पुणे :स्वामी विवेकानंदाच्या जयंती अर्थात राष्ट्रीय युवा दिनानिमित्त शहर राष्ट्रवादी काँग्रेसच्या वतीने विविध क्षेत्रात उत्तुंग कामगिरी करणाऱ्या कर्तृत्वान सात युवक आणि युवतींना गौरविण्यात आले. स्वप्नील दुधाणे (कोथरूड विधानसभा अध्यक्ष) आणि सनी मानकर (अध्यक्ष, राष्ट्रवादी काँग्रेस साहित्य, कला व सांस्कृतिक विभाग, पश्चिम विभाग) यांच्या हस्ते पुरस्कारार्थींचा सन्मान झाला.या उपक्रमाचे २०१८-१९ हे प्रथम वर्ष होते. हा उपक्रम आज शनिवारी, १२ जानेवारी रोजी सकाळी पुणे फिल्म कास्टिंग कार्यालय, सातारा रोड येथे संपन्न झाला.या उपक्रमांतर्गत रफिक जमादार, किरणकुमार कोरे, विपुल साळुंखे,  प्रेरणा चव्हाण, कोमल बन्सल आणि आसमी जैन या सात जणांना मानपत्र आणि पुष्पगुच्छ देऊन गौरविण्यात आले.

रफिक जमादार हे ‘एडीजीपीआय इंडियन आर्मी अँड नॅशनल डिफेन्स’मध्ये कार्यरत असून, राष्ट्रीय संरक्षण अकादमीमधील तरुण प्रशिक्षणार्थी आहेत. किरणकुमार कोरे याने श्रीलंकेत झालेल्या आंतरराष्ट्रीय नृत्य स्पर्धेत भारताचं नेतृत्व करून लावणीसाठी सुवर्णपदक मिळवले आहे. तसेच “छत्रपती शासन” या चित्रपटात लावणी सादर करून किरण कोरे हा चित्रपटात लावणी करणारा पहिला मुलगा ठरला. विपुल साळुंखे कलाकार, मॉडेल आणि चित्रपट निर्माता आहे. झी मराठी वाहिनीवरील ‘माझ्या नवऱ्याची बायको’ या मालिकेद्वारे ते प्रचलित आहेत. प्रेरणा चव्हाण या सेल्स टॅक्स इन्स्पेक्टर असून, अत्यंत कमी वयात त्यांनी अनेक पुरस्कार पटकाविले आहेत. डॉ. कोमल बन्सल यांनी आंतरराष्ट्रीय पातळीवर विशेष काम केले आहे. प्राणीमित्र आसमी जैन यांनी एका वर्षात तब्बल शंभर भटक्या वन्यजीवांना जीवनदान दिले आहे.

या सर्वांच्या अत्यंत कमी कालावधीत आदर्श कामगिरी केल्याबद्दल त्यांना गौरविण्यात आले आहे. या वर्षीपासून दरवर्षी युवादिनी हा सन्मान उपक्रम घेण्यात येणार असल्याची माहिती कार्यक्रमाचे आयोजक सनी मानकर यांनी या प्रसंगी दिली.

कार्यक्रमाचे आयोजन सनी मानकर यांनी केले तर नियोजन महेश शिर्के यांचे होते. याप्रसंगी मिलिंद वालवडकर, प्रमोद शिंदे, स्वप्नील खवले, शुभम माताळे, आकाश मोहकर, सौरभ दसपुते, ऋषिकेश कडू, अमर सहाने, श्रीकांत बालघारे, शुभम झेंडे, व्यंकटेश भोंडवे, प्रणव बहिरट, रोहित पळसकर, शुभम मारणे हे उपस्थित होते.

