पुणे- लाल महालाच्या सुरक्षेची जबाबदारी महापालिकेची आहे. सध्या पालिकेत प्रशासक आहे. त्यावर राज्य सरकारचे नियंत्रण आहे. राष्ट्रवादी काँग्रेसने केलेले आंदोलन ही नौटंकी आहे.म्हणजे हे आंदोलन राज्य सरकार म्हणजेच राष्ट्रवादी काँग्रेसच्याच विरोधात करत आहेत. केवळ प्रसिद्धीच्या हव्यासापायी ते ही नौटंकी करीत आहेत.असा आरोप करत भाजपचे शहर अध्यक्ष जगदीश मुळीक यांनी लालमहल येथे चित्रित केलेले लावणी नृत्य समाजमाध्यमात व्हायरल करुन भावना दुखावल्याप्रकरणी कठोर कारवाई करा अशी मागणी केली आहे. सदर प्रकारामुळे आमच्या भावना दुखावल्या गेल्या असून आपण स्वतः या प्रकरणी लक्ष घालून तातडीने कारवाई करावी अशी मागणीहि भाजपचे शहर अध्यक्ष जगदीश मुळीक यांनी पोलिस आयुक्त अमिताभ गुप्ता यांची भेट घेऊन केली. आमदार माधुरी मिसाळ त्यांच्या सोबत होत्या.

ते म्हणाले,’ हिंदुस्तानचे आराध्यदैवत छत्रपती श्री शिवाजी महाराज यांच्या वास्तव्याने आणि पराक्रमाने पावन झालेला लालमहल समस्त हिंदुंसाठी एक पवित्र स्थान आहे. ही केवळ एक वास्तू नसून हिंदवी स्वराज्याचा इतिहासाचे सोनेरी पर्व यात दडलेले आहे. त्यामुळे या वास्तुची गरिमा, पावित्र्य राखणे अत्यंत आवश्यकच आहे. समाजमाध्यमात व्हायरल झालेल्या एका व्हिडिओमुळे समस्त शिवप्रेमींच्या भावना दुखावल्या गेल्या आहेत. सदर व्हिडिओ हा लालमहलमध्ये चित्रित केला गेला असून यात लावणीवर नृत्य केल्याचा प्रकार आहे. लावणी ही महाराष्ट्राची सांस्कृतिक परंपरा असली, तरी त्याचे सादरणीकरण करण्यासाठी वेगळी व्यासपीठे उपलब्ध आहेत. मात्र तरीही लालमहलमध्ये हा प्रकार घडला. हे जितके धक्कादायक आहे, तितकेच चीड आणणारेही.

मुळीक पुढे म्हणाले, नृत्य सादर केल्याप्रकरणी नृत्यांगनेवर कारवाई तर करावीच, शिवाय तीला आतमध्ये जाण्यास कोणी मदत केली? सुरक्षारक्षक काय करत होते? जबाबदार अधिकाऱ्यांची भूमिका काय? याचीही उत्तरे मिळवून योग्य ती कारवाई तातडीने करावी, अशी भारतीय जनता पक्षाची मागणी आहे.

