–    आयटी क्षेत्रातील टीमचा चित्रपट क्षेत्रात वेगळा ठसा

ड्रीमबुक प्रॉडक्शन्सने वेदार्थ क्रिएशन्सच्या मदतीने तयार केलेल्या मराठी चित्रपट ‘मंत्र’ ने यंदाच्या राज्य चित्रपट पुरस्कार सोहळ्यात आपला ठसा उमटविला. राज्य पुरस्कारामध्ये सामाजिक विषय सर्वोत्कृष्ट चित्रपट पुरस्कारासाठी निर्माता संजय काटकर, दिग्दर्शक हर्षवर्धन आणि सर्वोत्कृष्ट सहायक अभिनेता म्हणून शुभंकर एकबोटे यांना पुरस्कार देण्यात आले.

‘माणूस फक्त पैशासाठी काम करत नाही, तर त्या कामात तो समाधान शोधतो’ हे  चित्रपटातील वाक्य ‘मंत्र’ च्या निर्माते आणि दिग्दर्शकांना तंतोतंत लागू पडते. आय.टी क्षेत्रात काम करत असतानाच चित्रपटाची निर्माण प्रक्रियाही त्यांना आकर्षित करत होती. त्यामुळेच दोनेक वर्षात या क्षेत्रात लागणाऱ्या तांत्रिक बाजूंचे कौशल्य अवगत करून वेदार्थ क्रिएशन्सच्या देवेंद्र शिंदे, रजनीश कलावंत, सचिन पंडित यांनी  संगीतकार विश्वजित जोशी यांच्या बरोबर  ‘मंत्र’ ची योजना करून ती  ड्रीमबुक प्रोडक्शन्सच्या संजय काटकर यांच्यापुढे मांडली. विषयाचं वेगळेपण भावल्यान त्यांनीही या चित्रपटाच्या निर्मिती बरोबरच मार्केटींग आणि सादरीकरणाची जबाबदारी घेतली.

निर्माते, दिग्दर्शक यांच्या बरोबरच मुख्य भूमिका करणारा सौरभ गोगटे या सर्व IT मधील लोकांचा ‘मंत्र’ हा पहिलाच चित्रपट, पण पुणे आंतरराष्ट्रीय चित्रपट महोत्सव, संस्कृती कलादर्पण मागोमाग महाराष्ट्र राज्य चित्रपट पुरस्कारातही जाणकारांच्या प्रशंसेस पात्र ठरला हे या टीमच्या प्रयत्नांचे यश आहे. याच महिन्यात जर्मनीमध्ये होणाऱ्या मराठी चित्रपट उत्सवासाठीही  ‘मंत्र’ ची निवड केली आहे.  

  देव आणि धर्म या विषयावर भाष्य करणं हे आजच्या काळात खूपच धाडसाचे काम आहे. पण हा  अत्यंत संवेदनशील विषय ‘मंत्र’ या चित्रपटात फारच संतुलितपणे मांडण्यात आला आहे. एका पुरोहिताचा मुलगा पैशासाठी वडिलांचा पेशा स्वीकारतो पण जेव्हा त्याच्या आयुष्यात कर्मकांडाला न मानणारी मुलगी येते तेव्हा ‘मंत्र’ची कथा घडते. प्रेक्षकांना, समीक्षकांना आणि वेगवेगळ्या महोत्सवातील तज्ज्ञ परीक्षकानांही चित्रपटाचा विषय, त्याची मांडणी आणि लेखकान मांडलेल्या तर्कशुद्ध विचारांनी प्रभावित केले आहे. खर तर लेखानाप्रमाणेच या चित्रपटातील सर्वच कलाकारांच्या अभिनयालाही सर्वत्र दाद मिळते आहे. पदमश्री मनोज जोशी, दीप्ती देवी, पुष्कराज चीरपुटकर, सिद्धेश्वर झाडबुके, सुनील अभ्यंकर यांच्या बरोबरच अनेक नव्या चेहर्यांनी कमाल केली आहे. सनी आंबवणे हे पात्र रंगवणारा शुभंकर एकबोटे हा दिवंगत अभिनेत्री अश्विनी एकबोटे यांचा मुलगा. त्याचा अभिनय आईसारखाच नैसर्गिक वाटतो. एकंदर या IT मधल्या तज्ज्ञ लोकांकडून भावी काळातही चांगला content तयार होण्याची अपेक्षा ठेवायला हरकत नाही.

