मृत्यू पावलेल्या पाच कामगारांना उपमुख्यमंत्री अजित पवार यांची श्रद्धांजली
मृत कामगारांच्या कुटुंबियांना पाच लाखांची मदत

पुणे , दि. 4 :- पुण्यातील येरवड्यामधील शास्त्रीनगर परिसरात वाडिया बंगल्याजवळ इमारत स्लॅबची जाळी कोसळून पाच कामगारांना प्राण गमवावे लागणे, हे दुर्दैवी, क्लेशदायक असल्याचे सांगत उपमुख्यमंत्री अजित पवार यांनी मृत्युमुखी पडलेल्या पाच कामगारांना श्रद्धांजली वाहिली आहे. उपमुख्यमंत्र्यांनी मृत कामगारांच्या कुटुंबियांबद्दल सहसंवेदनाही व्यक्त केल्या असून उपमुख्यमंत्र्यांनी मृतांच्या कुटूंबियांना पाच लाख रुपयांची मदत जाहीर केली आहे.उपमुख्यमंत्री अजित पवार यांनी या  दुर्घटनेची माहिती घेतली असून अन्य जखमी कामगारांवर उपचार सुरळीत सुरु राहतील, याची दक्षता घेण्याचे निर्देश दिले आहेत. इमारतीचा स्लॅब कोसळून दुर्घटना घडण्याच्या घटनांची पुनरावृत्ती टाळण्यासाठी, या घटनेमागची कारणे शोधून त्रुटी दूर केल्या जातील, दोषींवर कडक कारवाई केली जाईल, असेही उपमुख्यमंत्र्यांनी स्पष्ट केले असून त्याबाबत प्रशासनाला सक्त सूचना दिल्या आहेत.

श्रीरामजी संस्थान तुळशीबागतर्फे आयोजन
पुणे : श्रीरामजी संस्थान तुळशीबाग च्यावतीने पेशवेकालीन तुळशीबाग राम मंदिरात श्री गणेश जयंतीनिमित्त गणेश यागाचे आयोजन करण्यात आले होते. मंदिराच्या परिसरात दत्तमंदिरासमोरील सभामंडपात हा याग पार पडला. संस्थानचे कार्यकारी विश्वस्त रामदास तुळशीबागवाले यांच्या हस्ते याग करण्यात आला. 

यावेळी संस्थानचे भरत तुळशीबागवाले, राघवेंद्र तुळशीबागवाले, श्रीपाद तुळशीबागवाले, शिशिर तुळशीबागवाले, कोटेश्वर तुळशीबागवाले यांसह तुळशीबागवाले परिवार उपस्थित होते. विरेंद्र कुंटे गुरुजी यांसह ब्रह्मवृंदांनी यागाचे पौरोहित्य केले. रंगावलीतून श्रीगणेशाचे चित्र देखील रेखाटण्यात आले होते. 
तुळशीबाग मंदिर परिसरातील गणेशाचे मंदिर गणेश जयंतीनिमित्त फुलांनी सजविण्यात आले होते. तसेच विद्युतरोषणाई देखील करण्यात आली होती. मुख्य राममंदिराशेजारी असलेल्या गणेश मंदिरात गणरायाच्या विलोभनीय मूर्तीचे दर्शन घेण्याकरीता भाविकांनी हजेरी लावली.

श्रीमंत दगडूशेठ हलवाई गणपती ट्रस्टच्यावतीने आयोजन ; मंदिरावर कामधेनू प्रतिमा व पुष्पआरास पुणे : पार्वतीच्या उदरी गणेश जन्मला…बाळा जो जो रे… च्या मंगल स्वरांत पाळणा म्हणत महिलांनी गणेशजन्म सोहळ्यात सहभाग घेत गणेशाचरणी प्रार्थना केली. गणपती बाप्पा मोरया… मंगलमूर्ती मोरया च्या निनादाने मंत्रमुग्ध झालेल्या वातावरणात दुपारी १२ वाजता दगडूशेठ गणपती मंदिरात मोठ्या उत्साहात गणेशजन्म सोहळा संपन्न झाला.

