पुणे, ता. 23 : वाढीव वीज बिलांच्या विरोधात निषेध करण्यासाठी शहर भाजपच्या झोपडपट्टी आघाडीच्या वतीने भाजपचे शहर अध्यक्ष जगदीश मुळीक यांच्या नेतृत्वाखाली आज रास्ता पेठेतील एमएसईबी कार्यालयासमोर वीज बिलांची होळी करण्यात आली.

यावेळी सरचिटणीस गणेश घोष, राजेश येनपुरे, दीपक नागपुरे, दत्तात्रय खाडे, महिला अध्यक्ष अर्चना पाटील, विधानसभा मतदारसंघाचे अध्यक्ष पुनीत जोशी, रवी साळेगावकर,उपस्थित होते.

यावेळी बोलताना मुळीक म्हणाले, ‘गेल्या 9 महिन्याच्या कालावधीमध्ये वीज वितरण कंपनीने ग्राहकांना नियमित वीज बिले दिली नाहीत.
दरम्यानच्या काळामध्ये वीज मीटरची रिडींग घेण्यासाठीही कधी कोणी फिरकले नव्हते. ग्राहकांवर अतिरिक्त भार टाकत  सर्वसामान्य ग्राहकांना विज वितरन कंपनीने विजेचा शॉक दिला असून भूलथापा देणार्‍या सरकारने जनतेची माफी मागावी व दिलेल्या शब्दाप्रमाणे वीज बिल माफ करावे आणि वारंवार शब्द फिरून लोकांची फसवणूक करणाऱ्या ऊर्जा मंत्री नितीन राऊत यांनी राजीनामा द्यावा.’

ते पुढे म्हणाले, ‘1 ते 100 युनिट पर्यंत  विजेचा वापर करणाऱ्या ग्राहकांना  वीज वितरण कंपनी 3 रुपये प्रति युनिट प्रमाणे वीज बील आकारते तर शंभर युनिटचे वर वीज वापर करणाऱ्या ग्राहकांना प्रतियुनिट सात रुपयाचे दर आकारले जातात तर हजार युनिट च्या पुढे वीज वापर करणाऱ्या ग्राहकांना बारा रुपये युनिट प्रमाणे बिल आकारले जाते मात्र कोरोणा संकटाच्या काळामध्ये पाच ते सहा महिने कुठल्याही प्रकारची रिडींग न घेता गेल्या महिन्याभरापूर्वी रिडींग घेऊन सर्वसामान्य ग्राहकांनी वापरलेले  शंभरच्या वरचे जे युनिट आहेत ते पाच महिन्यात वापरले होते मात्र प्रत्येक महिन्याला वीज बिल न दिल्यामुळे  या ग्राहकांना तीन रुपया ऐवजी सात रुपये युनिटप्रमाणे वीज बिलाचा भरणा करावा लागत आहे तर 300 ते 400 च्या पुढे प्रतिमहिना युनिट वापरणाऱ्या ग्राहकांना  हजार च्या पुढे युनिट वापरानंतर  विज बिल दिल्यामुळे  त्यांना बारा रुपये युनिट प्रमाणे वीज दर आकारला गेला असून त्यामुळे सर्वसामान्य ग्राहकांना वीज वितरण कंपनी लुटून खात आहे. ऊर्जामंत्री मात्र केंद्रावर आरोप करण्यात व्यस्त आहेत प्रत्यक्षात स्वतः मात्र कोणतीही कृती करताना दिसत नाहीत त्यामुळे हे सरकार जनतेप्रती कृतघ्न आहे.’

मुळीक पुढे म्हणाले, ‘वीज वितरण कंपनीने सुद्धा ग्राहकांचा कोणत्याही प्रकारचा विचार न करता केवळ आणि केवळ सरकारच्या इशार्‍यावर नाचत सर्वसामान्य ग्राहकांना वेठीस धरुन अव्वाच्या सव्वा बिले देण्यात आली आहे त्यात आलेली दरमहा आलेली नसून तब्बल सहा सात महिन्यांनंतर विज बिल देण्यात आले आहे त्यामुळे प्रति युनिटचा दर देखील वाढून आला आहे त्यासाठी सर्वसामान्य ग्राहक जबाबदार नसून हेतुपुरस्सर ऊर्जा मंत्र्यांचा आणि ऊर्जा विभागाच्या सांगण्यावरून ही वीज बिले वाढीव स्वरूपात उत्तर देण्यात आली नाहीत ना असा प्रश्न सर्वसामान्य ग्राहकाला पडला आहे विज वितरन कंपनीने हा सावळा गोंधळ थांबवत विज ग्राहकांना न्याय द्यावा अन्यथा आज केवळ वीज बिलांची होळी केली आहे यापुढे सरकार ताळ्यावर न आल्यास यापेक्षाही आक्रमक आंदोलन छेडण्यात येईल.’

