पुणे : मकरसंक्रातीच्या निमित्ताने पतंग उडविण्याची धामधूम सुरु झाली आहे. पतंग आणि मांजा बाजारात आला आहे. चीनी आणि नायलॉन मांजामुळे गेल्या काही वर्षात अनेकांना आपला जीव गमावावा लागला आहे. या मांजाच्या वापरावर कायद्याने बंदी आहे. मात्र, छुप्या पद्धतीने हा चीनी मांजा विकला जात आहे. त्यामुळे माणसांच्या जीवावर बेतणार्‍या या चीनी मांजा विकणार्‍यांवर कठोर कारवाई करावी, अशी मागणी सर्व जीव मंगल प्रतिष्ठानचे संस्थापक अध्यक्ष डॉ. कल्याण गंगवाल यांनी पत्रकार परिषदेत केली. या मांजामुळे जखमी होणार्‍या पक्ष्यांच्या बचावासाठी हेल्पलाईन सुरु करण्यात आल्याची माहितीही त्यांनी दिली.

डॉ. कल्याण गंगवाल म्हणाले, “जानेवारी महिन्याच्या सुरुवातीपासूनच पतंगबाजी करणार्‍यांची लगबग सुरु होते. बाजारात विविध प्रकारचा मांजा येतो. बोहरी आळीसह शहर आणि उपनगरांतील छोट्या-मोठ्या दुकानांत हा मांजा विकला जातो. यात बहुतांश मांजा चीनी किंवा नायलॉनचा असतो. त्यामुळे अपघातांचे प्रकार वारंवार घडताना आपण पाहिले आहे. गेल्या वर्षी सुवर्णा मुजुमदार या महिलेला शनिवारवाड्याजवळील पुलावर मांजाने गळा कापल्याने आपला जीव गमवावा लागला. अशा मांजाची निर्मिती, विक्री, साठवण, खरेदी व वापर यावर कायद्याने बंदी आहे. चीनी मांजा सापडल्यास संबंधितांवर पाच वर्षांचा तुरुंगवास व एक लाखाच्या आर्थिक दंडाची तरतूद आहे. मात्र, शासकीय यंत्रणेच्या ढिलेपणामुळे हा मांजा बाजारात विकला जात आहे. त्यामुळे प्रशासनाने याआधी घटलेल्या दुर्घटनांचे गांभीर्य लक्षात घेऊन चीनी मांजा विक्री करणार्‍यांवर कठोर कारवाई करावी. तसेच राष्ट्रीय हरित लवादाने याप्रकरणी लक्ष घालावे. ”

“या मांजाला अनेक पक्षीही बळी पडतात. त्यामध्ये कबुतरे, कावळे, घुबड, पोपट, घार आणि फुलपाखरे यांचा समावेश आहे. जखमी पक्ष्यांच्या बचावासाठी सर्वजीव मंगल प्रतिष्ठान गेल्या 15 वर्षांपासून काम करीत आहे. गेल्या चार पाच वर्षात जवळपास 150 पक्ष्यांना वाचविण्यात यश आले आहे. यंदाही एक अ‍ॅम्ब्युलन्स, एक पशुवैद्यकीय डॉक्टर आणि चार-पाच कार्यकर्ते ही बचावकार्य मोहिम राबविणार आहेत. त्यासाठी हेल्पलाईन सुरु करण्यात आली असून, डॉ. गंगवाल (9823017343), सुनील परदेशी (9823209184), अनिल अवचिते (9422349789) यांच्याकडे जखमी पक्ष्यांबाबत माहिती द्यावी. या मोहिमेत अहिंसाप्रेमी नागरिकांनी सहकार्य करावे,” असे डॉ. गंगवाल यांनी नमूद केले.

पुणे -शहरात हेल्मेट सक्तीच्या विरोधात आठवडाभरापासून विविध भागात राजकीय पक्षाकडून आंदोलन करण्यात येत आहे. मंगळवारी पुणे शहरातील विविध संघटनांनी एकत्र येऊन हेल्मेटविरोधी कृती समितीच्या वतीने हेल्मेट सक्तीच्या निषेधार्थ वैकुंठ स्मशानभूमीत दशक्रिया विधी करण्यात आला.