पुणे: पुणे मेट्रोपॉलिटन जिल्हा टेनिस संघटना(पीएमडीटीए) यांच्या तर्फे आयोजित व एमएसएलटीए आणि एआयटीए यांच्या मान्यतेखाली होत असलेल्या एमएसएलटीए-पीएमडीटीए एआयटीए 18वर्षाखालील चॅम्पियनशीप सिरीज टेनिस अजिंक्यपद स्पर्धेत एकेरीत मुलांच्या गटात मुंबईच्या ओमर सुमर याने तर, मुलींच्या गटात नागपूरच्या सेजल भुतडा यांनी विजेतेपद संपादन केले. तर, दुहेरीत मुलांच्या गटात सार्थ बनसोडे व सिद्धार्थ मराठे यांनी तर, मुलींच्या गटात प्रिशा शिंदे व वैष्णवी चौहान यांनी विजेतेपद पटकावले.
एमएसएलटीए स्कुल ऑफ टेनिस, म्हाळुंगे बालेवाडी कोर्टवर पार पडलेल्या या स्पर्धेत एकेरीत अंतिम फेरीत मुलांच्या गटात पाचव्या मानांकित मुंबईच्या ओमर सुमर याने सार्थ बनसोडेचा 3-6, 6-3, 6-2 असा तीन सेटमध्ये पराभव करून विजेतेपदाचा मान पटकावला. 2तास मिनिटे चाललेल्या या सामन्यात पहिल्या सेटमध्ये 2-2 अशी बरोबरी असताना सार्थने ओमरची सर्व्हिस ब्रेक केली व हा सेट 6-3 असा जिंकून आघाडी मिळवली. दुसऱ्या सेटमध्ये पिछाडीवर असलेल्या ओमरने तिसऱ्या गेममध्ये सार्थची सर्व्हिस रोखली व हा सेट 6-3 असा जिंकून बरोबरी साधली. तिसऱ्या व निर्णायक सेटमध्ये ओमरने सुरेख खेळ करत सार्थची पहिल्याच गेममध्ये सर्व्हिस रोखली. या सेटमध्ये ओमरने आपले वर्चस्व कायम राखत हा सेट 6-2 असा जिंकून विजेतेपदावर शिक्कामोर्तब केले. ओमर हा एनआयओएस मध्ये 12वी इयत्तेत वाणिज्य शाखेत शिकत असून बाऊन्स टेनिस अकादमीत प्रशिक्षक केदार शहा यांच्या मार्गदर्शनाखाली सराव करतो. 
मुलींच्या गटात अंतिम फेरीत सातव्या मानांकित नागपूरच्या सेजल भुतडा हिने आठव्या मानांकित डेनिका फर्नांडोचा 7-5, 6-2 असा पराभव करून विजेतेपद पटकावले. सेजल ही रामनगर भरत विद्यालय शाळेत 9वी इयत्तेत शिकत असून एनडीएचए,नागपूर येथे प्रशिक्षक विशाल लांडगे व नवीन मोरे यांच्या मार्गदर्शनाखाली सराव करते. तिचे या वर्षांतील हे दुसरे विजेतेपद असून याआधी हैदराबाद येथे मागील आठवड्यात झालेल्या 16 वर्षांखालील स्पर्धेत विजेतेपद पटकावले होते.
दुहेरीत मुलांच्या गटात अंतिम फेरीत सार्थ बनसोडे व सिद्धार्थ मराठे यांनी साहिल तांबट व अर्णव कोकणे यांचा 6-3 असा पराभव करून विजेतेपद पटकावले. साहिल तांबटला पायाला दुखापत झाल्यामुळे सामन्यातून माघार घेतली व त्यामुळे सार्थ बनसोडे व सिद्धार्थ मराठे यांना विजेते घोषित करण्यात आले. मुलींच्या गटात प्रिशा शिंदे व वैष्णवी चौहान या जोडीने सेजल भुतडा व अभिलिप्सा मल्लिक यांचा 6-4, 3-6, 10-8 असा पराभव करून विजेतेपद पटकावले.
स्पर्धेतील विजेत्या खेळाडूंना करंडक व प्रशस्तीपत्रक अशी पारितोषिके देण्यात आली. स्पर्धेचे पारितोषिक वितरण वितरण स्पर्धा संचालक संदीप नुलकर आणि प्रणव वाघमारे यांच्या हस्ते करण्यात आले.
स्पर्धेचा सविस्तर निकाल: एकेरी: मुख्य ड्रॉ: अंतिम फेरी: मुले: ओमर सुमर(महा)[5]वि.वि.सार्थ बनसोडे(महा)3-6, 6-3, 6-2;
मुली: सेजल भुतडा(महा)[7]वि.वि.डेनिका फर्नांडो(महा)[8]7-5, 6-2;
दुहेरी:अंतिम फेरी: मुले: सार्थ बनसोडे/सिद्धार्थ मराठे वि.वि.साहिल तांबट/अर्णव कोकणे[3] 6-3 सामना सोडून दिला;
मुली: प्रिशा शिंदे/वैष्णवी चौहान वि.वि.सेजल भुतडा/अभिलिप्सा मल्लिक 6-4, 3-6, 10-8.

