मुंबई, दि. 28 :- राज्यातील सर्व शासकीय शाळांमधून तंत्रज्ञानाचा वापर, प्रशिक्षण, अभ्यासक्रम यासंदर्भात पूरक माहिती देण्यासाठी तंत्रज्ञानाचे सहकार्य करण्याबाबत ॲमेझॉनने तयारी दर्शविली असून त्याची सुरूवात प्रातिनिधीक स्वरूपात टॅब वितरण करून झाल्याची माहिती शालेय शिक्षणमंत्री प्रा.वर्षा गायकवाड यांनी दिली.

राज्यात शैक्षणिक दर्जा उंचावण्यासाठी शालेय शिक्षण विभागामार्फत विविध प्रयत्न करण्यात येत आहेत. याचाच एक भाग म्हणून तांत्रिक सहकार्यासाठी ॲमेझॉनने सहकार्य करण्यास तयारी दर्शविली आहे. यासंबंधी शालेय शिक्षणमंत्री प्रा.वर्षा गायकवाड यांच्या अध्यक्षतेखाली चर्चासत्राचे आयोजन करण्यात आले होते. यावेळी आमदार रोहित पवार, शालेय शिक्षण विभागाच्या अपर मुख्य सचिव वंदना कृष्णा, ॲमेझॉन इंडियाचे संचालक सलीम मेमन, ॲमेझॉन सीएसआरच्या प्रमुख मनिषा पाटील, फ्युचर इंजिनिअरचे प्रमुख अक्षय कश्यप, पब्लिक रिलेशन्स टीमच्या माधवी कोचर, लीडरशीप फॉर इक्व‍िटीचे मधुकर बानुरी, पब्लिक पॉलिसीच्या स्मृती मिश्रा यांच्यासह शालेय शिक्षण विभागाचे वरिष्ठ अधिकारी उपस्थित होते.

विद्यार्थ्यांना शिक्षणात तंत्रज्ञानाची मदत होण्यासाठी ॲमेझॉन सहकार्य करणार आहे. याअंतर्गत राज्यात 488 आदर्श शाळांमधील विद्यार्थ्यांना लॅपटॉपचे वितरण, संगणकशास्त्रातील कोडिंग लॅब, ॲमेझॉनमार्फत देण्यात येणाऱ्या मुलींच्या शिष्यवृत्तीमध्ये अकरावी आणि बारावीच्या विद्यार्थिनींचा समावेश करण्याची तयारी, सर्व शासकीय शाळांमधील शिक्षकांना तंत्रज्ञानाचे प्रशिक्षण, पुणे येथे सायन्स सिटीच्या उभारणीमध्ये तंत्रज्ञानाची मदत, केंद्र सरकारच्या सूचनेनुसार नवीन शैक्षणिक धोरणाअंतर्गत 2022 पासून तंत्रज्ञान आधारित अभ्यासक्रम तयार करण्यासाठी मदत करणे, प्रशिक्षण देणे या कामी ॲमेझानचे सहकार्य लाभणार आहे.   शालेय शिक्षण विभागामार्फत वर्ग डिजिटाईज्ड केले जाणार आहेत. यामध्ये देखील ॲमेझॉनच्या सहकार्याची सुरूवात म्हणून मुंबईच्या धारावीमधील महानगरपालिकेअंतर्गत शाळांमधील 769 विद्यार्थ्यांना टॅब दिले जाणार असून नियमित अभ्यासासाठी विद्यार्थ्यांना त्यांचा उपयोग करता येणार आहे, अशी माहिती यावेळी देण्यात आली.

हिंदी माध्यमिक शाळा (संत कक्कया शाळा इमारत) दादर, काळा किल्ला मराठी प्राथमिक शाळा, काळा किल्ला एमपीएस माध्यमिक, टी.सी.मनपा मराठी माध्यमिक शाळा, टी.सी.मनपा उर्दू माध्यमिक शाळा, टी.सी.मनपा इंग्रजी माध्यमिक या शाळांमधील विद्यार्थ्यांना प्रातिनिधीक स्वरूपात टॅबचे वितरण करण्यात आले.

