पुणे  :-  दैनंदिन आयुष्य जगत असताना विद्यार्थ्यांना पुस्तकी ज्ञानासोबत प्रात्यक्षिक ज्ञान उपयोगी पडत असते. प्रात्यक्षिक ज्ञानामुळे विद्यार्थ्यांना जगाची माहिती अधिक मिळते आणि हीच माहिती त्यांना जीवन जगण्यास उपयुक्त ठरते. त्यामुळे पुस्तकी ज्ञानासोबतच  प्रात्यक्षिक ज्ञान विद्यार्थ्यांना देणे अधिक आवश्यक आहे. शाळेत मिळालेल्या या ज्ञानाच्या आधारे ते नवीन तंत्रज्ञान आत्मसात करून त्यातून समाजात नवे परिवर्तन घडवून आणू शकतील. शिक्षणाची गंगोत्री गावोगाव पोहचवून देशाच्या विकासात आम्हीही खारीचा वाटा उचलू असे ही ते यावेळी म्हणाले. अशी भावना बजाज ऑटोच्या सीएसआर विभागाचे सल्लागार  सी. पी. त्रिपाठी यांनी व्यक्त केली.

पुणे राऊंड टेबल १५ ,बजाज ऑटो आणि साने गुरुजी शिक्षण संस्था यांच्या विद्यमाने

वडकी येथील नूतन माध्यमिक विद्यालयाच्या विस्तारित इमारतीचे  उद्घाटन  त्यांच्या हस्ते झाले. त्या प्रसंगी ते बोलत होते.

यावेळी पुणे राऊंड टेबल १५ चे अध्यक्ष देवेश जतिया, विरोधी पक्षनेते  व साने गुरुजी शिक्षण संस्थाचे अध्यक्ष चेतन तुपे, राऊंड टेबल इंडिया राष्ट्रीय खजिनदार अक्षय दुगर , राऊंड टेबल इंडियाचे राष्ट्रीय समन्वयक मोर्य फिलीप   , सरपंच,मुख्याध्यापक व समस्त शिक्षक याप्रसंगी उपस्थित होते.

वडकी येथील नूतन माध्यमिक विद्यालयाच्या ७ वर्गांचे नूतनीकरण आणि ४ नवीन वर्ग तयार  करण्यात आले असल्यामुळे याचा फायदा २०० हुन अधिक मुलांना होणार आहे.
प्रत्येक मुलाला शिक्षण मिळवण्याचा अधिकार आहे त्यामुळेच आपल्या देशाचे भविष्य घडवणाऱ्या या पिढीला ते मिळवून देणे आमचे कर्तव्य आहे. आमच्या राऊंड टेबल इंडियच्या ( “शिक्षणाच्या माध्यमातून स्वातंत्र्य”( “Freedom Through Education या संकल्पनेअंतर्गत ज्या शाळांना पायाभूत सुविधा,ग्रंथालय, विज्ञान प्रयोगशाळा, पुस्तके, स्टेशनरी असे जे काही आवश्यक आहे ते देण्यासाठी आम्ही कटीबद्ध आहोत. गरीब होतकरू विद्यार्थ्यांना शिक्षणाचा लाभ मिळावा यासाठी  अधिकाधिक लोकांनी पुढे येणे गरजेचे आहे. यामुळे जास्तीत जास्त मुलांना शिक्षणाच्या मुख्य प्रवाहात आणता येणे शक्य होईल. असे देवेश जातिया म्हणाले .

ग्रामीण भागातील मुलांना चांगले शिक्षण मिळावे हे आमच्या संस्थेचे उदिष्ठ आहे. या माध्यमातून या मुलांना आधुनिक जगाशी जोडण्याचा प्रयत्न आम्ही साने गुरुजी शिक्षण संस्थेच्या माध्यमातून करत आहोत असे मनोगत चेतन तुपे यांनी मांडले.

मुंबई:-मार्च-2018 अखेर राज्यात कृषीपंपांच्या वीजजोडणीसाठी पैसे भरून प्रलंबित असणाऱ्या 2 लाख 49 हजार 358 शेतकऱ्यांना उच्चदाब वीज वितरण प्रणालीव्दारे (हाय व्होल्टेज डिस्ट्रीब्युशन सिस्टीम) वीजजोडणी देण्यात येणार आहे. कृषीपंपांच्या वीजजोडणीसाठी अर्ज केलेल्या शेतकऱ्यांपैकी 1 लाख 65 हजार 456 शेतकऱ्यांनी आपल्या मोबाईल क्रमांकाची नोंदणी केलेली असून उर्वरित 83 हजार 902 शेतकऱ्यांनी आपल्या मोबाईल क्रमांकाची नोंदणी महावितरणकडे करावी, असे आवाहन करण्यात येत आहे.

