मी रसिकांच्या ऋणातच राहणे पसंत करेल :- जेष्ठ सिने-नाट्य अभिनेते स्वरुपकुमार
पुणेः- आमच्या क्षेत्रात रसिकांना मायबाप संबोधले जाते, हे संबोधन वास्तव असून मी व्यक्ति: रसिकांच्या ऋणातच राहणे पसंत करेल असे विचार जेष्ठ सिने-नाट्य अभिनेते स्वरुपकुमार उर्फ अनंत प्रभाकर मेहंदळे यांनी व्यक्त केले.

अखिल भारतीय मराठी नाट्य परिषदेच्या कोथरुड शाखेतर्फे यशवंतराव चव्हाण नाट्यगृहाचा २२ वा वर्धापन दिन आणि स्व.यशवंतराव चव्हाण यांच्या स्मृतीदिनानिमित्त आज यशवंत-वेणू पुरस्काराने जेष्ठ सिने-नाट्य अभिनेते स्वरुपकुमार उर्फ अनंत प्रभाकर मेहंदळे आणि सुषमा अनंत मेहंदळे यांना देण्यात आला त्यावेळी स्वरुपकुमार बोलत होते .

यावेळी व्यासपीठावर पुणे महानगर पालिकेतील शिवसेनेचे माजी गटनेते पृथ्वीराज सुतार, अखिल भारतीय मराठी नाट्य परिषदेचे अध्यक्ष सुनील महाजन, सत्यजित धांडेकर, समीर हंपी, प्रवीण बर्वे, दिपक रेगे, दीपक गुप्ते, दिपक पवार आदी मान्यवर उपस्थित होते.

ज्येष्ठ सिने-नाट्य अभिनेत्री सुहासिनी देशपांडे यांच्या हस्ते पुरस्कार प्रदान करण्यात आला. यावेळी रंगभूमीवरील विशेष योगदानाबद्दल अशोक कुलकर्णी यांचा सत्कार करण्यात आला.

स्वरुपकुमार त्यांच्या मनोगतात म्हणाले , मला किर्लोस्कर मध्ये चांगल्या पगाराची नोकरी होती. बायकोशी विचार विनिमय करून नोकरी सोडून पूर्णवेळ रंगभुमीची सेवा करण्याचा निर्णय घेतला. या निर्णयावर रसिक मायबापांनी पश्याताप होऊ दिला नाही. बाबूराव गोखले यांच्या स्वयंसिद्धा या पहिल्या व्यवसाईक नाटकांत काम केले आणि नं ता मागे वळून पाहिले नाही. मला सिनेमासुष्टीतील मोठमोठ्या बॅनरखाली काम करण्या साठी बोलवणे होते परंतू सिनेमा पेक्षा रंगभुमी मला सदाबहार आणि जिवंत वाटली त्यामुळे मी त्या ऑफर्रस स्विकारल्या नाही.

सुहासिनी देशपांडे त्यांच्या मनोगतात म्हणाल्या , मी 1972 साली स्वरूपकुमार यांच्या सोबत सून बाई घर तुझेच आहे या नाटकापासून जोडलेली आहे. सुमारे 50 वर्षाहून ही अधिक काळ आम्ही सोबत काम केले. कुर्यात सदा टिंगलम , सासू बाईंचे असेच असते अश्या नाटकांची हजारो प्रयोग आम्ही महाराष्ट्रभर केली.

यावेळी दिपक रेगे यांनी त्यांच्या मनोगतातून स्वरूप कुमार यांचे व्यक्तिमत्व उलगतले.
अखिल भारतीय मराठी नाट्य परिषदेचे अध्यक्ष सुनील महाजन यांनी प्रास्ताविक केले.

पुरस्कार वितरण सोहळ्या नंतर डी.एस.पी. प्रॉडक्शन प्रस्तुत ‘सूर तेच छेडिता…’ हा कार्यक्रम गायक जितेंद्र भुरुक, रविंद्र शाळु, श्रीपाद देशपांडे, राधिका अत्रे, पल्लवी आनदेव आणि स्नेहल आपटे यांनी सादर केला.

विमानतळावरील अत्याधुनिक सुविधांनी युक्त एअरोमॉल पार्किंगचे उद्घाटन

पुणे,दि.२५: कला, संस्कृती, व्यापार आणि शिक्षण क्षेत्रात पुण्याचा जागतिक पातळीवर लौकिक आहे. देश विदेशातील नागरिक पुण्यात येत असल्याने विमानाने प्रवास करणाऱ्या प्रवाशांसाठी विमानतळावर इंटिग्रेटेड कार्गो टर्मिनल सुरु करण्यात येईल, असे प्रतिपादन केंद्रीय हवाई वाहतूक मंत्री ज्योतिरादित्य सिंधिया यांनी केले.

