पुणे दि.१६: विद्यार्थ्यांमध्ये वैज्ञानिक दृष्टिकोन विकसित करण्यासाठी विज्ञान आणि नाविन्यता केंद्र अत्यंत उपयुक्त असून प्रत्येक जिल्ह्यात असे केंद्र उभारण्यासाठी पुढील वर्षीच्या अंदाजपत्रकात तरतूद करण्यात येईल, असे प्रतिपादन राज्याचे उपमुख्यमंत्री अजित पवार यांनी केले.

बारामती ॲग्रीकल्चरल डेव्हलपमेंट ट्रस्टच्या कृषी विज्ञान केंद्र परिसरात उभारण्यात आलेल्या सायन्स ॲण्ड इनोव्हेशन ॲक्टिव्हीटी सेंटरच्या उद्घाटन प्रसंगी ते बोलत होते. महाराष्ट्र शासन, राजीव गांधी विज्ञान व तंत्रज्ञान आयोग आणि टाटा ट्रस्टच्या संयुक्त विद्यमाने हे केंद्र उभारण्यात आले आहे.

कार्यक्रमाला ज्येष्ठ नेते खासदार शरद पवार, राजीव गांधी विज्ञान व तंत्रज्ञान आयोगाचे अध्यक्ष डॉ.अनिल काकोडकर, उद्योगपती गौतम अदानी, खासदार सुप्रिया सुळे, आमदार रोहित पवार, एमकेसीएलचे व्यवस्थापकीय संचालक डॉ. विवेक सावंत, डॉ. सी. डी.माई, रयत शिक्षण संस्थेचे चेअरमन डॉ.अनिल पाटील, प्रीती अदानी, होमी भाभा विज्ञान आणि संशोधन केंद्राचे डॉ.अर्णव भट्टाचार्य, नेहरु विज्ञान केंद्राचे डॉ.सुब्रत चौधरी, तरुण वैज्ञानिक गोपाली जी., ॲग्रिकल्चर डेव्हलपमेंट ट्रस्टचे चेअरमन राजेंद्र पवार आदी उपस्थित होते.

श्री.पवार म्हणाले, राज्यात ६ ठिकाणी असे केंद्र उभारण्यात येत आहे. अशा केंद्रामुळे विद्यार्थ्यांमध्ये विज्ञानाविषयी गोडी निर्माण होईल. जागतिक पातळीवर शिक्षण क्षेत्रात वेगाने बदल होत असून आनंदाचा निर्देशांक अधिक असलेली राष्ट्रे प्रभावशाली तंत्रज्ञानावर आधारित शिक्षण मुलांना देतात. अशी नाविन्यपूर्ण आणि कौशल्याधारीत शिक्षण प्रणाली अनुकूल बदल घडवून आणण्यासाठी उपयुक्त आहे. वैज्ञानिक दृष्टिकोन निर्माण करणारे शिक्षण देण्यासाठी हे केंद्र उपयुक्त ठरेल. विद्यार्थ्यांनी या केंद्राचा स्वतःच्या प्रगतीसाठी उपयोग करून घ्यावा असे आवाहन त्यांनी केले.

कौशल्य विकास आणि उत्तम तंत्रज्ञानावर भर
उद्याचे कुशल मनुष्यबळ निर्माण करण्यासाठी विद्यार्थ्यांमध्ये विविध आव्हानांवर मात करण्याचे सामर्थ्य निर्माण करण्याची गरज आहे. त्यासाठी राज्य शासनातर्फे कौशल्य विकासावर भर देण्यात येत असून ‘स्वजीवी महाराष्ट्र’ उपक्रम सुरू केला आहे. युवकांना अद्ययावत तंत्रज्ञानाचे वातावरण देण्याचा प्रयत्न आहे. उत्तम दर्जाचे व्यवसाय शिक्षण विद्यार्थ्यांना देणे आवश्यक असून त्यासाठी शिक्षकांचेही प्रशिक्षण महत्वाचे आहे , असे त्यांनी सांगितले.

वैज्ञानिक मनोभूमिका यशासाठी महत्वाची-खासदार शरद पवार
ज्येष्ठ नेते खासदार शरद पवार म्हणाले, विद्यार्थ्यांच्या आयुष्यात विज्ञानाविषयी आस्था निर्माण करणारा हा प्रकल्प आहे. या केंद्रामुळे विद्यार्थ्यांच्या ज्ञानात आणि उत्सुकतेत भर पडेल.  जीवनात पुढे जाण्यासाठी वैज्ञानिक दृष्टिकोन स्वीकारावा लागेल.  विद्यार्थ्यांनी वैज्ञानिक मनोभूमिका तयार केल्यास जीवनात यश नक्की मिळेल.  विज्ञान आणि नाविन्यता केंद्राच्या माध्यमातून विद्यार्थ्यांना विज्ञानाची झेप लक्षात येईल आणि त्यातून वैज्ञानिकदृष्टी विकसित होईल, त्यांच्यात आत्मविश्वास निर्माण होईल, विज्ञानाविषयी आकर्षण कायम राहून प्रोत्साहन मिळेल, असे त्यांनी सांगितले.

