मुंबई, दि. २० : मराठी भाषेला ‘अभिजात’ भाषेचा दर्जा मिळावा अशी मागणी असलेली ४ हजार पोस्ट कार्ड आज मुख्यमंत्री उद्धव ठाकरे यांच्या उपस्थितीत राष्ट्रपतींकडे रवाना करण्यात आली.

याप्रसंगी वर्षा शासकीय निवासस्थानी मराठी भाषा मंत्री सुभाष देसाई, खासदार अरविंद सावंत उपस्थित होते.

मराठी भाषेला अभिजात भाषेचा दर्जा प्राप्त व्हावा यासाठी मराठी भाषा मंत्री सुभाष देसाई यांच्या नेतृत्वाखाली एक जन अभियान सुरू करण्यात आले आहे. हा ‘अभिजात’ दर्जा २७ फेब्रुवारी २०२२ रोजी मराठी भाषा दिवस आहे त्याआधी मिळावा, यासाठी सर्वतोपरी प्रयत्न सुरू केले आहेत. त्याचाच एक भाग म्हणून आज मुख्यमंत्री श्री. ठाकरे यांच्या हस्ते सुमारे ४ हजार पोस्ट कार्ड महामहीम राष्ट्रपती राम नाथ कोविंद यांना पाठविण्यात आली. हा पोस्ट कार्डचा दुसरा संच आहे, याआधीसुद्धा एक संच राष्ट्रपती महोदयांना पाठविण्यात आला आहे.

कोल्हापूर, दि. 20 : पर्यटनमंत्री आदित्य ठाकरे यांनी आज नृसिंहवाडी येथील दत्त मंदिरास भेट देऊन श्री दत्ताचे दर्शन घेतले.

यावेळी आरोग्य राज्यमंत्री राजेंद्र पाटील-यड्रावकर, राज्य नियोजन मंडळाचे कार्यकारी अध्यक्ष राजेश क्षीरसागर, खासदार धैर्यशील माने, जिल्हाधिकारी राहुल रेखावार, तहसीलदार अपर्णा मोरे, नृहसिंहवाडीच्या सरपंच पार्वती कुंभार, उपसरपंच रमेश मोरे, श्री नृसिंह सरस्वती स्वामी दत्त देव संस्थानचे अध्यक्ष सदाशिव पुजारी, सचिव संजय पुजारी यांच्यासह मान्यवर, पदाधिकारी उपस्थित होते.

तत्पूर्वी आरोग्य राज्यमंत्री राजेंद्र पाटील-यड्रावकर यांनी पर्यटन मंत्री आदित्य ठाकरे यांचे पुष्पगुच्छ देऊन स्वागत करुन मंदिर परिसराची माहिती दिली.

मुंबई, 20 फेब्रुवारी 2022-

 केंद्रीय वाणिज्य आणि उद्योग मंत्री पीयूष गोयल यांनी भारत- संयुक्त अरब अमिराती (यूएई) यांच्यातील सर्वसमावेशक आर्थिक भागीदारी करारा हा महत्त्वपूर्ण करार असल्याचे म्हटले आहे, ज्यामुळे भारतीय वस्तू आणि सेवांसाठी नवीन बाजारपेठ खुली होईल. शुक्रवारी भारत -यूएई करारावर स्वाक्षऱ्या करण्यात आल्या.

करारानंतर दुसऱ्या दिवशी मुंबईत पत्रकार परिषदेला संबोधित करताना पीयूष गोयल म्हणाले, “भारत-यूएई सर्वसमावेशक आर्थिक भागीदारी करार (CEPA) एमएसएमई, स्टार्ट-अप, शेतकरी, व्यापारी आणि व्यवसायाच्या सर्व वर्गांना  अत्यंत लाभदायक ठरेल.  

 क्षेत्रानूसार होणाऱ्या नफ्याबद्दल बोलताना, ते म्हणाले की, वस्त्रोद्योग, रत्ने, दागिने, चामड्याच्या वस्तू, पादत्राणे आणि अन्न प्रक्रिया उद्योग यांसारखे श्रम प्रधान उद्योग सर्वाधिक लाभदायक ठरतील.