मंदिरावर केलेली कामधेनू प्रतिमांची आणि विविधरंगी फुलांची आकर्षक आरास अशा मनोहारी सजावटीने मंदिर परिसर अधिकच खुलला. गणेशभक्तांनी बाप्पाचे दर्शन घेत आरोग्यसंपन्न भारताकरीता गणेशचरणी प्रार्थना केली. श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळच्यावतीने माघ शुद्ध चतुर्थीला विनायक अवतार असलेला गणेश जन्म सोहळा बुधवार पेठेतील दगडूशेठ गणपती मंदिरात आयोजित करण्यात आला होता. सोहळ्यात सिद्धार्थ गोडसे तन्वी गोडसे यांसह शारदा गोडसे, संगीता रासने, ज्योती सूर्यवंशी, मृणालिनी रासने, मालन चव्हाण यांच्या हस्ते गणेशजन्माचे पूजन झाले. यावेळी ट्रस्टचे सुनील रासने, महेश सूर्यवंशी, हेमंत रासने, माणिक चव्हाण यांसह कार्यकर्ते देखील उपस्थित होते. अर्चना भालेराव, सुवर्णा इनामदार, राधिका बावकर, संध्या अवचट, हेमलता डाबी यांनी गणेश गीत गणेश जपमाळ, गणपतीचा गजर, अथर्वशिर्ष म्हटले. शुक्रवारी पहाटे ३ वाजता ब्रह्मणस्पती सूक्त अभिषेक झाला. त्यानंतर पहाटे ४ ते सकाळी ६ यावेळेत प्रख्यात गायक अवधूत गांधी यांनी श्रीं चरणी स्वराभिषेकातून गायनसेवा अर्पण केली. स्वराभिषेकातून हरिनामाचा गजर, अभंग, भजन, गोंधळातील गण, शाहिरी गण, गोंधळ, गवळण, जुगलबंदी आणि भैरवी या विविध प्रकारची गीते ऐकण्याची संधी पुणेकरांना यानिमित्ताने मिळाली. सकाळी ८ ते ११ आणि दुपारी २ ते सायंकाळी ५ यावेळेत गणेश याग होतो आहे . नगरप्रदक्षिणा सायंकाळी ६.३० वाजता दगडूशेठ गणपती मंदिरापासून कै.श्रीमती लक्ष्मीबाई दगडूशेठ हलवाई दत्तमंदिरापर्यंत चांदीच्या पालखीतून काढण्यात येईल . तेथे पादुका पूजन होऊन आणि गणपती मंदिरात नगरप्रदक्षिणेची सांगता होईल . रात्री ८ वाजता श्रीगणेशाची मंगलआरती आणि रात्री ११ ते पहाटे ३ वाजेपर्यंत श्री गणेश जागर आयोजित करण्यात आला आहे.

पुणे – बांधकाम सुरू असलेल्या इमारतीचा स्लॅब कोसळून सहा कामगारांचा मृत्यू झाल्याची घटना येरवडामधील शास्त्रीनगरमध्ये असलेल्या गल्ली क्रमांक आठमध्ये गुरुवारी 3 तारखेला रात्री अकरा वाजण्याच्या सुमारास घडली.
या घटनेत तीन कामगार जखमी झाले आहेत. तर सुमारे दहा कामगारांना सुरक्षित बाहेर काढण्यात आले.

स्लॅब कोसळल्याची माहिती मिळताच पोलिस आणि अग्निशमन दलाचे अधिकारी घटनास्थळी दाखल झाले होते. स्लॅबचा ढिगारा आणि सळयांमध्ये अडकलेल्या कामगारांना पोलिस प्रशासन आणि अग्निशमन दलाकडून बाहेर काढण्यात आले. काही कामगार या सळयांमध्ये अडकल्याने सळया कापून त्यांना बाहेर काढल्याची माहिती पोलिसांकडून देण्यात आली. शास्त्रीनगर चौकतील वाडिया बंगला गेट नंबर आठ येथील नवीन इमारतीचा स्लॅब भरण्याचे काम सुरु होते. काम सुरू असताना अचानक स्लॅब कोसळला आहे. त्यामुळे ही दुर्घटना घडली. त्यानंतर अग्निशामक दलाच्या चार ते सहा गाड्या घटनास्थळी पोहोचल्या व जवानांनी कामगारांना बाहेर काढण्याचे काम सुरु केले.

