पुणे – मनसे अध्यक्ष राज ठाकरे यांच्या हस्ते प्रभाग क्रमांक १८ चे मनसेचे पुणे शहर संघटक प्रल्हाद गवळी यांच्या जनसंपर्क कार्यालयाचे उद्घाटन करण्यात आले
याप्रसंगी राज ठाकरे म्हणाले प्रत्येक कार्यकर्त्यांनी आपआपल्या प्रभागांमध्ये जनसंपर्क वाढून लोकांच्या गाठीभेटी घेऊन त्यांच्या अडचणी समजून घ्यावे या कार्यक्रमासाठी मनसेचे नेते बाबू वागसकर, किशोर शिंदे, अजय शिंदे, सुशीला नेटके, वनिता वागसकर, गणेश भोकरे, प्रशांत मते, प्रकाश ढमढेरे, संगीता तिकोने व इतर पदाधिकारी उपस्थित होते.कार्यक्रमाचे संयोजन प्रल्‍हाद गवळी यांनी केले कार्यक्रम यशस्वी करण्यासाठी बाळा देवळे, हेमंत कंठाळे ,साईनाथ चकोर,संदीप ढवळे,उमेश लोखंडे,विकास गवळी, गौरव गवळी,दक्ष गवळी , श्रीराज पवार, विहंग कोटकर, यश येते, प्रज्वल कसबे, भूषण शिदे, युवराज लोखंडे, सौरभ पडावकर यांनी विशेष परिश्रम घेतले.
या कार्यक्रमासाठी नादब्रम्ह ढोल पथक, आढाव सनईवादक पाचशे ते सहाशे फेटे धारी मनसे सैनिक उपस्थित होते तसेच चाफ्याचा हार व तलवार देऊन प्रल्हाद गवळीनी  राज ठाकरेंचे स्वागत केले.

पुणे -महापालिकेच्या आगामी निवडणुका भाजपच्या वतीने शहर अध्यक्ष जगदीश मुळीक यांच्या अध्यक्षतेखाली लढविल्या जातील अशी घोषणा प्रदेशाध्यक्ष चंद्रकांतदादा पाटील यांनी केली.पुणे शहर कार्यालयात आयोजित करण्यात आलेल्या भाजप पदाधिकार्यांच्या बैठकीत पाटील बोलत होते. महापौर मुरलीधर मोहोळ, आमदार माधुरी मिसाळ, भीमराव तापकीर, सिद्धार्थ शिरोळे, स्थायी समितीचे अध्यक्ष हेमंत रासने, सभागृह नेते गणेश बिडकर, संघटन सरचिटणीस राजेश पांडे यांची प्रमुख उपस्थिती होती.

पाटील म्हणाले, आगामी निवडणुकीसाठी शहर भाजपची तयारी अंतिम टप्प्यात आहे. बूथस्तरापर्यंतच्या रचना पूर्ण झाल्या आहेत. शहर, विधानसभा आणि प्रभागनिहाय निवडणुक व्यवस्थापन समितीची लवकरच रचना पूर्ण करण्यात येईल. जगदीश मुळीक यांच्या अध्यक्षतेखाली पुणे महापालिकेत शंभरहून अधिक नगरसेवक निवडून येतील असा विश्वास वाटतो.

