पुणे-

महर्षी कर्वे हे युगप्रवर्तक होते, त्यांनी स्त्री शिक्षण, विधवा विवाह ह्या क्षेत्रात त्या काळात केलेले कार्य अतुलनीय असल्यानेच त्यांना महर्षी ही उपाधी दिली गेली, अश्या अवतारी पुरुषाच्या नावाने कार्यरत संस्थेस भेट देताना मला मंदिरात आल्याचा आनंद होत आहे असे गौरवोदगार महाराष्ट्राचे राज्यपाल भगतसिंग कोश्यारी यांनी काढले. कर्वे समाज सेवा संस्थेस भेट दिल्यानंतर तेथे आयोजित कार्यक्रमात ते बोलत होते. यावेळी संस्थेचे अध्यक्ष मधुकर पाठक, विश्वस्त संदीप खर्डेकर व्यासपीठावर उपस्थित होते. त्यांच्यासह व्यवस्थापन समितीचे अध्यक्ष विनायक कराळे,सचिव एम.शिवकुमार,कोषाध्यक्ष दीपक जानोरीकर, सदस्य जगदीश पाटील, रवि पवार,वैजनाथ बिरादार, संचालक श्रीमती शर्मिला रामटेके इ उपस्थित होते.यावेळी बोलताना राज्यपाल कोश्यारी म्हणाले ” समाजात देणारे खूप जण आहेत, विशेषतः महाराष्ट्रात तर खूप दानशूर व्यक्ती आहेत, कमतरता आहे ती मागणाऱ्यांची ” त्यामुळे आपण समाजोपयोगी उपक्रम घेऊन लोकांकडे जायला हवे असेही ते म्हणाले. तसेच येणाऱ्या काळात निम्न स्तरापर्यंत पोहोचण्याचा प्रयत्न केला पाहिजे आणि त्यासाठी संस्थेने कार्यविस्तार करावा यासाठी लागणारी सर्व आवश्यक मदत कुलपती म्हणून करेन असेही ते म्हणाले. नवीन शैक्षणिक धोरणात पहिल्यांदाच संस्कारांना ही महत्व असल्याने त्यावरही लक्ष केंद्रित करावे. हे सर्व एक मिशन म्हणून स्वीकारा, तुमचे सर्वस्व द्या आणि बघा. त्याग आणि तपस्या यामुळे सगळे साध्य होते असेही ते म्हणाले. तत्पूर्वी प्रास्ताविक करताना संस्थेचे विश्वस्त संदीप खर्डेकर यांनी संस्थेची माहिती देताना सांगितले की 1963 मध्ये महर्षी कर्वे यांचे सुपुत्र भास्कर कर्वे यांनी ह्या संस्थेची स्थापना केली व त्यांनी ह्याचा पाया रचला. संस्था सध्या एम एस डब्लू, पी एच डी, एम फिल, पदव्युत्तर सी एस आर मध्ये डिप्लोमा आणि मानसिक आरोग्य मध्ये देखील डिप्लोमा कोर्सेस उपलब्ध आहेत.मात्र आम्हाला संस्थेचा विस्तार करावयाचा असून त्यासाठी आपण पालक म्हणून आमच्या पाठीशी उभे रहावे असे आर्जव देखील संदीप खर्डेकर यांनी केले. तसेच संस्थेने विविध कारपोरेट कंपन्यासोबत केलेल्या सी एस आर उपक्रमांची माहिती दिली.
संस्थेचे अध्यक्ष मधुकर पाठक यांनी दिव्यांग व्यक्तींनी तयार केलेल्या वस्तू भेट देऊन राज्यपाल महोदयांचा सत्कार केला, तसेच संस्थेच्या आवारात फुलविलेल्या बागेतील फुलांचा गुच्छ त्यांना भेट दिला. ह्या सर्व वस्तू संस्थेच्या सी एस आर उपक्रमांतर्गत तयार केल्याची माहिती ही श्री. पाठक यांनी दिली. यावेळी संस्थेचे संचालक (सी.एस आर) महेश ठाकूर,प्रा.चेतन दिवाण व रजिस्ट्रार प्रसाद कोल्हटकर यांना राज्यपालांच्या हस्ते सन्मानित करण्यात आले.तर संस्थेचे विद्यार्थी अमित इंगळे व मुक्ता ढवळे यांना त्यांच्या नशामुक्ती अभियान मधील कार्यासाठी सन्मानित करण्यात आले.
तसेच आज जागतिक मानसिक आरोग्य दिनाचे औचित्य साधून प्रा. चित्रा राजूस्कर यांच्या दिव्यांग मुले व पालकांच्या समस्या या विषयावरील विशेष ऋतुरंग या पुस्तकाचे प्रकाशन करण्यात आले.
मधुकर पाठक यांनी स्वागत, संदीप खर्डेकर यांनी प्रास्ताविक, विनायक कराळे यांनी आभार प्रदर्शन तर श्रेष्ठा बेपारी यांनी सूत्रसंचालन केले.

विश्व हिंदू परिषद पूर्व व पश्चिम विभाग पुणे तर्फे महर्षी वाल्मिकी जयंती उत्सव
पुणे : अयोध्येमध्ये श्रीरामांचे मंदिर उभारले जात आहे. त्याचवेळी  प्रत्येकाच्या हृदयात समरसता निर्माण व्हायला हवी. आपल्या मनातील उच्च – नीच हा भाव दूर झाला पाहिजे. देशातील कोणताही एक समाज जरी आर्थिक, शैक्षणिक, आरोग्य याबाबत मागे राहिला तरी समता येणार नाही, असे मत विश्व हिंदू परिषदेचे केंद्रीय कार्याध्यक्ष ॲड. आलोककुमार यांनी व्यक्त केले.

विश्व हिंदू परिषदेच्या पूर्व आणि पश्चिम पुणे विभागातर्फे सामाजिक समरसता अभियान अंतर्गत महर्षी वाल्मिकी जयंती उत्सव कार्यक्रमात ते बोलत होते. यावेळी विश्व हिंदू परिषद पश्चिम महाराष्ट्र प्रांताचे अध्यक्ष पांडुरंग राऊत, कविराज संघेलिया, ईश्वर बुवा दादा महाराज, बापू भोळे, विजय कांबळे, निखील कुलकर्णी उपस्थित होते.

ॲड. आलोककुमार म्हणाले, समरसता म्हणजे काय तर सर्व मनुष्यामध्ये भगवंत निवास करतो, अशी भावना ठेवणे. संपूर्ण समाजामध्ये ब्रह्म पाहण्याचा अभ्यास म्हणजे समरसता. हिंदू समाजाला आणि देशाला बलशाली बनविण्यासाठी सामाजिक समरसता हे अभियान राबविण्यात येत आहे. येत्या काळात भारत देश विकसनशील नव्हे तर विकसित देश म्हणून ओळखला जाईल अशी भावना त्यांनी व्यक्त केली.

समरसतेचा आवाज देशाच्या प्रगतीसाठी असेल. हिंदू समाजातील तरुणांनी रोजगार निर्माण करणारे व्हा, असेही त्यांनी सांगितले. कविराज संघेलीया, ईश्वर बुवा दादा महाराज यांनी मनोगत व्यक्त केले. नाना क्षीरसागर यांनी सूत्रसंचालन केले. संतोष अनगोळकर यांनी आभार मानले.

राजकीय कार्यकर्त्यांच्या स्टॉलला कायमचे हॉटेल करण्यासाठी ? शहरातील अन्य स्टॉल धारकांना हि देणार असाच न्याय ?

पुणे- सारस बाग येथील केवळ ५३ स्टॉलधारकांचे भले करण्यासाठी सारस बाग वाॅकिंग प्लाझा’प्रस्ताव आणला जात असल्याचा आरोप होत असून,या स्टॉलधारकांनी वर्षानुवर्षे येथील रस्ता बळकावून स्टॉलला हॉटेलचे स्वरूप देऊन कायदा धाब्यावर बसविला तरीही यांचे परवाने रद्द करण्याची कारवाई करण्याऐवजी उलट त्यांच्या हॉटेलच्या व्यवसायाला कायम मूर्त स्वरूप देण्यासाठी येथे वाॅकिंग प्लाझाचा प्रस्ताव आणला जातो आहे.त्यांना अशा स्वरूपाचे सहाय्य केले तर शहरात अन्यत्र स्टॉल धारकांना हि याच धर्तीवर महापालिकेला सहाय्य करावे लागेल अशीही भूमिका आता अन्य स्टॉलधारक घेऊ लागले आहेत.सारसबागेतील स्टॉल धारकांवरच एवढी कृपा का? करायचीच तर सर्वांवर करा असा सूर आता उमटू लागला आहे.सारसबागेतील हा रस्ता वर्दळीचा रस्ता असून हा वाहतुकीला बंद करण्यास दुचाकी चालक संघटना देखील आता रिंगणात उतरणार आहेत.पालिकेने असा निर्णय घेतला तर कोर्टात जाण्याची तयारी अनेकांनी दर्शविली आहे.लक्ष्मी रस्ता,मंडई, तुळशीबाग,दगडूशेठ गणपती मंदिर,मजूर अड्डा, भोर आळी,रविवार पेठ,चोळखण आळी असा शहराचा मध्यवर्ती परिसर पालिका वाॅकिंग प्लाझा बनवावा असाच आहे,त्याबाबत काही नाही आणि सारसबागेतील वाहतुकीचा रस्ता मात्र बळकाविण्यासाठी वाॅकिंग प्लाझा बनवू पाहत आहे असे म्हणणे मांडले जाते आहे. शांतीलाल सुरतवाला महापौर असताना त्यांनी लक्ष्मी रस्ता आणि काही परिसर वाॅकिंग प्लाझा बनविण्याचा विचार मांडला होता.

महापालिकेच्या वतीने सारसबाग येथे वाॅकिंग प्लाझा विकसित करण्यात येणार असून त्याबाबतच आराखडा तयार करण्यात आला आहे. त्याला अंतिम स्वरूप देण्याचे काम सुरू आहे.हे करताना रस्त्याच्या मध्यभागी दोन्ही दिशांना आणखी ५०स्टॉल ला परवाने देता येतील असाही मुद्दा पालिकेने लक्षात घ्यावा अशी मागणी होत आहे.

सारसबागेची पुनर्रचना करण्यात येणार असल्याने परिसरातील अतिक्रमणांना लगाम बसण्याची शक्यता आहे. तसेच पादचाऱ्यांनाही परिसरातून विना अडथळा चालता येणे शक्य होणार आहे.सारसबागेबाहेरील रस्त्यावर दुतर्फा खाद्यपदार्थांचे स्टॉल; तसेच मुलांसाठी लहान-मोठ्या खेळण्यांचेही स्टॉल आहेत.महापालिकेने या परिसरात ५३ जणांना व्यवसाय परवाने दिले आहेत. मात्र, व्यावसायिकांनी स्टॉलला हॉटेलचे स्वरूप दिले असून, अनेकांचे कामगारही तेथेच राहतात. महापालिकेच्या अतिक्रमण विभागाने मे महिन्यात सारसबागेतील स्टाॅल्सवर कारवाई केली होती. परवानगी असलेल्या जागेतच व्यवसाय करण्याचे आणि अतिक्रमण न करण्याचे हमीपत्र व्यावसायिकांनी द्यावे त्यानंतरच त्यांना मान्यता दिली जाईल,अशी भूमिका महापालिकेने घेतली होती.मात्र त्याचा उपयोग काहीही झाला नव्हता,नेहमीप्रमाणे कारवाई झाली कि लगेच मागे पुन्हा अतिक्रमणे उभारली जात होती. म्हणजे या कारवाईचा संबधितांवर काहीही परिणाम होत नव्हता.परिणाम कारक कारवाई आजवर येथे कधीच झाल्याचे निदर्शनास आलेले नाही.

मात्र काही राजकीय पक्षांनी आणि पथारी व्यावसायिक संघटनांनी त्यावर कायमस्वरूपी तोडगा काढण्याची मागणी केली होती.त्यामुळे महापालिकेकडून वाॅकिंग प्लाझाचा आराखडा तयार करण्याचे निश्चित करण्यात आले होते.हा आराखडा तयार झाला असून या आराखड्याबाबत सर्व संबंधित घटकांशी चर्चा करून येत्या काही दिवसांत त्या संदर्भात बैठक घेऊन त्याला अंतिम स्वरूप देण्यात येणार आहे.वॉकिंग प्लाझा तयार झाल्यानंतर चौपाटी परिसरात दुचाकी आणि चारचाकी वाहनांना पेशवे उद्यानाजवळ असलेल्या वाहनतळापर्यंत आपली वाहने नेता येतील.त्यामुळे सारसबागेत येणाऱ्यांना आता या रस्त्यावर निर्धास्तपणे चालणे शक्य होईल, असा दावा महापालिका प्रशासनाकडून करण्यात आला आहे. मात्र हे वाहनतळ महापालिकेने स्वतः चालवावे,कोणा ठेकेदारास देवू नये अशी मागणी होते आहे.

पुणे : कुख्यात गुंड गज्या मारणे टोळीतील सदस्यांनी व्यावसायिक व त्याच्या मित्राचे अपहरण करून त्यांच्याकडे तब्बल 20 कोटी रुपयांची खंडणी मागितल्याचा धक्कादायक प्रकार उघडकीस आला. पैसे न दिल्यास व्यावसायिक व त्याच्या कुटुंबीयांना जीवे मारण्याची धमकी देण्यात आली. दरम्यान, खंडणी विरोधी पथकाने या प्रकरणाचा तपास कररून व्यवसायिक व त्याच्या मित्राची सुखरूप सुटका केली. तसेच मारणे टोळी विरुद्ध गुन्हा दाखल करण्यात आला असून ४ जणांना अटक करण्यात आली आहे.दरम्यान, याप्रकरणी कुख्यात गुंड गज्या उर्फ गजानन पंढरीनाथ मारणे (रा.शास्त्रीनगर,कोथरुड), सचिन उर्फ पप्पू दत्तात्रय घोलप (रा. गोविंदराव पाटील नगर, धनकवडी), अमर शिवाजी किर्दत (रा. एम.आय.डी.सी. कोडोवली, सातारा), हेमंत बालाजी पाटील (रा. बुरली,पलुस सांगली), फिरोज महंमद शेख (रा. समर्थनगर कोडोवली, सातारा), एक अनोळखी महिला आणि त्यांचे इतर तीन ते चार साथीदार यांच्या विरुद्ध भारती विद्यापीठ पोलिस ठाण्यात अपहरण, खंडणी, जिवे मारण्याची धमकी दिल्याप्रकरणी गुन्हा दाखल करण्यात आला आहे.पोलिसांनी दिलेल्या माहितीनुसार, फिर्यादी हे सिंहगड रस्ता परिसरात राण्यास असून त्यांचा जमीन खरेदी विक्री व शेअर ट्रेडींगचा व्यवसाय आहे. शुक्रवारी (ता.7) तक्रारदार व त्यांचे मित्र कात्रज येथील आयसीआयसीआय येथे थांबले होते. त्यावेळी काही अनोळखी व्यक्तींनी त्यांचे अपहरण करून त्यांना जबरदस्तीने गाडीमध्ये बसवुन मुंबई बंगळूर महामार्गावर नेले. तेथे त्यांना रात्रभर वेगवेगळया गाडीमधुन फिरवून, खोटा बलात्काराचा गुन्हा दाखल करण्याची धमकी देत मारहाण केली. तसेच तक्रारदार यांची गाडी जबरदस्तीने काढून घेत २० कोटी रुपयांची खंडणीची मागणी केली, पैसे न दिल्यास तक्रारदार व त्यांचे कुटुंबीय यांना जिवे मारण्याची धमकी दिली होती. याबाबतची माहिती वरिष्ठ पोलिस निरीक्षक बालाजी पांढरे यांना मिळाली.

फेडरेशन चषक रोलबॉल स्पर्धा : उत्तर प्रदेश, राजस्थान उपविजेते

पुणे / प्रतिनिधी : महाराष्ट्राच्या मुलांनी उत्तर प्रदेश संघाला तर मुलींनी राजस्थान संघाला पराभूत करताना महाराष्ट्र रोलबॉल संघटनेच्या वतीने आयोजित करण्यात आलेल्या तिसऱ्या फेडरेशन चषक रोलबॉल स्पर्धेत दुहेरी मुकुट पटकावला.

स्पर्धेचे बक्षीस वितरण बडवे इंजिनियरिंगच्या संचालिका सुप्रिया बडवे, उद्योगपती सुजित जैन, सिम्बायोसिस आंतरराष्ट्रीय विद्यापीठाचे संचालक अमेय येरवडेकर व महाराष्ट्र रोलबॉल संघटनेचे अध्यक्ष संदीप खर्डेकर यांच्या हस्ते करण्यात आले. यावेळी रोलबॉल खेळाचे जनक राजू दाभाडे, आशियाई रोलबॉल संघटनेचे सचिव आनंद यादव, भारतीय रोलबॉल संघटनेचे सचिव चेतन भांडवलकर आदी मान्यवर उपस्थित होते.

जिल्हा रोलबॉल संघटनेच्या बाणेर येथील मैदानावार सुरु असलेल्या स्पर्धेच्या अंतिम लढतीत महाराष्ट्र संघाने उत्तर प्रदेश संघाला १०-५ असे पराभूत केले. मध्यंतराला महाराष्ट्राने ५-२ अशी तीन गोलची आघाडी घेतली होती. महाराष्ट्र संघाकडून हर्षल घुगे (१२.३०, २३.४१, ३३.२५ मिनिटे) व अमितेश बोधाडे (१४.१५, २७.१२ ३२.५० मिनिटे) यांनी प्रत्येकी ३, आदित्य गणेशवाडेने २ (३.४५, ३०.५५ मिनिटे) तर अथर्व धायगुडे (०.३८ मिनिट) व मधुसुधन रत्नपारखी (३९.०३ मिनिटे) यांनी प्रत्येकी १ गोल केला. उत्तर प्रदेश संघाकडून सचिन सैनीने २ (६.१५, ४२.४६ मिनिटे), गोविंद गौर (११.४८ मिनिटे), विशाल वर्मा (१५.०९ मिनिटे) व खेतान सैनी (३९.३३ मिनिटे) यांनी प्रत्येकी एक गोल केला.

मुलींच्या गटाच्या अंतिम फेरीत महाराष्ट्र संघाने राजस्थान संघाला ६-१ असे पराभूत केले. महाराष्ट्र संघाने मध्यंतराला ३-१ अशी २ गोलांची आघाडी घेतली. महेक राउतने ३ (१८.५१, २६.२९, ४६.४९ मिनिटे) ३ तर श्रुती भगतने २ (१.०७, १४.०२ मिनिटे) व सई शिंत्रेने १ (२७.१९ मिनिटे) गोल केला. राजस्थान संघाकडून प्रीतीका तारावतने (४८.१३ मिनिटे) एकमात्र गोल केला.

तत्पूर्वी तिसऱ्या स्थानासाठी झालेल्या मुलांच्या गटाच्या लढतीमध्ये गोवा संघाने मध्य प्रदेश संघाला ५-४ असे पराभूत केले. गोवा संघाकडून श्रेयस बोंबलेने ५ (१२.२४, १४.५२, २३.०९, ३४.२२, ४९.२० मिनिटे) गोल केले. मध्य प्रदेश संघाकडून आदित्य अवस्थीने २ (२९.५५, ४४.४९ मिनिटे) तर आदित्य राणावत (३०.४२ मिनिटे) व गुरुवचन सिंग (३२.०२ मिनिटे) यांनी प्रत्येकी एक गोल केला.

मुलींच्या तिसऱ्या स्थानासाठी झालेल्या लढतीमध्ये झारखंड संघाने छत्तीसगड संघाला ७-३ असे पराभूत केले. मध्यंतराला झारखंड संघाने ५-२ अशी आघाडी घेतली. झारखंड संघाकडून इशा सोनकर (२७.५८, २९.४४, ३८.२४ मिनिटे) व लव्हली कुमारी (२१.४०, ४३.०७, ४८.४७ मिनिटे) यांनी प्रत्येकी ३ तर उझ्मा खानमने (२.५५ मिनिट) एक गोल केला. छत्तीसगड संघाकडून इशा साहूने ३ (१०.४५, ४६.३५, ४९.०१ मिनिटे) गोल करताना लढत देण्याचा प्रयत्न केला.