पुणे – बसची वाट पाहत थांबलेल्या ज्येष्ठ नागरिकांच्या अंगावर मेट्रोचे लोखंडी बॅरीकेड पडल्याने त्यांच्या डोक्याला आणि डाव्या पायाला गंभीर दुखापत झाली. उपचारासाठी त्यांना रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला. याप्रकरणी कोथरूड पोलीस ठाण्यात मेट्रोचे काम पाहणाऱ्या यू. आर. सी कंपनीसह ठेकेदारावर गुन्हा दाखल करण्यात आला आहे.

मारूती लक्ष्मण नवस्कर (६४, रा. कोथरूड) असे मृत्यू झालेल्या ज्येष्ठाचे नाव आहे. याबाबत त्यांचा मुलगा मयूर नवस्कर यांनी तक्रार दिली आहे. ही घटना ९ सप्टेंबर रोजी वनाज बसस्टॉपवर घडली होती. पोलिसांनी दिलेल्या माहितीनूसार, ९ तारखेला ज्येष्ठ नागरिक पिरंगूट येथे जाण्यासाठी वनाज बसस्थानकावर बसची वाट पाहत थांबले होते.

या दरम्यान तेथे मेट्रोच्या कामाकरीता लावण्यात आलेले लोखंडी बॅरीकेड ज्येष्ठाच्या अंगावर पडले. यामध्ये त्यांच्या डोक्याला आणि डाव्या पायाला गंभीर दुखापत झाली. त्यांना उपचारासाठी रुग्णालयात भरती करण्यात आले होते. परंतु उपचारादरम्यान त्यांचा मृत्यू झाला. सुरक्षेत हयगय केल्याप्रकरणी पोलिसांनी सुरक्षा पुरविणाया ठेकेदारावर गुन्हा दाखल केला आहे. पुढील तपास पोलीस उपनिरीक्षक किसन राठोड करीत आहेत.

पुणे, ता. १९ ऑक्‍टोबर – बिबवेवाडीतील ‘राज्य कामगार विमा योजना’ (ईएसआयसी) रुग्णालय विस्तारीकरणाची उर्वरित प्रक्रिया तातडीने सुरू करण्याचे आश्वासन केंद्रीय श्रम आणि कामगार मंत्री डॉ. भूपेंद्र यादव यांनी दिले. आमदार माधुरी मिसाळ यांनी आज मंत्रालयात यादव यांची भेट घेऊन या विषयावर सविस्तर चर्चा केली.  
मिसाळ पुढे म्हणाल्या, ‘राज्य शासनाच्या अखत्यारित ससून सर्वोपचार रुग्णालय हे एकमेव मोठे सर्वसाधारण रुग्णालय शहरात आहे. पुणे आणि लगतच्या जिल्ह्यांतील रुग्णांच्या वाढत्या रुग्ण संख्येमुळे त्यावर मोठा ताण येतो. नवीन सर्वसाधारण रुग्णालयाच्या निर्मितीसाठी मोठी जागा आवश्यक होती. बिबवेवाडीत ‘ईएसआयसी’कडे १६.५ एकर जागा उपलब्ध असल्याने या जागेत पाचशे खाटांचे सर्वसाधारण रुग्णालय व्हावे यासाठी मी गेल्या दहा वर्षांपासून पाठपुरावा करीत आहे.’  
मिसाळ पुढे म्हणाल्या ‘या प्रस्तावाला ‘ईएसआयसी’ने १६ ऑक्टोबर २०१८ रोजी मान्यता दिली. त्यानुसार पहिल्या टप्पात नवीन एकशे वीस खाटांसाठी विस्तारीकरणाचे काम पूर्ण झाले आहे. आता दुसर्या टप्प्यात आणखी तीनशे ऐशी खाटा वाढविण्यात येणार आहेत. तसेच वैद्यकीय क्षेत्रातील तंत्रज्ञांची वाढती गरज लक्षात घेऊन या ठिकाणी प्रशिक्षण देण्यासाठी महाविद्यालय सुरू करण्यावरही बैठकीत सकारात्मक चर्चा झाली.’

पुणे (प्रतिनिधी) : बीव्हीजीच्या सेंद्रिय कृषी निविष्ठांचे पारगाव तर्फे आळे (ता.जुन्नर) फार्मर्स प्रोड्युसर कंपनीच्या वतीने नुकतेच अनावरण करण्यात आले. यावेळी बीव्हीजीचे चेअरमन हणमंतराव गायकवाड, फार्मर्स प्रोड्युसर कंपनीचे अध्यक्ष प्रशांत टट्टू , रामदास चव्हाण,  बीव्हीजी ॲग्रोटेकचे अरुण बारगजे, अनिकेत येवले, दिलीप डुंबरे , बापू लोखंडे सचिन काफरे व राज्याच्या विविध भागातील शेतकरी उपस्थित होते.

