पुणे-माजी गृहराज्यमंत्री आणि काँग्रेसचे शहराध्यक्ष,पुणे रमेश बागवे (Pune Congress President Ramesh Bagwe) यांच्या कारचा दरवाजा बनावट चावीने उघडून त्यातील एक लाख रुपयांचे रिव्हॉल्व्हर अज्ञात चोरट्याने (Revolver Theft) चोरुन (Pune Crime) नेले.यामुळे राजकीय वर्तुळात प्रचंड खळबळ उडाली आहे.पुणे कॅणटोंमेंट विधानसभा मतदार संघाचे बागवे हे माजी आमदार आहेत . अगदी थोड्या मतांनी गेल्या निवडणुकीत त्यांचा पराभव झाला मात्र या मतदार संघासह पुण्यात कॉंग्रेसचे नेते आणि महाराष्ट्रातही मातंग समाजाचे वरिष्ठ नेते म्हणून ते परिचित आहेत .

याप्रकरणी रमेश बागवे (Ramesh Bagwe) यांनी खडक पोलीस (Khadak Police Station) ठाण्यात फिर्याद दिली आहे. लोहियानगर, गंज पेठ (Lohiyanagar, Ganj Peth) ते भवानी पेठेतील (Bhawani Peth) अरुणकुमार वैदय स्टेडियम (Arunkumar Vaidya Stadium Pune) दरम्यान हा चोरीचा प्रकार घडला आहे. नेमका चोरीचा हा प्रकार कसा घडला, याबाबत बागवे यांना समजू शकलेले नाही. त्यांनी आपले रिव्हॉल्व्हर (Revolver) कारमधील ड्रायव्हर सीटचे शेजारील सीटच्या मागील कप्प्यामध्ये ठेवले होते. चोरट्याने बागवे यांच्या कारची बनावट चावी तयार करुन किंवा कारचा दरवाजा उघडून कारमधील सीटमागील कप्प्यात ठेवलेले 1 लाख रुपयांचे रिव्हॉल्व्हर चोरुन (Pune Crime) नेले. खडक पोलीस अधिक तपास करीत आहेत.

माजी गृह राज्यमंत्री बागवे यांच्या कारमधून रिव्हॉल्व्हर चोरीला गेल्यामुळे प्रचंड खळबळ उडाली आहे.याबाबत पोलिस दप्तरी नोंद करण्यात आली असून पोलिस प्रकरणाचा तपास करत आहेत.

इस्तांबुल (टर्की) येथील आशियाई पॉवरलिफ्टिंग स्पर्धा ः महिलांच्या ५७ किलो गटात (खुल्या) कामगिरी 

पुणे : इस्तांबुल (टर्की) येथे सुरू असलेल्या आशियाई पॉवरलिफ्टिंग स्पर्धेत पुण्याच्या डॉ. शर्वरी इनामदार यांनी चार सुवर्णपदक पटकाविले. ३८ वर्षीय डॉ. शर्वरी यांनी महिलांच्या ५७ किलो गटात (खुल्या) कजाकिस्तान वर मात करत ही कामगिरी केली. त्यांनी स्क्वॅटमध्ये १३० किलो वजन उलचून अव्वल क्रमांक पटकावला. यानंतर बेंच प्रेसमध्ये ७० किलो वजन उचलून बाजी मारली. डेडलिफ्टमध्ये १५० किलो आणि एकूण ३५० किलोसह सुवर्णयश मिळवले.
यापूर्वी गोव्यातील मडगाव येथील श्री मनोहर पर्रिकर इन्डोअर स्टेडियममध्ये झालेल्या राष्ट्रीय स्पर्धेत त्यांनी ५७ किलो गटात ब्रेंच प्रेसमध्ये ७० किलो उचलून सुवर्णपदक पटकाविले होते. या स्पर्धेतूनच त्यांची आशियाई स्पर्धेसाठी निवड झाली होती. डॉ. इनामदार या त्यांचे पती वैभव इनामदार यांच्या सोबत सराव करतात. तसेच आहार आणि व्यायाम कसा असावा याची तयारी त्या स्वतःच करतात.
डॉ. शर्वरी इनामदार म्हणाल्या, ‘आशियाई स्पर्धेसाठी भरपूर मेहनत केली होती. मागील तीन वर्षे कसून सराव केल्यानंतर मिळालेल्या मेहनतीचे हे फळ आहे. सामान्य महिला देखील आपल्या व्यवसाय आणि घर सांभाळून आवडत्या क्षेत्रात यशाची शिखरे पादाक्रांत करू शकतात. त्यामुळे महिलांनी मर्यादित न राहता स्वतःच्या क्षमता जाणून घेऊन पुढे यावे.’
वैद्यकीय व्यवसायात नावलौकिक मिळवणाऱ्या डॉ. शर्वरी इनामदार यांनी पॉवरलिफ्टिंगमध्ये देखील स्वतःचे वेगळे स्थान निर्माण केले आहे. कुटुंबातील दैनंदिन कामे, रुग्णांची देखभाल अशा रोजच्या धावपळीच्या जीवनातून वेळ काढून त्यांनी सलग चार वेळा ‘स्ट्राँग वूमन’ हा किताब जिंकला आहे. अनेक राज्यस्तरीय स्पर्धांमध्ये त्यांनी सुवर्णपदक मिळविले आहे. शिवाय २०१८मध्ये झालेल्या राष्ट्रीय स्पर्धेत त्यांनी रौप्यपदक जिंकले आहे.

