पुणे, दि. १९ मे २०२२: महावितरणकडून पुणे, पिंपरी चिंचवड शहरासह ग्रामीण भागात सुरु असलेल्या वीजयंत्रणेच्या मान्सूनपूर्व देखभाल व दुरुस्तीची कामे पूर्णत्वाकडे आहेत. मान्सूनचे लवकरच आगमन होत आहे. त्यामुळे येत्या पावसाळ्यात वीजपुरवठा सुरळीत ठेवण्यासाठी ही कामे सुरु वेगाने सुरु आहेत.

पावसाळ्यात वीजपुरवठा खंडित होण्याचे संभाव्य धोके टाळण्यासाठी महावितरणकडून दरवर्षी देखभाल व दुरुस्तीचे कामे केली जातात. यात प्रामुख्याने उपरी वीजवाहिन्यांना स्पर्श करणार्‍या झाडांच्या फांद्या तोडून टाकणे, तुटलेले पीन व डिस्क इन्सूलेटर्स बदलणे, वितरण रोहित्रांचे, खांबांचे, उपकेंद्रातील उपकरणांचे पूर्ण अर्थिंग तपासणे व तुटलेल्या अर्थवायर पूर्ववत करणे, ऑईल फिल्टरेशन, उपकेंद्रातील ब्रेकर्सची दुरुस्ती, बॅटरी चार्जींग, फ्यूज बदलणे, भूमिगत केबल टाकणे, खांब आणि तारांचे मजबुतीकरण, वाकलेले किंवा गंजलेले वीज खांब, उच्चदाब व लघुदाब वीजवाहिन्यांना आवश्यकतेनुसार गार्डस् पुरवणमे व अस्तित्वात असलेले गार्डिंग सुस्थितीत करणे, तारांमधील झोल काढणे, जुन्या फिडर पिलरमध्ये इन्सूलेशन स्प्रे मारणे तसेच पावसाचे पाणी साचणार्‍या परिसरातील फिडर पिलरची जमिनीपासून उंची वाढविणे, लघुदाब वीजवाहिनीवर पीव्हीसी स्पेसर्स बसवणे, लघुदाब वितरण पेटीची किरोकोळ दुरुस्ती करणे व दरवाजा नसल्यास लावणे अशा विविध प्रकारच्या कामांचा समावेश आहे. रोहित्र तसेच वीजयंत्रणेच्या ठिकाणी नागरिकांनी टाकलेला कचराही या मोहिमेत साफ करण्यात येत आहे.

भर उन्हात महावितरणच्या कर्मचार्‍यांनी देखभाल व दुरुस्तीच्या कामांना वेग दिला आहे. यामध्ये विविध ठिकाणी झाडांच्या छोट्या फांद्या तोडण्यात आल्या आहेत. तर धोकादायक असलेल्या मोठ्या फांद्यांबाबत संबंधीत स्थानिक स्वराज्य संस्थांना माहिती देण्यात आली आहे. खासगी किंवा संस्थांच्या मालकीच्या जागेतील झाडे किंवा मोठ्या लांबीच्या फांद्या वादळी व मुसळधार पावसामुळे वीजवाहिन्यांवर कोसळण्याची शक्यता असते. या शक्यतेचा अंदाज घेऊन संभाव्य धोका निर्माण करणार्‍या झाडांची किंवा मोठ्या फांद्यांची संबंधीतांनी महानगरपालिकेची परवानगी घेऊन कटाई करावी. त्यासाठी आवश्यकतेनुसार सहकार्य करण्यात येईल, असे आवाहन महावितरणने केले आहे.

वीजपुरवठा खंडित होण्याची काही कारणे

वीज खांबावर असणारे चॉकलेटी रंगाचे पीन किंवा डीस्क इन्सूलेटर (चिमणी) तसेच डीपी स्ट्रक्चरवर असणारे पोस्ट इन्सूलेटर हे चिनीमातीचे असतात. वीजप्रवाह वितरण यंत्रणेच्या लोखंडी खांबात उतरू नये, यासाठी हे इन्सूलेटर अतिशय महत्वाचे असतात. उन्हाळ्यात चिनीमातीचे हे इन्सूलेटर तापतात. त्यानंतर पावसाचे दोन-चार थेंब पडले की इन्सूलेटरला तडे जातात. त्यामुळे विजेचा संभाव्य अपघात टाळण्यासाठी आपत्कालिन यंत्रणा (ब्रेकर) कार्यान्वित होते व वाहिनीमधील वीजप्रवाह खंडित होतो. त्यामुळे खराब झालेले डिस्क व पीन इन्सूलेटर बदलण्यात येत आहेत.

