मुंबई, दि. 15 : वातावरणीय बदलामुळे तापमानात प्रचंड वाढ झाल्याने हवेमध्ये कार्बन डाय ऑक्साइडचे प्रमाण वाढले आहे. यावर उपाय म्हणून शुद्ध हवेसाठी पर्यावरणपूरक वाहतूक व्यवस्था गरजेची असल्याचे मत पर्यावरणमंत्री रामदास कदम यांनी व्यक्त केले.

हॉटेल ताज पॅलेस येथे आज प्रदूषण नियंत्रण मंडळ, नीरी आणि मुंबई फर्स्टतर्फे आयोजित ‘शुद्ध हवेसाठी पर्यावरणपूरक दळणवळण’ या विषयावरील कार्यशाळेच्या उद्घाटनप्रसंगी ते बोलत होते.

श्री.कदम म्हणाले, महाराष्ट्र प्रदूषण नियंत्रण मंडळाने हवा गुणवत्ता अभ्यासाकरिता नीरी या संस्थेमार्फत राज्यातील निवडक शहरातील हवा प्रदूषणाच्या स्त्रोतांचा विश्लेषणात्मक अभ्‍यास अहवाल तयार केला आहे. त्यात वाहन प्रदूषण हे हवा प्रदूषणाचा प्रमुख स्त्रोत असल्याचे अनुमान काढले आहे. केंद्र शासनाच्या राष्ट्रीय शुद्ध हवा कार्यक्रमानुसार योग्य तो कृती आराखडा तयार करण्याचे काम सुरु झाले आहे. विविध शहरातील एकूण हवा प्रदूषणाच्या अंदाजे 30 टक्के प्रदूषण हे वाहनामुळे होते असे लक्षात आले असून त्याचा मानवी आरोग्यावर परिणाम होत आहेत.

गेल्या वर्षी प्लास्टिक बंदीबाबतचा निर्णय घेतला. लोकसहभागामुळे तो यशस्वी ठरत आहे. आता हवा शुद्ध राहण्यासाठी प्रदूषणावर कशी मात करायची यासाठी पर्यावरण विभाग वेगवेगळे उपाय करीत आहे. भारतात सर्वात अधिक प्रदूषण दिल्ली शहरात आहे. तेथे रस्त्याच्या प्रमुख ठिकाणी धूलिकण आणि कार्बन डाय ऑक्साईड शोषणारी यंत्रे बसविली आहेत. मुंबई शहरातही अशी यंत्रणा राबविली जाईल, असेही श्री.कदम यांनी सांगितले.

प्रारंभी महाराष्ट्र प्रदूषण नियंत्रण मंडळाचे अध्यक्ष सुधीर श्रीवास्तव यांनी प्रास्ताविक केले. मुंबई फर्स्टचे सचिव नंदन मालुसे आणि मुंबई महानगर विकास आयुक्त ए.राजीव यांनी शुद्ध हवा कार्यक्रमावर आपल्या भाषणातून चर्चा केली. महाराष्ट्र प्रदूषण नियंत्रण मंडळाचे सदस्य सचिव ई.रविंद्रन यांनी आभार मानले.

मुंबई, दि.15 जून : रेशन कार्डधारक महिन्याच्या कोणत्याही दिवशी रेशन घेण्याकरिता आल्यास त्यास रास्तभाव दुकानदाराने धान्य उपलब्ध करून देणे बंधनकारक करण्यात आले आहे. तशा स्वरूपाचे परिपत्रक विभागाकडून निर्गमित करण्यात आले असल्याची माहिती अन्न व नागरी पुरवठामंत्री जयकुमार रावल यांनी दिली.