पुणे : “हॉटेल मॅनेजमेन्ट क्षेत्रातील विद्यार्थ्यांनी उद्योजकतेकडे वळले पाहिजे. हॉटेल मॅनेजमेंट व कृषी पर्यटन एकमेकांना पूरक आहे. कृषी पर्यटनाला चालना मिळाली, तर महाराष्ट्रातील शेतकऱ्यांची आर्थिक स्थिती सुधारण्यास मदत मिळेल. सूर्यदत्ता संस्थेतर्फे उपलब्ध होणाऱ्या कृषी पर्यटनातील नाविन्यपूर्ण अभ्यासक्रमामुळे राज्यातील शेतकऱ्यांना आत्मनिर्भर होण्यास मदत होईल,” असे मत कृषी पर्यटन क्षेत्रातील प्रख्यात उद्योजक पांडुरंग तावरे यांनी व्यक्त केले.
‘नॅक’ मानांकन प्राप्त नामांकित सूर्यदत्ता कॉलेज ऑफ हॉस्पिटॅलिटी मॅनेजमेंट अँड ट्रॅव्हल टुरिझमतर्फे (एससीएचएमटीटी) ‘एक्झेनिया : बेस्टोविंग हॉस्पिटॅलिटी’ या चार दिवसीय आंतरराष्ट्रीय वेबिनारच्या उद्घाटनप्रसंगी पांडुरंग तावरे बोलत होते. इंडस्ट्री-कनेक्ट अँड नॉलेज मॅनेजमेंट इनिशिएटिव्ह’ अंतर्गत झालेल्या या वेबिनारला ‘सूर्यदत्ता’चे संस्थापक अध्यक्ष प्रा. डॉ. संजय चोरडिया, सिद्धांत चोरडिया यांच्यासह उद्योगातील तज्ज्ञ, ज्येष्ठ अभ्यासक, वैश्विक स्तरावर पसरलेले सूर्यदत्ता संस्थेचे माजी विद्यार्थी या वेबिनारमध्ये सहभागी झाले होते. उद्योगातील दिग्गजांनी या आंतरराष्ट्रीय वेबिनारमध्ये मार्गदर्शन करत विद्यार्थ्यांना मौल्यवान ज्ञान आणि उद्योगातील अंतर्भाव स्पष्ट करून सांगितले.
प्रा. डॉ. संजय चोरडिया म्हणाले, “कृषी पर्यटनाशी संलग्नित अनेक क्षेत्र आहेत. स्थानिक उत्पादने, ठिकाणे आणि गोष्टींना व्यवस्थितपणे मार्केट केले, तर रोजगार मोठ्या प्रमाणावर उपलब्ध होऊ शकेल. हॉटेल मॅनेजमेंट करणाऱ्या विद्यार्थ्यांना कृषी पर्यटनामुळे अनेक संधी खुल्या होतील. भारत कृषिप्रधान देश असल्याने येथे कृषी पर्यटन मोठ्या प्रमाण विकसित झाले, तर आत्मनिर्भर भारत बनण्याचे स्वप्न पूर्ण होण्यास हातभार लागेल.”
विद्यार्थ्यांना हॉस्पिटॅलिटीच्या सर्व विभागांशी संबंधित बदलत्या संकल्पना आणि नाविन्यपूर्ण कल्पनांची ओळख झाली. फूड स्टाइलिंग, फूड ब्लॉगिंग, एअरपोर्ट केटरिंग, वाईन अ‍ॅप्रिसिएशन, मिक्सोलॉजी अँड स्क्रब्स, क्लाऊड किचेन्स, फूड हिस्टरीयन, सुविधा व्यवस्थापन यासह इतर अनेक गोष्टी समजून घेता आल्या. ‘एससीएचएमटीटी’सह महाराष्ट्रातील इतर संस्था व महाविद्यालयातील एकूण २५० विद्यार्थी आणि प्राध्यापकांनी या वेबिनारमध्ये सहभाग घेतला.