यावेळी गायकवाड यांनी सेंद्रिय शेतीचे महत्व उपस्थित  शेतकऱ्यांना समजावून सांगितले. ते म्हणाले, ” जगभरात विविध प्रकारच्या विषाणू संक्रमणाचा काळ सध्या सुरु आहे. विषाणूजन्य रोगांचा मुकाबला करण्यासाठी मानवी आरोग्य मजबूत असणे गरजेचे आहे. मानवी आरोग्य अबाधित ठेवण्यासाठी सकस आहाराची गरज आहे. मानव जातीला सकस आहार देण्यासाठी शेतकऱ्यांनी सेंद्रिय शेतीचा अवलंब करणे काळाची गरज आहे. देशभरात सेंद्रिय शेतीला चालना देण्यासाठी बीव्हीजीने पुढाकार घेतला आहे. त्याचा पहिला टप्पा म्हणून सेंद्रिय कृषी निविष्ठा कंपनीच्या वतीने शेतकऱ्यांना उपलब्ध करून देण्यात आल्या आहेत.”

टट्टू म्हणाले, ” रासायनिक औषधांच्या वारेमाप वापराने शेतीची उत्पादकता कमी झाली आहे. त्याचबरोबर उत्पादीत होणारा शेतमाल मानवी आरोग्यास धोकादायक आहे. या पुढच्या काळात मानवी आयुर्मान वाढवण्यासाठी सेंद्रिय शेतीचाच अवलंब करावा लागणार आहे. बीव्हीजीने राज्यात सेंद्रिय शेतीची चळवळ उभी केली आहे. त्यांच्या चळवळीत राज्यातील शेतकऱ्यांनी सहभाग नोंदवणे ही काळाची गरज आहे.

पुणे, 19 ऑक्टोबर 2021: डेक्कन जिमखाना टेनिस विभागातर्फे आयोजित अतुल रुणवाल मेमोरियल डेक्कन जिमखाना टेनिस सोशल स्पर्धेत 130 खेळाडूंनी आपला सहभाग नोंदविला आहे. हि स्पर्धा डेक्कन जिमखाना टेनिस कोर्टवर 23 ऑक्टोबरपासून सुरु होणार आहे. 
डेक्कन जिमखानाच्या टेनिस विभागाचे सचिव आश्विन गिरमे यांनी सांगितले की, क्लबचे सदस्य अरुण रुणवाल यांचे कोरोनामुळे निधन झाले असून त्यांच्या स्मरणार्थ हि स्पर्धा आयोजित करण्यात आली आहे. तसेच, हि स्पर्धा 40, 50, 60, 70 and 80 वर्षावरील पुरुष एकेरी व दुहेरी या गटात होणार आहे. 
स्पर्धेसाठी धनंजय सुमंत यांची स्पर्धा संचालक म्हणून तर, तेजल कुलकर्णी यांची स्पर्धा निरीक्षक म्हणून निवड करण्यात आली आहे.   

