पुणे : गोव्यातून पुण्यात आलेल्या सनबर्न फेस्टिव्हलला आता संभाजी ब्रिगेडने देखील आपला विरोध दर्शवला आहे. दोन वर्षांपासून पुण्यात होत असलेल्या सनबर्न फेस्टिव्हल हा दारूड्या संस्कृतीचा व अमली पदार्थांचा खुला बाजार आहे, असे म्हणत संभाजी ब्रिगेडकडून विरोध करण्यात आला आहे.
अनेक वर्षांपासून डिसेंबरमध्ये गोव्यात होणारा सनबर्न फेस्टिव्हल गेल्या दोन वर्षांपासून पुण्यात होत आहे. पुण्यात हा फेस्टिव्हल सुरू झाल्यापासून वादात सापडला आहे. पुण्यात पहिल्या वर्षी हा फेस्टिव्हल केसनंद येथे झाला होता. त्या वेळी टेकडी फोडून रस्ता तयार केल्याचा आरोप करण्यात आला होता. दुसऱ्या वर्षी हा फेस्टिव्हल पिंपरी-चिंचवड येथे भरविण्यात आला होता.
सनबर्न फेस्टिव्हलला वेळेची मर्यादा नसते; मात्र शिवजयंती, दहीहंडी, गणपती उत्सव, नवरात्रोत्सव कायद्याचा बडगा दाखवून रात्री १० वाजता बंद केले जातात. सनबर्न फेस्टिव्हलला आर्थिक गणिते बघून रात्रभर चालवण्यास परवानगी दिली जाते. सनबर्न फेस्टिव्हलमध्ये रात्रभर अमली पदार्थांचे प्रचंड सेवन होते. यामुळे तरुण पिढीवर प्रचंड वाईट परिणाम होतात. या वाईट संस्कृतीमुळे गुन्ह्यांचे प्रमाण वाढते आहे. रात्रभर तरुण मुले-मुली दारू पिऊन व अमली पदार्थांचे सेवन करून दररोज धिंगाणा घालत फिरतात.
समता, समानता व बंधुता प्रस्थापित करणारे व महाराष्ट्राला चांगली दिशा देणारे शहर आहे. पुणे जिजाऊ-शिवरायांचे, महात्मा फुले व जेधे-जवळकरांचे पुरोगामी शहर आहे. शिक्षणाचे हब असून सर्व धर्मांची संस्कृती जपणारे शहर आहे. याच पुण्यात हा धर्मद्रोही उत्सव चालणार नाही, असे ब्रिगेडकडून ठणकावून सांगण्यात आले आहे. तसेच, प्रशासनाने या फेस्टिव्हलला परवानगी नाकारावी, अशी मागणीदेखील करण्यात आली आहे.
सनबर्न फेस्टिव्हल हा पाश्चिमात्य संस्कृतीचे समर्थन करणारा तसेच या फेस्टिव्हलमध्ये अमली पदार्थांचे सेवन केले जाते, असा आरोप याआधी हिंदू जनजागृती समितीकडून गेली दोन वर्षे करण्यात आला आहे. आता संभाजी ब्रिगेडनेसुद्धा या फेस्टिव्हलला विरोध दर्शविला आहे. सनबर्न फेस्टिव्हल हा दारूड्या संस्कृतीचा व अमली पदार्थांचा खुला बाजार आहे. हा सरकार पुरस्कृत अश्लील पाश्चात्त्य संस्कृतीचा नंगा नाच, अशी टीका संभाजी ब्रिगेडकडून करण्यात येत आहे.