पुणे-भडकाऊ आणि चिथावणीखोर भाषणे केल्याप्रकरणी तथाकथित कालिचरण महाराज आणि भाजपाचे माजी नगरसेवक आणि समस्त हिंदू आघाडीचे कार्याध्यक्ष मिलिंद एकबोटे यांच्यासह सहा जणांवर खडक पोलिस ठाण्यात गुन्हा दाखल झाला.मिलिंद रमाकांत एकबोटे, मोहनराव शेटे, दीपक बाबूलाल नागपुरे, कालिचरण (रा. अकोला), कॅप्टन दिगेंद्रकुमार (रा. राजस्थान), नंदकिशोर रमाकांत एकबोटे यांच्यावर गुन्हा दाखल झाला. खडक पोलिस ठाण्याचे पोलिस शिपाई सोमनाथ दादा ढगे यांनी याबाबत फिर्याद दिली. १९ डिसेंबर रोजी शुक्रवार पेठेतील नातूबाग मैदानात हा कार्यक्रम आयोजित केला होता. समस्त हिंदू आघाडी संघटनेतर्फे शिवप्रतापदिन आयोजित केला होता. या कार्यक्रमासाठी हजर राहून आरोपींनी मुस्लीम व ख्रिश्चन धर्माच्या नागरिकांच्या भावना दुखावल्या जातील. तसेच, धार्मिक श्रद्धांचा अपमान व हावभाव करून दोन समाजामध्ये जातीय तेढ निर्माण होईल, असे भडकाऊ आणि चिथावणीखोर भाषणे केली.
सूत्रसंचालन करताना नंदकिशोर एकबोटे यांनी इतरांच्या भाषणांचा त्यांच्या बोलण्यात पुन्हा थोडक्यात उल्लेख करून तेथे जमलेल्या लोकांमध्ये जातीय तेढ निर्माण करण्यासाठी प्रोत्साहन दिले. आरोपींनी केलेल्या भाषणाच्या क्लिपची पडताळणी केल्यानंतर हा गुन्हा दाखल झाला. खडक पोलिस ठाण्याचे पोलिस निरीक्षक हर्षवर्धन गाडे या गुन्ह्याचा तपास करीत आहेत.

पुणे, दि.२९:- राज्यपाल भगत सिंह कोश्यारी यांनी खडकी येथील दिव्यांग सैनिकांच्या क्विन मेरी टेक्निकल इन्स्टिट्यूटला भेट देवून माहिती जाणून घेतली.

यावेळी लेफ्टनंट जनरल अरविंद वालिया, मेजर जनरल इंद्रजीत सिंग, मुख्य कार्यकारी अधिकारी राहूल बाली आदी उपस्थित होते.

राज्यपाल श्री.कोश्यारी यांनी येथील दिव्यांग सैनिकांशी संवाद साधला. हिंमत हारू नका, खचू नका, मेहनत करा, निराश होऊ नका. आपले मनोबल उच्च असून स्पर्धा परीक्षांची चांगली तयारी करा. आपल्यांपैकी काहींनी खेळांमध्ये आंतरराष्ट्रीय, राष्ट्रीय स्तरावर उत्कृष्ट कामगिरी बजावली असून समाजापुढे आदर्श आहात. आपल्यातील कौशल्यांना वाव द्या, असे आवाहन करत त्यांनी सैनिकांचे कौतुक केले.

पुणे-मध्यवर्ती पेठांतील महत्त्वाचे रस्ते आधी दिलेल्या मुदतीत म्हणजेच २० जानेवारीपर्यंत पूर्ववत होतील आणि पुढील तीन वर्षे ते सुस्थितीत राहून कोणत्याही प्रकारची खोदाई करावी लागणार नाही अशी ग्वाही म्हणजेच गॅॅरंटी स्थायी समितीचे अध्यक्ष नगरसेवक हेमंत रासने यांनी दिली.

