पुणे -श्रीलंकेच्या सशस्त्र दलाच्या सहा अधिकाऱ्यांचे शिष्टमंडळ 10 ते 12 फेब्रुवारी 2022 दरम्यान उभय लष्करांमधील  चर्चेचा भाग म्हणून तीन दिवसांच्या  भारत दौऱ्यावर आले होते.  पुणे येथील दक्षिण कमांडच्या  मुख्यालया अंतर्गत अग्निबाज विभागातर्फे दोन्ही देशांच्या लष्करांमध्ये  अधिक चांगला समन्वय वृद्धिंगत करण्याच्या उद्देशाने 9व्या आर्मी टू आर्मी स्टाफ चर्चेचे  (AAST)  आयोजन करण्यात आले होते.

या परिषदेचे नेतृत्व भारतीय लष्कराच्या शिष्टमंडळाचे प्रमुख मेजर जनरल अनिल कुमार काशीद,एव्हीएसएम, व्हीएसएम, आंतरराष्ट्रीय सहकार्य अतिरिक्त महासंचालक,  आणि श्रीलंकेच्या  लष्कराच्या शिष्टमंडळाचे प्रमुख मेजर जनरल एचपी रणसिंघे आरडब्ल्यूपी, आरएसपी  यांनी केले. दोन्ही देशांनी प्रशिक्षण, द्विपक्षीय आणि बहुपक्षीय सरावाचे आयोजन, कला, क्रीडा आणि सांस्कृतिक देवाणघेवाण या क्षेत्रातील संबंध वाढवणे या प्रमुख मुद्द्यांवर प्रामुख्याने चर्चा केली. अंमलबजावणी करण्यात आलेल्या बाबींच्या प्रगतीवर आणि आगामी वर्षांतील नियोजित  कृती आराखड्यावर  चर्चा झाल्यावर  परिषदेचा समारोप झाला. ही चर्चा दोन्ही देशांदरम्यान वाढत्या  द्विपक्षीय लष्करी सहकार्य आणि सामंजस्य याचे प्रतीक  होती.

भारतभेटीवर आलेल्या  शिष्टमंडळाने 11 फेब्रुवारी 2022 रोजी मिलिटरी इन्स्टिट्यूट ऑफ टेक्नॉलॉजी (MILIT) आणि नॅशनल डिफेन्स अॅकॅडमी (NDA), खडकवासला येथे भेट दिली. या पथकाने कमांडंट आणि शिक्षकांशी प्रशिक्षण पद्धती आणि एमआयएलआयटीमध्ये अवलंबलेल्या   सर्वोत्तम पद्धतींबद्दल संवाद साधला. शिष्टमंडळाला एमआयएलआयटीमध्ये सुरू असलेल्या सशस्त्र दलांशी संबंधित तांत्रिक अभ्यासाविषयी माहिती देण्यात आली आणि एमआयएलआयटीमध्ये डीएसटीएससी अभ्यासक्रम शिकणाऱ्या श्रीलंकेच्या लष्करातील  शिकाऊ  अधिकाऱ्यांशीही संवाद साधला.

नॅशनल डिफेन्स अॅकॅडमी (NDA) च्या भेटीचे उद्दिष्ट दोन्ही देशांमधील ‘प्रशिक्षण आदानप्रदान कार्यक्रमाचा’ भाग म्हणून सहकार्य वाढवणे हे होते. भारत-श्रीलंका द्विपक्षीय संरक्षण सहकार्याचा हा सर्वात मजबूत आणि शाश्वत स्तंभ आहे. शिष्टमंडळाच्या सदस्यांना एनडीए मधील प्रशिक्षण पद्धती आणि संबंधित पायाभूत सुविधांबद्दल माहिती देण्यात आली. एनडीएमध्ये प्रशिक्षण घेत असलेल्या श्रीलंकन कॅडेट्सनीही कॅडेट्स मेस येथे या  शिष्टमंडळाच्या सदस्यांची भेट घेतली. शिष्टमंडळाने एअर मार्शल संजीव कपूर, एव्हीएसएम, व्हीएम, कमांडंट, एनडीए यांची भेट घेतली.