पुणे-
ग्राहकांच्या संमतीशिवाय प्लॅनमध्ये बदल करून तसेच पुणे महानगरपालिकेचा मंजुर नसलेला खोटा प्लॅन लावुन तो खरा असल्याचे दाखवुन खरेदीखताच्या दस्तमध्ये वापर करून कोटयावधी रूपयांची फसवणुक केल्याप्रकरणी हडपसर पोलिसांनी शहरातील एका बड्या बिल्डरला अटक केली आहे. हडपसर पोलिसांच्या या कारवाईमुळे बांधकाम क्षेत्रामध्ये प्रचंड खळबळ उडाली आहे. मोठा मासा पोलिसांच्या गळाला लागल्याने बांधकाम व्यवसायीकांमध्ये खळबळ उडाली आहे.

विश्‍वजित सुभाष झंवर (49, रा. फ्लॅट नंबर 1201, मार्कल औरम लेन नंबर 7, कोरेगाव पार्क) असे अटक करण्यात आलेल्या बिल्डरचे नाव आहे. त्याच्यासह कार्तिक धनशेखरन (36, रा. विमाननगर), संजय जस्सुभाई देसाई आणि प्रमोद तुकाराम मगर यांच्याविरूध्द भादंवि 420, 406, 409, 465, 467, 478, 471, 474, 120 (ब), 34, मोफा कायदा कलम 3,4,5,8 आणि 11 अन्वये गुन्हा दाखल करण्यात आला आहे. मुकेश मोहनदास मनसुखानी (40, रा. दुबई) यांनी याप्रकरणी फिर्याद दिली असून दुसरी फिर्याद मुकेश यांचे भाऊ नवीन मोहनदास मनसुखानी (40, रा. दुबई) यांनी दिली आहे.

फिर्यादी मनसुखानी यांनी विश्‍वजित झंवर, कार्तिक धनशेखरन, संजय देसाई, प्रमोद मगर आणि इतरांच्या मार्वल कायरा बांधकाम स्कीम स.नं. 134/2/1 व 2/2ए व 2बी/2 व 3 ए व 3 बी व 4 मगरटपट्टा (हडपसर) येथे बी विंग मधील 12 व्या मजल्यावरील 1201 डुप्लेक्स व सर्वात मोठा फ्लॅट व त्याच बरोबर 12 व्या मजल्यावर स्काय रेस्टॉरंट व 16 व्या मजल्यावर जिम अशी सुविधा असलेला व त्याचे एकुण क्षेत्रफळ 644.74 चौरस मिटर बिल्टअप एरिया 79.89 चौरस मिटर व ओपन टेरेस व दोन कार पार्किंग असा असलेला फ्लॅट आणि इतर गोष्टी दि. 5 नोव्हेंबर 2014 रोजी 5 लाख रूपये आरटीजीएस व्दारे देवुन बुक केला होता. दि. 4 एप्रिल 2015 रोजी सदर फ्लॅटचे रजिस्टर खरेदीखत केले. दि. 30 जून 2917 रोजी नंबर फिर्यादी यांनी वेळावेळी अटक आरोपी विश्‍वजित झंवर व पाहिजे असलेल्या आरोपींना फोन व ई-मेल करून फ्लॅटच्या ताब्याबद्दल विचारणा केली. त्यावेळी त्यांनी फिर्यादी मनसुखानी यांना उडवाउडवीची उत्‍तरे दिली. त्यामुळे फिर्यादी यांना शंका आली. त्यांनी भारतात येवुन आरोपींच्या कार्यालयावर जावुन व मगरपट्टा येथील मारवल कायरा स्कीमच्या बांधकाम साईटवर जावुन खात्री केली असता त्यावेळी त्यांना फक्‍त दोन बिल्डींगचे अर्धवट आरसीसी बांधकाम झाल्याचे दिसले.