सदाशिव पेठ-शनिवार पेठ या प्रभागाला एक एकक मानून विविध प्रकारची विकासकामे खात्यांतर्गत समन्वयातून पूर्ण करण्यासाठी आयुक्त विक्रम कुमार यांच्या समवेत १३ नोव्हेंबरला या भागातील समस्या आणि विकासकामांची माहिती घेण्यासाठी दौरा आयोजित केला होता. प्रभागातील समस्या लक्षात घेऊन प्रभागाचा विकासाचा आराखडा तयार करण्यात आला. त्यानुसार विकासकामांचा आढावा घेण्यासाठी बैठक आयोजित करण्यात आली होती.

अतिरिक्त आयुक्त डॉ. कुणाल खेमणार, पथ विभागाचे प्रमुख व्ही. जी. कुलकर्णी, अधिक्षक अभियंता संतोष तांदळे, पाणीपुरवठा विभागाचे नंदकिशोर जगताप, क्षेत्रिय अधिकारी आशिष महादलकर, पथ विभागाचे देडगे, पाटील, अर्धापुरे, ड्रेनेज विभागाचे फड, उमेश गोडगे, गांगुर्डे यांच्या सह स्मार्टसिटी विभागाचे अधिकारी यावेळी उपस्थित होते. बैठकी नंतर रासने पत्रकारांशी बोलत होते.

मध्यवर्ती पेठांच्या भागात मुख्य बाजारपेठ असल्याने, तेथे दररोज मोठ्या प्रमाणात रहदारी असते. त्यामुळे गेली पंचेचाळीस वर्षे या भागातील पाणीपुरवठा आणि मैलापाण्याचे वहन करणार्या वाहिन्या बदलताना मर्यादा येत होत्या. कोविडमुळे निर्माण झालेल्या टाळेबंदीत अत्यावश्यक सेवा वगळता सर्वच बाजारपेठ बंद होती. त्या काळात समान पाणीपुरवठा, मैलापाणी वहन, एमएनजीएल पुरवठा, इंटरनेट कंपन्या यांच्या वाहिन्या आणि केबल्स टाकण्याची विकासकामे तातडीने पूर्ण करण्यात आली. त्यामुळे या भागात मोठ्या प्रमाणात खोदाई करावी लागल्याने रस्त्यांची दुरावस्था झाली होती. या पूर्वी निकृष्ट कामांमुळे रस्त्यांची दुरावस्था होत होती. आता सर्व प्रमुख रस्ते पूर्ववत करण्यासाठी नियोजनबद्ध काम सुरू आहे.

रासने पुढे म्हणाले, विविध विकासकामांसाठी रस्ते खोदाईची बहुसंख्य कामे पूर्ण करण्यात आली आहेत. स्मार्ट सिटी अंतर्गत वाहतूक नियंत्रण व्यवस्थेची (ट्रॅफिक सिग्नल) या परिसरातील २४ कामे नव्याने सुरू झाली आहेत. ती १० जानेवारी पर्यंत पूर्ण होतील. त्यानंतर दहा दिवसांत रस्ते पूर्ववत होतील. पुढील काळात रस्त्यांवर वाहतुक सुरळीत होण्यासाठी आवश्यक उपाययोजना आणि सुशोभीकरण करण्यात येणार आहे. त्या साठी आवश्यक निधीची तरतुद करण्यात आली आहे.

रासने म्हणाले, महात्मा फुले मंडईसमोरील मेट्रोचे काम, दक्षिणमुखी मारूती मंदिर चौकातील रस्त्याची कामे, शनिवारवाड्याच्या पिछाडीचा भाग, शुक्रवार पेठ, सुभाष नगर, बाजीराव रस्ता परिसरातील समान पाणीपुरवठा योजनेसंदर्भातील विकासकामे, हिराबाग चौकातील वर्षानुवर्षे पडलेली बेवारस वाहने उचलणे आदी कामे पूर्ण करण्यात आली आहेत. सदाशिव पेठ, शिवाजी रस्ता, बाजीराव रस्ता, लक्ष्मी रस्ता, केळकर रस्ता, टिळक रस्ता परिसरातील रस्ता डांबरीकरणाची कामे टप्प्‌याटप्प्याने हाती घेण्यात आली असून, ती २० जानेवारीपर्यंत पूर्ण होतील.

