पुणे : पुणे परिमंडलातील वीजबिलांच्या थकबाकीदारांविरोधात महावितरणकडून सुरु असलेल्या ‘शून्य थकबाकी’च्या धडक मोहिमेत 19 हजार 452 घरगुती, वाणिज्यिक व औद्योगिक वीजग्राहकांचा वीजपुरवठा 10 कोटी 84 लाख रुपयांच्या थकबाकीमुळे खंडित करण्यात आला आहे.

पुणे, पिंपरी चिंचवड शहरांसह मुळशी, जुन्नर, आंबेगाव, मावळ, खेड तालुक्यातील 6 लाख 78 हजार घरगुती, वाणिज्यिक व औद्योगिक थकबाकीदारांकडे असलेल्या 132 कोटी 48 लाख रुपयांच्या वसुलीसाठी वीजपुरवठा खंडित करण्याची कारवाई सुरु आहे. ही थकबाकी शुन्यावर येईपर्यंत ही मोहीम सलगपणे सुरु राहणार आहे.

पुणे परिमंडलातील 5 लाख 59 हजार घरगुती वीजग्राहकांकडे 75 कोटी 79 लाख रुपयांची सर्वाधिक थकबाकी आहे. तसेच 1 लाख 2 हजार वाणिज्यिक ग्राहकांकडे 40 कोटी 30 लाख तर 16 हजार 361 औद्योगिक ग्राहकांकडे 16 कोटी 38 लाख रुपयांची थकबाकी आहे. ही थकबाकी वसुल करण्यासाठी महावितरणने आक्रमकपणे ‘शून्य थकबाकी’ मोहीम सुरु केलेली आहे. या मोहिमेत प्रादेशिक संचालक श्री. संजय ताकसांडे व मुख्य अभियंता श्री. एम. जी. शिंदे यांच्या मार्गदर्शनात अधीक्षक अभियंता, कार्यकारी अभियंता, सर्व उपविभाग व शाखा कार्यालयप्रमुख अभियंते, लेखा अधिकारी तसेच हजारो जनमित्र सहभागी झाले आहेत.

पुणे शहरात आतापर्यंत 11 हजार 98 थकबाकीदारांचा वीजपुरवठा 4 कोटी 46 लाख रुपयांच्या थकीत वीजबिलांपोटी खंडित करण्यात आला आहे. भोसरी व पिंपरी विभागअंतर्गत पिंपरी चिंचवड शहरातील 3650 वीजग्राहकांची वीज 2 कोटी 44 लाख रुपयांच्या थकबाकीपोटी खंडित करण्यात आली आहे. मुळशी, मंचर व राजगुरुनगर विभाग अंतर्गत मुळशी, जुन्नर, आंबेगाव, मावळ, खेड तालुक्यातील 4714 ग्राहकांचा वीजपुरवठा 3 कोटी 94 लाख रुपयांच्या थकबाकीमुळे खंडित करण्यात आला आहे. थकीत वीजबिलाच्या रकमेचा भरणा करता यावा म्हणून दि. 10, 11 व 13 फेब्रुवारीला पुणे परिमंडलातील महावितरणचे सर्व अधिकृत वीजबील भरणा केंद्ग कार्यालयीन वेळेत सुरु राहणार आहेत.

ट – कटू कारवाई टाळा, सहकार्य करा – वीजपुरवठा खंडित करण्याची कटू कारवाई टाळण्यासाठी थकबाकीचा भरणा करून सहकार्य करावे, असे आवाहन महावितरणने केले आहे. वीजपुरवठा खंडित केल्यानंतर थकबाकीचा भरणा करणे, त्याची पावती संबंधीत कार्यालयात दाखवणे, रिकनेक्शन चार्जेस भरल्यानंतर वीजपुरवठा सुरु करून घ्यावा लागणार आहे. थकीत वीजबिल भरण्यासाठी स्थानिक वीजबील भरणा केंद्गे तसेच घरबसल्या ‘ऑनलाईन’ पेमेंटसाठी महावितरणची www.mahadiscom.in ही वेबसाईट तसेच मोबाईल अ‍ॅपचा पर्याय उपलब्ध आहे.

पुणे: पुरंदर तालुक्यातील झेंडेवाडी, दिवे येथील  ब्रेक चाचणी पथामुळे नागरिकांची सोय होणार असून हा पथ सर्वांसाठी  महत्वपूर्ण ठरेल, असे प्रतिपादन परिवहन मंत्री दिवाकर रावते यांनी केले.