विद्यार्थ्यांमध्ये चिकित्सक वैज्ञानिकदृष्टी निर्माण होणे गरजेचे-अनिल काकोडकर
विज्ञान केंद्राचे सर्वात पुढारलेले स्वरूप बारामतीला साकारत आहे. एक लाख विद्यार्थ्यांनी केंद्राला आतापर्यंत भेट दिली आहे. विद्यार्थ्यांमध्ये चिकित्सक वैज्ञानिकदृष्टी निर्माण होणे गरजेचे असून त्यासाठी केंद्र उपयुक्त ठरेल. प्रत्येक विद्यार्थ्याला वर्षातून एकदा या केंद्रात जाता यावे असा प्रयत्न आहे.

वैज्ञानिक प्रक्रियेचा आनंद अनुभवण्याची संधी या केंद्रात आहे.  स्वतः नवीन काहीतरी शोधण्यासाठी सुविधादेखील आहेत. प्रत्येक शाळेने विद्यार्थ्यांचा एक वर्ग केंद्रात घ्यावा आणि त्यांना तज्ज्ञांनी माहिती द्यावी.  ग्रामीण भागापर्यंत विज्ञान पोहोचविण्यासाठी नॅशनल कौन्सिल ऑफ सायन्स म्युझिअमच्या माध्यमातून ‘सायन्स ऑन व्हील्स’ सारख्या उपक्रमाद्वारे विद्यार्थ्यांमध्ये वैज्ञानिक दृष्टिकोन निर्माण करण्याचा प्रयत्न व्हावा आणि विद्यार्थ्यानी नवनिर्मितीकडे वळावे असे आवाहन त्यांनी केले.

खासदार श्रीमती सुळे म्हणाल्या, देशातील अत्यंत आधुनिक विज्ञान केंद्र बारामतीत उभे राहत आहे. याचा उपयोग परिसरातील विद्यार्थ्यांना होईल. भविष्यातील यशासाठी विज्ञान आणि नाविन्यतेशिवाय दुसरा पर्याय नाही.

प्रास्ताविकात ट्रस्टचे प्रमुख राजेंद्र पवार यांनी विज्ञान आणि नाविन्यता उपक्रम केंद्राविषयी माहिती दिली.  केंद्रामुळे ग्रामीण भागातील विद्यार्थ्यांमध्ये शालेय जीवनापासूनच वैज्ञानिक वृत्ती वाढीस लागेल. ग्रामीण भागातील विद्यार्थ्यांना नाविन्यपूर्ण संशोधनाची संधी मिळेल आणि त्यातून चांगले उद्योजक तयार होतील असा विश्वास त्यांनी व्यक्त केला.

सारंग साठे यांनीदेखील यावेळी विचार व्यक्त केले. शारदा संगीत विद्यालयाच्या विद्यार्थ्यांनी कार्यक्रमाच्या सुरुवातीस विज्ञानगीत सादर केले. ॲग्रिकल्चर डेव्हलपमेंट ट्रस्ट बारामती आणि रयत शिक्षण संस्था सातारा यांच्यात यावेळी सामंजस्य कराराचे आदानप्रदान करण्यात आले. तसेच, नेहरु विज्ञान केंद्र आणि राजीव गांधी विज्ञान व तंत्रज्ञान आयोगाने तयार केलेल्या प्रकल्पाचे ॲग्रीकल्चर डेव्हलपमेंट ट्रस्टला हस्तांतरण करण्यात आले.

पुणे दि.16: शरद पवार इन्स्पायर फेलोशीप शिबिरात सहभागी युवकांनी आपल्या नव्या संकल्पनांचा समाजाला उपयोग करून देण्याचे ध्येय समोर ठेवताना सातत्यपूर्ण प्रयत्नांवर भर द्यावा, असे आवाहन राज्याचे उपमुख्यमंत्री अजित पवार यांनी केले.

