पुणे-छत्रपती शिवाजी महाराजांच्या मावळ्यांनी शरीर सौष्ठवाच्या शक्तीच्या बळावर असाध्य असे पराक्रम केले. त्यामुळेच छत्रपती शिवाजी महाराजांच्या जन्मोत्सवाच्या पूर्वसंध्येला अखिल भारतीय शिवमहोत्सव समितीच्या वतीने प्रतिवर्षी हा अनोखा मानवंदनेचा कार्यक्रम आयोजित करण्यात येतो. या प्रसंगी जिजाऊ ब्रिगेडच्या वतीने महिलांच्या मशाल उत्सव साजरा करण्यात आला. बॉडी बिल्डर्सच्या मानवंदेसाठी महाराष्ट्रश्री पै.संदेश नलावडे, विक्रांत घेरपडे, समीर हळंदे, व इतर शरीर सौष्ठव पटू मोठ्या संख्येने उपस्थित होते. या प्रसंगी जिजाऊ ब्रिगेडच्या स्नेहाताई खेडेकर, प्रा.सुवर्णाताई बनबरे, जयश्रीताई पाटील, रुचिका रणपिसे, पूजा झोळे, मराठा सेवा संघाचे मारूतीराव सातपुते, मिलिंद लवांडे, जितेंद्र साळुंखे, संभाजी ब्रिगेडचे संतोष शिंदे, प्रशांत धुमाळ, राजाराम महाराज स्मृती मंडळाचे बापूसाहेब देशमुख, मयूर शिरोळे, युवराज ढवळे, महादेव मातेरे, संजय चव्हाण, सचिन जोशी आदि उपस्थित होते. विराज तावरे यांनी सूत्रसंचालन केले, तर कैलास वडघुले यांनी आभार मानले.

पुणे- वीज बिले न भरल्याचे कारण देऊन ,वाढीव रकमेची बिल वसुली केली तर खबरदार , वीज ग्राहकाला १५ दिवसांची नोटीस देऊन त्यांची बाजू मांडण्याची संधी द्या त्याशिवाय थेट वीज तोडली तर मात्र आप च्या वतीने उग्र नागरी आंदोलन छेडले जाईल असा इशारा आप च्या वतीने देण्यात आला आहे. .आम आदमी पक्षाचे खडकवासला विधानसभा मतदार संघांचे अध्यक्ष कृष्णा गायकवाड ,प्रवक्ते डॉ अभिजित मोरे तसेच संपर्क प्रमुख तुषार जंगम व त्यांचे सहकारी निलेश चाटी सर, सागर शिंदे, पर्वती मतदार संघांचे संघटक. विनोद जवळकर धनकवडी रिक्षा चालक सचिन जगताप यांनी या संदर्भात महावितरणच्या पद्मावती कार्यालयात प्रत्यक्ष जाऊन निवेदन दिले आहे

या वेळी कृष्णा गायकवाड म्हणाले कि,’ कोवीड काळात लॉकडाऊन मुळे लोकांची या राज्य सरकार ने बिकट अवस्था केलेली असताना दुसरीकडे महावितरण कंपनी ने वाढीव बिले देऊन मनमानी कारभार चालवलेला आहे लोकांची आर्थिक परिस्थिती बिकट असताना देखील पंधरा दिवसांची नोटीस न देता वीज कनेक्शन तोडून मीटर घेऊन जातात व पुन्हा ते जोडण्या साठी नवीन मीटर चे कनेक्शन घेण्यासाठी सांगितले जाते. अशा प्रकारच्या विविध नागरिकांच्या अडचणीवर आम आदमी पक्षाने बालाजीनगर धनकवडी येथे 7 दिवसांचे आंदोलन करण्यात आले होते. आंदोलनात नागरिकांच्या अभिप्राय व सह्यांची मोहीम घेऊन पद्मावती येथील महावितरण कंपनी चे कार्यकारी अभियंता काळुमाळी साहेब यांना निवेदन देऊन सांगण्यात आले कीजर नोटीस न देता कोणाचेही वीज कनेक्शन तोडू नये. अन्यथा संपूर्ण पुण्यात विविध मार्गानी आमचे आंदोलन घेण्यात येईल .