पुणे, 19 ऑक्टोबर 2021- पाथ-वे फाउंडेशन यांच्या वतीने आयोजित दोशी इंजिनियर्स करंडक आंतरक्लब 25 वर्षांखालील निमंत्रित क्रिकेट स्पर्धेत साखळी फेरीत सौरभ नवले(120धावा) याने केलेल्या धडाकेबाज शतकी खेळीच्या जोरावर व्हेरॉक वेंगसरकर क्रिकेट अकादमी संघाने आपली विजयी मालिका कायम ठेवत चौथ्या विजयासह उपांत्य फेरीत प्रवेश केला.  
व्हेरॉक क्रिकेट अकादमीच्या मैदानावरील लढतीत प्रथम फलंदाजी करताना व्हेरॉक वेंगसरकर क्रिकेट अकादमी संघाने 50षटकात 6बाद 340धावाचे आव्हान उभे केले. यात सौरभ नवलेने 103चेंडूत 14चौकारांच्या व 3षट्काराच्या साहाय्याने 120 धावांची शतकी खेळी केली. सौरभ व किरण मोरे(71धावा) यांनी तिसऱ्या गड्यासाठी 151 चेंडूत 167 धावांची खेळी करून संघाला चांगली सुरुवात करून दिली. त्यानंतर मिझान सय्यद 40, टिळक जाधव 19, मनोज यादव नाबाद 15 यांनी धावा काढून संघाला आव्हानात्मक धावसंख्या उभारून दिली. हे आव्हान ब्रिलियंटस स्पोर्ट्स अकादमी संघाला पेलवले नाही व त्यांचा डाव 35.2षटकात सर्वबाद 153 धावावर कोसळला. यात अनिकेत नलावडे 45, प्रज्वल घोडके 32, प्रथमेश बाजारी 18, वैभव पाटील 12 यांनी दिलेली लढत अपुरी ठरली. व्हेरॉक संघाकडून राहुल वारे(4-23), कपिल गायकवाड(2-34), अॅलन रॉड्रिक्स(2-34), ओंकार राजपूत(1-24) यांनी सुरेख गोलंदाजी करत संघाला 187धावांनी विजय मिळवून दिला. 
पूना क्लब मैदानावरील सामन्यात केडन्स क्रिकेट अकादमी संघाने पूना क्लब संघाचा  7 गडी राखून पराभव करत दुसरा विजय मिळवला. केडन्स क्रिकेट अकादमीच्या शुभम हरपाळे(5-26), इझान सय्यद(4-47) यांच्या आक्रमक गोलंदाजीपुढे पूना क्लब संघाचा डाव 41.1षटकात सर्वबाद 203 धावावर संपुष्ठात आला. पूना क्लब संघ 8.5षटकात 7बाद 16धावा असा अडचणीत असताना फलंदाजीस आलेल्या ओंकार आखाडेने 138चेंडूत 13चौकार व 1षट्काराच्या मदतीने 126धावांची धडाकेबाज शतकी खेळी केली. ओंकारला हर्ष ओसवालने 60चेंडूत 7चौकारांच्या मदतीने 43 धावा काढून चांगली साथ दिली. या दोघांनी आठव्या गड्यासाठी 145 चेंडूत 135धावांची भागीदारी केली. याच्या उत्तरात केडन्स क्रिकेट अकादमी संघाने हे आव्हान 45.4षटकात 3बाद 204धावा करून पूर्ण केले. यात अथर्व धर्माधिकारी नाबाद 68, ऋषिकेश मोटकर 43, अथर्व काळे नाबाद 42, दिग्विजय पाटील 25 यांनी धावा काढून संघाला विजय मिळवून दिला. पूना क्लबकडून राजकमल चौहान(1-34), अमेय मुजुमदार(1-38), ओंकार आखाडे(1-39)यांनी प्रत्येकी एक गडी बाद केला. सामनावीर शुभम हरपाळे ठरला. 
स्पर्धेचा सविस्तर निकाल: साखळी फेरी: व्हेरॉक वेंगसरकर क्रिकेट अकादमी: 50षटकात 6बाद 340धावा(सौरभ नवले 120(103,14×4,3×6), किरण मोरे 71(98,2×4,4×6), मिझान सय्यद 40(30,3×4,1×6), टिळक जाधव 19, मनोज यादव नाबाद 15, अजित बागाडी 3-69, प्रथमेश बाजारी 1-62) वि.वि.ब्रिलियंटस स्पोर्ट्स अकादमी: 35.2षटकात सर्वबाद 153 धावा(अनिकेत नलावडे 45(54,4×4,1×6), प्रज्वल घोडके 32(42), प्रथमेश बाजारी 18, वैभव पाटील 12, राहुल वारे 4-23, कपिल गायकवाड 2-34, अॅलन रॉड्रिक्स 2-34, ओंकार राजपूत 1-24);सामनावीर-सौरभ नवले; व्हेरॉक संघ 187धावांनी विजयी;
पूना क्लब: 41.1षटकात सर्वबाद 203 धावा(ओंकार आखाडे 126(138,13×4,1×6), हर्ष ओसवाल 43(60,7×4), शुभम हरपाळे 5-26, इझान सय्यद 4-47, सिद्धेश वरगंटे 1-47) पराभूत वि. केडन्स क्रिकेट अकादमी: 45.4षटकात 3बाद 204धावा(अथर्व धर्माधिकारी नाबाद 68(135,3×4), ऋषिकेश मोटकर 43(46,8×4), अथर्व काळे नाबाद 42(56,3×4), दिग्विजय पाटील 25, राजकमल चौहान 1-34, अमेय मुजुमदार 1-38, ओंकार आखाडे 1-39);सामनावीर शुभम हरपाळे; केडन्स 7 गडी राखून विजयी. 

पुणे : कोरोनाच्या त्रिसूत्रीच्या नियम पालनाचे बंधन घालून त्वरित शुभकार्यातील उपस्थितीचे हे बंधन शिथिल करावे अशी मागणी पुणे मनपा आयुक्त विक्रमकुमार यांच्याकडे क्रिएटिव्ह फाउंडेशन अध्यक्ष संदीप खर्डेकर यांनी एका निवेदानाव्दारे केली आहे.

या निवेदनात खर्डेकर यांनी असे म्हटले आहे कि,’आता संपूर्ण राज्यात निर्बंध शिथिल करण्यात आले आहेत. मॉल, दुकाने, शाळा, महाविद्यालये, धार्मिक स्थळ,बाजार, चित्रपटगृह, नाट्यगृह सगळेच खुले होत आहे आणि मुक्त वातावरणात सामान्य नागरिक श्‍वास घेत असून कोरोनाच्या संकटातून मुक्त होत सर्वत्र नवचैतन्य संचारत आहे. अश्या परिस्थितीत एखाद्या व्यक्ती च्या जीवनात एकदाच येणार्‍या आनंदाच्या क्षणांना मात्र बंधन घालण्यात आले आहे. मग तो विवाह समारंभ असो किंवा साखरपुडा, बारसं असो वा डोहाळजेवणं, मंगळागौर यासारखे कार्यक्रम मात्र 100 किंवा 200 लोकांच्या उपस्थितीत बंधनकारक करणे हे अन्यायकारक असून सर्वकाही नॉर्मल होत असताना हे उपस्थिती चे बंधन देखील शिथिल करणे गरजेचे आहे. एखाद्या आनंदाच्या प्रसंगाला 100/200 ची जरी अट असली तरी कमी उपस्थितीत, कार्यालय भाड्यासह भोजनाच्या दरापर्यंत सर्वच महाग पडत आहे.