भूमिगत वाहिन्यांच्या ठिकाणी वेगवेगळ्या कामांसाठी खोदकाम केले जाते. यात भूमिगत वाहिन्यांना धक्का बसतो. उन्हाळ्यात त्यावर काही परिणाम होत नाही. परंतु, पावसाला सुरवात झाली की पाणी या वाहिन्यांमध्ये शिरते व वाहिनीत बिघाड होतो. संततधार पावसामुळे भूमिगत वाहिन्यांमध्ये आर्द्रता निर्माण होते. त्यामुळेही वीजपुरवठा खंडित होतो. केबल टेस्टींग व्हॅनच्या सहाय्याने भूमिगत वाहिन्यांमधील दोष शोधला जातो. दोष आढलेल्या ठिकाणी खोदकाम करणे, केबलमधील आर्द्रता काढणे, जाईंट करणे आदी कामे करावी लागतात.

वीजपुरवठा खंडित होण्याचे आणखी कारणे म्हणजे वीज यंत्रणेवर झाडे कोसळणे, मोठ्या फांद्या तुटून पडणे, वीज कोसळणे किंवा तिच्या कडकडाटाने दाब वाढणे आदींमुळे वीजपुरवठा खंडित होतो. फिडर पिलर, रिंगमेन युनिट आदी आदी यंत्रणेत पाणी शिरते. त्यामुळेही वीजपुरवठा खंडित होतो. खोलगट व सखल पावसाचे पाणी साचल्याने सुरक्षिततेच्या दृष्टीने रोहित्राचा वीजपुरवठा बंद करून ठेवावा लागतो.

महावितरणचे कॉल सेंटर २४तास उपलब्ध – शहरी व ग्रामीण भागातील वीजग्राहकांसाठी महावितरणचे कॉल सेंटर २४ तास उपलब्ध आहे. कोणत्याही प्रकारची तक्रार नोंदविण्यासाठी १८००-१०२-३४३५ किंवा १८००-२३३-३४३५ किंवा १९१२ या टोल फ्री क्रमांकावर कोणत्याही कंपनीच्या लॅण्डलाईन किंवा मोबाईलद्वारे वीजग्राहकांना संपर्क करण्याची व वीजसेवेविषयक कोणत्याही प्रकारची तक्रार व माहिती देण्याची सोय उपलब्ध आहे.

पुणे, दि. १९ मे २०२२: अनुसूचित जाती व जमाती प्रवर्गातील अर्जदारांना महावितरणकडून नवीन घरगुती वीजजोडणी प्राधान्याने उपलब्ध करून देण्यासाठी सुरु असलेल्या ‘डॉ. बाबासाहेब आंबेडकर जीवन प्रकाश योजने’तून पुणे परिमंडलामध्ये आतापर्यंत ९९८ नवीन वीजजोडण्या कार्यान्वित करण्यात आल्या आहेत. दरम्यान, लाभार्थ्यांकडून मिळालेला प्रतिसाद पाहता व वीजजोडण्यांची भविष्यातील मागणी पाहता या योजनेचा कालावधी राज्य शासनाकडून दि. ६ डिसेंबर २०२२ पर्यंत वाढविण्यात आला आहे.

राज्याचे ऊर्जामंत्री ना. डॉ. नितीन राऊत यांच्या पुढाकाराने अनुसूचित जाती व जमाती प्रवर्गातील नागरिकांना घरगुती नवीन वीजजोडणी उपलब्ध करून देण्यासाठी ‘डॉ. बाबासाहेब आंबेडकर जीवन प्रकाश योजना’ सुरु करण्यात आली आहे. या योजनेमध्ये लाभार्थी अर्जदारांना वीजजोडणीसाठी ऑनलाईन किंवा ऑफलाईन अर्ज करण्याची सोय आहे. लाभार्थ्यांना या योजनेमधून घरगुती वीजजोडणी घेण्यासाठी महावितरणकडे केवळ ५०० रुपयांची अनामत रक्कम भरावी लागणार आहे. ही रक्कम देखील पाच समान मासिक हप्त्यांमध्येच वीजबिलातून भरण्याची सुविधा उपलब्ध आहे. या योजनेत पुणे परिमंडलामध्ये आतापर्यंत ९९८ नवीन घरगुती वीजजोडण्या कार्यान्वित करण्यात आल्या आहेत.

