“कार्यावरील विश्वासामुळेच संघाला भरभरून साहाय्य”

पुणे, ४ डिसेंबर
समाजासाठी आणि देशासाठी राष्ट्रीय स्वयंसेवक संघाचे कार्यकर्ते निःस्वार्थीपणे गेली शंभर वर्षे काम करत आहेत. या कार्यामुळेच संघाबद्दल समाजामध्ये विश्वास निर्माण झाला आहे. या विश्वासामुळे समाज संघाला भरभरून साहाय्य करत आहे, असे प्रतिपादन संघाच्या अखिल भारतीय धर्मजागरण गतिविधीचे समन्वयक शरदराव ढोले यांनी केले.

धर्मजागरण गतिविधीचे अखिल भारतीय कार्यालय पुण्यात बांधले जाणार असून या प्रकल्पाचे भूमिपूजन ढोले यांच्या हस्ते करण्यात आले. या कार्यक्रमात ते बोलत होते.

संघाच्या पश्चिम महाराष्ट्र प्रांताचे संघचालक प्रा. सुरेश उर्फ नाना जाधव, महानगर संघचालक रवींद्र वंजारवाडकर, पर्वती भागाचे संघचालक अॅड. चंद्रशेखर कुलकर्णी, ज्येष्ठ कार्यकर्ते दिवाकर पांडे यांची यावेळी प्रमुख उपस्थिती होती. मित्रमंडळ सोसायटीमध्ये ‘अक्षय सेवा संशोधन प्रतिष्ठान’तर्फे मुद्रिका बंगला येथे हा कार्यालय बांधकाम प्रकल्प हाती घेण्यात आला आहे.

धर्मजागरण विभागाचे काम देशभरात वाढत आहे. त्यामुळे कार्यालयांचीही गरज निर्माण झाली आहे. पुण्यात कार्यालयाची जी इमारत तयार होईल त्यात अध्ययन, संशोधन, संस्था सक्षमीकरण, कार्यकर्ता प्रबोधन, कार्यकर्ता प्रशिक्षण अशा अनेक योजना चालवल्या जातील. प्रशिक्षणाचे अनेक विषय या कार्यालयाच्या माध्यमातून सुरू केले जातील, अशी माहिती ढोले यांनी दिली.

संघ प्रेरणेतून चालणाऱ्या संस्थांना जो निधी किंवा ज्या वास्तू देणगीरूपाने दिल्या जातात, त्यांचा उपयोग योग्य त्याच कारणांसाठी होतो, हा विश्वास समाजात निर्माण झाला आहे. समाजाला बरोबर घेऊनच संघ यापुढेही काम करत राहील, असेही ढोले यांनी सांगितले.

कै. वासुदेवराव आणि कै. कमलताई गोखले या दाम्पत्याच्या दातृत्वाबद्दलची माहिती अॅड. चंद्रशेखर कुलकर्णी यांनी दिली. गोखले यांनी त्यांचा मित्रमंडळ सोसायटीतील बंगला अक्षय सेवा संशोधन प्रतिष्ठानला देणगी स्वरूपात दिल्यामुळेच त्या जागी नवी वास्तू साकारत आहे, असे कुलकर्णी म्हणाले.

सेवा आणि समाजोपयोगी उपक्रम चालावेत या अपेक्षेने जी वास्तू देणगी स्वरूपात देण्यात आली आहे, त्याच अपेक्षेप्रमाणे या वास्तूचा उपयोग केला जाईल, असा विश्वास प्रा. नाना जाधव यांनी व्यक्त केला. नितीन कमळापूरकर, शिरिष किराड, हेमंत हरहरे यांनीही मनोगत व्यक्त केले. मिलींद वाईकर यांनी सूत्रसंचालन केले.

