पुणे : मराठी ग्लोबल चेंबर ऑफ कॉमर्स, इंडस्ट्रीज अँड अ‍ॅग्रिकल्चर – पुणे कार्यालयाच्या उद्घाटनप्रसंगी विधान परिषद उपसभापती डॉ. नीलम गोऱ्हे प्रमुख पाहुण्या म्हणून उपस्थित होत्या. मराठी उद्योजकांना जागतिक पातळीवर मजबूत व्यासपीठ मिळावे, परदेशातील मराठी समुदायाशी दृढ संबंध जोडले जावेत आणि शासन–उद्योजक यांच्यात समन्वय वाढावा, याबाबत त्यांनी महत्त्वपूर्ण मुद्दे मांडले.

कार्यक्रमात मराठी ग्लोबल चेंबर ऑफ कॉमर्सचे सेक्रेटरी शिरीष फडतरे यांनी चेंबरच्या कार्याचा, उद्दिष्टांचा परिचय करून दिला. उद्घाटन सोहळा फिल्म अँड टेलिव्हिजन इन्स्टिट्यूट ऑफ इंडिया परिसरातील चेंबर कार्यालयात झाला.

यावेळी आपल्या भाषणात डॉ. गोऱ्हे म्हणाल्या की, विधिमंडळातर्फे परदेशातील मराठी मंडळींशी तसेच उद्योजकांशी संवादाचे विविध कार्यक्रम सातत्याने होत असतात. “फक्त संसदीय भेटी किंवा वैधानिक कामांपुरते आमचे दौरे मर्यादित नसतात. परदेशातील मराठी समुदायाच्या संस्कृती, रोजगार, स्थलांतरितांच्या अडचणी आणि उद्योजकतेच्या संधी यावर आम्ही प्रत्यक्ष चर्चा करतो,” असे त्या म्हणाल्या.

त्या पुढे म्हणाल्या की, जपान, युरोप, अमेरिका या देशांमध्ये भेटीदरम्यान अनेक महत्त्वपूर्ण निरीक्षणे समोर आली. “इतर राज्यांचे उद्योजक परदेशात सक्रियपणे करार करून सहकार्य वाढवत आहेत. महाराष्ट्रातूनही अशीच चळवळ गतिमान करण्याची गरज आहे. महाराष्ट्रात इनोव्हेटिव्ह प्रोजेक्ट्स मोठ्या प्रमाणावर चालू असतानाही त्यांची माहिती सादर करणारी ‘नॉलेज बँक’ अद्याप प्रभावीपणे तयार केलेली नाही,” असा मुद्दा डॉ. गोऱ्हे यांनी मांडला.

स्त्री सुरक्षितता आणि स्थलांतरित महिलांच्या प्रश्नांवर डॉ. गोऱ्हे यांनी विशेष भर दिला. परदेशात काही महिलांचे पासपोर्ट काढून घेणे, भाषेची अडचण, निवासाची समस्या अशा अनेक तक्रारी समोर येतात. “आंतरराष्ट्रीय स्तरावर महिलांसाठी एक सुरक्षित ‘विंडो’ निर्माण करण्याबाबत महाराष्ट्र सरकार गंभीर आहे. प्रोटोकॉल विभागात नवीन पदे निर्माण झाली असून लवकरच यावर व्यापक चर्चा होणार आहे,” असे त्यांनी नमूद केले.

उद्योग–धोरणांच्या अंमलबजावणीबाबत बोलताना डॉ. गोऱ्हे म्हणाल्या, “महाराष्ट्र हे भारतातील पहिले राज्य आहे जे उद्योग विषयक महिला धोरण राबवत आहे. यामुळे महिला उद्योजकांसाठी मोठ्या संधी निर्माण होत आहेत. पर्यटन क्षेत्रालाही उद्योगाचा दर्जा दिल्याने महाराष्ट्र नवीन दिशा मिळवत आहे.”

परदेशातील तंत्रज्ञान, कचरा व्यवस्थापन, शेतीसंबंधित प्रकल्प, इंडस्ट्री विस्तार, आणि परदेशात स्थायिक झालेल्या मराठी युवा–व्यावसायिकांच्या संधी यावरही त्यांनी प्रकाश टाकला. “परदेशातील अनेक कंपन्या महाराष्ट्रात युनिट्स सुरू करू इच्छितात, पण पायाभूत सुविधांच्या अडचणींमुळे प्रकल्प पुढे जात नाहीत. यावर संयुक्त प्रयत्नांची गरज आहे,” असे त्या म्हणाल्या.