पुणे,: भारतातील सर्वात मोठ्या शालेय स्तरावरील खगोलशास्त्रीय अवकाश निरीक्षण केंद्र व प्रयोगशाळेचे अनावरण शनिवारी ( दि.२६ ) करण्यात आले.पुणे शहरातील विद्यार्थ्यांसाठी हेन्केल इंडिया कंपनी व ग्लोबल मिशन अ‍ॅस्ट्रोनॉमी आणि लायन्स क्लब यांच्या सहकार्याने ही प्रयोगशाळा पुण्यातील महर्षी कर्वे स्त्री-शिक्षण संस्थेमध्ये सुरु करण्यात आली.या अवकाश निरीक्षण केंद्राचे उद्घाटन सावित्रीबाई फुले पुणे विद्यापिठाचे कुलगुरु डॉ.नितीन करमळकर,जेष्ठ शास्त्रज्ञ डॉ.काशिनाथ देवधर,प्रांतपाल हेमंत नाईक यांच्या हस्ते करण्यात आले.यावेळी हेंकेल इंडियाचे भुपेश सिंग,संध्या केडिया,डॉ.प्रसाद खंडागळे,शेखर डुंबरे,प्रसाद वैद्य,खगोलशास्त्रज्ञ विशाल कुंभारे,मुख्याध्यापिका प्राजक्ता वैद्य,जयंत इनामदार,प्रदिप वाजे आदी मान्यवर उपस्थित होते.यावेळी जेष्ठ खगोलशास्त्रज्ञ डॉ.जयंत नारळीकर व नासाचे शास्त्रज्ञ डॉ.रूपेश ओझा यांनी सुमारे चार हजार विद्यार्थांना ऑनलाईन मार्गदर्शन केले.यावेळी कुलगुरु डॉ.नितीन करमळकर यांनी विद्यार्थांमध्ये लहान वयातच अवकाश निरीक्षणाची आवड निर्माण होण्यासाठी अशा केंद्रांची गरज आहे.भारत सरकारकडून नांदेड जवळ आंतराष्ट्रीय लायगो प्रकल्प उभारण्यात येत आहे.भविष्यात त्यासाठी लागणारे वैज्ञानिक या केंद्रातून तयार होतील असे
त्यांनी सांगितले.मुलांमध्ये खगोलशास्त्राची आवड निर्माण करण्यासाठी हेंकेलने यापूर्वी पुणे जिल्ह्यातील जेजुरी,भोर,तळेगाव-ढमढेरे आणि शिरगाव येथे अवकाश निरीक्षण केंद्र सुरु केली असल्याचे डॉ.प्रसाद खंडागळे यांनी सांगितले.
या अवकाश निरीक्षण केंद्रामध्ये विद्यार्थ्यांसाठी दुर्बिण,टेलिस्कोप,व्दीनेत्री यासारखी अद्यावत उपकरणे व खगोलशास्त्रीय पुस्तके कंपनीतर्फे देण्यात आली आहेत.सूर्यग्रहण,चंद्रग्रहण,सुपरमून,उल्कावर्षाव,ग्रह-तार्‍यांचे निरीक्षण,लघुग्रहांचे निरीक्षण,ग्रहांची युती अशी निरिक्षणे येथे करता येणार आहेत.भारतामध्ये शालेय स्तरावर अवकाश निरीक्षण केंद्र उभारण्यासाठी ग्लोबल मिशन अ‍ॅस्ट्रोनॉमी आणि रिसर्च सेंटर या संस्थेने अमेरिका आणि स्पेनमधील संशोधन संस्थांसोबत सामंजस्य करार केला आहे.या माध्यमातून विद्यार्थी नासाच्या लघुग्रह शोध मोहिमेत सामील होतील.याव्दारे सध्या दहा हजार विद्यार्थी अवकाश संशोधनाचा अभ्यास करत आहेत.तसेच ‘ट्रेन द ट्रेनर’ कार्यक्रमाद्वारे पुण्याच्या आसपास २५० हून अधिक शिक्षकांना कंपनीने प्रशिक्षण दिले आहे.

पुणे दि.26: सर्वसामान्य नागरिकांचा म्हाडावर विश्वास असल्याने म्हाडाच्या घरासाठी नागरिक मोठ्या प्रमाणात अर्ज करतात. सर्वसामान्य नागरिकांचा हा विश्वास म्हाडाने जपावा, असे प्रतिपादन उपमुख्यमंत्री तथा पालकमंत्री अजित पवार यांनी केले.

शासकीय विश्रामगृह येथे पुणे गृहनिर्माण व क्षेत्रविकास मंडळाच्या २७०३ नवीन सदनिका व ५८ व्यापारी संकुलासाठी ऑनलाइन अर्ज नोंदणीचा शुभारंभ उपमुख्यमंत्री श्री. पवार यांच्या हस्ते झाला. यावेळी खासदार वंदना चव्हाण, जिल्हाधिकारी डॉ. राजेश देशमुख, पुणे म्हाडाचे मुख्याधिकारी नितीन माने, सार्वजनिक बांधकाम विभागाचे अधीक्षक अभियंता अतुल चव्हाण आदी उपस्थित होते.

श्री.पवार म्हणाले, ‘सर्वांसाठी घरे’ या उपक्रमाच्या माध्यमातून  राज्यात गरजूंना घर देण्याचा शासनाचा प्रयत्न आहे. कोरोना संकटकाळात मुद्रांक शुल्कात कपात करण्याचा महत्त्वाचा निर्णय सरकारने घेतला, त्यामुळे बांधकाम क्षेत्राला उर्जितव्यवस्था मिळाली. सर्वांना हक्काचे घर मिळावी यासाठी शहरी आणि ग्रामीण भागात विविध गृहनिर्माण योजनांची अंमलबजावणी सुरू करण्यात आली आहे. ‘सर्वांसाठी घरे’ कार्यक्रमांतर्गत सर्वांना हक्काचे घर देण्याचा प्रयत्न आहे.