लोहगाव आंतरराष्ट्रीय विमानतळ येथे उभारण्यात आलेल्या मल्टिलेव्हल व अत्याधुनिक पार्किंग सुविधा देणाऱ्या एरोमॉलचे उद्घाटन केंद्रीय मंत्री श्री. सिंधिया यांच्या हस्ते झाले, यावेळी ते बोलत होते. कार्यक्रमाला खासदार गिरीश बापट,

राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांत पाटील, खासदार वंदना चव्हाण, आमदार सुनील टिंगरे, विमानतळाचे कार्यकारी संचालक अनिल गुप्ता उपस्थित होते.

अत्याधुनिक सुविधांनी सुसज्ज असलेल्या नव्या बहुमजली वाहनतळामुळे पुणे विमानतळावरील वाहनतळाचा मोठा प्रश्न सुटणार आहे, असे सांगून मंत्री श्री.सिंधिया यांनी जागतिक पातळीवर नवरत्न म्हणून पुण्याला मान्यता मिळावी यासाठी सर्वांनी प्रयत्न करायला हवे असे सांगितले. येणाऱ्या काळात पुणे-सिंगापूर हवाई सेवेसह नवीन टर्मिनल कार्यान्वित करण्यात येईल, अशी माहिती त्यांनी दिली.

मंत्री श्री.पाटील यांनी लवकरच सर्व सुविधांनी युक्त विमानतळ पुणेकरांच्या सेवेत दाखल होईल, विमानतळ प्राधिकरण त्यासाठी आवश्यक प्रयत्न करेन अशी अपेक्षा व्यक्त केली.

खासदार बापट यांनी पुणे विमानतळाच्या विकासासाठी केंद्रीय हवाई वाहतूक मंत्रालयाने नेहमीच सहकार्य केल्याचे सांगितले.

खासदार श्रीमती चव्हाण यांनी मालवाहतूकीसाठी कार्गो सुविधा सुरु करण्याची सूचना केली. कार्यक्रमाला पदाधिकारी, प्रवासी, विविध क्षेत्रातील मान्यवर उपस्थित होते.

एअरोमॉलची वैशिष्ट्ये
नव्या मल्टीलेव्हल पार्किंगमुळे पुणे विमानतळावरील पार्किंगचा मोठा प्रश्न सुटणार आहे. १२० कोटी रुपये खर्चून बांधण्यात आलेल्या या पाच मजली एरोमॉलमध्ये सुमारे १ हजार चारचाकी व दुचाकींच्या पार्किंगची सोय असणार आहे. केवळ कार पार्किंगच नाही तर येथे प्रवाशांच्या सुविधांसाठी दालने, फूडकोर्ट अशा विविध सुविधा उपलब्ध करून देण्यात आल्या आहेत. याशिवाय विमानांच्या येण्या-जाण्याच्या वेळा, स्थिती दर्शविणारे डिस्प्लेज पार्किंग इमारतींच्या सर्व मजल्यांवर लावण्यात आले आहेत. त्यामुळे प्रवाशांना विमानांच्या वेळा समजण्यास मदत होणार आहे.

पार्किंगसाठी प्रवाशांना फास्टस्टॅग, क्रेडिट कार्ड, पे ऑन फूट, मोबाईल अॅप व्दारे पेमेंट करता येईल. ज्यामुळे प्रवाशांची सोय व इमारतीतून लवकर बाहेर पडण्यास मदत होणार आहे. तसेच ‘फाईंड माय कार’ तंत्रज्ञान सुविधेच्या माध्यमातून आपली कार कोणत्या मजल्यावर पार्क आहे हे जाणता येणार आहे.

विमानतळावर येणाऱ्या-जाणाऱ्या प्रवाशांना लिफ्ट, फुट ओव्हर ब्रीज, स्वयंचलित जिन्यांची पुरेशा संख्येने सुविधा आहेत. त्यासोबतच विमानतळ ते कार पार्किंग दरम्यान जाण्या-येण्यासाठी वृद्धांसाठी पर्यावरणपूरक गोल्फ कार्टची (कार) व्यवस्था करण्यात आली आहे. ही सुविधा पूर्णपणे मोफत असणार आहे.

प्रवाशांना सोडण्यासाठी बाहेरून येणाऱ्या चालकांना विश्रांतीसाठी येथे खास विश्रांती कक्षाची स्थापन करण्यात आली आहे. तेथे त्यांच्या राहण्याची व्यवस्था असणार आहे. प्रवासी व अन्य नागरिकांकरिता हे पार्किंग २४ तास सुरू असणार आहे, अशी माहिती विमानतळाच्या अधिकाऱ्यांनी दिली.

