पुणे :शैक्षणिक आदानप्रदान ,संशोधन आणि शैक्षणिक सुविधांसाठी कॉमनवेल्थ व्होकेशनल युनिव्हर्सिटी या आंतरराष्ट्रीय विद्यापीठाचा  सुरेश ग्यान विहार युनिव्हर्सिटी(जयपूर )शी सहकार्य  करार झाला आहे. कॉमनवेल्थ व्होकेशनल युनिव्हर्सिटीचे पुणे स्थित संस्थापक सदस्य राकेश मित्तल यांनी पत्रकाद्वारे ही माहिती दिली.
  कॉमनवेल्थ व्होकेशनल युनिव्हर्सिटीचे संस्थापक सदस्य राकेश मित्तल आणि  सुरेश ग्यान विहार युनिव्हर्सिटी(जयपूर )चे संचालक  कनिष्क शर्मा  यांनी या सहकार्य करारावर सह्या केल्या.  

 टोंगा देशातील  कॉमनवेल्थ व्होकेशनल युनिव्हर्सिटीशी सहकार्य करार करणारे  सुरेश ग्यान विहार युनिव्हर्सिटी हे  ‘नॅक’ च्या वतीने ग्रेड ए  श्रेणीचे  एक्रिडिटेशन असणारे विद्यापीठ आहे. जयपूर परिसरात शैक्षणिक सुविधा केंद्र,अल्प मुदतीचे शैक्षणिक अभ्यासक्रम,विद्यार्थी -प्राध्यापक आदान प्रदान,पी एच डी संशोधन सुविधा,आंतरराष्ट्रीय परिषदांचे आयोजन,शैक्षणिक साधनांचे आदान प्रदान  अशा अनेक बाबतीत ही दोन्ही विद्यापीठे पुढाकार घेणार आहेत.    राकेश मित्तल म्हणाले,’बदलत्या परिस्थितीत आंतरराष्ट्रीय पातळीवर विद्यापीठे एकत्र येवून नवे उपक्रम,शैक्षणिक सुविधा देवू इच्छित आहेत. या सहकार्य करारानुसार  पी एच डी करु इच्छीणाऱ्या विद्यार्थ्यांना ६० ते ७२ तासांचे कोर्स वर्क  सुरेश ग्यान विहार युनिव्हर्सिटी मध्ये पूर्ण करता येईल’.

पुणे विभागातील 3 लाख 90 हजार 226 कोरोना बाधित रुग्ण बरे होऊन घरी
विभागात कोरोना बाधित
4 लाख 61 हजार 507 रुग्ण -विभागीय आयुक्त सौरभ राव

पुणे,दि.8 :- पुणे विभागातील 3 लाख 90 हजार 226 कोरोना बाधित रुग्ण बरे होऊन घरी गेले असून विभागात कोरोना बाधित रुग्णांची संख्या 4 लाख 61 हजार 507 झाली आहे. तर ॲक्टीव रुग्ण संख्या 58 हजार 895 इतकी आहे. कोरोनाबाधित एकुण 12 हजार 386 रुग्णांचा मृत्यू झाला असून मृत्यूचे प्रमाण 2.68 टक्के आहे. पुणे विभागामध्ये बऱ्या होणा-या रुग्णांचे प्रमाण 84.55 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा-
पुणे जिल्हयातील कोरोना बाधित एकूण 2 लाख 99 हजार 353 रुग्णांपैकी 2 लाख 58 हजार 858 रुग्ण बरे होवून घरी गेले आहेत. ॲक्टीव रुग्ण 33 हजार 636 आहेत. कोरोनाबाधित एकूण 6 हजार 859 रुग्णांचा मृत्यू झाला आहे. मृत्यूचे प्रमाण 2.29 टक्के इतके आहे तर बरे होणा-या रुग्णांचे प्रमाण 86.47 टक्के आहे.

सातारा जिल्हा-
सातारा जिल्हयातील कोरोना बाधित एकूण 40 हजार 195 रुग्णांपैकी 31 हजार 740 रुग्ण बरे होवून घरी गेले आहेत. ॲक्टीव रुग्ण 7 हजार 155 आहेत. कोरोनाबाधित एकूण 1 हजार 300 रुग्णांचा मृत्यू झाला आहे.