मराठी संस्कृती, साहित्य आणि भाषेच्या पोहोचविषयी बोलताना डॉ. गोऱ्हे म्हणाल्या, “जगभर मराठी साहित्य संमेलने होतात, परंतु त्यांचे निष्कर्ष, माहिती एकत्रित करून पुढील वाटचालीसाठी देवाणघेवाण होणे आवश्यक आहे. मराठी भाषेची नाळ परदेशातील तरुण पिढीशी मजबूत ठेवण्यासाठी उद्योजक आणि सांस्कृतिक मंडळींनी एकत्रित कृती करणे गरजेचे आहे.”

शेवटी, ग्लोबल मराठी फोरम्सचे फेडरेशन तयार करून सामूहिक पातळीवर काम करण्याचा प्रस्ताव डॉ. गोऱ्हे यांनी मांडला. “महाराष्ट्र आणि मराठी विश्व जागतिक स्तरावर पुढे जाण्यासाठी सज्ज आहे. त्यासाठी आपली भूमिका मजबूत, सर्वसमावेशक आणि सातत्यपूर्ण असली पाहिजे,” असे सांगत त्यांनी सर्व उपस्थितांना मन:पूर्वक शुभेच्छा दिल्या.

पुणे : ओबीसी सेवा संघ ,ओबीसी राजकीय आघाडी व माळी विकास मिशन म.राज्य मा.सुनील खोब्रागडे आणि प्रा.श्रावण देवरे यांचे ओबीसी विरुद्ध मराठा संघर्ष ,जाती अंताचे क्रांतिकारी पर्व खंड 1 चे प्रकाशन समता भूमी येथे थोर समाजसुधारक महात्मा जोतीराव फुले यांच्या 135 व्या स्मृतिदिनानिमित दि.28 नोव्हेंबर २०२५ रोजी (समतादिनी) दु.1 वाजता ओबीसी तरुण योद्धे प्रा.लक्ष्मण हाके यांचे व राष्ट्रीय ओबीसी महासंघाचे सरचिटणीस रघुनाथ ढोक यांचे शुभहस्ते प्रकाशन सोहळा मोठ्या दिमाखात पार पडला. यावेळी समता भूमीवरील सामाजिक क्रांतीचे जनक महात्मा फुले यांच्या व स्री शिक्षणाचे आध्यप्रनेत्या सावित्रीबाई फुले यांच्या पुतळ्यास कार्यक्रमाचे सुरुवातीला पुष्पहार आर्पण करण्यात आला.यावेळी प्रमुख पाहुणे म्हणून माळी मिशनचे कार्यकर्ते संजयबाबा करपे ,डॉ.बी.के.यादव , समता परिषद चे आबा भोंगळे ,लहू अनारसे,मंगेश गोरे उपस्थित होते.

