पुणे -शहरातील एक अत्याधुनिक आरोग्य केंद्र म्हणून ओळख असलेल्या प्रभाग क्र. ३५ मधील पुणे महानगरपालिकेच्या कै. शिवशंकर पोटे दवाखान्यामध्ये आता लहान बाळांचे लसीकरण फक्त मंगळवार व शुक्रवार न होता, आठवड्याचे ६ दिवस (दररोज, रविवार बंद) मोफत होणार आहे अशी माहिती राष्ट्रवादी च्या नगरसेविका अश्र्विनी नितिन कदम यांनी येथे दिली.

त्या म्हणाल्या,’ लहान बालकांचे लसीकरण करणे महत्त्वाचे तर असतेच पण हे लसीकरण करताना खाजगी दवाखाने व खाजगी व्यवसायिक डॉक्टरांकडे हजारो रुपये खर्च करावे लागतात व अनेकवेळा गरजू व गोरगरीब माता-पितांना अशा मोठ्या खर्चामुळे बाळांना लस देणे शक्य होत नाही आणि त्यामुळे बालकांच्या आरोग्याला नुकसान पोहचू शकते…!

या सर्व कारणांचा योग्य विचार करत पोटे दवाखान्यामध्ये गर्भवती व नवजात बालकांना मोफत लसीकरण सेवा आठवड्याच्या प्रत्येक मंगळवार व शुक्रवारी उपलब्ध होती पण या सदरच्या दिवशी बऱ्याच प्रमाणात गर्दी होत असत व त्यामुळे अनेकांना खूप वेळ थांबावे लागायचे किंवा अनेक वेळा दुसऱ्या वेळी यावे लागत असे या सर्व तसदीच्या बाबी लक्षात घेऊन आता आठवड्याचे ६ दिवस म्हणजेच सोमवार ते शुक्रवार स. ९:३० ते दु. १२:०० आणि दु. २.३० ते सायं ४:०० वा. व शनिवार स. ९:३० ते दु.१२:०० वाजेपर्यंत (रविवार बंद) उपलब्ध असणार आहेत.

माझ्या अनेक वेगवेगळ्या संकल्पनेतून महानगरपालिकेच्या कै. शिवशंकर पोटे दवाखानामध्ये सन २००७ पासून सर्वसामान्य नागरिकांच्या निरोगी आरोग्याचा सर्वांगीण विचार करत संपूर्ण इमारतीचे नूतनीकरण करुन वर्षागणिक वेगवेगळ्या आरोग्य सेवासुविधा उपलब्ध करुन दिल्या आहेत. त्यामध्ये शासकीय दरात डायग्नोस्टिक सुविधांमधील एम्.आर.आय, डिजिटल एक्स-रे, सोनोग्राफी, कलर डॉप्लर, २डी इको, रक्त तपासणी, प्राथमिक आरोग्य तपासणी, लसीकरण, गर्भवती स्त्रियांची तपासणी, मोफत औषधे, क्षयरोग उपचार केंद्र यांसारख्या महत्त्वपूर्ण सुविधा उपलब्ध केल्या आहेत. आज फक्त पुणे जिल्हातूनच नव्हे तर सबंध महाराष्ट्रातून या आरोग्य सेवांचा लाभ अनेक गरजू रुग्ण घेत आहेत. आज समाजातील सर्वसामान्य गरजू नागरिकांसाठी या आरोग्य सुविधा कार्यान्वित असून अनेकजण यांचा लाभ घेत आहेत याचे अत्यंत समाधान वाटत आहे.

लसीकरणाविषयी महत्त्वाचे?
लसीकरण हा बाळाच्या आरोग्यासाठी अत्यंत महत्त्वाचा घटक आहे. आजार झाल्यावर उपचार करण्यापेक्षा आजार होऊच न देणे आवश्यक असते. सरकारी प्राथमिक आरोग्य केंद्रात लसीकरण मोफत मिळते. खेडे गावात लसीकरणा संबंधित माहिती नसल्या कारणाने अनेक बालकांचे नुकसान झालेले दिसून येते.

लस म्हणजे काय?
लस म्हणजे खुद्द त्या त्या रोगचे मेलेले किंवा अर्धवट मेलेले जंतू असतात, किंवा त्या जंतुचा अंश असतो.
ही लस शरिरात गेली की त्याच जंतु मुले होणा-या आजार विरोधी अँन्टीबोडी तयार करते. लसीत सबळ जंतू नसल्याने रोग तर होत च नाही पण रोगजंतू बरोबर लढण्याचा अनुभव प्राप्त होतो.