पुरंदर तालुक्यातील झेंडेवाडी, दिवे येथे सुरु करण्यात आलेल्या ब्रेक चाचणी पथाचे लोकार्पण  श्री. रावते यांच्या हस्ते  करण्यात आले, या कार्यक्रमात ते बोलत होते. यावेळी जलसंधारण राज्यमंत्री विजय शिवतारे, परिवहन विभागाचे प्रधान सचिव मनोज सौनिक, सहपरिवहन आयुक्त प्रसाद महाजन, प्रादेशिक परिवहन अधिकारी बाबासाहेब आजरी, उपप्रादेशिक परिवहन अधिकारी संजय राऊत आदी मान्यवर उपस्थित होते. यावेळी ब्रेक चाचणी पथाची तसेच  ब्रेक चाचणीसाठी आलेल्या वाहनांची पाहणी श्री. रावते, श्री. शिवतारे व अन्य मान्यवरांनी केली. तसेच हा पथ तयार करण्यासाठी योगदान दिलेल्या व्यक्ती, संस्था, संघटना व अधिकाऱ्यांचा सन्मान करण्यात आला.

श्री. रावते म्हणाले, परिवहन विभागाच्या अधिकारी व कर्मचाऱ्यांनी नागरिकांना जलदरित्या चांगली सेवा देवून समाजात शासनाबाबत सकारात्मक प्रतिमा निर्माण करावी. परिवहन विभागाकडे असणाऱ्या कामाची व्याप्ती व त्या तुलनेत असणाऱ्या अपुऱ्या मनुष्यबळाचा विचार करुन नागरिकांनीही सहकार्य करावे, असे सांगून ते म्हणाले, ब्रेक चाचणी पथाचे कामकाज गतीने होण्यासाठी 1 कोटी 31 लाख 72 हजार रुपये मंजूर  करण्यात आले आहेत. या निधीतून या ठिकाणी कार्यालय,प्रतिक्षाकक्ष, तसेच पाणीपुरवठा,विद्युत सुविधा, अंतर्गत जोडरस्ते व वाहनतळ, स्वच्छतागृह आदी सुविधा उपलब्ध करुन देण्यात येतील. तसेच ब्रेक चाचणी पथाची गरज लक्षात घेवून आणखी एक पथ उपलब्ध करुन दिला जाईल. नागरिकांच्या परिवहन विभागाकडे असणाऱ्या कामांचे स्वरुप विचारात घेवून त्यांना विविध सोयीसुविधा देण्यासाठी हा विभाग प्रयत्नशील असल्याचेही मत त्यांनी यावेळी व्यक्त केले.

श्री. शिवतारे म्हणाले, या ब्रेक चाचणी पथावर विविध सोयीसुविधा उपलब्ध करुन देणे आवश्यक आहे. या परिसराचा पूर्णत: विकास झाल्यास याद्वारे मोठया प्रमाणावर रोजगाराची संधी निर्माण होईल. ज्याप्रमाणे पुरंदरच्या  भागात पिकणारे अंजीर, सिताफळ, पेरु ही  फळे सर्वत्र प्रसिध्द आहेत, त्याप्रमाणेच या भागातील नियोजित विमानतळ आणि हा पथ अल्पावधीत महत्वाचे केंद्र बनेल.

श्री. सौनिक म्हणाले, याठिकाणी देण्यात आलेल्या सुविधांचा उपयोग करुन प्रादेशिक परिवहन विभागाने नागरिकांना वेळेत सेवा द्यावी.

श्री. महाजन म्हणाले, परिवहन विभागाचे अधिकाधिक संगणकीकरण व यांत्रिकीकरण करण्यावर भर देण्यात येत आहे. तसेच वाहनचालकांना जास्तीतजास्त सुविधा मिळवून देण्यात येत आहेत.

लोकसहभागातून  ब्रेक चाचणी पथाचे काम पुर्ण करण्यात आले आहे. याठिकाणी येणारे वाहनचालक व परिवहन विभागाच्या अधिकारी-कर्मचाऱ्यांच्या सोयीच्या दृष्टिने मुलभूत सोयीसुविधा उपलब्ध करुन देणे  आवश्यक असल्याचे मत श्री.आजरी यांनी प्रास्ताविकातून व्यक्त केले. उपप्रादेशिक परिवहन अधिकारी संजय राऊत यांनी सुत्रसंचालनातून विभागाच्या अडीअडचणी मांडल्या. आभार  मोटार वाहन निरीक्षक अमरसिंह गवारे यांनी मानले. यावेळी स्थानिक लोकप्रतिनिधी, राज्य शासनाच्या विविध विभागांचे अधिकारी, प्रादेशिक परिवहन विभागाचे अधिकारी, कर्मचारी तसेच नागरिक मोठया संख्येने  उपस्थित होते