मुंबई, दि. २८ जानेवारी – सत्यमेव जयते! सर्वोच्च न्यायालयाने महाविकास आघाडी सरकारच्या मनमानी कारभाराला, सूडभावनेने घेतलेल्या निर्णयाला चाप लावला आहे. या निर्णयामुळे महाविकास आघाडी सरकारला जबरदस्त सणसणीत अशी चपराक मिळाल्याची प्रतिक्रिया विधान परिषदेचे विरोधी पक्षनेते प्रविण दरेकर यांनी दिली.

भाजपच्या १२ आमदारांचे केलेले निलंबन सर्वोच्च न्यायालयाने आज रद्द केले. त्यावर प्रसारमाध्यमांशी बोलताना दरेकर म्हणाले की, लोकशाहीचा गळा घोटण्याचे काम हे आघाडी सरकार रोज करतेय. सरकारने तीन-तीन लाख मतदारांचे प्रतिनिधित्व करणाऱ्या आमदारांचे निलंबन केले होते. आपली सत्ता टिकावी, विरोधकांचे बहुमत होऊ नये, त्यांची संख्या कमी करावी या वाईट उद्देशाने कुठल्याही प्रकारची चूक नसताना, निलंबनासाठी पार्श्वभूमी नसताना हुकुमशाही पद्धतीने १२ आमदारांचे निलंबन करण्यात आले होते. सर्वोच्च न्यायालयात दाद मागितल्यावर आम्हाला न्याय मिळाला. याबद्दल न्यायदेवतेचे आभार व्यक्त करतानाच दरेकर यांनी कृतज्ञताही व्यक्त केली.

सर्वोच्च न्यायालयाने या निकालाच्या निमित्ताने देशाच्या लोकशाहीच्यादृष्टीने दिशादर्शक भूमिका घेतलेली आहे. सरकार कोणाचेही असू देत, मनमानीपणे अशा प्रकारे कोणालाही निलंबन करता येणार नाही, अशा आशयाचा निर्णय सर्वोच्च न्यायालयाने दिलाय. निकाल देताना न्यायालयाने काही गंभीर ताशेरे ओढलेत, तसेच या सरकारच्या भूमिकेवर केलेल्या कारवाईबद्दल आक्षेप सर्वोच्च न्यायालयाने घेतल्याची प्राथमिक माहिती असल्याचेही दरेकर यांनी स्पष्ट केले.
आपले आमदार फुटतील का, विरोधी पक्षाची बहुसंख्या होईल का, अशा प्रकारची भीती महाविकास आघाडी सरकारला होती. १२ आमदारांचे निलंबन करत त्यांची संख्या कमी करावी, असा त्यांचा डाव होता. आता ते निवडणूक घ्यायला काहीतरी करतील, असे वाटते, असेही दरेकर म्हणाले.

त्या १२ आमदारांसाठी तुम्ही आमचे
१२ आमदार निलंबित केले होते का ?

भास्कर जाधव यांच्या विधानावर बोलताना दरेकर यांनी सांगितले की, त्या त्या विषयावर ती ती भूमिका पाहिजे. वड्याचे तेल वांग्यावर काढायचे हे बरोबर नाही. त्या १२ आमदारांसाठी तुम्ही आमचे हे १२ आमदार निलंबित केले होते का, असा सवालही त्यांनी यावेळी उपस्थित केला. सर्वोच्च न्यायालय आपल्या देशातील शेवटची न्यायलयीन संस्था आहे. सर्वोच्च न्यायालयाने निर्णय दिल्यानंतर तो निर्णय स्वीकारला पाहिजे. राज्यपालांचा काही निर्णय असेल तर न्यायालय आहेत, न्यायायलय ठरवेल काय करायचे ते. परंतु ते त्यांनी केले म्हणून तुम्ही हे केले का? सूडभावनाच आहे का तुमच्या मनामध्ये, असा थेट सवालही दरेकर यांनी उपस्थित केला.

