मुंबई, दि 4 :  राज्य उत्पादन शुल्क विभागाच्या भरारी पथकाने आज वरळी-मुंबई या ठिकाणी विदेशी मद्याविरोधात कारवाई करून आरोपीस अटक केली. या प्रकरणात विदेशी मद्य पुरवणाऱ्या मुख्य सूत्रधारास अटक करण्यात आली असून फरारी आरोपींचा तपास सुरू आहे.

या गुन्ह्यात विदेशी मद्य (स्कॉच), एक मोबाईल, स्मार्ट वॉच, एक बॅग, एक दुचाकी सुझुकी बर्गमॅन स्ट्रीट असे एकूण ४ लाख ६२ हजार ६०० रुपयांचे साहित्य जप्त करण्यात आले आहे. या गुन्ह्यात  शेहजाद हसनेन कुरेशी आणि मोहम्मद दानिश मुश्ताक अहमद खान या दोन आरोपींना अटक करण्यात आली आहे.

ही कारवाई राज्य उत्पादन शुल्क, मुंबई आयुक्त कांतीलाल उमाप, राज्य उत्पादन शुल्क, ठाणेचे विभागीय उप-आयुक्त,  सुनिल चव्हाण, अंमलबजावणी व दक्षता संचालक श्रीमती उषा वर्मा  तसेच मुंबई शहर अधीक्षक  सी.बी. राजपूत, उप अधीक्षक श्री.पोकळे  यांचे मार्गदर्शनाखाली करण्यात आली.

गी कारवाई निरीक्षक प्रसाद सास्तुरकर, निरीक्षक ओ.एच.घरत, निरीक्षक, दुय्यम निरीक्षक डी.बी.भदरगे, दुय्यम निरीक्षक आर. जी. जाधव, जवान सर्वश्री. शेलार, मोरे, कुंभार, तडवी, यांनी यशस्वीरित्या पार पाडली.  गुन्ह्याचा पुढील तपास दुय्यम निरीक्षक डी. बी. भदरगे हे करीत असल्याची माहिती राज्य उत्पादन शुल्क, भरारी पथक क्र. 1, मुंबई यांनी एका प्रसिद्धीपत्राद्वारे दिली आहे.

परीक्षा केंद्रांवर पोहोचण्यासाठी उमेदवार/परीक्षा कर्मचाऱ्यांचा सुरळीत प्रवास सुनिश्चित करण्याची केंद्रीय लोकसेवा आयोगाची राज्य सरकारांना विनंती

नवी दिल्‍ली, 5 जानेवारी 2022

कोविड-19 महामारीमुळे निर्माण झालेल्या परिस्थितीचा काळजीपूर्वक आढावा घेतल्यानंतर, नागरी सेवा  (मुख्य) परीक्षा, 2021 नियोजित वेळापत्रकानुसारच म्हणजेच  7, 8, 9, 15 आणि 16 जानेवारी 2022 रोजी  आयोजित करण्याचा निर्णय केंद्रीय लोकसेवा आयोगाने घेतला आहे.

आजाराचा  प्रादुर्भाव रोखण्यासाठी सरकारकडून लागू  निर्बंध/प्रतिबंध  लक्षात घेऊन ,उमेदवार/परीक्षा कर्मचार्‍यांना परीक्षा केंद्रापर्यंत पोहोचण्यासाठी विशेषत: जे प्रतिबंधक  / सूक्ष्म प्रतिबंधक क्षेत्रामधून येतात त्यांची  प्रवासात कोणतीही गैरसोय होणार नाही ,आणि आवश्यक असल्यास, उमेदवारांचे ई-प्रवेशपत्र आणि परीक्षा कर्मचाऱ्यांची  ओळखपत्रे  प्रवासासाठी पास म्हणून वापरली जातील,हे सुनिश्चित करण्याची विनंती आयोगाने राज्य सरकारांना केली आहे.

उमेदवार/परीक्षा कर्मचाऱ्यांचा सुरळीत  प्रवास  सुनिश्चित करण्याच्या दृष्टीने, परीक्षेच्या एक दिवस आधीपासून ते परीक्षा आयोजित केल्याच्या शेवटच्या तारखेपर्यंत म्हणजेच 06.01.2022 ते 09.01.2022 आणि 14.01.2022 ते 16.01.2022 पर्यंत सार्वजनिक वाहतूक पुरेशा स्तरावर  कार्यान्वित करावी अशी विनंती राज्य सरकारांना करण्यात आली आहे.