पुणे- तळजाई रक्षणाच्या नावाने होणारी आंदोलने , महापालिका करत असलेल्या वृक्षतोडीच्या तथाकथित बातम्या या सर्वांवर आज अखेरीस महापालिका प्रशासनाने मौन सोडून स्पष्टीकरण दिले असून महापालिकेकडून तळजाई येथे कोणत्याही प्रकारची वृक्ष तोड जैव विविधता उद्यान विकसीत करण्यासाठी झालेली नाही ,सुरु नाही आणि प्रस्तावित देखील नसल्याचा खुलासा केला आहे . दरम्यान वृक्ष तोड हि राज्य शासनाच्या अखत्यारीत असलेल्या वन विभागात होत असल्याच्या बातम्यांकडे महापालिकेने लक्ष वेधले असून त्याशी महापालिकेचा संबध नसल्याचे हि म्हटले आहे .आज महापालिका आयुक्त विक्रम कुमार यांच्या आदेशान्वये उद्यान अधीक्षक अशोक घोरपडे यांनी याबाबतचे अधिकृत स्पष्टीकरण प्रसिद्धीसाठी पीआरओ मार्फत माध्यामाना पाठविले आहे . या महापालिकेच्या दाव्यामुळे तळजाई बाबत झालेली आंदोलने हि सारी दिशाभूल करणारी होती हे स्पष्ट होणार आहे.

या प्रसिद्धी पत्रकात उद्यान अधीक्षक यांनी असे म्हटले आहे कि ,’पुणे पेठ पर्वती स.नं. ६७ ते ७३ तळजाई टेकडी येथे जैव विविधता उद्यान विकसीत करणे या कामासाठी पुणे महानगरपालिकेने नेमलेल्या आर्किटेक्ट यांनी सादर केलेल्या आराखड्या मध्ये
स.नं. ६७ ते ७३ पर्वती मधील एकूण १०७ एकर क्षेत्राचा समावेश आहे. १९८७ च्या डीपी नुसार याठिकाणी हिल टॉप हिल स्लोप झोनचे आरक्षण कायम ठेवण्यात आले होते. जागेच्या ताब्याची प्रक्रिया स्थायी समिती ठ.क्र. ६३७ दि. ०६.०८.२००२ प्रमाणे सुरु करण्यात आली. मनपाचे ताब्यात आलेल्या मिळकतींवर अतिक्रमण होऊ नये म्हणून, तसेच सदरच्या जागेचा नागरिकांना उपयोग होण्याकरीता वृक्षारोपण, जॉगिंग ट्रॅक व खेळाचे मैदान इत्यादी सुविधा उपलब्ध करून देण्यात आलेल्या आहेत. सदरच्या ठिकाणी मनपाचे ताब्यात असलेल्या व ताब्यात येणाऱ्या मिळकतींचा एकत्रित सुनियोजित विकास होण्याच्या दृष्टीने पुणे महानगरपालिकेने आर्कीटेक्ट आनंद उपळेकर यांची या प्रकल्पाचे आर्किटेक्ट म्हणून नेमणूक केलेली आहे.
सदरच्या प्रकल्पामध्ये सद्यस्थितीत हिल टॉप हिल स्लोप झोन तथा प्रस्तावित असलेले व शासनाचे निर्णयानुसार प्रलंबित असलेल्या आरक्षणाकरीता विकास नियंत्रण नियमावलीतील अनुज्ञेय तरतुदींना अनुसरून कामे प्रस्तावित करण्यात आलेली आहेत.
प्रकल्पामध्ये बांबू उद्यान, नक्षत्र उद्यान, जैव विविधता उद्यान, फ्लॉवर गार्डन, अरोमा गार्डन, स्पायसेस गार्डन, नाना नानी पार्क, फॅमिली गार्डन, रानमेवा उद्यान, रोपवाटीका, मुलांकरीता साहसी खेळ, महिलांकरीता खेळाची जागा, पाण्याची तळी, मुलांसाठी ग्रीन स्कूल, सेंद्रिय शेती, पक्षी निरीक्षण केंद्र, सोलर रुफ पार्किंग इत्यादी सोयी सुविधा करण्यात येणार असून, मोठ्या प्रमाणावर स्थानिक/भारतीय वृक्षांची लागवड करण्याचे नियोजन करण्यात आले असून, उद्याने विकसित करताना अस्तित्वातील कोणतीही स्वदेशी प्रकारची वृक्ष न काढता विकसन करण्याचे नियोजन करण्यात आलेले आहे. सदरच्या प्रकल्पातील मिळकतीमधील दुर्मिळ वृक्ष तसेच स्थानिक/भारतीय वृक्ष संपदा जपण्याचा मनपाचा पूर्णपणे प्रयत्न राहणार आहे.
पुणे महानगरपालिकेकडून सदरच्या प्रकल्पा अंर्तगत करण्यात आलेल्या विकसनामध्ये कोणतीही स्थानिक/भारतीय जातीची वृक्ष काढण्यात आलेले नाहीत. सदरच्या प्रकल्पालगत मे. शासनाच्या वन विभागाच्या मिळकतीमध्ये वन विभागाकडून ग्लिरिसीडीया(उंदीर मारी) या परदेशी जातीची वृक्ष काढून, त्याजागी स्वदेशी प्रकारची वृक्ष लावण्याचे काम चालू आहे. या वन विभागाच्या जागेतील वृक्ष तोडीच्या बातम्या वृत्तपत्रांमध्ये प्रसिद्ध झाल्या असून, पुणे महानगरपालिकेचा प्रस्तावित प्रकल्प व वन विभागाची मिळकत दोन्ही तळजाई टेकडी येथे असल्याने त्या बातम्यांमधून निश्चित कोणत्या मिळकतीमध्ये वृक्ष तोड झाली आहे, याबाबत स्पष्टता होत नाही. पुणे महानगरपालिकेच्या प्रस्तावित प्रकल्पाच्या अनुषंगाने कोणतीही वृक्ष तोड पुणे महानगरपालिकेकडून करण्यात आलेली नाही.