बारामती येथे आयोजित शरद पवार इन्स्पायर फे‍लोशिप उन्हाळी शिबिराच्या समारोप कार्यक्रमात ते बोलत होते. कार्यक्रमाला ज्येष्ठ नेते खासदार शरद पवार, राजीव गांधी विज्ञान आणि तंत्रज्ञान आयोगाचे अध्यक्ष डॉ.अनिल काकोडकर, उद्योगपती गौतम अदानी, खासदार सुप्रिया सुळे, एमकेसीएलचे व्यवस्थापकीय संचालक डॉ.विवेक सावंत, डॉ.सी.डी. माई, प्रीती अदानी, ॲग्रिकल्चर डेव्हलपमेंट ट्रस्टचे चेअरमन राजेंद्र पवार आदी उपस्थित होते.

श्री.पवार म्हणाले, शिबिरात सहभागी युवकांची राज्यभरातून निवड झाली असल्याने त्यांच्याकडून मोठ्या अपेक्षा आहेत. आधुनिक महाराष्ट्राचे शिल्पकार यशवंतराव चव्हाण आणि कृषी, कला, साहित्य, संरक्षण, क्रीडा आदी विविध क्षेत्रात योगदान असणारे ज्येष्ठ नेते शरद पवार अशा दोन मोठ्या व्यक्तिमत्वांची नावे शिष्यवृत्तीशी जोडली गेली असल्याने त्याला साजेसे कार्य करण्याची जबाबदारी शिबिरात सहभागी युवकांवर आहे. शिबिराच्या माध्यमातून समाजाला उपयुक्त असणारा वेगळा विचार करणारे तरुण पुढे यावेत, अशी अपेक्षा त्यांनी व्यक्त केली.

ते म्हणाले, समाजासाठी आवश्यक कृषी आणि कृषीपुरक व्यवसायाशी निगडित नव्या कल्पना तरुणांनी पुढे आणाव्यात. आज शेतीकडे वेगळ्या दृष्टिकोनातून बघणे गरजेचे आहे. कृषी क्षेत्रात जागतिकस्तरावर नवे संशोधन होत आहे. हे संशोधन शेतकऱ्यांपर्यंत पोहोचविण्यासाठी नव्या संकल्पना समोर आणाव्यात, आपल्या प्रयत्नात आणि संशोधनात सातत्य ठेवावे. समाजाला उपयुक्त असणारा हा उपक्रम पुढे जायला हवा, असेही त्यांनी सांगितले.

सामाजिक जाणीव असलेला नागरिक घडविण्यासाठी उपयुक्त उपक्रम-डॉ.अनिल काकोडकर

डॉ.काकोडकर म्हणाले, नवे संशोधन, नव्या कल्पनांना मूर्त रुपात आणणे आणि  व्यवसाय सुरू करण्यासोबत सामाजिक जाणीव असलेला आदर्श नागरिक घडविण्यासाठी शरद पवार इन्स्पायर फे‍लोशिप उपक्रम अतिशय उपयुक्त आहे. या उपक्रमातून तरुणांना आत्मविश्वास मिळेल. या माध्यमातून नेतृत्वाची शृंखला तयार व्हावी आणि वैयक्तिक जीवनात प्रगती करताना तरुणांनी समाजात मोठ्या क्रांतीसाठी आपले कर्तव्य पार पाडावे.

मोठे ध्येय गाठताना क्षमतेसोबत निवडलेल्या क्षेत्राशी संबंधित वातावरणात असणाऱ्या समस्यांचा अभ्यासही महत्वाचा आहे. या समस्येतून मार्ग काढणे हेच उद्योजकांचे खरे कौशल्य असून परस्पर संवादातून हे शक्य आहे. त्यासाठी आत्मसात केलेल्या नव्या संकल्पनांचे परस्पर आदानप्रदान व्हावे. शिबिरातील युवकांनी एकमेकांशी जोडलेले राहून येणाऱ्या युवकांनाही मार्गदर्शन करावे, असे त्यांनी सांगितले.

श्री. सावंत म्हणाले, प्रेरणेतून उत्तमतेकडे हे ब्रीद घेऊन शिष्यवृत्तीचा उपक्रम राबविण्यात येत आहे. जीवनात यशासाठी दुर्दम्य इच्छाशक्ती आणि दीर्घ प्रयत्न आवश्यक आहेत. मानवजात, पृथ्वी आणि अपेक्षित लाभ या गोष्टींमध्ये संतुलन साधत उत्तम उद्दिष्ट समोर ठेवावे. बुद्धिमत्ता आणि क्षमतेच्या बळावर सर्व साध्य करता येते.

प्रास्ताविक खासदार श्रीमती सुळे यांनी केले. फेलोशिपच्या माध्यमातून युवकांना त्यांच्या आवडीच्या क्षेत्रात कारकीर्द घडविण्यासाठी त्यांना एक वर्ष मार्गदर्शन आणि सहकार्य करण्यात येते.  हे विद्यार्थी देशाचा गौरव वाढवतील आणि त्यातून उत्तम उद्योजक घडतील आणि कृषी क्षेत्रालाही योगदान देतील असा विश्वास त्यांनी व्यक्त केला.