पिंपरी चिंचवड वैभव काव्य संग्रहामधून संस्कृतीचे दर्शन – डॉ. श्रीपाद जोशी

पिंपरी चिंचवड काव्य संग्रहाचे प्रकाशन

पिंपरी, पुणे (दि. ०४ डिसेंबर २०२५) पिंपरी चिंचवड वैभव काव्यसंग्रहा मधून शहराच्या ऐतिहासिक, सांस्कृतिक प्रतिभेची सर्वांना माहिती, ओळख होते. या काव्य संग्रहाने शहराविषयी शब्दांचे कोंदण निर्माण केले आहे. या माध्यमातून स्थानिक साहित्यिकांशी संभाजी बारणे यांनी योग्य समन्वय साधून व्यासपीठ उपलब्ध केले; ही विशेष कौतुकाची बाब आहे, असे मत ज्येष्ठ अभिनेत्री वर्षा उसगावकर यांनी व्यक्त केले.
महाराष्ट्र साहित्य परिषद पिंपरी चिंचवड शाखा तसेच मराठी भाषा संवर्धन समिती पिंपरी चिंचवड यांच्या वतीने संभाजी बारणे यांच्या संकल्पनेतून आणि राजन लाखे संपादित “पिंपरी चिंचवड वैभव” काव्यसंग्रहाचे प्रकाशन बुधवारी (दि.३ डिसेंबर) वर्षा उसगावकर यांच्या हस्ते करण्यात आले. यावेळी अखिल भारतीय मराठी साहित्य मंडळाचे माजी अध्यक्ष डॉ. श्रीपाद जोशी, अखिल भारतीय मराठी नाट्य परिषदेचे उपाध्यक्ष भाऊसाहेब भोईर, डॉ. अभय कुलकर्णी, अशोक पगारिया, माजी नगरसेविका मनिषा पवार, महाराष्ट्र साहित्य परिषद पिंपरी चिंचवड शाखा अध्यक्ष राजन लाखे, संभाजी बारणे, कांचन जावळे, प्रभाकर ओव्हाळ, सागर बारणे, विशाल बारणे आदी उपस्थित होते.
डॉ. श्रीपाद जोशी म्हणाले, सध्या संस्कृतीची साठवणूक सुरू आहे. भौतिक साधनांद्वारे संस्कृतीचे जतन करता येत नाही. त्यासाठी गावागावातील लोककला, साहित्य, काव्य, कलावंत, शास्त्रज्ञ, राजकारणी, कामगार ही त्या ठिकाणी गुण्यागोविंदाने नांदणारी सामाजिक वीण महत्त्वाची आहे. यालाच आपण संस्कृतीची श्रीमंती म्हणू शकतो. संस्कृती ही संज्ञा खूप व्यापक असून बारणे आणि लाखे यांनी पिंपरी चिंचवड वैभव काव्य संग्रहाद्वारे शहराच्या सांस्कृतिक ऐश्वर्याचे दर्शन घडविले आहे असे डॉ. श्रीपाद जोशी म्हणाले.
भाऊसाहेब भोईर यांनी सांगितले की, पिंपरी चिंचवड शहराचा नावलौकिक साहित्य, क्रीडा, शिक्षण, समाजकारण, राजकीय अशा विविध क्षेत्रांमध्ये वाढवली पाहिजे. शहरांमध्ये प्रतिभावंतांची मांदियाळी तयार होत आहे. पिंपरी चिंचवड शहरातून अनेक कलाकार घडले आणि त्यांनी राज्य, राष्ट्रीय पातळीवर नावलौकिक मिळविला आहे. बारणे आणि लाखे यांनी सादर केलेला काव्यसंग्रह नव साहित्यिकांना प्रेरणा देणारा आहे असे भाऊसाहेब भोईर यांनी सांगितले.

पिंपरी चिंचवड वैभव काव्य संग्रहासाठी शहरातील कवींकडून त्यांच्या स्वलिखित कविता मागविण्यात आल्या होत्या. एकूण १५२ कविता प्राप्त झाल्या त्यामधून ९६ कवितांचा समावेश या काव्य संग्रहामध्ये करण्यात आला आहे, असे राजन लाखे यांनी सांगितले‌.

यावेळी प्रातिनिधिक स्वरूपामध्ये कवयित्री सुरेखा कटारिया, अकीला इनामदार, कमल सोनजे, मंगला पाटसकर, प्रा. सुभाष आहेर, डॉ. निळकंठ मालाडकर, सिताराम नलगे, रमेश पिंजरकर आदींचा सत्कार करण्यात आला. तसेच फिरोज मुजावर यांनी नृत्याविष्कारतून गणेश स्तुतीचे सादरीकरण केले. ऋचा राजन यांनी गणेश वंदना गायली. सूत्रसंचालन गणेश लिंगाडे यांनी तर संभाजी बारणे यांनी आभार मानले. कार्यक्रमास साहित्यिक, कवी, प्रेक्षक मोठ्या संख्येने उपस्थित होते.

