पुणे – पुणे शहराने खासदार, आमदरा, नगरसेवक मोठ्या संख्येने देऊन भारतीय जनता पक्षाला समृद्ध केले आहे. लोकप्रतिनिधी हा पक्षाचा चेहरा असतो. विजय काळे आठ वर्षे लोकप्रतिनिधी नसतानाही त्यानंतर 2014 मध्ये लोकांनी त्यांना आमदार म्हणून निवडून देऊन स्वीकारले. त्यांची मतदारांशी असलेली नाळ जीवंत आहे. यातूनच स्पष्ट होते की लोकांमध्ये जाऊन, लोकांच्या घरी जाऊन त्यांची कामे करणारे लोकप्रतिनिधी फक्त भाजपमध्ये आहेत, असे नगरविकास राज्य मंत्री योगेश सागर यांनी आज येथे सांगितले.

शिवाजीनगर मतदारसंघाचे आमदार विजय काळे यांच्या पाच वर्षाच्या कार्य अहवालाचे प्रकाशन राज्यमंत्री सागर यांच्याहस्ते झाले, त्यावेळी ते बोलत होते. कार्यक्रमाच्या अध्यक्षस्थानी भाजपचे शहराध्यक्ष योगेश गोगावले होते. कॉसमॉस बँकेचे उपाध्यक्ष कृष्णकुमार गोयल आणि निवृत्त आयपीएस अधिकारी वसंत  कोरेगावकर पाहुणे म्हणून उपस्थित होते. यावेळी शिवाजीनगर मतदारसंघाचे भाजपचे अध्यक्ष सतीश बहिरट, खडकीचे अध्यक्ष चिंतन शहा, महिला आघाडीच्या अध्यक्षा भावना शेळके, युवामोर्चाचे अध्यक्ष सौरभ कुंडलिक, आणि खडकी कॅन्टोन्मेंट बोर्डाचे ज्येष्ठ नगरसेवक सुरेश कांबळे, उपाध्यक्ष कमलेश चासकर, निलमाताई खाडे, सोनालीताई लांडगे, सुनिताताई वाडेकर, आदित्य माळवे, प्रकाश ढोरे, विजय शेवाळे, अर्चनाताई मुसळे, आदी नगरसेवक व्यासपीठावर उपस्थित होते.

या कार्यक्रमात घरेलू महिला कामगारांच्या नेत्या मेधा थत्ते, टेल्को एम्प्लॉइज युनियनच्या सरचिटणीसपदी निवड झाल्याबद्दल संतोष दळवी यांचा सत्कार योगेश सागर यांच्या हस्ते करण्यात आला. आमदार निधीतून विजय काळे यांनी ग्रंथालयासाठी प्रत्येकी पन्नास हजार रूपयांची पुस्तके घेतली आहेत. या पुस्तकांच्या संचाचे नऊ ग्रंथालयांना वितरण गोगावले, गोयल आणि कोरेगावकर यांच्या हस्ते करण्यात आले.

योगेश सागर म्हणाले, भाजपच्या सर्वच ठिकाणी लोकप्रतिनिधी म्हणून पुणेकरांनी गेल्या पाच वर्षात निवडले आहे. लोकप्रतिनिधी हा पक्षाचा चेहरा असतो. हे लोकप्रतिनिधी पुणेकरांनी दिलेल्या पाठिंब्याची परतफेड त्यांच्या कामातून करतच आहेत. या पुणे शहराला अधिकपटीने जर कोणी दिले असेल तर ते मुख्यमंत्री देवेंद्र फडणवीस यांनी दिले आहे. पुण्याचा चेहरा मोहरा बदलण्याचे कामच त्यांनी सुरू केले असल्याचे सध्या शहरात फिरताना दिसते. विधानसभेत प्रश्न मांडताना विजयरावांच्या प्रश्नांना मत्र्यांना उत्तरे द्यावीच लागतात. त्यांच्या प्रश्न मांडण्याचा सचोटीमुळे अनेकदा मुख्यमंत्रीच स्वत: त्यांच्या प्रश्नांची उत्तरे देतात याचा मी साक्षिदार आहे.