उद्योग मंत्री सुभाष देसाई यांनीही दिली प्रकल्पाला भेट

पुणे दि.१९: ई कॉशेस मोबीलिटी इलेक्ट्रीक व्हेईकल या नवीन इलेक्ट्रीक वाहन निर्मिती करणाऱ्या प्रकल्पाचे पर्यावरण मंत्री आदित्य ठाकरे यांच्या हस्ते भूमिपूजन करण्यात आले. उद्योग मंत्री सुभाष देसाई यांनीदेखील प्रकल्पाला भेट देऊन माहिती घेतली.

तळेगाव एमआयडीसी येथे झालेल्या कार्यक्रमप्रसंगी खासदार श्रीरंग बारणे, आमदार सुनील शेळके, उद्योग समूहाचे अध्यक्ष पीटर केन्झ,संस्थापक राम तुलुमूरी, संचालक रवी पंगा उपस्थित होते.

ई कॉशेस मोबीलिटी या युकेच्या उद्योग समूहाने महाराष्ट्र राज्याची गुंतवणूकीसाठी निवड केली, ही आनंदाची बाब असल्याचे सांगून पर्यावरण मंत्री श्री. ठाकरे म्हणाले, राज्य शासनाने या क्षेत्राला प्रोत्साहन देण्यासाठी इलेक्ट्रिक वाहन धोरण तयार केले आहे. इलेक्ट्रिक वाहने निर्मिती, त्यासाठीच्या पायाभूत सुविधा निर्माण करण्यासाठी शासन सातत्याने प्रोत्साहन देत आहे. इलेक्ट्रिक वाहनांची निर्मिती करणाऱ्या उद्योग, संस्थांना पाठबळ देण्याचे शासनाचे धोरण असल्याचेही त्यांनी सांगितले.

उद्योग मंत्री श्री.देसाई म्हणाले, महाराष्ट्राचे इलेक्ट्रिक वाहन धोरण चांगले असल्याने गुंतवणूकदार गुंतवणूकीसाठी महाराष्ट्राला पसंती देत आहे. या धोरणामुळेच राज्यात गुंतवणूक वाढेल, असा विश्वास त्यांनी व्यक्त केला. अशा प्रकल्पांना शासन सर्वोतोपरी सहकार्य करेल, असेही त्यांनी सांगितले.

यावेळी उद्योग क्षेत्रातील मान्यवर तसेच विविध उद्योग समूहाचे प्रतिनिधी उपस्थित होते

कस्तुरी शिक्षण संस्थेत मोफत कायदेविषयक सल्ला व मार्गदर्शन

पुणे : “नोकरी, व्यवसाय करणाऱ्या महिलांना समाजात चुकीच्या प्रवृत्तीचा सामना करावा लागतो. महिलांच्या संरक्षणासाठी अनेक कायदे आहेत. या कायद्यांच्या आधाराने या प्रवृत्ती विरोधात लढण्यासाठी शिक्षण गरजेचे आहे. कायद्याचे ज्ञान घेतले, तर असुरक्षित वातावरणातही आपल्याला संकटावर मात करता येते आणि न्याय मिळवता येतो,” असे प्रतिपादन पुणे येथील प्रमुख जिल्हा व सत्र न्यायाधीश एस. ए. देशमुख यांनी केले. चाणाक्ष बुद्धीच्या जोरावर यशाची शिखरे गाठता येतात, असेही त्यांनी नमूद केले.

