पुणे- उद्या शुक्रवार दि १३ मे 2022 रोजी सायंकाळी ४.०० वा घरगुती गॅस दरवाढ व महागाई विरोधात शिवसेनेने तब्बल 58 ठिकाणी आंदोलन करण्याचे घोषित केले आहे . शिवसेनेचे शहरप्रमुख संजय मोरे म्हणाले कि ,”शिवसेनेच्या वतीने संपूर्ण पुणे शहरात प्रत्येक प्राभागानुसार केंद्र सरकार विरोधात वाढलेल्या महागाईच्या भस्मासुरा विरोधात ५८ प्रभागाच्या ५८ ठिकाणी आंदोलन घेण्यात येणार आहे. प्रभागातील वाडी वस्तीच्या आणि मोक्याच्या 58 ठिकाणी हि आंदोलन घेण्यात येणार आहेत. सध्या घरगुती गॅस, डिझेल, पेट्रोल, CNG गॅसच्या दरवाढीमुळे सामान्य नागरिक हैराण झाले आहेत. त्यांचे जीवनमान खालावले आहे. इंधनांच्या सततच्या दरवाढीमुळे प्रत्येक जीवनावश्यक वस्तूंच्या किमती भरमसाठ वाढत आहेत. ह्यामुळे सामान्य माणसाचे दैनंदिन जनजीवन संपूर्ण पणे कोलमडून अनेक समस्यांना तोंड देऊन आयुष्य जगावे लागत आहे. त्यामुळे सामान्य जनतेचा रोष आणि त्यांच्या मनातील असंतोष आता जाहीरपणे जाणवायला लागला आहे, त्यासाठी ह्या आंदोलनाद्वारे जनतेच्या मनातील आक्रोश केंद्र सरकारच्या विरोधातील राग शिवसेना केंद्रापर्यंत पोहोचवणार आहे.

महिलांसाठीच्या आरोग्य सुविधा पुरवा, पुरेसा स्टाफ नेमा!: आप ची मागणी
 
पुणे- दळवी हॉस्पिटलमध्ये तातडीच्या प्रसूती ऑपरेशन ची सुविधा द्या! महिलांसाठीच्या आरोग्य सुविधा पुरवा, पुरेसा स्टाफ नेमा! अशा मागण्यांंसाठी आम आदमी पार्टीच्या मुकुंद किर्दत यांच्या उपस्थितीत महिलांनी आंदोलन केले व स्मरणपत्र दिले. यावेळेसएशा डोंगरे, काजल दातखिळे, वैशाली डोंगरे, सतीश यादव, मंगल चौधरी, पार्वती परदेशी, पूजा चव्हाण, शंकर थोरात, अनिता श्रीराम, सरस्वती जाधव,लिलाबाई दगडे, तेजस डोंगरे, रूपा माने, झुंबर हवाले, राहुल म्हस्के, विकास चव्हाण, दिनेश चौधरी, विनोद दातखिळे, अभिमान विटकर, ईश्वर तुजारे,माधुरी रणसुरे,आकाश मुनियान, बाबा गोलंदाज, ललिता गायकवाड, संतोष पाटोळे , तुकाराम शिंदे, अभिमान विटकर, शारुक शेख, शालन जोगदंड, आशा गायकवाड, अनुसया शिंदे, अंजना पवार, विकास लोंढे, वैशाली पवार, धर्मेंद्र डोंगरे, संदेश दिवेकर, आदी उपस्थित होते.