पुणे महानगरपालिकेच्या प्रस्तावित प्रकल्पामध्ये मोठ्या प्रमाणावर स्थानिक/भारतीय जातीचे वृक्ष लावण्याचे नियोजन असल्याने विविध पक्षी, फुलपाखरू यांचा अधिवास निर्माण होऊन पर्यावरणातील सर्व घटकांचे संवर्धन करण्याचा पूर्ण प्रयत्न करण्यात येणार आहे.
सदरच्या प्रकल्पामध्ये मोठ्या प्रमाणावर कॉक्रीटीकरण करण्यात येणार नसून प्रकल्पामध्ये विकसित करण्यात येणारे जॉगिंग ट्रॅक मातीचे करण्याचे नियोजन आहे. तसेच काही पाथवे हे नैसर्गिक बाबी वापरून करण्याचे नियोजन आहे. नागरीकांसाठी तयार करण्यात येणारे गझीबो, पॅगोडा हे नैसर्गिक मटेरियल वापरून करण्याचे प्रस्तावित आहे. सदरच्या प्रकल्पातील नैसर्गिक साधन संपत्तीमध्ये वाढ करून प्रकल्पामध्ये सर्व अत्यावश्यक सोयी सुविधा निर्माण करून शहरातील सर्व स्तरातील नागरीकांना त्यांच्या आरोग्य व मनोरंजन याकरीता येथील नैसर्गिक साधन संपत्तीचा लाभ मिळावा या उद्देशाने सदरच्या प्रकल्पाचे नियोजन करण्यात येत आहे. सदरच्या प्रकल्पाचे प्रकल्प अहवालास मान्यता मिळणेकरीता स्थायी समितीकडे प्रस्ताव सादर करण्यात आलेला असून स्थायी समितीचे आदेशानुसार स्थायी समितीसमोर सादरीकरण करण्यात येणार आहे. प्रस्तुत प्रकल्पाच्या सादरीकरणानंतर स्थायी समितीच्या निर्णयाच्या अनुषंगाने कार्यवाही करण्यात येऊन मुख्य सभा यांची मान्यता प्राप्त होण्याची कार्यवाही करण्यात येईल. त्यानुसार मुख्य सभा यांची मान्यता प्राप्त झाल्यानंतर प्राप्त मान्यतेच्या अनुषंगाने पुढील कार्यवाही करण्यात येईल .

पुणे- केंद्रीय आरोग्य आणि कुटुंब कल्याण राज्यमंत्री डॉ. भारती पवार यांनी आज पुणे महानगरपालिकेला भेट दिली. कोरोनाच्या काळात महापालिकेने केलेले काम आणि कोरोनाच्या संभाव्य तिस-या लाटेसाठी प्रतिबंधात्मक उपाययोजना यांच्याबाबत विविध प्रश्न विचारत माहिती घेतली आणि त्यांनी आढावाही घेतला. पुण्याचे महापौर मुरलीधर मोहोळ,  पदाधिकारी आणि महापालिकेचे वरीष्ठ अधिकारी यावेळी उपस्थित होते.देशात कोरोनाची दुसरी लाट अजून संपली नाही. पंतप्रधान नरेंद्र मोदी स्वतः परिस्थितीवर लक्ष ठेवून आहेत. तिसऱ्या लाटेची शक्यता लक्षात घेऊन येत्या काळात आणखी सतर्कता बाळगावी लागेल असेही आरोग्य राज्यमंत्री डॉ. पवार यांनी यावेळी सांगितले. कोरोनाच्या संभाव्य तिस-या लाटेच्या सामना करण्यासाठी केंद्र सरकारने विविध उपाय योजना केल्या असून जिल्ह्याच्या ठिकाणी कोरोना उपचारांबाबतच्या पायाभूत सुविधा निर्माण करण्यासाठी प्रयत्न केले जात आहेत. असेही त्यांनी सांगितले

त्यानंतर पत्रकारांशी बोलताना डॉ. पवार यांनी सांगितले की, पुणे महापालिकेने शहरी गरीब योजनेच्या माध्यमातून कोविड काळात उत्तम काम केले आहे. राज्यातील इतर महानगरपालिकांनी अशी योजना राबवावी. ‘जंम्बो’ कोविड सेंटर उभारुन रुग्णांना चांगल्या आरोग्य सुविधा देण्यात आल्या. महानगरपालिकेने कोविड प्रतिबंधक लसीबाबत प्रभावी जनजागृती केल्यामुळे मोठ्या प्रमाणावर लसीकरण झाले. तसेच कोरोनामुळे मृत झालेल्या कर्मचाऱ्यांना पुणे महानगरपालिकेनं स्वतःच्या अर्थसंकल्पातून मदत केली याबाबत राज्यमंत्री डॉ. पवार यांनी महापालिकेचं अभिनंदन केले.