             कोरोना संकटकाळातदेखील म्हाडाने मोठ्या प्रमाणात घरे उपलब्ध करून दिली. म्हाडाच्या घरासाठी नागरिकांनी  चांगला प्रतिसाद दिला. म्हाडाच्या पारदर्शक कामामुळे सर्वसामान्य नागरिकांचा म्हाडावर विश्वास आहे. म्हाडाच्या घरामुळे गरजूंच्या घराची स्व्पनपुर्ती होते. सर्व सोईसुविधायुक्त घरे देण्यासाठी देण्यासोबतच म्हाडाने पुणे शहराच्या विकासासाठी आणखी योगदान द्यावे, असे आवाहनही त्यांनी केले. पुणे शहराची राज्यात राहण्यासाठी सर्वोत्तम शहर अशी ओळख आहे. देशातही ही ओळख निर्माण करू, असेही श्री. पवार म्हणाले.

पुणे-स्वातंत्र्यवीर सावरकरांचे वास्तव्य असणार्या फर्ग्युसन महाविद्यालयाच्या वसतिगृहातील खोलीत आज त्यांच्या पुण्यतिथी निमित्त नागरिकांनी मोठ्या संख्येने दर्शन घेतले. सावरकरांच्या साहित्याचे सादरीकरण करून विद्यार्थ्यांनी त्यांना अनोख्या पद्धतीने अभिवादन केले.

डेक्कन एज्युकेशन सोसायटीचे उपाध्यक्ष महेश आठवले यांच्या हस्ते सावरकरांच्या अर्धपुतळ्याला पुष्पहार अर्पण करण्यात आला. कार्यवाह प्रा. धनंजय कुलकर्णी, संचालक मिलिंद कांबळे, डॉ. आर. जी. परदेशी, उपप्राचार्या स्वाती जोगळेकर, प्राजक्ता प्रधान, आनंद काटीकर यांची प्रमुख उपस्थिती होती.

सन १९०२ ते १९०५ या कालावधीत सावरकर फर्ग्युसन महाविद्यालयाच्या वसतिगृहातील इमारत क्रमांक १ मधील खोली क्रमांक १७ मध्ये वास्तव्यास होते. महाविद्यालयाने याखोलीचे एका स्मारकामध्ये रुपांतर केले आहे. सावरकरांचा अर्धपुतळा, पदवी  स्वीकारतानाचा अंगरखा, त्यांची काही प्रचित्रे, पुस्तके आदी स्वरुपात त्यांच्या स्ती जतन केल्या आहेत. सावरकरांचे वास्तव्याने पावन झालेली ही ऐतिहासिक खोली विद्यार्थ्यांचे प्रेरणा स्थान बनली आहे.

पुणे-सावरकरांचे विचार कालातीत आहेत. संरक्षण क्षेत्रात आत्मनिर्भर असायला पाहिजे, दुसर्या देशांवर अवलंबून राहाणे योग्य नाही हा सावरकरांचा विचार रशिया आणि युक्रेन युद्धाच्या पार्श्वभूमीवर आजही महत्त्वाचा ठरत असल्याचे मत माजी उपराष्ट्रीय सुरक्षा सल्लागार लेफ्टनंट जनरल (निवृत्त) विनोद खंडारे यांनी व्यक्त केले.

मी सावरकर संस्थेच्या वतीने आयोजित करण्यात आलेल्या व्हॉटसअप वक्तृत्व राज्यस्तरीय स्पर्धेच्या पारितोषिक वितरण समारंभात खंडारे बोलत होते. डेक्कन एज्युकेशन सोसायटीचे कार्यवाह प्रा. धनंजय कुलकर्णी अध्यक्षस्थानी होते. अभिनेता योगश सोमण यांची प्रमुख उपस्थिती होती.तरुणांनी सावरकरांचे विचार आचरणात आणावेत आणि त्यावर संशोनध होणे आवश्यक असल्याचे मत कुलकर्णी यांनी व्यक्त केले. सावरकरांचे विचारांचा प्रसार करण्याची गरज असल्याचे मत सोमण यांनी व्यक्त केले.