महामारीच्या  काळात परीक्षा आयोजित करण्यासाठी, सर्व सक्षम जिल्हाधिकारी आणि परिक्षा केंद्र  पर्यवेक्षकांना  आयोगाची मार्गदर्शक तत्त्वे प्रदान करण्यात आली आहेत.उमेदवार/परीक्षा कर्मचार्‍यांची वैयक्तिक स्वच्छता, सामाजिक अंतर राखणे आणि उमेदवार/परीक्षा कर्मचाऱ्यांनी पूर्ण वेळ मास्क परिधान करणे, परीक्षा स्थळी सोयीच्या ठिकाणी सॅनिटायझरची व्यवस्था करणे आणि परीक्षा कर्मचाऱ्यांनी, उमेदवारांनी स्वतःचे सॅनिटायझर पारदर्शक बाटल्यांमध्ये घेऊन जावे, प्रत्येक परीक्षा केंद्राची नियमितपणे स्वच्छता करणे, खोकला, शिंका येत असलेल्या, श्वास घेण्यास त्रास होणाऱ्या, ताप येत असलेल्या उमेदवारांना बसण्यासाठी दोन अतिरिक्त परीक्षा खोल्या असाव्यात जेणेकरून ते योग्य सुरक्षा नियम इत्यादीनुसार परीक्षा देऊ शकतील.या सगळ्या गोष्टींचा प्रामुख्याने या मार्गदर्शक तत्त्वांमध्ये  समावेश आहे.

पंतप्रधान नरेंद्र मोदी यांच्या पंजाब दौऱ्यादरम्यान सुरक्षा व्यवस्थेत गंभीर त्रुटी

नवी दिल्‍ली, 5 जानेवारी 2022

पंतप्रधान नरेंद्र मोदी आज सकाळी भटिंडा इथे पोहचले आणि त्यानंतर ते हुसैनीवाला इथे असलेल्या राष्ट्रीय शहीद स्मारकस्थळी हेलिकॉप्टरने जाणार होते. मात्र पाऊस आणि खराब दृश्यमानतेमुळे नियोजित वेळी हेलिकॉप्टरचे उड्डाण झाले नाही.आकाश निरभ्र होण्यासाठी  सुमारे 20 मिनिटे पंतप्रधानांनी  वाट पाहिली. 

मात्र, त्यानंतरही आकाश स्वच्छ झाले नाही, त्यामुळे पंतप्रधान राष्ट्रीय शहीद स्मारकापर्यंत रस्त्याने जातील, असा निर्णय घेण्यात आला. मात्र, त्यासाठी दोन तासांपेक्षा अधिक वेळ लागणार होता. पंजाब पोलीस महासंचालकांकडून आवश्यक त्या सुरक्षा व्यवस्था करण्यात आल्याचा संदेश आल्यानंतर पंतप्रधान रस्त्याने या प्रवासाला निघाले.

पंतप्रधान हुसैनीवाला इथल्या राष्ट्रीय शहीद स्मारकापासून  साधारण 30 किलोमीटर दूर अंतरावर असतांना, ज्यावेळी त्यांचा ताफा एका उड्डाणपूलावर पोहोचला, त्यावेळी असे लक्षात आले की तो रस्ता काही आंदोलकांनी अडवून धरला होता.

पंतप्रधान या उड्डाणपूलावर 15 ते 20 मिनिटे अडकून पडले होते. पंतप्रधानांच्या सुरक्षा व्यवस्थेत झालेली ही मोठी त्रुटी होती.

पंतप्रधानांचा कार्यक्रम आणि दौऱ्याचे नियोजित वेळापत्रक पंजाब सरकारला आधीच कळवण्यात आले होते. सामान्य प्रक्रियेनुसार, पंजाब सरकारने पंतप्रधानांच्या दौऱ्यासाठीची आवश्यक तयारी आणि सुरक्षा व्यवस्था तसेच आकस्मिक अडचणी आल्यास पर्यायी व्यवस्था तयार ठेवणे अपेक्षित होते. तसेच, नियोजित कार्यक्रमात अकस्मात झालेल्या बदलांच्या पार्श्वभूमीवर, रस्त्यावरची वाहतूक सुरक्षित ठेवण्यासाठी, अतिरिक्त सुरक्षा व्यवस्था तैनात करणे अपेक्षित होते. मात्र, तशी व्यवस्था तैनात करण्यात आलेली नव्हती, हे स्पष्टपणे आढळले.