महावितरणव्दारे सर्वच प्रकारच्या ग्राहकांना नवीन वीजजोडणी, वीजजोडणीची सद्यस्थ‍िती, वीजबिल व वीजबिलांचा भरणा, वीज स्थगीतीची सूचना, मीटर रीडींग इत्यादी एसएमएस ग्राहकांना पाठविण्यात येतात. महावितरणने कृषीपंपाना उच्चदाब वीज वितरण प्रणालीव्दारे वीजजोडणी देण्याबाबतची निविदा प्रक्रिया सुरू केली असून ती अंतिम टप्प्यात आहे. लवकरच या प्रणालीतील कामांना सुरूवात होणार आहे. या प्रणालीतील कामे कोणत्या टप्प्यात आहेत तसेच कृषीपंपाना वीजजोडणी देण्याबाबतची सद्यस्थिती काय आहे, इत्यादी माहिती शेतकऱ्यांना एसएमएसव्दारे कळविण्यात येईल. त्यामुळे ज्या शेतकऱ्यांनी अद्यापही आपल्या मोबाईल क्रमांकाची नोंदणी महावितरणकडे केलेली नसेल त्यांनी महावितरण मोबाईल ॲप, शाखा कार्यालय किंवा  1800-102-3435/1800-233-3435/1912  या टोलफ्री क्रमांकाशी संपर्क साधून मोबाईल क्रमांकाची नोंदणी करावी.

 सध्याच्या प्रचलित पध्दतीनुसार राज्यातील 40 लाख 68 हजार 220 कृषीपंपांना वीजजोडण्या दिलेल्या असून कृषीपंपांसाठी मोठ्याप्रमाणात विजेचा वापर करण्यात येतो. या पध्दतीमुळे एकाच रोहीत्रावरून 15 ते 20 कृषीपंपांना वीजपुरवठा करण्यात येत असल्याने लघुदाब वाहिनीची लांबी वाढते. लघुदाब वाहिनीची लांबी वाढल्यामुळे कृषीपंपांना कमी दाबाने वीजपुरवठा मिळणे, रोहित्र वारंवार बिघडणे, वीजपुरवठा खंडित होणे, वीजहानी वाढणे, वाहिनीवर आकडे टाकून वीजचोरी करणे अशा अडचणींना सामोरे जावे लागत आहे.

यासर्व अडचणींना कायमचे सोडवून राज्यातील शेतकऱ्यांना चांगल्या दाबाचा अखंडित वीजपुरवठा मिळावा यासाठी या प्रणालीव्दारे कृषीपंपाच्या जागेपर्यंत उच्चदाब वाहिनी उभारण्यात येणर असून त्यांच्या वीजभारानुसार विविध क्षमतेचे (10,16 किंवा 25 एव्हीए) रोहित्र उभारण्यात येणार आहेत. या रोहित्रावरून एक किंवा दोन शेतकऱ्यांनाच वीजजोडणी दिली जाणार असल्यामुळे या प्रणालीचा (एचव्हीडीएस) शेतकऱ्यांना फायदाचं होणार आहे. तरी पैसे भरून प्रलंबित असणाऱ्या शेतकऱ्यांनी आपल्या मोबाईल क्रमांकांची नोंदणी तातडीने करावी, असे आवाहन महावितरणने केले आहे.

पुणे- शहर जिल्हा मातंग समाज व दलित संघटनाच्यावतीने जळगाव येथील मातंग तरुणांची नग्न धिंड व विहीरीमध्ये  पोहल्याने विहीर बाटली म्हणुन मातंग समाजाच्या दोन युवकांची नग्न करुन धिंड काढण्यात आली व त्यांना नग्नावस्थेत बेदम मारहाण करुन त्यांचा व्हीडीओ सोशल मीडियावर प्रसारीत केल्याची घटना जळगाव जिल्ह्यात घडली आहे. या घटनेच्या निषेधार्थ पुणे जिल्हाधिकारी कार्यालयाच्या प्रवेशद्वारावर निदर्शने करण्यात आली . यावेळी मातंग समाजाच्या शिष्टमंडळाने  पुणे जिल्हाधिकारी नवल किशोर राम यांना निवेदन देण्यात आले .

