पुणे- स्त्रियांना शिक्षणाची द्वारे खुली करुन देशात शैक्षणिक क्रांती करणारे महात्मा फुले यांना अभिप्रेत असणारे शिक्षक व विद्यार्थी निर्माण व्हावेत. जसा शेतकरी शेतीची मशागत करतो व मग चांगलं पीक येतं, तसे शिक्षकांनी विद्यार्थ्यांच्या विचारांची मशागत करावी व चांगला समाज, विद्यार्थ्यांचे भवितव्य व पर्यायाने देश घडवावा असे मत माजी खासदार राजू शेट्टी यांनी जगदीशब्द फाउंडेशन आयोजित पुरस्कार वितरण सोहळ्यात व्यक्त केले.

क्रांतीसुर्य महात्मा ज्योतिराव फुले यांच्या स्मृतिदिनानिमित्त शिक्षक दिन म्हणून जगदीशब्द फाउंडेशन व परिवर्तन सामाजिक संस्था यांच्या वतीने विविध क्षेत्रातील मान्यवरांना राज्यस्तरीय क्रांतीसुर्य व क्रांतीज्योती पुरस्कार वितरण सोहळा पुणे येथे माजी खासदार राजू शेट्टी यांच्या विशेष उपस्थितीत मोठ्या दिमाखात संपन्न झाला.

यावेळी प्रमुख पाहुणे म्हणून सामाजिक कार्यकर्त्या दिशा पिंकी शेख, पत्रकार श्रीरंग गायकवाड, भूमाता ब्रिगेडच्या तृप्ती देसाई, ज्येष्ठ विधीज्ञ विजय कुरले, साहित्यिक नारायण सुमंत, व्याख्याते जगदीश ओहोळ, परिवर्तन सामाजिक संस्थेचे अध्यक्ष महादेव वाघमारे आदी मान्यवर उपस्थित होते.

या पुरस्कार वितरण सोहळ्यात राज्यातील सर्व जिल्ह्यातून पुरस्कारार्थी निवडण्यात आले होते. शैक्षणिक, सामाजिक, उद्योग, आरोग्य, पत्रकारिता अशा विविध क्षेत्रातील मान्यवरांना यावेळी पुरस्कार देऊन सन्मानित करण्यात आले.

कार्यक्रमाचे प्रास्ताविक जगदीश ओहोळ व सूत्रसंचालन जालिंदर राऊत यांनी केले तर आभार महादेव वाघमारे यांनी मानले.

पुणे- -पुण्यातील वयाने सर्वात छोटी असलेली लेखिका मोक्षदा चौधरी हीचे बालगंधर्व येथे डेक्कन लिटरेचर फेस्टिवल येथे ” The Musings of Chimera ” ” द मूसिंग्स ऑफ छिमेरा ” पुस्तकाचे प्रकाशन उपस्थित सर्व लेखकांच्या हस्ते करण्यात आले. सर्वात लहान वयात अवघ्या १३ व्या वर्षात पुस्तक लिहिण्यास सुरवात केली. आज ती १५ वर्षाची आहे. करोना च्या काळात घरी बसून तिने अनेक विषयांवर पुस्तक लिहिण्यास सुरवात केली. मुलींच्या भावना व विचारांवर आधारित हे पुस्तक आज प्रकाशित करण्यात आले.
रेडिओ जॉकी आर. जे. तरुण ( Radio Jockey R.J.Tarun ) यांनी मोक्षदा चौधरी हीची मुलाखत घेतली. या प्रसंगी लेखिका तेजस्विनी नाईक, उर्मी रुम्मी, लेखक धीरज सिंग उपस्थित होते.
मोक्षदा चौधरी लिखित ” The Musings of Chimera ” या पुस्तकाचे प्रकाशन लेखिका तेजस्विनी नाईक, उर्मी रुम्मी, लेखक धीरज सिंग यांच्या उपस्थितीत करण्यात आले. लेफ्टनंट कर्नल रवी चौधरी यांची कन्या मोक्षदा चौधरी एवढ्या लहान वयात झाली लेखिका व या पुढे ती अनेक विषयांवर लिखाण करणार आहे असे तिने व्यक्त केले. या प्रसंगी तिची आई सिम्पल चौधरी, बहीण आराध्या चौधरी व नागरिक मोठ्या संख्येत उपस्थित होते.