पुण्यात सध्या हेल्मेट सक्तीवरुन वाद सुरु आहे. वाहतूक पोलिसांनी हेल्मेट सक्तीचा पवित्रा घेतला असून पुणेकरांनी मात्र याला विरोध दर्शवला आहे. हेल्मेटसक्तीविरोधात हेल्मेटविरोधी कृती समितीची स्थापना करण्यात आली आहे. मंगळवारी कृती समितीच्या वतीने हेल्मेट सक्तीच्या निषेधार्थ वैकुंठ स्मशानभूमीत दशक्रिया विधी करण्यात आला. या दशक्रिया विधीमध्ये हेल्मेट विरोधी कृती समितीचे संयोजक माजी महापौर अंकुश काकडे, शिवसेनेचे माजी आमदार महादेव बाबर, भाजप नेते संदीप खर्डेकर,नगरसेवक विशाल धनवडे , माजी नगरसेवक धनंजय जाधव, उमेश वाघ,काँग्रेस सरचिटणीस संदीप मोरे तसेच शहरातील विविध संघटनेचे आजी- माजी पदाधिकारी उपस्थित होते.

माजी आमदार महादेव बाबर म्हणाले की, मागील आठवडाभरापासून पुणे वाहतूक पोलिसाकडून कायद्याचा धाक दाखवत हेल्मेट सक्ती केली जात आहे. ही निषेधार्ह बाब असून पुणे शहराच्या वाहतुकीचा वेग लक्षात घेता, हेल्मेट सक्ती राबवणे चुकीचे आहे, अशी भूमिका त्यांनी मांडली. वाहतुक पोलिसांनी ही कारवाई मागे न घेतल्यास भविष्यात आधिक तीव्र आंदोलन केले जाईल. असा इशारा त्यांनी दिला.

पुणे : एमआयटी वर्ल्ड पीस युनिव्हर्सिटी, पुणे आणि एमआयटी एडीटी विद्यापीठ, पुणेतर्फे भारताचे थोर सुपुत्र स्वामी विवेकांनंद यांच्या १५६ व्या जयंतीचे औचित्य साधून गुरुवार, दि. १० ते शनिवार दि. १२ जानेवारी २०१९ या कालावधीत ‘२१ व्या शतकात भारत ‘विश्‍वगुरू’ होणार!’ या स्वामीजींच्या सन १८९७ च्या वचनांवर आधारित, ‘ज्ञान जागर’ हा आगळा-वेगळा कार्यक्रम, विश्‍वराजबाग, लोणीकाळभोर, पुणे येथील जगातील सर्वात मोठा घुमट असलेल्या तत्त्वज्ञ संतश्री ज्ञानेश्‍वर विश्‍वशांती सभागृह आणि विश्‍व शांती ग्रंथालयात आयोजित करण्यात आला आहे.
भारताचे थोर सुपुत्र स्वामी विवेकानंद यांनी १८९७ साली असे भाकीत केले होते, की ‘२१ व्या शतकात माझी भारतमाता जगात ‘ज्ञानाचे दालन’ म्हणून उदयास येईल व विश्‍वगुरु म्हणून तिची जगासमोर ओळख निर्माण होईल’. त्यांच्या या वचनावर आधारित एमआयटी विश्‍व शांती विद्यापीठातर्फे ‘२१ व्या शतकात भारत ‘विश्‍वगुरु’ होणार! या विषयावर तीन दिवसीय ‘ज्ञानजागरा’चे आयोजन केले आहे.
आपल्या भारतीय संस्कृतीचे व परंपरेचे वर्णन करताना एक गोष्ट प्रामुख्याने ध्यानी येते, ती म्हणजे हजारो वर्षापासून या आपल्या मातृभूमीमध्ये मुख्यत्वे दोन गोष्टींची पूजा केली गेली. त्यातील पहिली ‘ज्ञानाची पूजा’ आणि दुसरी ‘सत्याची पूजा’. संपूर्ण विश्‍वामध्ये ज्ञान हेच एकमेव सत्य! या विश्‍वाचे एक अंतिम चैतन्यस्वरूप हे सुध्दा ज्ञानस्वरूपच होय! संत शिरोमणी श्री ज्ञानेश्‍वर माऊली यांच्या खालील उक्तीनुसार याची प्रचिती येते..