लसीकरणाची गरज–
प्राथमिक लसीकरण एक वर्ष पूर्ण होण्या अगोदर होणे गरजेचे असते. लहान मुलांना घातक असलेले सहा रोग आहेत. घटसर्प, गोवर, डांग्या खोकला, धनुवार्त, क्षयरोग, पोलिओ (पक्षाघात) हे आजार रोगप्रतिबंदक लस दिल्याने टाळता येतात.

लहान मुलांना देण्यात येणा-या लसी:
1) बी.सी.जी. (BCG Vaccine) :
ही लस क्षयरोग होऊ नये म्हणून वापरली जाते. जन्माताच किंवा १-२ दिवसात ही लस बाळाला दिली जाते.
2) त्रिगुणी लस (Triple Vaccine)
खोकला, घटसर्प, धनुर्वात या तीन लसीचा समावेश यात होतो. ही लस जन्मल्या नंतर तिसर्या महिन्यानंतर दर महिन्याला सलग तीन महिने घेतली जाते.
3) पोलिओ (Polio Vaacine):
हे डोस म्हणजे लाल रंगाचे थेंब असतात. पोलिओ चा पहिला डोस बाळ जन्मल्या वर १-२ दिवसात देतात. बाकी पोलिओ चे बाकी डोस त्रिगुणी लसी बरोबर तोंडने पाजावेत. पोलिओ चा डोस देणे पुर्वी अर्धा तास गरम पाणी किंवा दूध पिवू नये. कारण उष्णते मुळे डोसची शक्ती कमी होते.
4) गोवर प्रतिबंध लस (Measles Vaccine):
गोवर हा तसा साधा आजार आहे. पण जे मूले अशक्त किंवा कुपोषित असतात त्यांच्यासाठी तो जीवघेणा सुद्धा ठरू शकतो. अशा कुपोषित मुलांना गोवर नंतर काही इतर आजारांना तोंड द्यावे लागू शकते. जसे की न्यूमोनिया, छातीत कफ (श्वसनलिकदाह) किंवा दबलेला क्षयरोगाचा आजार उफाळून येऊ शकतो. कित्येकदा या आजारानंतर हगवण, रक्ती आव लागते. त्यामुळे आधीपासून सौम्य किंवा कुपोषित असलेली मुले जास्त कुपोषित होतात. म्हणून गोवर महत्त्वाची गोष्ट असते.
बाळाला नवव्या महिन्यात एक गोवर लसीचे व पंधराव्या महिन्यात किंवा दीड वर्ष पूर्ण झाल्यावर बुस्टर (फेरडोल) इंजेक्शन द्यावे. गोवर लसी नंतर ताप किंवा गाठ येत नाही.हे इंजेक्शन त्वचेखाली देतात. या लसीसाठी शितकापाट आवश्यक आहे.
5) द्विगुणी लस (Double Vaccine)
यामध्ये दोन प्रकारच्या लस असतात. एक म्हणजे घटसर्प व धनुर्वात प्रतिबंधक लस आहे. यात डांग्या खोकला विरुद्ध लस नसते. कारण चौथ्या वर्षानंतर दांड्या खोकला होण्याची शक्यता कमी असते. चौथ्या वर्षाच्या बुस्टरसाठी या लसीची इन्जेक्शन व पोलिओ डोस दिला जातो. कधीकधी काही कारणांमुळे मुलांना तीन वर्षे कोणतीच लस दिली नसेल तर प्रत्येक महिन्यात द्विगुण लसीची तीन इंजेक्शने व पोलिओ डोस द्यावेत. एक वर्षाने दोन्हीचे बूस्टर व पाच वर्षाने दुसरा बूस्टर द्यावा. द्विगुणी लस हि देखील महत्वाची लस आहे.

लसीकरण हा महत्वाचा विषय आहे याबद्दल जागृतता घडून यावी असे बरेच प्रयत्न सुरु आहेत. मुलांसाठी लसीकरण हे खूप महत्वाचे आहे कारण याने आपण बरेच भावी आजार टाळू शकतो. बरेच आजार हे लसीकरणामुळे पूर्ण नाहीसे करण्यात यश आले आहे. तसेच लसीकरणामुळे मृत्युदर देखील बऱ्याच प्रमाणात कमी झाला आहे. मुलाच्या भावी आयुष्यातील सदृढ शारीरिक जीवनासाठी लसीकरण अत्यंत महत्वाचे ठरले आहे. लसीकरणबाबत जागृतीसाठी सरकार देखील प्रयत्नशील आहे. सरकारी दवाखान्यांमध्ये लसीच्या किमती देखील कमी आहेत तर काही लसी मोफत देखील असतात. लसीकरणाने हानी पोहचत नाही उलट फायदाच होतो म्हणून हे मूल्य लक्षात घेऊन प्रत्येक मुलाला लसीकरण करणे महत्वाचे आहे.

