पेणमध्ये भाजपची भव्य जाहिर निषेध सभा
पेण – एखाद्या घटनेचा राजकीय स्वार्थासाठी भांडवल करून घेणे हि सुनिल तटकरेंची वृत्ती असून गेली २० ते २५ वर्षात विरोधकांना वेळोवेळी अडचणीत आणण्याचे काम ते करीत असून त्यांना आलेला सत्तेचा माज आगामी काळात जनताच उतरवेल हे निर्विवाद सत्य आहे. प्रामाणिकपणे निवडून आलेल्या लोकप्रतिनीधींना सत्तेचा गैरवापर करीत पोलीस यंत्रणेला चुकीच्या पद्धतीने गुन्हे दाखल करण्यास भाग पाडणे या विरोधात भाजप रस्त्यावर उतरल्याशिवाय राहणार नाही असा जोरदार इशारा विधानपरिषदेचे विरोधी पक्ष नेते प्रविण दरेकर यांनी पेणमध्ये आयोजित निषेध मोर्चा प्रसंगी दिला.

१६ ऑक्टोबर रोजी पेण न. प. च्या स्थायी समितीच्या सभेत नरदासचाळ येथील सांडपाण्याचा निचरा समस्या निवारण प्रश्नी गटनेते अनिरुद्ध पाटील यांनी मुख्याधिकारी यांना जाब विचारला यावरून मुख्याधिकारी यांनी गटनेत्याच्या विरोधात पेण पोलीस स्थानकात गुन्हा दाखल केला परंतु पोलीस यंत्रणेने कोणतीही शहानिशा न करता ३५३ गुन्हा दाखल केल्याने जनतेच्या प्रश्नासंबंधी जाब विचारणाऱ्या लोकप्रतिनिधींनवर गुन्हा दाखल करणे हे निषेधार्ह असून या विरोधात आज २९ ऑक्टोबर रोजी वैकुंठ निवास येथून निषेध मोर्चाचे आयोजन केले होते. विरोधी पक्ष नेते प्रविण दरेकर यांच्या प्रमुख उपस्थितीत या वेळी रॅली काढण्यात आली होती. या रॅलीचे न. प. कार्यालयासमोर सभेत रूपांतर झाले.
याप्रसंगी व्यासपीठावर रायगडचे माजी पालकमंत्री आमदार रविद्र चव्हाण, आमदार रविशेठ पाटील, भाजप जिल्हाध्यक्ष आमदार प्रशांत ठाकुर, आमदार निरंजन डावखरे, पनवेलचे उपमहापौर जगदीश गायकवाड, पनवेल मनपा सभागृह नेते परेश ठाकूर, पेणच्या नगराध्यक्षा प्रितम पाटील, पनवेल मनपा स्थायी समिती सभापती संतोष शेट्टी, सभापती मोनिका महानवर, सभापती अनिता पाटील, समीर ठाकूर, हेमलता म्हात्रे, सुशीला घरत, भाजप जिल्हाध्यक्ष अँड. महेश मोहिते, युवा मोर्चा जिल्हाध्यक्ष अमित घाग, रिपाई कोकण अध्यक्ष जगदिश गायकवाड, भाजपचे जिल्हा उपाध्यक्ष वैकुंठ पाटील, जिल्हा सरचिटणीस मिलिंद पाटील, चिटणीस बंडू खंडागळे, तालुकाध्यक्ष श्रीकांत पाटील आदी मान्यवर उपस्थित होते.
यावेळी पुढे बोलताना प्रविण दरेकर म्हणाले कि, सुडाचे राजकारण करत असताना तटकरे यांनी पोलीस यंत्रणेवर दबाव टाकल्याने पोलिसांनी सारासार विचार न करता रात्रौ १२.३० वाजता माजी मंत्री आमदार रविशेठ पाटील यांच्या घराची झाडाझडती घेतली हे निव्वळ रविशेठ पाटील यांना बदनाम करण्यासाठी आपण कुठल्याही थराला जाऊ शकतो हे तटकरेंनी या घटनेवरुन सिद्ध करून दाखविले असून या प्रकरणाचा जाब येत्या विधानसभा अधिवेशनात सरकारला विचारणार असल्याचे प्रविण दरेकर यांनी सांगितले.
तटकरेंशी राजकीय मैत्री करणारे इतर पक्षांचेही अस्तित्व संपविण्याचे काम ते करीत असून शिवसेनेचे जिल्ह्यात ३ आमदार असून सुद्धा पालकमंत्री पद राष्ट्रवादीला गेले आहे, तसेच शासकीय कार्यक्रमाच्या आमंत्रांवरून शिवसेनेच्या आमदारांनी तक्रार दिली असून ही शिवेसनेसाठी शोकांतिका आहे. आगामी काळात तटकरे भाजपाला १ नंबर राजकीय क्षत्रू मानतात आम्ही पण तटकरेंना जशास तसे उत्तर देऊ असे शेवटी दरेकर यांनी स्पष्ट केले.
हा प्रश्न फक्त एका नगरपालिकेशी मर्यादित नाही तर रायगड जिल्ह्याच्या भविष्याशी निगडित आहे. भारतीय जनता पार्टी राज्यातील सर्वात मोठा विरोधी पक्ष आहे आणि सुदैवाने विधान परिषदेचा विरोधी पक्षनेता हा याच रायगडच्या मातीतला आहे त्यामुळे अशा कोणत्याही प्रकारची दडपशाही आम्ही खपवून घेणार नाही असेही त्यांनी यावेळी स्पष्ट केले.
राज्यात हे सरकार सत्तवेर आले तेव्हाच लोकशाहीचा खून झाला. शिवसेना भाजपच्या युतीला लोकांनी मत दिली असून देखील हे अनैसर्गिक सरकार स्थापन केल. श्रीवर्धन बँक बुडविली, गोरेगाव अर्बन बँक बुडवली गेली, पेण अर्बन बँक बुडाली हे सर्व बँक बुडवणारे तटकरे यांचे साथीदार असल्याचा आरोप दरेकर यांनी यावेळी केला. तटकरे यांच्या सुतार वाडी ची झाडाझडती तुम्ही करणार आहात का असा सवालही त्यांनी रायगड पोलिसांना यावेळी केला.
या मोर्चात हजारो नागरिकांनी सहभाग घेतला होता तसेच पेणमधील व्यापारी, फळ विक्रेते, दुकानदार, भजीवाले यांनी दुकाने बंद ठेऊन बंदमध्ये सहभाग घेतला.