छत व फ्लड लाईट्सची मागणी ताताडीने मंजूर : उद्यापासून लढतींना सुरुवात

पुणे : राज्य आणि राष्ट्रीय रोलबॉल खेळाडूना सरकारी नोकरीमध्ये आरक्षण मिळवून देण्यासाठी प्रयत्नशील असून यासाठीच्या योग्य त्या सुचना प्रशासनाला दिल्या असल्याचे पुण्याचे पालकमंत्री चंद्रकांतदादा पाटील यांनी सांगितले.

जिल्हा रोलबॉल मैदानावर भारतीय रोलबॉल संघटनेच्या मान्यतेने, महाराष्ट्र रोलबॉल संघटना व जिल्हा रोलबॉल संघटना यांच्यावतीने एक भारत श्रेष्ठ भारत या स्पर्धेचे आयोजन करण्यात आले आहे. स्पर्धेचे उद्घाटन पुणे जिल्ह्याचे पालकमंत्री चंद्रकांतदादा पाटील यांच्या हस्ते करण्यात आले. यावेळी ते बोलत होते. यावेळी रोलबॉल खेळाचे जनक राजू दाभाडे, महाराष्ट्र रोलबॉल संघटनेचे अध्यक्ष संदीप खर्डेकर, पुणे स्मार्ट सिटीचे मुख्य कार्यकारी अधिकारी संजय कोलते, एक भारत श्रेष्ठ भारत उपक्रमाचे नोडल अधिकारी लेफ्ट. कर्नल अमरबीर सिंग, काकडे बिल्डर्सचे सुर्यकांत काकडे, नगरसेविका स्वप्नाली सायकर, नगरसेवक अमोल बालवडकर, लहू बालवडकर, राज्य रोलबॉलचे उपाध्यक्ष अमोल काजळेपाटील आदी मान्यवर यावेळी उपस्थित होते.

सध्याच्या घडीला रोलबॉल हा खेळ शासकीय खेळाच्या यादीमध्ये आला असला तरी देखील या खेळाडूना सरकारी नोकरीमध्ये आरक्षण मिळालेले नाही. यामुळे अनेक दर्जेदार खेळाडू असून देखील या खेळाडूना इतर खेळाच्या खेलाडूप्रमाणे सरकारी नोकरीमध्ये आरक्षण मिळालेले नाही. मात्र, पालकमंत्री चंद्राकांतदादा पाटील यांनी या खेळातील खेळाडूना नोकरीमध्ये सरकारी आरक्षण मिळावे यासाठी प्रयत्न सुरु असल्याचे सांगून योग्य त्या सुचना प्रशासनाला दिल्या असल्याचे यावेळी सांगितले.

सध्याच्या घडीला हे मैदान खुल्या स्वरूपात आहे. मैदानाला छत बांधण्यासाठी तसेच फ्लड लाईट्स बसविण्यासाठी निधीची मागणी महाराष्ट्र रोलबॉल संघटनेचे अध्यक्ष संदीप खर्डेकर यांच्यावतीने करण्यात आली होती. या मागणीला पालकमंत्र्यांनी सकारात्मक प्रतिसाद देताना मैदनाला छत बांधणी, फ्लड लाईट्स बसविण्यासाठीच्या सुचना स्मार्ट सिटीचे मुख्य कार्यकारी अधिकारी संजय कोलते यांना दिल्या. याबरोबरीने मैदानावर कायमस्वरूपी खुर्च्या देखील देण्याचे पालकमंत्री चंद्रकांत पाटील यांनी मान्य केले. यामुळे मैदानाचे रूप पालटून याला रोलबॉल अंतरराष्ट्रीय मैदानामध्ये रुपांतरीत होवू शकेल.