सोलापूर जिल्हा-
सोलापूर जिल्हयातील कोरोना बाधित एकूण 35 हजार 725 रुग्णांपैकी 28 हजार 675 रुग्ण बरे होवून घरी गेले आहेत. ॲक्टीव रुग्ण 5 हजार 814 आहेत. कोरोनाबाधित एकूण 1 हजार 236 रुग्णांचा मृत्यू झाला आहे.

सांगली जिल्हा-
सांगली जिल्हयातील कोरोना बाधित एकूण 39 हजार 969 रुग्णांपैकी 33 हजार 360 रुग्ण बरे होवून घरी गेले आहेत. ॲक्टीव रुग्ण 5 हजार 132 आहेत. कोरोनाबाधित एकूण 1 हजार 477 रुग्णांचा मृत्यू झाला आहे.

कोल्हापूर जिल्हा-
कोल्हापूर जिल्हयातील कोरोना बाधित एकूण 46 हजार 265 रुग्णांपैकी 37 हजार 593 रुग्ण बरे होवून घरी गेले आहेत. ॲक्टीव रुग्ण 7 हजार 158 आहेत. कोरोनाबाधित एकूण 1 हजार 514 रुग्णांचा मृत्यू झाला आहे.

कालच्या रुग्णसंख्येच्या तुलनेत आज झालेली वाढ-
कालच्या बाधित रुग्ण संख्येच्या तुलनेत पुणे विभागात बाधित रुग्णांच्या संख्येमध्ये एकूण 3 हजार 732 ने वाढ झाली आहे. यामध्ये पुणे जिल्ह्यात 2 हजार 363, सातारा जिल्ह्यात 438, सोलापूर जिल्ह्यात 301, सांगली जिल्ह्यात 451 तर कोल्हापूर जिल्ह्यात 179 अशी रुग्ण संख्येमध्ये वाढ झालेली आहे.

पुणे विभागामध्ये बऱ्या होणाऱ्या रुग्णांमध्ये एकूण 4 हजार 241 रुग्णांचा समावेश आहे. यात पुणे जिल्हा 2 हजार 373, सातारा 511, सोलापूर 241, सांगली 816 व कोल्हापूर जिल्हयामध्ये 300 रुग्णांचा समावेश आहे.

पुणे विभागातील सर्व्हेक्षण-
आजपर्यत विभागामध्ये एकुण 20 लाख 47 हजार 112 नमून्यांचा तपासणी अहवाल प्राप्त झाला आहे. प्राप्त अहवालांपैकी 4 लाख 61 हजार 507 नमून्यांचा अहवाल सकारात्मक (पॉझिटिव्ह) आहे.

( टिप :- दि. 7 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )

पुणे,दि.8: नेतृत्व गुण असणाऱ्या तरुणांना एकत्र करुन प्रत्येक गावात ‘ग्राम युवा विकास समिती’ स्थापन करावी. या समितीमार्फत केंद्र आणि राज्य शासनाच्या योजना तळागाळात पोहोचवाव्यात, असे आवाहन जिल्हाधिकारी डॉ. राजेश देशमुख यांनी केले.

नेहरु युवा केंद्राच्या वतीने जिल्हा युवा कार्यक्रम सल्लागार समितीची बैठक जिल्हाधिकारी डॉ. राजेश देशमुख यांच्या अध्यक्षतेखाली पार पडली, यावेळी ते बोलत होते. बैठकीला नेहरु युवा केंद्राचे जिल्हा युवा समन्वयक यशवंत मानखेडकर, राज्य संचालक प्रमोद हिंगे, राष्ट्रीय सेवा योजनेचे विभागीय संचालक श्री.कार्तिकेयन, जिल्हा नियोजन अधिकारी संजय मरकळे, जिल्हा क्रीडा अधिकारी विजय संतान तसेच राष्ट्रीय युवा पुरस्कारार्थी व समिती सदस्य उपस्थित होते. यावेळी ‘कोविड-19 आपत्ती निर्मुलन कार्य अहवाल’ चे प्रकाशन तसेच ‘माझे कुटुंब माझी जबाबदारी’ अभियानांतर्गत युवकांच्या माध्यमातून राबविण्यात येणाऱ्या ‘संपर्क अभियान’ चे उद्घाटन जिल्हाधिकारी डॉ. देशमुख यांच्या हस्ते झाले.

