मुंबई, दि. 28 : अन्न व औषध प्रशासनाने केलेल्या कारवाईत अन्न सुरक्षा कायद्यांचे उल्लंघन केल्याचे आढळल्याने कमी दर्जाचे फूड सप्लिमेंट साठा जप्त करण्यात आला आहे. अन्न व औषध प्रशासन, दक्षता व गुप्तवार्ता विभागास प्राप्त माहितीनुसार मेसर्स सिग्मा लाइफसायन्स, बंगलो भूखंड क्रमांक-२०४-२४४, आरएससी-४१, गोराई 2, प्रगती शाळेसमोर, बोरिवली पश्चिम, मुंबई-400092 या पेढीची ऑनलाईन तपासणी केली असता तेथे Health Supplements चे उत्पादन होत असल्याचे आढळून आले. या ठिकाणी Health Supplement 100% Whey Protein(Ammolabz) व Dietary Supplement Progenix Mass Addict चा उत्पादित करून ठेवलेला साठा आढळून आला.

या ठिकाणी Health Supplement 100% Whey Protein(Ammolabz) व Dietary Supplement Progenix Mass Addict चे अन्न नमुने घेवून Health Supplement 100% Whey Protein (Ammolabz) ह्या अन्नपदार्थाचा उर्वरित 76 जार (कंटेनर), ५,७५,३२०/- रुपये चा साठा तर Dietary Supplement Progenix Mass Addict ह्या अन्नपदार्थाचा उर्वरित १०० जार (कंटेनर), १,४५,०००/- रुपये चा साठा हा काही घटकांचे प्रमाण हे RDA पेक्षा जास्त असल्याने अन्न सुरक्षा कायद्याचे उल्लंघन होत असल्यामुळे तसेच साठा कमीदर्जाचा असल्याच्या संशयावरून व जन आरोग्य हितार्थ जप्त करण्यात आला.

अन्न नमुने विश्लेषणासाठी प्रयोगशाळेत पाठविण्यात आले आहेत. विश्लेषण अहवाल प्रलंबित असून अहवाल प्राप्त झाल्यानंतर अन्न सुरक्षा व मानदे कायद्यानुसार पुढील योग्य ती कार्यवाही करण्यात येईल. ही कारवाई  अन्न व औषध प्रशासन विभागामार्फत करण्यात आली असल्याचे अन्न व औषध प्रशासन कार्यालयाने कळविले आहे.

मुंबई, दि. 27 : आज देशातील आयआयटी संस्थांनी सर्वोत्तम विद्यापीठांमध्ये स्थान पटकावले आहे. मुंबई विद्यापीठाला अलिकडेच ‘नॅक’कडून ए प्लस प्लस मानांकन प्राप्त झाले आहे. देशाच्या स्वातंत्र्यलढ्यात अभूतपूर्व योगदान असणाऱ्या वैभवशाली मुंबई विद्यापीठाची ख्याती जगभर अधिक वाढावी यासाठी विद्यापीठाने पावले टाकावीत, अशी अपेक्षा राज्यपाल तथा कुलपती भगतसिंह कोश्यारी यांनी व्यक्त केली.

राज्यपालांच्या प्रमुख उपस्थितीत मुंबई विद्यापीठाचा २०२१ या वर्षाचा वार्षिक दीक्षान्त समारंभ सोमवारी (दि. २७) विद्यापीठाच्या फोर्ट येथील सर कावसजी जहांगीर सभागृहात झाला त्यावेळी ते बोलत होते.

दीक्षांत समारंभाला पर्यटन, पर्यावरण व राजशिष्टाचार मंत्री आदित्य ठाकरे, गोवा येथील राष्ट्रीय समुद्रशास्त्र संस्थेचे संचालक प्रा. सुनील कुमार सिंह, कुलगुरू सुहास पेडणेकर, प्र-कुलगुरू रवींद्र कुलकर्णी, संचालक परीक्षा व मूल्यांकन डॉ विनोद पाटील, कुलसचिव डॉ सुधीर पुराणिक, विविध शाखांचे अधिष्ठाता, विद्यापीठाच्या प्राधिकार मंडळांचे सदस्य, शिक्षक व स्नातक उपस्थित होते.