शरद पवारांच्या वाढदिवसानिमित्त 14 डिसेंबरपर्यंत कलाप्रदर्शन

कलाकृतींच्या विक्रीतून येणाऱ्या पैशांतील 50 टक्के रक्कम दुष्काळग्रस्त शेतकऱ्यांच्या मुलांच्या शिक्षणासाठी देणार

शरद कला क्रीडा प्रतिष्ठान पुणे आणि अक्षय शिंदे फाउंडेशन यांच्या वतीने कलाप्रदर्शनाचे आयोजन

पुणे : राष्ट्रवादी काँग्रेसचे संस्थापक अध्यक्ष व माजी केंद्रीय कृषी मंत्री शरद पवार यांना 78 व्या वाढदिवसानिमित्त 12 चित्रकार व शिल्पकारांनी अनोखी भेट दिली आहे. त्यांच्या कलाकृतींचे प्रदर्शन पुण्यातील बालगंधर्व रंगमंदिर कलादालनात भरविण्यात आले आहे. त्यांच्या कलाकृतींच्या विक्रीतून येणाऱ्या पैशांतील 50 टक्के रक्कम दुष्काळग्रस्त शेतकऱ्यांच्या मुलांच्या शिक्षणासाठी देण्यात येणार असून हीच पवारांना वाढदिवसाची खास भेट असणार आहे.

शरद कला क्रीडा प्रतिष्ठान पुणे आणि अक्षय शिंदे फाउंडेशनच्या यांच्या वतीने या कलाप्रदर्शनाचे आयोजन करण्यात आले आहे. येत्या 14 डिसेंबरपर्यंत बालगंधर्व रंगमंदिर कलादालन येथे नागरिकांना हे कलाप्रदर्शन पाहण्यासाठी खुले असणार आहे. या कलाप्रदर्शनाचे उद्घाटन अक्षय शिंदे फाउंडेशन सोमेश्वर बारामतीचे अध्यक्ष आर. एन. शिंदे यांच्या हस्ते झाले. याप्रसंगी राष्ट्रवादी काँग्रेसचे शहराध्यक्ष चेतन तुपे, माजी आमदार कमल ढोले पाटील, राष्ट्रवादी कांग्रेसचे जिल्हा सरचिटणीस निलेश खाबिया, आयर्न मॅन सतीश ननावरे, व्यापारी सेलचे अध्यक्ष राजेंद्र फुलपगर, ज्येष्ठ चित्रकार तु. का. जाधव, चित्रकार श्रीकांत कदम, प्रा. सतीश काळे आदी मान्यवर उपस्थित होते.

या कलाप्रदर्शनात श्रीकांत कदम, प्रा. सतीश काळे, तु. का. जाधव, बाळासाहेब अभंग, प्रा. संतोष शिर्के, जितेंद्र सुतार, प्रशांत बंगाळ, सयाजी वाघमारे, दीपक वानखेडे, प्रा. मंगेश शिंदे, राम खरटमल व बापुसाहेब झांजे या चित्रकार व शिल्पकारांच्या कलाकृती ठेवण्यात आल्या आहेत.

शरद पवार हे भारतीय राजकारण, समाजकारण, अर्थकारण व ग्रामीण तसेच शहर विकासाच्या क्षेत्रातील अग्रगण्य व सर्वांनाच आदरणीय असे व्यक्तिमत्व आहे. याच कारणास्तव त्यांच्याप्रती आदरभाव व्यक्त करण्याबरोबरच वैशिष्ट्यपूर्ण पद्धतीने या कलाकारांनी त्यांच्या कलाकृतींच्या माध्यमातून शरद पवार यांना वाढदिवसाच्या शुभेच्छा दिल्या आहेत. शेती व शेतकरी हा पवार यांचा जिव्हाळ्याचा विषय असल्याने आणि सध्या दुष्काळामुळे शेतकरी हवालदिल झाल्याने यामाध्यमातून त्यांना मदत करण्याचा प्रयत्न राहणार आहे

• या स्पर्धेत ५ ते १६ या वयोगटातील स्पर्धकांचा सहभाग
• अंतिम फेरीसाठी ४८६ पैकी १२ विद्यार्थांची निवड
• स्पर्धेच्या प्रथम बारा स्पर्धकांना रोख बक्षीस, पारितोषिक व प्रशस्तिपत्रक प्रदान करण्यात आले.