या योजनेत वीजजोडणीचा अर्ज महावितरणकडून मंजूर झाल्यानंतर विद्युत पायाभूत सुविधा उपलब्ध असल्यास पुढील १५ कार्यालयीन दिवसांमध्ये वीजजोडणी कार्यान्वित करण्यात येत आहे. ज्या ठिकाणी वीजजोडणीसाठी विद्युत पायाभूत सुविधा तयार करावी लागणार आहे अशा ठिकाणी महावितरणकडून स्वनिधी किंवा जिल्हा नियोजन विकास समितीचा निधी (विशेष घटक योजना तथा आदिवासी उपाययोजना सहित) किंवा कृषी आकस्मिकता निधी तसेच इतर उपलब्ध होऊ शकणाऱ्या निधीमधून प्राधान्याने पायाभूत सुविधा उपलब्ध करण्यात येईल व संबंधीत लाभार्थ्यांना वीजजोडणी देण्यात येईल.

अनुसूचित जाती व जमाती प्रवर्गातील अर्जदारांनी नवीन वीजजोडणीसाठी सक्षम प्राधिकाऱ्याचे जातीचे प्रमाणपत्र, वीजजोडणीच्या विहित नमून्यातील अर्जासोबत आधार कार्ड, रहिवासी कार्ड जोडावे. अर्जदारांनी अर्ज केल्याच्या ठिकाणी वीजबिलाची पूर्वीची थकबाकी नसावी. तसेच शासनमान्य विद्युत कंत्राटदाराकडून वीजसंच मांडणीचा चाचणी अहवाल अर्जासोबत जोडणे आवश्यक आहे. या योजनेच्या अधिक माहितीसाठी नजीकच्या कार्यालयाशी संपर्क साधावा असे आवाहन महावितरणकडून करण्यात आले आहे.