विद्यार्थ्यांनी डोळ्यांसमोर मोठे लक्ष्य ठेवून त्याच्या प्राप्तीसाठी परिश्रम करून विलक्षण असे काही प्राप्त केले तर भारताला जगद्गुरू होता येईल असे सांगताना विद्यार्थ्यांनी नोकरीच्या मागे न लागता नोकरीच्या संधी निर्माण करणारे उद्योजक व्हावे, असे राज्यपालांनी सांगितले. देशाला आत्मनिर्भर बनविण्यासाठी प्रत्येक स्नातकाला आत्मनिर्भर व्हावे लागेल असे त्यांनी सांगितले.

नव्या शैक्षणिक धोरणामध्ये आंतरशाखीय अध्ययन व ॲकॅडेमिक क्रेडिट्स देण्यात आले आहे. विद्यार्थ्यांना विविध शाखांमधील विषय देखील शिकता येणार आहे असे राज्यपालांनी सांगितले. मुलींचा उच्च शिक्षणातील टक्का वाढत असल्याबद्दल तसेच सुवर्णपदके अधिकांश मुलींनी प्राप्त केल्याबद्दल राज्यपालांनी आनंद व्यक्त केला.   दीक्षांत समारंभात विविध शाखांमधील एकुण २,१२,५७९ स्नातकांना पदव्या, २४३  स्नातकांना पीएचडी तसेच सुवर्ण पदके प्रदान करण्यात आली.

मुंबई, दि. 27 : इतर मागास वर्गातील व्यक्तींना, स्थानिक स्वराज्य संस्थांमध्ये प्रतिनिधीत्व मिळणे आवश्यक आहे. राज्यातील स्थानिक स्वराज्य संस्थांच्या निवडणुका इतर मागास वर्गातील व्यक्तींना वगळून घेण्यात येऊ नये अशी शिफारस राज्य निवडणूक आयोगाला करण्याचा ठराव विधानसभेत उपमुख्यमंत्री अजित पवार यांनी मांडला. या ठरावास विरोधी पक्षनेते देवेंद्र फडणवीस यांनी अनुमोदन देऊन एकमताने हा ठराव पारित करण्यात आला.

सर्वोच्च न्यायालयाने ओबीसी आरक्षणाशिवाय राज्यातील स्थानिक स्वराज्य संस्थांच्या निवडणुका घेण्याचे आदेश दिल्यानंतर राज्य निवडणूक आयोगाने त्यादृष्टीने प्रक्रिया सुरु केली. मात्र राज्य शासनाने ओबीसी आरक्षणाशिवाय निवडणुका घेवू नये अशी शिफारस राज्य निवडणूक आयोगाला करण्याबाबतचा ठराव उपमुख्यमंत्री अजित पवार यांनी मांडला. तो सर्वपक्षीय सहमतीने एकमताने पारित करण्यात आला.

विधानपरिषदेत हा ठराव ग्रामविकास मंत्री हसन मुश्रीफ यांनी मांडला, तोही सर्वपक्षीय सहमतीने एकमताने पारित करण्यात आला.

राज्यातील ओबीसींचे आरक्षण अबाधित ठेवण्यासाठी सर्वोच्च न्यायालयाने राज्य शासनाला ओबीसी आरक्षणासाठी मागासवर्गीय आयोगाची स्थापना करावी, त्या आयोगामार्फत ओबीसींचा इम्पेरिकल डेटा तयार करावा आणि आयोगाच्या शिफारसीसह जमा झालेली माहिती सर्वोच्च न्यायालयात  सादर करावी असा तीन सूत्री कार्यक्रम दिला. याची पूर्तता करण्यासाठी राज्य शासनाने तीन महिन्यांचा कालावधी मागितला होता.

०००

मुंबई, दि. 27 : मुंबईतील अंधेरी पूर्व येथील पीएमजीपी वसाहतीतील जुन्या व जीर्ण इमारतींच्या पुनर्विकासासाठी येत्या महिनाभरात उच्चस्तरीय बैठक घेऊन तातडीने निर्णय घेण्यात येणार असल्याची माहिती गृहनिर्माण मंत्री जितेंद्र आव्हाड यांनी विधानसभेत दिली.

सदस्य सुनिल प्रभु, रविंद्र वायकर, अमिन पटेल यांनी मुंबईतील अंधेरी पूर्व, कामाठीपूरा, उमरखाडी या भागातील पीएमजीपी अंतर्गत येणाऱ्या जुन्या इमारतींच्या पुनर्विकासासंदर्भात लक्षवेधी सूचना मांडली होती. यास उत्तर देताना गृहनिर्माण मंत्री श्री. आव्हाड बोलत होते.