एक भारत श्रेष्ठ भारत या स्पर्धेचे उद्घाटन आज करण्यात आले. ही स्पर्धा दोन टप्प्यात घेण्यात येणार असून स्पर्धा पहिल्या टप्प्यातील लढती जिल्हा रोलबॉल मैदनावर घेण्यात येणार आहेत. ही स्पर्धा मुले व मुली अशा दोन्ही विभागात होणार असून हिमाचल प्रदेश, केरळ, उत्तराखंड, कर्नाटक, मध्यप्रदेश,मणिपूर, नागालँड, उत्तर प्रदेश, अरुणाचल प्रदेश, मेघालय, गुजरात, छत्तीसगड, महाराष्ट्र व ओडिसा हे संघ सहभागी होणार आहेत. उद्यापासून सर्व संघाच्या लढती सुरु होणार आहेत.

दत्तजयंती उत्सवानिमित्त श्रीमती लक्ष्मीबाई दगडूशेठ हलवाई दत्तमंदिर ट्रस्ट आणि अखिल भारतीय त्रिपदी परिवारतर्फे आयोजन ; मंदिराचे १२५ वे वर्ष  
पुणे : श्रीपाद वल्लभ दिगंबरा….च्या जयघोषाने आणि नर्मदे हर हर… च्या निनादात सामाजिक पर्यावरण शुद्धीचा सिद्ध वेदघोष असलेल्या प.पू.वासुदेवानंद सरस्वती टेंबे स्वामी रचित घोरात्कष्टात स्तोत्राचे सामुदायिक पठण पुणे व जिल्ह्यातील शेकडो दत्तभक्तांनी एकत्रितपणे केले. अवधूत चिंतन श्री गुरुदेव दत्त… च्या नामघोषाने लक्ष्मीबाई दगडूशेठ दत्तमंदिराचा परिसर दुमदुमून गेला. त्याचवेळी दत्तचरणी हजारो भाविक मनोभावे नतमस्तक होत होता. 

श्रीमती लक्ष्मीबाई दगडूशेठ हलवाई दत्तमंदिर ट्रस्ट आणि अखिल भारतीय त्रिपदी परिवार तर्फे या कार्यक्रमाचे आयोजन बुधवार पेठेतील दत्तमंदिरासमोरील उत्सव मंडपात दत्तजयंती उत्सवाचे शुभारंभानिमित्ताने करण्यात आले होते. मंदिराचे यंदा १२५ वे स्थापना वर्ष आहे. यावेळी अखिल भारतीय त्रिपदी परिवाराचे प्रमुख प.पू.बाबा महाराज तराणेकर (इंदोर), जगत् गुरू श्री तुकारम महाराज संस्थान देहूचे विश्वस्त ह भ प शिवाजी महाराज मोरे तसेच दत्तमंदिर ट्रस्टचे कार्यकारी विश्वस्त अ‍ॅड. शिवराज कदम जहागिरदार, उत्सवप्रमुख अ‍ॅड.रजनी उकरंडे, उत्सव उपप्रमुख युवराज गाडवे, विश्वस्त डॉ. पराग काळकर, राजू बलकवडे, अक्षय हलवाई यांसह विविध क्षेत्रातील मान्यवर उपस्थित होते. घोरात्कष्टात मंत्र पठणातून लोकमंगल व्हावे, अशी प्रार्थना यावेळी करण्यात आली. 

प.पू.बाबा महाराज तराणेकर म्हणाले, दत्त संप्रदायाची मंदिरे देशभरात आहेत. परंतु श्रीमती लक्ष्मीबाई दगडूशेठ हलवाई दत्तमंदिर हे एकमेव मंदिर आहे जिथे दत्त जयंतीची सुरुवात  लोकमंगलवर्धक घोरात्कष्टातच्या सहस्त्र आवर्तनाने होते. घोरात्कष्टातचे स्तोत्रपठण हे केवळ आपल्यासाठी नाही, तर आपल्या आजूबाजूच्या परिसराच्या शुद्धीकरणासाठीची ही दैवी चिकित्सा आहे. घोरात्कष्टात स्तोत्र हे स्वांत:सुखाय नाही, पर्यावरण शुद्धीकारक अशी ही थेरपी आहे.
एखादी संस्था १२५ व्या वर्षात पदार्पण करते हे त्या संस्थेचे वैशिष्ट्य आहे. त्या संस्थेचे महात्म्य यशस्वीपणे टिकून ठेवणे हे देखील महत्त्वाचे आहे, अशी भावनाही त्यांनी व्यक्त केली.

कार्यकारी विश्वस्त ॲड. शिवराज कदम जहागिरदार म्हणाले, घोरात्कष्टात हे लोकमंगल वर्धक स्तोत्र अत्यंत लोकप्रिय असून अनेक दत्तभक्तांच्या नित्य उपासनेत याचा अंतर्भाव असतो. दत्त जयंतीच्या निमित्ताने सर्व देवता उपासक एकत्र यावे आणि सामुहिक उपासना व्हावी, याकरीता स्तोत्र पठण करण्यात आले. त्रिपदी परिवार पुणे शाखेचे तेजसदादा तराणेकर, हरी मुस्तीकर, सुभाष कुलकर्णी, श्रीरंग लोंढे यांनी आयोजनात सहकार्य केले. उत्सवप्रमुख अ‍ॅड.रजनी उकरंडे यांनी आभारप्रदर्शन केले.