पुणे-एडिफाय इंटरनॅशनल स्कूलने पुणे जिल्हा चेस असोसिएशनच्या सहकार्याने विद्यार्थ्यांसाठी एक अनोख्या बुद्धिबळ स्पर्धेचे आयोजन केले होते. या स्पर्धेच्या अंतिम सामन्यात ग्रँडमास्टर विश्वनाथन आनंद यांनी आपली हजेरी लावली. या स्पर्धेची खासियत अशी होती की अंतिम फेरीसाठी निवडण्यात आलेल्या १२ विद्यार्थ्यान बरोबर विश्वनाथन आनंद यांनी बुद्धिबळचा सामना खेळला. हा खेळ एडिफाय इंटरनॅशनल स्कूल, हिंजवडी पुणे येथे आयोजित करण्यात आला होता.

या स्पर्धेत ५ ते १६ या वयोगटातील एकून ४८६ विद्यार्थ्यांनी सहभाग घेतला होता. या स्पर्धेची प्रारंभिक फेरी ही दि. १७ व १८ नोव्हेंबर रोजी आयोजन करण्यात आली होती. अंतिम १२ स्पर्धकांनमध्ये अद्वैत पाटील, कशिष जैन, शिवराज पिंगळे, जेल दिगंबर, निर्गुण केवल, प्रेम मेहेत्रे, साहिल ढोबळे, युवराज पाटील , सिंगला आर्यन, धीरेन मोर, अथर्व बागुल, छवी बाफना यांचा समावेश होता.

यावेळी मिडियाशी बोलताना विश्वनाथन आनंद म्हणाले की “ मला सांगण्यास अतिशय आनंद होतोय की एडिफाय इंटरनॅशनल स्कूल विद्यार्थांच्या कौशल्यपूर्ण खेळाला वाव देत आहे. अभ्यासा प्रमाणाने खेळालाही तेवढेच महत्व देणे गरजेचे आहे, तरच त्यात उत्तम यश नक्की मिळेल.” त्याच बरोबर ते म्हणाले की “ प्रत्येक वेळी स्वतःला आव्हान देणे आवश्यक आहे तसेच बुद्धिबळात आणि आयुष्यात यश व अपयश पचवण्याची ताकद निर्माण केली पाहिजे.”

शाळेच्या मुख्याधापिका प्रिया आनंद म्हणाल्या की “अंतिम १२ स्पर्धकांना  विश्वनाथन आनंद यांच्या बरोबर बुद्धिबळ खेळण्याची खूप मोठी संधी मिळाली. यातून त्यांना अनेक गोष्टी शिकायला मिळाल्या, विश्वनाथन यांच्या कडून मिळालेल्या टिप्स स्पर्धकांना आयुष्यभर नक्कीच उपयोगी पडतील हा मला विश्वास आहे.”

त्याच बरोबर पुणे जिल्हा चेस असोसिएशनचे अध्यक्ष जोसेफ डिसूझा म्हणाले की, “या स्पर्धेत सहभाग झालेल्या पुण्यातील विद्यार्थ्यांसाठी ही एक सुवर्ण संधी होती स्पर्धकांना विश्वनाथन आनंद यांच्या कडून बुद्धिबळाच्या खेळातील विविध  टिप्स व प्रेरणा मिळाली.”