याप्रसंगी प्रा.लक्ष्मण हाके यांनी प्रतिपादन केले की माननीय सुनील खोब्रागडे आणि प्रा.श्रावण देवरे यांनी एकत्र येऊन “ओबीसी विरुद्ध मराठा संघर्ष ,जाती अंताचे क्रांतिकारी पर्व खंड 1 या नावाचा महाग्रंथ साकार केला त्यामध्ये भाग 1 प्रा.देवरे यांनी डॉ.आंबेडकरानी ब्राह्मण+क्षत्रिय+वैश्यांना का नाकारले व भाग 3 संविधानाचा व न्यायालायाचा अवमान टाळण्यासाठी जात बदलून देणारा जी.आर.रद्द झालाच पाहिजे आणि भाग 2 कुणबी मराठा जातीच्या संबधाचा इतिहास प्रा.सुनील खोब्रागडे यांनी विस्तृत माहितीपूर्ण लिखाण केले असून ह्या ग्रंथ निर्मितीचे मुख्य कारण म्हणजे 2 सप्टेंबरचा काळा जी.आर.होय. दुसरे असे की देवरे सरांनी आपली तब्बेत बरी नसताना देखील आजच्या समतादिनी ओबीसी बांधवाना एकजुटीत आणणारा हा महाग्रंथ माझे हस्ते प्रकाशित केला आहे हे मी माझे भाग्य समजतो.देवरे सरांनी ओबीसी समाजाचे प्रबोधन व्हावे म्हणून ओबीसी मंडल आयोगापासून आज पर्यंत अनेक अभ्यासपूर्ण ग्रंथ प्रकाशित केले असून त्या ग्रंथाचे आधारावरच आम्ही आमच्या ओबीसी आरक्षणाच्या लढया लढत आहोत असे म्हणत सर्व बांधवानी आपल्या संग्रही हा ग्रंथ आवर्जून ठेवावे असे देखील आवाहन केले.
कार्यक्रमाचे स्वागत व प्रास्ताविकमध्ये रघुनाथ ढोक यांनी माहिती देताना सांगितले की हा महाग्रंथ लेखक व प्रकाशकांनी ओबीसी तरुण योद्धे प्रा.लक्ष्मण हाके ,नवनाथ वाघमारे ,मंगेश ससाणे,भरत निचिते ,रविंद्र टोंगे,रामभाऊ पेरकर,प्रा.विठ्ठल तळेकर आणि प्रल्हाद कीर्तने या लढवय्यांना व त्यांच्या साथीदारांना सविनय अपर्ण केला असून हा ग्रंथ लेखक देवरे सरांनी आजारी असताना देखील प्रथमावृत्ती 28 नोव्हेंबर 25 म्हणून त्याच दिवशी प्रकाशितचा आग्रह धरला आणि तो ग्रंथ देखील प्रा. लक्ष्मण हाके यांचे हस्ते प्रकाशित झाला हे देखील तेवढेच महत्वाचे आहे असे म्हंटले.कार्यक्रमाचे आयोजन प्रकाशक अमृतराव काळोखे ,माळी विकास मिशन आणि सूत्रसंचालन व आभार संजय करपे यांनी मानले.

पुणे : सत्यशोधक समाज संघ निर्मित सार्वजनिक सत्यधर्मीय सन 2026 दिनदर्शिके चे प्रकाशन समता भूमी येथे सामाजिक क्रांतीकारक सत्यशोधक समाजाचे संस्थापक महात्मा जोतीराव फुले यांच्या 135 व्या स्मृतिदिनानिमित सत्यशोधक केशवराव जेधे यांचे नातू व श्री.शिवाजी मराठा संस्थेचे खजिनदार मा.जगदीश जेधे यांचे व महात्मा फुले चरित्र साधने प्रकाशन समिती चे सदस्य रघुनाथ ढोक यांचे शुभहस्ते प्रकाशन सोहळा मोठ्या दिमाखात पार पडला. यावेळी समता भूमीवरील सामाजिक क्रांतीचे जनक महात्मा फुले यांच्या व स्री शिक्षणाचे आद्यप्रणेत्या सावित्रीबाई फुले यांच्या पुतळ्यास कार्यक्रमाचे सुरुवातीला पुष्पहार अर्पण करण्यात आला.
यावेळी प्रमुख पाहुणे म्हणून नगरसेवक अजय खेडेकर ,संदीप लडकत सामाजिक कार्यकर्ते डॉ.बी.के .यादव ,संजयबाबा करपे , रामराज्य बँकेचे संचालक बाळासाहेब रायकर समता परिषद चे राजेंद्र शेलवन्ते, आबा भोंगळे उपस्थित होते.
याप्रसंगी जगदीश जेधे यांनी प्रतिपादन केले की या दिनदर्शिकेचे हे पाचवे वर्ष असून फुले दांपत्य यांचे महत्वाचे कार्याविषयी तसेच इतर सत्यशोधक महापुरुषांच्या महत्वपूर्ण घटना कार्याविषयी अत्यंत मौलिक उपयुक्त माहिती दिल्याने समाजाला आपल्या महापुरुषांनी केलेल्या अलौकिक कार्याची सहज महती उपलब्ध होत आहे. तरूणापासून मोठ्या व्यक्ती व महिलांना या माहितीपूर्ण दिनदर्शिके मुळे एक प्रेरणा मिळत असते. प्रत्येक घराघरात ही दिनदर्शिका दर्शनी भागात लावली गेली पाहिजे असे सांगून सत्यशोधक केशवराव जेधे व दिनकरराव जवळकर यांनी फुले दांम्प्त्याचे सत्यशोधक कार्य पुढे नेले त्याच प्रमाणे आपण सर्वांनी कृतीशील कार्य करू या हीच खरी त्यांना आदरांजली होईल असे देखील म्हंटले.
कार्यक्रमाचे आयोजन सत्यशोधक समाज संघाने केले तर संयोजन व कार्यक्रमाची सांगता सत्यशोधक रघुनाथ ढोक यांनी महात्मा फुले रचित सत्याचा अखंड गाऊन उपस्थितांकडून पाठीमागे म्हणून घेतले तर लहू अनारसे यांनी आभार मानले.