पुणे-माजी नगरसेवक दत्तोबा ससाणे यांचे शुक्रवारी (ता. 9) निधन झाले. ते 78 वर्षांचे होते. ससाणेनगरचे सरपंच ते महापालिकेचे नगरसेवक असा त्यांचा राजकीय प्रवास झाला. ससाणे यांनी 2001 पर्यंत सुमारे 25 वर्षे किर्लोस्कर न्युमॅटिक कंपनीत नोकरी केली.

1984 ते 1997 या काळात ते ससाणेनगरचे सरपंच होते. तर 2002 ते 2012 असे सलग दोन टर्म नगरसेवक म्हणून हडपसरचे प्रतिनिधित्व केले. नगरसेवक असताना त्यांनी रामटेकडी येथील पिण्याच्या पाण्याच्या टाकीचा प्रश्न सोडविला. त्यामुळे हडपसर परिसरातील पाण्याचा प्रश्न कायमचा मार्गी लागला. सोलापूर रस्त्याच्या रुंदीकरणाचा महत्त्वाचा प्रश्न त्यांच्या कारकिर्दीतच सोडविला गेला. त्यामुळे हडपसरचा विकास होण्यात त्यांचा मोलाचा वाटा होता. नगरसेवक असताना त्यांचे सर्व पक्षीयांशी सलोख्याचे संबंध होते.

हडपसरच्या विकासाबाबत त्यांनी सर्वांना सोबत घेऊन वाटचाल केली. सध्या त्यांचे पुत्र योगेश ससाणे त्यांचा वारसा चालवित असून ते नगरसेवक होण्यात त्यांनी मोठा वाटा उचलला. त्यांच्या मागे पत्नी, दोन मुले, तीन मुली, सुना, नातवंडे असा परिवार आहे. त्यांच्या निधनाने हडपसर परिसरात शोक व्यक्त करण्यात येत आहे.

पुणे- मार्केट यार्डातील प्रस्तावित फुलबाजाराची शिरूर, हवेलीचे आमदार अशोक पवार यांनी पाहणी केली. यावेळी व्यापाऱ्यानी प्रस्तावित फुलबाजारातील अडचणींचा पाडाच त्यांच्यासमोर मांडला. त्यानंतर व्यापाऱ्यांच्या मागण्यांचे त्यांना निवेदन देण्यात आले. यावर चर्चा करून मागण्या पूर्ण करण्याचा प्रयत्न करण्याचे आश्‍वासन पवार यांनी दिले.

त्यावेळी पुणे कृषी उत्पन्न बाजार समितीचे प्रशासक मधुकांत गरड, अखिल पुणे
फुलबाजार आडते असोसिएशनचे अध्यक्ष अरुण वीर, सागर भोसले, बापू कड आदी उपस्थित होते
पवार यांना दिलेल्या निवेदनात म्हटले आहे की, आडत्यांनी मागणी केल्याप्रमाणे फुलबाजार बांधण्यात आलेला नाही. नवीन फुलबाजार बांधताना ठराविकच लोकांना विश्‍वासात घेतले असून इतरांचा विचार केला नाही. बाजार समितीने आडत्यांकडून एक लाख रुपये अनामत रक्कम घेतली आहे.

ही रक्कम आडत्यांनी स्वखुशीने दिलेली नाही. फुलांच्या बाजार हा गोलाकार आसावा. त्यामध्ये प्रत्येकाला समोरील भाग सारखा असावा. प्रत्येकाला सारखे गाळे असावेत. जागा वाढवून देण्याबाबत कोणताही विचार करण्यात आला नाही. सध्याच्या जागेपेक्षा नवीन बाजारात कमी जागा मिळणार आहे. नवीन फुलबाजारात दहा मजल्यांचा असणार आहे. त्यामुळे नवीन बाजारात आवक जास्त झाल्यास बाजार विस्कळीत होईल.