शिक्रापुर (ता. शिरुर) येथील कस्तुरी शिक्षण संस्थेच्या १९ व्या वर्धापन दिनानिमित्त स्कुल ऑफ लॉ यांच्यातर्फे आयोजित मोफत कायदेविषयक सल्ला व सहाय्य केंद्राच्या उद्घाटनावेळी प्रमुख पाहुणे म्हणून देशमुख बोलत होते. यावेळी दिवाणी न्‍यायाधीश (कनिष्‍ठ स्‍तर व फौजदारी दंडाधिकारी वर्ग-१ घोडनदी) व्ही. व्ही कुलकर्णी, सहदिवाणी न्‍यायाधीश पी .के. करवंदे, द्वितीय सहदिवाणी न्यायाधीश आर. डी. हिंगणगावकर, तृतीय सहदिवाणी न्यायाधीश के. एम. मुंढे, कस्तुरी शिक्षण संस्थेचे संस्थापक डॉ. पंडित पलांडे, संस्थेच्या अध्यक्षा आणि विधी महाविद्यालयाच्या प्राचार्या डॉ. जयश्री पलांडे, उपाध्यक्ष डॉ. प्रतीक पलांडे, उपप्राचार्या डॉ. सपना देव आदी उपस्थित होते.

डॉ. पंडित पलांडे म्हणाले, “शिरुर तालुक्यातील विद्यार्थ्यांना वकिलीचे शिक्षण घ्यायचे असेल, तर पुणे किंवा अहमदनगरला जावे लागत होते. त्यामुळे गेली चार ते पाच वर्षे लॉ कॉलेजची मान्यता मिळवण्यासाठी प्रयत्न सुरु होते. दोन वर्षांपूर्वी कॉलेजला मान्यता मिळाली. कोरोनामुळे दोन वर्ष प्रवेश प्रक्रियापासून अभ्यासापर्यत सगळेच ऑनलाईन होते. संस्थेच्या वर्धापन दिनानिमित्त आणि कोरोनाचे सावट बऱ्यापैकी कमी झाल्याने विद्यार्थ्याशी संवाद साधण्याचा योग आला.”

डॉ. जयश्री पलांडे, डॉ. प्रतीक पलांडे यांनी संस्थेच्या वाटचाली विषयी माहिती दिली. सूत्रसंचालन प्रा. संजय राऊत, रीना क्लिंटन यांनी केले. डॉ. सपना देव यांनी आभार मानले.

शेकडो लोकांनी घेतले मार्गदर्शन

१४ ते १९ फेब्रुवारी या कालावधीत मोफत कायदेशीर सल्ला व सहाय्य सप्ताह पार पडला. सप्ताहात सामान्य लोकांच्या अनेकविध अडचणी व कौटुंबिक कलह, घटस्फोट, कौटुंबिक हिंसाचार, तसेच लहान मुलांचे हक्क व अधिकार, मुलांकरता कौन्सिलिंग, शेती विषयक कायदे आदीसाठी कायदेशीर मदत देण्यात आली. पुण्यातील तसेच शिरूर भागातील विधिज्ञ, समुपदेशकांनी मार्गदर्शन केले, असे डॉ. सपना देव यांनी नमूद केले.

शिवाजी महाराजांच्या कार्याचा परिचय नव्या पिढीला करून देण्यासाठी गड-किल्ल्यांचा विकास
–उपमुख्यमंत्री अजित पवार

पुणे, दि.१९:  छत्रपती शिवाजी महाराज यांच्या जीवन आणि महान कार्याचा परिचय नव्या पिढीला करून देण्यासाठी शासनामार्फत महाराष्ट्रातील गड किल्ल्यांचा विकास करण्यात येत आहे, त्यांच्या मूळ रचनेला धक्का न लावता हा वारसा जतन करण्यात येईल, असे प्रतिपादन उपमुख्यमंत्री अजित पवार यांनी केले.