पुणे- ग्रामीण भागात सुरु असणाऱ्या पीएमपीएमएलच्या ११ मार्गावरील तोट्यात असलेले बसमार्ग उद्यापासून बंद करण्यात येणार आहेत. असे पीएमपीएमएल ने काल जाहीर करताच आज यावरून खासदार सुप्रिया सुळे चांगल्याच संतापल्या आहेत.गोरगरीबांची मुले शिकावीत असे पीएमपीएमएलच्या कर्त्या-धर्त्यांना वाटत नाही का? असा प्रश्न त्यांनी उपस्थित केला आहे. या सगळ्या मार्गांवरील बससेवा सुरू ठेवा अन्यथा आपण स्वतः आंदोलन करू, असा इशाराच त्यांनी दिला आहे.

सोशल माध्यमातून आपला हा संताप त्यांनी व्यक्त करताना म्हटले आहे कि,’

बारामती लोकसभा मतदारसंघासह पुणे जिल्ह्यातील ग्रामीण भागात सुरु असणाऱ्या पीएमपीएमएलच्या बससेवा बंद करण्याच्या हालचाली सुरु आहेत. वास्तविक या सेवेमुळे ग्रामीण भागातील विद्यार्थी,छोटे व्यावसायिक व कर्मचारी यांची मोठी सोय झाली आहे.ही जनतेच्या हक्काची बससेवा आहे. ही सेवा बंद झाल्यास या सर्वांचे मोठे हाल होणार असून आम जनतेची ही हक्काची वाहतूक व्यवस्था बंद होणे योग्य नाही. गोरगरीबांची मुलं शिकावीत असं पीएमपीएमएलच्या कर्त्या-धर्त्यांना वाटतं की नाही असा सवाल यानिमित्ताने उपस्थित झाला आहे. केवळ नफा-तोट्याचा विचार करुन ही सेवा बंद पाडणे सर्वथा अनुचित आहे. पीएमपीएमएलच्या प्रशासनाने हे लक्षात घेणं आवश्यक आहे. एवढंच नाही राज्य सरकारने देखील यामध्ये लक्ष घालून ही सेवा कायम ठेवणं गरजेचे आहे. माझी पीएमपीएमएलच्या प्रशासनाला कळकळीची विनंती आहे की, कृपया ग्रामीण भागांतील या बससेवा कायम ठेवा. या सेवा पुर्ववत न झाल्यास गोरगरीबांच्या हक्कासाठी, विद्यार्थ्यांच्या शिक्षणासाठी आणि सर्वसामान्यांच्या हक्काच्या प्रवासासाठी राष्ट्रवादी काँग्रेसच्या वतीने जोरदार आंदोलन करण्यात येईल. या आंदोलनात मी स्वतः सहभागी होईन याची कृपया आपण नोंद घ्यावी.

पुणे, दि.२५: साहित्यरत्न लोकशाहीर अण्णाभाऊ साठे विकास महामंडळ अंतर्गत लघु उद्योग व्यवसायासाठी थेटकर्ज योजना राबविण्यात येत असून त्यासाठी २८ नोव्हेंबर ते २० डिसेंबर २०२२ या कालावधीत प्रस्ताव सादर करावेत, असे आवाहन करण्यात आले आहे.

या योजनेअंतर्गत मातंग समाज व त्यामध्ये अंतर्भाव असणाऱ्या मांग, मातंग, मिनीमादिग, मादींग, दानखणी मांग, मांग महाशी, मदारी, राधेमांग, मांगगारुडी, मांग गारोडी, मादगी व मादिगा या १२ पोट जातींना या योजनेचा लाभ घेता येणार आहे. अर्जदार पुणे जिल्ह्यातील रहिवासी असावा. वय १८ वर्षे पूर्ण व ५० वर्षाच्या आत असावे. सीबील स्कोर किमान ५०० असावा.

योजनेअंतर्गत १ लाख रुपयांच्या प्रकल्प मूल्यासाठी महामंडळाचा सहभाग ८५ हजार रुपये, अनुदान १० हजार रुपये, अर्जदाराचा सहभाग ५ हजार रुपये असून ४ टक्के या व्याजदर असणार आहे. लाभार्थ्याने ३ वर्षांसाठी २ हजार ६४५ इतका मासिक हप्ता भरणे आवश्यक राहील. २०२२-२३ या आर्थिक वर्षासाठी भैतिक उदिष्ट ७० प्रकरणांचे असून प्रति युनिट १ लाख रुपये प्रमाणे प्राप्त झाले आहे. महिला ५० टक्के, पुरुष ५० टक्के तसेच शहरी व ग्रामीण विभागात या योजनेचा लाभ देण्यात येणार आहे. अधिक अर्ज आल्यास लॉटरी पद्धतीने निवड करण्यात येईल.