क्लियर वॉटर हॉस्पिटॅलिटी सर्व्हिसेसचे मुख्य कार्यकारी अधिकारी शेफ नितीन टंडन यांनी फूड स्टाईलिंगवरील रोमांचक सामग्रीचे वर्णन केले आणि फूड स्टायलिस्टच्या करियरविषयी आणि करिअरच्या मार्गांवरही चर्चा केली. फूड स्टायलिस्ट होण्यासाठी स्वयंपाकघरात प्रमुख मूलभूत तत्त्वे ठेवण्याचे महत्त्व त्यांनी अधोरेखित केले. 
कार्यक्रमाच्या दुसर्‍या आणि तिसर्‍या सत्रात युरेका अराझो शेफ अमर श्रीवास्तव यांनी धाडसी करिअर व प्रॉफेशनल पेस्ट्री मेकिंग यावर, शेफ राहुल वली यांनी खाद्य इतिहास, रमेश उपाध्याय यांनी फॅसिलिटी मॅनेजमेंटमधील करिअर, बापजी जिनगा यांनी मिक्सिंग फ्ल्यूड्स शास्त्र, शेफ राजेश शेट्टी यांनी एअरपोर्ट केटरिंग, श्री. कार्तिक यांनी लॉंड्री मॅनेजमेंट, शेफ रविराज यांनी क्लाउड किचन कॉन्सेप्ट आणि शेफ अकल्पित प्रभुणे यांनी फ्रुट वाईन्स या क्षेत्रातील करिअरवर मार्गदर्शन केले.
सूर्यदत्त ग्रुप ऑफ इन्स्टिट्यूट्स नियमितपणे त्यांचे विद्यार्थी, प्राध्यापक आणि माजी विद्यार्थ्यांसाठी प्रशिक्षण उपक्रम, कार्यशाळा आणि उद्योग कनेक्ट उपक्रम आयोजित करतात. अलिकडच्या काळात ‘एससीएचएमटीटी’ने आपल्या इंडस्ट्री कनेक्ट इनिशिएटिव्ह अंतर्गत उद्योग तज्ज्ञ, थीमलंच, माजी विद्यार्थी मेळावा, स्वयंपाकासंबंधी कला कार्यशाळा, बेकरी, एफ अँड बी सर्व्हिस, निवास व्यवस्था, मिक्सोलॉजी, फूड स्टाईलिंग, हाऊसकीपिंग, फ्रंट ऑफिस मॅनेजमेंट अशा विविध कार्यक्रमांचे आयोजन करण्यात आले.
हॉटेल मॅनेजमेंट आणि ट्रॅव्हल टुरिझमच्या विविध क्षेत्रांतील विविध सत्रांमधून मौल्यवान मार्गदर्शन मिळाल्याची भावना विद्यार्थी आणि माजी विद्यार्थ्यांनी व्यक्त केली. या आंतरराष्ट्रीय अभ्यासक्रमाची संधी उपलब्ध करून दिल्याबद्दल विद्यार्थ्यांनी सूर्यदत्ताच्या या उपक्रमाचे कौतुक करून धन्यवाद दिले.

