पुणे  :- राज्य निवडणूक आयोग, महाराष्ट्र राज्य यांनी दिलेल्या सूचनांनुसार 26 जानेवारी 2019 ते 10 फेब्रुवारी 2019 या कालावधीत लोकशाही भक्कम होण्याच्या व नागरीकांना निवडणूकीच्याबाबत विविध स्वरुपातील माहिती  उपलब्ध करून देण्याच्या अनुषंगाने “लोकशाही पंधरवडा” साजरा करण्यात येणार आहे. या पंधरा दिवसाच्या कालावधीत वेगवेगळ्या स्तरांवर कार्यक्रमाचे आयोजन करण्यात आले आहेत.

                26 जानेवारी 2019 रोजी झेडावंदनाच्या वेळी ठिकठिकाणी होणाऱ्या लोकप्रतिनिधी व शासकीय अधिकाऱ्याच्या भाषणांमध्ये लोकशाही, निवडणूक व सुशासन या विषयावर माहिती देण्यात येणार आहे. तसेच महानगरपालिका, नगरपरिषद ग्रामपंचायतींमध्ये “लोकशाही निवडणूक व सुशासन” या विषयाचे होर्डिग्ज, बॅनर्स लावण्यात येणार आहेत. प्राथमिक आरोग्य केंद्र व बस स्टँड, रेल्वे स्टेशन, बाजारपेठा इ. ठिकाणी पोस्टर्स, कापडी फलक लावण्यात येणार आहेत. स्थानिक टि.व्ही, केबल व रेडिओ चॅनलवर 30 सेकंदाची “लोकशाही निवडणूक व सुशासन” या विषयावर जिंगल्स प्रसारीत करण्यात येणार आहे. मतदार यादी जागृती अभियानाची व्यापक प्रसिध्दी करण्याण्यासोबतच अक्षम नोंदणीकृत राजकीय पक्षांची नोंदणी रद्द केली, NOTA ला सर्वाधिक मते पडल्यास अशा जागी फेरनिवडणूक घेणेबाबत सुधारणा करण्यात आली, याबाबत माहिती देण्यात येणार आहे.

18 व 19 वर्षे वयोगटातील विद्यार्थ्यांची निश्चिती करून त्यांचे नाव मतदार यादीत अंतर्भुत करण्यासंदर्भात महाविद्यालयात कक्ष उभारण्यात येणार आहेत. मतदार यादीत महिला मतदारांची टक्केवारी कमी आहे अशा मतदान केद्रांचा शोध घेऊन त्याठिकाणी महिला मतदारांचे नाव नोंदणीकरीता विशेष मोहिम राबविण्यात येणार आहे. स्थानिक स्वराज्य संस्थामध्ये (प्रामुख्याने शहरी भागातील) इतर भाषिक मतदारांना निवडणूकीचे महत्व पटवून देण्यासाठी व निवडणूकीतील त्यांचा सहभाग वाढवून निवडणूकीची टक्केवारी वाढविण्यासाठी संबंधीत ठिकाणी मान्यवरांच्या उपस्थितीत जनसामान्यांची “चुनाव पाठशाला” आयोजित करण्यात येणार आहे. माध्यमिक व उच्च माध्यमिक महाविद्यालयांमध्ये लोकशाही, निवडणूक व सुशासन या विषयावर निबंध व वक्तृत्व स्पर्धा आयोजित करण्यात येणार आहेत. कार्यक्षेत्रातील स्वयंसेवी संस्थांच्या मदतीने व सहकार्याने मतदार जागृती मोहिम राबविणेत येणार आहे, असे जिल्हाधिकारी कार्यालयाने प्रसिध्दी पत्रकाद्वारे कळविले आहे.

पुणे- जिल्हा परिषद, पंचायत समिती शिरुर व बालाजी शिक्षण प्रसारक मंडळ शिरुर यांच्या संयुक्त विद्यमाने जिल्हास्तरीय विज्ञान प्रदर्शन 2018-19 नुकतेच दि. 21, 22 आणि 23 जानेवारी या कालावधीत बालाजी इंग्लिश मिडीयम स्कुल शिरुर येथे संपन्न झाले.
या प्रदर्शनात दि. 21 जानेवारी रोजी विज्ञान दिंडी, शिक्षकांसाठी कार्यशाळा, जादुचे प्रयोग, कु.अंकिता नगरकर युवा शास्त्रज्ञ यांचे व्याख्यान, जल साक्षरतेचे पोस्टर प्रदर्शन, विज्ञान प्रश्न मंजुषा, रात्री सांस्कृतिक कार्यक्रम असे विविध कार्यक्रम संपन्न झाले.