ॐ नमोजी आद्या । वेद प्रतिपाद्या ॥ जय जय स्व संवेद्या । आत्मरूपा ॥

या पार्श्‍वभूमीवर एमआयटी वर्ल्ड पीस विद्यापीठाने पहिल्यांदाच विश्‍वात्मक चैतन्यस्वरूप ‘ज्ञान’ या विषयावर नामवंत वक्त्यांची व्याख्याने आणि कीर्तन / प्रवचने आयोजित करण्यात आली आहे. यामध्ये गुरुवार, दि. १० जानेवारी २०१९ रोजी दु. ३.३० वा. संतवृत्तीचे थोर शास्त्रज्ञ, परम संगणकाचे जनक डॉ. विजय भटकर यांच्या शुभहस्ते या ज्ञानजागरचे उद्घाटन होणार असून डॉ. विजय भटकर आणि ‘ज्ञानेश्‍वरी’ ग्रंथाचा ओवीबध्द इंग्रजी अनुवार करणार्‍या स्वामी राधिकानंद सरस्वती यांचे ‘ज्ञान’ या विषयावर व्याख्यान होणार आहे. त्यानंतर संध्या. ५.३० वा. सुप्रसिद्ध गायक डॉ. महेश काळे हे ज्ञानस्वरूप भक्ती-संगीत कीर्तन सादर करतील.

शुक्रवार, दि. ११ जानेवारी २०१९ रोजी हिमालयस्थित गुरू श्री. योगी अमरनाथजी व विज्ञानवादी वैदिक अभ्यासक श्री. प्रविण राजपाल यांची ‘ज्ञान’ विषयावर व्याख्यानं होणार आहेत. त्यानंतर संध्याकाळी ६.१५ वा. औसा संस्थानचे प्रमुख ह.भ.प. श्री. गुरूबाबा महाराज औसेकर यांचे भजन/कीर्तन होणार आहे.

शनिवार, दि. १२ जानेवारी २०१९ रोजी, भारतीय संस्कृती, परंपरा आणि तत्त्वज्ञानाचे मूर्तिमंत प्रतीक, ऋषितुल्य व्यक्तिमत्त्व, संतस्वरूप व ज्ञानस्वरूप विभूती उडुपी, कर्नाटक येथील पेजावर मठाचे ज्ञानमठाधिपती प.पू. आदरणीय श्री विश्‍वेशतीर्थ स्वामीजींना शैक्षणिक, सामाजिक, आध्यात्मिक क्षेत्रात दिलेल्या बहुमोल योगदानाबद्दल आणि विश्‍वशांती व विश्‍वकल्याणाच्या कार्याबद्दल, ‘तत्त्वज्ञ संतश्री ज्ञानेश्‍वर माऊली ज्ञान-ब्रह्म ऋषी’ हा प्रतिष्ठेचा पुरस्कार डॉ. विजय पां. भटकर आणि शांतिब्रह्म ह.भ.प. श्री. मारूती महाराज कुर्‍हेकर यांच्या शुभहस्ते आदरपूर्वक अर्पण करण्यात येईल.

अशी माहिती विश्‍वशांती केंद्र (आळंदी), माईर्स एमआयटी, पुणेचे संस्थापक अध्यक्ष प्रा. डॉ. विश्‍वनाथ दा. कराड आणि जगप्रसिद्ध संगणकतज्ञ डॉ. विजय पां. भटकर यांनी दिली.

चाटे शिक्षण समूह पुणे विभागाचे वतीने शैक्षणिक मार्गदर्शन

पुणे-

वाढत्या जीवघेन्या स्पर्धेच्या युगात तुम्हाला काय व्हायचे आहे हे ठरवा व तशी वाटचाल करा. पुढचा टप्प्यावर तुम्हाला काय करायचय याची अंतिम क्षणापर्यंत पाहु नका, दहावीची बोर्ड परीक्षा तुमच्या करियरची सुरवात आसते. त्याचा कोणताही दबाव अथवा प्रेशर घेऊ नका. वेळेचे योग्य प्रकारे नियोजन करा,  पेपर लिहीत असताना देखील कॉन्फिडन्स असला पाहिजे.स्पर्धा परीक्षा देश पातळीवरची 17 लाख विद्यार्थ्याबरोबर असल्याने तयारी तेवढी चांगली असेल तर रिझल्ट तसाच मिळेल.सखोल ज्ञानाने शन्यातून विश्व निर्माण होते. वारंवार अभ्यासक्रम बदली होत असल्याने वेळ खडतर आहे, त्यासाठी आत्मविश्वास वाढवला पाहिजे. पालकांनी विद्यार्थ्याची मानसिकता बदलणे गरजेचा असून मुलांना जबाबदारी ची जाणीव करून द्या. विद्यार्थ्यांनी देखील पालकांच्या स्वप्नाचा चकनाचूर करू नका, त्याची मान अभिमानाने उंच होईल असे करा, दशा बदलण्यासाठी दिशा बदला. करिअर घडवण्यासाठी जिद्द, चिकाटी, मेहनत, प्लानिंग कराच त्याच बरोबर सोशल मीडिया आणि मोबाईल व टीव्हीच्या पासून दूर रहा. पुढील अभ्यासावर परिणाम होत असल्याने झालेल्याची निरर्थक चर्चा करू नका. पूर्वी पासून ध्येय व करिअर ठरवून उत्तुंग यशाचा पाठलाग करण्याचे आवाहन चाटे शिक्षण समूहाचे सचालक प्रा फुलचंद चाटे यांनी केले.