पुणे विभागातील 4 लाख 96 हजार 102 कोरोना बाधित रुग्ण बरे होऊन घरी
विभागात कोरोना बाधित 5 लाख 24 हजार 448 रुग्ण
-विभागीय आयुक्त सौरभ राव

पुणे,दि.22 :- पुणे विभागातील 4 लाख 96 हजार 102 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 24 हजार 448 झाली आहे. तर ॲक्टीव रुग्ण संख्या 13 हजार 571 इतकी आहे. कोरोनाबाधीत एकुण 14 हजार 775 रुग्णांचा मृत्यू झाला असून मृत्यूचे प्रमाण 2.82 टक्के आहे. पुणे विभागामध्ये बऱ्या होणा-या रुग्णांचे प्रमाण 94.60 टक्के आहे, अशी माहिती विभागीय आयुक्त सौरभ राव यांनी दिली.कालच्या तुलनेत रुग्णसंख्येमध्ये एकूण 1 हजार 465 ने वाढ झाली आहे.

पुणे जिल्हा
पुणे जिल्हयातील कोरोना बाधीत एकूण 3 लाख 35 हजार 425 रुग्णांपैकी 3 लाख 17 हजार 388 रुग्ण बरे होवून घरी गेले आहेत. ॲक्टीव रुग्ण 9 हजार 863 आहे. कोरोनाबाधित एकूण 8 हजार 174 रुग्णांचा मृत्यू झाला आहे. मृत्यूचे प्रमाण 2.44 टक्के इतके आहे तर बरे होणा-या रुग्णांचे प्रमाण 94.62 टक्के आहे.
सातारा जिल्हा
सातारा जिल्हयातील कोरोना बाधीत एकूण 49 हजार 566 रुग्णांपैकी 47 हजार 53 रुग्ण बरे होवून घरी गेले आहेत. ॲक्टीव रुग्ण संख्या 835 आहे. कोरोनाबाधित एकूण 1 हजार 678 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 44 हजार 140 रुग्णांपैकी 40 हजार 698 रुग्ण बरे होवून घरी गेले आहेत. ॲक्टीव रुग्ण संख्या 1 हजार 878 आहे. कोरोनाबाधित एकूण 1 हजार 564 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 46 हजार 422 रुग्णांपैकी 44 हजार 326 रुग्ण बरे होवून घरी गेले आहेत. ॲक्टीव रुग्ण संख्या 408 आहे. कोरोनाबाधित एकूण 1 हजार 688 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 48 हजार 895 रुग्णांपैकी 46 हजार 637 रुग्ण बरे होवून घरी गेले आहेत. ॲक्टीव रुग्ण संख्या 587 आहे. कोरोनाबाधित एकूण 1 हजार 671 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 1 हजार 465 ने वाढ झाली आहे. यामध्ये पुणे जिल्ह्यात 914, सातारा जिल्ह्यात 162, सोलापूर जिल्ह्यात 274, सांगली जिल्ह्यात 80 तर कोल्हापूर जिल्ह्यात 35 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 1 हजार 272 रुग्णांमध्ये पुणे जिल्हयामध्ये 760, सातारा जिल्हयामध्ये 232, सोलापूर जिल्हयामध्ये 181, सांगली जिल्हयामध्ये 53 व कोल्हापूर जिल्हयामध्ये 46 रुग्णांचा समावेश आहे.

पुणे विभागातील सर्व्हेक्षण
आजपर्यत विभागामध्ये एकुण 26 लाख 90 हजार 636 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 24 हजार 448 नमून्यांचा अहवाल सकारात्मक (पॉझिटिव्ह) आहे.

( टिप :- दि. 21 नोव्हेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे- गरज सरो, वैद्य मरो ‘ या उक्तीप्रमाणे न वागता आरोग्य सेवकांच्या मधील असंतोषाची वेळीच दखल घ्यावी अशी मागणी मनसे चे शहराध्यक्ष अजय शिंदे यांनी केली आहे .