पिंपरी येथील घटनेत एकाविरुद्ध फौजदारी गुन्हा दाखल

पुणे: वीजयंत्रणेच्या मान्सूनपूर्व देखभाल व दुरुस्तीच्या विविध कामांसोबतच वीजपुरवठ्यात अडथळा ठरणाऱ्या झाडाच्या फांद्या छाटल्याने महावितरणच्या जनमित्रास फांदीच्या लाकडी दांड्याने मारहाण करून जखमी करण्यात आले. पिंपरीमधील कामगार भवन परिसरात गुरुवारी (दि. १९) दुपारी १२ च्या सुमारास ही घटना घडली. याप्रकरणी कर्मचाऱ्यास मारहाण तसेच सरकारी कामात अडथळा आणल्याप्रकरणी एका आरोपीविरुद्ध पिंपरी पोलीस ठाण्यात फौजदारी गुन्हे दाखल करण्यात आले आहे.

याबाबत माहिती अशी की, महावितरणच्या पिंपरी विभाग अंतर्गत अजमेरा कॉलनी शाखा कार्यालयाचे जनमित्र श्री. रामेश्वर बळीराम वाघमारे हे सहकारी श्री. अशोक मुळे तसेच दुरुस्ती कामाच्या कंत्राटदाराचे दोन कर्मचारी यांच्यासमवेत पिंपरीमधील कामगार भवन परिसरात रोहित्राची पावसाळापूर्व तपासणी तसेच देखभाल व दुरुस्तीचे काम करीत होते.

दरम्यान या रोहित्राच्या बाजूलाच असणाऱ्या झाडाच्या फांद्यांचा रोहित्र व वीजयंत्रणेला स्पर्श होण्याचा संभव असल्याने फांद्या तोडणे आवश्यक असल्याचे दिसले. याबाबत त्यांनी सहायक अभियंता सौ. सुरेखा भारती यांना कळविले. त्यांच्या सूचनेनुसार वीजपुरवठ्यामध्ये अडथळा ठरणाऱ्या झाडाच्या फांद्या छाटण्याचे काम सुरु केले. मात्र त्याचवेळी बाजूच्या गांधीनगर झोपडपट्टीतून एक इसम आला व स्वतःचे नागराज शंकर भांडेकर असे नाव सांगत फांद्या का छाटत आहे असे विचारत शिविगाळ करू लागला. महावितरणच्या गणवेशधारी कर्मचाऱ्यांनी ओळखपत्र दाखवून त्याची समजूत काढण्याचा प्रयत्न केला. पण काहीही समजून न घेता सदर इसम रोहित्राच्या कुंपणाच्या आत आला. त्यामुळे पुढील वाद व अनर्थ टाळण्यासाठी महावितरणच्या कर्मचाऱ्यांनी काम बंद केले व दुरुस्तीचे साहित्य घेऊन तिथून निघाले. मात्र त्याचवेळी आरोपी भांडेकर याने जनमित्र श्री. वाघमारे यांच्या डोक्यावर, पायावर व पाठीवर झाडाच्या फांदीने मारहाण केली. यामध्ये श्री. वाघमारे जखमी झाले.

या मारहाणप्रकरणी नागराज शंकर भांडेकर (वय ४५) विरुद्ध पिंपरी पोलीस ठाण्यात कलम ३५३, ३२३, ३२३, ५०४ नुसार गुन्हा दाखल करण्यात आला असून पुढील तपास सुरु आहे.