ते काल यश लॉन्स येथील दहावी बोर्ड परीक्षा व स्पर्धा परिक्षा करियर मार्गदर्शन शिबीरामध्ये बोलत होते.

या कार्यक्रमासाठी प्रमुख पाहुणे चाटे शिक्षण समूहाचे अध्यक्ष  प्रा. गोपीचंदजी चाटे, प्रा विजय बोबडे, प्रा भारत खराटे, प्रा. रमेश बनकर प्रा.बापूसाहेब काटकर, प्राचार्य समर जामदार, यांच्यासह हजारोच्या संख्येने पालक व विद्यार्थी उपस्थित होते.

यावेळी वैद्यकीय शिक्षण घेत असलेला सौरभ निंबाळकर तसेच आय आय टी क्षेत्रात पी एच डी करणारा मंगेश शेंडकर व विद्यार्थीनी आदिती शेवते यांनी आपले मनोगत व्यक्त केले. कार्यक्रमाचा शुभारंभ गायत्री कुलकर्णीच्या गणेश वंदनेने करण्यात आली.

प्रा गोपीचंद चाटे यांनी अध्यक्षीय भाषणात खुमासदार शैलीत विद्यार्थी व पालकांना अवाहन करताना यशाच्या शिखरावर जाण्यासाठी सर्व वेळ चागला असतो, विद्यार्थ्याणी दबावाखाली नको मात्र आस्था व कष्ठाशिवाय पर्याय नाही. शॉर्टकटचे यश ज्यास्तवेळ टिकत नाही. मार्ग काटेदार आहे,  विद्यार्थ्यांना बंधनात राहायला आवडत नसल्याने त्यांना नजरेच्या आवाक्यात ठेवत त्यांच्या सोबत संवाद घडवा, टेक्नॉलॉजीचे दुष्परिणाम ओळखून बिघडण्या इतपत अडकू नका, जगण्यासाठी जेवढी धडपड करता तेवढी यश मिळवण्यासाठी करावेत. चाटे शिक्षण समूहाची ख्याती पाया मजबूत करून उच्च पदापर्यंत पोहचवण्याची असल्याने हजारो संख्येने विद्यार्थी डॉक्टर, इंजिनिअर व वरिष्ठ पातळीवर आहेत. दहावीची परीक्षा केवळ अभ्यास नसून करियरसाठी आहे व ही संधी सर्वांसाठी उपलब्ध असून तुमच्यातील उर्जेला योग्य दिशा देण्याचे आवाहन केले.

कार्यक्रमाचे सूत्रसंचालन प्रा. समर जामदार यांनी केले.

तसेच 30 डिसेंबर रोजी एन्टरन्स टेस्ट घेतली त्याचा 6 जानेवारी रोजी निकाल लागला, या परीक्षेतील दहावीची परीक्षा, अभ्यासाच्या वेळेचे गमक, पेपर सोडवताना ध्यान द्यायच्या बाबी व उत्तर पत्रिका सोडवण्याचे गमक याबद्दल सविस्तर मार्गदर्शन करण्यात आले, उत्तीर्ण विद्यार्थ्यांना सातारा रस्ता विभागाकडील विद्यार्थ्यांना मार्केट यार्ड येथील उत्सव हॉटेलच्या प्रशस्त हॉलमध्ये  तर वारजे भागातील विद्यार्थ्यांना वारजे येथे पार पडले. तसेच सर्व यशस्वी विद्यार्थ्यांना शुभेच्छा देण्यात आल्या.