 कोरोना प्रतिबंधक लसीकरण (corona vaccination) मोहिमेत लहान मुलांच्या (१८ वर्षांखालील) लसीकरणाबाबत अद्याप अंतिम निर्णय केंद्राच्या आरोग्य विभागाकडून घेण्यात आलेला नाही़ तसेच लहान मुलांच्या लसीकरणासाठी आणखी किती काळ लागेल हे आज निश्चित सांगता येणार नाही, असे केंद्रीय आरोग्य राज्यमंत्री डॉ. भारती पवार (Bharti Pawar) यांनी सोमवारी स्पष्ट केले. दरम्यान लहान मुलांच्या लसीकरणासाठी सुरक्षितेतच्या चाचण्या सध्या सुरू असल्याचेही त्यांनी यावेळी सांगितले.”पुणे जिल्ह्याने आतापर्यंत एक कोटी लसीकरण पूर्ण केले आहे. येथील रुग्ण संख्या वाढू नये यासाठी केंद्र सरकार बारकाईने लक्ष ठेवून आहे. लहान मुलांच्या बाबतीत विशेष खबरदारी घेतली जात असून त्यांच्या लसीकरण चाचण्या सुरू आहेत. आता जरी कोरोनाची रुग्ण संख्या कमी झाली असली तरी महापालिकेकडून जनजागृती प्रभावीपणे राबवली जात आहे. सणासुदीच्या काळात काळजी घेण्याचे आवाहनही केले जाते. केंद्र सरकारकडून महाराष्ट्राला 220 कोटींचा निधी आलेला आहे असेही पवार यावेळी म्हणाल्या आहेत.’

पुणे- गेली ३ महिने पगार न झाल्याने आर्थिक तणावाखाली काम करणाऱ्या महापालिकेतील एका महिलेला हृदयविकाराचा झटका आल्याचा आरोप करत , गोरगरीब कामगारांचे पगार देखील खाणारी महापालिका अशी पुणे महापालिकेची प्रतिमा बनवू नका असा स्पष्ट इशारा देत नुसत्या बड्या बड्या बाता मारणारे सत्ताधारी कामगारांच्या पोटावर ही मारत असल्याचा घणाघात राष्ट्रवादीचे नितीन कदम यांनी केला आहे.

ते म्हणाले ,’ कंत्राटी पद्धतीने असलेल्या सुरक्षारक्षक महिलेला तीन महिने पगार न मिळाल्यामुळे आलेल्या दडपणामुळे ऑन ड्युटी असताना आला हृदयविकाराचा झटका आला. गणेश कला क्रिडा येथे कार्यरत असलेल्या या महिलेला गेले तीन महिने पगार झाल्यामुळे घरातील आर्थिक परिस्थिती मध्ये प्रचंड दडपण आले होते त्यामुळेच तीन साडेतीनच्या दरम्यान तिला हृदयविकाराचा झटका आला. त्यांना भारती हॉस्पिटल येथे दाखल केले असता तातडीने उपचार मिळाल्यामुळे जीव वाचला. परंतु पगार न झाल्यामुळे आर्थिक अडचणीमुळे पुढील उपचार मिळणे जिकिरीचे झाले आहे.कोट्यावधी खर्चाचे मोठे मोठे प्रकल्पांचे पुणेकरांना स्वप्न दाखवणाऱ्या सत्‍ताधारी भाजपच्या पुणे महानगरपालिकेच्या कारभाराचे यामुळे वाभाडे निघाले आहे.

