पुणे- महापालिकेच्या स्थायी समितीच्या अध्यक्षपदी सलग चौथ्यांदा हेमंत रासने यांची निवड झाली आहे.हेमंत रासने यांनी १० विरूद्ध ६ असा विजय मिळवून राष्ट्रवादीचे उमदेवार प्रदीप गायकवाड यांचा पराभव केला आहे. नगरसेवक हेमंत रासने यांची सलग चौथ्या वेळी अध्यक्षपदावर निवड झाली आहे. स्थायी समिती अध्यक्षपदाची मुदत २८ मार्च रोजी संपली आहे. तर महापालिकेची मुदत १४ मार्च रोजी संपणार आहे. त्यासाठी १ मार्च ते १४ मार्च या १४ दिवसांसाठी नवे स्थायी समिती अध्यक्ष निवडले गेले आहेत. एकापेक्षा अधिकवेळा स्थायी समिती अध्यक्षपद भूषवणारे रासने हे एकमेव नगरसेवक ठरणार आहेत.स्थायी समितीमध्ये भाजपचे १०, राष्ट्रवादीचे चार, शिवसेना व काँग्रेसचे प्रत्येकी एक असे एकूण १६ सदस्य आहेत. पीएमपीचे व्यवस्थापक संचालक लक्ष्मीनारायण मिश्रा हे निवडणूक निर्णय अधिकारी म्हणून उपस्थित होते. त्यामुळे रासने यांची निवड ही औपचारिकता होती. तरीही भाजपने दगाफटका होऊ नये यासाठी व्हीप काढला होता. रासने यांचा विजय निश्चित असल्याने शक्तिप्रदर्शन करण्यासाठी कार्यकर्ते जमा झाले होते.

पुणे दि.4: पंतप्रधान यांचा 6 मार्च रोजी पुणे शहरात दौरा होणार आहे. त्या अनुषंगाने व्हीव्हीआयपी यांच्या दौऱ्यानिमित्त सुरक्षिततेसाठी पुणे शहर व जिल्ह्यात पॅराग्लायडींग, हॉट बलून इत्यादी उड्डाणांना निर्बंध घालण्याचे आदेश जिल्हाधिकारी डॉ. राजेश देशमुख यांनी दिले आहेत.

पंतप्रधान यांच्या दौऱ्यानिमित्त व्हीव्हीआयपी यांच्या सुरक्षिततेसाठी आणि कायदा व सुव्यवस्था अबाधीत राहण्यासाठी ५ मार्च रोजी मध्यरात्री १२ वाजल्यापासून ते ६ मार्चच्या मध्यरात्री १२ वा. पर्यंत पुणे शहर व जिल्ह्यात पॅराग्लायडींग, हॉट बलून अशा प्रकारची अवकाश उड्डाणे करण्यास बंदी घालण्यात आली आहे.

आदेशाचे उल्लघंन केल्यास भारतीय दंड संहिता १८६० च्या कलम १८८ नुसार दंडनियम कायदेशीर कारवाई करण्यात येणार आहे.

पुणे : “वसतिगृह ही युवा परिवर्तनाची केंद्रे आहेत, असा आदर्श विद्यार्थी साहाय्यक समितीने आपल्या कार्यातून घालून दिला आहे. निवास-भोजनासह विद्यार्थ्यांची जडणघडण केंद्रस्थानी ठेवणाऱ्या समितीचे वसतिगृह व्यवस्थापन ‘मॉडेल’ म्हणून राज्यभर नेण्यासाठी प्रयत्न करणार आहे. इतर वसतिगृहात समितीच्या वसतिगृह व्यवस्थापनाची कार्यप्रणाली राबवण्यासाठी प्रयत्नशील आहे,” असे प्रतिपादन राज्याचे शिक्षण आयुक्त विशाल सोळंकी यांनी केले. जिद्द, चिकाटी, सातत्य, प्रामाणिकता आणि मूल्यांची जपणूक जीवनात महत्वाची असल्याचा सल्लाही त्यांनी विद्यार्थ्यांना दिला.