यावेळी उत्तम उद्दिष्ट सादर करणाऱ्या तीन शिष्यवृत्तीधारकाना मान्यवरांच्या हस्ते सन्मानित करण्यात आले. उन्हाळी आणि हिवाळी शिबिरातील युवकांना प्रातिनिधिक स्वरुपात शिष्यवृत्ती धनादेशाचे वितरणही यावेळी करण्यात आले. शिष्यवृत्तीधारक विद्यार्थ्यांनी आपले अनुभव मांडले.

पुणे-संतश्रेष्ठ श्री ज्ञानेश्वर महाराज व जगद्गुरू श्री तुकाराम महाराज पालखीनिमित्त प्रस्थान सोहळ्यास पुणे शहर/उपनगरे
व संपूर्ण राज्यभरातून आळंदी व देहू येथे उपस्थित राहणाऱ्या असंख्य भाविक नागरिकांचे वाहतुकीची व्यवस्था नेहमीच्या
बसेसशिवाय जादा बसेस देवून पुणे महानगर परिवहन महामंडळाकडून दरवर्षीप्रमाणे यंदाही करण्यात येत आहे. भाविक व
नागरिकांच्या सोयीसाठी दिनांक 18/06/2022 पासून दिनांक 22/06/2022 पर्यंत आळंदी करिता स्वारगेट, म.न.पा.,
हडपसर, पुणे स्टेशन, निगडी, भोसरी, हिंजवडी, चिंचवड या ठिकाणावरून सद्या संचलनात असणाऱ्या बसेस व जादा बसेस
अशा प्रतिदिनी एकुण 130 बसेस संचलनात राहणार आहेत. दिनांक 21/06/2022 रोजी रात्रौ 12:00 वा. पर्यंत आळंदी
करिता बसेसची व्यवस्था करण्यात आलेली आहे. याशिवाय देहूकरिता पुणे स्टेशन, म.न.पा., निगडी, या ठिकाणावरून
सद्याच्या संचलनात असणाऱ्या बसेस व जादा बसेस अशा एकुण 22 बसेस महामंडळाकडून देण्यात आलेल्या आहेत. याशिवाय
देहू ते आळंदी अशा 10 बसेस ठेवण्यात आलेल्या आहेत.
दिनांक 22/06/2022 रोजी पालखी प्रस्थान आळंदीमधून होत असल्यामुळे पहाटे 03:00 वा. पासून स्वारगेट, पुणे
स्टेशन, हडपसर, म.न.पा. या ठिकाणावरून आळंदीला जाणेकरिता जादा 18 बसेसची व्यवस्था करण्यात आलेली आहे.
या व्यतिरिक्त नेहमीच्या संचलनात असणाऱ्या बसेस सकाळी 05:30 वाजले पासून पुणे व पिंपरी चिंचवड
परिसरातील बस स्थानकावरून नेहमीच्या मार्गावरील 101 बसेस आळंदीसाठी भोसरी व विश्रांतवाडी पर्यंत भाविकांच्या
सेवेसाठी संचलनात राहणार आहेत. याशिवाय जादा बसेसची व्यवस्था ही प्रवाशांच्या गरजेनुसार (प्रवासी संख्या किमान 40
आवश्यक) देण्यात येईल.
तसेच पुण्याहून पालख्या प्रस्थानाच्या वेळेस दिनांक 24/06/2022 रोजी हडपसरमध्ये पालख्या दर्शनासाठी दुपारी
12:00 ते 1:00 दरम्यान थांबणार असल्याने अशा वेळेस महात्मा गांधी स्थानक येथून पुणे स्टेशन, वारजेमाळवाडी कोथरूड
डेपो, निगडी, चिंचवड, आळंदी इ. ठिकाणी जाण्यासाठी बससेवा देण्याची व्यवस्था करण्यात आलेली आहे. तसेच कात्रज
कोंढव्याकडे जाण्यासाठी शिवरकर गार्डन येथून आणि मुंढवा, चंदननगर व वाघोलीसाठी मगरपट्टा येथून बससेवा देण्याची
व्यवस्था करण्यात आली आहे.