पुणे – गेली कित्येक वर्षे महापालिकेतील कंत्राटी कर्मचाऱ्यांची आर्थिक आणि बेकायदेशीर पिळवणूक करणाऱ्या पुण्याच्या महापालीकेविरोधात आता आवाज उठू लागला आहे . महापालिकेच्या विविध खात्यात ठेकेदारा मार्फत काम करणारे ४ हजार कर्मचारी यांना वेळेवर पगार होत नाही म्हणून रिप्ब्लिकन पक्षा च्या वतीने आज आयुक्तांना घेराव घालण्यात आला. अखेरीसमहापौर मुरलीधर मोहोळ यांनी त्यांच्या दालनात बैठक बोलवली या बैठकी मधे आयुक्त यांनी पुढिल दोन दिवसात सुरक्षा रक्षक यांचे पगार होतील व पुढिल आठवडा मधे इतर सर्व खात्या मधिल कर्मचारी यांचे पगार होतील हे आश्वासन दिले.
तसेच जे ठेकेदार वेळेवर पगार करत नाही त्यांना काळ्या यादीत टाकायचे आदेश दिले व पुढिल महिण्यात या पद्धती मधे एक नियमावली करून ते मान्य करुन प्रत्येक कर्मचारी यांचा महिन्या च्या ७ तारखे च्या आत त्यांच्या खात्यात पैसे जमा होतील असे आश्वासनही त्यांनी दिले
स्थायी समिती अध्यक्ष हेमंत रासने , गटनेत्या फरझाना शेख, नगरसेविका हिमालीताई कांबळे, शहराध्यक्ष संजय सोनवणे , राज्याचे सहसचिव बाळासाहेब जानराव , अशोक कांबळे, अशोक शिरोळे,नगरसेवक अयुब शेख, बसवराज गायकवाड, बाबुराव घाडगे , शैलेश चव्हाण, वसंतराव बनसोडे , महिला अध्यक्ष शशीकला वाघमारे व सर्व पदाधीकारी व कर्मचारी उपस्थित होते.

पुणे- पुणे महापालिकेच्या सर्व अधिकारी आणि कर्मचारी सेवकांना पुढील पाच आर्थिक वर्षांसाठी मूळ पगार, महागाई भत्ता आणि ग्रेड पे यावर एकत्रित ८.३३ टक्के सानुग्रह अनुदान देण्यासाठी महापालिकेच्या मान्यताप्राप्त कामगार संघटनांसाठी करार करण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.

रासने म्हणाले, ‘सानुग्रह अनुदानासंदर्भातील संघटनांबरोबरचा पाच वर्षांचा करार या वर्षी संपुष्टात आला. त्यामुळे सन २०२१-२०२२ ते सन २०२४-२०२५ या कालावधीतील आर्थिक वर्षांसाठी प्रशासनाने संबंधित संघटनांबरोबर नवीन करार करण्यास मान्यता देण्यात आली. तसेच सानुग्रह अनुदानासह दर आर्थिक वर्षी अनुक्रमे सतरा हजार, एकोणीस हजार, एकवीस हजार, तेवीस हजार आणि पंचवीस हजार जादा रक्कम अतिरिक्त सानुग्रह अनुदान म्हणून अदा करण्यासाठी करार करण्यासाठी आणि फक्त या आर्थिक वर्षासाठी महापालिकेच्या अधिकारी आणि कर्मचार्यांना प्रत्येकी तीन हजार रुपये कोविड प्रोत्साहन भत्ता म्हणून देण्यास मान्यता देण्यात आली आहे.’

रासने पुढे म्हणाले, ‘महापालिकेचे सर्व अधिकारी, कर्मचारी, रोजंदारीवरील कर्मचारी, शिक्षण विभागामधील सर्व शिक्षक, शिक्षकेतर कर्मचारी, बालवाडी शिक्षिका, सेविका, माध्यमिक व तांत्रिक शिक्षण विभागातील शिक्षक, शिक्षकेतर सेवक यांना सानुग्रह अनुदाना योजनेचा लाभ मिळणार आहे.’

फुरसुंगी, उरुळी देवाची पाणीपुरवठा योजनेसाठी निधी मंजूर

फुरसुंगी आणि उरुळी देवाची या गावांमध्ये राष्ट्रीय ग्रामीण पेयजल कार्यक्रमाअंतर्गत पाणीपुरवठा योजनेच्या विविध कामांसाठी महाराष्ट्र जीवन प्राधिकरणला तीन कोटी रुपयांचा निधी उपलब्ध करून देण्यास स्थायी समितीने मान्यता दिल्याची माहिती रासने यांनी दिली.

रासने म्हणाले, ‘या दोन्ही गावांतील पाणीपुरवठा सुरळीत होण्यासाठी सन २०१७ पासून तुकाई टेकडी फुरसुंगी येथे ३३ एमएलडी क्षमतेचा जलशुद्धीकरण प्रकल्प, या प्रकल्पाला पाणीपुरवठा करणारी लष्कर जलकेंद्रापासूनची मुख्य जलवाहिनी, अंतर्गत वितरण नलिका, तेरा साठवण टाक्या आदी विकासकामे सुरू आहेत. या गावांचा नुकताच महापालिकेच्या हद्दीत समावेश झाल्याने पाणीपुरवठा करण्याची जबाबदारी महापालिकेवर आली आहेत. या ठिकाणची पाणीपुरवठ्याची अपूर्ण राहिलेली कामे पूर्ण करण्यासाठी तीन कोटी रुपयांच्या निधीला मान्यता देण्यात आली.’

राजीव गांधी प्राणी संग्रहालयात आशियाई सिंह खंदकासाठी निधी

कात्रज येथील महापालिकेच्या राजीव गांधी प्राणी संग्रहालयात आशियाई सिंह खंदक उभारण्यासाठी निधी उपलब्ध करून देण्यास स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.