पहिला गाळा सहाव्या मजल्यावर येत आहे. पाचव्या मजल्यावर ऑक्‍शन हॉल शेतकऱ्यांनी विकल्यावर आमच्याकडे सहाव्या मजल्यावर शेतकरी कसे येणार आणि एवढी मोठी किंमत देवून आम्ही गाळे विकत तरी कशासाठी घ्यायचे, असा सवालही व्यापाऱ्यांनी उपस्थित केला

डॉ. नितीन करमळकर यांचे मत; एसीपीपीयू रिसर्च पार्क फाउंडेशन व ‘टीटीए’ यांच्यात सामंजस्य करार
पुणे : “उद्योग आणि शिक्षणसंस्थांमधील दरीविषयी नेहमी बोलले जाते. पण अलीकडच्या काळात ही दरी दूर करण्यासाठी औद्योगिक संस्था आणि शिक्षणसंस्था एकत्रित येत आहेत. उद्योगांना आवश्यक आणि समाजाभिमुख संशोधनावर शिक्षण संस्थांनी भर देण्याची आवश्यकता आहे. तसेच अशा संशोधनांना व्यवसायात रूपांतरित करण्याची गरज असून, त्यासाठी एकमेकांतील सामंजस्य करार उपयुक्त ठरतील,” असे प्रतिपादन सावित्रीबाई फुले पुणे विद्यापीठाचे कुलगुरू डॉ. नितीन करमळकर यांनी केले.

सावित्रीबाई फुले पुणे विद्यापीठाच्या (एसीपीपीयू) रिसर्च पार्क फाउंडेशन आणि टेक्नॉलॉजी ट्रान्स्फर असोसिएशन (टीटीए) यांच्यात सामंजस्य करार झाला, त्यावेळी डॉ. करमळकर बोलत होते. याप्रसंगी प्र-कुलगुरू डॉ. एन. एस. उमराणी, शासकीय अभियांत्रिकी महाविद्यालयाचे संचालक डॉ. भारत आहुजा, रिसर्च पार्क फौंडेशनचे मुख्य कार्यकारी अधिकारी डॉ. अरविंद शाळीग्राम, टेक्नॉलॉजी ट्रान्स्फर असोसिएशनचे अध्यक्ष यशवंत घारपुरे, सचिव विलास रबडे, विद्यापीठाच्या तंत्रज्ञान विभागाचे प्रमुख डॉ. आदित्य अभ्यंकर, भौतिकशास्त्र विभागाचे प्रमुख डॉ. सुरेश गोसावी, उद्योजक विश्वास काळे, अनिल चैतन्य आदी उपस्थित होते.

डॉ. नितीन करमळकर पुढे म्हणाले, ” सावित्रीबाई फुले पुणे विद्यापीठातील संशोधनांना बाजारपेठेत व्यावसायिक रूपात आणण्याच्या दृष्टीने रिसर्च पार्क फाउंडेशनची स्थापना झालेली आहे. या फाउंडेशनबरोबर टेक्नॉलॉजी ट्रान्सफर असोसिएशनचा करार होणे ही चांगली बाब आहे. उद्योग क्षेत्रात अनेक वर्षे काम केलेली मंडळी या असोसिएशनमध्ये असल्याने विद्यापीठातील संशोधकांना उद्योजकता विकास साधण्यासाठी त्यांचा अनुभव कामी येईल. तसेच या संशोधकांचे तंत्रज्ञान कंपन्यांपर्यंत पोहोचले, तर त्यांना स्टार्टअप सुरु करण्यात, व्यवसाय उभारण्यात मदत होईल. त्यातून अनेक नवतंत्रज्ञान विकसित होतील. हे तंत्रज्ञान लोकांपर्यंत पोहोचवून त्याचा त्यांना लाभ करून देता येईल.”

यशवंत घारपुरे म्हणाले, “शिक्षणसंस्थांतील संशोधनांना कंपन्यांशी जोडून देण्याचा आमचा उपक्रम आधीपासूनच सुरु झाला आहे. मॉडर्न कॉलेजबरोबर इलेक्ट्रिकल व्हेइकलवर संशोधन करून तीनचाकी वाहने निर्मितीचे काम सुरु आहे. पीएचडी करत असलेल्या तरुण लोकांच्या ज्ञानाचा उपयोग उद्योगांना करून घेऊन त्यातून व्यवसाय उभारण्याचा प्रयत्न कसा करता येईल, यासाठी आमची संस्था काम करत आहे.”
 डॉ. अरविंद शाळीग्राम म्हणाले, “या करारामुळे विद्यापीठातील विद्यार्थ्यांना उद्योगांशी संवाद करता येणार आहे. उद्योग क्षेत्रातील वरिष्ठ पदावरील आणि अनुभवी लोकांचा समावेश ‘टीटीए’मध्ये असल्याने त्याचा लाभ होईल. येथील संशोधन व्यवसायाच्या रूपात समाजापर्यंत पोहोचताना आपल्याला भविष्यात पाहायला मिळेल.” विलास रबडे यांनी या कार्यक्रमाचे समन्वयन केले.

