• नागरिकांच्या गैरसोयीसह हिंसक आंदोलन नको, अशी भूमिका घेतल्यानेच बदनामीचा प्रयत्न
• रिक्षा चालकांच्या प्रश्नावर महाराष्ट्र रिक्षा पंचायत कायदेशीर मार्गाने लढा उभारणार

पिंपरी / प्रतिनिधी

कायदेशीर मार्गाने लढा उभारून देखील रिक्षा चालकांचे प्रश्न सोडविता येतात. त्यासाठी प्रशासन देखील सहकार्य करत असते. आंदोलन करत असताना नागरिकांची गैरसोय होऊ नये, याची खबरदारी रिक्षा चालकांनी घेतली पाहिजे. ही भूमिका महाराष्ट्र रिक्षा पंचायतची आहे. तसेच रिक्षांची तोडफोड, संप करण्यासाठी जबरदस्ती करून कायदा सुव्यवस्था बिघडवू नये, अशी भूमिका संघटनेने सातत्याने मांडली आहे. शहरातील नागरिकांनी देखील संघटनेच्या या भूमिकेचे स्वागत केले आहे. मात्र काही बोगस प्रतिनिधींनी रिक्षा संघटनांमध्ये प्रवेश करून आंदोलन भरकटवले असल्याचा आरोप महाराष्ट्र रिक्षा पंचायतचे अध्यक्ष बाबा कांबळे यांनी प्रसिद्धीपत्रकाद्वारे केला आहे. काही राजकीय पक्ष देखील स्वतःचा राजकीय स्वार्थ बघण्यासाठी रिक्षा चालकांना वेगळ्या दिशेला घेऊन जात आहेत. संघटनेसह वैयक्तिक मला बदनाम केले जात आहे. हे बोगस प्रतिनिधी रिक्षा चालकांना संकटात टाकून कायद्याच्या कचाट्यात सापडण्यास भाग पाडत आहेत. रिक्षा चालकांनी अशा बोगस प्रतिनिधींचा डाव उधळवून लावावा, असे आवाहनही बाबा कांबळे यांनी केले.

बाबा कांबळे यांनी दिलेल्या प्रसिद्धीपत्रकात नमूद केले आहे की, विविध मागण्यांसाठी रिक्षा चालकांनी रिक्षा बंदची हाक दिली होती. रिक्षा चालकांच्या हितासाठी महाराष्ट्र रिक्षा पंचायत देखील या आंदोलनात सक्रिय सहभागी झाले. त्यामुळे पुणे पिंपरी चिंचवड शहरात रिक्षा बंदला शंभर टक्के प्रतिसाद मिळाला. हे आंदोलन कायदेशीर मार्गाने होणे गरजेचे असल्याचे वारंवार संघटनेच्या माध्यमातून सांगत आलो आहे. आंदोलन दरम्यान कुठेही गालबोट लागू नये यासाठी आवाहन करत होतो. मात्र काही रिक्षा संघटनांच्या प्रतिनिधींनी आक्रमक पवित्रा घेत तोडफोड करण्याची भूमिका घेतली. पिंपरी चिंचवड व पुण्यात जबरदस्तीने रिक्षा बंद करण्यात आल्या. काही ठिकाणी तोडफोडीच्या घटना घडल्या. तसेच काही राजकीय पक्षाच्या रिक्षा संघटना आपल्या राजकीय विरोधकांची कोंडी करण्यासाठी रिक्षा चालकांचा दुरोपयोग करत आहेत. रिक्षा चालकांना चुकीच्या मार्गाला घेऊन जात आहेत. त्यामुळे आंदोलनादरम्यान अनेक रिक्षा चालकांवर पोलिसांनी गुन्हे देखील दाखल केल्याच्या घटना घडल्या. ही बाब लक्षात” येताच महाराष्ट्र रिक्षा पंचायतच्या वतीने चुकीच्या गोष्टींना विरोध केला असल्याचे बाबा कांबळे म्हणाले. लोकशाहीमध्ये कायदेशीर मार्गाने लढा दिल्यास यश मिळते ही भूमिका मांडली. तोडफोडीचा मार्ग योग्य नसल्याचे सातत्याने सांगितले. आपल्याच रिक्षा चालक असणाऱ्या बांधवांना न्यायालयीन प्रक्रियेत अडकविणे योग्य नसल्याचे सांगितले. आधीच कर्ज, महागाई, चुकीच्या प्रवासी कंपन्यांच्या वाहतुकीमुळे रिक्षा चालक बेजार आहे. त्यात चुकीच्या लोकांमुळे रिक्षा चालकांना आणखीन खड्डयात टाकण्याचे काम करण्यात आले. महाराष्ट्र रिक्षा पंचायतने चुकीच्या लोकांचे मनसुबे ओळखून विरोध केला. त्यामुळेच संघटना व वैयक्तिक बदनामी सुरु केल्याचा आरोप बाबा कांबळे यांनी केला.