या वेळी विश्वनाथन आनंद यांच्या हस्ते एडिफाय इंटरनॅशनल स्कूलच्या आयबी अभ्यासक्रमाचे उद्घाटन झाले तसेच त्यांच्याच हस्ते बुद्धिबळ स्पर्धेच्या प्रथम बारा स्पर्धकांना रोख बक्षीस, पारितोषिक व प्रशस्तिपत्रक प्रदान करण्यात आले. यामध्ये प्रथम बारा स्पर्धकांची नावे पुढील प्रमाणे आहेत, कशिष जैन, शिवराज पिंगळे , जेल दिगंबर , निर्गुण केवल , अद्वैत पाटील , प्रेम मेहेत्रे, साहिल ढोबळे, युवराज पाटील, सिंगला आर्यन, धीरेन मोर, अथर्व बागुल, छवी बाफना. या बारा स्पर्धकांना पुढील प्रमाणे बक्षीस प्रदान करण्यात आली. (१) १०,०००/-  (२) ६,०००/- (३) ४,०००/-  (४) २,५००/-  (५) २,५००/-  (६) २,०००/-  (७) २,०००/- (८) २,०००/- (९) २,०००/- (१०) २,०००/- (११) पारितोषिक व प्रशस्तिपत्रक (१२) पारितोषिक व प्रशस्तिपत्रक.

पुणे-पुणे महानगर प्रदेश विकास प्राधिकरणासाठी (पीएमआरडीए ) ‘सुधारित विकास नियंत्रण व प्रोत्साहन
नियमावली’स शासनाची अंतिम मान्यता मिळाली असून दि.११/१२/२०१८ रोजी महाराष्ट्र शासनाच्या
नगरविकास विभागाकडून प्रसिद्ध करण्यात आली आहे.

नेमके यात हे आहेत प्रमुख मुद्दे …
1. पुणे महानगर प्रदेश विकास प्राधिकरण रिंग रोड सह प्रादेशिक योजना आराखड्यातील रस्त्यांचा
भूसंपादनासाठी TDR संकल्पना; प्रादेशिक योजनेसाठी TDR लागू करण्याची राज्यातील पहिलीच
घटना.
2. सर्वांसाठी घरे (Inclusive Housing) बद्दलची नियमावली लागू; पुणे महानगर पालिका व पिंपरी
चिंचवड महानगर पालिका हद्दीपासून १० कि.मी. अंतरापर्यंत १०,००० चौ.मी. पेक्षा अधिक
क्षेत्रासाठी Inclusive Housing बंधनकारक; २०% बांधीव क्षेत्र आरक्षित.
3. ०.२ हे. (२०००.०० चौमी.) पेक्षा कमी क्षेत्राच्या मिळकती विकसनक्षम होणार; लहान भूखंडावरील
अन्याय दूर होणार; अशा मिळकतीवर FSI ०.७५ मर्यादित होऊन विकास शक्य; मागील २०
वर्षापासून प्रलंबित बाब मार्गी लागणार.
4. पुणे महानगर पालिका व पिंपरी चिंचवड महानगर पालिका हद्दीपासून ५.०० कि.मी. अंतरापर्यंत
औद्योगिक वापर अनुज्ञेय होणार; पर्यायाने शहरांच्या / वस्त्यांच्या जवळपास उद्योगांची उभारणी
शक्य होणार. मागील २० वर्षांपासून सदरची बाब प्रलंबित होती.
5. शासनाच्या Flagship Program PMAY ला चालना देणेसाठी सवलतीची N A Primium आकारणी;
सदरची आकारणी ३०% वरून केवळ १०% दराने होणार.
6. शहराची गरज विचारात घेऊन Working Women व Students Hostel साठी विशेष तरतूद.
7. बांधकाम क्षेत्रात Ease of Doing Business संकल्प साध्य करण्यासाठी Plinth Checking व भोगवटा
पत्र अदा करणेची कालमर्यादा 7 व ८ दिवसांची राहील. (पूर्वी ती १५ व २१ दिवस अशी होती.)
8. विविध रुंदीच्या रस्त्यांच्या सर्वसमावेशक वापराचा विकास होणेच्या दृष्टीने (Eg. NMT) रस्त्यांचे
प्रमाणीकरण समाविष्ट करणेत आले आहे; त्यानुसार विकास बंधनकारक.