किल्ले शिवनेरीवर उपमुख्यमंत्री अजित पवार यांच्या उपस्थितीत शिवजन्मोत्सव  उत्साहात साजरा झाला, त्यावेळी श्री. पवार बोलत होते. कार्यक्रमास महसूलमंत्री बाळासाहेब थोरात, गृहमंत्री दिलीप वळसे पाटील, पर्यटनमंत्री आदित्य ठाकरे, माहिती व जनसंपर्क राज्यमंत्री अदिती तटकरे, खासदार छत्रपती संभाजीराजे, जिल्हा परिषद अध्यक्षा निर्मला पानसरे, आमदार अतुल बेनके,  मराठा सेवा संघाचे प्रदेशाध्यक्ष विजय घोगरे, माजी आमदार शरद सोनवणे आदी उपस्थित होते.

उपमुख्यमंत्री पवार म्हणाले, छत्रपती शिवाजी महाराज रयतेचे राज्य स्थापन करणारे युगपुरुष होते. त्यांनी अठरापगड जातींना बरोबर घेऊन रयतेचे राज्य स्थापन केलं. महाराजांसारख्या युगापुरुषाने महाराष्ट्रात जन्म घेतला हे आपले भाग्य आहे. ४०० वर्षानंतरही शिवाजी महाराजांविषयी नव्या पिढीच्या मनात आदर आणि अभिमान कायम आहे. महाराजांच्या नावाने प्रत्येक पिढीला शौर्याची आणि जनकल्याणाची प्रेरणा दिली आहे.

छत्रपती शिवरायांच्या कार्याची प्रेरणा नव्या पिढीला मिळावी यासाठी गडकिल्ल्यांचे संवर्धन करण्याची मुख्यमंत्री उद्धव ठाकरे यांच्या नेतृत्वाखाली शासनाची भूमिका असून यासाठी पुरातत्व, पर्यावरण, वन विभाग आदी विभागांच्या माध्यमातून जुन्या बांधकाम रचनेला धक्का न लावता या वारसास्थळांचे जतन करण्यात येईल. राज्यात आघाडी सरकार स्थापन झाल्यानंतर शिवनेरी किल्ले संवर्धनासाठी २३ कोटी रुपये देण्यात आले आहेत. त्यातून किल्ल्याच्या परिसरात विकास कामे सुरू आहेत. किल्ले रायगड  संवर्धनासाठीही मोठ्या प्रमाणात निधी दिला असून अनेक विकासकामे तेथे सुरू आहेत.

शिवजयंती ही मराठी माणसांच्या स्वप्नपूर्तीची जयंती आहे. यंदा कोरोनाचे सावट असल्यामुळे किल्ल्यावर काही बंधनात जयंती साजरी करावी लागली. कोरोनाचे सावट कमी झाल्यावर सर्व निर्बंध खुले करण्याबाबत विचार केला जाईल.

शिवाजी महाराजांनी जुन्नर येथील हापूस आंबा जपला. या आंब्याचे जतन करण्याचे काम सुमारे साडेतीनशे वर्षांपासून येथील शेतकऱ्यांनी केले. त्याला भौगोलिक मानांकन (जी.आय.) मिळण्यासाठी जिल्हा नियोजन समितीच्या माध्यमातून दिलेल्या २७ लाख रुपयांच्या निधीतून प्रयत्न केले जातील.

मराठा समाजाला आरक्षण मिळावे ही कायमच राज्य शासनाची भूमिका आहे. मात्र घटनात्मक तरतुदीमुळे आरक्षणाची मर्यादा ५० टक्क्यांच्या वर नेता येणार नाही ही भूमिका सर्वोच्च न्यायालयाने घेतली आहे. त्यावर मार्ग काढण्यासाठी शासनाचे सर्व ते प्रयत्न सुरू आहेत. कोणत्याही समाजाच्या आरक्षणाला धक्का न लागता हे आरक्षण देण्याची शासनाची भूमिका आहे. त्यासाठी प्रधानमंत्री महोदयांचीही भेट घेऊन कायद्यात बदल करून आरक्षणाची मर्यादा वाढवण्याबाबत विनंती केली आहे. कोणतेही राजकारण न करता सर्वांना बरोबर घेऊन आपल्याला यातून मार्ग काढायचा आहे.

