भलं केलं ग बया.., ‘जगातली देखणी बाई मी भीमाची लेखणी..’, ‘चांदण्याची छाया माझा भीमराया..’ अशा अनेक लोकप्रिय गाण्यांनी प्रेक्षकांना मंत्रमुग्ध केलं.  

संविधानातील मूलभूत मूल्यांची जनजागृती व लोकशाही प्रक्रियेबद्दल जागरूकता निर्माण करणे हा या विशेष कार्यक्रमाचा मुख्य उद्देश असल्याचे डॉ. बाबासाहेब आंबेडकर सांस्कृतिक महोत्सव समितीचे अध्यक्ष परशुराम वाडेकर यांनी प्रास्ताविकपर भाषणात सांगितले.

यावेळी दहा लाख रुपयांची कचरा वेचताना सापडलेली बॅग मूळ मालकास परत करणाऱ्या प्रामाणिक सफाई कामगार अंजू माने यांना रोख पाच हजार रुपये देऊन सत्कार करण्यात आला. कार्यकमांची सांगता राष्ट्रगीताने झाली. कार्यक्रमाचे सूत्रसंचालन अॅड. ज्ञानेश्वर जाविर यांनी केले.

गुरू तेग बहादुर जी यांचा जाज्वल्य इतिहास ग्रंथालयांद्वारे समाजापर्यंत पोहोचविणार : चंद्रकांत पाटील

नांदेडच्या गुरू गोविंदसिंग अध्यासन केंद्राचे बळकटीकरण करणार : चंद्रकांत पाटील

सरहद, पुणेतर्फे गुरू तेग बहादुर जी यांच्या ३५०व्या शहीदी वर्षानिमित्त आयोजित उपक्रमांचा शुभारंभ
‘गुरू तेग बहादुर जी’ पुस्तकाचे प्रकाशन
पुणे : हिंदुस्तानवर सातत्याने होणारी परकीय आक्रमणे रोखण्यात देशातील मोजक्या राज्यांचे मोठे योगदान आहे. यात महाराष्ट्रासह पंजाबचे नाव प्रामुख्याने घेतले जाते. गुरू तेग बहादुर जी यांचे बलिदान अविस्मरणीय असून त्यांच्या प्रयत्नातून धर्मावरचा आघात रोखला गेला. हा जाज्वल्य इतिहास पुढील पिढीपर्यंत पोहोचण्यासाठी त्यांच्या कार्याची माहिती देणारे पुस्तक महत्वाचे ठरेल, असा विश्वास उच्च व तंत्रशिक्षण मंत्री चंद्रकांत पाटील यांनी व्यक्त केला.
राज्य शासनाच्या माध्यमातून राज्यातील प्रत्येक ग्रंथालयात गुरू तेग बहादुर जी यांच्यावरील पुस्तक पोहोचविण्याचा तसेच नांदेड येथील स्वामी रामानंद तीर्थ विद्यापीठातील गुरू गोविंदसिंग अध्यासन केंद्राचे बळकटीकरण करण्याची ग्वाहीही त्यांनी दिली.
सरहद, पुणेतर्फे गुरू तेग बहादुर जी यांच्या ३५०व्या शहीदी वर्षानिमित्त वर्षभर राबविण्यात येणाऱ्या विविध उपक्रमांचा तसेच ‘गुरू तेग बहादुर जी’ या पुस्तकाचे प्रकाशन चंद्रकांत पाटील यांच्या हस्ते झाले. त्या वेळी ते बोलत होते. कार्यक्रमाच्या अध्यक्षस्थानी गुरुनानक एज्युकेशन सोसायटीचे अध्यक्ष संतसिंग मोखा होते तर गुरुद्वारा दरबारचे अध्यक्ष चरणजितसिंग साहनी यांची प्रमुख उपस्थिती होती.
सरहद, पुणेचे संस्थापक संजय नहार, विश्वस्त डॉ. शैलेश पगारिया, डॉ. अमोल देवळेकर, शैलेश वाडेकर, अनुज नहार मंचावर होते. महाराष्ट्र साहित्य परिषदेच्या माधवराव पटवर्धन सभागृहात आज (दि. २६) कार्यक्रमाचे आयोजन करण्यात आले होते.
चंद्रकांत पाटील पुढे म्हणाले, पुस्तक माणसाच्या जीवनाला दिशा देण्याचे कार्य करते. आपल्या देशात ग्रंथांना गुरू मानले गेले आहे. ‘गुरू तेग बहादुर जी’ या पुस्तकाच्या माध्यमातून गुरू तेग बहादुर जी यांचे बलिदान जनसामान्यांपर्यंत पोहोचावे, त्यातून त्यांनी प्रेरणा घ्यावी याविषयी सघन काम होणे आवश्यक आहे.
प्रास्ताविकात संजय नहार म्हणाले, देशाला स्वातंत्र्य मिळवून देण्याच्या लढ्यात गुरू तेग बहादुर जी यांनी मोलाचे कार्य केले. त्यांच्या ३५०व्या शहीदी वर्षानिमित्त देशात येत्या वर्षभरात विविध उपक्रम राबविले जाणार आहेत, त्यांचा प्रारंभ या पुस्तक प्रकाशनाच्या माध्यमातून करण्यात येत आहे. या द्वारे शिखांचा इतिहास देशभरात पोहोचविण्यास मदत होईल.
चरणजित साहनी म्हणाले, गुरू तेग बहादुर जी यांच्या कार्याविषयी चित्रकथेच्या माध्यमातून सोप्या शब्दात या पुस्तकात माहिती देण्यात आली आहे. वर्षभरात शाळा-शाळांमध्ये हे पुस्तक वितरित केले जाईल, ज्या योगे गुरू तेग बहादुर जी यांचे कार्य जनसामन्यांच्या मनात रुजविले जाईल. विद्यार्थ्यांनी हा इतिहास जाणून घ्यावा असे सांगून साहनी म्हणाले गुरू तेग बहादुर जी यांच्या कार्यकर्तृत्वावर आधारित निबंध स्पर्धाही घेण्यात येणार आहे.
कार्यक्रमाचे सूत्रसंचाल लेशपाल जवळगे यांनी केले तर आभार अनुज नहार यांनी मानले. ना. चंद्रकांत पाटील यांचे स्वागत डॉ. अमोल देवळेकर, संतसिंग मोखा, चरणजितसिंग साहनी यांनी केले.