पुणे, दि.३ : पुणे विभागातील पदवीधर व शिक्षक मतदार संघाच्या नव्याने मतदार यादी तयार करण्याच्या कार्यक्रमांतर्गत प्रसिद्ध करण्यात आलेल्या प्रारुप मतदार यादीनुसार पुणे विभागात २ लाख ७२ हजार ६१ पदवीधरांची तर ४४ हजार २३३ मतदारांची नोंदणी झाली आहे.

या २०२५ च्या कार्यक्रमांतर्गत प्रारुप मतदार यादीनुसार पदवीधर मतदार संघासाठी पुणे जिल्ह्यात ५४ हजार ८१० मतदार नोंदणी, सातारा-३५ हजार ८७९, सोलापूर- ३० हजार ४७२, कोल्हापूर- ८० हजार १८०, सांगली- ७० हजार ७२० अशी एकूण २ लाख ७२ हजार ६१ इतकी नोंदणी झाली आहे. तर शिक्षक मतदार संघासाठी पुणे- ९ हजार ७७८, सातारा- ८ हजार ४९२, सोलापूर- ११ हजार १९८, कोल्हापूर ८ हजार ६३१ व सांगली- ६ हजार १३४ अशी एकूण ४४ हजार २३३ मतदारांची नोंदणी झाली आहे.

२०२० मध्ये पदवीधर मतदार संघासाठी ४ लाख २० हजार ८९६ इतकी तर शिक्षक मतदारांची ७२ हजार १९० इतकी नोंदणी होती. गेल्या निवडणुकीपेक्षा यावर्षी आतापर्यंत कमी मतदार नोंदणी झाली आहे. त्यामुळे राजकीय पक्षांनी मतदार नोंदणीची प्रसिद्धी व जागृती करुन जास्तीत जास्त पात्र मतदारांना नोंदणीसाठी प्रोत्साहित करावे, असे आवाहन विभागीय आयुक्त तथा पुणे विभाग पदवीधर व शिक्षक मतदार संघाचे मतदार नोंदणी अधिकारी डॉ. चंद्रकांत पुलकुंडवार यांनी केले आहे.

मतदार याद्या नव्याने तयार करण्याचा कार्यक्रम:
या कार्यक्रमांतर्गत १८ डिसेंबर २०२५ पर्यंत मतदान केंद्रावर उपस्थित असलेल्या पदनिर्देशित अधिकारी किंवा संबंधित विधानसभा मतदार संघाचे सहायक मतदार नोंदणी अधिकारी यांच्याकडे दावे व हरकती दाखल करता येतील. नवीन नाव नोंदणीचा दावा दाखल करण्यासाठी पदवीधरांना नमुना क्रमांक १८ व शिक्षकांना नमुना क्रमांक १९ द्वारे याच कालावधीत दावा दाखल करता येईल. प्रारुप मतदार यादीतील नावांबाबत आक्षेप असल्यास नमुना क्रमांक ७ व यादीतील नोंदीमध्ये दुरुस्तीसाठी नमुना क्रमांक ८ दाखल करता येईल.

दावे व हरकतींचा कालावधी संपल्यानंतर ५ जानेवारी २०२६ रोजी दावे व हरकती निकाली काढून पुरवणी यादी तयार करणे व छपाईची कार्यवाही करण्यात येईल. पदवीधर व शिक्षक मतदार संघाच्या यादीची अंतिम प्रसिद्धी १२ जानेवारी २०२६ रोजी केली जाणार आहे.

नवी दिल्ली/पुणे : ‘राष्ट्रीय सहकारी निर्यात लिमिटेड’ (एनसीईएल), ‘राष्ट्रीय सहकारी सेंद्रिय लिमिटेड’ (एनसीओएल) आणि ‘भारती बीज सुरक्षा व सेवा लिमिटेड’ (बीबीएसएसएल) या तीन महत्त्वाच्या राष्ट्रीय सहकारी संस्थांमध्ये महाराष्ट्राचा सहभाग वाढत असून, त्याचा थेट लाभ राज्यातील शेतकरी व सहकारी संस्थांना होत असल्याची माहिती सहकार राज्यमंत्री मुरलीधर मोहोळ यांनी आज राज्यसभेत दिली. डॉ. अनिल बोंडे यांनी या संदर्भात प्रश्न विचारला होता.