इच्छूक व पात्र अर्जदारांनी अटी व शर्ती, अर्जासोबत जोडावयाची कागदपत्रे, विहित नमुन्यातील अर्ज आदींबाबत साहित्यरत्न लोकशाहीर अण्णाभाऊ साठे विकास महामंडळ, डॉ. बाबासाहेब आंबेडकर सामाजिक न्याय भवन, सर्वे नंबर १०३,१०४ मेंटल कॉर्नर, विश्रांतवाडी पोलीस स्टेशनसमोर, येरवडा, पुणे दूरध्वनी क्र. ०२०-२९७०३०५७ येथे संपर्क साधून माहिती घ्यावी, असे महामंडळाचे जिल्हा व्यवस्थापक श्री. मांजरे यांनी कळवले आहे.

पुणे दि.२५- पेरणे फाटा येथे १ जानेवारी रोजी आयोजित करण्यात येणारा विजयस्तंभ अभिवादन सोहळा शांतता आणि उत्साहात साजरा व्हावा तसेच येणाऱ्या अनुयायांना आवश्यक त्या सोयीसुविधा पुरवण्यासाठी सर्व विभागांनी समन्वयाने काम करावे, असे निर्देश जिल्हाधिकारी डॉ.राजेश देशमुख यांनी दिले.

विजयस्तंभ अभिवादन सोहळ्याच्या अनुषंगाने जिल्हाधिकारी कार्यालयात आयोजित आढावा बैठकीत ते बोलत होते. बैठकीस बार्टीचे महासंचालक धम्मज्योती गजभिये, पोलीस सहआयुक्त संदीप कर्णिक, अपर पोलीस आयुक्त नामदेव चव्हाण, निवासी उपजिल्हाधिकारी हिंमत खराडे, अपर पोलीस अधीक्षक मितेश घट्टे, एनएचएआयचे प्रकल्प संचालक संजय कदम आदी उपस्थित होते.

डॉ.देशमुख म्हणाले, मागील वेळचा विजयस्तंभ अभिवादन सोहळा कार्यक्रम सर्व विभागांनी अतिशय चांगल्या समन्वयाने आयोजित केला. यावर्षी मोठ्या प्रमाणात भाविक येण्याची शक्यता असून त्यादृष्टीने सर्व बाबींचे सूक्ष्म नियोजन करावे. वाहतूक व्यवस्था, वाहनतळाचा आराखडा बारकाईने तयार करावा. पोलीस विभागाने वाहतूकीचे नियोजन करण्यासह कायदा व सुव्यस्थेबाबत सर्व ती काळजी घ्यावी. सार्वजनिक बांधकाम विभागाने रस्त्यांची डागडुजी करून घ्यावी, अशाही सूचना त्यांनी दिल्या.

सोहळ्याच्या उत्तम आयोजनाच्या दृष्टीकोनातून विविध संघटनांच्या प्रतिनिधींनी दिलेल्या सूचनांचा सकारात्मक विचार करण्यात येईल. दीर्घकालीन आराखड्यानुसार काही जागा संपादित करायच्या असल्यास त्याबाबतचा प्रस्ताव आणि आर्थिक तरतूद बार्टी व समाजकल्याण विभागाने जिल्हाधिकारी कार्यालयास दिल्यास आवश्यक ती कार्यवाही गतीने करण्यात येईल. गतवेळी पीएमपीएमएलने सोहळ्यासाठी आवश्यक संख्येने नव्या बसेस दिल्या होत्या. यावर्षीही पुरेशा प्रमाणात नव्या बसेस पुरवण्यात याव्यात, असेही जिल्हाधिकारी म्हणाले.

यावेळी विजयस्तंभ परिसराचे सुशोभिकरण, प्रकाशव्यवस्था, स्टॉल, मंडप उभारणी, वाहनतळ, वाहतूक आराखडा, आरोग्य तपासणी, पिण्याचे पाणी, रस्त्यांची दुरुस्ती, तात्पुरेत शौचालय उभारणी, स्वच्छतेसाठी घंटागाड्या, आपत्तकालीन प्रसंगी अग्नीशमन वाहनांची व्यवस्था, विजयस्तंभाशेजारी नदी असल्यामुळे आपत्तीव्यवस्थापन विभागाकडून बोटीची व्यवस्था आदींबाबत सविस्तर आढावा घेण्यात आला.