रिक्षा चालकांना गुन्ह्यातून वगळा –

काही रिक्षा संघटना रिक्षाचे हॅन्डल लॉक करून रिक्षा रस्त्यामध्येच सोडून द्यायला भाग पाडत होते. असे आंदोलन करणाऱ्या रिक्षा चालकांवर गुन्हे दाखल करण्यात आले आहे. या गोष्टी न करण्याची भूमिका महाराष्ट्र रिक्षा पंचायतने मांडली आहे. अशी भूमिका घेतल्याने रिक्षा चालकांच्या समितीमधून बाहेर काढले असल्याचे काही संघटना सांगत आहेत. असे असेल तर ज्या रिक्षा चालकांवर गुन्हे दाखल झालेत त्यांना आता गुन्ह्यातून वगळा असे आवाहनही बाबा कांबळे यांनी केले आहे.

समितीतून बाहेर पडलो तरी लढा सुरूच –

रिक्षा चालकांना बळीचा बकरा बनविण्याचे काम काही संघटना करत आहेत. हे चुकीचे आहे. नागरिकांची गैरसोय होईल अशी भूमिका काही चुकीच्या रिक्षा संघटनांचे बोगस प्रतिनिधी घेत आहेत. तोडफोडीचा मार्ग अवलंबून कायदा सुव्यवस्था बिघडवणे हा रिक्षा संघटनांच्या आंदोलनाचा मुख्य उद्देश नाही. त्याला महाराष्ट्र रिक्षा पंचायत कधीच पाठिंबा देणार नाही. काही चुकीची माणसे रिक्षा संघटनांच्या समितीत दाखल झाल्याने महाराष्ट्र रिक्षा पंचायत समितीमधून बाहेर पडत असल्याचे मी स्वतः जाहीर केले आहे. समितीमधून बाहेर पडलो असलो तरी रिक्षा चालक, मालक यांच्या मागणीसाठी, प्रश्नांसाठी कायदेशीर मार्गानेच लढा उभारून यश मिळवून देऊ, असे बाबा कांबळे म्हणाले. ज्यांना ही भूमिका योग्य वाटते त्या रिक्षा चालक बांधवांनी साथ द्यावी, असे आवाहन बाबा कांबळे यांनी केले.

‘सेव्ह द बेबीज’ उपक्रमांतर्गत पुढाकार

पुणे :

रोटरी क्लब ऑफ पुणे एअरपोर्टच्या वतीने ससून हॉस्पिटलच्या बालरोग शस्त्रक्रिया विभागाला ५० लाखाची अद्ययावत वैद्यकीय उपकरणे प्रदान करण्यात आली.