मोहोळ म्हणाले, “देशातील आठ लाख सहकारी समित्यांपैकी सव्वा दोन लाख समित्या महाराष्ट्रात आहेत. देशाच्या सहकार क्षेत्रात महाराष्ट्र आघाडीवर आहे. एनसीईएल, एनसीओएल, बीबीएसएसएल या संस्थांच्या माध्यमातून महाराष्ट्रात मोठा विस्तार होत आहे. ‘एनसीईएल’ आणि ‘एनसीओएल’मध्ये राज्यातील अनुक्रमे अकराशे आणि तीनशेहून अधिक सहकारी संस्था सामील असून, बीबीएसएसएलशी पाच हजारांहून अधिक संस्था जोडल्या गेल्या आहेत.”

महत्त्वाचे मुद्दे

• ‘एनसीओएल’ने ‘डॉ. पंजाबराव देशमुख कृषी मिशन’अंतर्गत 11 संस्थांसोबत सामंजस्य करार
• त्यामुळे सेंद्रिय हरभरा, तूर आणि इतर कृषी उत्पादनांच्या खरेदीस चालना
• ‘एनसीईएल’मार्फत सहकारी संस्थांकडून केळी, कांदा, हळद, अनार आणि द्राक्ष यांसारख्या उत्पादनांची निर्यात
• ‘बीबीएसएसएल’चे पारंपरिक बियाण्यांचे संरक्षण, संवर्धन आणि त्यांच्या प्रसारासाठी टिश्यू कल्चर प्रयोगशाळा उभारण्यावर मोठे काम

‘पंतप्रधान नरेंद्र मोदी यांच्या सहकारातून समृद्धी या धोरणानुसार आणि गृह व सहकारमंत्री अमितभाई शाह यांच्या नेतृत्वात सहकार क्षेत्राला मजबूत आणि सक्षम करण्याच्या दृष्टीने सकारात्मक पावले उचलली जात आहेत. या बहुराज्य सोसायट्यांना सक्षम करत त्याचे सकारात्मक परिणाम गावपातळीवरील संस्थांपर्यंत पोहोचवण्याचा आमचा प्रयत्न आहे. राष्ट्रीय सहकारी संस्थांमुळे उत्पादनांना बाजारपेठ, निर्यात संधी, सेंद्रिय शेतीला चालना आणि स्थानिक बियाण्यांचे संरक्षण शक्य होत असल्याने शेतकऱ्यांना थेट फायदा होत आहे’.

मुरलीधर मोहोळ
केंद्रीय सहकार राज्यमंत्री

पुणे, दि. ३ : पेरणे (ता. हवेली) पेरणे येथे १ जानेवारी २०२६ रोजी होणाऱ्या विजयस्तंभ अभिवादन कार्यक्रमाच्या पार्श्वभूमीवर वाहतूक कोंडी होऊ नये, याकरिता पुणे-अहिल्यानगर महामार्ग क्र.६० वर वाहतूक कोंडी होऊ नये यासाठी ३१ डिसेंबर २०२५ रोजी सायं. ५ वा. पासून ते १ जानेवारी २०२६ रोजी रात्री १२:०० वा. पर्यंत दोन्ही बाजूकडील वाहतुकीत बदलाचे आदेश जिल्हाधिकारी तथा जिल्हादंडाधिकारी जितेंद्र डूडी यांनी जारी केले आहेत.

याअंतर्गत चाकण ते शिक्रापूर व शिक्रापूर ते चाकण अशी दोन्ही बाजूकडील जाणारी-येणारी सर्व प्रकारची वाहतूक पूर्णपणे बंद करण्यात येणार आहे. अहिल्यानगर कडून पुणे-मुंबईकडे येणारी जड वाहने ही शिरुर, न्हावरा फाटा, न्हावरा, पारगाव, चौफुला, यवत, हडपसर या मार्गे पुण्याकडे जातील.

पुण्याहून अहिल्यानगरकडे जाणारी जड वाहने खराडी बाह्यवळण येथून हडपसरवरुन पुणे-सोलापूर महामार्गाने चौफुला, केडगाव मार्गे न्हावरा, शिरुर-अहिल्यानगर मार्ग अशी वळविण्यात येतील. तसेच सोलापूर महामार्गावरुन आळंदी, चाकण या भागात जाणारी जड वाहने, ट्रक, टेम्पो आदी माल वाहतूक हडपसर, मगरपट्टा, खराडी बाह्यवळणमार्गे विश्रांतवाडीहून आळंदी व चाकण येथे जातील.