यावेळी किर्दत यांनी सांगितले कि,’जनवाडी, गोखलेनगर, मॉडर्न कॉलनी  ते बोपोडी , इंदिरा वसाहत, खैरवाडी, पाटील इस्टेट या भागातील भाभा हॉस्पिटल अजून पूर्ण नाही, त्यामुळे एकमेव दळवी हॉस्पिटलमध्ये प्रसूती सुविधा आहे, परंतु तातडीची इमर्जन्सी सेवा उपलब्ध नाही. त्यामुळे महिलांना तातडीने दुसरे हॉस्पिटल शोधावे लागते. ससून मध्ये महिला तेजायला कचरतात. कमला नेहरू हॉस्पिटलमध्ये ऍडमिशन मिळेल याची खात्री नसते. त्यामुळे खाजगी रुग्णालयात जाणे भाग पडते.त्यामुळे या मोठया परिसरात किमान दळवी हॉस्पिटलमध्ये या तातडीच्या सुविधा सुरू करा अशी या वस्त्यामधील महिलांची मागणी आहे.
तसेच दळवी हॉस्पिटलमध्ये बऱ्याचदा मुख्य डॉकटर उपलब्ध नसतात.नर्सेस नसतात त्यामुळे सतत नातेवाईकांशी वादाचे प्रसंग घडतात. आपचे शंकर थोरात यांना माहिती अधिकारांतर्गत आरोग्य विभागाने दिलेल्या माहितीनुसार दळवी हॉस्पिटलमध्ये कार्यरत असलेल्या सुविधा पुरवण्यासाठी सुद्धा आवश्यक असणारा स्टाफ उपलब्ध नाही. मिळालेल्या माहितीनुसार ७ डॉकटरची गरज असताना केवळ ४ डॉकटर आहेत तर ७ नर्सेस ची गरज आहे.अजून ५ आया असणे आवश्यक आहे. बाह्य रुग्ण विभागात अटेंडन्टच नाही. तसेच अनेक उपकरणांची मागणी प्रलंबित आहे.असेही मुकुंद किर्दत यांनी सांगितले .
 

वीजवाहिन्या स्थलांतरीत करण्यापूर्वीच राष्ट्रीय महामार्गासाठी खोदकाम सुरु

पुणे, दि. १२ मे २०२२: भारतीय राष्ट्रीय राजमार्ग प्राधीकरणाच्या वतीने कात्रज चौक ते नवले ब्रिज दरम्यान राष्ट्रीय महामार्ग तयार करण्याचे काम गेल्या दीड वर्षांपासून सुरू आहे. तथापि गेल्या सहा महिन्यांमध्ये विविध ठिकाणी झालेल्या खोदकामामध्ये तब्बल ३५ वेळा महावितरणच्या वीजवाहिन्या तोडलेल्या आहेत. त्यामुळे कात्रज, आंबेगाव, संतोषनगर, दत्तनगर, जांभूळवाडी, गुजरवाडी, मांगडेवाडी, भारती विद्यापीठाच्या परिसरातील सुमारे ४५ हजार वीजग्राहकांना खंडित वीजपुरवठ्याचा नाहक त्रास सहन करावा लागत आहे.

याबाबत माहिती अशी की, भारतीय राष्ट्रीय राजमार्ग प्राधीकरणाकडून (नॅशनल हायवेज अॅथोरिटी ऑफ इंडिया) गेल्या दीड वर्षांपासून रस्ता रुंदीकरणाचे तसेच कात्रज चौकाच्या रस्त्याचे काम सुरु आहे. हे काम सुरु होण्यापूर्वी महावितरणकडून रस्त्यालगतच्या भूमिगत वीजवाहिन्या व संबंधित यंत्रणा स्थलांतरीत करण्याबाबत जुलै २०२० मध्ये अंदाजपत्रक मंजूर करून देण्यात आले आहे. हे काम नियमानुसार प्राधीकरणाकडून करण्यात येत आहे. मात्र प्राधीकरणाकडून वीजयंत्रणा स्थलांतरीत करण्यापूर्वीच रस्ता रुंदीकरणाचे काम सुरु करण्यात आले. तर अंदाजपत्रकानुसार वीजयंत्रणा स्थलांतरीत करण्याचे काम सध्या संथगतीने सुरु आहे. त्यामुळे रस्त्यालगतच्या भूमिगत वीजवाहिन्या वारंवार जेसीबीच्या खोदकामात तोडल्या जात आहेत. आठवड्यातून असे तीन ते चार वेळा प्रकार घडत आहेत.