पुणे- पुणे महानगर परिवहन महामंडळाचे (पीएमपीएल) अध्यक्ष व व्यवस्थापकीय संचालक तुकाराम मुंढे यांची नाशिक महापालिका आयुक्तपदी बदली करण्यात आल्यानंतर आज महापालिकेत ..कधी काळी सर्व पीएमटी च्या चाव्या हातात असलेले अजित आपटे यांच्यासह बडतर्फ कर्मचारी आणि अस्तास गेलेले कामगार नेते यांनी आज महापालिकेत गर्दी केली होती . काहीजण पदाधिकाऱ्यांच्या भेटी घेत होते तर काही जन अधिकाऱ्यांच्या भेटीस सज्ज होते .दरम्यान मुंडे जातील आणि गुंडे मॅडम येतील …पुन्हा मॅडम  ना या प्रश्नांना सामोरे जायचे आहे . पालिकेतील लॉबी,पीएमपीएमएल मधील लॉबी यांचा सामना पूर्ण न करताच मुंडे यांना गाशा गुंडाळावा लागला आहे ,तर प्रेरणा देशभ्रतार या हि लॉबी च्या बाहेर होत्या आता त्या हि गेल्या आहेत .या पार्श्वभूमीवर आता ‘तुझ्या गळा माझ्या गळा गुंफू मोत्यांच्या माळा ‘ असा अनुभव येतो कि लोण्याच्या गोळ्या साठी भांडणे होतात .. ते येणाऱ्या काळात दिसणारच आहे .

मुंढे यांनी दहा महिन्यांपूर्वी ‘पीएमपी’चा कारभार स्वीकारला होता. मुंढे यांनी मागील दहा महिन्यांत घेतलेल्या विविध निर्णयांमुळे तसेच कर्मचाऱ्यांवरील कारवाईच्या धडाक्यामुळे पीएमपीच्या सर्व कामगार संघटना त्यांच्याविरोधात गेल्या होत्या. मुंढे यांची बदली होताच पीएमपीच्या कर्मचा-यांकडून जल्लोष करण्यात आला आहे .

काय केले होते मुंडे यांनी …

– सतत गैरहजर राहणा-या पीएमपीमएलच्या 158 बसचालकांना पीएमपीएमएलचे व्यवस्थापकीय अध्यक्ष तुकाराम मुंढे यांनी सेवेतून बडतर्फ केले होते.
– बदली हंगामी कर्मचारी म्हणून या बसचालकांची नियुक्ती करण्यात आली होती. परंतू ऑगस्ट 2017 ते डिसेंबर 2017 या कालावधीत हे बसचालक सतत गैरहजर राहिल्यामुळे त्यांची सेवा संपुष्टात आणली होती.
– बडतर्फ केलेले कर्मचारी बदली, हंगामी आणि रोजंदारीवर काम करणारे होते. या कर्मचा-यांनी सुटीचे दिवस सोडून एका महिन्यात 21 दिवस काम करणे गरजेचे होते.
– परंतू ही अट ते पूर्ण करू शकले नाहीत त्यामुळे त्यांना बडतर्फ करण्यात आले होते. शिवाय कामात हलगर्जीपणा केल्याचा ठपका ठेवत 13 वाहतूक निरीक्षकांना निलंबित केले होते.
– पीएमपीएमएलचा पदभार स्वीकारल्यापासून तुकाराम मुंढेंनी कामात हलगर्जीपणा करणा-या 200 पेक्षा अधिक कर्मचारी आणि अधिका-यांना निलंबित केले होते. त्यामुळे बदली होताच त्यांनी जल्लोष केला.