रासने म्हणाले, ‘केंद्रीय प्राणी संग्रहालयाच्या निकषानुसार खंदक उभारण्याचे काम करण्यात येणार आहे. त्यासाठी सर्व करांसहित सुमारे तीन कोटी सहा हजार रुपये खर्च अपेक्षित आहे. त्याशिवाय रॉयल्टी आणि चाचणीचा खर्च अनुक्रमे ३४ हजार आणि ८४ हजार रुपये इतका होणार आहे.’

आरोग्य विभागातील करार पद्धतीतील सेवकांना मुदतवाढ

कोरोना विषाणू संसर्गामुळे येणार्या संभाव्य तिसर्या लाटेचा धोका लक्षात घेऊन आरोग्य विभागातील करार पद्धतीतील सेवकांना मुदतवाढ देण्याचा निर्णय स्थायी समितीने घेतल्याची माहिती अध्यक्ष हेमंत रासने यांनी आज पत्रकार परिषदेत दिली.

रासने म्हणाले, महापालिकेच्या आरोग्य विभागात वर्ग एक ते चार मध्ये सेवकांची एकूण मान्यता पदांची संख्या सोळाशे एकोणसत्तर इतकी आहे. मात्र केवळ आठशे ऐशी सेवक कार्यरत आहेत. म्हणजेच रिक्त पदांची संख्या सातशे एकोणनव्वद इतकी मोठी आहे. कोविड रुग्णालय आणि फ्ल्यू क्लिनिक सेंटरचा वाढता ताण वैद्यकीय अधिकारी आणि कर्मचार्यांवर येतो.’

रासने पुढे म्हणाले, ‘त्यामुळे कंरार पद्धतीने सेवेत असलेल्या बधिरीकरण तज्ज्ञ, स्त्रीरोग तज्ज्ञ, बालरोग तज्ज्ञ, ज्युनिअर नर्स, सेवक, आयुर्वेदिक वैद्यकीय अधिकारी, औषध निर्माता, दंतशल्यचिकित्सक अशा एकूण ७३ सेवकांना मुदतवाढ देण्याचा निर्णय घेण्यात आला.’

डी. पी. रस्ते आणि पूल विकसित करण्यासाठी सल्लागार नियुक्तीस मान्यता

शहराच्या विविध भागांतील मान्य विकास आराखड्यातील डी. पी. रस्ते आणि पूल विकसित करण्याच्या उद्देशाने विविध टप्प्यांवरील कामे पूर्ण करण्यासाठी स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.

रासने म्हणाले, ‘बालेवाडी येथील मुळा नदीकाठच्या २४ मीटर डी. पी. रस्ता आणि बाह्य वळण रस्ता ते ज्युपिटर हॉस्पिटलजवळील डॉ. बाबासाहेब आंबेडकर पूल, मुंढव्यातून जाणारा २४ मीटरचा रस्ता, कोंढवा बुद्रुक, कोंढवा खुर्द, उंड्रीतून जाणारे १८ मीटर आणि २४ मीटरचा रस्ता विकसित करण्यासाठी प्रकल्पांसाठी तज्ज्ञ सल्लागारांची नियुक्ती करणे, भूसंपादन करणे, पाठपुरावा करणे आणि सुलभ व सुरक्षित वाहतुकीसाठी विविध उपाययोजना करणे आदी विकासकामे करण्यासाठी आज मान्यता देण्यात आली.’

रासने म्हणाले, ‘शहरातील विकास आराखड्यातील रस्ते ताब्यात आलेल्या जागेनुसार आणि उपलब्ध तरतुदीनुसार दरवर्षी टप्प्याटप्प्याने विकसित केले जातात. रस्ते विकसनाचा खर्च, तुलनेने कमी उपलब्ध तरतूद आणि जागा ताब्यात घेताना जागा मालकांची रोख मोबदल्याची मागणी अशा कारणांमुळे डी. पी. रस्ते आणि पूल विकसित करण्यात मर्यादा येतात. अशा परिस्थितीत रस्ते विकसन खासगी सहभागातून करण्याचा प्रस्ताव सादर करण्यात आला होता. या प्रस्तावाअंतर्गत रस्त्यांच्या जागा एफएसआय आणि टीडीआर यांच्या मोबदल्यामध्ये ताब्यात घेता येत आहेत.’

रासने म्हणाले, ‘रस्ते विकसनाचा खर्च विकसकास किंवा ठेकेदारास क्रेडिट नोट स्वरूपात देण्याचे प्रस्तावित करण्यात येते. ही क्रेडिट नोट पुणे महापालिकेकडे असलेल्या बांधकाम परवानगी शुल्काच्या अंतर्गत वापरता येते. तसेच ती क्रेडिट नोट हस्तांतरणीय असते, या वर्षी ११ रस्ते आणि दोन उड्डाणपूलांची कामे प्रस्तावित करण्यात आली होती. पीपीई अंतर्गत रस्ते विकसित करण्याच्या तरतुदींना गेल्या वर्षी मुख्य सभेने आणि स्थायी समितीने मान्यता दिली होती. या प्रस्तावामुळे महापालिकेला थेट गुंतवणूक न करता क्रेडिट नोटच्या बदल्यात रस्त्यांची व पुलांची कामे विकसित करण्यात येणार आहेत.’