मुंबईहून अहिल्यानगरकडे जाणारी कार, जीप आदी हलकी वाहने वडगाव मावळ, चाकण, खेड, पाबळ, शिरुर मार्गे अहिल्यानगरकडे जातील, मुंबई व ठाणे कडून येणारी अनुयायांची वाहने मुंबई-पुणे महामार्गावरुन देहूरोड-निगडी-चऱ्होली-आळंदी-मरकळ-तुळापूर फाटा (लोणीकंद) अशी वळविण्यात येणार असल्याचे जिल्हाधिकाऱ्यांनी आदेशात नमूद केले आहे.

पुणे, दि. ३ : जिल्हा सांख्यिकी कार्यालयाच्यावतीने तयार करण्यात आलेला जिल्हा सामाजिक व आर्थिक समालोचन तसेच शाश्वत विकास ध्येये जिल्हा प्रगतीमापन अहवाल जिल्हाधिकारी जितेंद्र डूडी यांच्या हस्ते प्रकाशनांचे विमोचन करण्यात आले.
यावेळी प्रादेशिक सहसंचालक अर्थ व सांख्यिकी संचालनालय सुनील जाधव, उपायुक्त नियोजन संजय मरकळे, उपसंचालक जिल्हा सांख्यिकी कार्यालय प्रियांका बोकील, तसेच जिल्हा सांख्यिकी आणि जिल्हा नियोजन समिती कार्यालयातील अधिकारी व कर्मचारी उपस्थित होते.

जिल्हाधिकारी श्री. डुडी म्हणाले, पुणे जिल्हा सामाजिक व आर्थिक समालोचन तसेच शाश्वत विकास ध्येये जिल्हा प्रगतीमापन अहवाल प्रशासनाला धोरणनिर्मितीत, विकास आराखडा तयार करतांना प्राधान्यक्रम ठरवितांना मार्गदर्शक ठरणारे आहेत. जिल्ह्याच्या सातत्यपूर्ण व सर्वांगीण विकासासाठी अशा अभ्यासपूर्ण दस्तऐवजांची आवश्यकता आहे, जिल्हा सांख्यिकी कार्यालयाने संकलित केलेल्या आकडेवारीच्या आधारे तयार केलेला हा अहवाल जिल्ह्यातील विविध शासकीय, निम शासकीय कार्यालये, स्थानिक स्वराज्य संस्था, संशोधक व विद्यार्थ्यांना उपयोगी ठरेल, असेही श्री. डुडी म्हणाले.
पुणे जिल्हा सामाजिक व आर्थिक समालोचन आणि शाश्वत विकास ध्येये जिल्हा प्रगतीमापन अहवाल
पुणे जिल्ह्याच्या सामाजिक-आर्थिक प्रगतीचे तसेच आंतरराष्ट्रीय स्तरावरील शाश्वत विकास ध्येये निर्देशकांच्या अनुषंगाने झालेल्या कामगिरीचे सर्वसमावेशक चित्र उभे राहते. जिल्हा सामाजिक व आर्थिक समालोचन हा जिल्ह्याच्या लोकसंख्या, शिक्षण, आरोग्य, पायाभूत सुविधा, उद्योग, शेती, रोजगार यांसह विविध क्षेत्रांतील स्थितीचे प्रतिबिंब दर्शवणारा महत्त्वाचा दस्तऐवज मानला जातो.
दरम्यान, शाश्वत विकास ध्येये जिल्हा प्रगतीमापन अहवाल हा संयुक्त राष्ट्रांच्या शाश्वत विकास ध्येयांनुसार निर्धारित केलेल्या निर्देशकांचे मापन करून जिल्ह्याची प्रगती, आव्हाने आणि भविष्यकालीन दिशा स्पष्ट करतो. अहवालात दारिद्र्य निर्मूलन, आरोग्य, गुणवत्तापूर्ण शिक्षण, स्वच्छ पाणी व स्वच्छता, उद्योग व नवोन्मेष, शाश्वत शहरे, हवामान कृती इत्यादी महत्त्वाच्या ध्येयांवरील जिल्ह्याची स्थिती विषद करण्यात आली आहे.

