मुंबई : राज्य मंत्रिमंडळाची बैठक आज पार पडली असून त्यामध्ये 10 मोठ्या निर्णयावर मोहोर लावण्यात आली आहे. राज्यात यापुढे शेतजमिनीच्या वाटणीपत्राच्या दस्तास लागणारी नोंदणी फी माफ करण्याचा मोठा निर्णय राज्य सरकारने घेतला आहे. तसेच इचलकरंजी आणि जालना महानगरपालिकांना वस्तू व सेवा कर भरपाई अनुदान देण्यास मान्यता देण्यात आली आहे. महसूल खात्यामध्ये एक मोठा निर्णय घेण्यात आला आहे. शेतकऱ्यांना त्यांच्या शेतीची आपसामध्ये वाटणी करायची असेल तर एकूण रेडीरेकनरच्या एक टक्के किंमत मोजावी लागायची. आता त्यामध्ये बदल करण्यात आला आहे. आता फक्त 500 रुपयांमध्ये ही वाटणी केली जाणार आहे. त्यामुळे शेतकऱ्यांना मोठा दिलासा मिळणार आहे. राज्य सरकारच्या या निर्णयामुळे शेतकऱ्यांना मोठा फायदा होणार आहे. या आधी शेतीच्या वाटणीपत्राच्या दस्तासाठी मोठी रक्कम मोजावी लागायची.

मंत्रिमंडळ निर्णय (संक्षिप्त)
(मंगळवार, दि. २७ मे २०२५)
एकूण निर्णय: १०

• रायगड जिल्ह्यातील पेण येथील सुहित जीवन ट्रस्च्या एकलव्य व्यवसाय प्रशिक्षण केंद्रास कार्यशाळेस तसेच,पदांना मान्यता. (दिव्यांग कल्याण विभाग)

•मा. शेट्टी आयोगाच्या शिफारशीनुसार राज्यातील न्यायिक अधिकाऱ्यांसाठी टंकलेखकाची पदे निर्माण करण्यास मान्यता.(विधि व न्याय विभाग)

• इचलकरंजी व जालना महानगरपालिकांना वस्तू व सेवा कर भरपाई अनुदान देण्यास मान्यता. इचलकरंजीला ६५७ कोटी , जालन्याला ३९२ कोटी पाच वर्षांत मिळणार (वित्त विभाग)
• शेतजमिनीच्या वाटणीपत्राच्या दस्तास लागणारी नोंदणी फी माफ. (महसूल विभाग)
• पत्रकार क्लब ऑफ नागपूर, नागपूर यांना देण्यात आलेल्या जमीनीबाबतच्या अटी-शर्तीमध्ये बदल करण्यास मान्यता. (महसूल विभाग)

• फॉरेस्ट डेव्हलपमेंट कॉर्पोरेशन ऑफ महाराष्ट्र लि. (FDCM Ltd.) मधील १हजार ३५१ पदांच्या सुधारीत आकृतीबंधास मंजूरी (वने विभाग )

• स्थानिक स्वराज्य संस्थांच्या उच्च प्राथमिक शाळांमध्ये अंशकालीन निदेशकांच्या नियुक्तीच्या सुधारीत धोरणास मान्यता. (शालेय शिक्षण विभाग)

• अशियाई विकास बैंक (ADB) सहाय्यित “महाराष्ट्र अॅग्रीबिझनेस नेटवर्क (मॅग्नेट) प्रकल्प” संस्थेवर पणन मंत्री पदसिध्द अध्यक्ष राहणार. (पणन विभाग)

• कृषि पर्यवेक्षक व कृषि सहायक यांच्या पदनामात “उप कृषि अधिकारी” व “सहायक कृषि अधिकारी” असा बदल (कृषि विभाग )

• महाराष्ट्र राज्य हातमाग महामंडळाच्या नागपूर येथील १९५ कर्मचाऱ्यांना ६ व्या वेतन आयोगाची थकबाकी मंजूर (वस्त्रोद्योग विभाग)