कार्यक्रमाचे अध्यक्ष योगेश गोगावले म्हणाले, गेल्या पाच वर्षात सबका साथ सबका विकास या धेय्याने आम्ही काम करत आहोत. या मागची आमची भूमिका आता मतदारांनी तपासावी, त्यासाठीच हा कार्य अहवाल आहे. अशा प्रकारे आपण केलेल्या कामाची महिती देणारे अहवाल फक्त भाजपचेच लोकप्रतिनिधी काढतात. मेट्रोच्या कामाच्या प्रगतीचा अनुभव सगळेच घेत आहेत. कारण आमचं राज्यातील आणि केंद्रातील सरकार हे कमी बोलून काम करणारं सरकार आहे. आम्ही सांगितलेला कार्यक्रम राबवणारं सरकार आहे.

कृष्णमार गोयल म्हणाले, ज्या मेट्रोची चर्चा फक्त पुणेकर ऐकत होते त्या मेट्रोचं का या सरकारमुळे सुरू झालेलं बघायला मिळालं आहे. यापेक्षाही गुरूजनांचा त्यांच्या घरी जाऊन कृतज्ञता पूर्वक गौरव करणारे आमदार विजय काळे मला जास्त महत्वाचे वाटतात. वसंत कोरेगावकर म्हणाले, मी माझ्या पोलिस खात्यातील कारकिर्दीत अनेक आमदार, खासदार मंत्री बघितले, त्यांचे स्वभाव, कॅरेक्टर बघितलं, पण प्रगल्भ विचारांचा अन ठाम निर्णय घेणारा विजयरावां इतका साधा आमदार पहिल्यांदाच बघितला. त्यांनी मला त्यांचा मतदार म्हणून त्यांच्या कार्य अहवाल प्रकाशनासाठी बोलावले याचा मला अभिमान आहे.

कार्यक्रमाचे प्रस्ताविक करताना आमदार काळे म्हणाले,  या मतदार संघात शिवाजीनगर, विद्यापीठ चौक, बोपोडीचौक अशा प्रमुख रस्त्यांवर असलेली वाहतुकीची समस्या सोडवली नाही तर पुन्हा मत मागायला येणार नाही असं मी 2014 साली सांगितले होते. पण गेल्या पाच वर्षात नगरसेवक, नागरीकांच्या मदतीने या सर्व वाहतुकीच्या प्रश्नांवर उपाय योजना सुरू करू शकलो  आहे. या शिवाय हिंजवडी – शिवाजीनगर मेट्रो, आयटीआय, चतुशृंगीची पाण्याची टाकी, भांबुर्डा वनउद्यान अशा विविध विकास कामांचा आढावा घेऊन आता याचे मूल्यमापन व परिक्षण मतदारांनी करावे असे आवाहन केले. प्रारंभी मतदारसंघाचे अध्यक्ष बहिरट यांनी सर्वांचे स्वागत केले तर खडकीचे अध्यक्ष चिंतन शहा यांनी आभारप्रदर्शन केले. कार्यक्रमाचे सूत्रसंचलन डॉ. वर्षा डोमल यांनी केले. कार्यक्रमात मन:शक्ती केंद्राच्यावतीने मान्यवरांना पुस्तके भेट देण्यात आली.

पुणे- पुण्यातील जुना बाजार हा रस्त्यावर भरू नये आणि येथील रस्त्यावर पार्किंग देखील होवू नये या अनुषंगाने आज पोलिसांनी महत्वाची पावले उचलली असून प्रायोगिक  तत्वावर महिनाभराच्या कालावधीसाठी अधिसूचना आज काढली आहे.

शाहीर अमरवेस चौक ते कुंभार वेस दरम्यान च्या  मंगळवार पेठेतील रस्त्यावर दर रविवारी आणि बुधवारी जुना बाजार रस्त्यावर भरतो .या रस्त्याच्या एका बाजूला  न्यायालय ,महापालिका ,शनवार वाडा,शिवाजी नगर बस स्थानक ,रेल्वे स्थानक आहे तर दुसऱ्या बाजूस ससून हॉस्पिटल ,जिल्हाधिकारी कार्यालय ,सेन्ट्रल बिल्डींग ,विधान भवन ,पुणे स्टेशन , आर टी ओ ,जिल्हा परिषद ,विधान भवन अशी कार्यालये आहेत . दिवसेंदिवस रस्त्यावरील वाहने वाढत आहेत आणि एकूणच पुण्यातील वाहतूक समस्या जिकिरीची होत आहे .शाहीर अमरवेस चौक ते कुंभार वेस दरम्यान वाहतुकीचा मोठा खोळंबा रस्त्यावर भरणारी दुकाने आणि पार्किंग मुळे होतो . याबाबत अनेक तक्रारी येतात असे या अधिसूचनेत म्हटले आहे .वाहतूक शाखेचे पोलीस उपायुक्त पंकज देशमुख यांच्या सूचनेनुसार या ठिकाणी वाहतूक नियमना साठी सुधारित अधिसूचना सह आयुक्त डॉ.रविंद्र शिसवे यांनी काढली आहे .२४ जुलै पासून ती लागू करण्यात येत असून या नुसार प्रायोगिक तत्वावर या रस्त्याच्या दोन्ही बाजूस नो पार्किंग झोन आणि रस्त्यावर दुकाने लावण्यास बंदी घालण्यात येते आहे . रिक्षा थांबे , अम्ब्युलंस, पोलीस आणि अग्निशामक दल आणि कर्तव्यावर असलेली शासकीय वाहने यांना यातून वगळण्यात येते आहे . असे या अधिसूचनेत म्हटले आहे .