जिल्हाधिकारी डॉ. देशमुख म्हणाले, युवा शक्तीचा उपयोग ग्रामीण भागाच्या विकासासाठी आणि विधायक कार्यासाठी होणे आवश्यक आहे. ग्राम युवा विकास समिती मार्फत गावांमधील विकास योजनांना गती देता येवू शकते. याकामी नेहरु युवा केंद्राने जिल्हा परिषदेचा ग्रामपंचायत विभाग व सर्व ग्रामपंचायतींचे सहकार्य घ्यावे.

‘माझे कुटुंब माझी जबाबदारी’ मोहिमेचा दुसरा टप्पा 14 ऑक्टोबर पासून सुरु होत आहे. या टप्प्यात युवा केंद्राच्या माध्यमातून जनसंपर्क व जनजागृती उपक्रम राबविण्यासाठी नियोजन करावे, असे सांगून जिल्हाधिकारी डॉ. देशमुख म्हणाले, कोरोना बाधित रुग्ण अधिक असणाऱ्या शहरा नजीकच्या व महामार्गालगतच्या गावांमध्ये जनजागृतीवर युवा केंद्राने भर द्यावा. घराबाहेर पडणाऱ्या युवक व नागरिकांमुळे घरातील ज्येष्ठ व गंभीर आजाराच्या रुग्णांना कोरोनाचा प्रादुर्भाव होऊ नये, यासाठी घ्यावयाच्या दक्षतेबद्दल माहिती पोहोचवावी. नाविन्यपूर्ण उपक्रमांतर्गत होणाऱ्या कला प्रदर्शनाच्या आयोजनामध्ये आदिवासी प्रशिक्षण व संशोधन केंद्राचा सहभाग घ्यावा. तसेच जलजागृती व जलसंवर्धन उपक्रमासाठी पाणी फौंडेशन चे सहकार्य घेऊन हा उपक्रम व्यापक स्वरुपात राबवावा,असे सांगून जिल्ह्यातील राष्ट्रीय युवा पुरस्कारार्थींचा सहभाग विविध शासकीय कार्यक्रमांत घेण्यासाठी नियोजन करा, असेही डॉ.देशमुख यांनी सूचित केले.

राज्य संचालक प्रमोद हिंगे म्हणाले, ग्राम युवा विकास समितीच्या माध्यमातून ग्राम विकास साधण्यास मदत होईल. तसेच युवकांच्या आशा,आकांक्षा, समस्या जाणून घेणे शक्य होईल.

समन्वयक यशवंत मानखेडकर यांनी युवा केंद्राचा वार्षिक आराखड्याअंतर्गत राबविण्यात येणाऱ्या उपक्रमांची माहिती दिली.

मायमर मेडिकल कॉलेज व डॉ. भाऊसाहेब सरदेसाई तळेगाव ग्रामीण रुग्णालयाचे कार्य कौतुकास्पद 
पुणे, 8 ऑक्टोबर: मावळ तालुक्यातील एकमेव कोविड समर्पीत रूग्णालय ‘मायमर वैद्यकीय महाविद्यालय व डॉ. भाऊसाहेब सरदेसाई तळेगाव ग्रामीण रुग्णालयातील’ डॉक्टरांच्या अथक प्रयत्नांनी येथील एक हजार पेक्षा अधिक कोविड रुग्णांवर यशस्वी उपचार करून त्यांना बरे केले आहे.
 या संदर्भात मायमर वैद्यकीय महाविद्यालयाच्या कार्यकारी संचालिका डॉ. सुचित्रा नागरे म्हणाल्या की, रुग्णालयात मध्यम ते अति तीव्र स्वरूपातील कोविड रुग्णांवर उपचार करण्याची सुविधा आहे. येथे 365 सुसज्ज बेड असून त्यातील 148 बेड हे ऑक्सिजन, 16 व्हेंटिलेटर आणि अतिदक्षतेसाठी  20 बेड आहेत. तसेच, गर्भवती कोविड रूग्ण महिंलांसाठी प्रसूतिची सोय व स्वतंत्र ऑपरेशन थिएटर्सची सुविधा करण्यात आली आहे. अशा रुग्णांना ऑक्सिजनची अधिक गरज भासते हे लक्षात ठेवून हॉस्पिटलने अद्यायावत लिक्विड ऑक्सिजन यंत्रणा कार्यान्वयित केली आहे. तसेच, येथील डॉक्टरांतर्फे रुग्णांच्या नातेवाईकांना उपलब्ध बेड व व्हेंटिलेटरची माहिती दिल्या जाते. याच प्रमाणे कोविड आजारातून बरे झालेल्या रुग्णांकरीता विशेष बाह्यरुग्ण विभाग सुरू करण्यात येणार आहे.
नॉन कोविड रुग्णांसाठी संपूर्ण वैद्यकीय सेवा, पात्र लाभार्थी रुग्णांसाठी महात्मा ज्योतिबा फुले जन आरोग्य योजना व इतर रुग्णांसाठी माफक दरात डॉक्टर्स व आरोग्य कर्मचारी सेवा देतात. येथील सर्व कर्मचारी, नर्सेस व डॉक्टरतर्फे दिल्या जाणार्‍या सेवेबद्दल व्यवस्थापनाच्या वतीने कार्यकारी संचालिका डॉ. सुचित्रा कराड नागरे, वैद्यकीय संचालक डॉ. सुरेश घैसास व प्राचार्य डॉ. राजेंद्र प्रसाद गुप्ता यांनी कौतुक केले.
ग्रामीण  क्षेत्रातील रुग्ण मदतीसाठी 02114-308380/308423/8087099040 या नंबरवर संपर्क साधू शकतात.