खरेदीखताप्रमाणे बांधकाम केले नसल्याचे दिसल्याने त्यांनी बिल्डर झंवर यांच्याकडे विचारणा केली. त्यावेळी झंवरने केवळ दोन बिल्डींगचे काम करणार असल्याचे सांगुन तिसर्‍या बिल्डींगचे काम करणार नसल्याचे सांगितले. आरोपींनी फिर्यादी यांच्या संमतीशिवाय प्लॅनमध्ये बदल करून फिर्यादी व इतरांना फसविण्याचा कट रचला. फिर्यादी यांच्याकडून वेळावेळी 1 कोटी 82 लाख 46 हजार 180 रूपये घेवुन त्या पैशाचा दुसरीकडे वापर केला. फिर्यादीचे भाऊ नवीन मनसुखानी यांच्याकडून देखील 1 कोटी 85 लाख 58 हजार 986 रूपये घेतले. याप्रकरणी दोन वेगवेगळे गुन्हे दाखल करण्यात आले आहेत. वरिष्ठांच्या मार्गदर्शनाखाली हडपसर पोलिस ठाण्याचे वरिष्ठ पोलिस निरीक्षक सुनिल तांबे गुन्हयाचा अधिक तपास करीत आहेत. विश्‍वजित सुभाष झंवर (49, रा. फ्लॅट नंबर 1201, मार्कल औरम लेन नंबर 7, कोरेगाव पार्क) याला अटक करून न्यायालयात हजर करण्यात आले. न्यायालयाने बिल्डर झंवरला दि. 16 जानेवारी पर्यंत पोलिस कोठडीत ठेवण्याचा आदेश दिला आहे.

गुंतवणूकदारांनी संपर्क साधावा….
मारवल बिल्डरच्या मगरपट्टा येथील मारवल कायरा या सोसायटीत अनेक गुंतवणूकदारांनी गुंतवणूक केली आहे, या बिल्डरच्या स्कीममध्ये फसवणूक झाली असल्यास हडपसर पोलीस स्टेशनला संपर्क साधावा व तक्रार द्यावी
सुनील तांबे
वरिष्ठ पोलीस निरीक्षक – हडपसर पो.स्टेशन

पुणे– बाळासाहेब ठाकरे प्रभावशाली व्यंगचित्रकार पुरस्कार राजेंद्र सरग यांना माजी आमदार मोहन जोशी यांच्‍या हस्‍ते प्रदान करण्‍यात आला. पुणे मीडिया वॉच, सिध्दार्थ वाचनालय व ग्रंथालय यांच्या संयुक्त विद्यमाने दरवर्षी एका व्‍यंगचित्रकाराला हा पुरस्‍कार देण्‍यात येत असतो. कार्यक्रमास मीडिया वॉचचे संचालक महेश जांभुळकर, ग्रंथालयाचे कार्याध्यक्ष बापूसाहेब गानला, मंजिरी धाडगे, सावित्रीबाई फुले पुणे विद्यापीठाचे संज्ञापन व वृत्तपत्रविदया विभागाचे सहाय्यक प्राध्यापक संजय विष्णू तांबट, डॉ. भगवान यादव, मनजितसिंग विरदी, भीमराव पाटोळे, संगीता आठवले, प्रा. वाल्मिक जगताप, शिवानंद हूल्ल्याळकर, श्याम सहानी, फिरोज मुल्ला, विकास भांबुरे, दिलीप भिकुले, शंकर जोग , प्रशांत फुले, संतोष गायकवाड, नितीन बाल्की, भारती अंकलेल्लू आदी उपस्थित होते. राजेंद्र सरग सध्‍या पुण्‍याचे जिल्‍हा माहिती अधिकारी म्‍हणून कार्यरत आहेत. त्‍यांना यापूर्वी महाराष्‍ट्र शासनाचा यशवंतराव चव्‍हाण उत्‍कृष्‍ट लेखन पुरस्‍कार, देवर्षी नारद व्‍यंगचित्रकारिता पुरस्‍कार, आचार्य अत्रे व्‍यंगचित्रकार पुरस्‍कार यासह इतर पुरस्‍कार प्राप्‍त झाले आहेत.