श्रीलंकन शिष्टमंडळाने कॉलेज ऑफ मिलिटरी इंजिनीअरिंग (CME), पुणे येथेही भेट दिली. इथे  त्यांना या महाविद्यालयातील प्रशिक्षण संबंधी पायाभूत सुविधांबद्दल माहिती देण्यात आली,  ज्याचा वापर लढाईशी संबंधित क्षेत्रातल्या उदयोन्मुख सुरक्षा आव्हानांसाठी सर्व संबंधित अभियांत्रिकी पैलूंवर प्रशिक्षण देण्यासाठी केला जातो. शिष्टमंडळासाठी लढाऊ अभियंता प्रात्यक्षिकही आयोजित करण्यात आले होते. याशिवाय भारताच्या समृद्ध वारसा आणि संस्कृतीची माहिती देणारा सांस्कृतिक दौराही प्रतिनिधींसाठी आयोजित करण्यात आला होता.

पुणे: स्वारद फाउंडेशनच्या वतीने छत्रपती शिवाजी महाराज मार्केटयार्ड आडते असोसिएशनच्या अध्यक्षपदी निवड झाल्याबद्दल बाप्पू भोसले यांचा सन्मान करण्यात आला.

छत्रपती शिवाजी महाराज मार्केट यार्ड येथे कार्यक्रमाचे आयोजन करण्यात आले होते. मुठा गावचे सरपंच शंकरनाना मोहोळ, स्वारद फाउंडेशनच्या संस्थापिका स्वाती मोहोळ, गौरी चव्हाण, सौरभ जाधव, मारुती चव्हाण यावेळी उपस्थित होते. कामगार युनियनच्या अध्यक्षपदी निवड झालेले संतोष नागरे, सचिव विशाल केकाणे यांच्यासोबतच निवडून आलेल्या व सर्व संचालक, विविध मान्यवर,कामगार युनियनच्या नवनिर्वाचित पदाधिकाऱ्यांचा देखील यावेळी सत्कार करण्यात आला.

यावेळी मुळशी तालुक्यातील शेतकऱ्यांना मार्केटयार्डमध्ये व्यवसाय करताना येणाऱ्या अडचणी संदर्भात चर्चा करण्यात आली. तसेच सर्व नवीन कार्यकारणी शेतकऱ्यांच्या पाठीशी आहे आणि त्यांच्या सर्व अडचणी दूर करण्याचा नक्की प्रयत्न करेल,अशी ग्वाही नवनिर्वाचित अध्यक्ष बाप्पू भोसले यांनी दिली.