या संदर्भात त्यांनी प्रसिद्धीस दिलेल्या पत्रकात म्हटले आहेकी, दुसऱ्या करोना लाटेची सध्यान मोठी चर्चा आहे या लाटेच्या पार्श्वभूमीवर मनसे पुणे शहर आपल्या सर्वांचे लक्ष आणखीन एका गंभीर प्रकारा कडे वेधू इच्छितो,जर दुर्देवाने दुसरी लाट आली तर प्रशासकीय आणि सरकारी पातळीवरील आरोग्यसेवकाच्या पिळवणुकी मुळे गंभीर समस्या निर्माण होणार आहे
जीव धोक्यात घालून कोविड रुग्णाची सेवा करणाऱ्या या सर्व स्तरांवरील आरोग्य सेवकाचे पगार सर्वच ठिकाणी प्रचंड अडवणूक करून तुकड्या तुकड्यात दिले आहेत जम्बो असो की ससून सरासरी 2 ते 3 महिन्याचे पगार अजून ही मिळणे बाकी आहे त्यांना काम असेल तर बोलावले जाते काम नसेल तर ब्रेक दिला जातो हे सगळं गरज सरो आणि वैद्य मरो या प्रकारचे आहे .
दुर्देवाने दुसरी लाट आली आणि रुग्ण संख्या वाढली तर पहिलं हा मेलेला वैद्य जिवंत करावा लागेल त्यात जो वेळ जाणार आहे त्यात पुन्हा हकनाक बळी जाऊ शकतात ही भीती आहे कारण पुण्यातले सुरवातीच्या टप्यातील दुर्देवी करोना बळी हे उपचार करणारे तज्ज्ञांच्या अभावी आणि सधन सामग्री नसल्या मुळे झाले आहेत,आज साधन सामुग्री आहे उपचाराचा मेडिकल प्रोटोकॉल आहे पण कदाचित उद्या शासकीय हेडसाळी मुळे व पगार थकवण्या सारख्या प्रकारा मुळे आरोग्यसेवक नसतील अशी परिस्थिती नक्की येऊ शकते.
जम्बो कोविड सेंटर हे मोठे कोविड रुग्णालय शेकडो कोटी खर्च करून उभे करण्यात आले त्याच्या अगोदर ससून व नायडू या ठिकाणी मोठ्या प्रमाणावर कोविड रुग्ण उपचार घेत होते आजच्या घडीला जम्बो कोविड सेंटर व ससून या ठिकाणी काम करणारे सर्व स्तरावरील आरोग्यसेवकाच्या पगारा साठी सातत्याने चालढकल करण्यात येत आहे प्रत्येक ठराविक कालावधी नंतर आरोग्यसेवकाना अनिश्चित कालावधी साठी ब्रेक देणे हे प्रकार सातत्याने होत आहेत. त्यामुळे मोठा असंतोष आरोग्य सेवकां मध्ये आहे असे अजय शिंदे यांनी म्हटले आहे.

पुणे – सव्वाचार महिने रिक्षा बंद होत्या. त्यामुळे प्रादेशिक परिवहन मंडळाने तसे प्रमाणपत्र देवून बंद कालावधीचा विमा हप्त्याचा परतावा रिक्षा चालकांना द्यावा अशा मागणीचे पत्र आमदार शिरोळे यांनी मुख्य मंत्र्यांना पाठवले आहे.

वाहन (रिक्षा) बंद असल्याचे प्रमाणपत्र संबंधित प्रादेशिक परिवहन कार्यालयाने (आरटीओ) द्यावयाचे असते. ते प्रमाणपत्र रिक्षा चालकांना मिळाल्यास त्यांना, सव्वाचार महिन्यांचा विमा हप्त्याचा परतावा विमा पॉलिसीनिहाय परत मिळेल असे आमदार शिरोळे यांनी पत्रात म्हटले आहे.

थर्ड पार्टी विमा असेल तर रिक्षा बंदच्या कालावधीतील विमा हप्त्याची रक्कम विमा कंपनी पुढील विमा पॉलिसी नूतनीकरणाच्या वेळी त्या हप्त्यापोटी वजा करेल किंवा पुढील पॉलिसीचा कालावधी रिक्षा बंद असलेल्या काळाइतका वाढवेल. या दोन्हीपैकी एक पर्याय पॉलिसीधारक रिक्षाचालक निवडू शकतो. पूर्ण विमा असेल तर विमा कंपनी भरपाई देण्यास जबाबदार राहील. अशा तरतुदींच्या आधारे काही अटींवर रिक्षा चालकांना परतावा देता येवू शकेल. सव्वाचार महिने रिक्षा सक्तीने बंद असल्याने विमा हप्त्याचा परतावा मिळणे हा रिक्षा चालकांचा अधिकार आहे असे पत्र आमदार शिरोळे यांनी मुख्य मंत्र्यांना पाठवले असून या पत्राची प्रत उप मुख्यमंत्री, परिवहन मंत्री आणि कामगार मंत्र्यांनाही पाठवली आहे.

तसेच टाळेबंदी (लॉकडाऊन) काळात एसटी, पीएमपीएमएल कर्मचाऱ्यांप्रमाणे रिक्षा चालकांनाही दरमहा किमान वेतन मिळावे, शेतकरी कर्जमुक्तीच्या धर्तीवर पकेज देवून टाळेबंदी काळातील वाहन कर्जाच्या हप्त्यात सूट द्यावी. हप्ते वसुलीसाठी फायनान्स कंपन्यांकडून होणारा छळ थांबवावा अशाही मागण्या आमदार शिरोळे यांनी मुख्य मंत्र्यांकडे केल्या आहेत.