पुणे :नागपूर विद्यापीठाचे माजी कुलगुरू आणि विश्व शांती केंद्र (आळंदी ) चे राष्ट्रीय समन्वयक डॉ एस एन पठाण यांच्या
‘टाकीचे घाव ‘ या आत्मचरित्राच्या ‘चिजेल्स ब्लोज ‘ या इंग्रजी आवृत्ती चे प्रकाशन इचलकरंजी येथे खा . राजू शेट्टी आणि माजी मंत्री प्रकाश आवाडे यांच्या हस्ते झाले .

‘टाकीचे घाव ‘ही डॉ. पठाण यांची आत्मकथा आहे.प्रा . डॉ . मंजुषा धुमाळ (अमरावती) यांनी हे इंग्रजी भाषांतर केले आहे . इंग्रजी आवृत्ती ‘विश्वकर्मा पब्लिकेशन्स ‘ने प्रकाशित केली आहे . ‘टाकीचे घाव ‘ हे मूळ आत्मवृत्त २०१३ साली प्रकाशित झाले आहे .

‘डॉ एस एन पठाण यांचे जीवनच ‘धार्मिक सद्भावाची ज्योत ‘ असून ते हिंदू -मुस्लिम समाजाच्या एकात्मतेचे प्रतीक आहेत ‘ ,असे गौरवोद्गार राजू शेट्टी यांनी यावेळी काढले .

रयत शिक्षण संस्थेच्या “कमवा आणि शिका’ योजनेतून शिक्षण घेत अधिव्याख्यातापदापासून ,राज्याचे शिक्षण संचालक ,नागपूर विद्यापीठाच्या कुलगुरुपदापर्यंतचा प्रवास करणारे पठाण सरांनी या पुस्तकात आपल्यावर झालेले संस्कार, तसेच जीवनात मार्गदर्शक ठरलेल्या व्यक्तींबद्दल मोकळेपणाने लिहिले आहे दारिद्र्यावर मात करून पठाण सर ज्या तडफेने आपली वाटचाल करतात, ती अनेक तरुणांना प्रेरणादायी ठरेल,’असे उद्गार खा . राजू शेट्टी यांनी यावेळी बोलताना काढले .

यावेळी बोलताना डॉ एस एन पठाण म्हणाले,’भारतात हिंदू -मुस्लिम समाज एकोप्याने राहत आहे ,तरीही अनेक राजकारणी हा एकोपा बिघडविण्याच्या प्रयत्नात आहेत . केवळ राजकारणासाठी चालणारे हे विखारी प्रयत्न यशस्वी होऊ देता कामा नयेत . ग्रामीण भागातील माझ्यासारखा एक गरीब मुस्लिम शिक्षणाच्या वाटेने जाऊन राज्याचा शिक्षण संचालक ,कुलगुरू होतो ,याचाच अर्थ या देशात प्रगतीच्या संधी सर्वाना समान उपलब्ध आहेत ,आणि या देशात जन्माला येणे हे भाग्याचे आहे ,हे सिद्ध करणाऱ्या आहेत .

या कार्यक्रमात डॉ . पठाण याना ‘स्वातंत्र्यसैनिक निजामुद्दीन काझी ‘ यांच्या नावाचा ‘सांप्रदायिक सद्भावना पुरस्कार’ राजू शेट्टी यांच्या हस्ते प्रदान करण्यात आला . यावेळी सौ . जे एस पठाण उपस्थित होत्या .

नुरुद्दीन काझी यांनी आभार मानले .

पुणे-पतित पावन संघटना पुणे शहरच्यावतीने नौरोसजी वाडिया महाविद्यालयासमोर हेल्मेट सक्ती नको ? का हेल्मेट पाहिजे यावर मतदान मोहीम राबविण्यात आले . यावेळी महाविद्यालयीन युवकांनी मोठ्या संख्येने या मोहिमेत सहभागी होऊन मतदान केले . यावेळी पतित पावन संघटनेचे कार्यकर्ते प्रविण झंवर , धनंजय क्षीरसागर , संतोष शेंडगे , गुरु कोळी , मनिष पवार , सिताराम खाडे , मनोज नायर ,  चेतन लंगार , हृतिक कवडे , गोकुळ शेलार , मयूर कवडे , महेश पालीमकर , आनंद कवडे , सुजित कवडे , पपू टेमगिरे ,आदी पदाधिकारी कार्य्रकर्ते सहभागी झाले होते . 

