पुणे : पुणे विभागातील प्रामुख्याने सांगली आणि कोल्हापूर जिल्ह्यातील पूरग्रस्तांना मदतीच्या अनुषंगाने सोमवार दि. 19 ऑगस्ट 2019 रोजी सकाळी 11 वाजता कौन्सिल हॉल, विभागीय आयुक्त कार्यालय, पुणे येथे विभागीय आयुक्त डॉ. दीपक म्हैसेकर यांच्या अध्यक्षतेखाली बैठक घेण्यात येणार आहे.
पूरग्रस्तांना वेगवेगळ्या स्वरुपात मदत करण्याची आवश्यकता आहे. बऱ्याच संस्था व व्यक्ती स्वयंस्फूर्तीने यामध्ये सहभागी होत असून आणखीही मदत करण्यास उत्सुक आहेत. या सर्वांचे योग्य नियोजन व अमलंबजावणी करणे आवश्यक आहे.
यासाठी होणाऱ्या या बैठकीला दानशूर व्यक्ति, संस्था, स्वयंसेवी संस्थाचे पदाधिकारी उपस्थित राहणार आहेत, असे विभागीय आयुक्त कार्यालयाने कळविले आहे.

पुणे: ज्यांचे सौंदर्य अगणिक कामदेवतेपेक्षा श्रेष्ठ आहे, ज्यांचे शरीर निलमेघाप्रमाणे आहे, पितांबर नेसलेले त्यांचे रुप लखलखत्या विजेप्रमाणे दिसत आहे, अशा पावनरुपी श्रीरामाला वंदन करुन या रघुनंदन ह्या कार्यक्रमात रामावरच्या आणि कृष्णावरच्या अनेक रचनांनी रसिक प्रेक्षकांना अक्षरश: भूरळ घातली. नृत्यभक्ती फाउंडेशन तर्फे रघु-नंदन भरतनाट्यम नृत्याविष्कार या कार्यक्रमाचे आयोजन करण्यात आले होते. रामाचा आचार, कृष्णाचा विचार, हरिचा उच्चार या प्रवाहात तल्लीन होण्यासाठी रघुनंदन ही कथा आयोजिली होती. मुकुंदनगर येथील सकल ललित कलाघर येथे या कार्यक्रमाचे आयोजन नुकतेच करण्यात आले होते.

कार्यक्रमाच्या सुरुवातीला गणेशवंदना केली गेली, ठुमक चलत रामचंद्र, राम जन्मला गं सखी राम जन्मला.., श्रीरामचंद्र कृपालू भज हर अशा वेगवेगळ्या रामावरच्या रचना सादर केल्या. कृष्णाबरोबर होळी खेळणा-या गोपिका, राधे बरोबर झालेलं कृष्णाच भांडण आणि विरह, कृष्ण आणि कालियाचं द्वंद्व असे अनेक प्रसंग विविध रचनांद्वारे सादर करण्यात आले. तर कार्यक्रमाची सांगता दशावताराने झाली. यामध्ये कृष्ण आणि रामावरचं सुंदर भजन आणि दोघांचे दहा अवताराचे सुंदर चलचित्र सादर करण्यात आले. कृष्णाच्या नामगजरात कार्यक्रमाची सांगता झाली.

कुहू, ऐश्वर्या, सायली, नेहा, अंकिता,तेजोमयि, हर्षिता, ईश्वरी, जान्हवी, मेघा, सिमरन, तन्वी, देवयानी या कलाकारांनी भरतनाट्यम नृत्याविष्कार सादरीकरण केले.

नृत्य कार्यक्रमाद्वारे रामाच्या आणि कृष्णाच्या आचार विचारांची देवाण घेवाण करत नामस्मरणामधून परमेश्वर रुपी शक्ती सदैव आपल्याला साथ देईल आणि आपला मार्ग आनंददायी करण्यासाठी या कार्यक्रमाचे आयोजन केले असल्याचे मत नृत्यभक्ती फाउंडेशनच्या सई परांजपे यांनी व्यक्त केले.