प्रारंभी शिवजन्मस्थानी पारंपरिक वेशातील महिलांनी शिवरायांची महती सांगणारा पाळणा गायिला. त्यानंतर पोलीस पथकाने बंदुकीच्या तीन फैरी झाडून छत्रपती शिवरायांना मानवंदना दिली. यावेळी जुन्नर येथील महिला पथकाने ढोल व लेझीमचे पारंपरिक सादरीकरण केले. त्यानंतर उपमुख्यमंत्री पवार यांनी बालशिवाजी व जिजाऊंच्या पुतळ्यास पुष्पहार अर्पण केला. छत्रपती शिवाजी महाराजांच्या प्रतिमेची पालखी उपमुख्यमंत्र्यांनी वाहीली.

भारतीय डाक विभागाने केलेल्या ‘जुन्नर रत्न’ या पोस्टकार्ड संचाचे प्रकाशनही उपमुख्यमंत्र्यांच्या हस्ते करण्यात आले. १५ सचित्र पोस्ट कार्डाच्या या संचात येथील किल्ले, जैवविविधता, पर्यटन स्थळे, मंदिरे आदींचा समावेश आहे. पर्यावरण शास्त्रज्ञ डॉ. सचिन पुणेकर यांची संकल्पना यामागे होती.

कार्यक्रमात मान्यवरांच्या हस्ते पुरस्कारांचे वितरण करण्यात आले. छत्रपती शिवाजी महाराज गौरव पुरस्कार स्व. अनिल अवचट यांना जाहीर झाला होता तो त्यांची कन्या मुक्ता पुणतांबेकर यांनी स्वीकारला. तसेच शिवनेर भूषण पुरस्कार प्रा. विनायक खोत यांना प्रदान करण्यात आला.

कार्यक्रमास विभागीय आयुक्त सौरभ राव,  जिल्हाधिकारी डॉ.राजेश देशमुख, कोल्हापूर परिक्षेत्राचे पोलीस महानिरीक्षक मनोज लोहिया, जिल्हा परिषदेचे मुख्य कार्यकारी अधिकारी आयुष प्रसाद, जिल्हा पोलीस अधीक्षक डॉ. अभिनव देशमुख, प्रांताधिकारी सारंग कोडोलकर, माजी जि.प. अध्यक्ष देवराम लांडे, मराठा सेवा महासंघाचे जिल्हा अध्यक्ष राजेंद्र डुबे, यांच्यासह शिवभक्त उपस्थित होते.

पुणे- कर्वेनगर व सनसिटी सिंहगड रोडला जोडणाऱ्या नदीवर पूल बांधण्यासाठी दुधाने कुटुंबाने १३ गुंठे जमीन पुणे महापालिकेच्या स्वाधीन केली असल्याचे जाहीर केले आहे .