सीईपीए हा एक संतुलित, निःपक्ष, सर्वसमावेशक आणि न्याय्य भागीदारी करार आहे, जो भारतासाठी वस्तू आणि सेवा या दोनही प्रकारे  वर्धित बाजारपेठेत प्रवेश देईल असे गोयल यांनी अधोरेखित केले. “या करारामुळे आमच्या युवकांसाठी नोकऱ्या निर्माण होतील, आमच्या स्टार्टअप्ससाठी नवीन बाजारपेठ मिळेल, आमचे व्यवसाय अधिक स्पर्धात्मक बनवेल आणि आमच्या अर्थव्यवस्थेला चालना देईल,”असेही  ते पुढे म्हणाले.

क्षेत्रनिहाय पाहणी असे दर्शवित  आहे, की या करारामुळे भारतीय नागरिकांसाठी किमान 10 लाख नोकऱ्या निर्माण होतील,अशी माहिती गोयल यांनी दिली. 

याबद्दल प्रसारमाध्यमांना  अधिक माहिती देताना  गोयल पुढे म्हणाले, की सीईपीए केवळ 88 दिवसांच्या विक्रमी वेळेत पूर्ण झाले आणि 90 दिवसांपेक्षा कमी कालावधीत,मे महिन्याच्या सुरुवातीस ते लागू होईल. “भारतातून यूएई मध्ये निर्यात होणाऱ्या जवळपास 90% उत्पादनांवर या कराराच्या अंमलबजावणीमुळे शून्य शुल्क आकारले जाईल, 80% ट्रेड लाइन्सवर शून्य शुल्क आकारले जाईल, उर्वरित 20% आमच्या निर्यातीवर फारसा परिणाम करणार  नाहीत, म्हणून हा एक दोन्ही देशांच्या दृष्टीने लाभदायक करार आहे.”

 या व्यापार करारानुसार  प्रथमच, सीईपीए भारतीय जेनेरिक औषधांची स्वयंचलित नोंदणी आणि विपणन अधिकृतता 90 दिवसांत करण्याची परवानगी दिली गेली आहे, एकदा ती विकसित देशांमध्ये मंजूर झाल्यानंतर  भारतीय औषधांना मोठ्या बाजारपेठेत प्रवेश यामुळे मिळेल.

 भारतीय दागिन्यांच्या निर्यातदारांना यूएईमध्ये शुल्क मुक्त प्रवेश मिळेल,  सध्या अशा उत्पादनांवर 5% सीमाशुल्क आहे.  यामुळे दागिन्यांच्या निर्यातीत लक्षणीय वाढ होईल, कारण भारतीय डिझाईन केलेल्या दागिन्यांना बाजारपेठेत मोठी प्रतिष्ठा आहे.  हिरे आणि दागिने क्षेत्राने 2023 पर्यंत आपली निर्यात 10 अब्ज पर्यंत अमेरिकन डॉलर्स पर्यंत वाढवण्याची अपेक्षा केली आहे.

सीईपीएमुळे  केवळ भारतीय उत्पादनांची स्पर्धात्मकता सुधारणार नाही, तर भारताला धोरणात्मक लाख देखील मिळवून देईल.  “युएई हे व्यापारी केंद्र म्हणून कार्य करत असल्याने, हा करार आफ्रिका, मध्य पूर्व आणि युरोपमध्ये बाजारपेठेतील प्रवेश सुलभ करण्यात मदत करेल,” असेही गोयल यावेळी पुढे म्हणाले.

सीईपीएच्या समाप्तीसह, भारत आणि यूएईने पुढील पाच वर्षांमध्ये द्विपक्षीय वस्तूंचा व्यापार 100 अब्ज अमेरिकन डॉलर्सपर्यंत वाढवण्याचे उद्दिष्ट ठेवले आहे, असे पीयूष गोयल यांनी नमूद केले, “तथापि, मला विश्वास आहे की दोन्ही  राष्ट्रांमधील व्यापाराची क्षमता आणखी मोठी आहे, आम्ही स्वतःसाठी निश्चित केलेले लक्ष्य निश्चित पार करू”, असे गोयल  म्हणाले.  यूएई हा भारताचा तिसरा सर्वात मोठा द्विपक्षीय व्यापारी भागीदार आहे.