राज्यातील विविध क्षेत्रातील सोळा यशस्वी युवांचा होणार सन्मान

छत्रपती संभाजीनगर (दि. २७): यशवंतराव चव्हाण सेंटरच्या वतीने मागील सव्वीस वर्षांपासून राज्यस्तरीय युवा पुरस्कार दिले जातात. महाराष्ट्राच्या सर्वागीण विकासासाठी विविध क्षेत्रात विधायक, भरीव व विशेष कामगिरी करणाऱ्या युवक-युवतींना हे पुरस्कार देण्यात येतात. यशवंतराव चव्हाण सेंटरच्या कार्याध्यक्ष खासदार सुप्रिया सुळे यांच्या मार्गदर्शनाखाली ही संपूर्ण प्रक्रिया राबविण्यात येते.
यावर्षीच्या पुरस्कारांची घोषणा करण्यात आली असून पुरस्कार वितरण सोहळा छत्रपती संभाजीनगर येथे शुक्रवार दि, ३० मे २०२५ रोजी सकाळी ९.३० वाजता रुक्मिणी सभागृह, एमजीएम परिसर येथे संपन्न होणार आहे. महाराष्ट्र राज्याचे माजी आरोग्य मंत्री राजेश टोपे यांच्या हस्ते या पुरस्कारांचे वितरण होणार आहे. कार्यक्रमाच्या अध्यक्षस्थानी चव्हाण सेंटरच्या जिल्हा केंद्राचे अध्यक्ष अंकुशराव कदम असतील, तर मानद कार्यक्रम व्यवस्थापक दत्ता बाळसराफ यांची प्रमुख उपस्थिती असणार आहे.

यशवंतराव चव्हाण राज्यस्तरीय युवा पुरस्कार २०२४-२५ सालचे मानकरी पुढीलप्रमाणे: साहित्य – विनायक होगाडे (कोल्हापूर), मृदगंधा दीक्षित (पुणे), सामाजिक – आकाश टाले (नागपूर), ऋतुजा जेवे (बुलढाणा), इनोव्हेटर – सुश्रुत पाटील (पालघर), पद्मजा राजगुरू (परभणी), क्रीडा – ओजस देवतळे, नागपूर (क्रीडा प्रकार : धनुर्विद्या), हृतिका श्रीराम, सोलापूर (डायव्हिंग), पत्रकारिता – प्रथमेश पाटील (पुणे), ज्योती वाय. एल. (मुंबई), उद्योजक जयेश टोपे (नाशिक) शिवानी सोनवणे (पुणे), तसेच रंगमंचीय कलाविष्कार विभागात कृष्णाई उळेकर, धाराशिव (लोककला), तन्वी पालव, सिंधुदुर्ग (शास्त्रीय नृत्य), ऋतुजा सोनवणे, जळगाव (शास्त्रीय संगीत), कल्पेश समेळ, रायगड (नाट्य) असे एकूण सोळा पुरस्कार मान्यवरांच्या हस्ते प्रदान केले जाणार आहेत. महाराष्ट्रातील युवकांच्या कार्याचे मूल्यमापन होऊन त्यांचा गौरव व्हावा आणि प्रोत्साहन मिळावे, हे या पुरस्कारांचे उद्दिष्ट आहे. २१ हजार रुपये रोख, स्मृतीचिन्ह व मानपत्र असे या पुरस्काराचे स्वरुप आहे.

या कार्यक्रमास उपस्थित राहण्याचे आवाहन यशवंतराव चव्हाण सेंटरचे कोषाध्यक्ष सचिन मुळे, सचिव निलेश राऊत, कार्यकारिणी सदस्य डॉ. अपर्णा कक्कड, डॉ. श्रीरंग देशपांडे, डॉ. आशिष गाडेकर, डॉ. रेखा शेळके, डॉ. दासू वैद्य, प्रेरणा दळवी, सुबोध जाधव, रुपेश मोरे, राजेंद्र वाळके, वैशाली बावस्कर, संतोष मेकाळे आदींनी केले आहे.

मुंबई-एका 25 वर्षीय तरुणीने 22 व्या मजल्यावरून उडी मारून आत्महत्या केल्याची भयंकर घटना मुंबईच्या विक्रोळी परिसरात घडली आहे. भयंकर म्हणजे सदर मुलगी इमारतीच्या परिसरात पार्क करण्यात आलेल्या एका दुचाकीवर पडली. यामुळे तिच्या शरीराचे 2 तुकडे होऊन घटनास्थळी अक्षरशः रक्तामांसाचा सडा पडला होता.

यासंबंधीच्या माहितीनुसार, विक्रोळीतील कन्नमवार नगरात सोमवारी रात्री उशिरा ही घटना घडली. हर्षदा तांदोलकर असे मृत तरुणीचे नाव आहे. मुंबईत सोमवारी मुसळधार पाऊस सुरू असताना तिने 22 व्या मजल्यावरून उडी मारून आपली जीवनयात्रा संपवली. तिने हे टोकाचे पाऊल का उचलले? हे स्पष्ट झाले नाही. पण या घटनेमुळे परिसरात एकच खळबळ माजली आहे.