11 वर्षात तब्बल 10 वेळा बदली-

2005 च्या बॅचचे आयएएस अधिकारी असलेल्या मुंढेंची 11 वर्षात तब्बल 10 वेळा बदली करण्यात आली आहे. अरुण भाटीया गेल्यानंतर  आपल्या कामाच्या धडाकेबाज कारवाईने गाजणारे म्हणून पुण्यात आलेले ते पहिलेच अधिकारी म्हणून ओळखले जातील .हेकेखोर ,लोकप्रतिनिधींना किंमत न देणारे ,त्यांना अवमानास्पद वागणूक देणारे , कामगारांवर हुकुमशाही पद्धतीने दहशत बसविणारे म्हणून त्यांच्यावर राजकीय क्षेत्रातून आरोप केले गेले .मुंडे यांनी लोकप्रतिनिधींच्या आक्षेपांना उत्तरे देण्यासाठी कायम पालिकेच्या मुख्य सभेत जाणे टाळले , गेले तेव्हा स्वतःचे निवेदन करून लोकप्रतिनिधींचे म्हणणे न ऐकता मधूनच  निघून गेल्याचा आरोप त्यांच्यावर झाला .पीएमपीएमएल साठी पैसे देणे महापालिकेचे कर्तव्य आहे त्यासाठी मी भिक मागण्याची गरज नाही अशा स्वभावाचे मुंडे  आणि लोकप्रतिनिधी यांच्यात कधीही सुसंवाद झाला नाही. ते आमचा अवमान करतात अशी भावना लोक्प्रतीन्धींची कायम असताना पुण्याचे खासदार अनिल शिरोळे आणि त्यांचे पुत्र सिद्धार्थ शिरोळे यांचे मात्र त्यांच्याशी चांगले संबध होते .मोडेल पण वाकणार नाही अशा स्वभावाने  भाटीया यांनी सर्वच राजकीय पक्षातील लोकांशी  आणि कामगारांशी देखील एकाच वेळी परिणामांची  तमा न बाळगता वाईट पणा घेतला आणि त्यांच्या वारंवार बदल्या होत गेल्या . तसाच काहीसा प्रकार मुंडे यांच्या बाबत हि होता असल्याचे दिसून आले आहे .भाटीया  हे मीडियाशी फटकून राहत पण त्यांना झोपडपट्टीतील आणि आम जनतेचा माथ्य स्वरूपात पाठींबा काही काल लाभला होता . मुंडे  यांच्या बाजूला मात्र मोठ्या मीडियाशी सलगी  आणि बड्या विद्यार्थ्यांचा पाठींबा  अशा दोन गोष्टी दिसून आल्या आहेत. पीएमपीएमएल च्या प्रवाश्यांचा त्यांना पाठींबा कधी मिळाल्याचे फारसे जाणवले नाही .मी एकटाच प्रामाणिक अशी त्यांची भावना असल्याचा आरोप होत गेला  … पण केवळ प्रामाणिक असून प्रत्यक्षात जनतेच्या पदरी काय ?उपयोग काय ? असे हि प्रश्न उपस्थित झाले .

पुणे -महानगर परिवहन महामंडळाचा व्यवस्थापकीय संचालक म्हणून गेल्या १० महिन्यात पुणेकरांच्या आणि पीएमपीच्या हितांचे निर्णय घेत असताना काही लोकांचे हितसंबंध दुखावले त्यामुळे माझ्या विरोधात नाराजी होती. मात्र, मी नियमात राहून प्रवासी हितांचे निर्णय घेतले. त्याचा परिमाण प्रवासी संख्या वाढवण्यात झाला आहे, असे पुणे महानगर परिवहन महामंडळाचे व्यवस्थापकीय संचालक तुकाराम मुंढे यांनी सांगितले.

तुकाराम मुंढे यांची बदली नाशिकच्या महापालिका आयुक्तपदी करण्यात अली असून त्यानिमित आज पत्रकार परिषदेत घेतली. त्यावेळी मुंढे म्हणाले की, नाशिकमध्ये काम करण्याच्या जास्त संधी म्हणून आनंदी आहे. नाशिकचे आयुक्तपद हे मोठे असून मी ते चॅलेंज म्हणून नाही तर संधी म्हणून पाहत आहे. पीएमपी संचालक पदाच्या कालावधीत माझ्यावर प्रवासी विरोधी असल्याची टीका करण्यात आली. मात्र, मी घेतलेले निर्णय हे प्रवासी हितांचे होते. त्याचा परिमाण प्रवासी वाढविण्यात झाला. यामुळे कर्मचाऱ्यांमध्ये ठेकेदारांना शिस्त लावण्यात यश आले आहे. यामध्ये काही लोकांचे हितसंबंध दुखावले गेले. मात्र मी नियमात राहून काम केले आहे, असे तुकाराम मुंढे यांनी सांगितले.