–    उन्हाळ्याच्या सुट्टीत धम्माल मस्ती करण्यासाठी बच्चेकंपनीला ‘वायू’ चे निमंत्रण

एक कोवळं रोपटं…त्याच्या जागेवर आनंदाने‌ डोलणारं….अचानक उपटून दुसरीकडे पेरलं तर काय होईल त्याचं ?  कोल्हापूरात आपल्या घरात.. अंगणात…मित्रांमध्ये…रमलेला हा मुलगा..”.वायू “….. त्याला अचानक उचलून‌ मुंबईत आणलं आई-बाबांनी…. गोंधळलेल्या… घुसमटलेल्या वायूच्या मनांत आलेला हा वैताग…श्या… कुठे येऊन पडलो यार….श्या…!!

उन्हाळ्याची सुट्टी म्हणजे लहान मुलांसाठी धम्माल, मस्ती करण्याची पर्वणीच.सुट्ट्यांमध्ये लहान मुले मनसोक्त खेळतातआणिबागडतात. अशातच त्यांच्या सुट्ट्या अधिक रंगतदार करण्यासाठी दिग्दर्शक विजू माने घेऊन आले आहेत बालचित्रपट ‘मंकी बात’. नुकतेच या चित्रपटातील श्या… कुठे येऊन पडलो यार….श्या…!! हे गाणे रिलीज झाले असून हे गाणे अल्पावधीत मुलांच्या मनात घर करण्यात यशस्वी ठरले आहे.

जरा काही आवडेनासं झाला  की “श्या…” म्हणत कंठ काढताना आपण लहान मुलांना बघितले असेलच.‘मंकी बात’ मधील वायू मुंबई शहरात येण्यापूर्वी मस्त कोल्हापुराला राहायचा.तेथीलजिवलग मित्रांचा सहवास आणि सोबतीला नदी, दऱ्या, डोंगर होता, या सर्व गोष्टीत तो रमून जायचा. नयनरम्य निसर्ग आणि बागडण्यासाठी त्याला पूर्ण रानं मोकळ होते.शहरात आल्यानंतर मात्र मर्यादित जागेचं आयुष्य त्याला आवडेनासं झाले. त्याचाशी कुणी लवकर गट्टी करेना, कुणी सोबत खेळू देईना. शिवाय शाळेतही जीवाला खाणारा एकटेपणा आहेच यामुळे वायू म्हणतोय ‘श्या… कुठे येऊन पडलो यार…..!!

प्रसिद्ध दिग्दर्शक विजू माने यांची  ‘मंकी बात’ हि कलाकृती लहान मुलांसाठी उन्हाळ्याच्या सुट्ट्यामधली खास मेजवानी ठरणार आहे. निष्ठा प्रॉडक्शन्स निर्मित या चित्रपटाची प्रस्तुती आकाश पेंढारकर, विनोद सातव, अभय ठाकूर, प्रसादा चव्हाण, शंकर कोंडे यांची असून विवेक डी, रश्मी करंबेळकर, मंदार टिल्लू आणि विजू माने निर्माते आहेत. चित्रपटाची गीते आणि संवाद  संदीप खरे यांचे तर  संगीत डॉ. सलील कुलकर्णी यांनी दिले आहे.  ‘मंकी बात’ मध्ये बाल कलाकार वेदांत, पुष्कर श्रोत्री आणि भार्गवी चिरमुले प्रमुख भूमिकेत आहेत.चित्रपटाची कथा महेंद्र कदम आणि विजू माने यांची आहे. खास बच्चेकंपनीसाठी उन्हाळ्याच्या सुट्टीत येणारा हा चित्रपट येत्या १८ मी रोजी संपूर्ण महाराष्ट्रात प्रदर्शित होणार आहे.