या घटनेतील आरोपीना कठोर शासन करण्याकरिता शासनाने प्रयत्न करून पीडित कुटुंबाचे पुनर्वसन त्वरित करावे , घटनेतील तपासात कसूर केल्याप्रकरणी संबधित पोलीस अधिकाऱ्यांना तात्काळ निलंबित करून अट्रॉसिटी अक्टप्रमाणे गुन्हे दाखल करावेत , महाराष्ट्रातील दलितांवरील वाढलेल्या अन्याय अत्याचाराच्या विरोधात शासनाने कठोर भूमिका घेऊन दलितांवरील अन्याय अत्याचाराचे गुन्हे तात्काळ नोंदवून घेण्याचे पोलीस प्रशासनाला आदेश देण्यात यावेत , सर्वोच्च न्यायालयाच्या निर्देशाने अट्रॉसिटी अक्ट शिथिल करण्यात आला आहे . त्यातील बदल रद्द करून तो कायदा पूर्ववत करण्याकरिता राज्य शासन व केंद्र शासनाने प्रयत्न करावेत . अशा मागण्या निवेदनात मांडण्यात आल्या .

या निर्दशनामध्ये  नगरसेवक अविनाश बागवे , प्रकाश वैराळ , अशोक जगताप , शंकर तडाखे,  मालती अवघडे , भगवानराव वैराट , विष्णू कसबे , विठ्ठल थोरात , शाम देडे , विकास सातारकर , दादासाहेब सोनवणे , वसंतराव साळवे , अंकल सोनवणे , दत्ता जाधव , रवी आरडे , नारायण घोरपडे , सुदीप गायकवाड , संजय शेंडगे , भास्कर नेटके , संतोष घोलप , राकेश लोंढे , संजय भिमाले , राहुल डंबाळे , अमोल तुजारे , अशोक लोखंडे , अनिल हातागळे , सनी सोनवणे , प्रशांत फुले , बाळासाहेब मोहिते , दिनेश सकट , अतिश कापसे , गणेश लांडगे , सचिन इंगळे , सचिन देडे , सचिन पेटाडे , दयाभाऊ अडागळे , शैलेश मोरे , दीपक आवळे , मंगेश जाधव , संतोष कांबळे , सुखदेव वाघमारे , एकनाथ चांदणे , वसंत कांबळे , विनोद सोने , जितेंद्र भोसले , बाळासाहेब आवारे , अश्विन दोडके , रवी मोरे , निलेश वाघमारे , आनंद वैराट , सोमनाथ शिंदे , किशोर धगाटे , गणेश जाधव आदी मान्यवर पदाधिकारी व मोठ्या संख्येने कार्यकर्ते सहभागी झाले होते .

पुणे – जगात अनेक देश हे महाराष्ट्रापेक्षा लोकसंख्येने लहान असूनही तेथील लोक स्थानिक भाषेतच व्यवहार करत आहेत. पण जागतिकीकरणामुळे स्थानिक भाषा. संस्कृतीला धोका निर्माण झाला असून वाढती पिढीही इंग्रजीला बळी पडत आहे हे दुर्दैव आहे. इंग्रजी बोलण्याच्या प्रतिष्ठेपोटी मराठी भाषा बोलण्याचा न्यूनगंड बाळगू नका असे परखड आवाहन तुकाराम महाराजांच्या अभंगांवर पीएचडी करणारे बिशप थॉमस डाबरे यांनी आज येथे केले.

पत्रकार भवन येथे झालेल्या मराठी भाषा संवर्धन प्रतिष्ठानच्यावतीने देण्यात येणा-या “मराठी रत्न पुरस्कार” वितरण समारंभात बिशप डाबरे बोलत होते. अध्यक्षस्थानी माजी आमदार उल्हास पवार होते. ऍस्पयार नॉलेज ऍण्ड स्कील्स प्रा. लिचे अध्यक्ष व व्यवस्थापकीय संचालक संजय गांधी, प्रतिष्ठानचे अध्यक्ष प्रवीण प्र. वाळिंबे आदी मान्यवर व्यासपीठावर उपस्थित होते. यंदाचे मराठी रत्न पुरस्कार चित्रपट विषयक १४ पुस्तके लिहिणारे मधू पोतदार, अनुवादासाठी साहित्य अकादमीचा पुरस्कार मिळालेल्या आणि माहेर मासिकाच्या कार्यकारी संपादिका सुजाता देशमुख आणि मुक्त पत्रकार देवीदास देशपांडे यांनी देण्यात आले. पुणेरी पगडी, पाच हजार रूपये रोख, शाल आणि श्रीफळ असे पुरस्काराचे स्वरूप आहे.