मृत्यू झालेल्या कामगारांचे मृतदेह ससून रुग्णालयात नेण्यात येत आहेत. तर जखमींवर उपचार सुरू करण्यात आले आहेत. बांधकाम सुरू असताना कामगारांच्या सुरक्षेसाठी आवश्यक असलेली खबरदारी बांधकाम प्रकल्पावर घेण्यात आली होती की नाही याचा पोलिस तपास करत आहे. या प्रकरणात रात्री उशिरापर्यंत गुन्हा दाखल करण्याचे काम सुरू होते.

रात्री अकरा वाजण्याच्या सुमारास या घटनेची माहिती मिळाली. त्यानंतर त्वरित पोलिस घटनास्थळी पोहोचले व बचावकार्य सुरू केले. या दुर्घटनेत सहा कामगारांचा मृत्यू झाला असून तिघे जखमी आहेत. जखमींवर उपचार सुरु आहे. स्लॅब नेमका कशामुळे कोसळला व कामगारांच्या सुरक्षेसाठी आवश्यक असलेली खबरदारी या ठिकाणी घेण्यात आली होती का नाही? याचा तपास सुरू आहे.
विजयसिंह चव्हाण, पोलिस निरीक्षक (गुन्हे) येरवडा पोलिस ठाणे

पुणे : श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळच्यावतीने यंदाचा गणेश जन्म सोहळा माघ शुद्ध चतुर्थी म्हणजेच आज ४ फेब्रुवारी २०२२ रोजी बुधवार पेठेतील दगडूशेठ गणपती मंदिरात आयोजित करण्यात आला. मुख्य गणेशजन्म सोहळा दुपारी १२ वाजता होणार आहे. यंदा ब्रह्मणस्पती सूक्त अभिषेक ,स्वराभिषेक, गणेशयाग, श्री गणेश जागर असे विविध धार्मिक कार्यक्रम आयोजित करण्यात आले.पहाटे ४ ते सकाळी ६ यावेळेत आळंदी येथील संत परंपरा असलेले प्रसिद्ध कीर्तनकार ,प्रवचनकार ,कलावंत गायक अवधूत गांधी यांनी श्रीं चरणी स्वराभिषेक अर्पण केलं . स्वराभिषेकातून हरिनामाचा गजर ,अभंग ,भजन ,गोंधळातील गण ,शाहिरी गण,डफया ,गोंधळ ,गवळण ,जुगलबंदी ,आणि भैरवी या विविध प्रकारची गीते ऐकण्याची संधी पुणेकरांना मिळाली . . श्रीमंत दगडूशेठ हलवाई गणपती ट्रस्टच्यावतीने मंदिराला कामधेनू गायीचं सुंदर विलोभनीय असे प्रतीक आणि आकर्षक सजावटीचा फुलांची आरास व विद्युतरोषणाई साकारली आहे मुख्य गणेशजन्म सोहळ्याला दुपारी १२ वाजता सुरुवात होणार आहे. यावेळी गणेशाची मंगलआरती होईल. नगर प्रदक्षिणा सायंकाळी ६. वाजता श्रीं ची मागाल आरती रात्री ८. वाजता तर, रात्री ११ ते पहाटे ३ वाजेपर्यंत श्री गणेश जागर आयोजित करण्यात आला आहे. मंदिराला फुलांसह आकर्षक विद्युतरोषणाई करण्यात आली आहे.

पुणे -PMPML कर्मचाऱ्यांच्या वेतन वाढीच्या मागणीसाठी आज या कर्मचाऱ्यांना घेऊन राष्ट्रवादी ने महापालिका भवनासमोर आंदोलन केले . राष्ट्रवादी काँग्रेस पार्टीचे पुणे शहराध्यक्ष प्रशांत जगताप यांच्या नेतृत्वाखाली पुणे महानगरपालिकेस मानवी साखळीद्वारे घेराव करून हे आंदोलन करण्यात आले.महापालिकेतील विरोधी पक्षनेत्या सौ दिपाली प्रदीप धुमाळ, कामगार सेलचे प्रदेशाध्यक्ष शिवाजीराव खटकाळे,रवींद्र माळवदकर, प्रदीप देशमुख,सोमनाथ शिंदे,किरण थेऊरकर,सुनील नलावडे,राजेंद्र कोंडे,हरीश ओहोळ,कैलास पासलकर आदींसह PMPML युनियन चे पदाधिकारी व कर्मचारी उपस्थित होते.महानगरपालिका आयुक्त विक्रम कुमार यांना राष्ट्रवादी काँग्रेस पार्टीच्या वतीने निवेदन देण्यात आले.