पुणे : माजी नगरसेवक धनंजय जाधव यांची भारतीय जनता पक्षाच्या पुणे शहर उपाध्यक्षपदी निवड करण्यात आली. भाजपाचे पुणे शहर अध्यक्ष जगदीश मुळीक यांनी नियुक्तीचे पत्र धनंजय जाधव यांना दिले. पुणे शहरात पक्षाच्या संघटनात्मक विस्तारासाठी धनंजय जाधव यांच्या राजकीय वाटचालीच्या अनुभवाचा उपयोग होईल, असे जगदीश मुळीक यांनी पत्राद्वारे सांगितले.
धनंजय जाधव यांनी विविध संघटनांवर काम केले आहे. पॉवरलिफ्टिंग असोसिएशन पुणे जिल्ह्याचे ते अध्यक्ष म्हणून काम पाहतात. द हिंदू फाउंडेशनचे ते अध्यक्ष असून संस्थेच्या माध्यमातून विविध सामाजिक कार्य केले जाते. तसेच पुणे जिल्यातील नामांकित पुणे श्री शरीर सौष्ठव स्पर्धेचे मागील दहा वर्षे संस्थेच्या माध्यमातून आयोजन करण्यात येते. प्रथमच पेसापालो वर्ल्ड कपचे देशात आणि पुण्यात चार दिवस आयोजन धनंजय जाधव यांच्या नेतृत्त्वाखाली करण्यात आले होते. याशिवाय कसबा विश्रामबाग क्षेत्रीय कार्यालयाचे अध्यक्ष म्हणून देखील त्यांनी काम पाहिले आहे. पुण्यात प्रथमच राष्ट्रीय पॉवरलिफ्टिंग स्पर्धेचे आयोजन करून ८५० खेळाडू २८ राज्यातून सहभागी झाले होते.

पुणे- गेली ४ वर्षे पुण्यात सातत्याने पुरेसा पाउस होतो आहे, धरणे ओसंडून भरत आहेत ,पाण्याच्या वितरणासाठी जे काही व्यवस्थापन करून द्यायचे ते माजी आमदार टिळेकर यांनी त्यांच्या आमदारकीच्या कारकिर्दीत आणि ‘त्या’ नगरसेविकांनी आपल्या नगरसेवक पदाच्या कारकिर्दीत उपलब्ध करून दिलेले असताना ,जिथे पाणी सलग आठवडाभर दररोज ४ तास मिळत होते तिथे गेल्या काही दीड वर्षापासून आठवड्यातून एकदा पाणीपुरवठाच बंद ठेवला जातो आहे. काही भागात तर अप्वेली कधीही मनमानेल पद्धतीने पाणीपुरवठा केला जातो आहे . मुबलक पाणी असतांना अशा पद्धतीने अधिकारी जर मनमानी करून लोकप्रतिनिधींची गळचेपी करत असतील तर कोणाला कसा जाब विचारायचा ? पाण्याच्या प्रश्नावरून माजी आमदार टिळेकर आणि भाजपच्या ‘त्या’ नगरसेविकांनी आंदोलन केले आहे. त्यांच्या आम्ही सदैव पाठीशी राहू असे सांगत भारतीय जनता पार्टीच्या नवनियुक्त ओबीसी मोर्चाचे अध्यक्ष योगेश पिंगळे यांनी महापालिका आणि पोलिसी कारवाईचा निषेध केला आहे.