कात्रज, आंबेगाव, संतोषनगर, दत्तनगर, जांभूळवाडी, गुजरवाडी, मांगडेवाडी, भारती विद्यापीठाच्या परिसरातील सुमारे ४५ हजार वीजग्राहकांना महावितरणच्या २२/२२ केव्ही अमित उपकेंद्रातून वीजपुरवठा करण्यात येतो. मात्र खोदकामात तोडलेल्या वीजवाहिन्यांमुळे विविध भागातील नागरिकांना खंडित वीजपुरवठ्याचा नाहक त्रास सहन करावा लागत आहे. महामार्गाच्या रस्ता रुंदीकरणासाठी जेसीबीने सुरु असलेल्या खोदकामात गेल्या सहा महिन्यांमध्ये २५ वेळा भूमिगत वीजवाहिन्या तोडण्यात आल्या आहेत. त्यामुळे या प्रकारांमध्ये विविध परिसरात गेल्या ६ महिन्यांत एकूण सुमारे ४७ तास वीजपुरवठा खंडित झाला होता. यासोबतच प्राधीकरणाकडून सांडपाणी वाहिनी (ड्रेनेज लाईन) स्थलांतरीत करण्यासाठी रस्त्यालगत खोदकाम सुरु आहे. या खोदकामात देखील आतापर्यंत १० वेळा भूमिगत वीजवाहिन्या तोडण्यात आल्या आहेत तर विविध ठिकाणी एकूण सुमारे ४० तास वीजपुरवठा खंडित राहिला आहे.

महावितरणकडून वीजयंत्रणा वेगाने स्थलांतरीत करण्यासाठी प्राधीकरणाकडे वेळोवेळी पाठपुरावा विनंती करण्यात आली आहे. मात्र या कामास अद्याप गती आलेली नाही. अनेकदा सायंकाळी किंवा रात्रीच्या कालावधीत खोदकाम करून वीजवाहिन्या तोडल्या जात आहेत. तोडलेल्या वीजवाहिन्यांमुळे पर्यायी व्यवस्थेतून त्वरीत वीजपुरवठा सुरू करणे व वाहिन्यांची दुरुस्ती करणे यासाठी महावितरणच्या अभियंता व कर्मचाऱ्यांची रात्रंदिवस मोठी धावपळ होत आहे. सोबतच वीजग्राहकांचा नाहक रोष सहन तसेच यंत्रणेच्या दुरुस्तीचा आर्थिक भार, वीजविक्रीचे नुकसान महावितरणला सहन करावा लागत आहे.

संमेलनाच्या पूर्वसंध्येला महात्मा फुले ते संमेलन स्थळापर्यंत (सावित्रीबाई फुले स्मारक)

ग्रंथदिंडीने होणार संमेलनाची सुरूवात –

पुणे . : साहित्य सम्राट अण्णा भाऊ साठे जन्मशताब्दी वर्षानिमित्त आयोजित पुणे येथे होणाऱ्या साहित्य सम्राट अण्णा भाऊ साठे विशेष साहित्य संमेलन २०२२ ची तयारी अंतिम टप्प्यात झाली असून संमेलन अतिशय मोठ्या प्रमाणात होणार असल्याचे संयोजकांच्या वतीने सांगण्यात आले आहे. त्याचाच एक भाग म्हणून आज संमेलनाच्या लोगोचे अनावरण पत्रकार संघ येथे ज्येष्ठ सामाजिक कार्यकर्ते व लहुजी वस्ताद साळवे स्मारक समिती महाराष्ट्र शासनचे अध्यक्ष विजय बापु डाकले व स्वागताध्यक्ष अविनाश बागवे यांच्या हस्ते करण्यात आले.