पुणे : शिवाजीनगर आणि पुणे कंन्टोमेंट मतदारसंघ कांग्रेसचा बाले किल्ला होता पण काही स्वार्थी नेत्यांमुळे हातातून गेला. कॉंग्रेस पक्षाने ज्यांना महापौर केलं, उपमहापौर केलं ,आमदार केलं अशानीं गद्दारी करित पक्ष सोडला. आणि तेच आता पुन्हा कांग्रेस मध्ये दिसत आहे.शिवाजीनगर आणि पुणे कंन्टोमेंट मतदारसंघात काँग्रेसचा बालेकिल्ला प्रस्थापित करण्याची हीच वेळ आहे.आगामी निवडणूकीत नवीन युवा सूशिक्षत चेहर्‍यांना संधी दिली पाहिजे असे मत  पुणे शहराध्यक्ष रमेश बागवे यांनी व्यक्त केले.
        पुणे शहर जिल्हा काँग्रेस कमिटीचे सरचिटणीस विनोद रणपिसे यांनी बोपोडी येथील अग्रवाल धर्मशाळा येथे कार्यकर्ता संवाद मेळावा आणि पक्ष प्रवेश कार्यक्रम आयोजित केला होता.याप्रसंगी रमेश बागवे बोलत होते. कार्यक्रमांस माजी आमदार दिप्ती चौधरी, माजी नगरसेवक दत्ता बहिरट, नंदलाल धिवार, शैलेजा खेडेकर, पुणे शहर महिला अध्यक्ष पूजा मनिष आनंद, बोपोडी ब्लॉक अध्यक्ष राजेंद्र भुतडा, अंजनेय साठे आदी मान्यवर उपस्थित होते. यावेळी बोपोडी प्रभागातील बोपोडी गावठाण, औंधरोड, चिखलवाडी, गोखलेनगर अशा विविध भागातून 10 महिला व 10 पुरुषांनी असे सुमारे 100 ते 150 कार्यकर्त्यांनी विनोद रणपिसे यांच्या नेतृत्वात काँग्रेस पक्षात प्रवेश केला.
यावेळी दत्ता बहिरट म्हणाले की, कॉग्रेसचे तिन्ही उमेदवार निवडून येथील असा बोपोडी मतदार संघ आहे. विनोद रणपिसे यांनी संवाद मेळावा आयोेजित केला, असेच संवाद, मंथन मेळावे पुणे शहरात ठिकठिकाणी पक्ष मजबूत करण्यासाठी आयोजित केले पाहिजे.
तसेच विनोद रणपिसे म्हणाले की, काँग्रेस शिवाय पुणे शहरासोबतच देशाला पर्याय नाही त्यामुळे महापालिकेवर काँग्रेसचे वर्चस्व वाढले तर महाराष्ट्रातही सत्ता येईल आणि पुढे केंद्रातही येईल. त्यासाठी कॉंग्रेस मध्ये युवा पिढी प्रवेश करित आहे, त्यांना संधी दिली पाहिजे. कार्यक्रमाचे सूत्रसंचालन राजेंद्र भुतडा यांनी केले असून सौ.पूजा आनंद यांनी आभार प्रदर्शन व्यक्त केले.

पुणे, दि.१३:- डॉ. सलीम अली पक्षी अभयारण्य परिसरातील महसूल विभागाकडील क्षेत्र वन विभागाकडे हस्तांतरीत करण्यासाठी प्रयत्न करण्यात येणार असून पक्ष्यांना सुरक्षित अधिवास मिळण्याच्यादृष्टीने प्रयत्न करावे असे प्रतिपादन पर्यावरण मंत्री आदित्य ठाकरे यांनी व्यक्त केले.

येरवडा येथील सलीम अली पक्षी अभयारण्यास भेटीप्रसंगी ते बोलत होते. यावेळी विधान परिषदेच्या उपसभापती नीलम गोऱ्हे, आमदार सुनील टिंगरे, माजी मंत्री सचिन अहिर, जिल्हाधिकारी डॉ.राजेश देशमुख, मनपा आयुक्त विक्रम कुमार, पोलीस आयुक्त अमिताभ गुप्ता, उपवनसंरक्षक राहुल पाटील, अतिरिक्त मनपा आयुक्त राहुल खेमणार आदी उपस्थित होते.

मंत्री श्री. ठाकरे म्हणाले, गेल्या दोन वर्षापासून राज्य शासन वन वाचविण्यासाठी मोठ्याप्रमाणात पर्यंत करीत आहेत. पक्षी आणि वन्यजीवांना सुरक्षित अधिवास मिळणे गरजेचे आहे. पक्षी अभयारण्य परिसरात अतिक्रमण करणाऱ्यांवर कारवाई करण्यात येणार असून संरक्षणाच्यादृष्टीने परिसरात पोलीसाची गस्त वाढविण्याच्या सूचना पोलीस आयुक्तांना दिल्या आहेत. तसेच गैरप्रकार होऊ नये म्हणून सीसीटीव्ही बसविण्याचा सूचनाही देण्यात आल्या आहेत.

अभयारण्य परिसरात पुणे महानगरपालिकेने स्वयंसेवी संस्था आणि नागरिकांच्या सहकार्याने स्वच्छता मोहिम राबवावी. नागरिकांनी या पक्षी अभयारण्याला भेट द्यावी आणि पर्यावरणाच्यादृष्टीने पुण्यातील हिरवे आच्छादन टिकवण्यासाठी झाडाची लागवड करावी असे आवाहन मंत्री श्री. ठाकरे यांनी केले.

