मुंबई, दि २८ डिसेंबर- विधानपरिषदेच्या उपसभापती नीलम गोऱ्हे यांनी सभागृहाचा विश्वास गमावला आहे. त्यामुळे त्यांना उपसभापतीपदावरून दूर करावे, अशा प्रकारची अविश्वास प्रस्तावाची सूचना विधान परिषदेचे विरोधी पक्षनेते प्रविण दरेकर यांनी विधानपरिषदेचे सभापतींकडे आज दाखल केली आहे.
अविश्वास प्रस्तावाची सूचना दिल्यानंतर प्रसारमाध्यमांशी बोलताना, प्रविण दरेकर यांनी सांगितले की, उपसभापती न्यायदानाच्या ठिकाणी बसलेल्या असताना त्या नि:पक्षपाती भूमिका घेत नाहीत. आज सभापतींकडे उपसभापती गोऱ्हे यांच्याविरोधात अविश्वास प्रस्ताव दखल केला आहे. भारतीय संविधानाच्या अनुच्छेद १८३ (ग) व म.वि.प. नियम ११ अन्वये तशा प्रकारची प्रस्तावाची सूचना दाखल केली आहे. त्यांनी न्यायाधीशाप्रमाणे वागायचे असते. दोन्ही बाजूंचे म्हणणे ऐकून घेणे गरजेचे आहे. अकोला महापालिकेची लक्षवेधी सूचना आज सकाळी चर्चेला आली होती. परंतु सदर प्रकरण न्यायप्रविष्ट असल्यामुळे ही लक्षवेधी सूचना राखून ठेवावी हे आपण उपसभापतींच्या निदर्शनास आणले. परंतु माझी विनंती त्यांनी फेटाळल्याचेही दरेकर यांनी स्पष्ट केले.
मुंबई उच्च न्यायालयाच्या नागपूर खंडपिठाकडे याविषयाची याचिका सुनावणीसाठी प्रलंबित आहे. उच्च न्यायालयाने २१ डिसेंबर २०२१ रोजी याप्रकरणात कोणतीही कार्यवाही न करता चार आठवड्यामध्ये शासनाने आपले म्हणणे मांडण्याचे सादर करण्याचे निर्देश दिले आहेत. याचाच अर्थ सदर बाब न्यायालयाच्या अभिनिर्णयाधीन आहे व या प्रकरणी सभागृहात चर्चा करणे हे न्यायालयाचा अवमान करण्यासारखे आहे. त्यामुळे विधानपरिषदेतील नियम पुस्तिकेनुसार सदर लक्षवेधी राखून ठेवण्याची मागणीही दरेकर यांनी यावेळी केली.
त्यानंतरही उपसभापती गो-हे यांनी ही लक्षवेधी पुकारली व शिवसेनेचे गोपीकिशन बाजोरिया यांना या लक्षवेधीवर त्यांनी एकट्यालाच बोलू दिले. अकोला स्थानिक स्वराज्य संस्थेत त्यांचा परावभ झाला आहे आणि त्याचा राग घेऊन अकोला महापालिका बरखास्त करावी, अशी त्यांनी मागणी केली आहे. कायदेशीर कारवाईला आमचा विरोध नाही. परंतु विरोधी पक्षनेता हे संविधानिक जबाबदारीचे पद असताना गोपीकिशन बाजोरिया यांचे बोलणे झाल्यानंतर आपण सभागृहात वारंवार बोलण्याची मागणी केली. परंतु उपसभापतींनी विरोधी पक्षनेत्याला जाणीवपूर्वक बोलू दिले नाही. उपसभापती यांची ही कार्यपध्दती विधान परिषदेच्या परंपरेला धरून नाही. अशा प्रकारे सभागृहात दुजाभाव पद्धतीने कामकाज होत असल्याचेही दरेकर यांनी स्पष्ट केले.
महाराष्ट्रात सर्वात महत्वाचा एसटी कर्मचाऱ्यांचा प्रश्न आहे. याविषयावर लक्षवेधी सूचना द्यायची होती, पण उपसभापतींनी सांगितले की, जो विषय न्यायप्रविष्ट आहे त्यावर आपल्याला चर्चा करता येत नाही. उपसभापती पक्षाच्या प्रवक्त्या असल्याचा भास होत आहे. त्यामुळे उपसभापती नीलम गोऱ्हे यांच्यावर भारतीय संविधानाच्या अनुच्छेद १८३ (ग) व म.वि.प. नियम ११ अन्वये आणण्यासाठी सभापतींकडे सूचना दाखल केल्याची माहिती दरेकर यांनी दिली.