नांदेड :- मागील २४ वर्षे भाऊराव चव्हाण सहकारी साखर कारखान्याने इथल्या शेती आणि शेतकऱ्यांप्रती जी विश्वासार्हता जपली त्याच विश्वासार्हतेच्या बळावर आपण कारखान्याच्या रौप्य महोत्सवी गळीत हंगामाचा शुभारंभ केला आहे. ऊस उत्पादक शेतकऱ्यांच्या योगदानातून हा कारखाना आजवर विविध गुणवत्तेसह सुरु आहे. शेतकऱ्यांना जास्तीत जास्त चांगला दर कसा मिळेल यासाठी आम्ही विश्वस्त या नात्याने अधिक कटिबद्ध असून सदैव प्रयत्नशील राहू, असे प्रतिपादन राज्याचे सार्वजनिक बांधकाम मंत्री तथा नांदेड जिल्ह्याचे पालकमंत्री अशोक चव्हाण यांनी केले. ते भाऊराव चव्हाण सहकारी कारखाना लि. लक्ष्मीनगरच्या रौप्य महोत्सवी गळीत हंगाम शुभारंभानिमित्त आयोजित करण्यात आलेल्या कार्यक्रमात बोलत होते. या गळीत हंगामाच्या शुभारंभासाठी राज्याचे सहकार, कृषि, सामाजिक न्याय, अन्ननागरी पुरवठा, ग्राहक संरक्षण, अल्पसंख्यांक विकास व औकाफ आणि मराठी भाषा राज्यमंत्री डॉ. विश्वजीत कदम यांची विशेष उपस्थिती होती. यावेळी आमदार अमर राजूरकर, आमदार मोहन हंबर्डे, जिल्हा परिषदेच्या अध्यक्षा सौ. मंगाराणी अंबुलगेकर, महापौर सौ. मोहिनी येवनकर, माजी राज्यमंत्री डी. पी. सावंत, कारखान्याचे अध्यक्ष गणपतराव तिडके, उपाध्यक्ष कैलास दाड आदींची यावेळी उपस्थिती होती. भाषणाच्या सुरवातीला त्यांनी स्व. डॉ. शंकरराव चव्हाण व स्व. पतंगराव कदम यांच्या स्मृतींना उजाळा दिला. डॉ. विश्वजीत कदम यांनी पतंगराव कदम यांचा वारसा समर्थपणे चालविला असून त्यांच्या कामाची कार्यपद्धती अतिशय चांगली असून या युवा नेत्याचे मराठवाड्याकडून कौतूक व्हावे, त्यांच्या कार्याचा गौरव व्हावा यासाठी त्यांना मी निमंत्रण दिल्याचे त्यांनी स्पष्ट केले. माझा युवा सहकारी म्हणून मला अभिमान असल्याचेही त्यांनी गौरोउद् गार काढले.
 