पुणे : “डॉ. बाबासाहेब आंबेडकर यांनी आपले सबंध जीवन दलित, अस्पृश्य, शेतकरी, कामगार, स्त्रियांसह समाजातील उपेक्षित घटकांना समान न्याय व सन्मानजनक वागणूक मिळावी, यासाठी समर्पित केले. डॉ. बाबासाहेब आंबेडकर हे ज्ञानाचे प्रतीक असून, त्यांचे जीवन खऱ्या अर्थाने सामाजिक परिवर्तनाची चळवळ होती,” असे प्रतिपादन माजी केंद्रीय मंत्री, ज्येष्ठ नेते खासदार शरद पवार यांनी केले.

ऍड. जयदेव गायकवाड लिखित  ‘डॉ. बाबासाहेब आंबेडकर : प्रज्ञावंताचा संघर्ष’ या ग्रंथाचे प्रकाशन शरद पवार यांच्या हस्ते शुक्रवारी बालगंधर्व रंगमंदिर येथे झाले. पद्मगंधा प्रकाशन व लोकशाहीसाठी समंजस संवाद आणि सामाजिक न्याय विभाग यांच्या वतीने या प्रकाशन सोहळ्याचे आयोजन करण्यात आले होते. प्रसंगी कष्टकऱ्यांचे नेते डॉ. बाबा आढाव, श्रमिक मुक्ती दलाचे नेते डॉ. भारत पाटणकर, ज्येष्ठ गांधीवादी विचारवंत डॉ. कुमार सप्तर्षी, ज्येष्ठ संपादक पत्रकार अरुण खोरे, आमदार चेतन तुपे, राष्ट्रवादी काँग्रेसचे शहराध्यक्ष प्रशांत जगताप, पद्मगंधा प्रकाशनचे अभिषेक जाखडे, मयूर गायकवाड, निकिता गायकवाड आदी उपस्थित होते.

ग्रंथ निर्मितीसाठी महत्वपूर्ण योगदानाबद्दल रवी मुकुल, पंडित कांबळे, नंदकुमार देवरे, अनुश्री भागवत, बालाजी एंटरप्रायजेसचे श्री दुधाने यांचा यावेळी सन्मान करण्यात आला. दीपक म्हस्के यांनी सूत्रसंचालन केले. अरुण खोरे यांनी स्वागत-प्रास्ताविक केले.

शरद पवार म्हणाले, ” समाजातील दलित, वंचित, अस्पृश्य घटकांना न्याय मिळवून देण्यासाठी तसेच देशाच्या विकासासाठी धोरणात्मक निर्णय घेताना डॉ. बाबासाहेब आंबेडकर यांना अनेकदा संघर्ष करावा लागला. समर्पित भावनेने देशहितासाठी, प्रत्येक भारतीयाला समान अधिकार मिळण्यासाठी व समाजातील जातीनिर्मूलनासाठी त्यांनी संघर्ष केला. त्यांच्या याच वैचारिक संघर्षावर प्रकाश टाकण्याचे काम ऍड. जयदेव गायकवाड यांनी या ग्रंथाद्वारे केले आहे. हा ग्रंथ सयाजीराव गायकवाड आणि शाहू महाराजांना अर्पण केला आहे, याचा आनंद वाटतो. जयदेव यांनी या दोन व्यक्तींची केलेली निवड व बाबासाहेबांचा जवळचा संबंध वाटतो.”