मुंबई, दि. २८ डिसेंबर – रायगड जिल्ह्यामध्ये एका महिला सरपंचाची हत्या करण्यात आल्याची गंभीर घटना काल घडली आहे. राज्याचे हिवाळी अधिवेशन सुरू असताना राज्यात अशा प्रकारच्या घटना घडत आहेत. त्यामुळे राज्य शासनाने याविषयी तातडीने निवेदन करण्याची मागणी विधान परिषदेचे विरोधी पक्षनेते प्रविण दरेकर यांनी आज पॉईंट ऑफ इन्फॉर्मेशनद्वारे विधान परिषदेत केली. हा विषय गंभीर असून याप्रकरणाची आपण माहिती घेतली आहे व यादृष्टीने तपास सुरु असल्याची माहिती पालकमंत्री आदिती तटकरे यांनी यावेळी दिली.
विरोधी पक्ष नेते दरेकर यांनी सांगितले की, कालच विधानपरिषदेत कायदा व सुव्यवस्थेवर चर्चा करण्यात आली. आज या घटनेमुळे संपूर्ण रायगड जिल्ह्यात अतिशय तीव्र भावना आहेत. गुन्हेगारांना कशाचीही भीती उरलेली नाही, हेच याघटनेवरून दिसून येते. रायगड मधील महाड तालुक्यातील मौजे आदिस्ते येथील मीनाक्षी मनोहर खिडबिडे या महिला सरपंच होत्या. या सरपंच महिला अतिशय गरीब कुटुंबातील होत्या. जंगलात रस्त्याच्या कडेला काल दुपारी त्यांचा मृतदेह सापडला.त्यांच्यावर बलात्कार झाल्याचाही संशय व्यक्त केला जात आहे. लाकुडफाटा आणण्यासाठी त्या गेल्या होत्या. सायंकाळी महाडच्या ग्रामीण रुग्णालयात त्यांचा मृतदेह आणण्यात आला. ग्रामीण रुग्णालयात महिला डॉक्टर नाहीत. बलात्कार झाल्याचा संशय असल्यामुळे महाडचे आरएमओ डॉ. भास्कर जगताप यांनी सेकंड ओपिनियनसाठी मृतदेह जे.जे.रुग्णालयाकडे पाठवला आहे. गावापासून 500 मीटर अंतरावर त्यांचा मृतदेह सापडला होता, अशी माहिती दरेकर यांनी विधान परिषद सभागृहाला दिली.

मुंबई-उपमुख्यमंत्री अजित पवार यांनी शुक्रवारी सभागृहात ,’ तुम्ही मतदारांच्या पाठिंब्याने सभागृहात निवडून आला आहात, तुम्ही कुत्री, कोंबड्या आणि मांजरांचे प्रतिनधी नाही, असे म्हटले. या पार्श्वभूमीवर नारायण राणे यांनी अजित पवार यांच्यावर सडकून टीका केली. सभागृहात अजित पवार यांनी आमदारांच्या वर्तनाविषयी नाराजी व्यक्त केली. त्यावर नारायण राणे यांना पत्रकारपरिषद सुरु असताना प्रतिक्रिया विचारण्यात आली. त्यावर नारायण राणे प्रचंड संतापले. कोण अजित पवार? मी त्याला ओळखत नाही. जनतेच्या पैशांचा कोट्यवधींचा भ्रष्टाचार केल्याचा आरोप असणाऱ्याचे दाखले तुम्ही मला काय देता, असा प्रतिप्रश्न नारायण राणे यांनी उपस्थित केला.

तसेच विधिमंडळाच्या पायऱ्यांवर नितेश राणे यांनी मांजराचा आवाज काढला असेल तर त्यामध्ये गैर काय होते? आदित्य ठाकरे यांना या गोष्टीचा राग का यावा? वाघाची मांजर कधी झाली. त्यांचा आवाज मांजरीसारखा आहे का? माझ्या मते आदित्य ठाकरे यांचा आवाज तसा नाही. आदित्य ठाकरे तिथून जात असताना एखादा वेगळा आवाज काढला असता तर मग लगेच त्यांना त्या प्राण्याची उपमा लागू होते का, असा सवालही नारायण राणे यांनी विचारला. 