“खाजगी बस, अवजड वाहने आणि वाहतूक शिस्तीसाठी कठोर नियम; अपघात कमी करण्याचा निर्धार”

पुणे, ३ डिसेंबर २०२५ : पुणे व पिंपरी-चिंचवड परिसरात वाढत्या अपघातांच्या पार्श्वभूमीवर तसेच हिंजवडी परिसरातील वारंवार होणाऱ्या भीषण अपघातांबाबत तातडीची समीक्षा करण्यासाठी विधानपरिषदेच्या उपसभापती डॉ. नीलम गोऱ्हे यांनी २ डिसेंबर २०२५ रोजी विधानभवन, मुंबई येथे आढावा बैठक घेतली.या बैठकीस पुणे प्रादेशिक परिवहन अधिकारी,श्रीमती अर्चना गायकवाड, पिंपरी चिंचवड प्रादेशिक परिवहन अधिकारी श्री. संदेश चव्हाण, पुणे उपप्रादेशिक परिवहन अधिकारी श्री.स्वप्निल भोसले आणि परिवहन विभागाचे सहाय्यक प्रादेशिक अधिकारी श्री. युवराज पाटील हे उपस्थित होते.

डॉ. गोऱ्हे यांनी बैठकीत व्यक्त केले की, “फक्त दंडात्मक कारवाई पुरेशी नाही; नागरिकांचा जीव वाचवणे हेच सर्वात महत्त्वाचे उद्दिष्ट आहे.” वाढत्या अपघातांना आळा घालण्यासाठी परिवहन विभागाने युद्धपातळीवर उपाययोजना राबविण्याचे त्यांनी निर्देश दिले.

खासगी बस वाहतूक व्यवस्थेत शिस्तबद्धता

खासगी बस चालकांच्या वर्तनातील ढिसाळपणा आणि वाहतुकीत निर्माण होणारा धोका लक्षात घेऊन खासगी बस वाहतूक व्यवस्थेसाठी प्रमाणित व स्वतंत्र कार्यपद्धती तयार करण्याचे निर्देश देण्यात आले. वाहन चालवताना मोबाईलचा वापर करणाऱ्या चालकांवर कडक कारवाई करणे, प्रत्येक बसमध्ये सीसीटीव्ही अनिवार्य करणे, चालकाचा बॅज क्रमांक स्वच्छपणे प्रदर्शित करणे आणि विद्यार्थ्यांसह कंपनी कर्मचार्‍यांना नेणाऱ्या बस चालकांचे चारित्र्य पडताळणी प्रमाणपत्र अनिवार्य करणे ही महत्त्वाची पावले लागू करण्याचे सांगितले.

तसेच, मद्यधुंद चालकाविरुद्ध प्रवाशांना लगेच डिजिटल माध्यमातून तक्रार नोंदविता येईल अशी सोपी व तत्काळ प्रतिसाद देणारी यंत्रणा कार्यान्वित करण्याच्या सूचना देण्यात आल्या.

अवजड वाहनांवरील नियंत्रण आणि सुरक्षा

अवजड वाहनांमुळे होणाऱ्या अपघातांची शक्यता लक्षात घेऊन सर्व डंपर, मिक्सर आणि अवजड वाहनांवर रिव्हर्स व्ह्यू कॅमेरा अनिवार्य करण्याचे निर्देश देण्यात आले. गर्दीच्या वेळात ‘नो-एन्ट्री’ चा काटेकोरपणे अंमल होईल यासाठी नवीन वेळापत्रक तयार करून त्याचे नियमित पुनरावलोकन करण्याचे सांगितले.
याशिवाय, आरएमसी प्लांट परिसरात वेग नियंत्रणासाठी गस्त वाढविणे आणि अशा वाहनांवरील नियमभंग रोखण्यासाठी कठोर कारवाईचे आदेश देण्यात आले.

वाहतूक नियंत्रण, सुरक्षा मोहिमा आणि अंमलबजावणी

अपघात रोखण्यासाठी वाहतूक सुरक्षिततेसाठी काही महत्त्वाच्या मोहिमांना प्राधान्य देण्यात आले. नियमित ब्रेथ अॅनालायझर तपासणी, ब्लॅक स्पॉटवरील प्रकाशयोजनांची तपासणी, थर्मोप्लास्टिक रोड मार्किंगचे दुरुस्ती काम, रात्री उशिरा आणि पहाटे विशेष ड्रंक ड्रायव्हिंग मोहिमा राबविणे, हेल्मेट सक्ती आणि लेन कटिंगवर कठोर कारवाई हे उपाय तातडीने अमलात आणण्याचे ठरले.