“कामगार, स्त्रियांसाठी बाबासाहेबांनी अनेक कायदे केले. घटनेतही सर्वांना समान संधी, न्याय मिळेल यावर त्यांनी भर दिला. बाबासाहेबांनी दिलेल्या संविधानामुळे आजही देश एकसंध आहे. त्यांच्या विचारांवर चालण्याची गरज आहे. बाबासाहेबांवर प्रचंड लेखन विविध भाषेत झाले आहे. जवळ जवळ १८ खंडांचे बाबासाहेबांच्या विचारांचे ग्रंथ फक्त महाराष्ट्रातच नव्हे, तर अन्य राज्यांमध्येही महाराष्ट्र सरकारने केले आहे. तरीही आपण बाबासाहेबांना आपण न्याय देऊ शकत नाही. बाबासाहेब थोर विचारवंत, अर्थशास्त्रज्ञ होते. लंडन विद्यापीठात बाबासाहेबांनी वाचलेल्या प्रबंधाने खूप चर्चा झाली. कामगार हक्क, वेतन, रजा याचे निर्णय घेत त्यांनी कामगारांचे हित साधले. महात्मा फुलेंना दूरदृष्टी होती. त्याचा आदर्श बाबासाहेबांनी घेतला. जेथे अन्याय होतो तेथे संघर्षाची भूमिका त्यांनी घेतली. बाबासाहेबांची नोंद अन्य देशांनीही केली आहे,” असे शरद पवार यांनी आपल्या भाषणात नमूद केले.
बाबा आढाव म्हणाले, “आपण एकमेकांना दुरुस्त करण्यापेक्षा समोर आलेल्या आव्हानांना पेलण्यासाठी सज्ज व्हायला हवे. बाबासाहेबांनी देशाला दिलेली घटना पाळली जातेय का, याचा विचार गरजेचे आहे. आजची परिस्थिती पाहता आपण हिटलरला वेगळ्या शब्दात परत आणतो आहोत का याचा विचार करावा. सतत इतिहास उगळण्यात स्वारस्य नाही. देशद्रोह, सेक्युलर शब्दांवर सध्या चर्चा सुरू आहे. यात तरुण कुठे आहेत? समाजाचे चिंतन काय सुरू आहे, ते साहित्यात कसे उतरते आणि कलेच्या क्षेत्रात कसे उतरते ते महत्वाचे आहे. तरुणांबरोबर संवाद वाढवायला हवा.”  
डॉ. भारत पाटणकर म्हणाले, “जातीभेदाच्या विचारांना आव्हान देण्याचे काम १३ व्या शतकात सुरू झाले. संत चोखामेळा, संत नामदेव यांनी क्रांतिकारी विचार मांडले. विचाराच्या क्षेत्रातील ठराविक जातींची बंदी त्यांनी उठवून लावली. त्याचे शिखर बाबासाहेबांनी गाठले. बाबासाहेबांच्या विचारांनी नेमके काय केले हे एकत्रितपणे मांडणारे हे पहिले पुस्तक आहे. बाबासाहेब फक्त बहुजन समाजाचे नाही, तर समस्त स्त्री, पुरुष, सर्व जाती धर्माचे नेते होते. जाती व्यवस्थेचा अंत करणे, अंतरात जाती संपवण्याचा इशारा बाबासाहेबांनी दिला आहे. चळवळी विचारांच्या स्तरावर असणे आवश्यक आहे.”

जयदेव गायकवाड म्हणाले, “दोन अडीच वर्षाच्या सखोल अभ्यासातून निर्मिलेल्या या ग्रंथाचे प्रकाशन पवार साहेबांच्या हस्ते होतेय, याचे समाधान वाटते. आंबेडकरी विचार समजून घेत तसे वागायला हवे. शब्द, चित्रांच्या पलीकडचे ते व्यक्तिमत्व आहे. तो एक विचार आहे. सवंग बाबासाहेब वाचताना त्यांच्यासोबत झालेले राजकारण कोणासोबत तरी मांडावे अशी गरज वाटू लागली. मग हा ग्रंथ लिहावा वाटला. बाबासाहेबांच्या विचारांचा सर्वंकष विचार करण्यासाठी खोलवर विचार करणे गरजेचे आहे.”