पिंपरी येथील गोयल गंगा इंटरनैशनल स्कूल येथे स्वातंत्र्य दिन उत्साहात साजरा

पुणे :- पिंपरी येथील गोयल गंगा इंटरनैशनल स्कूल येथे स्वातंत्र्य दिन उत्साहात साजरा करण्यात आला. यावेळी लेफ्टनंट कर्नल गौरव छिब्बर यांच्या हस्ते ध्वजारोहण करण्यात आले.नाटकाच्या माध्यमातून विद्यार्थ्यांनी’चाणाक्य’ यांची अखंड भारत ही संकल्पना सर्वांसमोर मांडली. याचसोबत सातवी मध्ये शिकणाऱ्या मुलांनी देशभक्तीपर गाण्यांवर सुंदर नृत्याविष्कार सादर केले.

यावेळी प्रमुख पाहुणे कॉलेज ऑफ मिलिटरी इंजिनीअरींग येथे इन्स्ट्रक्टर म्हणून काम पाहणारे लेफ्टनंट कर्नल गौरव छिब्बर, मुख्याध्यापिका भारती भागवाणी,इतर शिक्षकही उपस्थित होते.

यावेळी छिब्बर म्हणाले कि, शत्रूचे आक्रमण असो व देशावर आलेली नैसर्गिक संपत्ती कोणत्याही आपत्तीशी लढण्यासाठी देशाची सेना कायमच तत्पर असते.तरुणांनी देखील हा आदर्श घेऊन देशसेवेसाठी तत्पर असले पाहिजे. वर्णभेद,जातिभेद, स्त्री- पुरुष असमानता असे प्रश्न जेव्हा खऱ्या अर्थाने समाजातून नष्ट होतील त्यानंतरच देश खऱ्या अर्थाने प्रगती करू शकेल.

भारती भागवाणी म्हणाल्या कि,भारताला जगातील सर्वात यशस्वी देश बनविण्यासाठी देशाच्या नेतृत्वासोबत देशाच्या युवा पिढीने एकत्र येवून देशाची सर्वसमावेशक प्रगती साधण्यात सक्रियतेने प्रयत्न केले पाहिजेत.

येणाऱ्या पिढ्यांच्या स्वातंत्र्यासाठी आधीच्या पिढ्यांनी नेमकी काय किंमत मोजली याची माहितीही या निमित्ताने त्यांनी सांगितली. याशिवाय दिवसरात्र आपले संरक्षण करणारे आपले जवान आणि अनेक कष्ट सोसून आपल्यासाठी पीक काढणारे शेतकरी यांच्या कष्टाची जाणीव होणे किती आवश्यक आहे. याची माहिती देखील त्यांनी सांगितली.

पुणे : कोल्हापूर, सांगलीतील पुरग्रस्तांच्या मदतीसाठी येवलेवाडी येथील केजेज ट्रिनिटी शिक्षण संस्थेच्या वतीने जीवनावश्यक वस्तू, कपडे, शालेय साहित्य आदी मदत पाठविण्यात आली. संस्थेच्या सर्वच महाविद्यालयातील आणि शाळेतील विद्यार्थी, शिक्षक-शिक्षकेतर कर्मचारी आणि व्यवस्थापनाकडून ही मदत गोळा करण्यात आली होती. कायम सामाजिक बांधिलकीची भावना जपणाऱ्या केजे शिक्षण संस्थेचे अध्यक्ष कल्याण जाधव यांच्या मार्गदर्शनाखाली पदाधिकारी, प्राचार्य, विभागप्रमुख, विद्यार्थी व शिक्षक-शिक्षकेतर कर्मचाऱ्यांनी मदत साहित्य गोळा करण्यात पुढाकार घेतला.