पुणे- केवळ भ्रष्टाचाराच्या उद्देशानेच बालगंधर्व रंगमंदिराच्या पुनर्विकासाचा घाट घातला जात असल्याचा आरोप आज कॉंग्रेसच्या वतीने करण्यात आलेल्या ‘बालगंधर्व रंग मंदिर बचाव’ च्या आंदोलनातून करण्यात आला . जुनी वास्तू पाडून नवीन करा अशी कोणाचीही मागणी नाही, आणि सोयी सुविधा मेंटेनन्स यासाठी केलेली आर्थिक तरतूदही गेली ५ वर्षे पूर्णतः प्रत्येक वर्षी वापरली गेली नाही हे सारे षड्यंत्र असल्याचा आरोप यावेळी करण्यात आला. पुण्याचं वैभव असलेल्या बालगंधर्व रंगमंदिराला मोठा सांस्कृतिक वारसा आहे. ५४ वर्षांपूर्वी पु. ल. देशपांडे यांच्या संकल्पनेतून हे रंगमंदिर उभे राहिले. आज पुणे शहरात एकूण १४ नाट्यगृह असून शहरात फक्त ३ नाट्यगृहच सुरू आहेत. बालगंधर्व नाट्यगृह पुण्याचे वैभव आहे. या वास्तूला पाडून तेथे मल्टीफेल्क्स मॉल करण्याचा प्रशासनाचा डाव आहे. ही वास्तू पाडू नये यासाठी आज पुणे शहर जिल्हा काँग्रेस कमिटीच्या वतीने बालगंधर्व रंगमंदिराच्या बाहेर आंदोलन करण्यात आले.यावेळी महाराष्ट्र प्रदेश काँग्रेसचे सरचिटणीस ॲड. अभय छाजेड, कमल व्यवहारे, संजय बालगुडे, कथ्थक नर्तक डॉ. नंदकिशोर कपोते, नगरसेवक रविंद्र धंगेकर, अविनाश बागवे, अजित दरेकर, लता राजगुरू, सुजाता शेट्टी, महिला अध्यक्षा पुजा आनंद, बाळासाहेब दाभेकर, युवक अध्यक्ष राहुल शिरसाट, रजनी त्रिभुवन, शेखर कपोते, शानी नैशाद, नुरुद्दीन सोमजी, राजेंद्र शिरसाट, विठ्ठल गायकवाड, सतिश पवार, राजेंद्र भुतडा, प्रविण करपे, सचिन आडेकर, अजित जाधव, अनुसया गायकवाड, ज्योती परदेशी, प्रशांत सरसे, मुन्नाभाई शेख, अकबर शेख, अविनाश अडसूळ, सोमेश्वर बालगुडे, ताई कसबे, नंदा ढावरे शोभना पण्णीकर, राजू गायकवाड, राजाभाऊ कदम, संतोष डोके, क्लेमेंट लाजरस, शारदा वीर, स्वाती शिंदे, मीरा शिंदे, सेल्वराज ॲन्थोनी आदी उपस्थित होते.
यावेळी बोलताना शहराध्यक्ष रमेश बागवे म्हणाले की, ‘‘पुणे हे महाराष्ट्राची सांस्कृतिक राजधानी असून बालगंधर्व रंगमंदिर हे पुण्याची शान आहे. या रंगमंदिरात अनेक दिग्गज कलाकारांनी आपले नाट्य व कला सादर केली आहे. बालगंधर्व रंगमंदिराच्या कलादालनामध्ये अनेक छायाचित्रप्रदर्शने, व्यंग चित्रकारांचे व्यंगचित्रे प्रदर्शित केली जात आहेत. या कलाकारांना पुणे महानगरपालिका अल्पदारात रंगमंदिर उपलब्ध करून देत होते. सध्याचे बालगंधर्व रंगमंदिर साडेबावीस हजार चौरस फूट जागेवर असून मूळ वास्तू पाडून साडेतीन लाख चौरस फुटांचे रंगमंदिर बांधण्यात येणार आहे. त्यामुळे कलाकारांना यापुढे वाढीव दराने रंगमंदिर उपलब्ध होईल. पुणे महानगरपालिकेमध्ये भाजपची सत्ता असताना त्यांनी बालगंधर्व रंगमंदिर पाडण्याचा प्रस्ताव प्रशासनापुढे ठेवला. पुणेकरांशी चर्चा न करता किंवा भावना समजून न घेता एवढ्‍या घाईगडबडीत हा प्रस्ताव ठेवण्याचे काय कारण आहे हे आजपर्यंत पुणेकरांना समजले नाही. काँग्रेस पक्ष नेहमी कला संस्कृतीला प्राधान्य देत आहे. बालगंधर्वचे मल्टीफेल्क्स मॉल करून काही मोजक्या राज्यकर्ते व बिल्डरांना फायदा होऊन देणार नाही. पुण्याच्या सौंदर्यावर कोणी घाला घालण्याचा प्रयत्न केला तर काँग्रेस पक्ष विरोध केल्याशिवाय राहणार नाही.’’
यानंतर माजी आमदार व महाराष्ट्र प्रदेश काँग्रेसचे उपाध्यक्ष मोहन जोशी म्हणाले की, ‘‘बालगंधर्व रंगमंदिरामध्ये कार्यक्रम पाहण्यासाठी महाराष्ट्रातील कानाकोपऱ्यातून जनता येत आहे. पुण्यनगरीतील अतिशय मोक्याच्या ठिकाणी ही वास्तू आहे. या वास्तूला पाडून त्याठिकाणी मल्टीफेल्क्स मॉल करण्यात आला तर बालगंधर्वचे वैभव संपुष्टात येईल. २०१७ च्या निवडणुकीमध्ये पुणेकरांनी भाजपावर विश्वास टाकून त्यांना मते दिली आणि ते सत्तेवर आले. सत्तेचा गैरवापर करून या बालगंधर्व रंगमंदिराचे मल्टीफेल्क्स मॉल करणे म्हणजे पुणेकरांशी विश्वासघात करणे. पुणेकरांची भावना दुखावणाऱ्या भाजप सरकारचा मी तीव्र निषेध करतो.’’