ससून सर्वोपचार रुग्णालय सामान्य रुग्णांसाठी आशास्थान : डॉ. विनायक काळे
पुणे : फिनोलेक्स इंडस्ट्रीज व त्यांचे सीएसआर भागीदार मुकुल माधव फाउंडेशन यांच्या वतीने ससून सर्वोपचार रुग्णालयाला पचनसंस्था विकार निदान व उपचार यंत्र (एन्डोस्कोपी मशीन) हस्तांतरित करण्यात आले. 
क्रिएटिव्ह फाउंडेशनचे संदीप खर्डेकर, काँग्रेसच्या महिला शहराध्यक्षा पूजा मनीष आनंद, उद्योजक विजय बजाज, ससून सर्वोपचार रुग्णालयाचे अधिष्ठाता डॉ. विनायक काळे, एन्डोस्कोपी तज्ज्ञ डॉ. विनय थोरात, विभागप्रमुख डॉ. आर. टी. बोरसे यांच्यासह मुकुल माधव फाउंडेशन व ससूनमधील डॉक्टर्स, कर्मचारी उपस्थितीत होते.
डॉ. विनायक काळे म्हणाले, “गोरगरिबांसाठी असलेल्या ससून सर्वोपचार रुग्णालयात दानशूरांच्या मदतीने अत्याधुनिक उपचार उपलब्ध होत आहेत. पुण्यासह राज्याच्या इतर जिल्ह्यांतूनही मोठ्या संख्येने रुग्ण येथे उपचार घेतात. सर्वोत्तम सेवा देण्यासाठी आमचे सर्व डॉक्टर्स, नर्स आणि इतर सहयोगी स्टाफ मेहनत घेत असून, मुकुल माधव फाउंडेशन सारख्या संस्था पाठबळ देत आहेत. त्यातून ससूनकडे सामान्य रुग्ण आशास्थान म्हणून पाहत आहेत.”
काळे यांनी मुकुल माधव फाउंडेशनच्या व्यवस्थापकीय विश्वस्त रितू प्रकाश छाब्रिया यांचे विशेष आभार मानले. या अत्याधुनिक मशीनमुळे रुग्ण तपासणी अधिक जलद व अचूक होण्यास मदत होणार आहे. त्यामुळे समाजातील अधिकाधिक रुग्णांना याचा नक्कीच लाभ होईल, असा विश्वास डॉ. काळे यांनी व्यक्त केला.
डॉ. विनय थोरात म्हणाले, “फाउंडेशनची आम्हाला कायमच मदत असते. जे उपचार परदेशात मिळतात; पुण्यातील अन्य रुग्णालयांत मिळत नाहीत, ते आता ससूनमध्ये मिळू शकतात. अत्याधुनिक व तंत्रज्ञानात्मक निदान व उपचार ससूनमध्ये माफक दरात उपलब्ध होताहेत, याची नोंद समाजाने घ्यायला हवी.”
संदीप खर्डेकर म्हणाले, “समाजाचे स्वास्थ्य चांगले राहण्यासाठी आम्ही प्रयत्नशील असतो. मुकुल माधव फाउंडेशनशी माझा कोरोना काळात अधिक संबंध आला. या काळात फाउंडेशनने केलेले काम वाखाणण्याजोगे आहे. ‘जिथे कमी तिथे आम्ही’ या स्वरूपाचे काम छाब्रिया दाम्पत्य करत आहे. ससून रुग्णालयाच्या अत्याधुनिकरणात त्यांची मोलाची भूमिका राहिली आहे.”

मुकुल माधव फाउंडेशनच्या पुढाकारातून २०१८ मध्ये येथे पचनसंस्थाविकार निदान व उपचार केंद्राचे (एन्डोस्कोपी युनिट) ‘मोहिनी व प्रल्हाद छाब्रिया’ यांच्या स्मरणार्थ लोकार्पण झाले होते. सध्या या विभागात दरवर्षी २५०० ते ३००० हजार रुग्णांवर निदान व उपचार होत आहेत. या नव्या यंत्रामुळे रुग्णांना आणखी अत्याधुनिक सुविधा मिळेल, असे बोरसे यांनी नमूद केले.