सुरक्षा व्यवस्थेतील ही गंभीर त्रुटी लक्षात घेता, पंतप्रधानांचा ताफा पुन्हा भटिंडा विमानतळावर परत नेण्याचा निर्णय घेण्यात आला.

पंतप्रधानांच्या सुरक्षा व्यवस्थेत झालेल्या या गंभीर त्रुटीची दखल गृहमंत्रालयाने घेतली असून, राज्य सरकारकडून त्याचा सविस्तर अहवाल मागवला आहे. पंजाब सरकारनेही या गंभीर चुकीसाठीची जबाबदारी निश्चित करुन, दोषींवर कठोर कारवाई करावी अशी सूचना देण्यात आली आहे.

नवी दिल्‍ली, 5 जानेवारी 2022

केंद्रीय निवृत्तीवेतन आणि निवृत्त कर्मचारी कल्याण विभागाने 16 जून 2021 रोजी जारी केलेल्या आदेशानुसार, जर एखाद्या सेवानिवृत्त सरकारी कर्मचाऱ्याविरोधात, हत्या किंवा आत्महत्येसाठी प्रवृत्त केल्याचा गुन्हा नोंदवला गेला असेल, तर  त्या कर्मचाऱ्याच्या कुटुंबातील इतर पात्र व्यक्तीला निवृत्तीवेतन लागू करण्याचा निर्णय घेण्यात आला आहे.

केंद्रीय संरक्षण मंत्रालयाच्या माजी सैनिक कल्याण विभागाने आज, म्हणजेच पाच जानेवारी रोजी, आदेश जारी करुन निवृत्तीवेतन आणि निवृत्त कर्मचारी कल्याण विभागाने जारी केलेल्या निर्देशाचा मूळ गाभा तसाच ठेवून, त्यात गरजेनुसार बदल केले आहेत आणि लष्करी दलातील निवृत्तीवेतन धारकांनाही हा आदेश लागू केला आहे.ही सुविधा 16 जून 2021 पासून, पूर्वलक्षी प्रभावाने लागू करण्यात आली आहे.

मुंबई, दि. ५- स्वराज्यरक्षक छत्रपती संभाजी महाराजांच्या मातोश्री महाराणी सईबाई यांची राजगडाच्या पायथ्याशी समाधी असून या समाधी परिसराचा विकास करण्यासाठी जिल्हाधिकाऱ्यांनी विविध विभागांच्या वरिष्ठ अधिकाऱ्यांसह या परिसराची पाहणी करावी आणि त्याचा सर्वंकष आराखडा तयार करण्याचे निर्देश विधानपरिषदेचे सभापती रामराजे नाईक- निंबाळकर यांनी आज दिले. या समाधी परिसराच्या विकासासाठी आवश्यक तो निधी उपलब्ध करुन देण्यात येईल, अशी ग्वाही उपमुख्यमंत्री तथा वित्तमंत्री अजित पवार यांनी यावेळी दिली.

छत्रपती संभाजी महाराजांच्या मातोश्री महाराणी सईबाई यांची राजगडाच्या पायथ्याशी सअसलेल्या समाधी स्थळाचा विकास करण्यासाठी विधानपरिषद सभापती रामराजे नाईक-निंबाळकर यांच्या अध्यक्षतेखाली आज विधानभवनात बैठक आयोजित करण्यात आली होती. उपमुख्यमंत्री अजित पवार, सहकारमंत्री बाळासाहेब पाटील, आमदार संग्राम थोपटे, सांस्कृतिक कार्य विभागाचे सचिव सौरभ विजय यांच्यासह महसूल विभागाचे वरिष्ठ अधिकारी उपस्थित होते.

महाराष्ट्राला गड-किल्ल्यांचा फार मोठा इतिहास लाभला असून हे गडकिल्ले दुर्लक्षित होऊ नयेत त्यासाठी त्यांचे संवर्धन करण्याचा निर्णय मुख्यमंत्री उद्धव ठाकरे यांनी घेतला आहे. राजगडाच्या पायथ्याशी असलेल्या महाराणी सईबाई यांच्या समाधीस्थळ परिसराच्या विकासाचा कार्यक्रम हाती घेण्याची आवश्यकता असल्याचे सभापती श्री. रामराजे नाईक-निंबाळकर यांनी सांगितले. या समाधीस्थळ व परिसराच्या विकासाचा आराखडा तयार करण्यासाठी पुणे जिल्हाधिकाऱ्यांसह जलसंपदा, भूमी अभिलेख, पर्यटन विभागाच्या अधिकाऱ्यांनी या परिसराला भेट देऊन पाहणी करुन अहवाल सादर करण्याचेही निर्देश सभापतींनी यावेळी दिले.