हिराबाग चौक ते स्वारगेट ठरणार अपवाद

रासने म्हणाले, हिराबाग चौक ते स्वारगेट या रस्त्यावर समान पाणीपुरवठा योजने अंतर्गत कामे सुरू आहेत. ही कामे पूर्ण करण्यासाठी ३० जानेवारी पर्यंतची मुदत खात्याने मागितली. त्यामुळे टिळक रस्त्यावरील हिराबाग ते स्वारगेट हा अपवाद वगळता सर्व विकासकामे २० जानेवारी पर्यंत पूर्ण होतील.

२६ जानेवारीला पादचारी दिन-येत्या प्रजासत्ताकदिनी म्हणजेच २६ जानेवारीला पादचारी दिन साजरा केला जाणार आहे. या वेळेला लक्ष्मी रस्ता समाधान चौक, उंबऱ्या मारुती चौक, टिळक पुतळा, महात्मा फुले मंडई, तुळशीबाग, शनिपार, नगरकर तालीम असा पादचारी मार्गाचा विस्तार करण्यात आला आहे, असेही रासने यांनी सांगितले.

पुणे, दि. २९ डिसेंबर २०२१ : महावितरणच्या पद्मावती विभाग अंतर्गत पद्मावती उपकेंद्रातील १० एमव्हीए क्षमतेचे मोठे पॉवर ट्रॉन्सफॉर्मर बदलण्याचे पूर्वनियोजित काम करण्यात येणार असल्याने गुरुवारी (दि. ३०) सकाळी ९ ते सायंकाळी ६ वाजेपर्यंत पद्मावती, गंगाधाम, बिबवेवाडी, मार्केटयार्ड परिसरात पर्यायी व्यवस्थेतून वीजपुरवठा करण्यात येणार आहे. मात्र पर्यायी व्यवस्थेच्या वीजपुरवठ्यात काही तांत्रिक बिघाड झाल्यास या भागातील वीजपुरवठा खंडित राहण्याची शक्यता आहे.

      महावितरणच्या पद्मावती उपकेंद्रातील १० एमव्हीए क्षमतेचा पॉवर ट्रॉन्सफॉर्मर नादुरुस्त झाल्यामुळे तो बदलणे अत्यावश्यक झाले आहे. नवीन पॉवर ट्रॉन्सफॉर्मर उपलब्ध झाला असून तो बसविण्याचे पूर्वनियोजित काम गुरुवारी (दि. ३०) सकाळी ९ ते सायंकाळी ६ वाजेपर्यंत करण्यात येणार आहे. त्यासाठी या उपकेंद्रातील २२ केव्ही उच्चदाबाच्या तीन वीजवाहिन्यांना पर्यायी व्यवस्थेतून वीजपुरवठा करण्यात येणार आहे. हा पर्यायी वीजपुरवठा दुरुस्ती कामाच्या कालावधीत सुरळीत राहण्यासाठी महावितरणकडून सर्व उपाययोजना करण्यात आल्या आहेत. परंतु तांत्रिक कारणास्तव त्यात बिघाड झाल्यास मात्र त्यानंतर सायंकाळी ६ वाजेपर्यंत बिबवेवाडी ते गंगाधाम एम्पोरियम, आदिनाथ सोसायटी ते महावीर सोसायटी, कुमार सिद्धांचल, मार्केटयार्ड, महर्षीनगर, वसंतबाग सोसायटी, अटल सोसायटी, सिटी प्राईड परिसरात वीजपुरवठा बंद राहण्याची शक्यता आहे. प्रत्यक्षात असा प्रसंग उद्भवल्यास वीजपुरवठा बंदच्या कालावधीत ग्राहकांनी सहकार्य करावे अशी विनंती महावितरणकडून करण्यात आली आहे.

मुरलीधर मोहोळ, सुनीता वाडेकर, परशुराम वाडेकर यांचा जाहीर सत्कार

पुणे : “समाजातील कित्येक समस्या सोडवून डॉ. बाबासाहेब आंबेडकर सामान्य लोकांची ताकद बनले. आयुष्यात येणाऱ्या अडचणीवर मात करण्याचा प्रेरणादायी विचार त्यांनी समाजाला दिला. त्यामुळे डॉ. आंबेडकर एका विशिष्ट जातीपुर्ते मर्यादित न राहता, ‘डॉ. बाबासाहेब आंबेडकर सर्वांचे’ आहेत, हा विचार समाजात रुजवण्याची जबाबदारी आपण पार पाडली पाहिजे,” असे माजी सामाजिक न्याय राज्यमंत्री अविनाश महातेकर यांनी व्यक्त केले.