कोथरूड मधील सोसायटीतील नागरिकांच्या भेटीगाठी

पुणे-कोरोनानंतर भारतीय जनता पक्षाचे प्रदेशाध्यक्ष आणि कोथरुडचे आमदार चंद्रकांतदादा पाटील यांनी आपल्या मतदारसंघात जनसंवाद उपक्रम हाती घेतला आहे. याअंतर्गत मतदार संघातील नागरिकांच्या भेटीगाठी घेऊन त्यांच्या समस्या जाणून घेत आहेत. तसेच, कोरोनानंतर आवश्यक उपाययोजना संदर्भात चर्चा करत आहेत.

कोरोनाविरुद्धच्या लढ्यात सर्व प्रशासकीय यंत्रणा काही लागल्यामुळे नागरी समस्यांकडे दुर्लक्ष झाले होते. त्यामुळे याची दखल घेऊन भारतीय जनता पक्षाचे प्रदेशाध्यक्ष आणि कोथरुडचे आमदार चंद्रकांतदादा पाटील यांनी आपल्या मतदारसंघात जनसंवाद उपक्रम हाती घेतला आहे.या उपक्रमाअंतर्गत ते नागरिकांच्या भेटीगाठी घेऊन समस्या जाणून घेत आहेत.

आज त्यांनी बाणेर-पाषाण लिंक रोड, हॅप्पी कॉलनी, अनंतकृपा सोसायटीतील नागरिकांशी संवाद साधून समस्या जाणून घेतल्या. तर गेल्या आठवड्यात मतदार संघातील विविध सोसायटीतील नागरिकांची भेट घेऊन चर्चा केली. तसेच कोरोनानंतरच्या आवश्यक उपाययोजना संदर्भात चर्चा केली.

यावेळी नागरिकांच्या समस्या जाणून घेतल्यानंतर आयुक्तांची भेट घेऊन, तोडगा काढणार असल्याचेही सांगितले. तसेच, आगामी काळात मतदार संघातील कोरोनावर यशस्वीपणे मात केलेल्यांसाठी एक काऊन्सिलिंग शिबीर राबवणार असल्याचे त्यांनी यावेळी स्पष्ट केले.

पिंपरी, दि. 10 ऑक्टोबर 2020 : भोसरी येथील विद्युत रोहित्राच्या स्फोटाच्या दुर्दैवी घटनेतील तीन मृतांच्या कुटुंबियांना महावितरणकडूनशुक्रवारी (दि. 9) प्रत्येकी चार लाख रुपयांच्या मदतीचा धनादेश सुपूर्द करण्यात आला.

भोसरी येथील इंद्रायणीनगरमध्ये राजवाडा बिल्डींग 2 जवळ विद्युत रोहित्राचा दि. 4 सप्टेंबरला दुपारी दीडच्या सुमारास स्फोट झाला होता. या घटनेत शारदा दिलीप कोतवाल, हर्षदा सचिन काकडे व त्यांची मुलगी शिवण्या यांचा मृत्यू झाला होता. या मृतांच्या कुटुबियांना महावितरणकडून प्रत्येकी 4 लाख रुपयांची मदत जाहीर करण्यात आली होती. त्याप्रमाणे भोसरी विभागाचे प्रभारी कार्यकारी अभियंता श्री. अमित बारटक्के यांनी मदतीच्या रकमेचे धनादेश कुटुबियांना सुपूर्द केले. महावितरणकडून ही मदतीची प्रशासकीय प्रक्रिया पूर्ण करण्यासाठी इतर शासकीय विभागांकडून काही कागदपत्रांची प्रतीक्षा सुरु होती. कोरोनाच्या संकटामुळे त्यास विलंब होत असल्याचे पाहून महावितरणच्या अधिकाऱ्यांनी पुढाकार घेऊन वैयक्तिकस्तरावर पाठपुरावा करीत आवश्यक सर्व कागदपत्रांची पुर्तता केली. त्यानंतर मृतांच्या कुटुबियांना मदतीचा धनादेश सुपूर्द करण्यात आले.