प्रत्यक्षदर्शींनी दिलेल्या माहितीनुसार, 25 वर्षीय हर्षदा तांदोलकरने इमारतीच्या 22 व्या मजल्यावरून उडी मारली. त्यानंतर घटनास्थळावरील दृश्य अंगाचा थरकाप उडवणारे होते. कन्नमवार नगरातील इमारत क्रमांक 97 मध्ये ही घटना घडली. एवढ्या उंचीवरून उडी मारल्यामुळे तरुणीच्या शरीराचे दोन तुकडे झाले होते. यामुळे घटनास्थळी रक्तामांसाचा सडा पडला होता. परिसरातील नागरिकांनी या घटनेची माहिती पोलिसांना दिली. त्यानंतर त्यांनी घटनास्थळी जाऊन मृतदेह ताब्यात घेतला. पोलिसांनी या प्रकरणी पंचनामा करून पुढील तपासाला सुरुवात केली आहे.

हर्षदा तांदोलकरने 22 व्या मजल्यावरून उडी मारून टोकाचे पाऊल का उचलले? हे अद्याप स्पष्ट झाले नाही. पण एका पोलिस अधिकाऱ्याने तिने तणावातून हे पाऊल उचलल्याचे सांगितले आहे. हर्षदाने बहुजमली इमारतीवरून उडी मारली. त्यानंतर ती खाली उभ्या करण्यात आलेल्या एका दुचाकीवर कोसळली. यामुळे तिच्या मृतदेहाचे दोन तुकडे झाले होते, असे ते म्हणाले.

मुंबई: उपमुख्यमंत्री एकनाथ शिंदे यांच्या नेतृत्वातील शिवसेनेचे नेते तथा राज्याचे सामाजिक न्यायमंत्री संजय शिरसाट यांचे सुपुत्र सिद्धांत शिरसाट यांच्यावर एका विवाहित महिलेने शारीरिक व मानसिक छळाचे गंभीर आरोप केलेत. या प्रकरणी पीडितेने सिद्धांत शिरसाट यांना कायदेशीर नोटीस बजावत त्यांच्यावर मानसिक व शारीरिक छळासह हुंडा प्रतिबंधक कायद्यांतर्गत गुन्हा दाखल करण्याची मागणी केली आहे. या घटनेमुळे राज्याच्या राजकीय वर्तुळात एकच खळबळ माजली आहे.दरम्यान,या प्रकरणी सिद्धांत शिरसाट यांनी या नोटीशीची आपल्याला कोणतीही कल्पना नसल्याचे सांगत आपले हात वर केले आहेत .

पीडित महिलेचे वकील चंद्रकांत ठोंबरे यांनी दिलेल्या माहितीनुसार, सिद्धांत शिरसाट यांनी चेंबूर येथील त्यांच्या वडिलांच्या नावावर असलेल्या फ्लॅटमध्ये पीडित महिलेशी लग्न केले. दोन वर्षे ते चांगले राहिले. पण नंतर तिसऱ्याच मुलीशी त्यांचे अफेअर सुरू झाले. यामुळे त्यांनी पीडितेकडे दुर्लक्ष करत तिचा मानसिक छळ सुरू केला. तिने कुठे तक्रार दाखल करू नये म्हणून सिद्धांत शिरसाटने स्वत:च्या डोक्याला बंदूक लावत तिला धमकावले.

वकील चंद्रकांत ठोंबरे म्हणाले की, सिद्धांत शिरसाट यांनी पीडितेला छत्रपती संभाजीनगरलाही येऊ दिले नाही. तू तिकडे आलीस तर तुझे तंगडे तोडू अशी धमकी त्यांनी तिला दिली. त्यामुळे आम्ही त्यांना यासंबंधी नोटीस पाठवून पीडितेला 7 दिवसांच्या आत नांदण्यास घेऊन जाण्याचा इशारा दिला आहे. त्यांनी पीडितेला नांदण्यास नेले नाही तर आम्ही महिला अत्याचार प्रतिबंधक काद्यांतर्गत त्यांच्यावर 3 केस दाखल करणार आहोत.

छत्रपती संभाजीनगरचे पालकमंत्री संजय शिरसाट यांचे सुपुत्र सिद्धांत शिरसाट यांच्यावर एका विवाहित महिलेने गंभीर स्वरूपाचे आरोप केले आहेत. सदर महिलेने सिद्धांत यांना कायदेशीर नोटीस बजावून त्यांच्यावर मानसिक आणि शारीरिक छळ केल्याचा आरोप केला आहे. पीडित महिलेने दिलेल्या माहितीनुसार, त्यांची 2018 मध्ये सोशल मीडियावरून सिद्धांत शिरसाट यांच्याशी ओळख झाली. काही दिवसांतच हे नाते चेंबूर येथील एका फ्लॅटमध्ये शारीरिक संबंधांपर्यंत पोहोचले. या संबंधानंतर सिद्धांतने आत्महत्येच्या धमक्या देत तिला भावनिक ब्लॅकमेल केले. त्याचबरोबर लग्नासाठी दबाव आणला.