पुणे:पुणे महापालिकेने ५० टक्के आरक्षणाच्या मर्यादेचे पालन केलेले आहे. त्यामुळे महापालिका निवडणुकीसाठी कोणतीही अडचण नाही. असे उपायुक्त, निवडणूक अधिकारी प्रसाद काटकर यांनी सांगितल्याने महापालिका निवडणुकीसाठीची
आचारसंहिता साधारणतः १५ डिसेंबरदरम्यान लागू होण्याची शक्यता आहे, तर जानेवारीच्या दुसऱ्या किंवा तिसऱ्या आठवड्यात निवडणूक होण्याची शक्यता आहे.

न्यायालयाच्या निर्णयानुसार पुणे आणि पिंपरी-चिंचवड महापालिकांच्या निवडणुकीचा मार्ग मोकळा झाला आहे. त्यामुळे आता डिसेंबरच्या मध्यावधीत आचारसंहिता जाहीर होऊन जानेवारीच्या दुसऱ्या किंवा तिसऱ्या आठवड्यात निवडणूक होण्याची शक्यता आहे, यास महापालिका अधिकाऱ्यांनी देखील दुजोरा दिला आहे.

महापालिकेने निवडणुकीची प्रक्रिया सुरू केली आहे. प्रारंभी प्रभाग रचना जाहीर केली. त्यानंतर प्रभागनिहाय आरक्षण जाहीर केले. त्यापाठोपाठ प्रारूप मतदार यादीही जाहीर केली. तसेच, हरकती-सूचना घेण्यास सुरुवात केली. त्यामुळे आता निवडणुकीचा कार्यक्रम केव्हाही जाहीर होऊ शकतो यामुळे इच्छुक आणि ज्यांना खरोखर लढायचे आहेच त्यांना प्रचार प्रारंभ करावाच लागणार आहे.

मोक्का लावताना पोलिसांनी निकष पाळले नसल्याचा ठोंबरे पाटलांचा आरोप
पुणे:पुण्यातील गजानन मारणेला विशेष मोक्का न्यायालयाने जामीन मंजूर करताच पुणे शहरात पुन्हा एकदा या प्रकरणाची जोरदार चर्चा सुरू झाली आहे. कोथरूडमध्ये शिवजयंती दिनी अभियंता देवेंद्र जोग यांना मारहाण केल्याप्रकरणी मारणे आणि त्याच्या टोळीवर मोक्का लावण्यात आला होता
पुणे पोलिसांनी त्याला टोळी प्रमुख म्हणून अटक केली होती . मात्र फिर्यादी देवेंद्र जोग यांनी न्यायालयात हजर राहून कुणीही चिथावणी दिली नसल्याचे प्रतिज्ञापत्र दाखल केल्याने प्रकरणाला वेगळे वळण मिळाले. विशेष न्यायालयाने एक लाख रुपयांच्या जात-मूचलक्यावर जामीन मंजूर केला.
जेलमधून जामिनावर सुटका होताच गजानन मारणे थेट पुणे पोलिस आयुक्तालयात दाखल झाला आणि गुन्हे शाखेचे उपायुक्त यांच्या समोर हजेरी लावली. पोलिसांनी मात्र त्याला पुणे शहरात थांबण्यास मनाई केली आहे. या संपूर्ण प्रकरणावर गजानन मारणेचा वकिल विजयसिंह ठोंबरे यांनी मोक्का लावताना लागणारे कायदेशीर निकष पोलिसांनी पाळलेच नसल्याचा आरोप त्यांनी केला. ‘हे प्रकरण पूर्णपणे बनावट आहे. रस्त्यावर भांडण झाले, पण आम्ही कुठेही काही सांगितले नव्हते. तपासात आम्ही पूर्ण सहकार्य केले, ते कधीही फरार नव्हते आणि स्वतः पोलीस स्टेशनमध्ये हजर राहिले,’ असे ठोंबरे यांनी स्पष्ट केले.
पुण्यातील गुन्हेगारीच्या जगतात ‘गजा मारणे’ हे नाव वेगळ्या धाकाने उच्चारले जाते. अमोल बधे आणि पप्पू गावडे या दोघांच्या खुनाप्रकरणी त्याला अटक झाली आणि त्यानंतर तब्बल तीन वर्षे तो येरवडा कारागृहात होता. या खटल्यांनंतर त्याची प्रतिमा ‘मारणे टोळीचा म्होरक्या’ म्हणून अधिक बळकट झाली. त्याच्यावर सहापेक्षा जास्त खुनाचे गुन्हे दाखल आहेत. मागील वर्षी पुण्यातील एका व्यावसायिकाकडून तब्बल २० कोटी रुपयांची खंडणी मागितल्याप्रकरणीही कोर्टाने त्याला जामीन मंजूर केला होता. जामीनानंतर काढलेली त्याची रॅली शहरभर चर्चेचा विषय ठरली होती. पुणे पोलिसांनी एकदा त्याची ‘धिंड’ काढत त्याला गुडघ्यावर बसवले होते. उद्देश होता की त्याच्या दहशतीला चाप बसावा. पण काही काळानंतर याच गजा मारणे सोबत काही पोलिसांनी पार्टी केल्याचा प्रकार समोर आला आणि पाच पोलिस निलंबित झाले होते.