विद्यार्थी साहाय्यक समितीच्या फर्ग्युसन रस्त्यावरील आपटे वसतिगृहात विशाल सोळंकी यांनी वसतिगृह व्यवस्थापन अभ्यासक्रम याबाबत समितीच्या पदाधिकाऱ्यांसोबत बैठक घेतली. त्यानंतर विद्यार्थ्यांशी संवाद साधताना ते बोलत होते. प्रसंगी विद्यार्थी साहाय्यक समितीचे कार्यकारी विश्वस्त तुकाराम गायकवाड, विश्वस्त रमाकांत तांबोळी, सुप्रिया केळवकर, तुषार रंजनकर, रत्नाकर मते, दिनकर वैद्य, चंद्रकांत कुलकर्णी, प्रभाकर पाटील, ज्योती गोगटे, मनोज गायकवाड, विनया ठोंबरे, अरुण अत्रे, सुनील चोरे, कुंदन पाठारे आदी उपस्थित होते.

विशाल सोळंकी म्हणाले, “विद्यार्थ्यांच्या विकासात समितीचा मोलाचा वाटा आहे. हे कार्य समाजातील इतर संस्थांनी आत्मसात केले पाहिजे. तळागाळातील विद्यार्थ्यांपर्यंत समितीसारख्या संस्थाचा लाभ पोहोचावा, यासाठी राज्य शासन व शिक्षण विभागामार्फत सहकार्य करण्याचा प्रयत्न आहे. वसतिगृह माणूस घडवणारी केंद्रे व्हावीत, त्याचे व्यवस्थापन सुसूत्र असावे, प्रत्येक विद्यार्थ्याला न्याय देणारे आणि स्वावलंबी, चारित्र्यवान बनवणारे असावे, यासाठी लवकरच वसतिगृह व्यवस्थापन अभ्यासक्रम सुरु करण्यात येईल. समितीच्या कार्यात माजी विद्यार्थी कणा बनून काम करताहेत, ही आनंदाची बाब आहे. प्रत्येक शाळा, महाविद्यालये किंवा संस्थांमध्ये माजी विद्यार्थ्यांचा सहभाग वाढला, तर शिक्षण व्यवस्था सक्षम होण्यास नक्की मदत होईल.”

“आपण प्रत्येकाने सतत नवनव्या गोष्टी शिकल्या पाहिजेत. सकारात्मक विचार, नियोजनबद्ध अभ्यासावर भर देताना सातत्य टिकवून ठेवले पाहिजे. करिअरच्या प्रगतीसोबतच माणूस म्हणून आपली जडणघडण महत्वाची असते. त्यामुळे संस्कार, मूल्ये जपायला हवीत. स्वतःतील क्षमतांना ओळखून त्यानुसार करिअरच्या वाटा निवडण्याची गरज असते. काळ बदलतोय, तशा संधीही बदलत आहेत. नवे कौशल्य, तंत्रज्ञान आत्मसात करायला हवीत. तुमच्यातील प्रत्येकजण समितीचा चेहरा आहे. येथून चांगले संस्कार घेऊन बाहेर पडल्यानंतर आपल्या गावखेड्यात, कामाच्या ठिकाणी समितीसारखे कार्य उभारण्याचा प्रयत्न आपण केला पाहिजे.”

पुणे, दि. ३ मार्च : ‘भारतरत्न पंडित भीमसेन जोशी यांनी जगाला आवाज दाखवला,’ अशा शब्दांमध्ये गीतकार, पटकथा लेखक जावेद अख्तर यांनी भीमसेन जोशी यांना आदरांजली अर्पण केली. पुणे फिल्म फाउंडेशन आणि महाराष्ट्र शासन यांच्या संयुक्त विद्यमाने आयोजित करण्यात आलेल्या २० व्या पुणे आंतरराष्ट्रीय चित्रपट महोत्सवाचे (पिफ २०२२) आज पटकथाकार जावेद अख्तर आणि शास्त्रीय गायक पंडित सत्यशील देशपांडे यांच्या हस्ते उद्घाटन झाले. त्यावेळी अख्तर बोलत होते.

‘पिफ’चे संचालक ज्येष्ठ दिग्दर्शक डॉ. जब्बार पटेल, अखिल भारतीय मराठी चित्रपट महामंडळाचे अध्यक्ष मेघराज राजेभोसले, पुणे फिल्म फाउंडेशनचे सरचिटणीस रवी गुप्ता, विश्वस्त सतीश आळेकर, चित्रपट निवड समितीचे सदस्य समर नखाते, अभिजित रणदिवे यावेळी उपस्थित होते.