पुण्यातील नागरिक पर्यावरणाप्रती जागरुक असून त्यांच्या सहकार्याने पुण्याला २०३० पर्यंत कार्बन न्यूट्रल करण्यासाठी प्रयत्न करणार असल्याचेही ते म्हणाले.

मनपा आयुक्त विक्रम कुमार यांनी अभयारण्य परिसरात होत असलेल्या कामांची माहिती दिली.

नागरी,सरकारी कामात अडथळे

पुणे – महापालिकेत शिवसैनिकांनी किरीट सोमय्या यांच्यावर हल्ला केला होता. त्याच ठिकाणी त्यानंतर भाजप कडून किरीट यांचा सत्कार करण्यात आला. त्यावेळी मोठ्या प्रमाणात कार्यकर्ते जमले होते. त्यामुळे आता पोलिसांनी गुन्हा दाखल केलाय, महापालिका पदाधिकारी, एक आमदार, यांच्यावर गुन्हा दाखल केला किंवा नाही हे समजू शकले नाही, मात्र भाजपा शहर अध्यक्ष आणि काही नगरसेवक यांच्यासह 300 जणांवर गुन्हा दाखल करण्यात आला आहे .बंदी आदेश उल्लंघन,घोषणाबाजी आणि बेकायदेशीर जमाव जमवून, पोलीस साहित्याचे नुकसान करणे, नागरिक आणि काही ठराविक नगरसेवक, ठराविक पत्रकार यांना अटकाव निर्माण होईल अशी परिस्थिती निर्माण करून त्यांच्या कामात अडथळे आणणे, धक्काबुक्की करणे या प्रकरणी गुन्हा दाखल झाला आहे

भाजप नेते किरीट सोमय्या यांच्या पुणे दौऱ्यात अनेक घडामोडी घडल्या होत्या. आधी त्यांना शिवसैनिकांकडून धक्काबुक्की झाली. त्यानतंर त्याच ठिकाणी भाजपकडून सोमय्यांचा सत्कार करण्यात आला होता.

जमावबंदी आदेश भंग, विनापरवाना कार्यक्रम घेणे यात महापालिका पदाधिकारी अग्रभागी होते काय, याबाबत त्यांच्या नावाचा स्पष्ट उल्लेख पोलिसांकडून केला गेला नाही .

पुणे-पर्वती मतदार संघातील नागरिकांच्या आरोग्य सेवेसाठी पदवीधर आमदार अरुण अण्णा लाड यांच्या विकास निधीतून नगरसेविका सौ.अश्विनी नितीन कदम यांच्या विशेष प्रयत्नातून पूर्णवेळ रुग्णवाहिकेचा लोकार्पण सोहळा महाराष्ट्र राज्याचे उपमुख्यमंत्री तथा अर्थमंत्री अजित पवार यांच्या हस्ते विधानभवन येथे आज संपन्न झाला.

याप्रसंगी नगरसेविका अश्विनी कदम म्हणाल्या की पर्वती मतदार संघात राष्ट्रवादी काँग्रेस पार्टी च्या वतीने निवडणूक लढवली असताना पर्वती मतदार संघातील नागरिकांच्या उत्तम आरोग्या सुविधेच्या विषयी मी कायम प्रयत्नशील असते. जबाबदार लोकप्रतिनिधी म्हणून कोरोनाच्या प्रादुर्भावात लसीकरण,आरोग्य तपासणी शिबीर , राज्य स्तरावर नामाजलेले सुसज्य असे अल्प दरातील MRI सेंटर व त्यामध्ये एक्सरे,सर्व रक्त-लघवी चाचण्या व तसेच प्रभागात डोळे तपासणी ,विनामूल्य चष्मे वाटप,अपंग व्यक्तींना कृत्रिम अवयव देणे असे आरोग्य विषयक शिबीर घेत जास्तीत जास्त लोकांना कसा आरोग्याचा फायदा होईल यासाठी प्रयत्नशील राहिले आहे व पुढे ही राहील.याचाच भाग म्हणून खूप पाठपुरावा करत पर्वती मतदार संघातील नागरिकांसाठी पूर्णवेळ रुग्णवाहिका उपलब्ध केली.यावेळी शहराध्यक्ष प्रशांत जगताप, सांगली जिल्हा परिषद गटनेते शरद लाड,विरोधी पक्षनेते दिपाली धुमाळ , महिला शहराध्यक्ष मृणालिनी वाणी , युवक राष्ट्रवादी काँग्रेस पार्टीचे प्रदेश कार्याध्यक्ष रविकांत वरपे, अमोल ननावरे, विनीत मोकाशी, ऍड.प्रमोद गालिंदे, डॉ.सुनीता मोरे,फारुख शेख,संकेत शिंदे, सचिन समेळ,संग्राम वाडकर ,सचिन जमदाडे ,राहुल गुंड, अमोल पोतदार, प्रमोद कोठावळे, मंथन जागडे,महादेव जाधव ,सोमनाथ खंडाळे, प्रसाद खंडाळे, सौरभ ढावरे ,सुरज बनसोडे ,कृष्णा कोळी, मयूर शिंदे ,गणेश हनवते, यश नांदे, अरुण ढावरे ,योगेश लोंढे, अजय मिसाळ उपस्थितीत होते.