प्रकरण नेमके कसे, का लावला मोक्का ?

कोथरूडमधील आयटी अभियंता तरुण १९ फेब्रुवारी रोजी दुपारी दुचाकीवरून घरी निघाला होता. वाटेत भेलकेनगर परिसरात रस्त्यावर गर्दी होती. या गर्दीतून दुचाकी काढण्याचा प्रयत्न करताना तिघांनी त्या तरुणाला बेदम मारहाण केली. याबाबत अभियंता तरुणाने कोथरूड पोलिस ठाण्यात फिर्याद दिली होती.
पोलिसांनी ओम तीर्थराम धर्मजिज्ञासू (वय-३५), किरण कोंडिबा पडवळ (वय-३१) अमोल विनायक तापकीर (वय-३५, तिघे रा. शास्त्रीनगर, कोथरूड) या तिघांना अटक केली होती. या गुन्ह्यातील अन्य एक आरोपी श्रीकांत संभाजी पवार पसार झाला होता. तपासात आरोपी मारणे टोळीशी संबंधित असल्याचे समोर आले.त्यानुसार पोलिसांनी ओम तीर्थराम धर्मजिज्ञासू (वय-३५), किरण कोंडिबा पडवळ (वय-३१) अमोल विनायक तापकीर (वय-३५, तिघे रा. शास्त्रीनगर, कोथरूड) या तिघांना अटक केली होती. या गुन्ह्यातील अन्य एक आरोपी श्रीकांत संभाजी पवार पसार झाला होता. तपासात आरोपी मारणे टोळीशी संबंधित असल्याचे समोर आले.
या घटनेनंतर केंद्रीय राज्यमंत्री मुरलीधर मोहोळ यांनी ‘पुणे पोलिसांनी आत्मपरीक्षण केले पाहिजे. पोलिस डोळे बंद करून बसले आहेत का?’ या भाषेत पोलिसांच्या कार्यपद्धतीवर नाराजी व्यक्त केली होती. दरम्यान, या प्रकरणात पोलिसांनी तीन आरोपींसह टोळीप्रमुख गजानन मारणे, त्याचा भाचा रूपेश मारणे याच्यावर मकोका कायद्यान्वये कारवाई केली.

“संविधान हे सर्वांचे; मतपेटीपलीकडे जाऊन समाजासाठी काम करा” – डॉ. गोऱ्हे

पुणे, दि. २८ नोव्हेंबर २०२५ : शिवसेना भवन, सारसबाग येथे झालेल्या ‘शाखा तिथे संविधान’ अभियानात विधानपरिषद उपसभापती डॉ. नीलम गोऱ्हे यांनी संविधान दिनानिमित्त मार्गदर्शन केले. भारतीय संविधानातील सामाजिक न्याय, आरक्षणाचे मूलभूत उद्दिष्ट आणि बाबासाहेब आंबेडकरांच्या विचारांची आजची गरज यावर त्यांनी थोडक्यात पण स्पष्ट भाष्य केले.

डॉ. गोऱ्हे म्हणाल्या की, “संविधान हे एका समाजाचे नसून सर्व नागरिकांचे आहे. सामाजिक समता प्रस्थापित होईपर्यंत शैक्षणिक आणि नोकरीतील आरक्षण आवश्यक आहे.” सर्वोच्च न्यायालयाने पुन्हा अधोरेखित केलेली ५०% आरक्षण मर्यादा, बाबासाहेबांनी मांडलेले तत्त्व आणि इतिहासातील संघर्ष त्यांनी उपस्थितांसमोर मांडले.

