पुणे-मराठा समाजाला ओ बी सी प्रवर्गामध्ये घेण्यास विरोध केला पाहिजे अशी भूमिका ओ बी सी आरक्षणाच्या मुद्यावरती हॉटेल सेंट्रल पार्क येथे झालेल्या बैठकीत मांडण्यात आली .

      या बैठकीमध्ये विविध सामाजिक संघटना , संस्था , तसेच अनेक ओ बी सीवर्ग बांधव मोठ्या संख्येने उपस्थित होते . ओ  बी सी प्रवर्गामध्ये मराठा समाज मागास नसल्या कारणाने समाविष्ट करण्यात येऊ नये . मराठा समाज आर्थिक , सामाजिक,  शैक्षणिक स्तराने जर विचार केला तर मराठा समाज कुठेच मागास नाही तर मग त्यांना ओ बी सी मध्ये समाविष्ट करण्यात येऊ शकत नाही . मराठा समाजामध्ये काही लोक गरीब व बेरोजगार आहेत हि वस्तू स्थिती लक्षात घेता,  त्यांच्यासाठी काही उपक्रम आखले आहेत . त्यांची  परिस्थिती सुधारण्यासाठी आणखी योजना आखण्यात याव्यात . हि मागणी सर्वानुमते मांडण्यात आली .

तमाम महाराष्ट्रातील  ओ बी सी प्रवर्गाला आव्हान केले आहे कि , सामाजिक संस्था , सामाजिक संघटना तसेच वैयक्तिक निवेदने जास्तीत जास्त संख्येने शुक्रवार दि. २९ जून रोजी कौन्सिल हॉलमधील विभागीय आयुक्त कार्यालयात येथे  महाराष्ट्र राज्य मागासवर्ग आयोगाकडे देण्यात यावे . आपल्या अस्तित्वाची लढाई लढण्यासाठी आपले अस्तित्व टिकवून ठेवण्यासाठी हि तमाम ओ बी सी प्रवर्गाला संधी आहे . सर्व ओ बी सी मधील सर्व संघटना , राजकीय पक्ष , संस्था  , मंडळे यांनी  जास्तीत जास्त संख्येने निवेदने घेऊन शुक्रवार दि. २९ जून २०१८ ला उपस्थित राहावे असे आवाहन केले आहे . तसेच , आपले वैयक्तिक निवेदन सादर करू शकता . असे आवाहन करण्यात आले .

मागील ओ बी सी समाजाची वेगवेगळ्या ठिकाणी निवेदने देताना कार्यकर्त्यावर हल्ले झाले त्यासाठी पुण्यात २९ जून २०१८ निवेदन दिले जाणार आहेत . त्यावेळी असे भ्याड हल्ले होऊ नयेत यासाठी पोलीस संरक्षण देण्यात यावे . असे ओ बी सी च्या संघटनांनी मागणी केली आहे .

या बैठकीस कृष्णकांत कुदळे ,माजी नगरसेवक  संदीप लडकत,  मृणाल ढोलेपाटील , सपना माळी , प्रितेश गवळी , रघुनाथ ढोक , प्रदीप बनसोडे , प्रकाश लोंढे , डॉ. पी. बी. कुंभार , राजेंद्र पंडित , सुधीर पाषाणकर , नंदकुमार गोसावी , रमजान शेख , आनंदा कुदळे ,  विठ्लराव सातव , कैलास काठे , सुधीर पैठणकर , सचिन कचरे , ऍड.मंगेश लेंडघर , पंकज गिरमे , चंद्रकांत भुजबळ , प्रा . लक्ष्मण हाके , उमेश कोकरे , राजेंद्र नेवसे , सुरेश रायकर , बंडू कचरे , किरण बारटक्के , अजय मुंडे , रमाकांत दरवडे , दिलीप शेलवंटे , अभिजत भडके , प्रदीप फलटणे आदी मान्यवर उपस्थित होते .