विधीमंडळात सर्वात चांगले काम नितेश राणे करतो. हीच त्यांची पोटदुखी आहे, राज्य सरकार सत्तेचा दुरुपयोग करत आहे असा आरोप केंद्रीयमंत्री नारायण राणेंनी केला आहे.नारायण राणे पत्रकार परिषदेत बोलताना म्हणाले की, ‘सिंधुदुर्गातील शिवसैनिकावरील हल्ल्याचा प्रकरणाचा नितेश राणेंचा काहीच संबंध नाही तसेच या प्रकरणात नितेश राणेंचे नाव जाणिवपूर्वक टाकले जात आहे. राज्याचा अॅडिशनल डीजी, राज्यातील पोलिस तिथे आले. असं काय घडलं की, एवढी यंत्रणा तिथे आली. अशा छोट्या मोठ्या गोष्टी सगळीकडे होत असतात. यासाठी एवढी यंत्रणा का आली? कुठूनही नाव गोवायचं आणि त्यासाठी कलम 307 लावायची. खरचटल्यासाठी ही कलम लावली आहे. नितेश राणेंचा या प्रकरणाशी काहीच संबंध नाही. प्रशासनाचा दुरुपयोग केला जात आहे.’

अदित्य ठाकरेंचा आणि मांजरीचा संबंध काय?
नितेश राणे यांच्या म्याव म्याव प्रकरणावर देखील नारायण राणेंनी भाष्य केले आहे. नितेश राणेंनी कसला आवाज काढला. आदित्य ठाकरे आणि मांजरीचा काय संबंध? असा सवाल नारायण राणेंनी केला आहे. तसेच तो विधानभवनात बोललेला नाही. तो पायऱ्यांवर बसून बोललेला आहे. तसेच पंतप्रधानांची नक्कल केल्यावरुन राणे म्हणाले की, भास्कर जाधवांना जशास तसे उत्तर दिले जाईल.

काय आहे प्रकरण?
सिंधुदुर्ग जिल्ह्यात शिवसेनेचे स्थानिक नेते संतोष परब यांना मारहाण करण्यात आली होती. या मारहाणीसाठी थेट नितेश राणे यांच्यावर आरोप करण्यात आले आहेत. यापूर्वी त्यांना दोन वेळा पोलिसांनी चौकशीसाठी बोलावले होते. याच प्रकरणात मुख्य आरोपी सचिन सातपुते याला दिल्लीतून अटक करण्यात आली. त्याच्या अटकेनंतर आता नितेश राणेंना अटक होणार अशी शक्यता आहे. तत्पूर्वी पोलिसांनी नितेश राणेंना तिसऱ्यांदा चौकशीसाठी बोलावले होते. परंतु, ते हजर झाले नाहीत.यानंतर त्यांनी थेट कोर्टात अर्ज दाखल केला.

उल्लेखनीय बाब म्हणजे, यापूर्वी 24 ऑगस्ट रोजी मुख्यमंत्री उद्धव ठाकरे यांच्यावर आक्षेपार्ह विधान केल्या प्रकरणी केंद्रीय मंत्री नारायण राणे यांना अटक करण्यात आली होती. राणे यांना त्यांच्या राहत्या घरातून अटक करण्यात आली होती. यानंतर त्याच दिवशी जामीनावर मुक्तता करण्यात आली होती .

मुंबई- विधिमंडळात प्रत्येकानंच आपापल्या जबाबदारीचं भान ठेऊन योग्य वर्तनच ठेवायला हवं, सभागृहाचा मान सन्मान न ठेवणाऱ्यांना ४ तास हवे तर ८ तास सभागृहाबाहेर ठेवा ,१२ महिने नका ठेऊ अशा शब्दांत सत्ताधारी आणि विरोधी पक्षाच्या आमदारांनाही कानपिचक्या उपमुख्यमंत्री अजित पवार यांनी दिल्याचा धागा पकडत विरोधीपक्षनेते देवेंद्र फडणवीस यांनी अजित पवारांच्या भूमिकेचे स्वागत करत पाठींबा दिला पण तो देताना “मला समाधान आहे की किमान उपमुख्यमंत्र्यांना १२ आमदारांच्या निलंबन प्रश्नी वर्षभर बाहेर ठेऊ नये याची जाणीव आहे”, असा टोलाहि मारला .

फडणवीस म्हणाले “देशाची लोकसभा असेल किंवा राज्याचं विधानमंडळ असेल, यांच्यावर या लोकशाहीने राज्य चालवण्याची जबाबदारी दिली आहे. त्यामुळे इथे आपण काय करतो, कसं वागतो या गोष्टी महत्त्वाच्या आहेत. खासगी आयुष्यात आपण कसेही वागू शकू. पण इथे आपण जनतेचे विश्वस्त म्हणून आलो आहोत. त्यामुळे मूल्यांचं आपण पालन केलं पाहिजे. नियमांचं पालन केलं पाहिजे. सभागृहाचा दर्जा सांभाळायला हवा. व्यक्तिगत वर्तन किंवा सामुहीक वर्तनात तो कायम ठेवला पाहिजे”, असं फडणवीस म्हणाले.