इथल्या कृषिक्षेत्रावर स्व. डॉ. शंकरराव चव्हाण यांचे मोठे ऋण आहेत. त्यांनी शेतीसाठी विविध प्रकल्पाच्या माध्यमातून पाणी उपलब्ध करुन दिले. यातूनच नांदेडमधल्या शेतकऱ्यांनी समृद्धता साध्य केली. अशोक चव्हाण यांनीही त्यांची धुरा समर्थपणे सांभाळली असून माझ्यासारख्या अनेक युवा नेतृत्वाला त्यांनी घडविल्याचे प्रतिपादन राज्यमंत्री डॉ. विश्वजीत कदम यांनी केले. उत्पादन खर्च जर कमी करायचा असेल तर ठिबक शिवाय पर्याय नसल्याचे सांगून त्यांनी शेतकऱ्यांना उच्च कृषि तंत्रज्ञानाची कास धरण्याचे आवाहन केले. नुकताच झालेल्या अतिवृष्टीमुळे शेतकऱ्यांचे जे नुकसान झाले त्याचे शंभर टक्के पंचनामे पूर्ण झाले असल्याचेही त्यांनी सांगितले. प्रारंभी आमदार अमर राजूरकर व कारखान्याचे अध्यक्ष गणपतराव तिडके यांनी मनोगत व्यक्त केले.

मुंबई, दि. 28 : कोरोना संकटाच्या कालावधीत मनामनावर दाटलेले मळभ शरद पौर्णिमेच्या कालावधीतील शारदीय चांदण्यांच्या स्पर्शाने दूर करत मंत्रालयात ‘शतदा प्रेम करावे’ हा काव्यवाचनाचा कार्यक्रम रंगला.

मंत्रालयीन अधिकारी/कर्मचारी कल्याण समितीच्या वतीने मंत्रालयात परिषद सभागृह येथे या काव्यवाचन कार्यक्रमाचे आयोजन करण्यात आले.

कोरोना संकटात दिसलेले भाव-भावनांचे विश्व, मानवी मनाचे कंगोरे, ताणतणाव आणि आनंदाचे क्षण यावर आधारित जगण्यावर प्रेम करायला शिकविणाऱ्या कवितांचे सादरीकरण यावेळी करण्यात आले. या काव्यवाचनाचा उद्देश फक्त मनोरंजनाकरिता नव्हता तर कोरोना काळात सर्वांच्याच मनावर आलेले मळभ दूर करणे हा होता.

अजय भोसले, अंजली मोटळकर, मच्छिंद्र डवले, स्वप्ना चव्हाण, मीनल जोगळेकर, यांच्यासह श्री. विवेक दहिफळे, मंगल नाखवा, स्वाती महांगरे, दिवाकर मोहिते, रवींद्र पानसरे, प्रवीण मुंडे, सतीश जोंधळे, प्रशांत साजणीकर, जयश्री सिंगलवार, सचिन देवडराव, अमोल उगलमले, संजय जाधव, अतुल कुलकर्णी, सतीश मोघे, अभय जावळे या  मंत्रालयातील अधिकारी व कर्मचाऱ्यांनी आपल्या कविता यावेळी सादर केल्या. मनाला उभारी देण्याचे काम या कार्यक्रमाच्या माध्यमातून झाले. अशा भावना कवी व कवयित्री यांनी व्यक्त केल्या.

लॉकडाऊनच्या कालावधीत कोरोनासारख्या महामारीशी संघर्ष करीत असताना मंत्रालयातील उपहारगृहातील कर्मचाऱ्यांनी मंत्रालयात येणाऱ्या अधिकारी व कर्मचाऱ्यांना चहा, नाश्ता, गरम पाणी तसेच आवश्यकतेनुसार जेवणाची सोय करणे अशी कामे नियमितपणे व आपुलकीने पार पाडली. त्यानिमित्त सुरेंद्र अंबिलपुरे, परशुराम सितप, संदिप चिकणे, भरत वाजे, पद्माकर परवडी, श्रीधर यरगट्टीकर व शिवाजी  आव्हाड यांचा गुलाब पुष्प, शर्ट, मिठाई देऊन सत्कार करण्यात आला.

सामान्य प्रशासन विभागाचे सहसचिव श्री. सतीश जोंधळे म्हणाले, मंत्रालयीन उपहारगृहातील कर्मचाऱ्यांच्या वेदना, समस्या अनुभवल्या आहेत. सकाळी 4.30 वाजल्यापासून ते मंत्रालयात उपस्थित राहून जीव ओतून काम करीत असतात. लॉकडाऊनच्या काळातही त्यांनी तीन ते चार महिने घरी न जाता मंत्रालयातील अधिकारी व कर्मचाऱ्यांना सेवा पुरविल्या. त्यांचा हा सत्कार कोरोना काळात केलेल्या कामगिरीबद्दल कोरोना योद्धा म्हणून केला जात आहे, असेही त्यांनी सांगितले.