या संदर्भात जगताप म्हणाले,’इतिहासात पहिल्यांदाच आज पुणे महानगरपालिकेला मानवी साखळीद्वारे घेराव घालण्यात आला. PMPML कर्मचाऱ्यांच्या विविध मागण्यांसाठीपुणे महानगरपालिकेत भारतीय जनता पक्षाची सत्ता आल्यापासून PMPML कर्मचाऱ्यांवर सातत्याने अन्याय करण्याचं धोरण सत्ताधाऱ्यांनी अवलंबले आहे. वर्षानुवर्षे पुणेकरांची सेवा करणाऱ्या प्रामाणिक कर्मचाऱ्यांची पदोन्नती सत्ताधारी भाजपने केली नाही. सभागृहात चर्चा करूनही PMPML कर्मचाऱ्यांना सातवा वेतन आयोग लागू केला नाही. कंत्राटी कर्मचाऱ्यांना कायमस्वरूपी रुजू करणे याकडे महानगरपालिका प्रशासनाने दुर्लक्ष केले. संपूर्ण शहर कोरोनाच्या संकटाशी लढा देत असताना PMPML कामगारांनी आपली जबाबदारी चोखपणे बजावली मात्र या कोरोना काळातील सेवेचे वेतनही महानगरपालिकेतील सत्ताधाऱ्यांनी कर्मचाऱ्यांना दिले नाही. यावर कळस म्हणजे PMPML च्या खासगीकरणाची चाचपणी सुरू केली. पुणे शहराच्या विकासात PMPML कर्मचाऱ्यांचे मोठे योगदान आहे, असे असतानाही कर्मचाऱ्यांवर सातत्याने अन्याय होत आहे. कोरोनाच्या काळात बसेस बंद असतानाही ठेकेदारांना तब्बल १६० कोटी रुपये देणारे सत्ताधारी भाजप कर्मचाऱ्यांच्या वेतानाच्यावेळी मात्र हात आखडता घेतात. या अन्यायाला वाचा फोडण्यासाठी व कर्मचाऱ्यांच्या न्याय्य हक्कांसाठी राष्ट्रवादी काँग्रेस पार्टीच्या वतीने तीव्र आंदोलन करण्यात आले.या आंदोलनात कर्मचाऱ्यांनी मानवी साखळी द्वारे संपूर्ण महापालिकेस घेराव घातला होता. एक खासदार, सहा आमदार, महापौर, स्थायी समिती सभापती, सभागृह नेते, PMPML वरील संचालक भाजपचे असतानाही कर्मचाऱ्यांवर अन्याय होतोय याचा अर्थ भाजपला कर्मचाऱ्यांच्या हिताची पर्वा नाही, त्यांना फक्त ठेकेदाराचे कल्याण करायचे आहे. असे यावेळी प्रशांत जगताप यांनी सांगितले. राष्ट्रवादी काँग्रेस पार्टीचा शहराध्यक्ष व सभागृहातील सदस्य या नात्याने प्रशांत जगताप यांनी भारतीय जनता पक्षाला इशारा दिला की येत्या ७ दिवसांत PMPML कर्मचाऱ्यांना ७ वा वेतन आयोग लागू न झाल्यास पुणे शहरातील भारतीय जनता पक्षाच्या लोकप्रतिनिधींच्या घरासमोर, कार्यालयासमोर आंदोलन करण्यात येईल. कर्मचाऱ्यांच्या या अक्रोशाने भाजप नेत्यांचे रस्त्यावर फिरणेही अशक्य होईल. यासोबतच पुणे महानगरपालिकेत राष्ट्रवादी काँग्रेस पार्टीची सत्ता आल्यास पहिल्याच बैठकीत PMPML कर्मचाऱ्यांना सातवा वेतन आयोग लागू करण्याचा निर्णय घेतला जाईल असे अश्वासन त्यांनी कामगार बांधवांना दिले.