समाधीस्थळ व परिसराच्या विकासासाठी निधी देणार- उपमुख्यमंत्री अजित पवार

छत्रपती शिवाजी महाराजांच्या पत्नी तथा छत्रपती संभाजी महाराजांच्या मातोश्री महाराणी छत्रपती सईबाई यांच्या राजगडाच्या पायथ्याशी असलेल्या समाधीस्थळ परिसराचा विकास करण्यासाठी आवश्यक तो निधी मंजूर केला जाईल. महाराष्ट्राचा अभिमान,अस्मिता असलेल्या ऐतिहासिक स्थळांच्या विकासासाठी निधी कमी पडू देणार नाही, अशी ग्वाही उपमुख्यमंत्री अजित पवार यांनी यावेळी दिली. या आराखड्यामध्ये बंधारा आणि त्यावरील घाट विकसित करण्याच्या बाबींचा समावेश करतानाच गुंजवणी नदीच्या उगमाजवळच्या परिसराचे महत्त्व ओळखून त्याचाही समावेश करण्याच्या सूचना उपमुख्यमंत्र्यांनी यावेळी दिल्या. समाधीस्थळ परिसराच्या विकासाचे काम हे दोन टप्प्यात करण्यात येईल, पहिल्या टप्प्यात झालेल्या कामांनंतर पुढील टप्प्यांमधील कामे केली जातील असेही उपमुख्यमंत्री श्री. पवार यांनी सांगितले.

यावेळी राजगडाच्या पायथ्याशी महाराणी सईबाई यांच्या समाधीस्थळ परिसराच्या विकासाच्या अनुषंगाने श्रीमंत छत्रपती महाराणी सईबाई महाराज स्मारक समिती ट्रस्टच्या वतीने तयार करण्यात आलेल्या आराखड्याचे यावेळी सादरीकरण करण्यात आले.

पुणे,5 जानेवारी 2022: अजिंक्य क्रिकेट क्लब यांच्या वतीने आयोजित स्वर्गीय बल्लाळ चिपळूणकर 12 वर्षाखालील क्रिकेट करंडक स्पर्धेत परंदवाल संघाने 2एन् क्रिकेट अकादमी संघाचा तर एम्.एस्.एफ संघाने 30 यार्ड्स ए संघाचा पराभव करत स्पर्धेत आगेकुच केली. 
ए.के स्पोर्ट्स क्लब साळुंबरे येथे सुरू असलेल्या या स्पर्धेत साखळी फेरीत विराज घारेच्या अष्टपैलू कामगिरीच्या जोरावर परंदवाल संघाने 2एन् क्रिकेट अकादमी संघाचा 37 धावांनी पराभव केला. पहिल्यांदा खेळताना परंदवाल संघाने 20 षटकात 3 बाद 152 धावा केल्या. विराज घारेने 52 चेंडूत 9 चौकारांसह नाबाद 67 तर यश सुर्यवंशीने 30 चेंडूत 6 चौकारांसह नाबाद 40 धावा करत संघाचा डाव मजबुत केला. 152 धावांच्या आव्हानाचा पाठलाग करताना आशिष बेडेकर, विराज घारे व सुधांशू कांबळेच्या अचूक गोलंदाजीने 2एन् क्रिकेट अकादमी संघाचा डाव 20 षटकात 8 बाद 115 धावांत रोखत संघाला विजय मिळवून दिला. विराज घारे सामनावीर ठरला.
दुस-या सामन्यात आर्यन भामरेच्या अष्टपैलू कामगिरीच्या बळावर एम्.एस्.एफ संघाने 30 यार्ड्स ए संघाचा 10 धावांनी पराभव केला. पहिल्यांदा खेळताना ओम अगरवालच्या नाबाद 38 तर महेश्वर वाघ व माऊली बडे यांच्या प्रत्येकी 18 धावांसह एम्.एस्.एफ संघाने 20 षटकात 6 बाद 126 धावा केल्या. 126 धावांच्या आव्हानाचा पाठलाग करताना अरूष पासलकर व आर्यन भामरे यांच्या अचूक गोलंदाजीपुढे 30 यार्ड्स ए संघ 20 षटकात 9 बाद 116 धावांत गारद झाला. आर्यन भामरे सामनावीर ठरला. 
स्पर्धेचा सविस्तर निकाल: साखळी फेरी
परंदवाल- 20 षटकात 3 बाद 152 धावा(विराज घारे नाबाद 67(52, 9×4), यश सुर्यवंशी नाबाद 40(30, 6×4), शौनक चांदपुरे 1-17, भावेश चौधरी 1-22) वि.वि 2एन् क्रिकेट अकादमी- 20 षटकात 8 बाद 115 धावा(सुरेखा खराडे 18(31, 1×4), कृष्णा देशमुख 12(11, 1×4), आशिष बेडेकर 3-17, विराज घारे 1-8, सुधांशू कांबळे 1-10) सामनावीर- विराज घारेपरंदवाल संघाने 37 धावांनी सामना जिंकला.
एम्.एस्.एफ- 20 षटकात 6 बाद 126 धावा(ओम अगरवाल नाबाद 38(39, 3×4), महेश्वर वाघ 18(15, 3×4), माऊली बडे 18(15, 3×4), आर्यन भामरे 13(11, 2×4), ओजस अलटेकर 2-28, अर्णव मधुगिरी 2-25) वि.वि 30 यार्ड्स ए- 20 षटकात 9 बाद 116 धावा(दक्ष किरोदीयन 42(41, 4×4, 1×6), विहान बागड 17(18, 2×4), अरूष पासलकर 3-19, आर्यन भामरे 2-16) सामनावीर- आर्यन भामरे एम्.एस्.एफ संघाने 10 धावांनी सामना जिंकला. 