पूजा आनंद यांनीही फाउंडेशनच्या कामाचे कौतुक केले. समाजातील दुर्लक्षित भागांना, घटकांना मोठी मदत रितू छाब्रिया फाउंडेशनच्या माध्यमातून करत असल्याचे त्यांनी सांगितले.
“ससून सर्वोपचार रुग्णालयात सामान्य रुग्ण येतात. त्यांना उच्च दर्जाच्या आरोग्य सुविधा उपलब्ध व्हाव्यात, या उद्देशाने फाउंडेशन गेल्या काही वर्षांपासून सातत्याने प्रयत्न करत आहे. पचनसंस्थेचे विकार वाढत आहेत. अशावेळी ही एन्डोस्कोपी केंद्र व मशिनरी देणे गरजचे वाटते. याचा उपयोग सर्वसामान्य रुग्णांना होतो आहे आणि ससूनमधील सर्व डॉक्टर्स व सपोर्ट स्टाफ त्याचा सुयोग्य वापर करत आहे, याचा आनंद वाटतो.”- रितू प्रकाश छाब्रिया, व्यवस्थापकीय विश्वस्त, मुकुल माधव फाउंडेशन

हरयाणा, मध्य प्रदेश संघांना पराभवाचा धक्का

पुणे / प्रतिनिधी : महाराष्ट्र, उत्तर प्रदेश संघांनी आपापल्या प्रतिस्पर्धी संघांना पराभूत करताना भारतीय रोलबॉल संघटना, राज्य रोलबॉल संघटना व पुणे जिल्हा रोलबॉल संघटना यांच्या वतीने आयोजित करण्यात आलेल्या वरिष्ठ गटाच्या १८ व्या राष्ट्रीय रोलबॉल स्पर्धेत विजयी सलामी दिली.

श्री शिवछत्रपती क्रीडानगरी, म्हाळुंगे-बालेवाडी येथे स्पर्धेचे आयोजन करण्यात आले आहे. स्पर्धेचे उद्घाटन साईचे संचालक डॉ. सुधांशू शेखर रॉय, पद्मश्री मुरलीकांत पेटकर, समालोचक सुनंदन लेले यांच्या हस्ते करण्यात आले. यावेळी अंतरराष्ट्रीय रोलबॉल संघटनेचे संचालक सुर्यकांत काकडे, भारतीय रोलबॉल संघटनेचे अध्यक्ष मनोहरकांत, उपाध्यक्ष मनोज यादव, सचिव चेतन भांडवलकर, स्पर्धा अध्यक्ष संदीप खर्डेकर, रोलबॉलचे जनक राजू दाभाडे, जिल्हा रोलबॉल संघटनेचे अध्यक्ष गजानन थरकुडे, डॉ. शैलेश हडगावकर, सनी सांकला, श्रीपाद सपकाळ, महेश कुलकर्णी आदी मान्यवर यावेळी उपस्थित होते.

मुलांच्या गटाच्या सलामीच्या लढतीत महाराष्ट्र संघांनी हरयाणा संघाला ११-४ असे पराभूत करताना विजय साकारला. महाराष्ट्र संघाने सुरुवातीपासून आक्रमक खेळाचे प्रदर्शन करताना मध्यंतराला ६-३ अशी आघाडी घेतली होती. महाराष्ट्र संघाकडून कर्णधार आदित्य गणेशवाडे यांने ५ गोल, अरिंजय कळकेरी व संजोग तापकीर यांनी प्रत्येकी २ गोल तर हर्षल घुगे व रोहन दाभाडे यांनी प्रत्येकी १ गोल केला. तर हरयाणा संघाकडून नवीन कुमारने ३ तर राहुल सिंग याने एक गोल करताना लढत देण्याचा प्रयत्न केला.