गृहनिर्माण मंत्री श्री.आव्हाड म्हणाले, अंधेरी पूर्व येथील परिसरात 17 इमारती 6.41 एकरात असून, 984 गाळे आहेत. तीन वेळा देकार पत्र देऊनही विकासक पुनर्विकास करत नसल्याने, चौकशी केली असता विकासक आर्थिकदृष्ट्या सक्षम नसल्याने तो पुनर्विकास करू शकत नसल्याचे निदर्शनास आले आहे. मुंबईतील म्हाडाअंतर्गत येणाऱ्या सोसायटीच्या रहिवाशांना निवासस्थानाची अडचण भासू नये तसेच जीर्ण इमारत आणि स्थानिकांच्या जीवला धोका होवू नये यासाठी  पीएमजीपी अंतर्गत येणाऱ्या वसाहतींचा पुनर्विकास करण्यासाठी महिनाभरात उच्चस्तरीय बैठक घेऊन तातडीने निर्णय घेवून कार्यवाही करण्यात येणार असल्याचे श्री.आव्हाड यांनी सांगितले.

मुंबईतील म्हाडाअंतर्गत येणाऱ्या वसाहतीतील नागरिकांना निवासाचा प्रश्न भेडसावणार नाही यासाठी भविष्यात निर्णय घेण्यात येतील. पीएमजीपी अंतर्गत येणाऱ्या इमारतींचा प्रश्नही तातडीने सोडविण्यात येईल यासाठी संस्थेचे पदाधिकारी, स्थानिक लोकप्रतिनिधी आणि विकासक यांच्याशी चर्चा करण्यात येईल. इमारतींच्या पुनर्विकासासाठी शासनाकडून घेण्यात येणाऱ्या विविध मान्यताही लवकर घेऊन प्रश्न सोडविण्याचा प्रयत्न करणार असल्याचेही श्री.आव्हाड यांनी यावेळी सांगितले.

रायपुर –

रायपूर येथे झालेल्या धर्म संसदेत गांधीजींचा अपमान करणाऱ्या तथाकथित संत कालीचरण यांच्यावर रायपूरमध्ये एफआयआर दाखल करण्यात आला आहे. पक्षाचे प्रदेशाध्यक्ष मोहन मरकाम यांनी ‘ढोंगी बाबा हाय..हाय…’च्या घोषणा दिल्या.कालीचरण यांच्यावर IPC च्या अजामीनपात्र कलम 505(2) अंतर्गत शांतता भंग करण्याच्या उद्देशाने आक्षेपार्ह विधाने करणे, समुदायांबद्दल द्वेष निर्माण करणे आणि कलम 294 अंतर्गत अश्लील अपमानास्पद भाषण केल्याचा आरोप ठेवण्यात आला आहे. सिव्हिल लाइन्सचे CSP वीरेंद्र चतुर्वेदी यांनी सांगितले की, मोहन मरकम यांचा अर्ज पोलिस ठाण्यात कारवाईसाठी पाठवण्यात आला आहे. इकडे, वादग्रस्त विधान केल्यानंतर लगेचच कालीचरण महाराष्ट्रात रवाना झाले.कालीचरण यांच्यावर FIR दाखल करण्यासाठी आलेले काँग्रेसचे प्रदेशाध्यक्ष मरकाम म्हणाले, गांधींचा अपमान हा देशाचा अपमान आहे. रविवारी रात्री उशिरा सिव्हिल लाइन्स पोलिस ठाण्यात पोहोचलेल्या महापालिकेचे अध्यक्ष प्रमोद दुबे यांच्या अर्जाच्या आधारे टिकरापारा पोलिस ठाण्यात गुन्हा दाखल करण्यात आला.

रायपूरमध्ये दोन दिवस चाललेल्या धर्मसंसदेचा समारोपाचा कार्यक्रम रविवारी पार पडला. रावणभट मैदानावर आयोजित या कार्यक्रमात मध्य प्रदेशातील भोपाळजवळील भोजपूर मंदिरात शिव तांडव स्त्रोत्र गाऊन प्रसिद्ध झालेल्या संत कालीचरण यांनाही आमंत्रित करण्यात आले होते. कालीचरण मंचावर आले आणि त्यांनी प्रथम शिव तांडवा स्त्रोत्र गायले.