नवी दिल्ली,दि.२८  : महाराष्ट्र  नॅशनल कॅडेट कॉर्प्स (एनसीसी)  संचालनालयाने प्रतिष्ठेच्या ‘प्रधानमंत्री बॅनर’चे विजेते पद पटकावून देशातील सर्वोत्तम संचालनालयाचा बहुमान प्राप्त केला आहे. तर पृथ्वी पाटील एनसीसीच्या एअर फोर्स विंगची सर्वोत्तम कॅडेट  (बेस्ट कॅडेट) ठरली आहे. पंतप्रधान नरेंद्र मोदी यांच्या हस्ते हे दोन्ही बहुमान आज महाराष्ट्राला प्रदान करण्यात आले.

येथील कॅन्टॉनमेंट भागातील करीअप्पा मैदानावर आयोजित एनसीसी रॅली मध्ये पंतप्रधानांच्या हस्ते ‘प्रधानमंत्री बॅनर’च्या विजेत्या व उपविजेत्यासह एनसीसीच्या लष्कर,नौदल आणि वायुदलातील प्रत्येकी एक मुलगा व मुलगी अशा बेस्ट कॅडेट्सला सन्मानित करण्यात आले. संरक्षण मंत्री राजनाथ सिंह, एनसीसीचे महासंचालक लेफ्टनंट जनरल गुरबीरपाल सिंह यांच्यासह गणमान्य व्यक्ती यावेळी उपस्थित होते.

यावेळी पंतप्रधानांच्या हस्ते महाराष्ट्र एनसीसी संचालनालयास प्राप्त विजेतेपदाचा कॅडेट कॅप्टन निकिता खोत आणि महाराष्ट्र एनसीसी  संचालनालयाचे अतिरिक्त महासंचालक मेजर जनरल वाय.पी.खंडुरी यांनी तर सिनियर अंडर ऑफिसर सिध्देश जाधव यांनी प्रधानमंत्री बॅनर स्वीकारले. देशातील एकूण 17  एनसीसी महासंचालनालयाच्या डिसेंबर 20२० ते  नोव्हेंबर 20२१ मधील विविध स्तरावरील मुल्यांकन तसेच यावर्षी 1 ते 28 जानेवारी दरम्यान दिल्लीत आयोजित प्रजासत्ताक दिन शिबिरातील विविध स्पर्धांतील सर्वोत्तम कामगिरीच्या आधारावर आज ‘प्रधानमंत्री बॅनर’चा बहुमान विजेत्या व उपविजेत्या संचालनालयास प्रदान करण्यात आला. या कार्यक्रमात महाराष्ट्राला विजेत्याचा तर दिल्ली एनसीसी संचालनालयास उपविजेतेपदाचा बहुमान प्रदान करण्यात आला.

महाराष्ट्राला तब्बल सात वर्षानंतर प्रधानमंत्री बॅनर

महाराष्ट्र एनसीसी संचालनालयाला यापूर्वी एकूण १७ वेळा प्रधानमंत्री बॅनरचा बहुमान मिळाला आहे. मात्र,गेल्या सात वर्षांपासून महाराष्ट्र उपविजेता किंवा पहिल्या तीन क्रमांकात असायचा. मागील वर्षी महाराष्ट्र हा प्रधानमंत्री बॅनरचा उपविजेता ठरला होता तर राज्याला जवळपास तब्बल सात वर्षाने हा प्रधानमंत्री बॅनरचा बहुमान मिळाल्याने या बहुमानाचे विशेष महत्व आहे.

 प्रधानमंत्र्यांच्या हस्ते पृथ्वी पाटीलचा सन्मान

या कार्यक्रमात एनसीसीच्या वायुदलाच्या (सिनीयर विंग) बेस्ट कॅडेट्सचा बहुमान पटकाविणारी महाराष्ट्राची कॅडेट वॉरंट ऑफिसर पृथ्वी पाटील हिचा पंतप्रधानांच्या हस्ते मानाचे पदक व केन प्रदान करून सन्मान करण्यात आला. एनसीसी वायुदलाच्या बेस्ट कॅडेटसाठी देशातील कॅडेट्समध्ये चुरस होती.लेखी परिक्षा, समुह चर्चा आणि एनसीसी महासंचालकांसमोर प्रत्यक्ष मुलाखत व शिबिरातील परेड या निकषांवर बेस्ट कॅडेट्ची निवड करण्यात आली.