पुणे :

महिलेने पुरुषावर अत्याचार केल्याच्या घटना कोथरूड येथे नोंदविली गेली आहे. कोथरूड पोलीस स्टेशनमध्ये महिलेवर गुन्हा दाखल करण्यात आला आहे. कोथरूड पोलिसांकडून या घटनेचा तपास करण्यात येत आहे. महिलेकडून अश्लील फोटो अन् व्हिडिओ दाखवत पुरूषाकडे वारंवार पैशांची मागणी केली जात होती, असेही सांगण्यात येत आहे. पुरूषावर बलात्कार केल्याची घटना समोर येताच एकच खळबळ उडाली आहे.
गुंगीचं औषध देऊन कोल्हापूरच्या एका व्यक्तीवर अत्याचार केला आहे. अत्याचार करतानाचे पुरूषासोबतचे अश्लील फोटो, व्हिडिओ महिलेने काढले. त्याचाच वापर करून सविता त्या व्यक्तीला पैशांसाठी ब्लॅकमेल करत होती. मी वकील आहे, अशी धमकीही त्या महिलेने त्याला दिली होती.
कोल्हापूर येथील फिर्यादीचे घर घेण्यासाठी पुरुषावर बळजबरीचा प्रयत्न केल्याचे तक्रारीत म्हटले आहे. पुरुषाला बळजबरीने काशी या ठिकाणी घेऊन अत्याचार केल्याचे तक्रारीत म्हटले आहे. कोथरूड पोलिसाकडून या प्रकरणाचा अधिक तपास केला जात आहे.

पुण्यातील महिला सविता (नाव बदलेले) आम्हाला तुळजापूरला भेटली होती. मी कुटुंब आणि मित्रांसह दर्शनासाठी गेलो होतो, तेव्हा आमची ओळख झाली होती. त्यानंतर सविताने माझ्या पत्नीला कॉलवरून बोलणं सुरू केलं.आमच्या घरी येऊन राहिली. माझ्या पत्नीला म्हणाली की मला भाऊ मानणार. पण, त्यानंतर तिने जवळीक करण्यास सुरूवात केली”, असे सांगत कोल्हापूर जिल्ह्यातील एका व्यक्तीने पुण्यात राहणाऱ्या आरोपी महिलेवर गंभीर आरोप केले आहेत.

चंदगड तालुक्यातील ४७ वर्षीय व्यक्तीने पुण्यातील कोथरूडमध्ये राहणाऱ्या एका महिलेविरोधात तक्रार दिली. पोलिसांनी गुन्हा दाखल केल्यानंतर हे प्रकरण समोर आले.

तक्रारदार व्यक्तीने म्हटले आहे की

, “महिला माझ्या घरी येऊन राहिली. माझ्या पत्नीसमोर मला भाऊ म्हणाली, पण नंतर तिने जवळीक करण्याचा प्रयत्न केला. त्यामुळे तिला निघून जाण्यास आणि परत न येण्यास सांगितले. त्यानंतर तिने माझी माफी मागितली. मी तिला चंदगड स्थानकात सोडायला जात होतो. त्यावेळी ती म्हणाली की, मला वॉशरुमला जायचे आहे आणि मी उघड्यावर जात नाही.”

“मी तिला एका लॉजमध्ये जाण्यास सांगितले. ती लॉजमधील रुममध्ये गेली. नंतर मला बोलावलं. मला म्हणाली मी उच्च न्यायालयात वकील आहे. मी तुमची साथ देईन, तुमच्या मुलाला मंत्रालयातील लोकांच्या ओळखीने नोकरीला लावेन, असे म्हणत माझा हात धरला आणि जवळ ओढू लागली. मी तिला नकार दिला आणि खाली येऊन थांबलो. त्यानंतर ती पुण्याला गेली”, असे तक्रारीत म्हटले आहे.