पुणे – गेल्या महापालिका निवडणुकीच्या अगोदर कात्रज मधील शिरोळे, कदम यांच्यानंतर आता होऊ घातलेल्या महापालिका निवडणुकीपूर्वी मनसेला झटका बसला तो रुपाली पाटलांच्या राष्ट्रवादी प्रवेशाने, आता त्यानंतर रावडी नसलेल्या पण शिवाजीनगरच्या परिसरात सभ्यपणे हक्कासाठी लढाई लढणाऱ्या युवा नेत्याला मनसे मुकली आहे, मनसेचे शिवाजीनगर विधानसभा मतदारसंघाचे अध्यक्ष डॉ.अंजनेय साठे यांनी पदाधिकाऱ्यांसह कॉंग्रेसमध्ये जाहीर प्रवेश केला आहे. मुंबईत टिळक भवन येथे प्रदेशाध्यक्ष नाना पटोले, महसूलमंत्री बाळासाहेब थोरात, माजी मुख्यमंत्री पृथ्वीराज चव्हाण, ऊर्जा मंत्री नितीन राऊत, प्रणिती शिंदे, यांच्या उपस्थितीत कॉंग्रेस पक्षात प्रवेश केला.शहर कॉंग्रेस चे अध्यक्ष रमेश बागवे, प्रदेश उपाध्यक्ष मोहन जोशी, रोहित टिळक यांच्या उपस्थितीत प्रवेश झाला. कॉंग्रेसचे माजी नगरसेवक दत्ता बहिरट आणि गौरव बोराडे यांनी या प्रवेशात मोलाची भूमिका बजावली. तरूण युवा कार्यकर्त्याला कॉंग्रेसने संधी दिली आहे.

शिवाजीनगर परिसरातील पाणीप्रश्नावर सातत्याने आवाज उठविणारे मनसे युवा नेते म्हणून अंजनेय यांच्याकडे पाहिले जात . सुशिक्षित आणि विविध स्वतरावरील वर्गात साठे यांचा असलेला सरळमार्गी ,अभ्यासू संपर्क कॉंग्रेसला बळ देणारा ठरेल असे नगरसेवक अविनाश बागवे यांनी म्हटले आहे.

‘माझ्या घरातच कॉंग्रेसची वैचारिक विचारसरणी आहे. माझे पणजोबा स्वर्गीय विनायक साठे हे स्वातंत्र्य सैनिक होते. त्यांच्या कार्याचा गौरव करत कॉंग्रेसकडून 1957 मध्ये त्यांना अन्न व नागरी पुरवठा मंत्रीपदाची संधी देण्यात आली होती. त्यांचाच वैचारीक वारसा घेऊन मी राजकारणात असून कॉंग्रेसकडून माझ्यासारख्या युवा कार्यकर्त्याला दिलेला मान सन्मान तसेच माझ्यावर दाखविलेला विश्‍वास मी निश्‍चितपणे सार्थ करून दाखविण’ – डॉ. अंजनेय साठे