शिवसेनेची शिवशक्ती–भीमशक्ती परंपरा, मराठवाडा विद्यापीठ नामांतर चळवळ आणि दलित–बहुजन समाजाच्या राजकीय सहभागाबाबत शिवसेनेची भूमिका यावरही त्यांनी उल्लेख केला. महात्मा फुले यांच्या पुण्यतिथीनिमित्त फुले–आंबेडकर विचारांची आजची उपयुक्तता त्यांनी सांगितली.

महिला सुरक्षिततेबद्दल बोलताना अलीकडील गंभीर घटनांचा संदर्भ देत प्रशासनाने तातडीने पावले उचलण्याची गरज त्यांनी व्यक्त केली. “केवळ राजकारणापुरते न थांबता समाजासाठी काम करा,” असे आवाहनही त्यांनी कार्यकर्त्यांना केले.

कार्यक्रमात प्रत्येक शाखेत संविधान प्रस्तावना लावणे, ६ डिसेंबरला विशेष स्टेटस ठेवणे, संविधान आणि राज्यशास्त्रावरील साप्ताहिक व्याख्यानमाला सुरू करण्याची सूचना देण्यात आली.

अभियानाचे प्रमुख संयोजक व प्रवक्ते किरण सोनावणे म्हणाले, “शिवसेनेच्या इतिहासातील हा सुवर्ण क्षण आहे. महाराष्ट्रातील प्रत्येक शिवसेना शाखेत संविधानाची प्रस्ताविका व प्रत ठेवून संविधानिक मूल्यांचा व्यापक प्रसार केला जाईल. एक शायर म्हणतो, ‘दोस्त, कभी फुरसत मिले तो मुझे पढ़ना, मुझमें तेरे हर उलझनों का समाधान है… मैं कोई और नहीं, तेरे देश का संविधान हूँ’.”

शिवसेना भवनात झालेल्या या कार्यक्रमात मिलिंद अहिरे, अनुसूचित जाती शिवसेना पुणे शहर प्रमुख, शिवसेना प्रवक्ते आणि पत्रकार किरण सोनवणे यांची कार्यक्रमात प्रमुख उपस्थिती होती. यासोबतच, पुणे शहर सह संपर्कप्रमुख सुदर्शना त्रिगुणाईत, शहर प्रमुख पूजा रावेतकर, महानगर प्रमुख कल्पना थोरवे, संदीप शिंदे शहर सचिव, नितीन पवार कोथरूड विधानसभा प्रमुख , सुनील जाधव, गौरव साईनकर, सुधीर जोशीं, संदिप शिंदे , एकनाथ ढोले, आणि अन्य प्रमुखांचाही या प्रसंगी विशेष सहभाग होता. सर्व पदाधिकारी आणि मान्यवरांच्या उपस्थितीत कार्यक्रमाला उत्साहपूर्ण वातावरण लाभले.

पुणे, दि.२८: आगामी राष्ट्रीय लोकअदालत होणाऱ्या १३ डिसेंबर २०२५ रोजी न्यायालयामध्ये होणारी संभाव्य गर्दी आणि नागरिकांची गैरसोय टाळण्याकरीता १ नोव्हेंबर २०२५ रोजी पुर्वी न्यायालयात दाखल असलेल्या ज्या प्रकरणांमध्ये लोकअदालतीची नोटीस काढण्यात आली आहे, केवळ अशीच प्रकरणे लोकअदालतीमध्ये ठेवण्यात आलेली आहेत.

इतर सर्व नागरिकांना व वाहनधारकांना सुचित करण्यात येते की, इतर कोणाचीही मोटार वाहन प्रकरणे लोकअदालतीत ठेवण्यात आलेली नाहीत. तसेच ज्यांना १३ सप्टेंबर २०२५ रोजीच्या लोकअदालतीच्या दिवशी टोकन मिळाली आहेत त्यांची देखील प्रकरणे या लोकअदालतीमध्ये ठेवण्यात आलेली नाहीत याची नोंद घ्यावी, असे आवाहन जिल्हा विधी सेवा प्राधिकरण, पुणे, पुणे शहर वाहतुक विभाग, पिंपरी-चिंचवड वाहतुक विभाग तसेच महामार्ग वाहतूक विभाग पुणेयांच्यातर्फे करण्यात येत आहे.