यावेळी संयोजन समितीचे अध्यक्ष हनुमंत साठे, साहित्य परिषदेचे संस्थापक सचिन बगाडे, निमंत्रक अनिल हातागळे ,बाळासाहेब भांडे ,विनोद शिंदे व इतर मान्यवर उपस्थित होते. या संमेलन स्थळास राजर्षी छत्रपती शाहू महाराज संमेलन नगरी असे नामकरण करण्यात आले आहे. तसेच मुख्य विचारपीठास डॉ. बाबासाहेब आंबेडकर विचार मंच तर प्रवेशद्वारास आनंदराव बागवे व प्रवेशद्वार क्र. २ यास ज्येष्ठ साहित्यिक उत्तम बंडू तुपे यांचे नाव देण्यात व आले आहे. ग्रंथ प्रदर्शनास मुक्ता साळवे ग्रंथ दालन असे नाव देण्यात आले आहे. एकुणच संपूर्ण परिसरास महापुरूषांचे व साहित्यिकांच्या नावांमुळे संपूर्ण संमेलन स्थळ हे विशेष आकर्षण ठरणार आहे. संमेलनच्या पूर्वसंध्येला शनिवार, दि. १४ मे २०२२ रोजी सायं. ६ वा. महात्मा फुले वाडा ते संमेलन स्थळ (सावित्रीबाई फुले स्मारक) ग्रंथदिंडी काढण्यात येणार आहे. य ग्रंथदिंडीमध्ये ज्येष्ठ सामाजिक नेते डॉ. बाबा आढाव, ज्येष्ठ साहित्यिक विश्वास पाटील संमेलनाध्यक्ष विठ्ठल भंडारे, रमेश बागवे ( मातंग एकता आंदोलन संस्थापक), विजय ब डाकले यासह पुणे शहरातील ज्येष्ठ साहित्यिक विचारवंत व सामाजिक व राजकीय क्षेत्राती विविध मान्यवर सहभागी होणार आहेत

पुणे: किडनी प्रत्यारोपण फसवणूक प्रकरणात पुण्यातील नामांकित रूबी हॉल क्लिनिकचे व्यवस्थापकीय विश्वस्त डॉ. परवेज ग्रँट, कायदेशीर सल्लागार मंजूषा कुलकर्णी यांच्यासह १५ जणांवर कोरेगाव पार्क पोलीस ठाण्यात फसवणूक आणि मानवी अवयव प्रत्यारोपण कायद्यानुसार गुन्हा दाखल करण्यात आला आहे. १५ लाख रुपयांच्या आमिषाने एका महिलेचे किडनी प्रत्यारोपण केल्याचा प्रकार मार्चमध्ये उघड झाला होता. याप्रकरणात राज्य आरोग्य विभागाने रुग्णालयाच्या अवयव प्रत्यारोपण केंद्राचा परवाना निलंबित केला आहे.या प्रकरणात पैशांसाठी किडनी विकलेल्या महिलेलाही आरोपी करण्यात आले आहे.
व्यवस्थापकीय विश्वस्त डॉ. परवेज ग्रँट, उपसंचालक रेबेका जॉन, कायदेशीर सल्लागार मंजूषा कुलकर्णी तसेच डॉ. अभय सद्रे, डॉ. मुफ्त भाटी, डॉ. हिमेश गांधी, सुरेखा जोशी यांच्यासह अमित साळुंखे, सुजाता साळुंखे, सारिका सुतार, अण्णा साळुंखे, शंकर पाटील, सुनंदा पाटील, रवी गायकवाड, अभिजित मदने यांच़्या विरोधात गुन्हा दाखल झाला आहे. याबाबत आरोग्य सेवा मंडळाचे उपसंचालक डॉ. संजोग कदम यांनी फिर्याद दिली आहे.अमित साळुंखे या रुग्णाने सारिका सुतार या महिलेला पंधरा लाख रुपयांचे आमिष दाखवून रूबी हॉलमध्ये किडनी प्रत्यारोपण केले. साळुंखे याने सादर केलेली कागदपत्रे ग्राह्य धरून प्रत्यारोपण समितीने किडनी प्रत्यारोपणास परवानगी दिली. १५ लाख रुपये मिळाले नाही म्हणून सुतार यांनी फसवणूक झाल्याची तक्रार पोलिसांकडे केली. त्यानंतर हा प्रकार उघड झाला होता