तसेच प्रदर्शनात पाणी बचत, विज बचत, शेती तंत्रज्ञान, अन्नधान्य अधुनिक पध्दती, दळणवळण उर्जा बचत या विविध विषयांवरील विविध उपकरणे विद्यार्थ्यांनी सादर केली. शिरुर व जिल्ह्यातील विद्यार्थ्यांनी प्रकल्प पाहण्यासाठी बहुसंख्य शाळांतील विद्यार्थ्यांनी गर्दी केली होती.
तीन दिवस चाललेल्या या प्रदर्शनाचा समारोप समारंभ दि. 23 जानेवारी 2019 रोजी बालाजी शिक्षण प्रसारक मंडळाचे अध्यक्ष श्री.सदाशिव(आण्णा) पवार यांच्या अध्यक्षतेखाली संपन्न झाला. प्रमुख पाहुणे म्हणून माजी विधानसभा अध्यक्ष श्री.दिलीपराव वळसेपाटील यांची कन्या कु.पुर्वा वळसेपाटील उपस्थित होत्या. या प्रसंगी मा.सभापती प्रकाश पवार, पुणे जिल्हा दुध उत्पादक संघाच्या संचालिका सौ.केशरताई पवार, सी.टी.बोरा शिरुर कॉलेजचे प्राचार्य डॉ.सि.के.मोहिते, तहसिलदार भोसलेसाहेब, बी.डी.ओ. जठार साहेब, जि.प.सभापती सुजाताताई पवार, राष्ट्रवादी काँग्रेस अध्यक्ष श्री.मानसिंग पाचुंदकर, पंचायत समिती शिरुरचे सभापती श्री.विश्वासराव कोहकडे, जि.प.सदस्य श्री.राजेंद्र जगदाळे, जि.प.सदस्या स्वाती पाचुंदकर, उपसभापती कुसुमताई मांढरे, जि.प.सदस्या सविताताई बगाटे, मा.सभापती मोनिकाताई हरगुडे, पं.स.सदस्या सौ.सविता प­-हाड, पं.स.सदस्या सौ.अरुणाताई घोडे, पं.स.सदस्य श्री.विजय रणसिंग, पं.स.सदस्य श्री.राजेंद्र गदादे, पं.स.सदस्य श्री.आबासाहेब सरोदे, पं.स.सदस्य डॉ.पोकळे, मा.पं.स.सदस्या दिपालीताई शेळके, जिल्हा मुख्याध्यापक संघाचे अध्याक्ष श्री.हरिश्चंद्र गायकवाड, मुख्याध्यापक संघ शिरुरचे अध्यक्ष श्री.शितोळे, सचिव श्री.मारुती कदम, पुणे जिल्हा विज्ञान अध्यापक संघाचे अध्यक्ष श्री.रोहीदास एकाड, पुणे जिल्हा उपशिक्षणाधिकारी श्री.बाळासाहेब राक्षे, विज्ञान पर्यवेक्षीका श्रीमती दिंडे, पं.स.शिरुरचे गटशिक्षणाधिकारी श्री.बाळकृष्ण कळमकर, सौ.वंदनाताई पवार, पै.राहुल पवार व श्री.बाबुराव उमाप आदी मान्यवर उपस्थित होते.
सदर प्रदर्शनामध्ये ए.जे.मलगुंडे सर यांच्या नेतृत्वाखाली 11 परिक्षकांनी मुल्यमापण करण्याचे काम केले.
या विज्ञान प्रदर्शनात इयत्ता 6 वी ते 8 वी या गटामध्ये प्रथम क्रमांक रोहन राजाराम बरडे (व्हिल हेक्स – जवाहरलाल विद्यालय केडगाव ता.दौंडे), द्वितीय क्रमांक राघव अतुल कुलकर्णी (मेट्रो कार पार्किंग – लक्ष्मणराव आपटे प्रशाला पुणे), तृतीय क्रमांक वंदना मारुती मेणे (स्मार्ट टोल नाका – ग्रा.वि.वि.भांबुर्डे ता.मुळशी), आदिवासी गट नरेंद्र दिनकर कारभळ (सौरभात झोडणी यंत्र – न्यु इंग्लिश स्कुल राजुन नं.1 ता.जुन्नर) यांनी विद्यार्थ्यांनी पटकावले.
तर इयत्ता 9 वी ते 12 वी या गटामध्ये प्रथम क्रमांक शुभम गणेश सोनार (चारचाकी वाहने चोरी रोखण्याचे यंत्र – भालचंद्र विद्यालय भांबोली, ता.खेड), द्वितीय क्रमांक अद्वैत गौरव बुरांडे (समुद्रातील पाण्याचे रुपांतरण – शिवराज विद्यामंदिर पुणे पुर्व), तृतीय क्रमांक आदित्य महेश शिरसाठ (घरगुती पाणी पंप – रामराव पलांडे माध्य. आश्रमशाळा मुखई ता.शिरुर) आदिवासी गट अंकिता नितीन खंडागळे (पाणी बचत स्मार्ट किट – आदर्श विद्यालय आंबोली ता.खेड) यांनी विद्यार्थ्यांनी पटकावले.