डिजिटल यंत्रणेत सहभागी होण्यासाठी २८०० परवानाधारक टॅक्सीचालक इच्छुक

 पणजी, 27 जून – गोवा पर्यटन विकास महामंडळाचे (जीटीडीसी) टॅक्सी अप ‘गोवामाइल्स’ पुढील महिन्यात लाँच होण्यासाठी सज्ज झाले आहे. सध्या हे अप प्रत्यक्ष परिस्थितीत चाचणी घेण्याच्या अंतिम टप्प्यावर आहे. गोव्यातील २८०० टॅक्सी चालकांनी हे अप वापरण्यात रस दाखवला असून प्रवाशांकडून येणआरी मागणी वाढल्यानंतर चालकांच्या संख्येतही वाढ होम्याची दाट शक्यता आहे. हा प्रकल्प प्रवासाचे सोयीस्कर साधन मिळवू इच्छिणाऱ्यांसाठी मोठा दिलासा देणारा आहे.

पर्यटन मंत्री श्री. मनोहर आजगांवकर म्हणाले, ‘गोव्यातील टॅक्सी सेवेवर आधारित अपचे लाँच टॅक्सी चालक, पर्यचक आणि स्थानिक अशा सर्व भागधारकांसाठी वाहतूक व्यवस्थेमध्ये क्रांतीकारी बदल आणणार आहे. मला खात्री आहे, की गोव्यातील सर्व पर्यटक टॅक्सी चालक या डिजिटल यंत्रणेमध्ये सहभागी होतील म्हणजे गोवा राज्य अशाप्रकारची सेवा यशस्वीपणे कार्यरत    असलेल्या इतर राज्यांच्या मागे पडणार नाही.’

 गोवा पर्यटन विकास महामंडळाचे (जीटीडीसी) माननीय अध्यक्ष श्री. निलेश काब्राल म्हणाले, ‘गोव्यातील एक दशलक्ष लोकांपर्यंत पोहोचून त्यांना गोवामाइल्स या टॅक्सी अपची माहिती देण्यासाठी  आम्ही सार्वजनिक माहिती अभियान राबवणार आहोत. सर्वसामान्य लोकांकडून आम्हाला उदंड प्रतिसादाची अपेक्षा असून ते हे अप पर्यटन कारणांसाठी डाउनलोड करतील तसेच दैनंदिन प्रवासासाठी वापरतील अशी खात्री आहे.’

 श्री. काब्राल म्हणाले, ‘अपवर आधारित ही टॅक्सी सेवा डिजिटल अर्थव्यवस्थेला चालना देईल, पर्यटकांसाठी प्रवास सोपा करेल, तर टॅक्सीचालकांना चांगले उत्पन्न देईल. या उपक्रमामुळे ग्राहकांना पूर्णपणे नवा अनुभव मिळेलच, शिवाय टॅक्सीचे भाडे भरणे सोपे व सुरक्षित होईल,’  असे ते पुढे म्हणाले. त्यांनी पुढे असेही सांगितले की हे पहिले असे अप आहे, जे स्थानिक गोवन टॅक्सी चालकांच्या खिशावर कोणताही परिणाम करत नाही व ते अतिशय वेगवान आणि सोयीस्कर पद्धतीने राबवले जाते. यातून त्यांनाही या डिजिटल यंत्रणेमध्ये भागीधारक बनून पर्यटकांना चांगला ग्राहकानुभव देता येतो.

 उत्कर्ष दाभाडे, व्यवस्थापकीय संचालक, गोवामाइल्स म्हणाले, ‘गोवामाइल्स प्रवाशांना परवानाधारक, व्यावसायिक टॅक्सी चालक मिळवून देण्यासाठी मदत करते. त्यांना आपण कशाचे पैसे भरत आहोत याची कल्पना येते आणि मोबाइल अपद्वारे कॅब कुठे जात आहे हे पाहाता येते. गोवामाइल्स सध्याच्या टॅक्सी कंपन्यांशी भागिदारी करून आणि त्यांच्यासोबत काम करून चालकांना जास्त ग्राहक मिळवून देण्यासाठी मदत करेल.’