तदनंतर पालखी प्रस्थान सोहळा सोलापूर व सासवड रोडने मार्गस्थ होईल. अशा वेळी सोलापूर/उरूळीकांचन मार्ग
जसा जसा वाहतुकीसाठी खुला होईल तसतशी बसवाहतुक चालू ठेवण्यात येईल.
हडपसर ते सासवड दरम्यानचा दिवेघाट हा रस्ता वाहतुकीस पुर्णत: बंद राहणार आहे. तथापि, प्रवासी/भाविकांच्या
वाहतुकीच्या सोईसाठी म्हणून सदर मार्गांची बसवाहतुक पर्यायी मार्गाने म्हणजेच दिवेघाट ऐवजी बोपदेव घाट मार्गे अशीचालू ठेवण्यात येणार असून सदर बसेसचे संचलन स्वारगेट, पुणे स्टेशन, हडपसर असे राहणार असून अशा 60 जादा बसेसचे
नियोजन करण्यात आलेले आहे.
तरी सदर बस वाहतुकीबाबतची नोंद सर्व संबंधित भाविक व इतर प्रवासी नागरिकांनी घेवुन त्याचा लाभ घ्यावा
आणि सहकार्य करावे असे आवाहन पुणे महानगर परिवहन महामंडळाकडून करण्यात येत आहे.

पुणे, 15 जून 2022

सशस्त्र दलांमध्ये नव्याने सुरू करण्यात आलेल्या ‘अग्निपथ’ योजनेची माहिती, दक्षिण कमांड मुख्यालयाचे  चीफ ऑफ स्टाफ लेफ्टनंट जनरल अरविंद वालिया यांनी आज पुण्यात दिली.  युवकांना  सशस्त्र दलांमध्ये  सेवा बजावता यावी यासाठीच्या  या योजनेला केंद्रीय मंत्रिमंडळाने 14 जून 2022 रोजी  मंजुरी दिली. या योजनेअंतर्गत निवडलेल्या युवकांना अग्निवीर म्हणून ओळखले जाईल.

“अग्निपथ योजना ही लष्कर आणि देशासाठी  एक परिवर्तनात्मक सुधारणा असून भारतीय लष्कराच्या मनुष्यबळ व्यवस्थापनात आदर्श बदल घडवून आणण्याचे या योजनेचे उद्दिष्ट आहे. या योजनेची संकल्पना युवा पिढीमध्ये राष्ट्रभक्तीला चालना देणे, समाजाला कुशल मनुष्यबळ पुरवणे  आणि लष्करात अधिकाधिक तरुणांचा सहभाग  सुनिश्चित करणे, ही आहे. राष्ट्रभक्तीने  प्रेरित तरुणांना 4 वर्षांच्या कालावधीसाठी सशस्त्र दलांमध्ये  सेवा बजावण्याची अनुमती अग्निपथ योजना देते. ”असे  जनरल वालिया यांनी सांगितले.

“युवावर्गाच्या अधिक समावेशामुळे लष्करात नवे चैतन्य निर्माण होईल आणि सशस्त्र दले अधिक तंत्रस्नेही होऊन   परिवर्तन घडेल, जी  काळाची गरज आहे”, असे त्यांनी सांगितले.

जनरल ऑफिसरनी आश्वासन दिले की नव्या  भरतीमध्ये  किमान शारीरिक, वैद्यकीय आणि व्यावसायिक निकष  सुनिश्चित करण्यासाठी सशस्त्र दल लागू असलेल्या मानकांशी कोणतीही तडजोड करणार नाही, हे जनरल वालिया यांनी स्पष्ट केले.  योजनेची  अंमलबजावणी आणि स्थायीकरणादरम्यान लष्कराची परिचालन क्षमता आणि सुसज्जता पूर्णपणे राखली जाईल, असेही त्यांनी आश्वस्त केले.

“मी ठामपणे सांगू इच्छितो की लष्कर आपली संस्कृती टिकवून ठेवेल –  ‘नाम, नमक और  निशान’  या आपल्या धर्मावर आणि  एकसंधता, सौहार्द व संघभावना यावर आधारित तत्त्वांवरची आपली संस्कृती आणि लष्करी मूल्ये, आपला समृद्ध वारसा, इतिहास, परंपरा यांची जोपासना लष्कर कायम करेल, ” असे त्यांनी ठामपणे नमूद केले.

या योजनेच्या अंमलबजावणीमुळे भारतीय सशस्त्र दले सरासरी 4-5  वर्ष तरुण होतील, असा अंदाज आहे. देशाला, समाजाला आणि देशातील युवा वर्गाला अल्प लष्करी सेवेचा मोठा लाभ होईल. यामध्ये देशभक्ती, सांघिक कार्य, शारीरिक तंदुरुस्ती वाढवणे, देशाप्रती दृढ निष्ठा आणि बाह्य धोके, अंतर्गत धोके आणि नैसर्गिक आपत्तींच्या काळात राष्ट्रीय सुरक्षा वाढवण्यासाठी प्रशिक्षित कर्मचाऱ्यांची उपलब्धता यांचा समावेश होतो.