मुलांच्या गटातील उत्तर प्रदेश संघाने ओडिशा संघाला १८-० असे एकतर्फी पराभूत केले. उत्तर प्रदेश संघाने मध्यंतराला उत्तर प्रदेश संघाने १३-० अशी विजयी आघाडी घेतली होती. उत्तर प्रदेश संघाकडून मोहित कुमारने ४, हेमंत यादव ३, श्रेयस श्रीवास्तव, त्रिभुवन पटेल, देव कुमार, मिलिंद शर्मा यांनी प्रत्येकी २, तर प्रयाग गिरी, पुष्पम पटेल, विशाल शर्मा यांनी प्रत्येकी १ गोल करताना संघाला विजय मिळवून दिला.

मुलींच्या गटात उत्तर प्रदेश संघाने जम्मू काश्मीर संघाला ४-१ असे पराभूत करताना विजयी सलामी दिली. मध्यंतराला दोन्ही संघानी १-१ अशी बरोबरी साधली होती. उत्तर प्रदेश संघाच्या इशिका गुप्ताने दमदार खेळाचे प्रदर्शन करताना ३ तर क्रिष्णाक्षी कुमारने एक गोल करताना संघाला विजय मिळवून दिला. जम्मू काश्मीर संघाकडून सुविधा सरीनने १ गोल केला.

मुलींच्या गटात महाराष्ट्र संघाने मध्य प्रदेश संघाला ६-१ असे पराभूत करताना विजय साकारला. महाराष्ट्र संघाने मध्यंतराला ३-१ अशी आघाडी घेतली. लढतीत श्रुती भगतने ३, स्नेहल पाटील, वैभवी मगदूम व ऋतुजा रावल यांनी प्रत्येकी १ गोल केला. मध्य प्रदेश संघाकडून जिया जोशीने १ गोल करताना लढत देण्याचा प्रयत्न केला.

संक्षिप्त गोलफलक : मुले : महाराष्ट्र ११ – हरयाणा ४

महाराष्ट्र : आदित्य गणेशवाडे ५ (२.२७, १२.५७, १८.५६, २३.१५, २५.५०), संजोग तापकीर २ (४.११, ६.५०), अरिंजय कळकेरी २ (०.३०, १६.५६), हर्षल घुगे १ (२०.२९), रोहन दाभाडे (२२.५)

हरयाणा : नवीन कुमार ३ (९.१७, १३.५६, १८.४९), राहुल सिंग १ (२४.२३)

मध्यांतर : महाराष्ट्र ६ – हरयाणा ३

उत्तर प्रदेश १८ – ओडिशा ०

उत्तर प्रदेश : मोहित कुमार ४ (४.१०, ११.२९, १३.४२, १५.५५),हेमंत यादव ३ (०.११, २.१७, ५.०२), श्रेयस श्रीवास्तव २ (३.२७, ९.३४), त्रिभुवन पटेल २ (१.०८, १३.००), देव कुमार २ (१०.२०, १०.५३), मिलिंद शर्मा २ (२०.५६, २२.५६), प्रयाग गिरी १ (२६.१४), पुष्पम पटेल १ (२८.३८), विशाल शर्मा १ (२२.१६)

ओडिशा : ०

मध्यंतर : उत्तर प्रदेश १३ – ओडिशा ०

मुली : उत्तर प्रदेश ४ – जम्मू कश्मीर १

उत्तर प्रदेश : इशिका गुप्ता ३ (३.५०, ७.४०, ११.१५), क्रिष्णाक्षी कुमार १ (२.१५)

जम्मू –काश्मीर : सुविधा सरीन १ (५.१०)

मध्यंतर : उत्तर प्रदेश १- जम्मू काश्मीर १

महाराष्ट्र ६ – मध्य प्रदेश १

महाराष्ट्र : श्रुती भगत ३ (०.२६, १८.०२, २४.२०), स्नेहल पाटील १ (५.१४), वैभवी मगदूम १ (११.०२), ऋतुजा रावल १ (१०.३८)

मध्य प्रदेश : जिया जोशी १ (१.२०)

मध्यंतर : महाराष्ट्र ३ – मध्य प्रदेश १