राज्य सरकारने सत्तेचा वापर करून केलेल्या प्रभाग रचने विरोधात कायदेशीर लढा देणार

पुणेकर जगताप यांना जागा दाखवतील: महापौरांच्या प्रतिमेची राष्ट्रवादीला भीती

पुणे-राज्यात असलेल्या सत्तेचा गैरवापर महाविकास आघाडी कसा करत आहे, हे प्रभाग रचना जाहीर झाल्यानंतर पुणेकरांच्या लक्षात आले आहे. पालिकेत सत्ता मिळविण्यासाठी सत्तेचा गैरवापर करत महाविकास आघाडीने नियमबाह्य पद्धतीने प्रभाग रचना केली तरी येणाऱ्या पालिकेच्या निवडणुकीत पुणेकर मतदार त्यांना जागा दाखविल्याशिवाय राहणार नाही, अशा शब्दात सभागृह नेते गणेश बिडकर यांनी राष्ट्रवादी काँग्रेसचे शहराध्यक्ष प्रशांत जगताप यांचा समाचार घेतला. निवडणुकीच्या निकालानंतर जगताप यांचा भ्रम निश्चित दूर होईल, असा दावा बिडकर यांनी केला.

प्रभाग रचना करताना टेकडीमुळे तयार होणारी नैसर्गिक हद्द तोडून विचित्र प्रभाग जोडावा लागत असेल, तर सरळमार्गी राजकारण करून आपल्याला जिंकता येणार नाही हेच जगतापांनी अप्रत्यक्षपणे मान्य केले का? काही महिन्यांपासून आघाडीची भाषा करणाऱ्या राष्ट्रवादीने आता थेट स्वबळावर लढण्यास समर्थ असून, १२२ जागांवर विजय मिळवू असा दावा शहराध्यक्ष जगताप करत आहेत, ही संख्या पुणे महानगरपालिकेची नाही तर पिंपरी चिंचवड आणि अन्य स्वराज्य संस्थांमधील असेल, असा टोला बिडकर यांनी लावला. जाती धर्माचे राजकारण करून आपण जिंकू असा समज जगताप यांनी करून घेतला आहे. मात्र त्यांना माहीत नाही सुज्ञ पुणेकर जाती- धर्मावर मतदान करत नाही. तो काम बघतो, आणि त्यांनी पंतप्रधान नरेंद्र मोदी, देवेंद्रजी यांचे काम पाहिले आहे, चार वर्षात पळणारी मेट्रो पहिली आहे.
स्वबळाची भाषा करणारे जगताप हे विसरतात की राज्यात तसेच देशात सत्ता असून ही त्यांचा आकडा कधी ६० च्या वर गेलेला नाही. ‘बेडूक फुगवला म्हणून तो हत्ती होत नाही’, असेही बिडकर म्हणाले. मागच्या पंचवार्षिक मध्ये प्रशांत जगताप हे महापौर असताना त्यांच्या पक्षाचा महापालिकेच्या निवडणुकीत दारुण पराभव झाला होता. त्याची पुनरावृत्ती होऊन परत नाचक्की होऊ नये, यासाठी त्यांचा हा केविलवाणा प्रयत्न चालू आहे. निवडणूक लढविण्यासाठी राष्ट्रवादीकडे सक्षम उमेदवार नाही त्यामुळेच भाजप मधील नगरसेवक आपल्याकडे येण्यास इच्छूक असल्याच्या घोषणा जगताप करत आहेत. पुढील २४ तासात राष्ट्रवादीने ८० उमेदवारांची नावे जाहीर करावीत, असे आव्हान सभागृह नेते बिडकर यांनी दिले. पुणेकर फक्त विकासाला मतदान करतात. थापाड्यांना नाही. टेंडरमधल्या टक्केवारीसाठी आरडाओरड करणाऱ्यांना जनता जागा दाखवते. शहराच्या विकासासाठी भकास आघाडी नको, की भ्रष्टवादी राष्ट्रवादी नको, म्हणनूच पुणेकरांनी ठरवले आहे. पुण्यासाठी पर्याय एकच, ‘यंदा परत कमळच..’ असा विश्वासही त्यांनी व्यक्त केला.

कायदेशीर लढा देणार

सत्तेचा चुकीचा वापर करून महाविकास आघाडी सरकारने प्रभाग रचना केली आहे. याविरोधात कायदेशीर लढा देणार असल्याचे सभागृह नेते बिडकर यांनी स्पष्ट केले. चुकीच्या पद्धतीने करण्यात आलेल्या प्रभागांवर हरकती आणि सूचना नोंदविण्यात येणार असून त्यामध्ये आवश्यक ते बदल करण्यास भाग पाडू असा निर्धार बिडकर यांनी व्यक्त केला.