अल्पवयीन वाहनचालकांवर कडक दंडात्मक कारवाई करण्याबरोबरच पालकांनाही जबाबदार धरण्याचे निर्देश दिले. पुणे व पिंपरी-चिंचवडमधील गर्दीची व अपघातग्रस्त ठिकाणे घोषित करून तेथे विशेष पथकांचे वेळोवेळी उपक्रम (ड्राइव्ह) राबविण्याचे ठरविण्यात आले.

जनजागृती आणि सार्वजनिक सहभागाचे महत्त्व

वाहतूक शिस्तीबाबत नागरिकांमध्ये जागरूकता वाढविण्यासाठी सायकलस्वारांना रिफ्लेक्टरचा अनिवार्य वापर, आयटी कंपन्यांना ‘फ्लेक्सी टाईम’ आणि ‘वर्क फ्रॉम होम’चा विचार करण्याबाबत आवाहन, तसेच रेडिओ आणि सोशल मीडियाद्वारे व्यापक वाहतूक-जागरूकता मोहीम राबविण्याचे निर्देश दिले.
वाहतूक नियमभंगाची माहिती नागरिकांकडून थेट व्हॉट्सअॅपद्वारे संकलित करण्यासाठी संयुक्त मोहीम राबविणे आणि सोपी ऑनलाईन तक्रार प्रणाली तयार करून ती सर्वांसाठी उपलब्ध करणे याचाही विशेष उल्लेख केला.

अपघातग्रस्त कुटुंबीयांना भावनिक आधार

डॉ. गो-हे यांनी आपल्या कर्तव्याच्या पलिकडे जाऊन गंभीर अपघातातील मृतकांच्या कुटुंबीयांना आणि जखमींना विमा दावा प्रक्रियेमधून जलद मदत मिळावी यासाठी विभागाने आवश्यक ते साहाय्य करावे, असे आवाहन केले. अपघातग्रस्त कुटुंबीयांच्या पुनर्वसनासाठी संवेदनशील भूमिका घेण्याची गरज त्यांनी अधोरेखित केली.

सुरक्षित वाहतुकीसाठी सामूहिक प्रयत्नांचा आग्रह

पुणे व पिंपरी-चिंचवडमधील वाढत्या वाहतूक समस्यांवर प्रभावी नियंत्रण आणण्यासाठी नागरिक, पोलीस, परिवहन विभाग आणि स्थानिक प्रशासन यांनी समन्वयाने कार्य करणे अत्यावश्यक असल्याचे डॉ. गो-हे यांनी स्पष्ट केले. सर्व निर्देशांची तत्काळ अंमलबजावणी करून तपशीलवार अहवाल सादर करण्याचे आदेश संबंधित विभागाला देण्यात आले.

पुणे, दि. ०३ : राष्ट्रीय कौशल्य विकास महामंडळामार्फत (NSDC) इस्त्राईलमध्ये “नूतनीकरण बांधकाम” (Renovation Construction) या क्षेत्रातील मोठ्या प्रमाणातील भरती प्रक्रिया सुरू झाली असून प्लॅस्टरींग काम – १००० जागा, सिरॅमिक टायलिंग – १००० जागा, ड्रायवॉल कामगार – ३०० जागा आणि राजमिस्त्री – ३०० जागा या पदांसाठी पात्र उमेदवारांकडून अर्ज मागविण्यात आले आहेत.

या पदांसाठी २५ ते ५० वयोगटातील, इंग्रजी भाषेचे सामान्य ज्ञान असलेले तसेच किमान तीन वर्षांचा नूतनीकरण बांधकाम क्षेत्रातील अनुभव असलेले उमेदवार पात्र ठरणार आहेत. उमेदवाराने यापूर्वी इस्त्राईलमध्ये काम केलेले नसावे तसेच त्यांचा जीवनसाथी, पालक किंवा मुले सध्या इस्त्राईलमध्ये काम करत नसावीत किंवा तेथील रहिवासी नसावेत, अशी अट घालण्यात आली आहे.