पुणे- -ई टॉयलेटचा ढोल पिटवून प्रसिद्धी मिळवून लोकांना आधुनिकतेचे आणि स्वच्छतेचे स्वप्ने दाखवून तत्कालीन खासदार अनिल शिरोळे यांच्या निधीचा अपव्यय करून उधळपट्टी केल्याचा आरोप आम आदमी पार्टीचे  प्रवक्ते  मुकुंद किर्दत यांनी केला आहे .

या संदर्भात त्यांनी सांगितले कि ,’२०१८ मध्ये अनिल शिरोळे यांच्या खासदार निधीतून २१ सिटचे १५ ई टॉयलेट पुण्यात बसवण्यात आले. त्यासाठी दोन कोटी अठरा लाख खर्च झाले. महिलांच्या सार्वजनिक स्वच्तागृहाची पुण्यात कमतरता आहे. त्यामुळे महिलांना याचा प्रामुख्याने उपयोग होईल असा दावा तेव्हा केला गेला. ही ईटॉयलेट थेट घनकचरा विभागाशी इंटरनेट ने थेट जोडली गेली असल्याचे सांगितले जात होते. अशी अत्याधुनिक यंत्रणा असलेली सुविधा योग्य देखरेख नसेल तर कुचकामी ठरते हे सर्वांनाच माहित आहे. तरीही हि ईटॉयलेट बसवली गेली. परंतु यातील निम्मी टॉयलेट दोन वर्षापूर्वीच बंद पडली होती. आता उर्वरित टॉयलेट कुठे कॉइन बॉक्स बिघडल्याने ,तर कुठे सेन्सर बिघडले, पाणी नाही अश्या कारणामुळे  बंद आहेत. १२ स्क्वेअर फुटाचे टॉयलेट साधारण १८००० रुपयात बांधले जाते व इतर खर्च धरून २५ ते ३० हजारात पूर्ण होऊ शकते पण ही एका सीटची ईटॉयलेट प्रत्येकी १० लाखपेक्षा अधिक रकमेला घेतली गेली. हा खर्च दिखावूपणासाठीच होता. ४ वर्षांनी ही ईटॉयलेट पूर्ण निकामी ठरली आहेत. आता तो पांढरा हत्ती आहे. त्याला चालू ठेवायचे तर अवाच्या सव्वा खर्च देखभाल दुरुस्ती वर होईल. यात कॉइन सिस्टीम असल्याने सामान्य घरातील महिला याचा वापर करायला बीचकतात. आज आम आदमी पार्टीच्या सतीश यादव , शंकर थोरात आदी कार्यकर्त्यांनी काही ई टॉयलेटची पाहणी केली असता , तिथे कचरा टाकलेला , दरवाजे बंद , कॉइन बॉक्स तोडलेले , घाण जमा झालेली आढळून आली. कोरोना काळात याचा फारसा वापरही झालेला नाही तरीही हि स्थिती आहे.  त्यामुळे महानगर पालिका बांधत असलेली टॉयलेट परवडली पण हि नको अशी जनतेची भावना आढळून आली. त्यामुळे ‘जनतेचे सव्वा दोन कोटी अक्षरशः गटाराला मिळाले असून हि स्मार्ट सिटीची च्या अपयशाची स्मारके आहेत’ अशी टीका आम आदमी पार्टीचे प्रवक्ता मुकुंद किर्दत यांनी म्हंटले आहे. याबाबत संबंधित कंपनी व घनकचरा व्यवस्थापन विभाग यांची बैठक असल्याचे समजते. आयुक्तांनी दिखावूपणाच्या खर्चाला आतातरी चाप लावावा व महिलांना स्वच्छ स्वच्छतागृह उपलब्ध करून द्यावीत अशी अपेक्षा आम आदमी पार्टीने व्यक्त केली आहे.