श्री.गजभिये म्हणाले, यापूर्वीच्या विजयस्तंभ अभिवादन सोहळ्याचे सर्व विभागांनी अतिशय उत्कृष्टरित्या आयोजन केले. या कार्यक्रमासाठी शासनाकडून निधीची तरतूद असल्यामुळे सर्व विभागांनी आपली मागणी तात्काळ बार्टीकडे द्यावी. या परिसरात चांगल्या सुविधा देण्याचा प्रयत्न आहे, असेही ते म्हणाले.

बैठकीस प्रांताधिकारी संतोष देशमुख, पोलीस उपायुक्त विक्रांत देशमुख यांच्यासह सार्वजनिक बांधकाम विभाग, पुणे महानगरपालिका तसेच पीएमआरडीए अग्नीशमन विभाग, एनडीआरएफ, जिल्हा परिषद, शिरुर तसेच हवेलीचे गटविकास अधिकारी, पोलीस विभाग, परिवहन, पीएमपीएमएल, आरोग्य विभाग, राज्य उत्पादन शुल्क आदी विभागांचे अधिकारी उपस्थित होते.

पुणे दि.२५ : खरीप पणन हंगाम २०२२-२३ मध्ये जुन्नर व खेड तालुक्यामध्ये किमान आधारभूत किंमत खरेदी योजनेअंतर्गत धान व भरडधान्य खरेदीकरिता दोन खरेदी केंद्र सुरू करण्यात आली असून तेथे इच्छुक शेतकऱ्यांनी ३० नोव्हेंबरपर्यंत ऑनलाईन नोंदणी करावी, असे आवाहन आदिवासी विकास महामंडळाच्या जुन्नर प्रादेशिक कार्यालयाकडून करण्यात आले आहे.

शेतकऱ्यांना हमी भावापेक्षा कमी किमतीने धान्य विकावे लागू नये यासाठी केंद्र शासनामार्फत किमान आधारभूत किंमत खरेदी योजना राबवण्यात येते. राज्य शासनाने आदीवासी क्षेत्रात ही योजना राबवण्यासाठी महारार्ष्ट राज्य सहकारी आदिवासी विकास महामंडळ मर्यादित नाशिक यांची मुख्य अभिकर्ता म्हणून नियुक्ती केली आहे. त्यानुसार जुन्नर तालुक्यातील पारगाव तर्फे मढ व खेड तालुक्यातील डेहणे येथे खरेदी केंद्र सुरू करण्यात आली आहेत.

शासनामार्फत हंगाम २०२२-२३ साठी किमान आधारभूत किंमतअंतर्गत साधारण दर्जाचा धानासाठी २ हजार ४० रुपये ‘अ’ दर्जाच्या धानासाठी २ हजार ६० रुपये प्रती क्विंटल तसेच रागी या भरडधान्याचा खरेदी दर ३ हजार ५७८ रुपये लागू करण्यात आला आहे.

खरेदी केंद्राच्या ठिकाणी शासनाच्या एनइएमएल या पोर्टलवर शेतकरी ३० नोव्हेंबरपर्यंत नोंदणी करु शकतात. नोंदणीसाठी ७/१२, ८ अ चा उतारा, बँक पासबुकची व आधार कार्डची छायांकित प्रत इत्यादी कागदपत्रे आवश्यक आहेत. चालू हंगामामध्ये जास्तीत जास्त प्रमाणावर शेतकऱ्यांनी नोंदणी करुन या योजनेचा लाभ घ्यावा, असेही प्रादेशिक व्यवस्थापकांनी कळवले आहे.

पुणे, दि. २५ : नवीन कात्रज बोगदा ते नवले पूल या दरम्यान होणाऱ्या अपघातांची कारणे शोधून त्याठिकाणी भविष्यात अपघात टाळण्याच्यादृष्टीने त्वरित आवश्यक त्या उपाययोजना कराव्यात, असे निर्देश पालकमंत्री चंद्रकांत दादा पाटील यांनी दिले.

जिल्हास्तरीय रस्ता सुरक्षा समितीची बैठक पालकमंत्री श्री. पाटील यांच्या अध्यक्षतेखाली नवीन विश्रामगृह पुणे येथे पार पडली त्यावेळी ते बोलत होते. बैठकीस आमदार भीमराव तापकीर, संग्राम थोपटे, पुणे शहर पोलीस आयुक्त अमिताभ गुप्ता, जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद, पुणे ग्रामीणचे पोलीस अधीक्षक अंकित गोयल, एनएचएआयचे प्रकल्प संचालक संजय कदम, पीएमआरडीएचे अधीक्षक अभियंता भरतकुमार बावीस्कर, सेव्ह लाईफ फाउंडेशनचे रोशन जोश आदी उपस्थित होते.

श्री. पाटील म्हणाले, या महामार्गावर उतार येण्याआधी वाहनचालकांना सावध करण्यासाठी रस्त्यावर फलक लावणे आवश्यक आहे. रस्त्यावरील चेक पोस्टवर सूचना देण्याची व्यवस्था करण्यात यावी. मोठ्या आणि लहान वाहनांसाठी रस्त्यावर वेगवेगळे मार्ग असावेत त्यासाठी ट्रक, कार इत्यादी वाहनांचे चिन्हे, फलक लावावेत.

लोकसंख्येबरोबरच वाहतूक वाढत असल्याने त्यादृष्टीने भविष्यातील आवश्यक नियोजन करावे. हद्दींचा प्रश्न उपस्थित न करता सर्व विभागांनी समन्वयाने कामे मार्गी लावावीत. आधीच्या आराखड्यातील मंजूर कामे प्राधान्याने पूर्ण करावीत. नवले पुलावर प्रवाशांसाठी स्काय वॉक उभारण्यात यावे. रस्त्याच्या दुतर्फा असलेले अतिक्रमण हटविण्यात यावेत, असे आदेशही त्यांनी यावेळी दिले.

बैठकीमध्ये पुणे ग्रामीण पोलीस तसेच पुणे शहर तसेच पिंपरी चिंचवड पोलीस आयुक्तालयाच्या हद्दीत गेल्या दोन वर्षात झालेल्या अपघातांचा व त्या अनुषंगाने केलेल्या उपाययोजनांचा आढावा घेण्यात आला. त्यानुसार करण्यात आलेल्या उपाययोजना व त्यानंतर अपघात प्रमाणात झालेली घट याबाबत चर्चा करण्यात आली.

जिल्हाधिकारी डॉ. राजेश देशमुख यांनी २०१८ ते २०२२ या कालावधीत या महामार्गावर झालेल्या अपघातांची व केलेल्या उपाययोजनांची माहिती दिली.

सेव्ह लाईफ फाउंडेशनचे रोशन जोश यांनी यावेळी रस्ता सुरक्षा विषयी करण्यात येणाऱ्या उपाययोजनांची सादरीकरणाद्वारे माहिती दिली.

बैठकीस पिंपरी-चिंचवड मनपा, जिल्हा परिषद, पोलीस विभाग, पीएमपीएमएल, आपत्ती व्यवस्थापन, आरोग्य विभाग, परिवहन महामंडळ तसेच प्रादेशिक परिवहन विभागाचे अधिकारी उपस्थित होते.
0000

पुणे-आगामी महापालिका आणि जिल्हा परिषद निवडणूक डोळ्यासमोर ठेवून पुणे, पिंपरी-चिंचवडमधील नगरसेवक आणि जिल्ह्यातील आमदारांनी ग्रामीण भागात सुरू केलेले मार्ग बंद करण्याचा निर्णय पीएमपीने घेतला आहे. येत्या शनिवारपासून (२६ नोव्हेंबर) मार्ग बंद करण्यात येणार असल्याची माहिती पीएमपीकडून देण्यात आली. संचलनासाठी येत असलेला खर्च आणि मार्गांतून मिळणारे उत्पन्न यामध्ये मोठी तफावत आढळून आल्याने हा निर्णय घेण्यात आला आहे.दरम्यान, मार्ग बंद करण्यात आल्याने पुणे आणि पिंपरी-चिंचवड शहरात काही मार्गांवर जादा गाड्या सोडण्यात येणार आहेत. गेल्या काही महिन्यांत तब्बल ७८ मार्गांवर पीएमपीची सेवा सुरू आहे. मध्यंतरी राज्य एसटी कर्मचाऱ्यांनी संप केल्याने ग्रामीण भागात जवळपास चाळीस मार्गांवर पीएमपीने सेवा देण्यास सुरुवात केली होती. पुणे महानगर विकास प्राधिकरणाच्या हद्दीत अशी सेवा सुरू झाल्याने पुणे आणि पिंपरी- चिंचवड शहरातील प्रवासी सेवेवर त्याचा ताण पडत असल्याचे दिसून येत होते.सेवा सुरू केलेल्या मार्गांवर उत्पन्न कमी आणि तोटा जास्त वाढत असल्याचे पीएमपीच्या वाहतूक विभागाला आढळून आले होते. लांब पल्ल्याच्या गाड्यांच्या देखभाल दुरुस्तीचा खर्चही पीएमपीला करावा लागत होता. त्यावरून प्रवासी संघटना आणि संस्थांनी लांब पल्ल्याची सेवा सुरू करण्याच्या धोरणावर टीका केली होती.

हे मार्ग बंद
स्वारगेट ते काशिंगगाव, स्वारगेट ते बेलावडे, कापूरहोळ ते सासवड, कात्रज सर्पोद्यान ते विंझर, सासवड ते उरूळी कांचन, हडपसर ते मोरगांव, हडपसर ते जेजुरी, मार्केटयार्ड ते खरावडे-लव्हार्डे, वाघोली ते राहुगाव, चाकण-शिक्रापूर फाटा, सासवड ते यवत या अकरा मार्गांवरील सेवा पहिल्या टप्प्यात बंद करण्यात येणार आहेत.

जिथे धंदा तिथे जादा गाड्या
ग्रामीण भागातील मार्ग बंद करण्यात आल्याने शनिवारपासून पुणे आणि पिंपरी-चिंचवड शहरामध्ये काही मार्गांवर जादा गाड्या सोडण्यात येणार आहेत. हडपसर ते मांजरी बुद्रुक, कात्रज ते हडपसर, कात्रज ते खराडी, पुणे रेल्वे स्थानक ते हिंजवडी माण फेज-३, शेवाळेवाडी ते कात्रज, कात्रज-गुजरवाडी ते भोसरी, पुणे रेल्वे स्थानक ते वडगाव, कात्रज ते जांभूळवाडी, मार्केटयार्ड ते पौडगांव, भोसरी ते हिंजवडी माण फेज-३ आणि भोसरी ते भेकराईनगर या अकरा मार्गांवर या गाड्या धावणार आहेत.

पुणे, दि. २५: कालव्यांच्या शेजारील विहिरींना पाणीपट्टी माफ करण्याचा प्रस्ताव कृष्णा खोरे विकास महामंडळाने शासनाकडे पाठवावा, असे निर्देश पालकमंत्री चंद्रकांत दादा पाटील यांनी कालवे सल्लागार समितीच्या बैठकीत दिले.

पुणे जिल्ह्यातील नीरा उजवा कालवा, नीरा डावा कालवा, खडकवासला, भामा आसखेड, पवना व चासकमान प्रकल्पांची कालवे सल्लागार समिती बैठक पालकमंत्री श्री. पाटील यांच्या अध्यक्षतेखाली संपन्न झाली. बैठकीस विधानसभेचे विरोधी पक्षनेते अजित पवार यांच्यासह पुणे, सोलापूर व सातारा जिल्ह्यातील लोकप्रतिनिधी, प्रशासकीय अधिकारी उपस्थित होते.

सन २००९ पर्यंत कालव्यांशेजारील विहीरींना पाणीपट्टी आकारण्याची तरतूद होती. मध्यंतरी ती बंद करण्यात आली होती. आता पुन्हा २०२२ पासून पाणीपट्टी आकारण्याचे महाराष्ट्र जलसंपत्ती नियामक प्राधिकरणाचे आदेश आहेत. त्यामुळे पुर्वीची व्याजासह थकबाकीची रक्कम आणि यापुढे होणारी आकारणी अशी सर्व रक्कम शेतकऱ्यांचे हीत लक्षात घेऊन माफ करण्याबाबत शासनस्तरावर सकारात्मक प्रयत्न केले जातील. तसा प्रस्ताव महामंडळाने शासनाकडे पाठवावा, असे निर्देश पालकमंत्री श्री. पाटील यांनी दिले.

पुणे महानगर पालिकेने पाणीपुरवठ्यातून होणारा ३५ टक्के इतका अपव्यय रोखल्यास मोठ्या प्रमाणात पाण्याची बचत होईल, त्यासाठी महानगरपालिकेने २४ बाय ७ समान पाणीपुरवठा योजना गतीने पूर्ण करावी, जायका प्रकल्प गतीने पूर्ण करावा, असे निर्देशही पालकमंत्र्यांनी दिले.

बैठकांना जिल्हाधिकारी डॉ. राजेश देशमुख, मुख्य कार्यकारी अधिकारी आयुष प्रसाद, महाराष्ट्र कृष्णा खोरे विकास महामंडळाचे कार्यकारी संचालक अतुल कपोले, मुख्य अभियंता हनुमंत गुणाले, अपर जिल्हाधिकारी विजयसिंह देशमुख, अधीक्षक अभियंता संजीव चोपडे, पुणे तसेच पिंपरी- चिंचवड महानगर पालिकेचे अधिकारी, पाटबंधार विभागाचे अधिकारी उपस्थित होते.

नीरा उजवा व डावा कालव्याची रब्बीची दोन आवर्तने
जिल्ह्यातील सर्व धरणप्रकल्पांमध्ये सध्या जवळपास शंभर टक्के पाणीसाठा आहे. भाटघर, वीर, गुंजवणी व नीरा देवघर मध्ये ४८ टीएमसी पाणीसाठा आहे. नीरा उजवा कालव्यातून २७ टीएमसी आणि नीरा डावा कालव्यातून १५.२५ टीएमसी पाणीवापर मंजूर आहे. सिंचन, पिण्यासाठी व औद्योगिक वापरासाठी मंजूर पाणीवापरानुसार मुबलक पाणी उपलब्ध असून नीरा उजवा कालवा आणि नीरा डावा कालव्यातून रब्बी हंगामात दोन आणि उन्हाळी हंगामात दोन आवर्तने देण्यात येणार आहेत. रब्बी हंगामातील पहिले आवर्तन २२ नोव्हेंबर पासून सुरू करण्यात आले आहे. पहिले आवर्तन १४ जानेवारी पर्यंत पूर्ण करुन दुसरे आवर्तन १५ जानेवारीपासून सोडण्याचे नियोजन असून त्यास पालकमंत्री श्री. पाटील यांच्या अध्यक्षतेखालील कालवा सल्लागार समितीने मान्यता दिली.

या बैठकीस खासदार रणजीतसिंह मोहिते पाटील, माजी राज्यमंत्री आमदार दत्तात्रय भरणे, आमदार समाधान आवताडे, दीपक साळुंखे, दीपक चव्हाण, राम सातपुते आदी उपस्थित होते.

खडकवासला प्रकल्पातून रब्बी व उन्हाळी अशी मिळून तीन आवर्तने
खडकवासला प्रकल्पात सध्या २७.३८ टीएमसी पाणीसाठा असून साठ्याची टक्केवारी ९३.९२ टक्के आहे. लाभक्षेत्रातील १८ तलावांमध्ये धरणाचे पाणी सोडून व कार्यक्षेत्रात झालेल्या पावसामुळे हे सर्व तलाव १०० टक्के भरण्यात आले आहेत.

पुणे महानगरपालिकेने अतिरिक्त पाणीवापर टाळण्यासाठी आवश्यक त्या उपाययोजना हाती घ्याव्यात अशी मागणी लोकप्रतीनिधींनी यावेळी केली. पिण्यासाठी, ग्रामीण भागातील सिंचनासाठी तसेच औद्योगिक वापरासाठी पाणीवापराबाबत समतोल राखण्यासाठी प्रयत्न करावेत. महानगरपालिका आणि जलसंपदा विभागाने एकत्र बैठक घेऊन अतिरिक्त पाणीवापराचा प्रश्न सोडवण्याबाबत विचारविनिमय करावा, अशा सूचनाही पालकमंत्री श्री. पाटील यांनी केल्या.

सध्या पाणीपरिस्थिती पाहता खडकवासला प्रकल्पातून नवा मुठा उजवा कालव्याला २२ डिसेंबर रोजी रब्बीचे अवर्तन सोडण्याचे नियोजन असून रब्बी आणि उन्हाळी हंगामासाठी योग्य नियोजन करुन दोन ऐवजी एकूण तीन आवर्तने सोडण्यात यावे, अशा सूचना श्री. पाटील यांनी दिल्या.

बैठकीस आमदार सर्वश्री राहूल कुल, सुनील शेळके, भीमराव तापकीर, चेतन तुपे, दिलीप मोहिते पाटील, अशोक पवार आदी उपस्थित होते.

पवना धरणात सध्या ७.६७ टीएमसी पाणीसाठा उपलब्ध असून ते पिण्यासाठी, सिंचन तसेच औद्योगिक वापरासाठी पुरेसे आहे. रब्बी व उन्हाळी हंगामासाठी १५ जुलैपर्यंतचा पाणीवार गृहीत धरता पाण्याचे योग्य नियोजन करण्यात आले आहे, असे बैठकीत सांगण्यात आले. भामा आसखेड धरणात पुरेसे पाणी असून धरणातून २ वेळा नदी पाणी सोडण्याचे ठरले. धरणाचे पाणी प्राधान्याने खेड तालुक्याला देण्याबाबत विचार करावा अशी मागणी यावेळी करण्यात आली. चासकमान प्रकल्पातून रब्बी हंगामात २२ डिसेंबर रोजी आवर्तन सोडण्याचे बैठकीत ठरले.

बैठकीस खासदाआमदार आदी उपस्थित होते.