पुणे या विद्येच्या माहेरी, राज्याच्या सांस्कृतिक राजधानीत लोक इंग्रजीतून बोलणेच पसंत करतात अशी खंत व्यक्त करून थॉमस डाबरे म्हणाले, मी पुण्याचा, माझी मातृभाषा मराठी, त्यामुळेच मी तुकारामांचे निवड अभंग संशोधनासाठी निवडले. हे अभंग मी व्हॅटिकनसिटीत पोचवले याचा मला अभिमान आहे. मराठी भाषेतून जे भावतरंग मनात उमटतात, हृदयाला साद घालतात असे तरंग इतर कोणत्याही भाषेतून बोलले तरी उमटत नाहीत. व्यक्ती आणि तिची मातृभाषा यांचा विलक्षण संयोग असून तो व्यक्तीगत अस्मितेचा भाग आहे. मी म्हणजे मराठी भाषा या अस्मितेचं ते प्रकटरूप, मूर्तस्वरूप आहे. त्यामुळे आपण जेथे रहातो तेथे मराठीचाच वापर करू या असे आवाहन त्यांनी शेवटी केले.

उल्हास पवार म्हणाले, माजी पंतप्रधान नरसिंहराव यांना देशातील ९ आणि परदेशी तीन भाषा येत होत्या. त्यांनी ह. ना. आपटे यांच्या कादंबरीचे तेलगू भाषेत अनुवाद केला होता. ते पुस्तक खूपच गाजलं असं खुद्द नरसिंहराव यांनीच कराडच्या मराठी साहित्य संमेलनाच्यावेळी सांगितलं होतं. ट्रान्सलेशन याचा अर्थ एका जीवाचं दुस-या जीवात विलिनीकरण. भाषा ही संस्कृती वृद्धींगत करते, माणसं जोडण्याचं काम करते, एका अर्थी सानेगुरूजींच्या आंतर भारतीच्या निर्माणाचं काम करते. त्यामुळेच इतर भाषेतील पुस्तकांचे मराठीत अनुवाद होतात त्यापेक्षा जास्त समृद्ध मराठी साहित्यांचे अनुवाद हे इतर भाषेत झाले पाहिजेत. मराठी भाषा वृद्धींगत होईल, तिची लोकप्रियताही वाढेल आणि शंभर टक्के जगात पोचेल यात शंका नाही असा विश्वास त्यांनी शेवटी केला. संजय गांधी म्हणाले, आम्ही मुलांना कौशल्य विकासाचे शिक्षण हे मराठी भाषेतूनच देतो. आजपर्यंत महाराष्ट्रातील चाळीस हजार मुलांना असे प्रशिक्षण दिले असून आज मितीला सात हजार मुले ही आयटी कंपन्यांमध्ये लाखातील पॅकेज घेऊन काम करत आहेत. या सर्वांनाच मराठीतूनच आम्ही शिकवतो, कारण इंग्रजीतून त्यांना महिती मिळेल पण ज्ञान मिळणार नाही. सर्वांना मा मातृभाषेतून शिकवले तर मुले लवकर आणि सहजपणे शिकू शकतात असा अनुभव आहे.

यावेळी पुरस्कार्थींच्यावतीने बोलताना सुजाता देशमुख यांनी सांगितले की, भाषा, साहित्य आणि संस्कृती यांचा अन्योन्य संबंध असून दोन संस्कृतीतील संवादाचा भाषा हा सेतू असतो. मधू पोतदार म्हणाले, जगात वीस लाखांपेक्षा जास्त लोक एकच भाषा बोलतात अशा भाषांची संख्या १५ असून त्यात मराठीचा अकरावा नंबर आहे. ही अभिमानाची बाब असूनही आपण वर्षातून एक दिवस मराठी भाषा दिन म्हणून साजरा करून मराठी भाषेला परकं करतोय. मराठी भाषेत संतसाहित्य सारखे चिरंजीव साहित्य असल्याने धोका मराठी भाषेला नाही तर मराठीच्या बोलण्यातून कमी होत चाललेल्या बोली भाषा नष्ट होण्याचा आहे.

मराठी भाषा संवर्धन प्रतिष्ठानचे श्रृती तिवारी, वैष्णवी टिळेकर, तन्मयी मेहेंदळे, सागर बाबर अस्मिता पाठक – राजे, अमोल बोरसे आदींचाही यावेळी गौरव करण्यात आला. कार्यक्रमाची सुरूवात तन्मयी मेहेंदळे यांनी सादर केलेल्या मराठी अभिमान गीताने झाली. कार्यक्रामाचे प्रास्ताविक व सूत्रसंचलन करताना प्रतिष्ठानचे अध्यक्ष वाळिंबे यांनी मराठी भाषा संवर्धनाचे काम सन २००० पासून सुरू असून मराठी स्वाक्षरी करा, पाट्या मराठी लावा यासारख्या लहानलहान उपक्रमातून काम गेली अठरा वर्षे सुरू आहे. मराठी रत्न पुरस्कार म्हणजे मराठी भाषा वृद्धीसाठी यांनी केलेल्या कामासाठी प्रोत्साहन म्हणून दिलेले असल्याचे त्यांनी नमूद केले. शेवटी आभार प्रदर्शन करूणा पाटील यानी केले.