अग्निवीरांना तिन्ही सेवांमध्ये लागू असलेल्या जोखीम आणि हालअपेष्टांसाठी दिल्या जाणाऱ्या   भत्त्यांसह आकर्षक मासिक पॅकेज दिले जाईल. “चार वर्षांचा प्रतिबद्धता कालावधी पूर्ण झाल्यावर, अग्निवीरांना एककालिक ‘सेवा निधी’ पॅकेज दिले जाईल ज्यात त्यांचे योगदान त्यावरील जमा व्याज आणि व्याजासह त्यांच्या योगदानाच्या जमा झालेल्या रकमेशी  सरकारकडून जुळणारे योगदान समाविष्ट असेल” अशी माहिती चीफ ऑफ स्टाफ जनरल वालिया यांनी दिली.

या योजनेमुळे सशस्त्र दलांमध्ये युवा वर्ग  आणि अनुभवी कर्मचारी यांच्यात उत्तम  संतुलन राखले जाऊन  अधिक तरुण आणि तांत्रिकदृष्ट्या निपुण लढाऊ दलाला चालना मिळेल.

पुणे, 15 जून 2022

रसायने आणि खते विषयक संसदीय कामकाज समितीने दि. 13 व 14 जून 2022 रोजी पुण्यातील हिंदुस्थान अँटिबायोटिक्स लिमिटेडला भेट दिली. समितीच्या अध्यक्षा कणीमोळी करुणानिधी यांच्या नेतृत्वातील या समितीच्या सदस्यांमध्ये लोकसभा आणि राज्यसभेच्या पुढील सदस्यांचा समावेश होता- दीपक बैज, प्रतापराव पाटील चिखलीकर, कृपानाथ मल्लाह, प्रभुभाई वसावा, सत्यदेव पचौरी, अरुणकुमार सागर, अयोध्या रामी रेड्डी अल्ला, जयप्रकाश निषाद आणि विजयपालसिंग तोमर. त्याबरोबरच, औषध विभागाचे आर्थिक सल्लागार एच.के.हजोंग आणि लोकसभा सचिवालयाचे अन्य वरिष्ठ अधिकारीही या दौऱ्यावर आले होते.

या संसदीय समितीने पिंपरी येथील हिंदुस्थान अँटिबायोटिक्स लिमिटेडच्या कारखान्याला भेट दिली आणि तेथे उपलब्ध उत्पादन सुविधांची व उत्पादनांची प्रत्यक्ष पाहणी केली. कंपनीच्या भविष्यकालीन नियोजनाची माहितीही यावेळी त्यांना देण्यात आली. या स्थायी समितीच्या सदस्यांसमोर एक पॉवर पॉईंट प्रेझेंटेशन करण्यात आले. कंपनीच्या अडचणींवर सकारात्मक रीतीने विचार करण्याचे आणि तिच्या पुनरुज्जीवनासाठी उपायांची शिफारस करण्याचे आश्वासन या समितीच्या सदस्यांनी कंपनीला दिले.

पुणे :  स्वातंत्र्यपूर्व काळातील शिक्षणाचे अध्वर्यू आणि शिक्षण प्रसारक मंडळीेच्या स्थापनेमागील प्रणेते विष्णुशास्त्री चिपळूणकर यांच्या वेशातील कलाकाराने शाळेच्या पहिल्या दिवशी विद्यार्थ्यांचे स्वागत केले. विद्यार्थ्यांना लाडू भरवून आणि औक्षण करून मंगलमय वातावरणात विद्यार्थ्यांनी ज्ञानमंदिरात प्रवेश केला. काहींनी हसत हसत तर काहींनी रडत आपला शाळेचा पहिला दिवस अविस्मरणीय केला.

शि.प्र. मंडळीच्या लोकमान्य नगर येथील एसपीएम इंग्लिश स्कूलच्या पूर्व प्राथमिक आणि प्राथमिक शाळेच्या विद्यार्थ्यांचे स्वागत  करण्यात आले. यावेळी  संस्थेचे उपाध्यक्ष श्रीकृष्ण चितळे, शाळा समितीचे सदस्य सुधीर काळकर, मुख्याध्यापिका रमा कुलकर्णी आणि शिक्षक उपस्थित होते. रांगोळीने सजविलेले प्रवेशद्वार आणि ढोल ताशांच्या आणि तूतारीचा निनादात विद्यार्थ्यांचे स्वागत करण्यात आले. तुतारी व शंख वादनाची माहिती व प्रात्यक्षिक तसेच ढोल-ताशा चे स्थिर वादन हे माध्यमिकच्या विद्यार्थ्यांसाठी आयोजित करण्यात आले होते.