 गोवामाइल्स हे प्रवाशांना अँड्रॉइड आणि आयओएस प्लॅटफॉर्मद्वारे मोफत डाउनलोड करता येणार आहे. प्रवाशाने टॅक्सीची विनंती केल्यानंतर सर्वात जवळची टॅक्सी ठिकाण पाहिल आणि पिकअप तसेच येण्याची वेळ निश्चित करेल. त्याचबरोबर यामध्ये ‘लास्ट ड्रायव्हर’ नावाचे वैशिष्ट्य आहे, ज्याच्या मदतीने प्रवाशांना तातडीने चालकांशी कनेक्ट करता येते आणि टॅक्सीमध्ये राहिलेल्या वस्तू लगेचच मिळवता येतात.

 गोवामाइल्स प्रवाशांना अशी सोय देणार आहे, जी त्यांना यापूर्वी कधीच गोव्यात मिळालेली नाही – ती म्हणजे त्यांच्या राइडला श्रेणी देण्याची सोय. जर चालकाला सातत्याने चांगली श्रेणी मिळत असेल, तर त्याला चांगला व्यवसाय मिळेल. ‘गोवामाइल्सच्या प्रवाशांना सर्वोत्तम परवानाधारक आणि नियंत्रित चालकांद्वारे सेवा मिळवून देण्याची खात्री आम्हाला करायची आहे,’ असे काब्राल म्हणाले. ‘ग्राहकांना श्रेणी देण्याची सुविधा मिळआल्याने चालकही त्यांची सेवा उंचावतील. ग्राहकांना त्यांचा आवाज मिळेल आणि यामुळे एकंदरीतच टॅक्सी व्यवसाय सुधारेल.’

 गोवामाइल्स राज्यभरातील टॅक्सीचा जास्तीत जास्त वापर करून ज्या ठिकाणी सेवा मिळत नाही तेथेही सेवा प्रचलित करणार आहे आणि अधिक भाडे मिळवण्यासाठी चालकांना अंदाज लावत बसावे लागते, ते होणार नाही. गोवामाइल्स प्रवाशांना चालकांशी ते कुठेही म्हणजे समुद्रकिनाऱ्यावर, शहराच्या मध्यभागी किंवा अपरिचित ठिकाणी असले, तरी त्यांच्याशी कनेक्ट करण्याची सुविधा पुरवेल.

 चालकांकडून गोवामाइल्स मॉडेलचा अवलंब

शेकडो टॅक्सी चालकांनी गोवामाइल्स ड्रायव्हर उपक्रमात रस दाखवला आहे. गोवामाइल्स टीम चालकांना हे गोवामाइल्स ड्रायव्हर अप सर्वोत्तम पद्धतीने कसे वापरावे हे शिकवण्यासाठी सत्रांचे आयोजन करणार असून त्यात जनतेला चांगली सेवा कशी द्यावी आणि जास्त व्यवसाय कसा मिळवावा याचे प्रशिक्षण देणार आहे. व्यावसायिक चालक नेहमीच्या केवायसी फॉरमॅलिटीजसह गोवामाइल्स आजमावून पाहू शकतील आणि काही मिनिटांतच सेवा सुरू करू शकतील. त्यानंतर चालकांना अमर्यादित गोवामाइल्स पिकअप्स मिळतील व ते थांबेपर्यंत ही सेवा सुरूच राहील.

 चालकांना शिष्टाचार, पर्यटन स्थळांची माहिती, प्राथमोपचार किट, गोव्याची संस्कृती आणि परंपरेची माहिती इत्यादींचे प्रशिक्षण दिले जाणार आहे, ज्यामुळे त्यांना गोवा टुरिझमचे ब्रँड अम्बेसिडर म्हणून वावरता येईल. जीटीडीसी टॅक्सी चालकांच्या कुटुंबांसाठी आरोग्य विमा आणि शिष्यवृत्ती योजनाही सुरू करणार असून सर्वोत्तम श्रेणी मिळालेल्या चालकांना दर महिन्याला रोख बक्षिस दिले जाणार आहे.