दरम्यान, पिंपरी व भोसरी शहरामधील रोहित्रांच्या परिसरातील साफसफाई तसेच देखभाल व दुरुस्तीचे काम युद्धपातळीवर सुरु आहे. यामध्ये आतापर्यंत 2412 रोहित्रांच्या परिसरातील झाडीझुडपे, वेली काढणे, रोहित्रांची तपासणी करणे, आवश्यकतेनुसार दुरुस्ती करणे आदी कामे करण्यात आली आहे.

पुणे– नवी सांगवी येथील आदित्य डेंटल केअर हॉस्पिटल अँड रिसर्च सेंटरचे संचालक डॉ . आदित्य पतकराव यांची केंद्र शासनाच्या सुक्ष्म , लघु , मध्यम उद्दोग मंत्रालयातील निर्यात परीषदेच्या संचालक पदी निवड करण्यात आली.

नवीदिल्ली येथे नुकतेच केंद्र शासनाच्या सुक्ष्म , लघु , आणि उद्दोग परीषदेचे अध्यक्ष तथा भाजपाचे राष्ट्रीय परीषदेचे अध्यक्ष तथा हरिणारायण राजभार यांच्या हस्ते सदरील निवडीचे पत्र डॉ.आदित्य पतकराव यांना देण्यात येवून सन्मान करण्यात आला. केंद्र शासनाच्या सुक्ष्म , लघु आणि मध्यम उद्योग मंत्रालयातील निर्यात पदोन्नती परिषदेच्या संचालक करण्यात आलेल्या निवडी बद्दल डॉ . आदित्य पतकराव यांनी देशाचे पंतप्रधान नरेंद्र मोदी , सूक्ष्म , लघु आणि मध्यम उद्योग एम एस एम ई चे केंद्रीय मंत्री नितीन गडकरी , एम.एस. एम. ईचे केंद्रीय राज्यमंत्री प्रतापचंद्रा सारंगी, माजी मंत्री आणि भाजप राष्ट्रीय परिषदेचे सदस्य तथा सुक्ष्म, लघु आणि मध्यम उद्दोग मंत्रालय परीषदेचे अध्यक्ष हरिनारायण राजभार यांचे आभार मानले. आपण यापुढे राष्ट्रकार्यासाठी सदैव कर्तव्य तप्तर राहुन आपल्याला केंद्र शासनाने दाखवलेला विश्वास सार्थ ठरवू असा विश्वास व्यक्त केला आहे . विकासाचा अनुशेष भरुन काढण्यासाठी प्रयत्न करणार केंद्र शासनाच्या सुक्ष्म , लघु आणि मध्यम उद्दोग मंत्रालयाच्या निर्यात परीषदेच्या संचालक पदी झालेली निवड महाराष्ट्रातील एकमेव निवड असुन तीन वर्षासाठी राहणार आहे.

सूर्यदत्ता ग्रुप ऑफ इन्स्टिट्यूट्सतर्फे ‘सूर्यगौरव राष्ट्रीय व आंतरराष्ट्रीय पुरस्कार’ वितरण
पुणे : “कोरोनाने माणसातील जातीभेद नष्ट करत सेवाकार्य हेच अधिक महत्वपूर्ण असल्याचे अधोरेखित केले आहे. लॉकडाऊनच्या काळात लाखो लोकांना अन्न, आरोग्यसुविधा पुरविण्याचे काम अनेक सेवावृत्तींनी केले. माणुसकीचा बंध घट्ट करणाऱ्या या सेवाकार्य करणाऱ्या व्यक्तिमत्वाचा सन्मान आपल्या सर्वांसाठीच प्रेरणादायी आहे,” असे मत सावित्रीबाई फुले पुणे विद्यापीठाच्या सिनेटचे सदस्य व नॅशनल युथ को-ऑपरेटिव्ह सोसायटीचे चेअरमन राजेश पांडे यांनी व्यक्त केले.