9. विकास योजना आराखडा तयार करताना सार्वजनिक वापरासाठी पुरेशा जागा उपलब्ध होणेसाठी
Amenity Space (सुविधा क्षेत्र ) पुणे महानगर प्रदेश विकास प्राधिकरणास वर्ग करणे बंधनकारक. त्या
जगावर आरक्षणे ठेवल्यास विकास योजना अंमलबजावणी शीघ्रतेने होणार.
10. शहरांच्या १० किमी हद्दीमध्ये ७० मी पर्यंत उंच इमारती व १० कि मी बाहेरील क्षेत्रासाठी ३६.००
मी. पर्यंत उंच इमारती अनुज्ञेय करण्यात आल्या आहेत.
11. चटई क्षेत्राची कमाल मर्यादा १.६ (सध्याच्या १.४ वरून) पर्यंत वाढविण्यात आली असून त्यामध्ये
TDR पोटीच्या चटईक्षेत्रास प्राधान्य देण्यात आले आहे.

पुणे- अखिल भारतीय नागरी सेवा जलतरण स्पर्धा 2018-19 या स्पर्धेत विभागीय आयुक्त कार्यालयातील विकास देसाई यांनी महाराष्ट्र संघाबरोबर वॉटर पोलो क्रीडा प्रकारात अंतिम सामन्यामध्ये केंद्रीय सचिवालय, नवी दिल्ली संघाचा 10/5 गुणांच्या फरकाने धुव्वा उडवून महाराष्ट्र संघाला विजेतेपद मिळवून दिले.

गांधीनगर,गुजरात येथे दि.27 नोव्हेंबर, ते 29 नोव्हेंबर,2018 मध्ये झालेल्या राष्ट्रीय जलतरण स्पर्धेंतर्गत अखिल भारतीय जलतरण स्पर्धेत महाराष्ट्र संघाचा सहभाग होता. महाराष्ट्राच्या संघामध्ये विकास देसाई यांची निवड झाली होती. त्यामध्ये या संघाने विजय प्राप्त केला. विकास देसाई यांनी वॉटर पोलो क्रीडा प्रकारा शिवाय 50 मी. ब्रेस्टस्ट्रोक प्रकारात रौप्यपदक व 4 बाय 100 मिडले प्रकारात कास्यपदक मिळविले. त्यांनी महसूल विभागाच्या होणा-या विभागीय क्रीडा स्पर्धेत तसेच  राज्यस्तरीय महसूल क्रीडा स्पर्धेत जलतरण प्रकारात अनेकवेळा सुवर्ण पदके मिळविली आहेत. त्यांच्या या कामाची दखल घेवून त्यांना अनेक वेळा गौरविण्यात आले आहे.

त्यांनी आत्तापर्यंत मालवण येथील राज्यस्तरीय सागरी जलतरण स्पर्धा (3 कि.मी.), संकरॉक टू गेट वे ऑफ इंडिया येथील (5.कि.मी.) स्पर्धेत तसेच गोवा येथील बंबोलीम बिचवर झालेल्या 5 कि.मी.सागरी जलतरण स्पर्धेत उल्लेखनीय कामगिरी  करुन विभागीय आयुक्त कार्यालयाचा नावलौकिक केला आहे.

त्यांच्या या यशाबद्दल विभागीय आयुक्त कार्यालयातील उपायुक्त पुनर्वसन श्री. दीपक नलवडे, उपसचिव तथा प्रादेशिक विभागीय चौकशी अधिकारी श्री. भ.सं.वानखेडे, तहसिलदार श्री.विवेक साळुंके,  तसेच जिल्हाधिकारी कार्यालयातील निवासी उपजिल्हाधिकारी, डॉ जयश्री कटारे, श्री. विकास भालेराव, तहसिलदार, महाराष्ट्र राज्य महसूल कर्मचारी संघटनेचे उपाध्यक्ष श्री.दिपक चव्हाण,  पुणे जिल्हा महसूल कर्मचारी संघटनेचे अध्यक्ष श्री. विनायक राऊत व स्वाती मुरदाळे यांच्यासह अनेक मान्यवरांनी त्यांचे अभिनंदन करुन शुभेच्छा दिल्या.