या संदर्भात स्वप्नील दुधाने यांनी असे म्हटले आहे कि ,’आपण प्र. क्र. ३१ मधील कर्वेनगर व सनसिटी सिंहगड रोडला जोडणाऱ्या नदीवर पूल बांधण्यात यावा, यासाठी वेळोवेळी पाठपुरावा केला आहे. हा पूल सत्यात उतरावा, यासाठी दुधाने कुटुंबियांकडून तब्बल १३ गुंठे जमीन पुणे मनपाला सुपूर्द करण्यात आली आहे. या पुलाचे कामाबाबत आज पुणे मनपाच्या प्रकल्प विभागाच्या मुख्य अधीक्षक अभियंता शिर्के मॅडम यांची अधिकाऱ्यांसह प्रत्यक्ष ठिकाणी व्हिजिट घेण्यात आली. या व्हिजिटदरम्यान पुलासाठी येणारा एकूण खर्च, पुलाची आखणी, या विकासकामाची सद्यपरिस्थिती आदी अनेक विषयांवर चर्चा करण्यात आली. यावेळी लक्ष्मीताई दुधाने यांच्या लोकप्रतिनिधी या नात्याने पुणे शहराच्या सौंदर्यात भर घालणारा हा पूल ठरावा, अशा पद्धतीने या पुलाची डिजाईन असावी तसेच भविष्यातील वाहतूक प्रश्नांचा विचार यावेळी केला जावा, अशी विनंतीवजा सूचना करण्यात आली. याचप्रसंगी येणाऱ्या मनपा अंदाजपत्रकात या पुलासाठी १० कोटी रुपये असा निधी प्राथमिक स्वरूपात उपलब्ध करून घ्यावा आणि तशा प्रकारची निविदा प्रक्रिया सुरू करावी, अशी मागणी करण्यात आली आहे. या पुलामुळे दोन महत्त्वाची उपनगरे जोडली जाणार असून यामुळे नागरिकांचा वेळ आणि पैसा यांची मोठ्या प्रमाणात बचत होणार आहे, तसेच या पुलामुळे भविष्यातील अनेक वर्षांचा वाहतुकीचा प्रश्न सुटणार आहे असेही स्वप्नील दुधाने यांनी म्हटले आहे.

पुणे- राष्ट्रवादी कॉंग्रेस पार्टीने महापलिकेत वेगवेगळ्या प्रकरणावर वेगवेगळ्या भूमिका घेतल्या कधी भाजपा के साथ आणि कॉंग्रेस के खिलाफ चे धोरण पत्करलेल्या या पक्षाचे नेते ,नगरसेवक भाजपबरोबर जाताना शिवसेनेच्या विरोधातही कधी कधी उभी राहिल्याचे स्पष्ट झालेले आहे. सभागृहात एक भूमिका , महापौरांच्या अँँटीचेम्बर मध्ये दुसरी भूमिका आणि बाहेर तिसरी भूमिका घेणाऱ्या या पक्षाच्या नेत्यांनी वारंवार रंग बदलले हे घडत असताना अनेक नगरसेवकांनी नाराजी व्यक्त केली पण नेत्यांपुढे जाऊन ठाम राहण्याचे धारिष्ट्य कोणी दाखविले हीच स्थिती अगदी महापालिकेची निवडणूक तोंडावर आलेली असतानाही बदलली नाही हे खूपच महत्वपूर्ण मानावे लागणार आहे . परवा नदी सुधारणा प्रकल्पाला आणि गुजरात दौऱ्यावरून या पक्षाच्या या प्रकल्पाबाबतच्या धोरणाला विरोध करणाऱ्या आणि एकूणच या प्रकल्पाबाबत संशयाची भूमिका वारंवार अधोरेखित करणाऱ्या या पक्षाने प्रत्यक्षात एसीबी कडे तक्रार केली तेव्हा या प्रकल्पाचा साधा उल्लेख देखील केला नाही राष्ट्रवादीने संशयित म्हणून उपस्थित केलेल्या निविदांमध्ये आणि प्रकल्पांमध्ये नदी सुधारणा प्रकल्प सर्वाधिक खर्चाचा म्हणजे पावणेपाच हजार कोटीचा प्रकल्प आहे .आजच्या मुख्य सभेत तर त्याही पुढे या पक्षाने मोठ्ठी छलांग मारली. काल त्यांनी एसीबी कडे ज्या प्रकल्पाबाबत संशय व्यक्त करणारी हरकत घेऊन ज्याच्या चौकशीची मागणी केली आज त्याच प्रकल्पाला चक्क पाठींबा देऊन त्याबाबतचा सुमारे १ हजार कोटीचा प्रस्ताव संमत केला .