सूर्यदत्ता ग्रुप ऑफ इन्स्टिट्यूटतर्फे दिल्या जाणाऱ्या सूर्यगौरव राष्ट्रीय व आंतरराष्ट्रीय पुरस्कारांचे वितरण करण्यात आले. ‘सूर्यगौरव आंतरराष्ट्रीय पुरस्कार’ स्ट्रॅटेजिक फोरसाइट ग्रुपचे सचिन इटकर, भाजप नेत्या श्वेता शालिनी, प्रजापिता ब्रह्माकुमारीच्या सरिता दीदी, पत्रकार राजू वाघमारे, उद्योजक डॉ. दीपक तोष्णीवाल, सामाजिक कार्यकर्ते डॉ. राजेश बाहेती यांना, तर ‘सुर्यगौरव राष्ट्रीय पुरस्कार’ राजेश पांडे, ‘रक्ताचे नाते’ संस्थेचे राम बांगड, ‘जागृती ग्रुप’चे राज देशमुख, कौशल्य विकास क्षेत्रातील संजय गांधी, युवा सामाजिक कार्यकर्ते किरण साळी, जिल्हा माहिती अधिकारी राजेंद्र सरग, ‘उचित माध्यम’चे संचालक जीवराज चोले यांना प्रदान करण्यात आला. ‘सूर्यदत्ता’च्या बावधन प्रांगणातील बन्सीरत्न सभागृहात झालेल्या या सोहळ्याप्रसंगी ‘सुर्यदत्ता’चे संस्थापक अध्यक्ष प्रा. डॉ. संजय चोरडिया, कार्यकारी संचालक प्रा. अक्षीत कुशल, मुख्य विकास अधिकारी प्रा. रामचंद्रन यांच्यासह शिक्षक-शिक्षकेतर कर्मचारी उपस्थित होते.
राजेश पांडे म्हणाले, “तरुणांमध्ये मोठी क्षमता असते. त्यांना दिशा दिली, तर त्यांच्या हातून भरीव कार्य घडते. राष्ट्रीय सेवा योजनेतील विद्यार्थ्यांना आम्ही मास्क शिवण्याचा उपक्रम दिला. आजवर ७० हजार विद्यार्थ्यांनी मिळून जवळपास ३५ लाख मास्क शिवले आहेत. त्याचबरोबर गेल्यावर्षी हरित वारी उपक्रमात पालखी मुक्कामावर विद्यार्थ्यांनी स्वच्छता केली होती. विद्यापीठात एक लाख वृक्षलागवडीचा कार्यक्रम झाला होता. त्याची नोंद अनेकांनी घेतली.”
सचिन इटकर म्हणाले, “लॉकडाऊनमुळे हातावरचे पोट असणाऱ्या लोकांचे हाल होत होते. त्यावेळी समाजातील अनेक सेवाभावी व्यक्ती आणि संस्थांनी त्यांना आधार दिला. अशा व्यक्ती-संस्थांना सन्मानित करून सूर्यदत्ता परिवाराने सेवेचे आदर्श उदाहरण घालून दिले आहे.”
श्वेता शालिनी म्हणाल्या, “सूर्य जसा शाश्वत आणि प्रेरणादायी असतो, तसेच निस्वार्थ सेवाकार्य आपल्या सगळ्यांकरिता प्रेरणा देणारे असते. भारतीयांनी आलेल्या या संकटाचा सामना धैर्याने केला. लोकांनी एकत्र येऊन एकमेकांना सहकार्य भावनेतून नाते जपले. संकटाला संधी मानून काम करण्याची प्रेरणा पंतप्रधानांनी दिली.”
डॉ. दीपक तोष्णीवाल म्हणाले, “कोरोना काळात अडकलेल्या लोकांना आरोग्य सुविधा, निवास-भोजनाची सुविधा उपलब्ध करून दिली. अनेक सोसायट्यांमध्ये विलगीकरण कक्ष उभारण्यासाठी पुढाकार घेतला. कोरोनाच्या या लढ्यात अनेक डॉक्टर, पोलिसांनी आपले जीवनदान दिले. त्यांच्याप्रती आपण कृतज्ञ राहावे.
राम बांगड म्हणाले, “रक्ताची, प्लाझ्माची आज मोठी गरज आहे. राज्याच्या विविध भागातून, तसेच बाहेरूनही प्लाझ्माला मागणी आहे. पुणेकरांचे त्यात योगदान मोठे आहे. जास्तीत जास्त गरजूना रक्त आणि प्लाझ्मा पुरविण्यासाठी प्रयत्न करत आहोत. मी स्वतः तीनवेळा प्लाझ्मादान केले आहे. त्यामुळे लोकांनी पुढे येऊन प्लाझ्मा, रक्तदान करावे.”
सरिता दीदी म्हणाल्या, “भारतीयांनी निस्वार्थ दातृत्वाची भावना आहे. सेवेची संधी मिळणे हा ईश्वराचा प्रसाद असतो. आपण लोकांच्या चेहऱ्यावर हसू फुलवण्याचा प्रयत्न केला पाहिजे. कोरोनाच्या भीतीने अनेकांना जीव गमवावा लागला. त्यामुळे निडर बनून लोकांना कोरोनाच्या भीतीपासून दूर नेले पाहिजे. आपल्यातील करुणा जागृत ठेवून त्यांच्यासाठी काम करावे.”
राजेंद्र सरग म्हणाले, “या कठीण काळात अफवांचे पीक वाढत असताना माहिती खात्याकडून अधिकृत बातम्या देण्याचे काम करता आले. विभागीय कार्यालय, जिल्हाधिकारी कार्यालय आणि महानगरपालिका यांच्यातील निर्णयाची माहिती लोकांपर्यंत पोहोचवण्याचे काम गेल्या सात महिन्यात नियमितपणे केले.”