प्रधानमंत्री गार्ड ऑफ ऑनरमध्येही महाराष्ट्राची सर्वोत्तम कामगिरी

या विशेष कार्यक्रमामध्ये प्रधानमंत्री नरेंद्र मोदी यांना एनसीसीच्या विविध विंगच्यावतीने गार्ड ऑफ ऑनर देण्यात येतो या मानाच्या गार्ड ऑफ ऑनरमध्येही महाराष्ट्राचे कॅडेट्स चमकले. महाराष्ट्राच्या  सिनीयर अंडर ऑफिसर गितेश डिंगर याला एनसीसीच्या चारही विगंच्या परेड कमांडरचा बहुमान मिळाला. एनसीसीच्या छात्रा विंगच्या नेतृत्चाचा बहुमान सिनीयर अंडर ऑफिसर सोनाली पाटील तर एअर फोर्स विंगचे नेतृत्व सिनीयर अंडर ऑफिसर राघवेंद्र सिंह याने केले.  प्रधानमंत्री गार्ड ऑफ ऑनरसाठी  एनसीसीच्या चारही विंगसाठी  निवड  झालेल्या देशातील ५७ कॅडेट्सपैकी सर्वात जास्त ७ कॅडेट्स हे महाराष्ट्राचे होते.

महाराष्ट्राची उत्कृष्ट कामगिरी

लेफ्टनंट कर्नल अनिरुध्द सिंह यांच्या नेतृत्वाखाली महाराष्ट्राच्या एनसीसी संघाने यावर्षी उत्कृष्ट कामगिरी बजावली आहे. कोरोना महामारीच्या पार्श्वभूमीवर यावर्षी दिल्लीतील कँन्टॉनमेंट भागात आयोजित एनसीसीच्या प्रजासत्ताक दिन शिबीरात महाराष्ट्रातील ३४ मुले आणि २३  मुली असे एकूण ५७ कॅडेट्स सहभागी झाले .पुणे येथे 26 नोव्हेंबर ते 26 डिसेंबर 202१ या कालावधी दरम्यान या कॅडेट्सचा कसून सराव झाला व कोरोना चाचण्याअंती हे कॅडेट्स 1 जानेवारी  २०२२ रोजी  दिल्लीतील शिबिरात सहभागी झाले. प्रजासत्ताक दिनी राजपथावर झालेल्या पथ संचलनात सहभागी देशभरातील एनसीसीच्या १०० मुलींच्या तुकडीत महाराष्ट्राच्या ८ मुलींची निवड झाली. महाराष्ट्रातील १७ पैकी ९ मुलांची निवड राजपथवरील पथ संचलनासाठी झाली.

मुख्यमंत्री उद्धव ठाकरे यांच्याकडून राष्ट्रीय छात्रसेनेच्या चमूचे अभिनंदन

मुंबई, दि. 28 : – ‘…महाराष्ट्राच्या जिद्द आणि चिकाटीचा झेंडा दिल्लीत फडकवलात..छत्रपती शिवाजी महाराजांच्या मावळ्यांचा वारसा सांगणारी कामगिरी बजावलीत…शाब्बास..भले बहाद्दर…’ अशी शाबासकी देत मुख्यमंत्री उद्धव ठाकरे यांनी प्रजासत्ताक दिन संचलनात सर्वोत्कृष्टतेचा पंतप्रधान ध्वज (प्राईम मिनिस्टर्स बॅनर) पटकावणाऱ्या महाराष्ट्राच्या राष्ट्रीय छात्रसेनेच्या चमूचे अभिनंदन केले आहे.

राष्ट्रीय छात्रसेनेच्या महाराष्ट्र संचालनालयाने देशातील सर्वोत्कृष्ट संचालनालयाचे पारितोषिक पटकावले आहे, त्यासाठीही मुख्यमंत्र्यांनी महाराष्ट्र  संचालनालयाचे अभिनंदन केले आहे.

प्रधानमंत्री नरेंद्र मोदी यांच्या हस्ते नवी दिल्लीत महाराष्ट्र छात्रसेनेच्या चमूला हा ध्वज प्रदान करण्यात आला. तसेच महाराष्ट्र संचालनालय आणि कॅडेट ऑफिसर पृथ्वी पाटील यांचा पारितोषिक देऊन सन्मान करण्यात आला.