वारजे आणि बाणेर- बालेवाडी येथे सुमारे एक हजार कोटी रुपये खर्चून पीपीपी तत्वावर बांधण्यात येणार्‍या हॉस्पीटलचे काम ठराविक कंपन्यांना डोळ्यासमोर ठेउन करण्यात येत असल्याची चौकशी करावी अशी मागणी अ‍ॅन्टी करप्शन ब्युरो (एसीबी) कडे राष्ट्रवादी कॉंग्रेस पार्टीने केली होती पण चोवीस तासांच्या आतच या पार्टीच्या नेत्यांनी , आणि त्यांची भूमिका काल जाहीर होऊनही आज त्यांच्या नगरसेवकांनी देखील घुमजाव केले आहे.यामुळे अगदी शेवट्च्या क्षणापर्यंत ‘घुमजाव’ च्या भुमिकेमध्ये यांनी सातत्य ठेवल्याचे पाहायला मिळाले आहे. अशा पक्षाबरोबर शिवसेना आणि कॉंग्रेस येत्या निवडणुकीत आघाडी करणार काय ? केली तर कुठे कुठे काय होईल ? हे सांगायला आता कुठल्याही तज्ञ अशा समीक्षकांची आवशक्यता भासणार नाही .

स्थायी समितीमध्ये वारजे येथे मल्टिस्पेशालिटी हॉस्पीटल तर बाणेर- बालेवाडी येथे कॅन्सर हॉस्पीटल उभारणीचा प्रस्ताव आठवडाभरापुर्वी मंजूर करण्यात आला. पीपीपी तत्वावर उभारण्यात येणार्‍या या हॉस्पीटलसाठी महापालिका केवळ जागा देणार असून ही हॉस्पीटल उभारणी करणार्‍या कंपन्याच पुढील ३० वर्षे सर्व व्यवस्थापन पाहील. यासाठी या कंपन्या जे कर्ज काढतील या कर्जाची महापालिका गॅरंटी घेणार. तसेच या रुग्णालयांमध्ये महापालिकेच्यावतीने पाठविण्यात येणार्‍या रुग्णांवर अत्यल्प दरात उपचाराची सुविधाही देण्यात येणार आहे. यासाठी राज्य शासनाकडून परवानगी घेण्याचा प्रस्ताव मान्यतेसाठी सर्वसाधारण सभेपुढे होता.दरम्यान, दोनच दिवसांपुर्वी राष्ट्रवादी कॉंग्रेसचे शहर अध्यक्ष प्रशांत जगताप यांनी ही रुग्णालये उभारण्याचा प्रस्ताव ठराविक कंपन्या डोळ्यासमोर ठेवून भाजपच्या पदाधिकार्‍यांनी पुढील पिढ्यांच्या अर्थार्जनाची सोय केल्याचा आरोप केला होता. एवढेच नव्हे तर यासह मागील पाच वर्षात मंजुर झालेल्या प्रकल्पांमध्ये मोठ्याप्रमाणावर भ्रष्टाचार झाल्याची चौकशी करावी, असे निवेदन पुणे एसीबी अधिक्षक कार्यालयात दिले आहे. यानंतरही आज सर्वसाधारण सभेत मात्र प्रस्तावांना पाठींबा दिल्याने
राष्ट्रवादी कॉंग्रेस पार्टीने पुन्हा एकदा घुमजाव केल्याचे समोर आले आहे. यापुर्वीही कोरोनावरील कॉफी टेबल बुकसह अन्य प्रस्तावांना अगोदर विरोध आणि नंतर पाठींबा दिल्याचे पाहायला मिळाले आहे.
या प्रस्तावाची अंमलबजावणी राज्य शासनाच्या परवानगीनंतरच करण्यात येणार असल्याचे स्पष्टीकरण सभागृह नेते गणेश बिडकर यांनी दिल्यानंतर अन्य विरोधी पक्षांचेही समाधान झाले.काल हि असंख्य नगरसेवकांचे महापालिकेच्या जागा नाममात्र दराने मिळण्याबाबतचे प्रस्ताव संमत करण्यात आले त्यास राष्ट्रवादीच्या वतीने तातडीने अनुमोदन देण्यात येत होते . अन्य पक्षांनी हरकत घेताच सभागृहनेते जागा वाटप नियमावली नुसार जागा देण्यात येतील असे सांगत होते पण ते तोंडी होते , कोणत्याही विषयपत्र तसे नमूद नसल्याने अशा सर्व प्रस्तावांची अंमलबजावणी अखेरीस प्रशासनाला हाताशी धरूनच केली जाईल असे दिसते आहे.