पुणे-राज्यातील सत्ताधारी महाविकास आघाडीतील अंतर्गत मतभेद उफाळले आहेत आणि आघाडीचे मंत्री एकापाठोपाठ तुरुंगाच्या दिशेने जात आहेत. पाच राज्यांच्या विधानसभा निवडणुकीचा निकाल १० मार्च रोजी लागल्यानंतर अशी स्थिती निर्माण होईल की, महाविकास आघाडीला सत्तेवरून जावे लागेल, असे भारतीय जनता पार्टीचे प्रदेशाध्यक्ष आ. चंद्रकांतदादा पाटील यांनी शनिवारी सांगितले.भाजपा कार्यकर्त्यांच्या विरोधात पोलिसांकडून होत असलेल्या पक्षपाती कारवाईच्या विरोधात पिंपरी चिंचवड पोलीस आयुक्तांना निवेदन सादर केल्यानंतर ते पत्रकारांशी बोलत होते.

आ.चंद्रकांतदादा पाटील म्हणाले की, महाविकास आघाडी सरकारची सध्याची स्थिती पाहिली तर कोणीही विश्लेषण करणारा सांगू शकेल की, हे सरकार आता फार दिवस टिकणार नाही. आघाडीतील मतभेद उफाळले आहेत. दोन मंत्र्यांचा राजीनामा झाला. तसे बाकीच्यांचेही होतील. पोलिसांच्या बदल्यांबाबत माजी मुख्य सचिव सीताराम कुंटे यांनी त्यांना अनिल देशमुख यांच्याकडून यादी मिळत होती असे सांगितले तर देशमुख म्हणतात की, त्यांना शिवसेनेचे मंत्री अनिल परब यांच्याकडून मिळत होती व ते ती पुढे पाठवत होते. दुसरीकडे आयपीएस अधिकारी परमवीरसिंग यांनी सांगितले की, सचिन वाझे याला पुन्हा नोकरीत घेण्यासाठी त्यांच्यावर मुख्यमंत्री उद्धव ठाकरे आणि पर्यावरणमंत्री आदित्य ठाकरे यांनी दबाव आणला होता. या गंभीर आरोपांनंतर आघाडीच्या नेत्यांनी काहीही संवेदनशीलता दाखवली नसली तर ही प्रकरणे गुन्ह्याची आहेत. अनिल देशमुख यांच्या प्रकरणात उच्च न्यायालयाने सीबीआय चौकशीचा आदेश दिला तसा या गंभीर प्रकरणांबाबत न्यायालय न्याय देईल. अशी स्थिती निर्माण होईल की, आघाडीच्या नेत्यांना सत्ता सोडून घरी जावे लागेल.

त्यांनी सांगितले की, पिंपरी चिंचवड व एकूण संपूर्ण महाराष्ट्रात ज्या प्रकारे सत्तेचा दुरुपयोग चालू आहे तो आम्ही सहन करणार नाही. किरीट सोमय्या यांचा सत्कार करून काल पुण्यात भाजपा कार्यकर्त्यांनी दाखवून दिले की, आम्हीही काही कमी नाही. पिंपरी चिंचवडमध्ये खोट्या केसेस करून पोलिसांमार्फत आम्हाला हे सरकार किती दाबणार असा आपला सवाल आहे. भाजपाच्या कार्यकर्त्यांना न्याय मिळाल्याशिवाय आपण स्वस्थ बसणार नाही. पोलिसांनी निःपक्षपातीपणे चौकशी केली नाही तर आपण न्यायालयात जाऊ.

पुण्यात भाजपा नेते किरीट सोमय्या यांचा कार्यकर्त्यांनी सत्कार केल्यानंतर काँग्रेस आणि आम आदमी पार्टीने गोमुत्र आणि गुलाबजल टाकून त्या पायऱ्या स्वच्छ केल्या. त्याविषयी एका पत्रकाराने प्रतिक्रिया विचारली असता आ.चंद्रकांतदादा पाटील म्हणाले की, काँग्रेसचा गोमुत्र आणि गाईवरील विश्वास वाढलेला पाहून आपल्याला खूप आनंद झाला.