‘लय भारी’, ‘येरे येरे पैसा’ अशा गाजलेल्या चित्रपटांचे आणि ‘व्यक्ती आणि वल्ली’, ‘सौजन्याची ऐशी तैशी’, ‘शांतेचं कार्ट चालू आहे’ या लोकप्रिय नाटकांचे ‘निर्माते अमेय विनोद खोपकर याची कलारसिकांना वेगळी ओळख करून द्यायला नको. आता त्यांची निर्मिती संस्था अमेय विनोद खोपकर (एव्हीके) एंटरटेन्मेंट  युट्युब चॅनल क्षेत्रात पदार्पण करत असून त्यांच्या पहिल्या व्हिडीओचे वैशिष्टे म्हणजे कोणत्याही वाद्याविना तयार झालेले मराठी गाणे, या व्हिडीओ मध्ये दिग्गज अभिनेते, अभिनेत्री, गायक, संगीतकारांसह तब्बल ६४ कलावंताचा समावेश आहे. हा व्हिडीओ सोशल मीडियावर मोठ्या प्रमाणावर व्हायरल झाला असून बॉलीवूडचे महानायक ‘बिग बी’ अमिताभ बच्चन यांनी हा व्हिडीओ शेअर करून शुभेच्छा दिल्या आहेत.

चित्रपट निर्मिती क्षेत्रात वेगळा ठसा उमटविलेल्या एव्हीके एंटरटेन्मेंटच्या या पहिल्या युट्युब व्हिडीओची खासियत म्हणजे यामध्ये गाणे आहे मात्र स्वरवाद्य, तालवाद्य, तंतुवाद्य अशा कुठल्याही वाद्याचा यात वापर करण्यात आलेला नाही. हा संगीत प्रकार ‘आकापेला’ नावाने प्रसिध्द आहे. हरिहरन, सोनू निगम, अवधूत गुप्ते, कौशल इनामदार, स्वप्नील बांदोडकर, वैशाली सामंत, सुदेश भोसले आदी दिग्गज गायक कलाकारांनी मराठी मधील अजरामर अशा  गाण्यांचे ‘मेडले’ केले आहे. यामध्ये black & white सिनेमा ते २०१८ सालच्या गाण्यांचा समावेश आहे.

दरम्यान, या व्हिडीओ मध्ये विक्रम गोखले, अशोक सराफ, महेश मांजरेकर, भरत जाधव,  स्वप्नील जोशी, सचिन पिळगावकर, महेश कोठारे, सचिन खेडेकर, फुलवा खामकर, केदार शिंदे, अभिनय देव, मकरंद अनासपुरे, विक्रम फडणीस, मृणाल कुलकर्णी, पुष्कर श्रोत्री, रामदास पाध्ये, अतुल परचुरे, जितेंद्र जोशी, अजित परब, संजय जाधव, मंगेश देसाई, अनिकेत विश्वासराव, सोनाली खरे, विनोद कांबळी, किशोरी शहाणे, रिंकू राजगुरू, आकाश ठोसर, अभिनय बेर्डे, सायली संजीव, क्रांती रेडकर, दिपाली विचारे, आयान पटेल, मानसी नाईक, अभिनित पानसे, सचिन कुंभार, आदिनाथ कोठारे, प्राजक्ता माळी, मधुरा वेलणकर,नीलिमा कुलकर्णी, साहिल जोशी, चारू देसाई,चेतन शाशिथल,अमोल परचुरे, सौमित्र पोटे, जयंती वाघधरे, प्रेरणा जंगम,  विशाल इनामदार, बालकलाकार मृणाल जाधव, इशान खोपकर, तृष्णीका, स्नेहा चव्हाण, आदीसह मराठीतील अनेक सुप्रसिद्ध कलाकार झळकले आहेत. थोडक्यात सांगायचे तर  प्रेक्षकांना मंत्रमुग्ध  करेल असे वैविध्यपूर्ण गाण्यांचे मिश्रण आपणास या आकापेले संगीत प्रकारातील पहिल्या मराठी व्हिडीओ सॉंग मध्ये अनुभवायला मिळते.

अमेय विनोद खोपकर एंटरटेन्मेंटने विक्रांत स्टुडीओच्या सहयोगाने प्रस्तुत केलेल्या या व्हिडीओची निर्मिती स्वाती खोपकर यांनी केली असून सुभाष काळे हे सहनिर्माते आहेत. विनय प्रतापराव देशमुख याची संकल्पना आणि दिग्दर्शन असलेल्या या व्हिडिओला रुपाली मोघे आणि शाम्प्रद भामरे यांनी संगीत दिले, तर राहुल भातनकर यांनी संकलन आणि निखील गुल्हाने यांनी छायांकन केले आहे.  निनाद बत्तीन आणि तबरेज पटेल यांनी एव्हीके एंटरटेन्मेंटचे  व्यवसाय प्रमुख म्हणून जबाबदारी सांभाळली आहे.