रत्नागिरीच्या  कश्ती शेख या विद्यार्थिनीला स्पर्धेची महाविजेती म्हणून निवड करण्यात आली. मी सावरकर टीमचे रणजीत नातू यांनी सूत्रसंचालन, स्वानंद चॅरिटेबल ट्रस्टचे धनंजय बर्वे यांनी प्रास्ताविक आणि अमेय कुंटे यांनी आभार मानले.स्वागत मी सावरकर टीम रणजीत नातू, प्रास्ताविक धनंजय बर्वे अध्यक्ष स्वानंद चॅरिटेलबल ट्रस्ट, अमेय कुंटे आभार मानले

राष्ट्रीय कला अकादमी आणि नू.म.वि. प्रशाला व कनिष्ठ महाविद्यालय यांच्यावतीने गालिचा रांगोळी प्रदर्शन : २९ फेब्रुवारी पर्यंत प्रदर्शन 

पुणे: किंकरी, उरुमी, ढोडरो बानाम, पाहु या आदिवासी संगीत वाद्य बारकाईने साकारलेली मनमोहक रांगोळी… मराठी मातीचा  अभिमान असणारी मराठी भाषेच्या शुभेच्छा देणारी आणि अतिशय सुंदर पद्धतीने साकारलेली  हिन्दू देवी देवतांची रांगोळी यासोबतच. स्वातंत्र्यवीर सावरकर… शहिदांना अभिवादन… विविध रंग आणि पैठणीचा सुंदर साज उलगडणारी रांगोळी… अशा विविध संकल्पनेतून निर्माण झालेल्या गालिचा रांगोळी पाहण्याची संधी अवघा रंग एक झाला या गालिचा रंगावली प्रदर्शनातून पुणेकरांना मिळाली.

 राष्ट्रीय कला अकादमी (न्यास) आणि नू.म.वि. प्रशाला व कनिष्ठ महाविद्यालय यांच्या संयुक्त विद्यमाने अप्पा बळवंत चौकातील नू.म.वि. प्रशालेत  ‘अवघा रंग एक झाला’ या गालिचा रंगावली प्रदर्शनाचे आयोजन करण्यात आले आहे. प्रदर्शनाचे उद्घाटन चित्रकार विशाल वाडे यांच्या हस्ते झाले. यावेळी राष्ट्रीय कला अकादमीच्या संचालिका रोमा लांडे, अमर लांडे, अतुल सोनावणे, सुनील सोनटक्के उपस्थित होते.  गणेश माने, किरण फाळके, सुप्रिया मुरमुरे, अरुणा गाडे, गौरव निविलकर, कुणाल चौधरी यांनी संयोजन केले. 
स्वरसम्राज्ञी लता मंगेशकर, बाप्पी लाहिरी यांनी रंगावलीतून श्रद्धांजली, विज्ञान दिन, महाशिवरात्री, स्वातंत्र्याचा अमृतमहोत्सव अशा विविध विषयांवर रंगबेरंगी रांगोळ्या प्रदर्शनात साकारण्यात आल्या आहेत.
प्रदर्शनात २० पेक्षा अधिक रंगावल्या साकारण्यात आल्या आहेत. दि. २८ फेब्रुवारी पर्यंत सकाळी ९ ते रात्री ९ यावेळेत हे प्रदर्शन विनामूल्य पाहता येणार आहे.

पुणे दि.२६: विद्यार्थ्यांना ज्ञान देण्यासोबत त्यांच्यातील कौशल्याचा विकास करण्यावर विशेष भर देण्यात यावा. शालेय अभ्यासक्रमाबरोबरच विद्यार्थ्यांमध्ये सामाजिक जाणीव आणि नैतिक मूल्यांची वाढ व्हावी,  विद्यार्थी गुणवंत, ज्ञानवंत होण्यासोबतच प्रज्ञावंत, चारित्र्यसंपन्न व्हावेत याकडेही शिक्षकांनी विशेष लक्ष द्यावे, असे आवाहन उपमुख्यमंत्री अजित पवार यांनी केले.

अल्पबचत भवन येथे जिल्हा परिषदेच्यावतीने आयोजित गुणवंत शिक्षक पुरस्कार वितरण कार्यक्रमाप्रसंगी ते बोलत होते. यावेळी जिल्हा परिषदेच्या अध्यक्षा निर्मला पानसरे, उपाध्यक्ष रणजीत शिवतरे, बांधकाम सभापती प्रमोद काकडे, समाजकल्याण सभापती सारिका पानसरे, पशुसंवर्धन सभापती बाबुराव वायकर, महिला व बालकल्याण सभापती पुजा पारगे, शिक्षण समिती सदस्या अरूणा थोरात, जिल्हा परिषदेचे मुख्य कार्यकारी अधिकारी आयुष प्रसाद, शिक्षणाधिकारी संध्या गायकवाड उपस्थित होते.