पुणे- डेक्कन एज्युकेशन सोसायटीच्या बृहन महाराष्ट्र वाणिज्य महाविद्यालयात (बीएमसीसी) शैक्षणिक पारितोषिक वितरण समारंभाचे आयोजन करण्यात आले होते. सावित्रीबाई फुले पुणे विद्यापीठाचे प्र-कुलगुरु डॉ. एन. एस. उमराणी यांच्या हस्ते गुणवंत विद्यार्थ्यांना पारितोषिके देऊन गौरविण्यात आले.
डॉ. उमराणी म्हणाले, ‘सकारात्मकता, विकासाचा ध्यास आणि खेळ यामुळे महाविद्यालयांमध्ये समृध्द शैक्षणिक वातावरण निर्माण होते. त्यामुळे विद्यार्थ्यांना चांगले शिक्षण, संस्कृती आणि संस्कार मिळतात. ज्याचा उपयोग जीवनात अधिक चांगले यश मिळविण्यासाठी होतो.’
ते पुढे म्हणाले, ‘शिक्षणातील प्रगती तपासण्यासाठी परीक्षा आवश्यक आहेत.’ अकरावी, बारावी, बी. कॉम, बीबीए, बीसीए, एम. कॉम आदी परीक्षांतील २०० हून अधिक विद्यार्थ्यांचा गौरव करण्यात आला. एम. ङ्गिलच्या बारा आणि पीएच. डीच्या सात विद्यार्थ्यांचा त्यात समावेश होता.
प्राचार्य डॉ. चंद्रकांत रावळ, उपप्राचार्य डॉ. जगदीश लांजेकर, डॉ. सुरेश वाघमारे, डॉ. आशीष पुराणीक, डॉ. एन. सी. नायकवडी, परीक्षा विभाग प्रमुख डॉ. गौतम बेंगाळे, विद्यार्थी प्रतिनिधी शुभम पाटोळे यांची प्रमुख उपस्थिती होती.

पुणे : शिवसृष्टीसाठी हवा तेवढा निधी उपलब्ध करवून देवू ,सायकल मार्गासाठी ३५0 कोटी खर्च करू ,मेट्रो चा प्रकल्प धुमधडाक्यात करू ..पुरंदरला विमान तळ उभारू …आणि सामन्य माणसाला अच्छे दिन मिळवून देवू  अशी हाकाटी पिटणाऱ्या सत्ताधारी भाजपने समाजातील निराधार, वंचित, उपेक्षित घटकांसाठी सुरू असलेल्या महापालिकेतील  योजना बंद करण्याचा निर्णय  घेतला. पैसे नसल्याचे अनाकलनीय कारण यासाठी देण्यात आले आहे. पक्षनेत्यांची बैठक महापौर मुक्ता टिळक यांच्या अध्यक्षतेखाली आज बुधवारी महापौर कार्यालयात झाली. त्यात हा निर्णय घेण्यात आला.

माता रमाई योजना, बाबा आमटे योजना अशी त्यांची नावे आहेत. निराधार महिला, अपंग, गतीमंद अशांना त्यातून आर्थिक मदत देण्यात येत असते. अनेक गरजूंना या योजनेचा उपयोग झाला आहे.
सुमारे १५ कोटी रुपये या योजनांसाठी लागतात. तशी तरतूदही अंदाजपत्रकात केली जाते. मागील वर्षी मात्र प्रशासनाने फक्त ५ कोटी रूपयांचीच तरतूद केली होती. आता आर्थिक वर्ष संपण्यास अवघे दोन महिने शिल्लक असताना प्रशासनाने योजना बंद करण्याचा प्रस्ताव दिला व त्याला सत्ताधारी भाजपाने मान्यताही दिली.

सभागृह नेते श्रीनाथ भिमाले, राष्ट्रवादी काँग्रेसचे विरोधी पक्षनेते चेतन तुपे, माजी महापौर प्रशांत जगताप, मनसेचे वसंत मोरे, शिवसेनेचे संजय भोसले आदी बैठकीला उपस्थित होते.
महापालिकेच्या वतीने गेली अनेक वर्षे या योजना राबवल्या जात आहे.
बैठकीत राष्ट्रवादी काँगेसने योजना बंद करण्याला विरोध केला. मात्र अन्य पक्षांच्या पाठिंब्याअभावी ते एकटे पडले. किमान जे अर्ज आले आहेत त्यांची छाननी करावी व त्यांना तरी मदत करावी अशी मागणी करण्यात आली. २७ हजार अर्ज आले असल्याची माहितीही यावेळी देण्यात आली. मात्र ते अमान्य करण्यात आले. उलट या योजनांसाठी ठेवलेली ५ कोटी रुपयांची तरतूदही दुसऱ्या योजनेसाठी वर्ग करण्याला मान्यता देण्यात आली. कोट्यवधी रुपयांच्या जादा दराच्या निविदांना सहज मंजूरी देणाऱ्या सत्ताधाऱ्यांकडून उपेक्षित समाजघटकांवर होणारा हा अन्याय खेदजनक आहे, असे याविषयी बोलताना तुपे यांनी सांगितले. २७ हजार अर्जदारांच्या तोंडाला पाने पुसण्याचा हा प्रकार असल्याची टीका त्यानी केली.