अख्तर म्हणाले, “आवाज कसा असू शकतो, हे भीमसेन जोशी यांनी दाखवले. आवाजाला त्यांनी मूर्त स्वरूपात जगाला दाखवले. आवाज जवळ येतो, लांब जातो. वर येतो, खाली जातो. आवाज सादर होतो. भीमसेन जोशी यांचे गाणे ऐकताना आवाजाचा वापर विलक्षण कसा असू शकतो, याचा अनुभव यायचा.” ते म्हणाले की कदाचित त्यांचे बोलणे हे अतिशयोक्तीचे वाटेल, पण ज्यांनी त्यांच्या मैफिलींचा प्रत्यक्ष अनुभव घेतला आहे, त्यांना त्याचा प्रत्यय आलेला आहे.
लता मंगेशकर यांच्याविषयी बोलताना अख्तर म्हणाले, की भारतीय चित्रपटातील गीते लोकांचे तत्त्वज्ञान सांगणारी होती. भारतीय परंपरेमध्ये गाणी होती तीच परंपरा चित्रपट गीतांनी पुढे नेली. त्यामध्ये लता मंगेशकर यांचे स्थान मोठे होते. जगातील सर्वांत जास्त गाणी त्यांची आहेत. भारतीय चित्रपटाच्या त्या अविभाज्य भाग आहेत. लता मंगेशकर गायच्या तेंव्हा या कविता आणि गीताचा अर्थ ध्वनित होताना जाणवायचा.

पुणे आणि पुणे चित्रपट बोलताना अख्तर म्हणाले, “पुणे हे ऐतिहासिक शहर आहे. ज्ञानाचे शहर आहे. सिनेमाच्या विकासात पुण्याचा मोठा सहभाग आहे. पुण्याने खूप महत्त्वाचे चित्रपट तयार केले. इथला प्रेक्षक खूप प्रगल्भ आहे. संस्कृती आणि कला महाराष्ट्र आणि पुण्यात रोमारोमांत भरली आहे. हे या पुणे चित्रपट महोत्सवातून दिसते. वेगवेगळ्या देशांमध्ये चित्रपट तयार होतात. वेगेवेगळे लोक आणि समान लोक अशा दोन विरोधाभासाच्या गोष्टी हे चित्रपट आपल्याला शिकवत असतात. हे या चित्रपट महोत्सवातून दिसते. हा चित्रपट महोत्सव प्रत्येकवर्षी मोठा होत असून, हॉलिवूडच्या बाहेर मोठा सिनेमा आहे, हे या महोत्सवातून दिसते.”
“भारतीय व्यावसायिक चित्रपटामध्येही सामाजिक राजकीय अर्थ असतो. समकालीन मूल्यांना पुढे घेऊन जाणारा हा नायक असतो. भारतीय चित्रपटांच्या इतिहासात हा आशय येताना दिसतो. चित्रपट हे स्वप्नांसारखे असतात. आणि ती स्वप्ने लोकांची असतात. आणि ती भारतीय व्यावसायिक चित्रपटांमधून दिसतात. आता मोठ्या प्रमाणावर लोक मध्यमवर्गात आले आहेत. त्यांचा प्रभाव चित्रपटावर पडत आहे,” असेही अख्तर म्हणाले. तसेच भारतीय गीतकारांचं काम इतकं अद्वितीय आहे की त्यांना ऑस्कर, नोबेल सारखे पुरस्कार मिळावेत अशा शब्दांत त्यांनी गीतकारांचा गौरव केला आणि साहीर लुधियानवी, शैलेंद्र, मजरूह सुलतानपुरी आदी गीतकारांचा आवर्जून उल्लेख केला.