लोकसंख्या प्राथमिक गटामध्ये प्रथम क्रमांक सौ.योगिता रामचंद्र शिंगाडे (स्त्री पुरुष समानता – जि.प.प्रा.शाळा पाईट ता.खेड), द्वितीय क्रमांक सौ.सुनिता राजू वामण (लेक वाचवा देश घडवा – जि.प.प्राथ.शाळा कुसुर ता.जुन्नर), तृतिय क्रमांक श्रीमती मनिषा शशिकांत बारवकर (बेटी बचाव बेटी पढाओ – जि.प.प्राथ.शाळा पोम्बर्डी ता.भोर) यांनी पटकावले.
लोकसंख्या माध्यमिक गटामध्ये प्रथम क्रमांक श्री.महेंद्र दिक्षीत (लोकसंख्या शिक्षण – डी.ए.सातव हायस्कुल बारामती), द्वितीय क्रमांक श्री.दिलीप गंगाधर चौधरी (कशाला हवे आणखी मेल – महात्मा गांधी विद्यालय मंचर), तृतिय क्रमांक मनिषा श्रीरंग पवार लोकसंखेचे दुष्परिणाम – ज्ञानेश्वर विद्यालय आळंदी ता.खेड) यांनी पटकावले.
शैक्षणिक साहित्य प्राथमिक गटामध्ये सौ.मुलाणी झुबेदा मेहमुद (चौरस चेंडु बोर्ड – जि.प.प्रा.शाळा जे.पी.नगर इंदापूर), द्वितीय क्रमांक श्री.दिपक शिवाजी रेटवडे (ग्रीटींग टिचींग – जि.प.प्राथ.शाळा टाकळकरवाडी ता.खेड) यांनी पटकावले.
शैक्षणिक साहित्य माध्यमिक गटामध्ये श्री.अशोक बापुराव सोनवलकर (पेशींचे अंतरंग – सनब्राईट माध्य.विद्यालय आंबेगाव ता.हवेली), द्वितीय क्रमांक आर.एन.रांघवन (इलेक्ट्रॉनिक कॉन्फ्युगिरेशन – ग्यानबा सोपानराव मोझे प्रशाला येरवडा पुणे पुर्व) यांनी पटकावले.
प्रयोगशाळा परिचर गटामध्ये श्री.केशव तुकाराम पवळे (होपचे उपकरण – आर.आर. विद्यालय भोर), द्वितीय क्रमांक श्री.चंद्रकांत दादाभाऊ घाटगे (सौर उर्जेवर हायड्रोजन वायूची निर्मिती व उपयोग – न्यु इंग्लिश स्कुल कांदळी ता.जुन्नर) यांनी पटकावले. सर्व यशस्वी स्पर्धकांना परितोषिक देवून गौरवण्यात आले.
प्राचार्य श्री.सी.के.मोहिते यांनी विद्यार्थ्यांनी भविष्यातील समस्यांचा वैज्ञानिक दृष्टीने विचार करुन नवनविन संकल्पना यावर विचार करावा व त्यातुनच उद्याचे वैज्ञानिक तयार होतील असा विश्वास तयार केला. विद्यार्थ्यांमध्ये सुप्त गुण दडलेले असतात त्यांना अशा प्रदर्शनामधून आपले विचार व्यक्त करण्याचे व्यासपिट मिळते असे सांगितले.
प्रदर्शन यशस्वी करण्यासाठी बालाजी शिक्षण संकुलातील सर्व स्टाफ, शिरुर तालुका मुख्याध्यापक संघ, शिरुर तालुका गणित विज्ञान अध्यापक संघाचे अध्यक्ष श्री.संभाजी ठुबे, सचिव श्री.कल्याण कडेकर, खजिनदार श्री.दादाभाऊ घावटे, श्री.विलास कुरकुटे आदींनी परिश्रम घेतले.
या कार्यक्रमाचे सुत्र संचालन उपप्राचार्या सौ.स्वाती चत्तर, सौ.राजश्री नेमाणे, श्री.निलेश काळे व श्री.अनिल साकोरे यांनी केले. बालाजी प्राथमिक विद्यालयाचे प्राचार्य श्री.विनायक म्हसवडे, बालाजी इंग्लिश मिडीयम स्कुलचे प्राचार्य श्री.गणेश मिटपल्लीवार व सर्व स्टाफने विशेष परिश्रम घेतले.

पुणे :- लोकशाही व्यवस्थेमध्ये नागरिकांना मतदानाचा अमुल्य अधिकार प्राप्त झाला आहे. या अधिकाराचा वापर करुन लोकशाहीच्या बळकटीकरणासाठी प्रत्येकाने मतदान करावे, असे प्रतिपादन विभागीय आयुक्त डॉ.दीपक म्हैसेकर यांनी आज येथे केले.