ग्रामीण तसेच शहरी भागातील रेशनकार्ड धारकांना रास्तभाव दुकानदार महिन्यातील ठराविक वेळेनंतर रेशन उपलब्ध करून देत नाही. या संदर्भात विभागाकडे तक्रारी आल्या होत्या. तसेच विधानसभा सदस्यांनी याबाबतीत सभागृहामध्ये प्रश्न उपस्थित केले होते. याची दखल घेऊन याबाबत अन्न, नागरी पुरवठा व ग्राहक संरक्षण विभागाने नुकतेच शासन परिपत्रक निर्गमित केले आहे. यानुसार रास्त भाव दुकानदारांवर रेशनकार्ड धारकांना महिन्याच्या कोणत्याही दिवशी धान्य (रेशन) उपलब्ध करून देण्याची जबादारी निश्चित करण्यात आली आहे, असे मंत्री श्री.रावल यांनी सांगितले. रास्तभाव दुकानदाराने असे न केल्यास त्यांच्यावर नियमानुसार कारवाई करण्यात येईल.

अन्न, नागरी पुरवठा व ग्राहक संरक्षण विभागाने याबाबत राज्यातील सर्व विभागीय आयुक्त( पुरवठा), सर्व उपायुक्त (पुरवठा), सर्व जिल्हाधिकारी, शिधावाटप नियंत्रक, संचालक (नागरी पुरवठा, मुंबई), सर्व जिल्हा पुरवठा आधिकारी यांना परिपत्रकाच्या अंमलबजावणीचे आदेश दिले आहेत.

अखिल भारतीय मराठी नाट्य परिषदेचे पुरस्कार प्रदान

मुंबई : राज्य शासन रंगकर्मींच्या नेहमीच पाठीशी राहिले आहे. आगामी काळात राज्य शासनाच्या वतीने प्रायोगिक रंगभूमीची वास्तू उभारण्यात येईल असे सांस्कृतिक कार्यमंत्री विनोद तावडे यांनी सांगितले.

नाटककार गोविंद बल्लाळ देवल यांच्या स्मृत्यर्थ अखिल भारतीय मराठी नाट्य परिषद आयोजित कलावंत मेळावा व पुरस्कार वितरण सोहळा काल संध्याकाळी यशवंत नाट्य मंदिर येथे सांस्कृतिक कार्यमंत्री विनोद तावडे यांच्या प्रमुख उपस्थितीत पार पडला. अखिल भारतीय मराठी नाट्य परिषदेतर्फे दिला जाणारा यावर्षीचा जीवनगौरव पुरस्कार ज्येष्ठ समीक्षक कमलाकर नाडकर्णी आणि ज्येष्ठ अभिनेत्री श्रीमती दया डोंगरे यांना जाहीर झाला होता. प्रकृती कारणास्तव ज्येष्ठ अभिनेत्री दया डोंगरे उपस्थित राहू शकल्या नाहीत. ज्येष्ठ नाट्य समीक्षक कमलाकर नाडकर्णी यांना ज्येष्ठ दिग्दर्शक जब्बार पटेल आणि अखिल भारतीय नाट्य संमेलनाचे अध्यक्ष प्रेमानंद गज्वी आणि अखिल भारतील नाट्य परिषदेचे अध्यक्ष प्रसाद कांबळी यांच्या प्रमुख उपस्थितीत जीवनगौरव पुरस्कार प्रदान करण्यात आला.

श्री. तावडे या कार्यक्रमादरम्यान बोलताना म्हणाले, ज्येष्ठ नाट्यसमीक्षक नाडकर्णी यांच्या नाट्य समीक्षेने खऱ्या अर्थाने मराठी नाट्यरसिक नाट्यगृहांकडे वळला. मराठी नाटकांची वृत्तपत्रामध्ये अतिशय समर्पक वस्तुनिष्ठ व सडेतोड नाट्य समीक्षेमुळे मराठी रसिकांना मराठी नाटक कळू लागले.