• सरकारने आता भक्तांचा अंत पाहू नये देवळे उघडावीत व देव मुक्त करावेत अन्यथा जनतेच्या भावनांचा उद्रेक होईल – मनसेचे शहर अध्यक्ष अजय शिंदे यांचा इशारा

पुणे – महाराष्ट्र शासनाचा धिकार करत … आज मनसेने आंदोलनाचा पवित्रा घेत .. पुण्यात सर्वात प्रथम ,पुण्याचे ग्रामदैवत म्हणून प्रसिद्ध असलेले कसबा गणपती चे मंदिर भाविकांसाठी खुले केले .सरकारने आता भक्तांचा अंत पाहू नये देवळे उघडावीत व देव मुक्त करावेत अन्यथा जनतेच्या भावनांचा उद्रेक होईल  हा इशारा यावेळी मनसेचे शहर अध्यक्ष अजय शिंदे यांनी दिला.या आंदोलनात मनसे नेते बाबू वागसकर,विजयराव तडवलकर, प्रल्हाद गवळी , राम बोरकर ,हेमंत बत्ते, सुनील कदम , राहुल गवळी , नरेंद्र तांबोळी , प्रशांत मते ,गणेश नायकवडी ,सचिन काटकर ,राजेंद्र वेडेपाटील , किशोर चिंतामणी , गणेश भोकरे , राकेश क्षीरसागर , गोकुळ अडागळे अविनाश जाधव ,  अभिजित येनपुरे ,उदय गडकरी , अतुल जाधव ,अनुप जाधव , प्रवीण सिरसागर, शन्कर पवार , आकाश धोत्रे आदी मनसे कार्यकर्ते सहभागी झाले होते.

यावेळी शिंदे म्हणाले ,’ स्वतःला हिंदुत्त्ववादी समजणारी  आणि हिंदुत्त्ववाच्या नावावर मते मागणारी आणि आत्ता सत्ताधारी असलेली शिवसेना सत्तेत असताना आणि मुख्यमंत्री सेनेचा असताना सत्तेसाठी हिंदुत्व गुंडाळून ठेवत  असल्याचे दिसत आहे.सरकारने महसुला साठी मद्यालये उघडली मात्र कोरोनचे नाव करून देवालये उघडायला घाबरते आहे; कोरोना काय फक्त देवळातच आहे का ? महाराष्ट्रातील  देवालये न उघडण्यासाठी मुख्यमंत्री यांच्या वर नक्की कोणाचा दबाव आहे ? हे आता कोणी सांगण्याची गरज नाही.तथाकथित हिंदू विरोधी विचाराची दोन्ही कॉंग्रेसरुपी सहकारी आणि सत्तेसाठी मम म्हणणारी सेना हे आज च चित्र आहे .
महाराष्ट्रात सर्व व्यवसाय सुरु झाले आहेत. मद्यालये, हॉटेल , दुकाने इतकेच नाही तर जे खाऊन थुकल्या नंतर करोना होऊ शकतो पसरू शकतो तो गुटखा हि सगळी कडे मिळू लागला आहे . मात्र करोना होईल किंवा पसरेल म्हणून मंदिरे बंद ठेवण्यास सरकार भाग पडत आहे. गेल्या महिन्यातच महाराष्ट्रातील देवस्थानाची प्रमुख मंडळी  मनसे अध्यक्ष राज ठाकरे याना भेटली होती. त्या नंतर राजठाकरेंनी सरकारला मंदिरे सुरु करावीत हि मागणी देखील केली होती . परंतु अंतर्गत दबावा पोटी सरकार मंदिरे उघडू देत नाही . म्हणूनच आज मनसेने पुण्याचे ग्रामदैवत असणाऱ्या कसबा गणपतीचे देऊळ आज उघडले व देवळात जाऊन प्रतीकात्मक होम करीत देवाला व नागरिकांना करोना मधून लवकरात लवकर मुक्त कर व करोना मुळे आलेली बेकारी व महागाई यातून जनतेची सुटका कर हे साकडे घातले. सरकारने आता भक्तांचा अंत पाहू नये देवळे उघडावीत व देव मुक्त करावेत अन्यथा जनतेच्या भावनांचा उद्रेक होईल  हा इशारा मनसेचे शहर अध्यक्ष अजय शिंदे यांनी दिला.