पुणे, 18 मे 2022: पुणे मेट्रोपॉलिटन जिल्हा टेनिस संघटना(पीएमडीटीए) यांच्या तर्फे आयोजित व एमएसएलटीए आणि एआयटीए यांच्या मान्यतेखाली होत असलेल्या एमएसएलटीए-पीएमडीटीए एआयटीए 18वर्षाखालील चॅम्पियनशीप सिरीज टेनिस अजिंक्यपद स्पर्धेत एकेरीत मुलांच्या गटात मुंबईच्या ओमर सुमर, पुण्याच्या सार्थ बनसोडे या खेळाडूंनी मानांकित खेळाडूंचा पराभव करून उपांत्य फेरीत प्रवेश केला.  
एमएसएलटीए स्कुल ऑफ टेनिस, म्हाळुंगे बालेवाडी कोर्टवर सुरू असलेल्या या स्पर्धेत मुख्य ड्रॉमध्ये एकेरीच्या उपांत्यपूर्व फेरीत मुलांच्या गटात पाचव्या मानांकित ओमर सुमर याने अव्वल मानांकित अर्जुन अभ्यंकरचा 6-2, 6-0 असा पराभव करून सनसनाटी निकालाची नोंद केली. सार्थ बनसोडे याने आपली अनपेक्षित निकालाची मालिका कायम ठेवत चौथ्या मानांकित पार्थ देवरुखकरचा 2-6, 6-3, 6-0 असा तीन सेटमध्ये संघर्षपूर्ण पराभव केला. क्वालिफायर पुण्याच्या सिद्धार्थ मराठेने आपला शहर सहकारी अभिराम निलाखेला 6-4, 6-2 असे पराभूत केले. दुसऱ्या मानांकित अनमोल नागपुरे याने सातव्या मानांकित अर्णव कोकणेला 7-5, 6-3 असे पराभूत केले. 
मुलींच्या गटात सातव्या मानांकित सेजल भुतडा हिने श्रावणी देशमुखचा 6-2, 6-2 असा सहज पराभव केला. क्वालिफायर प्रिशा शिंदेने कर्नाटकाच्या सोनिका जडिशचा 6-0, 6-0 असा एकतर्फी पराभव केला. सिद्धी खोतने श्रुती नानजकरचा टायब्रेकमध्ये 7-6(5), 7-5 असा पराभव करून उपांत्य फेरी गाठली. 
दुहेरीत उपांत्यपूर्व फेरीत मुलांच्या गटात सार्थ बनसोडे व सिद्धार्थ मराठे या जोडीने दिव्यांक कवितके व सर्वेश झवर या चौथ्या मानांकित जोडीचा 6-3, 6-1 असा पराभव केला.  स्पर्धेचा सविस्तर निकाल: एकेरी: मुख्य ड्रॉ: उपांत्यपूर्व फेरी: मुले:ओमर सुमर(महा)[5]वि.वि.अर्जुन अभ्यंकर(महा)[1] 6-2, 6-0; सिद्धार्थ मराठे(महा)वि.वि.अभिराम निलाखे(महा) 6-4, 6-2; सार्थ बनसोडे(महा)वि.वि.पार्थ देवरुखकर(महा)[4] 2-6, 6-3, 6-0;अनमोल नागपुरे(महा)[2]वि.वि.अर्णव कोकणे(महा)[7] 7-5, 6-3; 
मुली:
सेजल भुतडा(महा)[7]वि.वि.श्रावणी देशमुख(महा) 6-2, 6-2;  प्रिशा शिंदे(महा)वि.वि.सोनिका जडिश(कर्नाटक)6-0, 6-0;  डेनिका फर्नांडो(महा)[8]वि.वि.वैष्णवी चौहान(महा) 6-0, 6-1;  सिद्धी खोत(महा)वि.वि.श्रुती नानजकर(महा) 7-6(5), 7-5;

दुहेरी: उपांत्यपूर्व फेरी: मुले:पार्थ देवरुखकर/अर्जुन अभ्यंकर[1] वि.वि.अर्जुन कीर्तने/अभिराम निलाखे 6-2, 6-4;
सार्थ बनसोडे/सिद्धार्थ मराठे वि.वि.दिव्यांक कवितके/सर्वेश झवर[4] 6-3, 6-1;साहिल तांबट/अर्णव कोकणे[3] वि.वि.राधेय शहाणे/ईशान देगमवार 6-1, 6-4;ओमर सुमर/अनमोल नागपुरे[2] वि.वि.स्वराज ढमढेरे/नीव कोठारी 6-2, 6-2.