रमा कुलकर्णी म्हणाल्या, तब्बल २  वर्षांनी शाळा सुरू झालेल्या आहेत. एसपीएम इंग्लिश स्कूलच्या विद्यार्थ्यांचे स्वागत पारंपरिक पद्धतीने करण्यात आले. विद्यार्थ्यांनी शाळा पुन्हा गजबजल्या आहेत, त्यांना शाळेत बघून शिक्षकांना खूप आनंद झाला आहे. २ वर्षांच्या कालावधीनंतर शाळेत आल्यामुळे  शिकण्याच्या प्रक्रियेत थोडा विलंब होऊ शकतो. त्यामुळे विविध शैक्षणिक साहित्यासह विद्यार्थ्यांना शिकविण्यासाठी शिक्षक सज्ज आहेत, असेही त्यांनी सांगितले.

पुणे :  पोलिसांची भीती मनात बाळगू नका. तुम्हाला कोणत्याही अडचणी आल्या तर पोलीस काकांशी किंवा पोलीस ताईंबरोबर तुम्ही बिनधास्त बोलू शकता. कोणती अडचण आली तर तात्काळ पोलिसांशी कसा संवाद साधायचा अशा गप्पा गोष्टींमधून शाळेच्या पहिल्या दिवशी विद्यार्थ्यांनी पोलीस काका व पोलीस ताईंबरोबर मैत्री केली. यावेळी बंदुक, वॉकी टॉकीचा वापर कसा व कोणत्या प्रसंगी केला जातो याची माहिती पोलिसांनी दिली.

शुक्रवार पेठेतील सेवा मित्र मंडळ ट्रस्टच्यावतीने दरवर्षी प्रमाणे यंदाही वसंतदादा पाटील हायस्कूल मनपा शाळा क्रमांक १ मध्ये विद्यार्थ्यांचे जल्लोषात स्वागत केले. यावेळी सहाय्यक पोलीस आयुक्त सतीश गोवेकर, खडक पोलीस स्टेशनचे वरिष्ठ पोलीस निरीक्षक श्रीहरी बहिरट, शिक्षण उपसंचालक प्रसाद काळंगावकर, शाळेचे मुख्याध्यापक विठ्ठल भरेकर, मुख्याध्यापिका शालिनी सोनावणे, पोलीस कर्मचारी दिलीप मोहिते, सोमनाथ ढगे, सचिन माळी, सामाजिक कार्यकर्ते आनंद सराफ, सेवा मित्र मंडळ ट्रस्टचे शिरीष मोहिते, विक्रांत मोहिते, अमर लांडे उपस्थित होते. कार्यक्रमाचे संयोजन उमेश कांबळे, रोहन जाधव, अॅड. हेमंत झंझाड यांनी केले. विद्यार्थ्यांना गुलाबाचे फुल, रेवडी व शालेय पुस्तकांचा संच देऊन त्यांचे स्वागत करण्यात आले. तसेच दामिनी पथकाच्या महिला पोलीस अधिकाऱ्यांनी विद्यार्थ्यांशी संवाद साधला.

सतीश गोवेकर म्हणाले, शाळा शिकताना जीवनाचा आनंद देखील तुम्ही घ्या. प्रत्येकाने मोठा अधिकारी किंवा डॉक्टर, इंजिनियर झाले पाहिजे असे नाही. तर, तुम्ही चांगले नागरिक झालात तरी देखील देशाला पुढे नेऊ शकता. नेहमी तुम्हाला यश मिळतेच असे नाही,  अपयश पचवण्याची ताकत देखील तुमच्याकडे असली पाहिजे. अपयश आले म्हणून खचून न जाता त्यातून प्रेरणा घेऊन पुढे जाता आले पाहिजे, असे ही त्यांनी सांगितले.

श्रीहरी बहिरट म्हणाले, शिक्षणाने माणूस सुसंस्कृत होतो. शिक्षणाचा पाया मजबूत झाला, तर तुम्ही कोणत्याही क्षेत्रात मजबूतपणे उभे राहू शकता. पोलीस हे तुमच्या सुरक्षेसाठी आहेत, त्यामुळे कोणतीही अडचण आली तर न घाबरता त्यांच्याशी संवाद साधा. हल्ली मोबाईलचा अतिवापर केल्यामुळे विद्यार्थ्यांची विचारशक्ती कमकुवत होत आहे. त्यामुळे मोबाईलच्या वापराची जिज्ञासा ही चांगली आहे का, की आपला पाल्य वाईट मार्गाला जात आहे याकडे पालकांनी लक्ष दिले पाहिजे, असेही त्यांनी सांगितले. प्रसाद काळंगावकर यांनी विद्यार्थ्यांना मार्गदर्शन केले.
विक्रांत मोहिते यांनी सूत्रसंचालन केले. शिरीष मोहिते यांनी प्रास्ताविक केले. विठ्ठल भरेकर यांनी आभार मानले.            