मुंबई, दि. 5 :  यंदाच्या प्रजासत्ताक दिनी  होणाऱ्या संचलनात ‘महाराष्ट्रातील जैवविविधता मानके’ या विषयावर आधारित चित्ररथ सहभागी होणार असल्याची माहिती सांस्कृतिक कार्यमंत्री अमित देशमुख यांनी दिली.

भारत हा देश जैवविविधता संपन्न असून महाराष्ट्रातील चार प्रमुख भागांमध्ये जैवविविधता दिसून येते. वातावरणातील होणाऱ्या बदलांचा विचार करता पर्यावरणाच्या संरक्षणासाठी महाराष्ट्र आघाडीवर आहे. युनेस्कोने मान्यता दिलेल्या सूचीमध्ये महाराष्ट्रातील ‘कास पठार’चा समावेश आहे. तसेच राज्य शासनाने राज्यातील प्राणी, पक्षी तसेच अन्य जीवांसाठी राष्ट्रीय स्तरावर अभयारण्य राज्य शासनाने राखीव ठेवले आहे. अनेक दुर्मिळ वनस्पती तसेच प्राण्यांच्या प्रजाती या महाराष्ट्रात आढळतात. ‘शेकरू’  हा महाराष्ट्राचा राज्यप्राणी आहे. ‘हरियाल’ हे विशेष असलेले कबुतर राज्यपक्षी म्हणून घोषित करण्यात आले आहे. ‘ब्ल्यू मॉरमॉन’ या विशेष प्रजातीची राज्य फुलपाखरू म्हणून घोषणा करणारे महाराष्ट्र हे प्रथम राज्य आहे. महाराष्ट्रातील हीच जैवविविधता चित्ररथाच्या माध्यमातून मांडण्यात येणार आहे.