पुणे विभागातील 3 लाख 85 हजार 985 कोरोना बाधित रुग्ण बरे होऊन घरी
विभागात कोरोना बाधित
4 लाख 57 हजार 775 रुग्ण -विभागीय आयुक्त सौरभ राव

पुणे,दि.7 :- पुणे विभागातील 3 लाख 85 हजार 985 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 57 हजार 775 झाली आहे. तर ॲक्टीव रुग्ण संख्या 59 हजार 519 इतकी आहे. कोरोनाबाधीत एकुण 12 हजार 271 रुग्णांचा मृत्यू झाला असून मृत्यूचे प्रमाण 2.68 टक्के आहे. पुणे विभागामध्ये बऱ्या होणा-या रुग्णांचे प्रमाण 84.32 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा-
पुणे जिल्हयातील कोरोना बाधीत एकूण 2 लाख 96 हजार 990 रुग्णांपैकी 2 लाख 56 हजार 485 रुग्ण बरे होवून घरी गेले आहेत. ॲक्टीव रुग्ण 33 हजार 691 आहेत. कोरोनाबाधित एकूण 6 हजार 814 रुग्णांचा मृत्यू झाला आहे. मृत्यूचे प्रमाण 2.29 टक्के इतके आहे तर बरे होणा-या रुग्णांचे प्रमाण 86.36 टक्के आहे.

सातारा जिल्हा-
सातारा जिल्हयातील कोरोना बाधीत एकूण 39 हजार 757 रुग्णांपैकी 31 हजार 229 रुग्ण बरे होवून घरी गेले आहेत. ॲक्टीव रुग्ण 7 हजार 255 आहेत. कोरोनाबाधित एकूण 1 हजार 273 रुग्णांचा मृत्यू झाला आहे.

सोलापूर जिल्हा-
सोलापूर जिल्हयातील कोरोना बाधीत एकूण 35 हजार 424 रुग्णांपैकी 28 हजार 434 रुग्ण बरे होवून घरी गेले आहेत. ॲक्टीव रुग्ण 5 हजार 768 आहेत. कोरोनाबाधित एकूण 1 हजार 222 रुग्णांचा मृत्यू झाला आहे.

सांगली जिल्हा-
सांगली जिल्हयातील कोरोना बाधीत एकूण 39 हजार 518 रुग्णांपैकी 32 हजार 544 रुग्ण बरे होवून घरी गेले आहेत. ॲक्टीव रुग्ण 5 हजार 514 आहेत. कोरोनाबाधित एकूण 1 हजार 460 रुग्णांचा मृत्यू झाला आहे.

कोल्हापूर जिल्हा-
कोल्हापूर जिल्हयातील कोरोना बाधीत एकूण 46 हजार 86 रुग्णांपैकी 37 हजार 293 रुग्ण बरे होवून घरी गेले आहेत. ॲक्टीव रुग्ण 7 हजार 291 आहेत. कोरोनाबाधित एकूण 1 हजार 502 रुग्णांचा मृत्यू झाला आहे.

कालच्या रुग्णसंख्येच्या तुलनेत आज झालेली वाढ-
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 2 हजार 805 ने वाढ झाली आहे. यामध्ये पुणे जिल्ह्यात 1 हजार 739, सातारा जिल्ह्यात 312, सोलापूर जिल्ह्यात 183, सांगली जिल्ह्यात 358 तर कोल्हापूर जिल्ह्यात 213 अशी रुग्ण संख्येमध्ये वाढ झालेली आहे.

पुणे विभागामध्ये बऱ्या होणाऱ्या रुग्णांमध्ये एकूण 5 हजार 46 रुग्णांचा समावेश आहे. यात पुणे जिल्हा 2 हजार 880, सातारा 476, सोलापूर 322, सांगली 583 व कोल्हापूर जिल्हयामध्ये 785 रुग्णांचा समावेश आहे.

पुणे विभागातील सर्व्हेक्षण-
आजपर्यत विभागामध्ये एकुण 20 लाख 26 हजार 172 नमून्यांचा तपासणी अहवाल प्राप्त झाला आहे. प्राप्त अहवालांपैकी 4 लाख 57 हजार 775 नमून्यांचा अहवाल सकारात्मक (पॉझिटिव्ह) आहे.

( टिप :- दि. 6 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )