वारकऱ्यांसाठी वैद्यकीय शिबिरे उभारून ‘मुकुल माधव फाउंडेशन’चेही (एमएमएफ) वारीत योगदान

पुणे-ज्येष्ठ महिना मावळतीला आला आहे आणि आषाढाची, त्यातही पंढरीच्या वारीची चाहूल लागली आहे. विठ्ठलाच्या लाखो भक्तांची ती यात्रा, ते मेळे, त्या दिंड्या, त्यांची ती भजने, रिंगण, आनंदाने नाचणे, तो टाळ-चिपळ्यांचा व मृदुंगाचा नाद या सगळ्यांनी भारून जाण्याचे दिवस जवळ आले आहेत. भगवे ध्वज आणि चंदनाचा सुगंध यांनी वातावरण-निर्मिती झालेली आहे. संतांनी श्रीविठ्ठलाला भेटण्याची ही ८०० वर्षांची परंपरा, संतांच्या पालख्यांचा हा प्रवास प्रत्येक वारकऱ्याच्या हृदयात, त्याच्या घामात, नामाचा जप करण्यात आणि भजनात पुन्हा नव्याने जिवंत होणार आहे.

दरवर्षी महाराष्ट्रभरातील लाखो भाविक पंढरपूरच्या विठोबा मंदिरात एकादशीला पोहोचण्यासाठी २१ दिवसांची पायी यात्रा करतात. या मिरवणुकीला वारी आणि या भक्तांना वारकरी म्हणतात. ही ८०० वर्षे जुनी परंपरा महाराष्ट्राच्या संस्कृतीचा एक अविभाज्य भाग आहे.

गेल्या अनेक दशकांप्रमाणे, फिनोलेक्स इंडस्ट्रीज लिमिटेड ही कंपनी या वर्षीही या अद्भुत मानवी आणि आध्यात्मिक अनुभवात सहभागी होत आहे. वारीमध्ये सहभागी होणाऱ्यांना अपूर्व आनंद मिळतो, परंतु त्याचबरोबर त्यांना उन्हा-पावसाचा त्रासही होतो. प्रत्येक वारकऱ्याकडे काही सामान, एक लहान वाद्य, तुळशीचे रोप किंवा विठ्ठलाची मूर्ती असते. फिनोलेक्स या वारकऱ्यांना आणि संपूर्ण वारीवर देखरेख करणार्‍या हजारो पोलिसांना रेनकोट आणि सोयीस्कर अशा पिशव्या यांसारख्या आवश्यक गोष्टी पुरवून हा प्रवास थोडा आरामदायी करीत असते.

याशिवाय, ‘फिनोलेक्स’ची सीएसआर शाखा असलेली मुकुल माधव फाउंडेशन ही संस्था यात्रेच्या विविध महत्त्वाच्या ठिकाणी सुमारे १० वैद्यकीय शिबिरे आयोजित करीत आहे. पुण्यातील अनेक रुग्णालयांनी या सेवेमध्ये ‘एमएमएफ’ला सहकार्य केले आहे.

या उपक्रमावर भाष्य करताना ‘फिनोलेक्स इंडस्ट्रीज लि.’चे सेल्स आणि मार्केटिंग विभागाचे प्रेसिडेंट प्रदीप शास्त्री वेदुला म्हणाले, “गेल्या ४० वर्षांमध्ये फिनोलेक्सची उत्पादने देशातील प्रत्येक राज्यात लाखो ग्राहकांपर्यंत पोहोचली. ‘फिनोलेक्स’ने सर्वांना सेवा दिली. त्यामुळे पीव्हीसी पाईप उद्योगातील काही महत्त्वाच्या राष्ट्रीय कंपन्यांमध्ये आमची गणना होते. महाराष्ट्र हे आमच्या कंपनीचे जन्मस्थान आहे आणि त्यामुळेच पंढरपूरच्या वारीचे आम्हाला अनन्यसाधारण महत्त्व आहे. या अनोख्या खास परंपरेशी निगडीत राहणे हा आमचा विशेष विशेषाधिकार आणि सन्मानही आहे.”

‘फिनोलेक्स’ला अर्थातच परंपरेची ताकद कळते. भारतातील सर्वात मोठा आणि एकमेव बॅकवर्ड इंटिग्रेटेड असा पीव्हीसीचा एकात्मिक उत्पादक असलेला हा ब्रॅंड आज कृषी, प्लंबिंग आणि सॅनिटेशन या क्षेत्रांमध्ये बाजारपेठेतील प्रबळ नेता बनला आहे. विश्वास, गुणवत्ता या पारंपारिक मूल्यांची काळजीपूर्वक जोपासना करून आणि आपल्या शेकडो वितरकांना, हजारो रिटेलर्सना व लाखो ग्राहकांना सेवा देऊन या ब्रॅंडने हा बहुमान कमावला आहे.

“पंढरपूरची वारी ही केवळ आध्यात्मिक यात्रा नाही, ही एक सामुदायिक सृजनशक्ती आहे. वारीच्या या प्रवासात जात, धर्म, लिंग किंवा सामाजिक-आर्थिक स्थितीचा विचार न करता लोक एकत्र प्रवास करतात, खातात, झोपतात. या मूल्यांवरच आमचा ठाम विश्वास आहे. मुकुल माधव फाऊंडेशन या आपल्या सीएसआर संस्थेच्या माध्यमातून ‘फिनोलेक्स इंडस्ट्रीज’ने समानता, सशक्तीकरण, आरोग्यसेवा आणि शिक्षण या क्षेत्रांमध्ये अथक परिश्रम घेतले आहेत. ज्या समुदायांमध्ये आम्ही कार्यरत आहोत, त्यांना सशक्त करण्यास आम्ही कटिबद्ध आहोत,” असे वेदुला यांनी नमूद केले.

पहिला पाऊस सुरू झाला आहे. ओल्या मातीचा सुगंध राज्यभरातील नागरिकांना मंत्रमुग्ध करीत आहे. आणि अर्थातच, वारकऱ्यांच्या पावलांना लागणारी पंढरीची माती ही त्यांच्यासाठी एक दैवी सुगंध घेऊन येणार आहे.

एक वेळ भाजपा राष्ट्रवादीचे सरकार होईल पण सेना भाजपचे होणार नाही – विश्वंभर चौधरींचा कयास

पुणे – विधान परिषदेनंतर घडलेल्या राजकीय घटनांनी महाराष्ट्रासह अनेक राज्यांचे लक्ष वेधून घेतले असून यावर ज्येष्ठ सामाजिक कार्यकर्ते आणि अभ्यासक विश्वंभर चौधरी यांनी आपली प्रतिक्रिया दिली आहे .

ते म्हणाले ,’ चाळीस गुवाहटीत पोचलेत. अजून दहा शिंदेंसोबत आहेत असा दावा आहे. तसं असेल तर सेनेकडे फक्त चार आमदार उरतात. आदित्य ठाकरे सोडून इतर तीन निष्ठावान कोण एवढाच उत्सुकतेचा मुद्दा आहे. दरम्यान गृहराज्यमंत्री परागंदा होतात पण ते पोलिसांना कळत नाही हे बुद्धीला पटत नाही. गृहखातं स्वतःकडे न ठेवण्याचा फटका मुख्यमंत्र्यांना बसला आहे. हा कट एका दिवसात शिजला नसणार. मात्र सीआयडीला त्याची खबर नसावी हे आश्चर्य आहे. राज्याच्या गृहखात्यानं मुख्यमंत्र्यांना धोका दिला असा याचा अर्थ आहे. गृहमंत्री गृहखातं चालवत असले तरी सगळं रिपोर्टींग मुख्यमंत्र्यांना मिळावं अशी व्यवस्था असते.’तुम्ही स्वतः मुख्यमंत्री व्हा’ हा सल्ला उद्धवजींनी नाकारला असता आणि तेव्हाच एकनाथ शिंदेंना मुख्यमंत्री केलं असतं तर प्रतिष्ठा गेली नसती. हा दिवस पहावा लागला नसता. बाकी जे घडलं त्याचं बरंच श्रेय संजय राऊतांना द्यायला पाहिजे. दररोज सकाळी नऊ वाजता चॅनलवर येऊन भाजपाच्या रोषाच्या संपूर्ण फोकस शिवसेनेवर राहील याची काळजी त्यांनी घेतली. राजकारणात परतीचे दोर कधीच कापायचे नसतात, ते दररोज सकाळी नऊ वाजता सपासप कापून राऊतांनी अप्रत्यक्षरित्या किंवा नकळत राष्ट्रवादीला सेफ पॅसेज दिला. संजय राऊतांचा उद्देश तो नक्कीच नसणार पण घडलं मात्र तेच. तिकडे स्वतःचे दोन मंत्री आत टाकले तरी राष्ट्रवादीनं संयत प्रतिक्रिया देत दोर पूर्णतः कधीच कापले नाहीत. आज परिस्थिती अशी आहे की एकवेळ भाजप-राष्ट्रवादी सरकार होईल पण भाजप-सेना सरकार बनणार नाही. उद्धव ठाकरे हे एक अतिशय सज्जन गृहस्थ आहेत. कदाचित हा त्यांचा प्रांतच नव्हता किंवा आसपास सगळेच दगाबाज होते.असे विश्वंभर चौधरी यांनी म्हटले आहे.

फार मोठ्या कोंडीत सापडले आहेत. पक्ष, पक्षप्रमुखपद आणि धनुष्यबाण हे चिन्ह वाचवायचं असेल तर शिंदेंसोबत तडजोड करण्याला पर्याय दिसत नाही.राजकारणात असे पेच येतात ते काही तरी गमावून सोडवावे लागतात. शिवसेनाप्रमुखपद की मुख्यमंत्रीपद याचा निर्णय उद्धवजींना घ्यायचा आहे. ही अभूतपूर्व आणि तितकीच दुर्दैवी कोंडी आहे पण दुसरा पर्याय दिसत नाही.असेही विश्वंभर चौधरी यांनी म्हटले आहे.

पुणे, दि.२१ :  ‘टाळ वाजे, मृदुंग वाजे, वाजे हरीचा वीणा, मुखाने विठ्ठल विठ्ठल म्हणा… टाळ-मृदंगाच्या तालावर भजनात दंग वारकऱ्यांची पाऊले….  ‘ज्ञानोबा माऊली’, ‘माऊली, माऊली’ चा गजर…. डोक्यावर तुळशी वृंदावन, हाती दिंड्या-पताका घेतलेले वारकरी…अशा भक्तिमय वातावरणात आळंदी येथून आषाढी वारीसाठी श्री संत ज्ञानेश्वर महाराज पालखी सोहळ्याने आज (दि २१ )पंढरपूरकडे प्रस्थान केले.

आळंदी येथील समाधी मंदिरात जिल्हाधिकारी डॉ. राजेश देशमुख यांनी पालखीचे सपत्नीक दर्शन घेतले. यावेळी पूजेला जिल्हा परिषदेचे मुख्य कार्यकारी अधिकारी आयुष प्रसाद, अप्पर जिल्हाधिकारी विजयसिंह देशमुख, प्रांताधिकारी विक्रांत चव्हाण, श्री संतश्रेष्ठ ज्ञानेश्वर महाराज संस्थानचे प्रमुख विश्वस्त योगेश देसाई, अभय टिळक, पालखी सोहळा प्रमुख ॲड. विकास ढगे आदी उपस्थित होते.

मानाच्या पालखी प्रदक्षिणेनंतर आळंदी संस्थान येथील गांधीवाडा देवस्थानाकडे पालखी सोहळ्याचे मुक्कामासाठी प्रस्थान झाले. प्रस्थान सोहळा ‘याचि देही याचि डोळा’ अनुभवण्यासाठी मोठ्या संख्येने वारकरी आळंदीत दाखल झाले आहेत.

याप्रसंगी जिल्हाधिकारी डॉ.राजेश देशमुख आणि मुख्य कार्यकारी अधिकारी आयुष प्रसाद यांनी फुगडीचा फेर धरला. विणा व टाळ वाजवत वारकऱ्यांसह त्यांनी भजनातही सहभाग घेतला.

वारकऱ्यांसाठी सुविधा

आषाढी वारीकरीता येणाऱ्या वारकऱ्यांना सोयी-सुविधा उपलब्ध करुन देण्यासाठी   जिल्हा प्रशासन, मंदिर संस्थान, पुणे व पिंपरी-चिंचवड मनपाने तयारी केली आहे. आळंदीत पाण्याची सोय, विजेची सोय, वैद्यकीय पथके, पालखी मार्गाचे वेळापत्रक, मंदिराच्या प्रवेशद्वारावर धातूशोधक यंत्रणा, सुलभ शौचालय, पोलीस मदत केंद्र, अग्निशमन यंत्रणा, रुग्णवाहिका, नदी पात्रात बोटीची व्यवस्था, सूचना फलक अशी व्यवस्था करण्यात आली असून जागोजागी सीसीटीव्ही यंत्रणा बसविण्यात आलेल्या आहेत. तसेच ध्वनीक्षेपणाद्वारे  सूचनाही देण्यात येत आहे.

पुणे दि. 21 जून, 2022

देशातील नागरिकांना योगचे महत्व व त्याचे लाभ सांगणे, या उद्देशाने योग दिन महत्वाचा आहे. आत्मनिर्भर होत असताना प्रत्येक नागरिक निरोगी व्हावा, हे गरजेचे आहे , अशी भावना केंद्रीय सूक्ष्म, लघु व मध्यम उद्योग मंत्री नारायण राणे यांनी आज पुणे इथे  व्यक्त केली.

आंतराष्ट्रीय योग दिनानिमित्त पुण्यामध्ये केंद्रीय सूक्ष्म, लघु व मध्यम उद्योग मंत्री नारायण राणे यांच्या उपस्थितीमध्ये योग उत्सवाचे उद्घाटन झाले. पिंपरी-चिंचवड महानगरपालिकेतील फुगेवाडी मेट्रो स्टेशनवर भारत सरकार तर्फे या योगोत्सवाचे आयोजन करण्यात आले होते.

   
सूक्ष्म, लघु व मध्यम उद्योग मंत्रालय; राष्ट्रीय निसर्गोपचार संस्था, आयुष मंत्रालय, पुणे; केंद्रीय संचार ब्युरो, माहिती व प्रसारण मंत्रालय, पुणे व पुणे मेट्रो यांच्या संयुक्त विद्यमाने योग दिन साजरा करण्यात आला.

मेट्रो स्थानकावर योग दिन साजरा होणे व फलाटावर योग सराव करणे, हे विशेष आहे; त्यातही पंतप्रधान नरेंद्र मोदी यांनी उद्घाटन केलेल्या स्थानकावर योग करताना नागरिकांना पाहणे, याचा आनंद आहे, असेही राणे यावेळी म्हणाले.

माहिती व प्रसारण मंत्रालयाच्या केंद्रीय संचार ब्युरो, पुणे तर्फे आयोजित योग व योगगुरुंबद्दल माहिती देणारे चित्रप्रदर्शनाचे उद्घाटन केंद्रीय मंत्री नारायण राणे यांनी केले. हे योग चित्र प्रदर्शन फुगेवाडी मेट्रो स्थानकात तीन दिवस विनामूल्य पाहण्यास उपलब्ध आहे. 
केंद्रीय संचार ब्यूरोच्या विभागीय कलाकारांनी यावेळी योग आधारित गीते सादर करून  उपस्थितांचे स्वागत केले.

   
उपस्थित नागरिकांनी मेट्रो  स्थानाकाच्या तीन मजल्यांवर आयोजित  योग सत्रात सहभाग  घेतला . प्रत्यक्ष प्लॅटफॉर्मवर योगासने करणे अविस्मरणीय अनुभव देणारे होते, अशी भावना नागरिकांनी व्यक्त केली.
      

  
योगोत्सवात सहभागी झालेल्या पहिल्या एक हजार नागरिकांना याप्रसंगी फुगेवाडी ते पिंपरी आणि परत असा मोफत प्रवास  (जॉय राईड) देण्यात आला. 

भारतीय पुरातत्व सर्वेक्षण  विभागाने आपल्या  आझादी का अमृत महोत्सवाअंतर्गत  आज पुण्यातील आठवा आंतरराष्ट्रीय योगा दिन-2022  आज आगाखान पॅलेसच्या आवारात साजरा केला. भारतीय पुरातत्व सर्वेक्षण विभागाने इंडिया टुरिझम, सॉफ्टवेअर टेक्नॉलॉजी पार्क ऑफ इंडिया, केंद्रीय औद्योगिक सुरक्षा दल, विमानतळ प्राधिकरण, योगाभ्यास स्कूल आणि केंद्रीय विद्यालय संघटना यांच्या सहकार्याने या कार्यक्रमाचे आयोजन केले.

भारतीय पुरातत्व सर्वेक्षण  विभागाच्या प्रादेशिक संचालक (पश्चिम विभाग)  डॉ. नंदिनी भट्टाचार्य-साहू, इंडिया टुरिझमच्या अपर्णा आठल्ये, सॉफ्टवेअर टेक्नॉलॉजी पार्क इंडियाचे संचालक  डॉ. संजय कुमार गुप्ता ,केंद्रीय विद्यालय संघटन, मुंबईचे सहाय्यक आयुक्त एस व्ही जोगळेकर आणि योगा अभ्यास  स्कूलच्या प्रमुख प्रशिक्षक निवेदिता आणि इतर मान्यवर यावेळी उपस्थित होते. यावेळी एएसआय मुंबई विभागाचे  अधीक्षक पुरातत्वशास्त्रज्ञ डॉ. राजेंद्र यादव यांनी कार्यक्रमात सहभागी झालेल्या सर्वांचे स्वागत केले.  

यावेळी योग अभ्यास स्कूलच्या तज्ञांच्या मार्गदर्शनाखाली योगा दिनाचे प्रात्यक्षिक आणि आसने करण्यात आली. योग कार्यक्रमात पुणे येथील केंद्रीय विद्यालयाच्या १०० विद्यार्थ्यांसह ३५० हून अधिक जण सहभागी झाले होते.  

 
आंतरराष्ट्रीय योगा दिन भारतीय पुरातत्व सर्वेक्षण  विभागाच्या मुंबई विभागातील विविध वारसास्थळी  अत्यंत उत्साहाने साजरा करण्यात आला. ठाणे जिल्ह्यातील अंबरनाथ येथील शिवमंदिर परिसरात केंद्रीय विद्यालयाच्या ५० विद्यार्थ्यांनी भारतीय पुरातत्व सर्वेक्षण  विभागाच्या सहकार्याने योगासने सादर  केली. तर पुण्यात शनिवारवाडा येथे केंद्रीय औद्योगिक सुरक्षा दल आणि भारतीय पुरातत्व सर्वेक्षण  विभाग यांनी संयुक्तपणे योगा प्रात्यक्षिकांचे कर्मचार्यांसाठी आयोजन केले. त्याचप्रमाणे, अलिबाग येथील सातखणी बुरूज, जुन्नर येथील लेण्याद्री लेणी, पालघर जिल्ह्यातील वसईचा किल्ला, जुन्नर येथील  शिवनेरी किल्ला, रत्नागिरी येथील विजयदुर्ग, मुंबईतील सायन किल्ला, कान्हेरी लेणी, रायगड किल्ला, पुण्यातील पाताळेश्वर लेणी, सोलापूर किल्ला या भारतीय पुरातत्व सर्वेक्षण  विभागाच्या इतर वारसास्थळी जनतेसाठी योगा प्रात्यक्षिकांचे आयोजन केले होते.

‘लायन्स क्लब’तर्फे गोसावी महाविद्यालयात सोयीसुविधांचे उद्घाटन 
पुणे : “समाजातील गरीब व गरजू मुलांसाठी विज्ञान प्रयोगशाळा, संगणक कक्ष यासह इतर अत्याधुनिक सोयीसुविधा उभारता आल्याचे समाधान आहे. निवृत्तीनंतर सामाजिक बांधिलकीच्या भावनेतून दिलेली देणगी सत्कारणी लागली,” असे मत सामाजिक कार्यकर्त्या रुक्साना अंकलेसारिया यांनी व्यक्त केले.
लायन्स क्लब ऑफ पूना सारसबाग चॅरिटेबल ट्रस्ट आणि लायन्स क्लब ऑफ पूना सारसबाग यांच्या संयुक्त विद्यमाने अंकलेसारिया कुटुंबाच्या अर्थसाहाय्यातून नामदेवराव मोहोळ महाविद्यालय अँड क्रीडा प्रतिष्ठान संचालित टीजी गोसावी महाविद्यालय, विठ्ठलवाडी येथे विद्यार्थ्यांसाठी उभारलेल्या ‘नरिमन अर्देशीर’ दुमजली इमारतीचे, रतनलाल मर्चंट हॉल (संगणक कक्ष), नौरोजी प्रकाश हॉल (विज्ञान प्रयोगशाळा) अंकलेसारिया पाणपोई आदी सोयीसुविधांचे उद्घाटन करण्यात आले.
सिंहगड रोडवरील विठ्ठलवाडी येथील गोसावी महाविद्यालयात झालेल्या या कार्यक्रमावेळी मेहेर मानेकजी अंकलेसारिया, रुक्साना मेहेर अंकलेसारिया, खोर्देह मेहेर अंकलेसारिया, लायन्स क्लबचे प्रांतपाल हेमंत नाईक, ट्रस्टचे चेअरमन फतेचंद रांका, उपप्रांतपाल परमानंद शर्मा, सुनील चेकर, प्रतिष्ठानचे अध्यक्ष माजी खासदार अशोकराव मोहोळ, कार्याध्यक्ष सदानंद मोहोळ, मीरा मोहोळ, रोहिदास मोरे, बाळासाहेब गांजवे, उद्योजक तुषार गोसावी, संग्राम मोहोळ, डॉ. हिरेन निरगुडकर, सदाशिव लाळे, विद्यालयाचे प्राचार्य किरण सूर्यवंशी, लायन्स क्लबच्या अध्यक्ष दीपाली गांधी, आशा ओसवाल, पूनम अष्टेकर, अंजली ओसवाल, माजी नगरसेवक श्रीकांत जगताप, ज्योती गोसावी आदी उपस्थित होते.
अशोकराव मोहोळ म्हणाले, “ग्रामीण भागातील, गरीब व गरजू मुलांना शिक्षणाच्या प्रवाहात आणण्यावर, तसेच रोजगाराभिमुख शिक्षण देण्यावर भर दिला जात आहे. अंकलेसरिया कुटुंबिय आणि लायन्स क्लबच्या मदतीने हे मोठे काम उभे राहिले. अशा दानशुरांच्या मदतीने मुलांना अत्याधुनिक सोयीसुविधा उपलब्ध होत आहेत. त्यामुळे गरीब व गरजू मुलांना गुणवत्ता पूर्ण शिक्षण देऊ शकतो, याचे समाधान वाटते.”