पुणे  : मेट्रो प्रकल्प गतीने मार्गी लागण्यासाठी महा मेट्रो आणि पीएमआरडीए मेट्रो मुळे बाधित होणाऱ्या झोपडपट्टी धारकांच्या पुर्नवसनाचे काम लवकर सुरु करावे, असे आदेश विभागीय आयुक्त डॉ. दिपक म्हैसेकर यांनी दिले.

मेट्रो बाधित झोपडपट्टी धारकांच्या पुर्नवसनाबाबत आज डॉ. म्हैसेकर यांच्या अध्यक्षतेखाली विभागीय आयुक्त कार्यालयात बैठक घेण्यात आली, त्यावेळी त्यांनी हे आदेश दिले.
बैठकीला विभागीय आयुक्त डॉ. दिपक म्हैसेकर, पीएमआरडीएचे आयुक्त विक्रमकुमार, जिल्हाधिकारी नवल किशोर राम, पीएमआरडीएचे मुख्य अभियंता विवेक खरवडकर, महा मेट्रोचे अतिरिक्त मुख्य प्रकल्प व्यवस्थापक अमोल मोहळकर, पुणे महानगरपालिकेचे अतिरिक्त आयुक्त राजेंद्र मुठे, झोपडपट्टी पुर्नविकास प्राधिकरणाचे अतिरीक्त मुख्य कार्यकारी अधिकारी सुरेश जाधव तसेच संबंधित विभागांचे अधिकारी उपस्थित होते.

डॉ. म्हैसेकर म्हणाले, महा मेट्रो मार्ग १ आणि २ तसेच पीएमआरडीए मेट्रो मार्ग ३ मध्ये बाधित होणाऱ्या झोपडपट्टीधारकांचे एकत्रित पुर्नवसन करण्याच्या दृष्टीने विचार होणे आवश्यक आहे. या विषयी पुण्याचे जिल्हाधिकारी नवल किशोर राम यांनी बाधित झोपडपट्टीधारकांच्या प्रतिनिधींसोबत येत्या पंधरा दिवसांत बैठक घेऊन त्यानंतर पुढील कार्यवाही करावी, असेही डॉ. म्हैसेकर यांनी बैठकीत सांगितले.
महामेट्रो, पीएमआरडीए, पुणे महानगरपालिका आणि झोपडपट्टी पुर्नवसन प्राधिकरण विभागाच्या संबंधित अधिकाऱ्यांनी पुर्नवसनाबाबतची कार्यवाही समन्वय ठेवून पूर्ण करावी, असेही डॉ. म्हैसेकर म्हणाले.

मेट्रो मार्गातील झोपडपट्ट्यांच्या सर्वेक्षणाबाबत तसेच पुनर्वसन करता येणाऱ्या जागांबाबत जिल्हाधिकारी श्री. राम यांनी माहिती दिली.

बैठकीला संबंधित सर्व विभागांचे अधिकारी उपस्थित होते.

पुणे – पुणे महसूल विभागातील जिल्‍हाधिकारी, अपर जिल्‍हाधिकारी, उपजिल्‍हाधिकारी व पोलिस अधीक्षक, पोलिस उपायुक्‍त यांच्‍या दिनांक २५ व २६ जुलै २०१९ या दोन दिवसांच्‍या कार्यशाळेचे आयोजन जिल्‍हाधिकारी कार्यालयातील ५ वा मजला येथे करण्‍यात आले आहे.