मुंबई- ज्या लाखो मतदारांनी विश्वास टाकल्यानंतर आमदार होऊन आपण सभागृहापर्यंत पोहोचतो , त्यांनी हे लक्षात ठेवले पाहिजे की, आपण इथे कुत्री, मांजर आणि कोंबड्यांचं प्रतिनिधीत्व करत नाहीत. असे वागलो तर लाखो मतदारांच्या विश्वासाला तडा जाईल. सदस्यांनी आपले वर्तन लाइव्ह होणार्या बातम्यांद्वारे जनता पाहत असते म्हणत उपमुख्यमंत्र्यांनीआमदारांचे कान टोचले आहे.’असे वागणे म्हणजे लाखो मतदारांचा अपमान केल्यासारखे आहे. मतदारांना काय वाटेल, आपला माणूस तिथे जातो आणि अशा पद्धतीनं आवाज काढतो, टवाळी करतो? त्यामुळे सगळ्यांनीच चारही प्रमुख प्रक्ष, इतर अपक्ष सदस्यांनी ही गोष्ट गांभीर्याने घ्यायला हवे’ असे देखील अजित पवार म्हणाले.विधिमंडळाच्या हिवाळी अधिवेशनाच्या दुसऱ्या दिवशीच्या सुरुवातीलाही विरोधकांकडून पायऱ्यांवर आंदोलन केले जात होती. ते सरकारविरोधात घोषणाबाजी करत होते. यावेळी आमदार नितेश राणे यांनी आमदार आदित्य ठाकरे येताच म्याव-म्याव असा अवाज काढला होता.या प्रकरणावरुन आज उपमुख्यमंत्री अजित पवारांनी यावरुन आमदारांचे कान टोचले आहे.

विधिमंडळात सदस्यांनी संसदीय राजशिष्टाचार व आचारसंहितेचे पालन करावे, यासाठी आज विधिमंडळात सर्वपक्षीय नेत्यांची बैठक आयोजित करण्यात आली होती. या बैठकीनंतर राज्याचे उपमुख्यमंत्री अजितदादा पवार यांनी विधानसभेत याविषयी सविस्तर भूमिका मांडली. सभागृहाचे कामकाज सुरळित चालण्यासाठी विधिमंडळातील सर्वच पक्षाच्या आमदारांनी नियमांचे पालन केले पाहीजे, अशा शब्दात अजितदादांनी सदस्यांचे कान टोचले.विधिमंडळ सर्वोच्च असून इतक्या वर्षांच्या सभागृहाच्या प्रदीर्घ वाटचालीत विधिमंडळ सभागृहाने उच्च मूल्ये प्रस्थापित केली आहेत. त्यामुळे प्रत्येक आमदाराने आदर्श आचारसंहितेचे पालन करत जबाबदारीने वागले पाहीजे. विधानसभेत आमदार निवडून आल्यानंतर तो सार्वजनिक जीवनात कसा वागतो? सभागृहात कसे वर्तन करतो? यावरुन त्याची प्रतिमा ठरत असते. पण काही सदस्यांच्या चुकीच्या वर्तणुकीमुळे सभागृहाच्या प्रतिमेला तडा गेला आहे‌. आता सर्वांनीच याचा अंतर्मुख होऊन विचार केला पाहीजे, असे मत अजितदादांनी व्यक्त केले.अजितदादा पुढे म्हणाले की, “सुरूवातीच्या काळात आम्ही निवडून आलो तेव्हा विधिमंडळ कामकाजाचे थेट प्रक्षेपण होत नव्हते. आता दोन्ही सभागृहांचे कामकाज लाईव्ह होते. राज्य आणि माध्यमे आपल्याकडे पाहात आहेत. त्यामुळे प्रत्येकाने संसदीय शिष्टाचारांचे पालन करणे आवश्यक आहे. आमदारांना दोन-दोन लाख मतदार मतदान करुन विधानसभेत पाठवत असतात. त्यांचे प्रतिनिधीत्व आमदाराने करायचे असते. कुत्रे, मांजर, कोंबड्या या प्राण्यांचे प्रतिनिधीत्व आपण करत नाही, हे सर्वांनी ध्यानात ठेवावे.”आगामी‌ काळात आमदारांनी सभागृहात तारतम्य ठेवून बोलावे. सभागृहाची शान आणि मान राखण्याची जबाबदारी प्रत्येक सदस्याची असे आवाहन अजितदादांनी केले.