महाराष्ट्र एनसीसीची कॅडेट ऑफिसर पृथ्वी पाटील ही देशातील सर्वोत्तम छात्रसैनिक ठरली आहे. या यशासाठी पृथ्वी हिचेही मुख्यमंत्र्यांनी कौतुक केले आहे. तसेच तिला पुढील वाटचालीसाठी शुभेच्छा दिल्या आहेत.

पंतप्रधान ध्वजाचा (प्राईम मिनिस्टर बॅनर) वाहक सिनिअर अंडर ऑफिसर सिद्धेश जाधव, सर्वोत्कृष्ट संचालनालयासाठीचा पारितोषिक स्वीकारण्याचा मान मिळालेले महाराष्ट्र संचालनालयाचे अतिरिक्त महासंचालक मेजर जनरल वाय. पी. खंडुरी, कॅप्टन निकिता खोत यांचेही मुख्यमंत्र्यांनी अभिनंदन केले आहे.

इंदूर -मध्य प्रदेशातील बहुचर्चित भैय्यू महाराज आत्महत्या प्रकरणात इंदूरच्या जिल्हा न्यायालयाने केयरटेकर पलक, मुख्य सेवादार विनायक आणि शरद यांना दोषी ठरवले आहे. तिघांनाही 6-6 वर्षांची शिक्षा सुनावण्यात आली आहे. आदेशानुसार, भैय्यू महाराज यांचा सेवकांनी इतका छळ केला की त्यांनी आत्महत्या केली.भैय्यू महाराज यांनी 12 जून 2018 रोजी स्वतःवर गोळी झाडून आत्महत्या केली होती.

याप्रकरणी इंदूर जिल्हा न्यायालयात आज अंतिम सुनावणी झाली. सर्व पुरावे व साक्षीदार न्यायालयासमोर सादर करण्यात आले. आरोपी पक्षाने भय्यू महाराज यांनी लिहिलेली सुसाईड नोट या संपूर्ण प्रकरणात महत्त्वाचा पुरावा म्हणून सादर केली. त्याचवेळी फिर्यादी पक्षाने तिन्ही आरोपींविरुद्ध बहीण व दुसरी पत्नी आयुषी यांना साक्षीदार म्हणून जिल्हा न्यायालयात हजर केले.मिळालेल्या माहितीनुसार, साडेतीन वर्षांच्या सुनावणीनंतर सत्र न्यायालयाने हा निकाल दिला. उच्च न्यायालयाने हा गुन्हा सिद्ध केला आहे. महाराजांना आत्महत्येस प्रवृत्त केल्याप्रकरणी सत्र न्यायाधीश धर्मेंद्र सोनी यांनी महाराजांचे सेवक शरद देशमुख, विनायक दुधाळे आणि पलक पुराणिक यांना शिक्षा सुनावली. आरोपी पैशासाठी महाराजांचा छळ करत असे, हे न्यायालयाने मान्य केले आहे. त्यांना पैशांसाठी ब्लॅकमेलही करण्यात आले होते. भैय्यू महाराजांना कुटुंबापेक्षा सेवेकरींवर जास्त विश्वास होता. त्यांना सेवेकरींवर एवढा विश्वास होता की त्यांनी त्यांचे आश्रम आणि काम त्यांच्याकडे सोपवले होते. मात्र सेवेकरींनी त्यांना पैशासाठी एवढा त्रास दिला की त्यांना आत्महत्येसारखे पाऊल उचलावे लागले.

मुंबई, दि. 28 : देशाच्या स्वातंत्र्यासाठी प्राणार्पण केलेल्या हुतात्म्यांच्या स्मरणार्थ आदर व्यक्त करण्यासाठी दि. ३० जानेवारी रोजी दरवर्षी संपूर्ण देशभर दोन मिनिटे मौन (स्तब्धता) पाळून त्यांना आदरांजली वाहण्यात येते. त्यानुसार यावर्षीही रविवार दिनांक ३० जानेवारी, २०२२ रोजी सकाळी ११.०० वाजता दोन मिनिटे मौन (स्तब्धता) पाळून हा दिवस हुतात्मा दिन म्हणून पाळण्यात यावा, असे परिपत्रक सामान्य प्रशासन विभागाने जारी केले आहे.