श्री. पवार म्हणाले, नव्या युगाच्या आवाहनांना सामोरे जाणारे विद्यार्थी घडविण्यासाठी शैक्षणिक दर्जा उंचावणे ही शिक्षकांची मोठी जबाबदारी  आहे. कोरोना महामारीमुळे विद्यार्थ्यांचे झालेले शैक्षणिक, सामाजिक, सांस्कृतिक, मानसिक नुकसान भरून काढावे लागणार आहे. कोरोनानंतर शाळेत येणारा विद्यार्थी ताणतणावात राहणार नाही, असे शैक्षणिक वातावरण तयार करण्यावर शिक्षकांनी भर द्यावा. पालकांचाही यामध्ये सहभाग महत्त्वाचा राहणार आहे. आजचे विद्यार्थी उद्याचे नागरिक, देशाचे भविष्य आहेत. हे भविष्य उज्ज्वल करण्यासाठी विद्यार्थ्यांना केवळ ज्ञान देऊन चालणार नाही, तर मिळवलेल्या ज्ञानाचा व्यवहारात उपयोग करण्याचे कौशल्यही त्यांना शिकवायला हवे.

जीवनात यशस्वी होण्यासाठी ज्ञानाइतकेच विज्ञान तंत्रज्ञान, कौशल्यांचा विकासही महत्वाचा आहे. कलाकौशल्यापासून संवाद कौशल्यापर्यंत प्रत्येक गोष्टी जमल्या पाहिजेत. समाजात यशस्वी झालेल्या व्यक्तींनी ज्ञान, विज्ञान, तंत्रज्ञानाची सांगड घालून त्याचा उपयोग जीवनात केल्याने ते यशस्वी झाले आहेत. विद्यार्थ्यांनी त्यांचा कित्ता गिरवला पाहिजे. त्यांच्यासारखी विज्ञानाची कास धरली पाहिजे. असे कौशल्य विद्यार्थ्यांनी मिळवावे त्यासाठी शिक्षकांनी मार्गदर्शन करावे. शिक्षणाच्या प्रभावी उपयोगासाठी, देशाच्या, समाजाच्या विकासासाठी ते आवश्यक असल्याचेही ते म्हणाले.

जिल्हा परिषद शाळेमध्ये चांगले बदल केले आहेत, राज्यातील काही भागातील जिल्हा परिषदेच्या शाळेत विद्यार्थ्यांची संख्या वाढते आहे. जिल्हा परिषदेच्या शाळेला पायाभूत सुविधा देण्यासाठी आपला सातत्याने प्रयत्न आहे.  दुर्गम, डोंगरी भागातील शिक्षक, विद्यार्थ्यांना येणाऱ्या अडचणी सोडविण्यासाठीही आपण सर्वतोपरी सहकार्य करू.

महिलांना सन्मान मिळाला पाहीजे, यासाठी राज्य शासनाने चौथे महिला धोरण आणण्याचा निर्णय घेतला असल्याचेही श्री. पवार यांनी यावेळी सांगितले.

जि.प. अध्यक्षा श्रीमती पानसरे म्हणाल्या,  कोरोना कालावधातीही शिक्षकांनी ज्ञानदानाचे अत्यंत चांगले कार्य केले आहे. ऑनलाइन शिक्षणाच्या माध्यमातून शिक्षण सातत्याने सुरू राहीले. ग्रामीण भागातील अनेक शाळा आदर्श करण्यासाठी शिक्षकांचे योगदान उल्लेखनीय असल्याचे त्यांनी सांगितले.

श्री. शिवतरे  यांनी पुणे जिल्हा परिषदेच्यावतीने राबविण्यात येत असलेल्या विविध उपक्रमाची माहिती दिली.

यावेळी पुणे जिल्हा परिषदेने तयार केलेल्या सामान्य ज्ञान मार्गदर्शक पुस्तिकेचे प्रकाशन करण्यात आले. यावेळी गुणवंत शिक्षक, शिक्षिका, त्यांचे कुटुंबीय, शिक्षण विभागातील अधिकारी उपस्थित होते.