कुंभमेळ्याला जायचं म्हणून पुण्यातील घरी घेऊन गेली

तक्रारीत या व्यक्तीने म्हटले आहे की, “फेब्रुवारीमध्ये तीन दिवस ती माझ्या घरी येऊन थांबली. पुण्याला गेल्यानंतर तिने माझ्या पत्नीला कॉल केला आणि म्हणाली की ‘माझी मैत्रीण आणि तिची फॅमिली काशी विश्वनाथाच्या दर्शनासाठी जात आहे. मी तुमच्या पतीला भाऊ म्हणून सोबत घेऊन जाणार आहे. कुंभमेळा भरला आहे. त्याला माझ्यासोबत पाठवा.’ माझ्या पत्नीने याला होकार दिला.”

“२५ फेब्रुवारी रोजी मी पुण्यात आलो. त्यानंतर ती मला स्वारगेट स्थानकात भेटली. मला एक मोबाईल दिला. मला तिच्या कोथरूडमधील घरी घेऊन गेली. मला सांगितलं की, मैत्रिणीचा प्लॅन रद्द झाला आहे. आपण दोघेच विमानाने जाऊ. त्यानंतर तिच्या बेडरुममध्ये मला झोपवले. मला तिने काहीतरी प्यायला दिले आणि माझ्यासोबत अतिप्रसंग करण्याचा प्रयत्न केला. मी रागाच्या भरात तिथून निघून जात होतो. तितक्या माझा हात धरला आणि म्हणाली की, तू इथून गेला, तर तुला इथेच काहीतरी करेन. मी सांगेन तसंच राहायचं अशी धमकी दिली”, असेही तक्रारीत म्हटले आहे.

काशीला नेले आणि….

तक्रारदाराने म्हटले आहे की, “सविताने मला मुंबई विमानतळावरून काशीला नेले. मला म्हणाली की, तू आता माझ्या कब्जात आहेस, काही कूरकूर केली तर तुझ्या घरी जाऊ देणार नाही. तुझे कुटुंब उद्ध्वस्त करेन. मी देवदर्शनासाठी होकार दिला. ती मला एका पंडिताकडे घेऊन गेली. त्याने मला शनि असल्याचे सांगितले. त्यानंतर मला बळजबरी तीन दिवस तिथे ठेवून घेतले. शरीरसंबंध ठेव म्हणाली. माझ्याशी जवळीक करत होती पण माझ्या पत्नीचा कॉल आला. “

“त्यानंतर मी गावी आलो. मी माझ्या पत्नीला झालेला प्रकार सांगितला. पत्नीला सांगितलं म्हणून सविता माझ्यावर चिडली. तिने माझ्या पत्नीने तिला कॉल करून झापलं. काही दिवस सविताने कॉल केला नाही. काही दिवसांनी दुसऱ्या नंबरवरून कॉल केला आणि २ लाख रुपये दे नाहीतर, तुझे फोटो व्हायरल करेन. बदनामी करेन अशा धमक्या देऊ लागली. त्यानंतर मी या प्रकरणी पोलिसात तक्रार दिली”, असे या व्यक्तीने म्हटले आहे. याप्रकरणी कोथरूड पोलिसांनी महिलेविरोधात धमकी देऊन वसुली करण्याचा प्रयत्न केल्याप्रकरणी गुन्हा दाखल केला आहे.

पुणे – पुणे महानगर क्षेत्र विकास प्राधिकरण (PMRDA) मुख्यालय आकुर्डी येथे संविधान दिन उत्साहात साजरा करण्यात आला. यानिमित्त संविधानाच्या प्रस्तावनेचे सामूहिक वाचन करून अधिकारी व कर्मचाऱ्यांनी राष्ट्रनिष्ठा आणि संविधान मूल्यांचे पालन करण्याची शपथ घेतली.
दरवर्षी 26 नोव्हेंबर रोजी संविधान दिन साजरा केला जातो. 1949 साली याच दिवशी भारतीय संविधान स्वीकारण्यात आले होते. त्या पार्श्वभूमीवर पीएमआरडीएत आयोजित कार्यक्रमास सह-आयुक्त (प्रशासन) रूपाली आवले-डंबे यांच्यासह सर्व विभागप्रमुख, अधिकारी व कर्मचारी उपस्थित होते.
या कार्यक्रमात सह-आयुक्त दीप्ती सूर्यवंशी, सह-आयुक्त हिम्मत खराडे, उपायुक्त राजेश माशेरे आदी मान्यवरांचीही प्रमुख उपस्थिती होती. संविधानातील मूल्ये आणि लोकशाही बळकट करण्यासाठी सर्वांनी कटिबद्ध राहण्याचे आवाहन यावेळी करण्यात आले.