पुणे -डेक्कन एज्युकेशन सोसायटीच्या (डीईएस) विविध शाळांमध्ये पहिल्या दिवशी विद्यार्थ्यांच्या स्वागतासाठी विविध उपक्रमांचे आयोजन करण्यात आले होते.
सर्व शाळांमध्ये फुलांच्या माळा, तोरणे, फुगे, रांगोळ्या, फुलांच्या पायघड्या अशी सजावट करण्यात आली होती. मिकी माऊस, डोरेमॅन, छोटा भिम, फ्रेंड  गणेशा असे विद्यार्थ्यांना आवडणारे कार्टून्स स्वागतासाठी सज्ज होते. सनई, चौघडा व तुतारींचे स्वर आणि बालगीते उत्साहात भर घालत होती. विद्यार्थ्यांचे औक्षण करण्यात आले. गुलाबाची फुले देण्यात आली.
रानडे बालक मंदीरात ‘स्वच्छतेच्या सवयी’चे प्रबोधन करणारे कटआऊटस् लावण्यात आले होते. नवीन मराठी शाळेत सेवा-सहयोग संस्थेच्या सहकार्याने चारशे विद्यार्थ्यांना शालेय साहित्याचे वाटप करण्यात आले. मा. स. गोळवलकर गुरुजी शाळेत आजपासूून योग सप्ताह सुरु करण्यात आला. योगासनाची प्रात्याक्षिके करुन घेण्यात आली. ‘ओमकार आणि योगाभ्यास यांचे अभ्यासाशी नाते’ या विषयावर मार्गदर्शन करण्यात आले. संगीताच्या माध्यमातून सूर्य नमस्कार आणि योगासने या ‘संगीत योग’ विशेष कार्यक्र माचे आयोजन करण्यात आले होते. विद्यार्थ्यांनी डीईएसच्या संस्थापकांच्या वेशभूषा साकारल्या. 
डीईएस, पूर्व-प्राथमिक, प्राथमिक आणि माध्यमिक शाळेत रंगीबेरंगी फुग्यांची सजावट करण्यात आली होती. स्वागतास उभे असलेले आवडते कार्टून्स पाहून विद्यार्थ्यांना आनंद झाला. विद्यार्थ्यांसाठी पपेट शोचे आयोजन करण्यात आले होते. वर्गामध्ये गप्पा-गोष्टी आणि गाणी झाली. न्यू इंग्लिश मीडियम स्कूलमध्ये (एनईएमएस) शाळेच्या पहिल्या दिवसाची आठवण जतन करण्यासाठी पालक आणि विद्यार्थ्यांना फोटो काढण्यासाठी सेल्फी पॉईंट तयार करण्यात आला होता. अवनी उकिरडे आणि तिचे वडील प्रमोद उकिरडे या दोघांचा आज शाळेचा पहिला दिवस ठरला. अवनीने एनईएमएसमध्ये इयत्ता पहिलीमध्ये प्रवेश घेतला, तर तिचे वडील प्रमोद आज त्याच शाळेत कि‘डा शिक्षक म्हणून रुजू झाले.    

अहिल्यादेवी प्रशालेत दहावीच्या विद्यार्थिनींनी पुष्पवृष्टी आणि औक्षण करून पाचवीच्या विद्यार्थिनींचे स्वागत केले. विद्यार्थिनींनी सरस्वती पूजन केले. स्वागतासाठी नृत्य आणि संगीताच्या कार्यक‘माचे आयोजन करण्यात आले होते. न्यू इंग्लिश स्कूल, टिळक रोड शाळेत विद्यार्थ्यांच्या स्वागतासाठी विशेष कार्यक्रमाचे आयोजन करण्यात आले होते. पाचवीच्या विद्यार्थ्यांनी तारांगणाची सफर केली. प्रयोगशाळा, ग्रंथालय, संगीत शाळा आदींचा परिचय करुन देण्यात आला. छत्रपती शिवाजी महराजांच्या जीवनातील बोधकथा सांगितली. न्यू इंग्लिश स्कूल रमणबाग शाळेचे ब्रीदवाक्य असणार्‍या ‘एकी हेच बळ’ या विषयावर आधारित नाट्यछंद वर्गाच्या विद्यार्थ्यांनी नाट्य सादर केले. विद्यार्थ्यांना पेढे, अक्षरपाटी, पुस्तके भेट देण्यात आली.