भरतीसंबंधी सर्व सविस्तर माहिती व अर्ज प्रक्रिया maharashtrainternational.com या संकेतस्थळावरील Latest Jobs या विभागात उपलब्ध आहे. इच्छुक उमेदवारांनी ऑनलाईन अर्ज करून या रोजगार संधीचा लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्र, पुणे यांच्या वतीने करण्यात आले आहे.

जिल्ह्यातील सर्व औद्योगिक प्रशिक्षण संस्था व तांत्रिक महाविद्यालयांनी ही माहिती अधिकाधिक उमेदवारांपर्यंत पोहोचवावी, असे आवाहन सहायक आयुक्त सु.रा. वराडे यांनी केले आहे. अधिक माहितीसाठी उमेदवारांनी जिल्हा कौशल्य विकास, रोजगार व उद्योजकता मार्गदर्शन केंद्र, ४८१, रास्ता पेठ, पुणे येथे संपर्क साधावा.

मता प्रतिष्ठान आयोजित फुले-आंबेडकर व्याख्यामालेत मार्गदर्शन

पुणे: “जुने आदर्श घेऊनच नवी पिढी पुढे जाईल. मात्र, आधीच्या पिढीने संवादाची दारे उघडी ठेवावीत. सद्यस्थितीत तरुणांमधील वाढती बेकारी, व्यसनाधीनता, गुन्हेगारी गंभीर प्रश्न निर्माण होत आहेत. त्याकडे सरकार गांभीर्याने पाहत नाही. देशातील तरुणांच्या हाताला काम न देणे हा खरा राष्ट्रद्रोह आहे,” असे मत माध्यम तज्ञ प्रा. भारत पाटील यांनी केले.

महात्मा ज्योतिराव फुले समता प्रतिष्ठान संचालित ग्रंथालय व वाचनालयातर्फे महात्मा फुले वाड्यात आयोजित फुले-आंबेडकर व्याख्यानमालेत ‘तरुणांमधील वाढती बेकारी, व्यसनाधीनता आणि उद्रेक’ या विषयावर ते बोलत होते. अध्यक्षस्थानी पथारी पंचायतचे नेते काशिनाथ नखाते होते.

प्रा. भारत पाटील म्हणाले, “व्यसनाची व्याख्या बदलली असून, मोबाईल हे नवे व्यसन बनले आहे. त्या उद्योगाचेही केंद्रीकरण होत असून, त्यावर लक्ष जाऊ नये म्हणून जातीजातीत भांडणे लावून दिली जात आहेत. यामध्ये कोवळी मुले भक्ष्यस्थानी पडत आहेत. उच्च शिक्षणात कमालीची घट झाली आहे. दहावी, बारावीनंतर विद्यार्थी, शाळा सोडल्याचा दाखला आणायलाही जात नाहीत. ही पिढी निराशेच्या गर्तेत जात आहे. रिकामे हात, रिकामे मेंदू यामुळे नवी पिढी व्यसनाधीन होत आहे. त्यातून उद्रेक होण्याचा धोका वाढला आहे. नेपाळ आणि बांगलादेश ही त्याची उदाहरणे आपल्याला दिसत आहेत.”

काशिनाथ नखाते यांनी शासकीय धोरणांवर टीका केली. एका बाजूला रोजगार निर्मिती करायची नाही आणि दुसऱ्या बाजूला, स्वयंरोजगारांना अटकाव करायचा. याची दखल समाजाने घेतली नाही, तर बेरोजगारांचा उद्रेक होईल, असे त्यांनी परखडपणे मांडले. कामगार आणि व्यवस्थापन यांच्यामध्ये न्यायालय न आणता, लवाद निर्माण केला आहे. लवाद हे सरकारी अपत्य असल्याची टीका त्यांनी केली.

कार्यक्रमाची सुरुवात फुले यांच्या अखंडाने झाली. प्रास्ताविक भाषणात ओंकार मोरे यांनी आजचा बेरोजगार युवक द्विधा मनस्थितीत असल्याचे सांगितले. आदर्शांना समाजासमोर, उभे करायचे आहे, पण उपाशी पोटी, तो भरकटत आहे, त्यातून त्याचा उद्रेक होऊ शकतो, अशी भीती व्यक्त केली. शारदा वाडेकर यांनी सूत्रसंचालन केले. प्रतिष्ठानचे हारुण मुजावर यांनी आभार मानले.