पीडित महिलेच्या म्हणण्यानुसार, सिद्धांतच्या सततच्या भावनिक आश्वासनांवर विश्वास ठेवून तिने त्याच्याशी विवाह केला. मात्र या नात्याचा शेवटही वेदनादायक ठरला. महिलेला गर्भधारणाही झाली होती, पण सिद्धांतने जबरदस्तीने तिचा गर्भपात करवून घेतल्याचा उल्लेख तिने नोटीसीमध्ये केला आहे. संजय शिरसाट हे राज्याचे सत्ताधारी शिवसेनेचे मंत्री आहेत. त्यामुळे पोलिसांनी अद्याप या प्रकरणी कोणतीही कारवाई न करता हे प्रकरण दाबण्याचा प्रयत्न केल्याचेही यात नमूद करण्यात आले आहे.

‘द रॉयल्स’ या मालिकेमुळे सध्या चर्चेत असलेल्या डिनो मोरियाची अलीकडेच EOW (इकॉनॉमिक ऑफेन्सेस विंग) ने चौकशी केली आहे. सोमवारी सकाळी ११ वाजता ते आपले म्हणणे नोंदवण्यासाठी कार्यालयात पोहोचले. मिठी नदी घोटाळ्यातील मुख्य आरोपी केतन कदमच्या कॉल रेकॉर्डमधून डिनो मोरियाचे नाव समोर आले आहे.

फ्री प्रेस जर्नलच्या वृत्तानुसार, ईओडब्ल्यूमधील सूत्रांनी सांगितले की, डिनो मोरिया आणि त्याचा भाऊ सॅन्टीनो यांना आज चौकशीसाठी बोलावण्यात आले आहे. मिठी नदी घोटाळ्यातील आरोपी केतनशी डिनो मोरिया आणि त्याचा भाऊ सँटिनो यांचे अनेक फोन कॉल्स झाल्याचे आरोप आहेत. चौकशीदरम्यान, तपास अधिकाऱ्याने त्याच्या संपर्क तपशीलांशी संबंधित प्रश्न विचारले.

खरंतर, मिठी नदीची स्वच्छता मुंबई महानगरपालिकेने केली होती. यासाठी, गाळ पुशर्स आणि ड्रेजिंग मशीन वापरण्यात आल्या आहेत. कोची येथील कंपनी मॅटप्रॉप टेक्निकल सर्व्हिसेस प्रायव्हेट लिमिटेडकडून मोठ्या रकमेला ही मशीन्स खरेदी करण्यात आली होती.

या प्रकरणाच्या चौकशीत असे दिसून आले की केतन कदम आणि जय जोशी यांनी मॅटप्रॉप कंपनीचे अधिकारी आणि बीएमसीच्या स्टॉर्म वॉटर ड्रेनेज विभागाच्या अधिकाऱ्यांशी संगनमत करून स्वच्छतेच्या नावाखाली ६५ कोटी रुपयांचा घोटाळा केला.

घोटाळ्यातील मुख्य आरोपी केतन कदम यांच्या कॉल रेकॉर्डची चौकशी केली असता, अभिनेता डिनो मोरिया आणि त्याच्या भावाची नावे समोर आली. त्या दोघांनीही केतन कदमशी अनेक वेळा बोलले होते. तपास अधिकाऱ्यांचा असा विश्वास आहे की, डिनो मोरिया आणि केतन हे केवळ मित्र नाहीत तर त्यांच्यात आर्थिक व्यवहार देखील असू शकतात. यामुळेच तपासाच्या कक्षेत डिनोची चौकशी केली जात आहे.

नेटफ्लिक्सवरील ‘द रॉयल्स’ या मालिकेत नवाब सलाउद्दीनच्या भूमिकेमुळे डिनो मोरिया चर्चेत आहे. येत्या काळात तो मल्टीस्टारर चित्रपट ‘हाऊसफुल ५’ मध्ये दिसणार आहे. डिनो मोरियाने १९९९ मध्ये आलेल्या ‘प्यार में कभी कभी’ या चित्रपटातून बॉलिवूडमध्ये पदार्पण केले, जरी त्याला २००० मध्ये आलेल्या ‘राज’ या चित्रपटातून ओळख मिळाली.