यंदाच्या चित्ररथावर दर्शनी बाजूस भव्य ‘ब्ल्यू मॉरमॉन’ फुलपाखराची ८ फूट उंचीची देखणी प्रतिकृती आहे. तसेच दीड फूट दर्शविणारे राज्यफुल ‘ताम्हण’ याचे अनेक गुच्छ दर्शविले आहेत त्यावर इतर छोटी फुलपाखरे यांच्या प्रतिमा आहेत. चित्ररथावर १५ फूट भव्य असा ‘शेकरू’ राज्यप्राणी तसेच युनेस्कोच्या सूचीमध्ये समावेश असलेल्या कास पठाराची प्रतिमा दर्शविण्यात आलेली आहे. चित्ररथाच्या दर्शनी भागात कास पठारावर आढळणारा सरडा ‘सुपारबा’ ३ फूट उंच दर्शविला आहे, त्यामागे राज्यपक्षी हरियालची प्रतिमा दर्शविण्यात आली आहे.  चित्ररथाच्या अंतिम भागात वृक्षाच्या फांदीवर बसलेल्या राज्यप्राणी शेकरूची प्रतिमा व त्यामागे राज्यवृक्ष आंबा वृक्षाची प्रतिमा सुमारे १४ ते १५ फूट उंचीपर्यंत आहे. तसेच दुर्मिळ माळढोक पक्षी, महाराष्ट्रात नव्याने सापडलेली खेकड्याची प्रजाती, नव्याने सापडलेला मासा, वाघ, आंबोली झरा, तसेच फ्लेमिंगो, मासा, गिधाड, घुबड पक्ष्यांच्या ४ ते ५ फूट उंचीच्या प्रतिकृती आहेत. तसेच रचनात्मक व सुंदर कलात्मक दृष्टिकोन ग्राह्य धरून अनेक जैवविविधता दिसतील, असे देखावे तयार केले आहेत.

या चित्ररथाची संकल्पना, सांस्कृतिक कार्य संचालनालयाची असून त्यावर अनेक कलाकार काम करीत आहेत. महाराष्ट्रातील वैविध्यपूर्ण जैव वारसा कवितेच्या व मधुर संगीताच्या रूपात मांडण्यात आलेला आहे.

मुंबई, दि. 5 : महिलांच्या तक्रारी/अडचणी यांची शासकीय यंत्रणेकडून सोडवणूक करण्यासाठी जिल्हास्तरीय महिला लोकशाही दिन प्रत्येक महिन्याच्या तिसऱ्या सोमवारी जिल्हाधिकारी कार्यालय, मुंबई शहर येथे सकाळी 11.00 वाजता आयोजित करण्यात येणार आहे, अशी माहिती जिल्हा महिला व बालविकास अधिकारी, मुंबई यांनी प्रसिद्धीपत्रकाद्वारे दिली आहे.

समस्याग्रस्त व पीडित महिलांना त्यांचे प्रश्न मांडण्यासाठी व्यासपीठ मिळावे तसेच त्यांच्या हक्कांचे संरक्षण होऊन न्याय मिळावा यादृष्टीने महिलांच्या तक्रारी/अडचणी यांची शासकीय यंत्रणेकडून सोडवणूक करण्यासाठी व समाजातील पीडित महिलांना सुलभ मार्गदर्शनाची सुविधा उपलब्ध व्हावी यासाठी जिल्हा महिला व बाल विकास अधिकारी कार्यालयामार्फत जिल्हास्तरीय महिला लोकशाही दिन प्रत्येक महिन्याच्या तिसऱ्या सोमवारी आयोजित केला जाणार आहे.

या महिला लोकशाही दिनात तक्रार दाखल करण्याकरिता तक्रार अर्जाचा नमुना जिल्हा महिला व बाल विकास अधिकारी कार्यालय, 117 बी.डी.डी. चाळ, पहिला मजला, वरळी मुंबई ४०००१८ येथे उपलब्ध आहे.

अर्ज स्वीकारण्यासाठी निकष अर्ज विहित नमुन्यात असावा तसेच तक्रार/ निवेदन वैयक्तिक स्वरुपाचे असावे. न्यायप्रविष्ट प्रकरणे, विहित नमुन्यात नसणारे व आवश्यक त्या कागदपत्राच्या न जोडलेला प्रतीचे अर्ज, सेवा विषयक, आस्थापनाविषयक बाबी तसेच तक्रार/निवेदन वैयक्तिक स्वरुपाचे नसेल तर अशा स्वरुपाचे अर्ज स्वीकारले जाणार नाहीत, असे जिल्हा महिला व बालविकास अधिकारी, मुंबई यांनी यांनी प्रसिद्धीपत्रकाद्वारे कळविले आहे.

मुंबई, दि. 5 : कोविड-19 आणि ओमायक्रॉनच्या पार्श्वभूमीवर राज्यातील सर्व अकृषि विद्यापीठे, स्वयंअर्थसहित विद्यापीठे, अभिमत विद्यापीठ, तंत्रनिकेतन तसेच विद्यापीठाशी संलग्नित महाविद्यालयातील वर्ग आणि परीक्षा 15 फेब्रुवारी 2022 पर्यंत फक्त ऑनलाईन पद्धतीने सुरु राहतील, अशी घोषणा उच्च व तंत्रशिक्षण मंत्री उदय सामंत यांनी फेसबुक लाईव्हच्या माध्यमातून केली.