संंविधान सन्मान समिती, आंबेडकरी पक्ष-संघटना व कार्यकर्त्यांच्या वतीने पुणे महानगरपालिकेच्या आवारात छत्रपती शिवाजी महाराज यांच्या पुतळ्याचे भुमिपुजन तसेच प्रवेशद्वारावर भारतरत्न डॉ बाबासाहेब आंबेडकर यांचा पुतळा बसविण्यात पुढाकार घेऊन त्याची पुर्तता करणारे पुण्याचे महापौर मुरलीधर मोहोळ, उपमहापौर सुनिता वाडेकर, डॉ बाबासाहेब आंबेडकर सांस्कृतिक महोत्सव समितीचे अध्यक्ष परशुराम वाडेकर यांच्या जाहीर सत्कार करण्यात आला. 
महापालिकेच्या छत्रपती शिवाजी महाराज सभागृहात झालेल्या समारंभाच्या अध्यक्षस्थानी सिंबायोसिसचे संस्थापक अध्यक्ष डॉ. शां. ब. मुजुमदार होते. यावेळी ‘रिपाइं’चे शहराध्यक्ष शैलेंद्र चव्हाण, माजी उपमहापौर डॉ. सिद्धार्थ धेंडे, रिपब्लिकन पार्टी ऑफ इंडियाचे प्रदेश सचिव बाळासाहेब जानराव, सभागृह नेते गणेश बीडकर, सावित्रीबाई फुले पुणे विद्यापीठातील प्राध्यापक डॉ. विजय खरे, नगरसेविका फरझाना शेख, आंबेडकरी नेते राहुल डंबाळे, ‘रिपाइं’चे ऍड. मंदार जोशी, महिला नेत्या संगीता आठवले, शशिकला वाघमारे आदी उपस्थित होते.

अविनाश महातेकर म्हणाले, “अस्पृश्यतेच्या जोखडातून समाजाला बाहेर काढत समाज घडवण्यासाठी बाबासाहेबांचे महत्त्वपूर्ण योगदान आहे. बाबासाहेबांनी देशाला राज्यघटना दिल्यानंतर ही त्यांचे नेतृत्व स्विकारण्यास विलंब झाला. अनेक अरिष्ठ परंपरा विरोधात बाबासाहेब अविरत लढले. समाजातील सामान्य घटकांना न्याय मिळवून देण्याची त्यांची प्रमाणिक भुमिका होती. जागतिक पातळीवर सर्वात जास्त आंबेडकर यांची स्मारके उभारण्यात आली आहेत. मात्र आता पुढच्या पिढीमध्ये त्यांचे विचार पेरणे ही तितकेच गरजेचे आहे.”

डॉ. शां. ब. मुजुमदार म्हणाले, “भारत देश स्वातंत्र्याचा अमृत महोत्सव साजरा करीत असताना पुणे महानगरपालिकेच्या प्रवेशद्वारावर आंबेडकरांचा पुतळा उभारणे हा ऐतिहासिक क्षण आहे. समाजात आंबेडकरी पुतळ्यांना विरोध का होतो, हेच कळत नाही. सिम्बायोसिसजवळ उभारलेल्या आंबेडकर स्मारकावेळी आम्हालाही प्रचंड त्रास सहन करावा लागला. आंबेडकर फक्त महामानव न राहता ते विश्वमानव कसे होतील, याचा विचार आपण केला पाहिजे. समाजातील अज्ञान, दारिद्र्य नष्ट करण्यासाठी शिक्षण हाच उपाय आहे.”

परशुराम वाडेकर म्हणाले, “लहानांपासून डॉ. बाबासाहेब आंबेडकरांच्या विचारांवर प्रेम करत आलो आहे. आंबेडकरांबद्दल कृतज्ञता म्हणून सर्वांच्या साथीने ५० वर्षानंतर का होईना महानगरपालिकेत बाबासाहेबांचा पुतळा बसला, याचा आनंद आहे. छत्रपती शिवाजी महाराज, महात्मा जोतीबा फुले आणि डॉ. आंबेडकर या महापुरुषांचे पुतळे असणारी ही एकमेव पालिका असणार आहे. ज्या पालिकेने बाबासाहेबांना मानपत्र देण्यास नकार दिला, त्याच पालिकेत बाबासाहेबांचा पुतळा बसविण्यात आला आणि ही ऐतिहासिक घटना आमच्या हातून घडली, याचा आनंद आहे.”
राहुल डंबाळे यांनी स्वागत प्रास्ताविक केले. बाळासाहेब जानराव, डॉ. विजय खरे, गणेश बिडकर यांनीही मनोगते व्यक्त केली. सुत्रसंचालन दिपक मस्के यांनी केले. आभार शैलेंद्र चव्हाण यांनी मानले.