 जीसीसी (GCC) सोबत 2022 मध्येच होणार करार

सरकार याच वर्षात गल्फ कोऑपरेशन कौन्सिल देशांसोबत समान आर्थिक भागीदारी करार करण्यास उत्सुक आहे, असेही पीयूष गोयल यांनी यावेळी सांगितले. ते म्हणाले, की जीसीसीच्या सरचिटणीसांनी वाटाघाटी जलद मार्गी लावण्याची इच्छा व्यक्त केली आहे  “आम्हाला आमच्या वाटाघाटी क्षमतेवर देखील विश्वास आहे, आम्ही युएईशी जलद वाटाघाटी केल्या आहेत आणि आम्हाला विश्वास आहे की समान करार  या वर्षातच जीसीसी सोबत व्यापार पूर्ण केला जाईल,”असे गोयल यांनी यावेळी सांगितले

जीसीसी हा आखाती प्रदेशातील सहा देशांचे एक समूह आहे, म्हणजे सौदी अरेबिया,यूएई, कतार, कुवेत, ओमान आणि बहरीन यांचा एकत्रित जीडीपी 1.6 ट्रिलियन अमेरिकन डॉलर्स आहे.

मुंबई, दि. 20 :- मराठी पत्रकारितेचे जनक, आद्यपत्रकार, ‘दर्पण’कार आचार्य बाळशास्त्री जांभेकर यांनी ‘दर्पण’ वृत्तपत्राची सुरुवात करून मराठी पत्रकारितेचा पाया रचला. मराठी पत्रकारितेला निर्भिड, निष्पक्ष, लोकाभिमुखतेचा वारसा दिला. ‘दर्पण’ वृत्तपत्रातून त्यांनी समाज घडविण्याचे कार्य केले. पत्रकारितेच्या क्षेत्रातील त्यांचे योगदान व कार्य मार्गदर्शक आहे, अशा शब्दांत उपमुख्यमंत्री अजित पवार यांनी दर्पणकार आचार्य बाळशास्त्री जांभेकर यांना त्यांच्या जयंतीनिमित्त अभिवादन केले आहे.

उपमुख्यमंत्री अजित पवार आपल्या संदेशात म्हणतात, दर्पणकार आचार्य बाळशास्त्री जांभेकर यांनी लोकशिक्षण, ज्ञानप्रसाराच्या उद्देशाने पत्रकारितेच्या क्षेत्रातील दिलेले योगदान प्रेरणादायी, मार्गदर्शक आहे. तत्कालीन ब्रिटिश सरकारच्या चुकीच्या धोरणांना त्यांनी विरोध केला. वृत्तपत्र हे समाजप्रबोधनाचे, राष्ट्र घडविण्याचे प्रभावी माध्यम असल्याचे त्यांनी दाखवून दिले. त्यांनी दिलेली शिकवण अंगीकारणे हेच त्यांना खरे अभिवादन ठरेल, असे उपमुख्यमंत्री अजित पवार यांनी म्हटले आहे.

मुंबई, दि. २० – महाराष्ट्र शासनाच्या सांस्कृतिक कार्य संचालनालयामार्फत घेण्यात येणाऱ्या हीरक महोत्सवी राज्य नाट्य स्पर्धेचा राज्यस्तरीय उद्घाटन सोहळा उद्या, दि. २१ फेब्रुवारी रोजी सायंकाळी सात वाजता ऑनलाईन पद्धतीने होणार असल्याची माहिती सांस्कृतिक कार्यमंत्री अमित विलासराव देशमुख यांनी दिली. या स्पर्धेचे उद्घाटन महसूलमंत्री बाळासाहेब थोरात यांच्या शुभहस्ते होणार असून या ऑनलाईन उद्घाटन कार्यक्रमास सहकारमंत्री बाळासाहेब पाटील, पर्यटनमंत्री आदित्य ठाकरे व सांस्कृतिक कार्य राज्यमंत्री राजेंद्र पाटील-यड्रावकर आणि १९ जिल्ह्यांमधील मान्यवर उपस्थित राहणार आहेत, असेही श्री. देशमुख यांनी सांगितले.

कोरोना संसर्गाच्या पार्श्वभूमीवर गतवर्षी  राज्य नाट्य स्पर्धा घेता आली नव्हती. यंदाचे वर्ष हे स्पर्धेचे हीरक महोत्सवी वर्ष असल्याने व आजादी का अमृत महोत्सव या उपक्रमाच्या पार्श्वभूमीवर ही स्पर्धा होत असल्याने त्यास विशेष महत्त्व असल्याचे श्री. देशमुख म्हणाले.

सांस्कृतिक कार्य संचालनालयामार्फत घेण्यात येणाऱ्या या स्पर्धा  हौशी मराठी, बाल, हिंदी, संगीत, संस्कृत, दिव्यांग बाल नाट्य अशा सहा विविध प्रकारांमधून राज्यातील ३४ केंद्रांवर घेण्यात येणार आहेत.