पुणे दि. १८: शैक्षणिक क्षेत्रात राज्याला अग्रेसर ठेवण्यासाठी सर्व मिळून एकत्रित समन्वयाने काम करूया, असे प्रतिपादन शालेय शिक्षण मंत्री वर्षा गायकवाड यांनी केले.
सिम्बॉयसिस विद्यापिठ येथे आयोजित शालेय शिक्षण विभागाच्या कार्यक्रमात त्या बोलत होत्या. यावेळी शिक्षण आयुक्त विशाल सोळंकी, राजेश कृष्णा यांच्यासह शिक्षण विभागाचे संचालक, उपसंचालक, शिक्षणाधिकारी उपस्थित होते.

श्रीमती गायकवाड म्हणाल्या, शालेय शिक्षण विभागाच्या माध्यमातून राज्यात शैक्षणिक क्षेत्रात समन्वयातून चांगले कार्य सुरू आहे. विभागाच्या अपर मुख्य सचिव वंदना कृष्णा यांनी शालेय शिक्षण विभागात केलेले कार्य उल्लेखनीय आहे. शिक्षण विभागात कार्य करताना त्यांनी अत्यंत लहान बाबी विचारात घेत नियोजन केले आहे. शालेय शिक्षण विभाग एक कुटुंब आहे, राज्याच्या शैक्षणिक विकासासाठी हे कुटुंब सातत्याने कार्यरत आहे. विद्यार्थ्यांना चांगले शिक्षण मिळावे यासाठी प्रत्येकाचा सक्रीय सहभाग महत्त्वाचा असल्याचेही त्यांनी सांगितले.

विद्यार्थ्यांकरिता चांगले, सुदृढ वातावरण निर्माण करणे ही आपली सर्वांची जबाबदारी आहे. कोरोना कालावधीत शिक्षकांनी ऑनलाईन, ऑफलाईनसह विविध माध्यमातून शिक्षण देण्याचे कार्य केले. यापुढेही शालेय शिक्षण विभागाच्या माध्यमातून विद्यार्थ्यांना गुणवत्तापुर्ण शिक्षण देण्यासोबतच पायाभुत सुविधा, तंत्रज्ञानाचा वापरही वाढविण्यात येणार असल्याचे श्रीमती गायकवाड यांनी सांगितले.

अपर मुख्य सचिव श्रीमती कृष्णा म्हणाल्या, शालेय शिक्षण विभागात खुप काळ सेवा करण्याची संधी मिळाल्याचा आनंद आहे. विभागात सेवा करताना अनेक उपक्रम राबविण्याचा प्रयत्न केला. आदर्श शाळा उपक्रमा अंतर्गत राज्यातील काही शाळा मॉडेल करण्याचा प्रयत्न आहे.

शिक्षण आयुक्त श्री. सोळंकी यांनी राज्याला शैक्षणिक क्षेत्रात अग्रेसर करण्यासाठी संकल्प करण्याचे आवाहन केले.

यावेळी सेवापुर्तीनिमित्त शिक्षणमंत्री श्रीमती गायकवाड यांच्या हस्ते श्रीमती वंदना कृष्णा व राजेश कृष्णा यांचा गौरव करण्यात आला. यावेळी शिक्षण विभागातील संचालक, उपसंचालक, शिक्षणाधिकारी उपस्थित होते.