औरंगाबाद– ‘करिअरच्या नव्या दिशा’ (शासकीय अभ्यासक्रमांची ओळख) हे पुस्तक ज्ञानाचा खजिना आहे. जीवनात यशस्वी होण्यासाठी ज्ञान आणि कौशल्य महत्त्वपूर्ण असते. या पुस्तकातून ते एकत्रित मिळाल्याने हा ज्ञानाचा खजिना सर्वांसाठी खुला झाल्याचे विभागीय आयुक्त डॉ. पुरूषोत्तम भापकर आज म्हणाले.
डॉ. भापकर यांच्याहस्ते समता दिनाचे औचित्य साधून ‘करिअरच्या नव्या दिशा’चे प्रकाशन झाले. यावेळी विभागीय आयुक्त डॉ. भापकर बोलत होते. यावेळी उपायुक्त वर्षा ठाकूर, महेंद्र हरपाळकर, सूर्यकांत हजारे, पारस बोथरा, साधना सावरकर, सरिता सूत्रावे, उपजिल्हाधिकारी मृणालिनी सावंत-निंबाळकर, पुस्तकाचे लेखक तथा संचालक (माहिती) देवेंद्र भुजबळ, प्रकाशक विद्या बुक पब्लिशर्सचे शशीकांत पिंपळापुरे यांची उपस्थिती होती.
डॉ. भापकर म्हणाले, भारतीय संविधानाला समता प्रस्थापित होणे अभिप्रेत आहे. वंचित घटकांना विकासाच्या प्रवाहात आणल्यास समता प्रस्थापित होण्यास मदत होते. ज्ञान आणि कौशल्य शिक्षणातून बळ मिळते. हे बळ देण्याचे कार्य या ‘करिअरच्या नव्या दिशा’ यातून होणार आहे. ग्रामीण स्तरावरील, शहरी भागातील तरुणांना या पुस्तकाच्या वाचनातून प्रगत जीवन जगण्यासाठी आवश्यक असणारी यशाची गुरूकिल्ली यातून सापडणार आहे. स्वत:मधील क्षमता, आवड ओळखून शासनाच्या विविध रोजगाराभिमुख, कौशल्यावर आधारीत महत्त्वपूर्ण अभ्यासक्रमांची, संकेतस्थळांची माहिती होऊन जीवनात यशस्वी होण्यासाठी फायदेशीर ठरणार आहे.
मराठवाडा विभागातून ‘स्कील इंडिया’ अंतर्गत एकच लक्ष दशलक्ष युवकांना रोजगाराभिमुख बनविण्याचा  मानस आहे. या उपक्रमाला या पुस्तकाच्या माध्यमातून बळ मिळणार आहे. अत्यंत माहितीपूर्ण, संशोधनपूर्ण अशा या पुस्तक निर्मिती व लेखनाबद्दल श्री. भुजबळ, श्री. पिंपळापुरे यांचे कौतुक व अभिनंदन. राज्यातील तरुणांना ‘करिअरच्या नव्या दिशा’ दिशादर्शक ठरेल, असा विश्वासही डॉ. भापकर यांनी व्यक्त केला.
सुरुवातीला श्री. भुजबळ यांनी पुस्तक लेखनामागील भूमिका विषद केली. यामध्ये त्यांनी महाराष्ट्रात राष्ट्रीय स्तरावरच्या संस्था, अभ्यासक्रम आहेत. मात्र, इंग्रजी ज्ञानाच्या अभावामुळे देशातील महत्त्वपूर्ण अशा रोजगाराभिमुख कोर्सेसची माहिती मराठी भाषक तरुणांना समजणे अवघड जाते. म्हणून शासनाच्या महान्यूज वेब पोर्टलवर ‘करिअरनामा’ सदरातून याबाबत लेखन केले. संबंधित लेखनास वाचकांचा भरपूर प्रतिसाद मिळाला. तज्ज्ञांनी या सदरातील लेखन पुस्तक स्वरूपात यावे, अशी अपेक्षा व्यक्त केली. प्रकाशक पिंपळापुरे यांच्या माध्यमातून ती पूर्ण झाली. पारंपरिक शिक्षणापेक्षाही इतर कोर्सेस करून आपण जीवनात यशस्वी होऊ शकतो, हे या पुस्तकातून सांगण्याचा प्रयत्न असल्याचेही श्री. भुजबळ म्हणाले.