जवळपास  तीन महिने अविरत चालणाऱ्या या स्पर्धांमधून एकूण ६७४ संघ भाग घेणार आहेत अशी माहिती देत सांस्कृतिक कार्यमंत्र्यांनी स्पर्धेत सहभागी होणाऱ्या संघ व कलाकारांना शुभेच्छा दिल्या आहेत.

 मुंबई,  20 फेब्रुवारी, 2022 :महाराष्ट्र राज्य लॉन टेनिस संघटना(एमएसएलटीए) यांच्या तर्फे आयोजित 16व्या एमएसएलटीए रमेश देसाई मेमोरियल 12वर्षाखालील राष्ट्रीय टेनिस स्पर्धेत मुलींच्या गटात रितिका डावलकर,  अव्यक्ता रायावपरू, दिपशिखा विनयामूर्थी या खेळाडूंनी मानांकित खेळाडूंना पराभवाचा धक्का देत मुख्य फेरीत प्रवेश केला. 
जी.ए.रानडे टेनिस कॉम्प्लेक्स येथे सुरु असलेल्या या स्पर्धेत अंतिम पात्रता फेरीत मुलींच्या गटात बिगरमानांकीत रितिका डावलकरने अव्वल मानांकित अविपशा देहुरीचा 7-6(2), 6-4असा पराभव करून अनपेक्षित निकाल नोंदविला. अव्यक्ता रायावपरूने दुसऱ्या मानांकित स्वरा जावळेचा 6-1, 6-2 असा तर दिपशिखा विनयामूर्थीने चौथ्या मानांकित सृष्टी सूर्यवंशीचा 6-2, 6-2 असा सहज पराभव करून मुख्य फेरीत प्रवेश केला.  
स्पर्धेत देशभरातून 250 हुन अधिक खेळाडूंनी आपला सहभाग नोंदविला आहे. एमएसएलटीएचे अध्यक्ष भरत ओझा व मानद सचिव सुंदर अय्यर यांनी सांगितले की, स्पर्धेत पहिल्या फेरीपासूनच खेळाडूंना टेनिसहब आणि इनरझलच्या वतीने आकर्षक पारितोषिके तसेच, एकूण 3लाख रुपयांची शिष्यवृत्ती प्रदान करण्यात येणार आहे. माजी एआयटीएचे सहसचिव आणि माजी एमएसएलटीएचे मानद सचिव रमेश देसाई यांच्या स्मृतीप्रित्यर्थ या स्पर्धेचे आयोजन करण्यात आले आहे.  राष्ट्रीय, राज्यस्तरीय व जिल्हास्तरीय प्रशासन आणि स्पोर्ट्स ऍथॉरिटी ऑफ इंडियाच्या एसओपी अंतर्गत, एमवायएएस, क्रीडा व युवक सेवा संचालनालय महाराष्ट्र सरकार यांच्या कोविड नियमांचे पालन करून या स्पर्धेचे आयोजन करण्यात येत असल्याचे अय्यर यांनी नमूद केले. 
एमएसएलटीएचे मुख्य कार्यकारी अधिकारी मनोज वैद्य यांची स्पर्धा संचालक म्हणून तर, आयटीएफ व्हाईट बॅच रेफ्री वैशाली शेकटकर यांची स्पर्धा निरीक्षक म्हणून निवड करण्यात आली आहे. 
स्पर्धेचा सविस्तर निकाल: अंतिम पात्रता फेरी: मुले: ध्रुव सेहगल वि.वि.वीरेन चौधरी(14) 3-6, 7-6(2), 6-1;अक्षत दक्षिणदा वि.वि.योना मंदा 6-1, 6-2;
रॉनी विजयकुमार(4)वि.वि.विश्वास चंद्रशेखर 6-0, 6-0;
मनन राय वि.वि.राम मगदूम 6-4, 6-4;
प्रणित पॉल वि.वि.निकुंज खुराणा(7) 3-6, 6-3, 6-0;
दर्श खेडेकर(8) वि.वि.साईराज शेवाळे 7-5, 6-1;

मुली:
रितिका डावलकर वि.वि.अविपशा देहुरी(1) 7-6(2), 6-4;
अव्यक्ता रायावपरू वि.वि.स्वरा जावळे(2) 6-1, 6-2;
श्राव्या नुंबुरी वि.वि.रितसा कोंडकर(16) 6-3, 6-0;
दिपशिखा विनयामूर्थी वि.वि.सृष्टी सूर्यवंशी(4) 6-2, 6-2;
रीतिशा चौधरी(7) वि.वि.अक्षिता अनंतरमन 6-2, 6-3;
एंजल वारंग वि.वि.रिया पुडीयोकडा(13) 6-2, 6-1.