यावेळी वित्त विभागाच्या सहाय्यक कक्ष अधिकारी कवयित्री स्वप्ना चव्हाण यांनी एप्रिल 2020 चे पूर्ण वेतन मुख्यमंत्री सहाय्यता निधीला मदत म्हणून दिल्याबद्दल त्यांचा वित्त विभागाचे सहसचिव श्री.दहिफळे यांच्या हस्ते सत्कार करण्यात आला.

यावेळी श्री.धनावडे, श्री. विजय चौधरी, सामान्य प्रशासन विभागाचे अवर सचिव रा.ना. मुसळे, जलसंपदा विभागाचे अवर सचिव श्रीमती सुशिला पवार तसेच मंत्रालयातील अधिकारी व कर्मचारी उपस्थित होते

भाजपा प्रदेशाध्यक्ष आ. चंद्रकांतदादा पाटील यांची केंद्रीय व्यापारमंत्र्यांकडे मागणी
 
मुंबई-
कांद्याचा साठा करण्यावरील निर्बंधांच्या विरोधात नाशिकच्या कांदा व्यापाऱ्यांनी बंद घोषित केल्यामुळे शेतकऱ्यांचा हजारो टन कांदा विक्रीविना पडून आहे तसेच ग्राहकांनाही समस्यांचा सामना करावा लागत आहे. शेतकरी व ग्राहकांच्या हितासाठी कांदा उत्पादक क्षेत्रातील घाऊक विक्रेत्यांसाठी कांदा साठवणीची मर्यादा सध्याच्या २५ टनावरून वाढवून १०० टन करावी, अशी मागणी भारतीय जनता पार्टीचे प्रदेशाध्यक्ष मा. चंद्रकांतदादा पाटील यांनी केंद्रीय व्यापारमंत्री पीयूष गोयल यांच्याकडे बुधवारी पत्राद्वारे केली.
 
मा. चंद्रकांतदादा पाटील यांनी पत्रात म्हटले आहे की, केंद्र सरकारने कांद्याचा साठा करण्यावर निर्बंध लागू केले आहेत व घाऊक विक्रेत्यांना २५ टन आणि किरकोळ व्यापाऱ्यांना २ टन साठा करण्याची परवानगी दिली आहे. या निर्णयाच्या विरोधात नाशिकच्या कांदा व्यापाऱ्यांनी बंद घोषित केला आहे. त्यामुळे कांद्याचे लिलाव बंद होऊन शेतकऱ्यांवर परिणाम होत आहे. शेतकरी आणि ग्राहकांचे हित ध्यानात घेऊन कांद्याचे लिलाव लवकर सुरू होणे गरजेचे आहे. यासाठी कांद्याचा साठा करण्याच्या क्षमतेत बदल करून कांदा उत्पादक क्षेत्रातील घाऊक व्यापाऱ्यांसाठी १०० टन साठ्याची परवानगी देण्यात यावी. महाराष्ट्राच्या बाहेरच्या व्यापाऱ्यांना ३० टनापर्यंत साठ्याची परवानगी द्यावी आणि किरकोळ व्यापाऱ्यांना १० टनाची मर्यादा ठरविणे व्यावहारिक होईल.
 
त्यांनी पत्रात म्हटले आहे की, नाशिक जिल्ह्यात शेतकरी त्यांचा हजारो टन कांदा कृषी उत्पन्न बाजार समितीच्या आवारात घेऊन आले आहेत. त्याचप्रमाणे हजारो टन कांदा शेतकऱ्यांकडील कांदा चाळीतही आहे. कांद्याचे लिलाव बंद झाल्यामुळे शेतकऱ्यांना त्याचे पैसे मिळत नाहीत. त्यामुळे कांद्याचा साठा करण्याची मर्यादा वाढविणे आवश्यक आहे, जेणेकरून व्यापारी कांद्याची खरेदी करू शकतील.
 
त्यांनी आपल्या पत्रात महत्त्वाचा मुद्दा मांडला की, ग्राहकांच्या हितासाठी नाशिकमध्ये खरेदी केलेला कांदा व्यापाऱ्यांना बाजारात आणणेही आवश्यक आहे. तसेच कांद्याचा पुरवठा सुरळीत होईल, यासाठी राज्याच्या अन्न व नागरी पुरवठा विभागाने कांद्याच्या वितरणावर लक्ष ठेवणे व गरज पडेल तर कठोर कारवाई करणे गरजेचे आहे.
 
( मुकुंद कुलकर्णी )
कार्यालय सचिव