पंडित सत्यशील देशपांडे म्हणाले, “भारतरत्न पंडित भीमसेन जोशी यांना जग हे भारताची ओळख म्हणून जाणते आणि भारत त्यांना स्वतःचा अभिमान मानतो. हिंदुस्थानी शास्त्रीय संगीत हे एकमेव असे संगीत आहे, की ज्यात गायक ३ तास तीनही सप्तकांत गात असतो. मात्र त्याच्याकडे सामुग्री अल्प असते. अशा अतिशय अल्प सामुग्रीत सुरांना घेऊन जगाला स्तिमित करणारी प्रतिभा घेऊन पंडित भीमसेन जोशी गेल्या शतकात आले. त्यांनी कधी फ्युजन केले नाही. त्यांचा स्वर हा नेहमीच आश्वासक होता. प्रत्येकाला असे वाटायचे की ते आपल्याशीच बोलत आहे आणि आपल्यासाठीच गात आहेत. ते संगीताच्या प्रवासात श्रोत्यांना बरोबर घेऊन जायचे. त्यांनी विलक्षण स्वरनाट्य सादर केले. त्यांनी शब्दांचा अतिशय कमी आणि नेमका वापर केला. त्यांनी भक्तिसंगीताला शास्त्रीय संगीताचा आयाम दिला.”

प्रास्ताविक करताना डॉ. जब्बार पटेल म्हणाले, “जगभरात भयानक परिस्थिती असतानाही यावर्षी ‘पिफ’मध्ये १५७८ चित्रपट आले. त्यातून निवडलेले ६५ देशांतून आलेले ११० चित्रपट या महोत्सवात दाखवण्यात येणार आहेत. भारत साहिर लुधियानवी, भारतरत्न पंडित भीमसेन जोशी आणि सत्यजित रे यांची जन्मशताब्दी साजरी करीत आहे. त्यांच्याच कारकिर्दीला यावेळच्या ‘पिफ’मध्ये सलाम करण्यात येत असून, त्यावर आधारित थीम यावर्षी ‘पिफ’साठे निवडण्यात आली आहे.” यावेळी त्यांनी चित्रपट महोत्सवाची विस्तृत माहिती दिली.

यावेळी भारतरत्न लता मंगेशकर यांना चित्रफितीमधून श्रद्धांजली वाहण्यात आली. पंडित बिरजू महाराज यांना अभिनेत्री शर्वरी जमेनीस हिने नृत्यांतून आदरांजली अर्पण केली. यशवंत जाधव यांनी पोवाडा आणि डॉ. गणेश चंदनशिवे यांनी पारंपरिक गोंधळ सादर केला. अभिनेत्री श्रेया बुगडे आणि अभिनेता स्वप्निल जोशी यांनी सोहळ्याचे निवेदन केले.
उद्घाटन सोहळ्यानंतर स्वित्झर्लंडच्या मानो खलील यांच्या ‘नेबर्स’ हा चित्रपट दाखवण्यात आला.

—

पुणे (प्रतिनिधी):श्री क्षेत्र आळंदी येथील येथील भामा आसखेड पाणी योजनेतून विशेष पाणी पुरवठा योजना मंजूर करण्यात महत्वपूर्ण भूमिका निभावल्याबद्दल महापौर मुरलीधर मोहोळ यांचा समस्त आळंदीकर नागरिक आणि महाराज मंडळीच्या वतीने संत ज्ञानेश्वर महाराज मंदिरात जाहीर नागरी सत्कार करण्यात आला. यावेळी हभप नारायण महाराज जाधव यांच्या हस्ते महापौरांना वारकरी संप्रदायाचा फेटा, संत ज्ञानेश्वर महाराज मूर्ती भेट देऊन सन्मानित करण्यात आले.

यावेळी कार्यक्रमाला नगराध्यक्ष वैजयंता उमरगेकर, हभप चैतन्य महाराज लोंढे, आध्यात्मिक विकास आघाडीचे पश्चिम महाराष्ट्र प्रमुख हभप संजय महाराज घुंडरे, माजी सभापती डी.डी. भोसले, जिल्हा परिषद सदस्य अतुल देशमुख, माजी नगराध्यक्ष बबनराव कुऱ्हाडे, सचिन पाचुंदे, शारदा वडगावकर, हभप भाऊमहाराज फुरसुंगीकर, माऊली वीर, नगरसेवक प्रशांत कुऱ्हाडे, सचिन गिलबिले, सागर बोरुंदिया, सचिन काळे, माजी नगरसेवक दिनेश घुले, अशोकराव उमरगेकर, नंदकुमार कुऱ्हाडे, वासुदेव घुंडरे, भाजपचे शहराध्यक्ष किरण येळवंडे, अजित वडगावकर, भागवत आवटे, गुलाबराव खांडेभराड, माऊली बनसोडे, पांडुरंग ठाकुर, आसाराम महाराज बडे, पंडित महाराज क्षीरसागर, महाराज मंडळी आणि आळंदीकर नागरिक आणि आळंदीकर नागरिक तसेच महापौरांच्या मातोश्री आणि बंधू सुध्दा उपस्थित होते.