या कार्यशाळेत दिनांक २५ जुलै २०१९ रोजी सकाळी १० ते १०.२० वाजता पुणे महसूलचे उपायुक्‍त उपस्थितांचे स्‍वागत व प्रस्‍ताविक करणार आहेत. सकाळी १०.२० ते १०.४५ वाजता कार्यशाळेत मार्गदर्शन विभागीय आयुक्‍त करणार असून सकाळी १०.४५ ते दुपारी १२ वाजता सामान्‍य प्रशासनचे उपायुक्‍त संजयसिंह चव्‍हाण हे महाराष्ट्र पोलिस अधिनियम अंतर्गत कलम ५५,५६,५७ प्रमाणे हद्दपार प्रकरणांबाबत मार्गदर्शन करणार आहेत. दुपारी १२ ते दुपारी १ वाजता सेवानिवृत्‍त अधिकारी पी.ई. गायकवाड यांचे हद्दपार विषयक कामकाजाबाबत मार्गदर्शन. दुपारी १ ते दुपारी २ वाजता कोल्‍हापूरचे जिल्‍हाधिकारी दौलत देसाई हे आपत्ती व्‍यवसथापन अधिनियम २००५ बाबत मार्गदर्शन करणार आहेत. दुपारी २.४५ ते दुपारी ३.४५ वाजेपर्यंत सोलापूरचे जिल्‍हाधिकारी राजेंद्र भोसले हे सन २०१४ ते २०१९ राज्‍य शासनाकडुन MLRC,Tenancy अंतर्गत करण्‍यात आलेल्‍या सुधारणा, धोरण, निर्णय याबाबत मार्गदर्शन करणार आहेत. दुपारी ३.४५ ते दुपारी ५ वाजेपर्यंत केंद्रशासनाचे कृषि व पशुसंवर्धनविषयक धोरण व कृषि उत्‍पन्‍न वाढ या चर्चासत्रात कृषी आयुक्‍त सुहास दिवसे, सांगलीचे जिल्‍हाधिकारी अभिजीत चौधरी, साताराचे जिल्‍हाधिकारी श्‍वेता सिंघल यांचा सहभाग असणार आहे.

दिनांक २६ जुलै २०१९ रोजी सकाळी ९३० ते सकाळी १०.३० वाजेपर्यंत पुणे नगररचानाचे सहसंचालक अविनाश पाटील हे प्रादेशिक आराखडयाचे अनुषंगाने महसूल अधिका-यांचे कामकाजाविषयी चर्चा करणार आहेत. सकाळी १०.३० ते दुपारी ११.३० वाजेपर्यंत साखर आयुक्‍त शेखर गायकवाड हे महसूल अधिकारी यांचे समोरील अर्धन्‍यायिक कामकाज, कार्यपध्‍दती व भूमिका या विषयी माहिती देणार आहेत. दुपारी ११.३० ते दुपारी १ वाजेपर्यंत७/१२ संगणकीकरण, ओडीसी/ १५५/डी-४ संगणकीकरणाचे अनुषंगाने झालेल्‍या बदलामुळे तलाठी/ सं.अ.दप्‍तर तपासणी बाबतची कार्यपध्‍दती यामध्‍ये पुणे जमाबंदी आयुक्‍त एस चोक्‍कलिंगम, राज्‍य समन्‍वयक रामदास जगताप, जमाबंदी आयुक्‍त कार्यालयाचे रा.भु.आ.आ.का यांचा सहभाग असणार आहे. दुपारी१ ते दुपारी २ वाजेपर्यंत Art of Writing of Judgement (TNC Act, Ceiting Act, MLRC 36A,Devasthan etc.) उपविभागीय अधिकारी यांनी दिलेल्‍या निर्णयांचे निरीक्षण या विषयी न्‍यायिक सदस्‍य व्‍ही.बी. कुलकर्णी हे माहिती देणार आहेत. दुपारी २.३० ते ३.१५ वाजेपर्यंत प्रशासकीय कार्यामध्‍ये संवाद कौशल्‍याचे महत्‍व नाशिक विभागाचे महसूल उपायुक्‍त दिलीप स्‍वामी हे माहिती देणार आहेत. दुपारी ३.१५ ते ३.४५ वाजेपर्यंत जिल्‍हाधिकारी नवल किशोर राम हे प्रधानमंत्री आवास योजना नागरी व ग्रामीण या विषयी माहिती देणार आहेत. दुपारी ३.४५ ते दुपारी ४ पर्यंत चर्चा, प्रश्‍नोत्‍तरे होणार असून कार्यशाळेचा समारोप दुपारी ४ ते दुपारी ४.१५ वाजता होणार आहे.