पुणे, दि. 27 : जागतिक जल दिवसाचे औचित्य साधून केंद्र शासनाच्या जलशक्ती मंत्रालयामार्फत ‘जलशक्ती अभियान: कॅच द रेन’ हे देशव्यापी अभियान राबविण्यात येत आहे. अभियानाची जिल्ह्यात 20 डिसेंबर रोजी सुरुवात करण्यात आली असून त्याची प्रभावी अमंलबजावणी करण्यासाठी जिल्हा जलसंधारण अधिकारी सुजाता हांडे यांची जिल्हा नोडल अधिकारी म्हणून नियुक्ती करण्यात आली आहे.

जलशक्ती अभियानांतर्गत जिल्हाधिकारी यांच्या मार्गदर्शनानुसार आदिवासी विकास विभाग, कृषी विभाग, नगर विकास, भूजल सर्वेक्षण आणि विकास विभाग, जलसंपदा विभाग, महसूल व वने विभाग, पाणी पुरवठा व स्वच्छता विभागातील अधिकाऱ्यांशी समन्वयाने जलशक्ती अंतर्गत कामे करण्यात येणार आहेत. अभियानाद्वारे पावसाच्या पाण्याचे संधारण करून भूजल पातळीत वाढ करण्याचे नियोजित आहे.

पावसाची अनियमितता लक्षात घेता जास्तीत जास्त पाणी स्थानिक पातळीवरच अडवून जिरविण्यासाठी प्राधान्य देण्याच्यादृष्टीने व त्याचे प्रबोधन करण्यासाठी जलशक्ती केंद्राची स्थापना करण्यात आली आहे. पर्जन्य जल पुनर्भरणासाठी (रेन वॉटर हार्वेस्टिंग) बांधकाम व दुरुस्तीतून जास्तीत जास्त पाणी साठविण्यासाठी या मोहिमेद्वारे प्रयत्न केले जाणार आहेत, अशी माहिती श्रीमती हांडे यांनी दिली आहे.

सध्या अस्तित्वातील जलस्त्रोतांचे पुनरुज्जीवन, नूतनीकरण करणे व जलसंधारणाच्या विविध उपचारांद्वारे जलसाठा तयार करणे व ते अडवून जमिनीत जिरवणे व भूजल पातळीत वाढ करण्याचे उद्दिष्ट या मोहिमेंतर्गत साध्य केले जाणार आहे. जिल्ह्यातील सर्व जलाशयांचे जिओ टगिंग करून एकत्रित माहिती संकलित करण्याचे देखील नियोजन असल्याचे यांनी माहिती

पुणे, दि. 27 : अनुसूचित जाती व नवबौद्ध घटकांतील इयत्ता ११ वी, १२ वी तसेच १२ वी नंतरच्या व्यावसायिक, बिगर व्यावसायिक अभ्यासक्रमांमध्ये प्रवेश मिळालेल्या विद्यार्थ्यांनी भारतरत्न डॉ. बाबासाहेब आंबेडकर स्वाधार योजनेचा लाभ मिळण्यासाठी ३१ डिसेंबर २०२१ पर्यंत अर्ज करण्याचे आवाहन समाज कल्याण विभागाच्या सहाय्यक आयुक्त संगिता डावखर यांनी केले आहे.

२०२०-२१ व २०२१-२२ या दोन वर्षाच्या कोरोना-१९ च्या प्रादुर्भाव कालावधीमध्ये शैक्षणिक संस्था, महाविद्यालये प्रत्यक्ष बंद असल्या तरी ऑनलाईन प्रणालीद्वारे शिक्षण सुरू होते. या कालावधीत ऑनलाईन प्रणालीद्वारे शिक्षण पूर्ण केले आहे अशा विद्यार्थ्यांना डॉ. बाबासाहेब आंबेडकर स्वाधार योजनेचा लाभ मिळणार आहे. त्यासाठी ऑनलाईन प्रणालीद्वारे शिक्षणासाठी सहामाही ७५ टक्के उपस्थितीचे संस्था, महाविद्यालयाचे प्रमाणपत्र अर्जासोबत सादर करणे आवश्यक आहे, असेही श्रीमती डावखर यांनी कळविले आहे.