पुणे: महिलांचे जन्मपूर्व आणि जन्मपश्चात मानसशास्त्र आणि आरोग्यविषयक काम करणारी अमेरिकेतील संस्था एपीपीपीएचआणि गेल्या 60 वर्षांपासून काम करणारी भारतीय एनजीओ मनशक्ती रिसर्च सेंटर (एमआरसी) ने एकत्र येऊन तीन दिवसीय जागतिक परिषदेचे आयोजन केले आहे. 18 जानेवारीपासून सुरु होणार्‍या या परिषदेत सहभागी डॉक्टर्स जगभरात प्रसुतीवेळी घेतल्या जाणार्‍या जन्मपूर्व काळजीबाबत विचारविनीमय करत आपले अनुभव व्यक्त करणार आहेत.

आज बाळाच्या जन्मपूर्व काळजीबाबत तरुण जोडपी तसेच डॉक्टरांमध्ये सुद्धा अनेक मिथके आणि गैरसमज आहेत. हे गैरसमज दूर करण्यासाठी18 जानेवारीपासून लोणावळ्यात सुरु होणार्‍या या प्रकारच्या पहिल्याच जागतिक परिषदेत भारतातील जुन्या पारंपारिक तसेच आधुनिक वैज्ञानिक पध्दतींची चर्चा करण्यात येईल.

अशा संकल्पना आणि कार्यपध्दती तपासून पाहण्यासाठी वैद्यकीय विज्ञानात वूम्ब इकोलॉजी नावाची शाखा सुरु करण्यात आली आहे. परंतु दुर्दैवाने सर्वात आघाडीवर असणार्‍या वैद्यकीय व्यावसायिकांनाही त्याबाबत फारशी माहिती नाही.

एपीपीपीएच संस्थेचे संस्थापक, डॉ. थॉमस वेर्नी यांनी याबाबत अधिक माहिती देताना सांगितले की, “आमच्या संस्थेचा मुख्य उद्देश आहे तो म्हणजे ‘वूम्ब इकोलॉजीला वर्ल्ड इकोलॉजी बनवणे’. बालकांच्या जन्मपूर्व आणि जन्मपश्चात आजारांचा अभ्यास करुन त्यांच्यावरील उपचारांच्या पध्दती शोधणे तसेच बालकांसोबत त्यांच्या मातापित्यांच्या मानसिक आणि शारीरिक आरोग्यातसुधार आणण्यासाठी आम्ही कटीबध्द आहोत.”

फेडरेशन ऑफ ऑब्स्टेट्रीक अँड गायनेकोलॉजीकल सोसायटीज ऑफ इंडिया (FOGSI) च्या मान्यतेने आयोजित होणार्‍या या परिषदेत जन्मपूर्व विकासाचे प्राचीन प्राचीन ज्ञान आभण अत्याधुनिक शास्त्र- गर्भातून नव्या आरोग्यदायी जगाची निर्मिती) यावर अधिक लक्ष केंद्रीत केले जाणार आहे.

धन्वंतरी पुरस्कार विजेत्या, नामांकीत बालरोगतज्ञ आणि मुंबई विद्यापीठाच्या माजी उपकुलपती डॉ. स्नेहलता देशमुख परिषदेत प्रामुख्याने मार्गदर्शन करणार आहेत. यावेळी त्या ‘माझा प्रवास- बालशल्यचिकित्सा ते संस्कार’ या विषयावर मार्गदर्शन करतील.