रविवार, दि. ३० जानेवारी, २०२२ रोजी सकाळी ११.०० वाजता पाळण्यात यावयाच्या मौन (स्तब्धता) ची सुरुवात होण्यापूर्वी सकाळी १०.५९ पासून ११.०० वाजेपर्यन्त इशारा भोंगा वाजविण्यात येईल. हा इशारा भोंगा संपल्यानंतर सर्व शासकीय/निमशासकीय कार्यालये/आस्थापना/शैक्षणिक संस्था/ विद्यापीठे यामधील अधिकारी/कर्मचारी/शिक्षक/शिक्षकेतर कर्मचारी विद्यार्थी तसेच नागरिक आदी सर्वांनी दोन मिनिटे मौन (स्तब्धता) पाळावे, सकाळी ११.०२ मिनिटांनी मौन (स्तब्धता) संपल्यासंबंधीचा इशारा भोंगा सकाळी ११.०३ मिनिटांपर्यंत वाजविण्यात येईल.

जेथे भोंग्याची व्यवस्था नसेल तेथे वरीलप्रमाणे सकाळी ११.०० वाजता मौन (स्तब्धता) पाळण्याबाबत योग्य ते निर्देश संबंधितांना देण्यात यावेत व हुतात्म्यांना आदरांजली गंभीरपणे व योग्य त्या आदराने मौन (स्तब्धता) पाळून देण्यात येईल याची दक्षता घेण्यात यावी.असे परिपत्रक सामान्य प्रशासन विभागाने जारी केले आहे.

मुंबई, दि. 28 :- यंदाच्या प्रजासत्ताक दिन संचलनात सर्वोत्कृष्ट कामगिरीसाठी महाराष्ट्राच्या एनसीसी पथकाला पंतप्रधानांच्या हस्ते मानाचा ‘पंतप्रधान बॅनर’ प्रदान करुन गौरवण्यात आल्याबद्दल उपमुख्यमंत्री अजित पवार यांनी महाराष्ट्राच्या एनसीसी पथकातील छात्रसैनिकांचे तसेच एनसीसी अधिकाऱ्यांचे अभिनंदन केले आहे.

महाराष्ट्राच्या एनसीसी सिनीयर एअर फोर्स विंगची छात्रसैनिक, वॉरंट ऑफिसर पृथ्वी पाटील ही देशातील सर्वोत्तम छात्रसैनिक ठरल्याबद्दल उपमुख्यमंत्र्यांनी तिचे विशेष अभिनंदन केले आहे. महाराष्ट्राच्या एनसीसी पथकाने यापूर्वी 17 वेळा ‘पंतप्रधान बॅनर’ पटकावल्याचे, तसेच गेली दोन वर्षे उपविजेतेपद जिंकल्याचे सांगत उपमुख्यमंत्र्यांनी महाराष्ट्राच्या छात्रसैनिकांच्या आजवरच्या गौरवशाली कामगिरीचा आवर्जून उल्लेख केला. महाराष्ट्राचे सर्व छात्रसैनिक ‘एकता व अनुशासन’ या ब्रीदाचे पालन करुन समर्पित वृत्तीने राष्ट्रसेवा करतील, असा विश्वासही उपमुख्यमंत्र्यांनी व्यक्त केला आहे.

पंतप्रधान ध्वज (प्राईम मिनीस्टर बॅनर)चा वाहक छात्रसैनिक सिनिअर अंडर ऑफिसर सिद्धेश जाधव, उत्कृष्ट ‘गार्ड ऑफ ऑनर’साठी सन्मानित सिनीयर अंडर ऑफिसर गितेश डिंगर, सिनियर अंडर ऑफिसर सोनाली पाटील, सिनियर अंडर ऑफिसर राघवेंद्रसिंह या छात्रसैनिकांसह महाराष्ट्र एनसीसी संचालनालयाचे अतिरिक्त महासंचालक मेजर जनरल वाय. पी. खंडुरी, कॅप्टन निकिता खोत आदी एनसीसी अधिकाऱ्यांचेही उपमुख्यमंत्री अजित पवार यांनी अभिनंदन केले आहे.