मानांकन यादी खालीलप्रमाणे:मुले: 1.तविश पहावा, 2.फझल अली मीर, 3.कुशाग्र अरोरा, 4.शिवा शर्मा, 5.विराज चौधरी, 6.हित कांदोरिया, 7.दिशेंदर लांबा, 8.यश्वीन दहिया; 
मुली: 1.आनंदिता उपाध्याय, 2.अहाना,  3.प्राची मलिक, 4.हविशा चौधरी, 5.सृष्टी किरण, 6.मीराया अगरवाल, 7.नंदिनी कंसाल, 8.अविका.

मुंबई, दि. २० : – तेलंगणा महाराष्ट्राचा सख्खा शेजारी आहे. त्याच्याशी जलसंपदा, उद्योग आणि पायाभूत सुविधांशी निगडीत क्षेत्रात सहकार्य वाढवण्यावर भर देण्यात येईल, असे मुख्यमंत्री उद्धव ठाकरे यांनी आज येथे सांगितले. तेलंगणाचे मुख्यमंत्री के. चंद्रशेखर राव यांच्यासमवेत शिष्टमंडळाने मुख्यमंत्री उद्धव ठाकरे यांची वर्षा शासकीय निवासस्थानी भेट घेतली. त्यावेळी ते बोलत होते.

यावेळी आंतरराज्यीय संयुक्त जलसिंचन प्रकल्पांविषयीही विस्तृत चर्चा झाली.

या शिष्टमंडळासमवेतच्या बैठकीस उद्योगमंत्री सुभाष देसाई, नगरविकास व सार्वजनिक बांधकाम मंत्री एकनाथ शिंदे, खासदार संजय राऊत, खासदार अरविंद सावंत, मुख्यमंत्र्यांचे अतिरिक्त मुख्य सचिव आशिषकुमार सिंह आदी उपस्थित होते.

बैठकीत बाभळी बंधारा,  तुम्मीदीहेटी, मेडीगड्डा बॅरेज, चन्खा-कोरटा बॅरेज या सिंचन प्रकल्पांच्या अनुषंगाने चर्चा झाली. तसेच उभय राज्यात सुरु असलेल्या उद्योग आणि पायाभूत सुविधा क्षेत्रातील विविध योजना, प्रकल्पांचीही चर्चा करण्यात आली. जलसिंचन प्रकल्पांतील आंतरराज्यीय सहकार्य आणि त्यातील विविध तरतुदींबाबतही यावेळी विस्ताराने ऊहापोह करण्यात आला. दोन्ही राज्यांदरम्यानचे विविध क्षेत्रातील सहकार्य वाढवणाऱ्या उपाययोजनांवर भर देण्याबाबतही चर्चा झाली.

मुख्यमंत्री श्री. राव यांच्या समवेतच्या शिष्टमंडळात खासदार रणजित रेड्डी, खासदार संतोष कुमार, खासदार बी. पी. पाटील, आमदार पल्ला राजेश्वर रेड्डी, आमदार श्रीमती के. कविता, तेलंगणा राष्ट्र समिती पक्षाचे महासचिव श्रवण रेड्डी, तसेच ज्येष्ठ अभिनेते प्रकाश राज आदींचा समावेश होता.

सुरवातीला मुख्यमंत्री श्री. ठाकरे यांनी मुख्यमंत्री श्री. राव यांचे पुष्पगुच्छ, शाल तसेच छत्रपती शिवाजी महाराज यांची प्रतिमा देऊन स्वागत केले. मुख्यमंत्री श्री. राव यांनी मुख्यमंत्री श्री. ठाकरे यांचाही सत्कार केला. मुख्यमंत्री श्री. राव यांच्यासमवेतच्या शिष्टमंडळातील सदस्यांचेही पुष्पगुच्छ आणि तसेच ‘महाराष्ट्र देशा’, ‘पहावा विठ्ठल” देऊन स्वागत करण्यात आले.