यावेळी बोलताना महापौर मुरलीधर मोहोळ म्हणाले, संतश्रेष्ठ श्री. ज्ञानेश्वर माऊलींच्या क्षेत्र आळंदीत अर्थात अलंकापुरीत भामा आसखेड पाणी योजनेतून विशेष पाणीपुरवठा योजना मंजूर करण्यात मोलाची भूमिका निभावण्याची संधी मिळाली. खरे तर ही योजना मंजूर करण्यात मी केवळ निमित्तमात्र होतो, कारण आळंदीकरांच्या सामूहिक पाठपुराव्याचेच हे यश आहे. हभप नारायण महाराज जाधव यांच्या हस्ते वारकरी संप्रदायाचा फेटा, संत ज्ञानेश्वर महाराज मूर्ती देऊन सन्मानित केले. आजवर अनेक सन्मान स्विकारण्याची संधी मिळाली, मात्र माऊलींच्या मंदीरात आणि आईच्या उपस्थितीत झालेला हा सन्मान कायम स्मरणात राहील.

‘आळंदी शहराला पाणी देण्याच्या या निर्णयाला खरंतर कोणाचाही विरोध नव्हता, तरीही प्रशासकीय पातळीवर ही मागणी पूर्ण करण्यासाठी विशेष पाठपुरावा करावा लागला. त्यानंतर कोणत्याही अटी-शर्तीशिवाय आळंदीला पाणीपुरवठा योजना मंजूर करण्यात आली, विशेष योगायोग म्हणजे त्याच दिवशी आळंदी शहराला जलसंपदा विभागाकडून स्वतंत्र पाण्याचा कोटा मंजूर करण्यात आला आणि आळंदीला स्वतःचे हक्काचे पाणी मिळाले. आळंदीतील नागरिक, भाविक आणि वारकऱ्यांना हा पाणीपुरवठा मंजूर झाला, याचे मला आत्मिक समाधान आहे आणि माझ्या महापौरपदाच्या कार्यकाळात कायम आठवणीत राहील, असा हा एक महत्वपूर्ण निर्णय आहे’, असेही महापौर मोहोळ म्हणाले.

यावेळी कार्यक्रमाचे सूत्रसंचालन हभप चैतन्य महाराज लोंढे यांनी तर आभार संजय घुंडरे यांनी केले.

  पुणे, दि.3: प्रादेशिक परिवहन प्राधिकरण, पुणे, पिंपरी-चिंचवड व बारामती यांनी ऑटोरिक्षा चालकांनी गैरसोय टाळण्यासाठी इलेक्ट्रॉनिक मीटर पुन:प्रमाणीकरण (कॅलिब्रेशन) करण्याकरीता 31 मार्च 2022 पर्यंत मुदतवाढ देण्यात आलेली असून या मुदतीत सर्व ऑटोरिक्षा चालक, मालकांनी ऑटोरिक्षांचे मीटर पुनः प्रमाणीकरण व मीटर तपासणी करून घ्यावी असे आवाहन करण्यात आले आहे.

            मीटर तपासणीचे कामकाज फुलेनगर, आळंदी रस्ता चाचणी मैदान या ठिकाणी सुरु आहे. ऑटोरिक्षाधारक मीटर पुन:प्रमाणीकरण करुन न घेतल्यास त्यांच्यावर मुदत समाप्तीनंतर किमान 7 दिवस आणि कमाल 40 दिवस या मर्यादेत प्रत्येक दिवसाच्या विलंबासाठी 1 दिवस परवाना निलंबन केले जाईल. निलंबनाऐवजी तडजोड शुल्क जमा करण्यात इच्छुक ऑटोरिक्षाधारकांकडून प्रत्येक दिवसासाठी 50 रुपये आकारण्यात येईल जे किमान 500 रुपये आणि कमाल 2 हजार रुपये या मर्यादेत राहील, असे प्राधिकरणाचे सदस्य सचिव तथा पुण्याचे प्रादेशिक परिवहन अधिकारी डॉ. अजित शिंदे यांनी कळवले आहे.