त्यांनी सांगितले की, “अनेक लोक जन्मपूर्व काळजीकडे एक नवीन फॅड या दृष्टीकोनातूनच पाहतात. मात्र भारतात हीच पध्दती संस्कार (सद्गुण) या नावाने खूप आधीपासून प्रचलीत आहे. या पध्दतीमधून स्पष्ट झाले आहे की, बाळ गर्भावस्थेत असल्यापासूनच गर्भ संस्काराच्या माध्यमातून त्याच्यामध्ये सद्गुण भरणे शक्य आहे. परंतु सर्वसामान्य जोडपी याबाबत अजूनही गोंधळलेल्या मन:स्थितीतच असतात.”

पुणे येथील अनुवांशिक आणि बालरोगतज्ञ डॉ. प्रकाश गंभीर सांगतात की, “याबाबतचे आणखी एक कटू सत्य म्हणजे काही पाश्चिमात्य वैद्यकीय पध्दती आणि भारतीय विचार यांच्यात खूपच तफावत दिसून येते. सध्याच्या उपचार पध्दतींमध्ये केवळ जैवीक प्रक्रियांनाच प्राधान्य दिले जाते. त्याचा पुढील टप्पा असणार्‍या मानसिक आणि सामाजिक घटकांना महत्व दिले जात नाही. मातेच्या शरीराला आवश्यक असणारे अन्न, आवश्यक असणारा व्यायाम आणि औषधे यांचीच फक्त चर्चा केली जाते. परंतु तिची मानसिक अवस्था, तिने वाचणे आवश्यक असणारे साहित्य किंवा त्या अवस्थेत ऐकावे असे संगीतही तितकेच महत्वाचे आहे.” या परिषदेत डॉ. प्रकाश गंभीर जन्मपूर्व अवस्थेत अनुवंशिक आणि एपिजेनेटिक्सची भूमिका या विषयावर मार्गदर्शन करणार आहेत.

एमआरसी आणि त्याचे संस्थापक स्वामी विज्ञानानंद यांनी जागतिक स्तरावर या विषयावर काम केले आहे, त्यांच्या मते,गर्भसंस्कारांनी प्राचीन ज्ञानाचा वैज्ञानिक पद्धतीने उपयोग केला आहे. स्वयंसेवकांच्या समर्पित कार्यसंघासह एमआरसी या विषयावर अव्यवसायिक स्तरावरील कार्यशाळा आणि प्रशिक्षण शिबिरे आयोजित करीत असते.

मागील एका दशकातच 1,25,000 पेक्षा जास्त पालकांनी एमआरसी च्या साप्ताहिक कार्यशाळेत भाग घेतला आहे. या एनजीओचे संशोधन संचालक, गजानन केळकर यांनी सांगितले की, “आमच्याकडून एक दिवसीय कार्यशाळा, तीन दिवसीय शिबिरे,इलेक्ट्रॉनिक चाचण्या आणि इतर अशा प्रकारच्या व्यायामांचे प्रशिक्षण घेतले जाते.”

कॅनडाच्या एपीपीपीएच संस्थापक डॉ. थॉमस वेर्नी यांच्या व्यतिरिक्त, ब्रिटनचे आघाडीचे एपिजेनिटिसिस्ट चरण सुर्धर आणि ब्राझिल, नेदरलँड आणि अमेरिकेतील अनेक तज्ञ या परिषदेस संबोधित करतील.

भारतातील प्रमुख वकत्यांमध्ये डॉ. संजय गुप्ते (पुणे), डॉ. जयदीप मल्होत्रा (FOGSI इंडियाचे अध्यक्ष) आणि बेंगलुरूच्या नॅशनल इन्स्टिटयूट ऑफ मेंटल हेल्थ आणि न्यूरोसायंसेस (एनआयएमएचएन्स) यांचा डॉ. प्रभा चंद्रा यांचा समावेश आहे.

डेक्कन कॉलेज (पुणे) मधील डॉ. विनया क्षीरसागर आणि मुंबईच्या वैशाली दबके यांसारखे अनेक भारतीय तज्ज्ञ गर्भ संस्कारांचे प्राचीन संकल्पना देखील सादर करतील.