फतेचंद रांका म्हणाले, “गरजू विद्यार्थ्यांसाठी या सोयीसुविधा उपलब्ध केल्याचे आनंद आहे. विद्यार्थ्यांचे मनोबल वाढवण्याचे काम होणार आहे. चांगले संस्कार व शिक्षण यासोबतच अत्याधुनिक सोयीसुविधा गरजेच्या आहेत.”

हेमंत नाईक म्हणाले, “लायन्स क्लबने जपलेली सामाजिक बांधिलकी समाजाला उपयुक्त अशी आहे. हाच सामाजिक कार्याचा वारसा यापुढेही चालू राहील. इच्छाशक्ती आणि मूल्यांची सांगड घालून उभारलेले काम चांगले होते.”

सुनील चेकर, परमानंद शर्मा यांनीही मनोगते व्यक्त केली. स्वागत-प्रास्ताविक दीपाली गांधी, किरण सूर्यवंशी यांनी केले. सूत्रसंचालन विलास बनसुडे यांनी केले. आभार बाळासाहेब गांजवे यांनी मानले.

शिवशक्ती प्रतिष्ठानच्या वतीने ‘दर्यावरचे मराठे’ या कार्यक्रमाचे आयोजन
पुणे : शिवशक्ती प्रतिष्ठानच्या वतीने ‘दर्यावरचे मराठे’ या कार्यक्रमाचे आयोजन करण्यात आले. यावेळी पुण्यातील युवा चित्रकार अमित राणे यांनी रेखाटलेल्या सरदार तुळाजी आंग्रे व मराठा आरमाराच्या चित्राचे अनावरण करण्यात आले. विजयदुर्ग किल्ल्यावर झालेल्या कार्यक्रमात आरमार अभ्यासक अनिकेत यादव यांनी उपस्थितांना मार्गदर्शन केले. 
यावेळी प्रतिष्ठानचे अध्यक्ष साताप्पा कडव, उपाध्यक्ष योगेश रोकडे, सामाजिक कार्यकर्ते किरण सोनिवाल, भारतीय दुर्ग अभ्यासक चेतन घाडगे, निलेश काणकोणकर, अभिजीत सोनावणे, प्रशांत जाधव, प्रफुल्ल भालेकर, सुनिल यादव, रुपेश जाधव, बंडू माळी, ओंकार पोतदार, विकी मगदूम, राजकिरण सावडकर, बजरंग गावडे, प्रशांत पाटील, विजयराव कातळे आदी उपस्थित होते. 
अनिकेत यादव म्हणाले, हिंदुस्थानात अनेक सत्ताधिश असूनही त्यांनी समुद्राच्या संरक्षणाकडे लक्ष दिले नाही, मात्र वयाच्या २७ व्या वर्षी शिवाजी महाराजांना समुद्राचे महत्त्व समजले आणि त्यांनी स्वतःचे लढाऊ आरमार निर्माण केले. त्याच प्रबळ आरमाराच्या जोरावर आंग्रे-धुळप यांनी हिंदी महासागरावर मराठ्यांचे वर्चस्व प्रस्थापित केले. अशा थोर इतिहासाचे साक्षीदार असणारे विजयदुर्ग व त्याभोवतालच्या वास्तू जपणे हे आत्ताच्या मराठ्यांचे परमकर्तव्य आहे, असेही त्यांनी सांगितले.