पुणेर:“आर्थिक विषमता देशाच्या विकासाला बाधक आहे. देशातील सर्वसाधारण व्यक्तीना मुख्य प्रवाहात आणून ही विषमता दूर केली जाऊ शकतो. या साठी गुणवत्तापूर्ण शिक्षणाची खूप मोठी गरज आहे. त्यातूनच ही विषमता दूर होऊ शकते. असे मत पुणे येथील गोखले इन्स्टिट्यूट ऑफ पॉलिटिक्स अ‍ॅण्ड इकॉनॉमिक्सचे कुलगुरू डॉ. अजित रानडे यांनी व्यक्त केले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे, भारत आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत आयोजित २७वी तत्त्वज्ञ संतश्री ज्ञानेश्वर-तुकाराम स्मृती व्याख्यानमालेत ‘राष्ट्रीय शिक्षण धोरण’ या विषयावर आयोजित तिसरे पुष्प गुंफतांना प्रमुख पाहुणे म्हणून ते बोलत होते.
अध्यक्षस्थानी विश्वशांती केंद्र (आळंदी), माईर्स एमआयटी, पुणेचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड होते.
तसेच एमआयटी वर्ल्ड पीस युनिव्हर्सिटीचे कुलगुरू डॉ. आर.एम.चिटणीस, डॉ. मिलिंद पात्रे, डॉ. अंजली साने व डॉ. शालिनी शर्मा उपस्थित होते.
डॉ. अजित रानडे म्हणाले,“जागतिक स्तरावर पाहता इंग्लंड, जर्मन या सारख्या देशात आर्थिक विषमता दूर झालेली आहे. पण भारतात पाहता आज ही ८२ टक्के लोक हे दारिद्र रेषेखाली जीवन व्यतीत करतांना दिसत आहेत. देशातील २० टक्के श्रीमंत लोक सत्ता चालवितांना दिसत आहे. त्यामुळे अशी विषमता घालविणे गरजेचे असून व्यक्तींचा आर्थिक स्तर उंचाविणे गरजेचे आहे. लोकांना सामाजिक व आर्थिक प्रवाहाच्या मुख्यधारेत आणावयाचे असेल तर गुणवत्तापूर्ण शिक्षण देणे हेच एकमेव शस्त्र आहे.”
“राष्ट्रीय उत्पन्नाचा सर्व समाजाला उपयोग होतो. समाजामध्ये वाढत्य विषमतेमुळे अस्थिरता निर्माण होते. परंतू आपला समाज अध्यात्म, मूल्य आणि नैतिकता यामुळे टिकून आहे. राजकीय समानतेमध्ये सर्वांना एक समान मतदानाचा अधिकार आहे. परंतू सामाजिक आणि आर्थिक विषमतेमध्ये अशी समानता दिसून येत नाही. परंतू राष्ट्रीय उत्पन्न वाढले तर समानता येऊ शकेल.”
प्रा.डॉ. विश्वनाथ दा. कराड म्हणाले,“ मानवाने स्वतःचे खरे स्वरूप ओळखण्याचा प्रयत्न करावा. ज्ञानेश्वरीमध्ये सुद्धा काही वैज्ञानिक शब्दांचा उल्लेख आहे. त्याचा अर्थ समझून घेऊन आपले जीवन व्यतीत करावे. वर्तमानकाळात कुटुंब पद्धत ही हळूहळू विस्कळीत होतांना दिसत आहे. त्यासाठी मुलांना आई वडिलांचे प्रेम मिळणे हे अत्यंत महत्वाचे आहे. देह, बुद्धि, आत्मा आणि मनाचे गणित समजून घेणे आवश्यक आहे.”
तत्पूर्वी सकाळच्या सत्रात प्रेरणादायी वक्ता डॉ. संजय उपाध्ये व डीआरडीओचे रिसर्च अँण्ड डेव्हलपमेंटचे संचालक प्रदिप कुरळकर यांनी आपले विचार मांडले.
प्रदिप कुरळकर म्हणाले,“देशातील प्रगत शस्त्रांमुळेच आज येथील सैनिकांन शारीरिक आणि मानसिक बळ मिळते. या शस्त्रसाठ्यांमुळेच कोणत्याही देशाची वाईट नजर आपल्याकडे वळत नाही. वर्तमान काळात डीआरडीओच्या माध्यमातून आर्मिसाठी वेगवेगळे वेपन्स आणि त्यांना वेगवेगळ्या वातावरणात राहण्यासाठीचे साहित्य उपलब्ध करून दिले जात आहे. डीआरडीओच्या माध्यमातून आवाजा पेक्षा ६ पट गतिेचे मिसाइल, सॅटेलाइट, सूपर सॉनिक मिसाइल, ब्रह्मास्त्र मिसाइल, आकाश मिसाइल आणि समुद्रापासून केवळ ७ फूट उंचीवरून जाणरे मिसाइल हे आपली शक्ती आहे. यामुळे जगभरात आपला दबदबा असल्याचे ही त्यांनी सांगितले.”
प्रा.डॉ. आर.एम.चिटणीस यांनी स्वागत पर भाषण केले.
प्रा. डॉ.पोर्णिमा बागची यांनी सूत्रसंचालन केल. प्रा.डॉ. अंजली साने यांनी आभार मानले.

पुणे :  शाळेतील मुलांना छत्रपती शिवाजी महाराज अवगत व्हावेत, त्यांचे कर्तृत्व समजावे यासाठी नवीन अभ्यासक्रमात छत्रपती शिवाजी महाराजांच्या इतिहासाचे धडे समाविष्ट करण्याचा निर्णय घेऊ, असे प्रतिपादन उच्च व तंत्र शिक्षण मंत्री तथा पालकमंत्री चंद्रकांतदादा पाटील यांनी आज केले.

पुणे महानगरपालिका आणि श्री शिवाजी राजगड स्मारक मंडळ पुणे यांच्या संयुक्त विद्यमाने छत्रपती शिवाजी महाराजांच्या आग्य्राहून किल्ले राजगड येथे सुखरुप परतल्याच्या ३५६ व्या सुटका स्मृतीदिनानिमित्त पुण्यातील लाल महाल येथे लाक्षणिक पालखीचे प्रस्थान सोहळ्याचे आयोजन करण्यात आले होते. या लाक्षणिक पालखीचा   प्रस्थान शुभारंभ लाल महालातून पालकमंत्री श्री.पाटील यांच्या हस्ते करण्यात आला, त्यावेळी ते बोलत होते. राजमाता जिजाऊ यांच्या प्रतिमेचे पूजन त्यांनी यावेळी केले.

या कार्यक्रमाला महापालिकेचे अतिक्रमण विभागाचे उप आयुक्त माधव जगताप, व्याख्याते डॉ. अजित आपटे, शिवसृष्टी पुणेचे जगदीश कदम, श्री शिवाजी राजगड स्मारक मंडळाचे संस्थापक अध्यक्ष वसंतराव प्रसादे, अध्यक्ष संजय दापोडीकर, सचिव अजित काळे, खजिनदार अनिरुद्ध हळदे, उपाध्यक्ष सुनील बालगुडे आदी उपस्थित होते.

पालकमंत्री श्री. पाटील म्हणाले, नवीन अभ्यासक्रमात ७० टक्के व्यवसाय नोकरीसाठी ३० टक्के महापुरुषांची चरित्रे, योगा, कला इत्यादी अभ्यासक्रमांचा समावेश करण्याचा निर्णय घेण्यात येईल. विद्यार्थांना छत्रपती शिवाजी महाराजांचे जीवन व कार्य  कळण्यासाठी १०० गुणांचा पेपर  ठेवण्यात येईल.

छत्रपतींच्या काळातील विहिरी व तटबंदी अजूनही शाबूत असून त्या काळातील बांधकाम किती चांगले होते ते कळते. आग्र्याला ते जेव्हा अटकेमध्ये होते त्यावेळी स्वराज्यावर आर्थिक संकट आले होते.त्यावेळी त्यांनी तेथील सावकारांकडून अष्टप्रधानांकडे पैसे पुरविले होते. ते त्यांनी सुटकेनंतर व्याजासह परत केले. शिवाजी महाराज एक खरे आर्थिकतज्ञ आणि व्यवहारात चाणाक्ष होते.

छत्रपती शिवाजी महाराजांचा आग्र्याहून सुटकेचा स्मृती सोहळा श्री शिवाजी राजगड स्मारक मंडळ हे सातत्याने ४२ वर्षापासून करीत आहे ही अभिमानाची गोष्ट असल्याचे पालकमंत्री म्हणाले.

असे आहे विविध कार्यक्रमांचे आयोजन

छत्रपती शिवाजी महाराज सन १६६६ रोजी किल्ले राजगड येथे पोहोचले. हा दिवस मागील ४१ वर्षांपासून दोन्ही संस्थांतर्फे साजरा करण्यात येतो. यंदा पालखी प्रस्थान सोहळ्याला उत्सवाचे ४२ वे वर्ष आहे. ३ डिसेंबर रोजी राजगड पायथा पाली गाव खंडोबाचा माळ येथे सायंकाळी गड जागरण कार्यक्रम होणार आहे. तसेच राजगडावर पद्मावती माता मंदिर येथे व्याख्याते योगेश पाटील यांचे व्याख्यान होणार आहे. रविवार ४ डिसेंबर रोजी किल्ले राजगड येथे वंशपरंपरेनुसार गडकरी असलेले सूर्यकांत भोसले यांच्या हस्ते सुर्योदयाच्यावेळी ध्वजारोहण होणार आहे. यानंतर सकाळी ९ वाजता पाली दरवाजा ते महाराजांच्या सदरेपर्यंत आणि त्यानंतर पद्मावती माता मंदिर येथे पालखी मिरवणूक सोहळ्याचे आयोजन करण्यात आले आहे.

000