राजेश बाहेती म्हणाले, “समाजातील अनेकांना गरज होती आणि ती पूर्ण करण्याचे काम ईश्वराने माझ्या हातून करून घेतले. कम्युनिटी किचनच्या माध्यमातून लाखो लोकांना जेवण देण्याचे सत्कर्म आमच्या हातून घडले.” राज देशमुख यांनी जागृती ग्रुपच्या माध्यमातून, तसेच पायी जाणाऱ्या मजुरांसाठी कोरोना काळात केलेल्या कार्याबद्दल सांगितले.
संजय गांधी यांनी कौशल्य विकास क्षेत्रात करत असलेल्या कार्याविषयी माहिती दिली. जीवराज चोले यांनी विद्यार्थी सहायक समिती, माजी विद्यार्थी मंडळ आणि पत्रकार मित्र परिवाराच्या माध्यमातून कोरोना काळात केलेल्या कार्याविषयी सांगितले. मनोगत व्यक्त केले. प्रा. डॉ. संजय चोरडिया यांनी पुरस्कार सोहळ्यामागील भूमिका स्पष्ट केली. प्रा. सुनील धनगर यांनी सूत्रसंचालन केले. प्रा. रामचंद्रन यांनी आभार मानले.

पुणे, 10 ऑक्टोबर: कोरोनाच्या वाढत्या संसर्गजन्य काळात प्रत्येक व्यक्तीने स्वतःची काळजी घेणे गरजेचे आहे, पण या बद्दल खेड्यांमध्ये अशी जागृती दिसत नाही. ही गोष्ट लक्षात ठेऊन एमआयटी वर्ल्ड पीस युनिव्हर्सिटीच्या स्कूल ऑफ फार्मसीमधील (टीम फार्मा पिक्सेल) च्या विद्यार्थ्यांनी सामाजिक जागृती करण्याचा विडा उचलला आहे. याकरीता त्यांनी मुळशी मधील अंबडवेट गावाला भेट देऊन मोफत मास्क व सॅनिटायझरचे वाटप केले.
जेमतेम हजारो वस्तींच्या या गावातील सर्व लहान मुले, स्त्रिया, पुरूषां आणि शाळेतील विद्यार्थ्यांना कोरोनाचा प्रादुर्भाव टाळण्यासाठी घ्यावयाच्या प्रतिबंधात्मक सूचनांबद्दल मार्गदर्शन केले. या गावातील समस्त ग्रामवासियांना मास्क व सॅनिटायझरचे मोफत वाटप केले. एमआयटीच्या स्कूल ऑफ फार्मसीमधील विद्यार्थी प्रथमेश मारणे, इशा ओसवाल, सुयश बागड, देविका नाईक, हर्षल मुंदडा, सिद्धेश जोगळेकर, निधी सबणे आणि आर्या गिजारे यांनी येथील नागरिकांना समजावून सांगितले की मास्क व सॅनिटायझरचा योग्य वापर कसा करावा. तसेच वेळो वेळी साबणाचा वापर करून स्वच्छ हात धुण्याचे लाभ काय आहेत.
विद्यार्थ्यांच्या या सामाजिक कार्याबद्दल स्कूल ऑफ फार्मसीचे अधिष्ठाता डॉ.बी.एस. कुचेकर, हेड ऑफ स्कूल डॉ. अक्षय बाहेती व इतर सर्व पदाधिकार्‍यांनी आणि शिक्षकांनी कौतुक केले.