पाटणा – बिहारमध्ये मेंदूज्वरने चिमुकल्यांच्या मृत्यूची संख्या दिवसेंदिवस वाढत आहे. या रोगाने शुक्रवारी आणखी 9 मुले दगावली. त्यामुळे, एकूणच मृतांची संख्या 67 झाली आहे. प्रशासकीय अधिकाऱ्यांनी दिलेल्या माहितीनुसार, या सर्वांच्या मृत्यूचे कारण हायपोग्लीसेमिया (मेंदूतील ताप) आहे. या परिस्थितीत मुलांच्या शरीरातील ब्लड शुगर अचानक ढासळतो. इलेक्ट्रोलाइटचे संतुलन बिघडते. हा रोग प्रामुख्याने बिहारच्या मुझफ्फरपूरमध्ये पसरला आहे. याच ठिकाणी दोन सरकारी रुग्णालयांमध्ये सर्व 67 मुलांनी अखेरचा श्वास घेतला. राज्याचे आरोग्य मंत्री मंगल पांडेय यांनी यासाठी नशीबाला जबाबदार धरले आहे. त्यांच्या मते, यासाठी सरकार किंवा प्रशासन जबाबदार नाही. त्या मुलांचे नशीब तसे होते. सोबतच, हवामानाला देखील त्यांनी दोष दिला.

या व्यतिरिक्त मुझफ्फरपूरच्या खासगी रुग्णालयांमध्ये सुद्धा उपचार सुरू आहेत. त्यापैकी 9 मुलांची प्रकृती चिंताजनक असल्याचे सांगितले जात आहे. राज्यातील आरोग्य मंत्र्यांनी शुक्रवारी डॉक्टर आणि आरोग्य अधिकाऱ्यांची विशेष बैठक घेतली. त्यामध्ये पीडित रुग्णांना तातडीने रुग्णवाहिका उपलब्ध करून देणे आणि रुग्णालयांत अतिरिक्त बेडसह विशेष विभाग स्थापित करण्यास मंजुरी देण्यात आली. राज्यातील 7 जिल्ह्यांमध्ये या रोगाने डोके वर काढले आहे. त्या सर्वच जिल्ह्यांमध्ये जनजागृती केली जात आहे. सोबतच, मुख्यमंत्री नितीश कुमार यांनी आरोग्य विभागाच्या अधिकाऱ्यांना संसर्ग पसरलेल्या जिल्ह्यांमध्ये दौरे करण्याचे निर्देश दिले आहेत.

मुंबई : ज्येष्ठ नागरिक धोरणातील तरतुदीनुसार  15 जून हा दिवस ज्येष्ठ नागरिक छळ प्रतिबंध जागृती दिवस  म्हणून साजरा करण्यात येतो. या निमित्ताने सामाजिक न्याय व विशेष सहाय विभाग  आणि हेल्पेज इंडिया यांच्या संयुक्त विद्यमाने चर्चासत्राचे आयोजन ऑडीटरम हॉल, विद्यालंकार इन्स्ट‍िट्यूट ऑफ टेक्नॉलॉजी, संगमनगर, वडाळा (पूर्व) येथे सकाळी १०.३० वाजता करण्यात आले आहे.
या चर्चासत्राचे उद्‌घाटन सामाजिक न्याय व विशेष सहाय विभागाचे मंत्री राजकुमार बडोले यांच्या हस्ते होणार आहे. या कार्यक्रमास मुंबई शहरचे पालकमंत्री सुभाष देसाई, सामाजिक न्याय व विशेष सहाय विभागाचे राज्यमंत्री दिलीप कांबळे, खासदार राहुल शेवाळे, महापौर विश्वनाथ महाडेश्वर, सामाजिक न्याय विभागाचे प्रधान सचिव दिनेश वाघमारे,  जनसंपर्क मुंबईचे अतिरिक्त पोलीस आयुक्त ज्ञानेश्वर चव्हाण,  समाजकल्याण विभागाचे आयुक्त मिलिंद शंभरकर, प्रादेशिक उपायुक्त समाजकल्याण मुंबई विभागाचे बाळासाहेब सोळंकी, हेल्पेज इंडियाचे प्रकाश बोरगावकर आदी मान्यवर उपस्थित राहणार आहेत. या कार्यक्रमास जास्तीत जास्त नागरिकांनी उपस्थित राहण्याचे आवाहन सामाजिक न्याय विभागाने प्रसिद्धी पत्रकाद्वारे केले आहे.