पुणे : मुंबई विभागात ५ ते ७ फेब्रुवारी दरम्यान ७२ तासांचा ब्लॉक घेण्यात येणार आहे. या दरम्यान ठाणे ते दिवा स्थानका दरम्यान ५ व सहाव्या मार्गिकेचे काम केले जाईल.

त्यामुळे मुंबईला येणाऱ्या जवळपास ५० गाड्या रद्द केले असून यात पुणे स्थानकावरून धावणाऱ्या डेक्क्न, डेक्कन क्वीन एक्सप्रेस चार दिवसांठी करिता रद्द करण्यात आली आहे. तसेच पुण्याहून धावणारी कोयना एक्सप्रेस देखील रद्द झाली आहे.

४ ते ७ फेब्रुवारी दरम्यान पुणे -मुंबई डेक्कन एक्सप्रेस रद्द झाली तर ५ ते ८ फेब्रुवारी दरम्यान मुंबई – पुणे डेक्कन एक्सप्रेस धावणार नाही. तर ५ ते ७ फेब्रुवारी दरम्यान डेक्कन क्वीन एक्सप्रेस रद्द झाली आहे. यासह ४ व ५ फेब्रुवारी रोजी हेंद्राबाद -मुंबई एक्सप्रेस ही पुण्यापर्यंतच धावेल तर हुसेनसागर एक्सप्रेस देखील पुण्यापर्यंतच धावणार आहे.

पुणे : हडपसर रेल्वे टर्मिनलसाठी २१ कोटी, तर पुणे स्थानकावरील यार्ड रिमोल्डिंग व फलाटाच्या विस्तारीकरणासाठी जवळपास ३१ कोटी रुपये मंजूर झाले आहेत.

बहुचर्चित पुणे-नाशिक सेमी हायस्पीड कॉरिडॉरसाठी यंदाच्या अर्थसंकल्पात १ हजार रुपये मंजूर झाले आहे. यासह पुणे-मिरज-लोंढा मार्गासाठी सर्वाधिक म्हणजे जवळपास १५६६ कोटी रुपये मंजूर झाले आहेत. तसेच बारामती-लोणंदसाठी देखील १ हजार रुपये देऊन हेड खुले करण्यात आले आहे.

यंदाच्या अर्थसंकल्पात राज्याला रेल्वेसाठी जवळपास ११ हजार ९०३ कोटी रुपयांचा निधी मंजूर झाला आहे. रेल्वे अर्थसंकल्पात पायाभूत सुविधांवर भर दिला गेला आहे. पुण्यासाठी हा अर्थसंकल्प चांगला ठरला आहे. पुणे-मिरज-लोढा रेल्वेमार्गाच्या दुहेरीकरणासाठी व विद्युतीकरणासाठी कॅपिटल व ईबीआर असे मिळून जवळपास १५६६ कोटी रुपये मंजूर झाले आहेत. यामुळे दुहेरीकरणाच्या कामाला गती येईल.

हडपसर टर्मिनलचा विकास
पुणे स्थानकावर होणाऱ्या गाड्यांच्या गर्दीचे विभाजन करण्यासाठी हडपसर टर्मिनल उभे केले जात आहे. तीन फलाटांच्या विकासासह २ नवे स्टेबलिंग लाईन तयार केली जाणार आहे. तसेच नवे आरआरआय केबिन तयार करण्याचे नियोजन आहे. या २१ कोटींत हडपसर स्थानकाचा कायापालट होणार आहे.

पुणे स्थानकाचे यार्ड रिमोल्डिंग होणार
पुणे रेल्वे स्थानकाच्या यार्ड रिमोल्डिंग व फलाटाच्या विस्तारीकरणासाठी जवळपास ३१ कोटी रुपये मंजूर झाले आहे. यात पुणे स्थानकावरील दोन, तीन व सहा या क्रमांकांचे फलाट २४ डबे बसतील इतक्या लांबीचे होतील. त्यामुळे आता गाड्यांना होम सिग्नलवर थांबावे लागणार नाही.