उच्च व तंत्र शिक्षण मंत्री उदय सामंत यांनी कोविड-19 व ओमायक्रॉनच्या पार्श्वभूमीवर विद्यापीठ/महाविद्यालयीन परीक्षा, शिक्षक, शिक्षकेतर कर्मचारी व विद्यार्थ्यांचे लसीकरणाबाबत दूरदृश्य प्रणालीद्वारे (ऑनलाईन) राज्यातील विभागीय आयुक्त, सर्व जिल्हाधिकारी, अकृषी विद्यापीठाचे कुलगुरू यांच्यासमवेत कोविड-19 परिस्थितीचा काल आढावा बैठक घेतली. बैठकीला उच्च व तंत्रशिक्षण विभागाचे प्रधान सचिव विकासचंद्र रस्तोगी, उच्च शिक्षण संचालक धनराज माने, तंत्र शिक्षण संचालक अभय वाघ, कला संचालक राजीव मिश्रा उपस्थित होते.

विद्यापीठे तसेच महाविद्यालयानी अद्याप लसीकरण न झालेल्या विद्यार्थी यादी स्थानिक प्राधिकरणना देऊन लसीकरण साठी विशेष मोहीम राबवून तसेच विद्यार्थीया मध्ये जनजागृती करून तातडीने लसीकरण पूर्ण करून घ्यावे. तंत्रनिकेतन मधील विद्यार्थी 15 ते 18 या वयोगटातील असल्याने व या वयोगटातील व्यक्तीचे लसीकरण सुरू झाले असल्याने संचालक तंत्रशिक्षण यांनी लसीकरण करावयाच्या विद्यार्थ्यांची यादी स्थानिक प्राधिकरणाला उपलब्ध करून द्यावी व विशेष मोहिमेद्वारे लसीकरण पूर्ण करून घावेत. तसेच संचालक कला यांनी ऑनलाईन चित्रकला परीक्षेसंदर्भात नियोजन करुन फेब्रुवारीच्या पहिल्या आठवड्यात परीक्षा घेण्यात याव्यात. तसेच विद्यापीठ शिक्षक, शिक्षकेतर कर्मचारी यांची चक्राकार पद्धतीने 50 टक्के उपस्थितीचे नियोजन करण्यात यावे. विद्यार्थ्यांनी कोरोनाच्या या संकटावर मात करण्यासाठी मास्क वापरणे, हात वारंवार धुणे, सामाजिक अंतर राखणे या नियमांचे काटेकोरपणे पालन करावे, असे आवाहनही श्री.सामंत यांनी यावेळी केले.

मुंबई-राज्यातील अनेक नेत्यांना कोरोनाने विळखा घातला आहे. आता शिवसेना खासदार संजय राऊतांच्या घरात देखील कोरोनाने शिरकाव केला आहे. त्यांच्या आई, पत्नी आणि मुलीसह चार जण कोरोना पॉझिटिव्ह आढळले आहेत.

राऊत यांच्या आई, त्यांची पत्नी, मुलगी आणि पुतणी कोरोना पॉझिटिव्ह आढळल्या. घरातील सदस्यांना सर्दी, ताप आणि खोकल्याची लक्षणे होते. यामुळे त्यांची कोरोना टेस्ट करण्यात आली. ज्यामध्ये हे चार जण कोरोना पॉझिटिव्ह आढळले आहेत. या सर्वांना सौम्य लक्षणे होते. यामुळे सध्या तरी होम क्वारंटाईन करण्यात आले आहे.

दरम्यान राज्यातील अनेकांना नेत्यांना कोरोनाची लागण झाली आहे. यामध्ये महसूल मंत्री बाळासाहेब थोरात, शालेय शिक्षणमंत्री वर्षा गायकवाड, महिला आणि बालविकास मंत्री यशोमती ठाकूर, सार्वजनिक बांधकाम आणि नगरविकास मंत्री एकनाथ शिंदे, के. सी. पाडवी आणि प्राजक्त तनपुरे तसेच विधान परिषदेचे विरोधी पक्षनेते प्रविण दरेकरांचा देखील समावेश आहे. जवळपास 61 आमदारांना कोरोनाचा संसर्ग झाला आहे.