भारत निवडणूक आयोगाच्याच्यावतीने मतदान प्रक्रियेच्या जनजागृतीसाठी दरवर्षी 25 जानेवारी रोजी राष्ट्रीय मतदार दिवस साजरा करण्यात येतो. यानिमित्त जिल्हाधिकारी तथा जिल्हा निवडणूक अधिकारी,पुणे, मतदार नोंदणी अधिकारी 209-शिवाजीनगर,211-खडकवासला आणि 214-कँटोनमेंट मतदार संघ यांच्या संयुक्त विद्यमाने येथील शासकीय अभियांत्रिकी महाविद्यालयाच्या ग्रंथालय इमारतीमध्ये आयोजित कार्यक्रमात विभागीय आयुक्त डॉ.म्हैसेकर बोलत होते. यावेळी जिल्हाधिकारी नवल किशोर राम, पोलीस आयुक्त डॉ.के.वेंकटेशम, उपजिल्हानिवडणूक अधिकारी मोनिका सिंग, शासकीय अभियांत्रिकी महाविद्यालयाचे प्राचार्य डॉ.डी.बी.आहुजा, उपविभागीय अधिकारी ज्योती कदम, जलतरणपटू सुयश जाधव, अभिनेता रमेश परदेशी उपस्थित होते.
यावेळी बोलताना डॉ.म्हैसेकर यांनी, सुशिक्षीत मतदार, निवडणूक प्रक्रियेमध्ये सहभागी अधिकारी व कर्मचारी यांनी मतदान प्रक्रियेमध्ये सहभागी होऊन मतदानाची टक्केवारी वाढवावी असे सांगितले. खऱ्या अर्थाने प्रातिनिधिक सरकारसाठी शंभर टक्के मतदान होणे आवश्यक असून मतदान जागृतीसाठी भविष्यात मोहिम राबविण्याची वेळ येणार नाही, अशा पध्दतीने प्रत्येक नागरिकाने स्वयंजबाबदारीने मतदान करायला हवे, असे आवाहन केले.
जिल्हाधिकारी नवल किशोर राम यांनी, मोठया संघर्षानंतर नागरिकांना मतदानाचा अधिकार प्राप्त झाला असून लोकशाही प्रगल्भ होण्यासाठी सर्वांनी मतदान प्रक्रियेमध्ये सहभागी होऊन आपले कर्तव्य पार पाडावे असे सांगितले. मतदानातील उदासीनता टाळण्यासाठी विद्यार्थ्यांनी मोठया संख्येने मतदान प्रक्रियेमध्ये सहभागी व्हावे. स्थानिक स्वराज्य संस्थांच्या निवडणूकीत भरघोस मतदान होते, त्याचप्रमाणे नागरिकांनी विधानसभा व लोकसभा निवडणूकीत भरघोस मतदान करावे असे आवाहन केले.
जलतरणपटू सुयश जाधव, अभिनेता रमेश परदेशी यांनी युवकांनी मतदानाविषयी जागृत रहावे असे सांगितले. उपजिल्हा निवडणूक अधिकारी मोनिका सिंह यांनी प्रास्ताविकात, जिल्हा प्रशासनातर्फे राबविण्यात आलेल्या मतदार नेांदणी मोहिमेची माहिती दिली. मतदार यादीमध्ये नांव नोंदणीसाठी विद्यार्थ्यांनी जागरुक राहण्याचे आवाहन त्यांनी केले. यावेळी मतदार नोंदणी मोहिमेमध्ये उल्लेखनीय कार्य केल्याबद्दल मतदार नोंदणी अधिकारी स्नेहल बर्गे, सुषमा चौधरी, रोहिणी घाडगे, वर्षा सकपाळ यांच्यासह सानिका कुलकर्णी, तीर्थ पुराणिक, संस्कृती माटे, प्रणव चाळके व रेणूका पाटील या विद्यार्थ्यांचा मान्यवरांच्याहस्ते प्रमाणपत्र देऊन सत्कार करण्यात आला. कार्यक्रमाच्या सुरुवातीला अभियांत्रिकी महाविद्यालयाच्या विद्यार्थ्यांनी मतदानाचे महत्व या विषयावर माहिती दर्शविणाऱ्या फलकांसह बोट क्लब सभागृह-जुना मुंबई पुणे महामार्ग-गुन्हे अन्वेषण विभाग कार्यालय-अभियांत्रिकी महाविद्यालय या दरम्यान रॅली काढून प्रबोधन केले. कार्यक्रमाला अभियांत्रिकी महाविद्यालयाचे प्राध्यापक, विद्यार्थी मोठया संख्येने उपस्थित होते.