‘सेव्ह द बेबीज’ उपक्रमांतर्गत ग्लोबल ग्रॅण्टद्वारे पुढाकार घेऊन रोटरी क्लब ऑफ पुणे एअरपोर्ट रोटरी डिस्ट्रिक्ट ३१३१,रोटरी क्लब ऑफ पुणे वेस्ट,रोटरी क्लब ऑफ पूना डाऊन टाऊन,रोटरी क्लब ऑफ मियामी एअरपोर्ट,रोटरी क्लब ऑफ समरव्हिल आणि देणगीदारांच्या मदतीने हा प्रकल्प मार्गी लावला.या देणगीदारांमध्ये अल्काईल अमाईन्स केमिकल्स प्रा.लि.श्रीमती कुंज छुगानी,दादा फायरवर्क्स,लाईफ इन्स्पिरेशन एडव्हायझरी,ललिता भोसले एन्डोन्मेन्ट फंड,दिनेश श्रॉफ,समीर थवानी,मीरा भवनानी आदींचा समावेश आहे.

अद्यावत शस्त्रक्रिया विभागाचे उदघाटन बी जे मेडिकल महाविद्यालयाचे अधिष्ठाता डॉ विनायक काळे,बालरोग शस्त्रक्रिया विभागप्रमुख डॉ दशमीत सिंग,अल्काईल अमाईन्स केमिकल्सचे उपाध्यक्ष श्री.अय्यर यांच्या हस्ते झाला.यावेळी रोटरी क्लब ऑफ पुणे एअरपोर्टचे पदाधिकारी उपस्थित होते.ही उपकरणे प्रदान करण्याचा कार्यक्रम २९ नोव्हेंबर रोजी झाला.

या अद्ययावत उपकरणांमध्ये सी आर्म ऑपरेशन टेबल,अनेस्थेशिया वर्कस्टेशन,पेडियाट्रिक सिस्टोस्कोपी युनिट,ब्लड वॉर्मर,पेशंट वॉर्मर,इलेक्ट्रो कॉटरी मशीन,वेसल सिलर आदींचा समावेश आहे.ससून मध्ये दरवर्षी सुमारे १५०० बालकांवर शस्त्रक्रिया करण्याची गरज पडते,ही गरज पूर्ण करण्यासाठी या अद्ययावत उपकरणांची मदत होणार आहे.निवडक खासगी रुग्णालयांकडे असलेली ही उपकरणे या निमित्ताने ससूनमध्ये उपलब्ध झाली आहेत.

पुणे दि.१: समाज कल्याण विभागामार्फत राबविण्यात येणाऱ्या ‘समता पर्व’च्या निमित्ताने सहाय्यक आयुक्त, समाज कल्याण पुणे कार्यालयामार्फत सामाजिक न्याय विभागाच्या सांस्कृतिक सभागृहामध्ये जालिंदर कांबळे यांचे ‘अनुसूचित जाती उत्थान दशा व दिशा’ या विषयावर व्याख्यान आयोजित करण्यात आले.

संविधान विषयक व्याखानांतर्गत आयोजित या कार्यक्रमाला समाज कल्याण विशेष अधिकारी मल्लिनाथ हरसुरे, समाज कल्याण अधीक्षक नंदकुमार राणे उपस्थित होते.

श्री.कांबळे म्हणाले, डॉ. बाबासाहेब आंबेडकर यांनी समाजातील वंचित व दुर्बल घटकांसाठी विविध चळवळींच्या माध्यमातून कार्य केले. त्यांनी भारतीय संविधानामध्ये समाजातील वंचित व दुर्बल घटकांसाठी तसेच देशातील सर्वसामान्य नागरीकांना हक्क व अधिकार मिळावेत म्हणून लिखित तरतुद करुन ठेवली आहे. अनुसूचित जाती जमाती व इतर जाती, समाजातील वंचित व दुर्बल घटकांसाठी सामाजिक न्याय व विशेष सहाय्य विभागामार्फत विविध योजना राबविल्या जात असून त्यांचा लाभ जनतेपर्यंत पोहोचविण्यासाठी समाज कल्याण विभाग आणि डॉ. बाबासाहेब आंबेडकर संशोधन व प्रशिक्षण संस्था (बार्टी) प्रयत्न करत असल्याचे त्यांनी सांगितले.

कार्यक्रमाला विद्यार्थी व पालक तसेच सहाय्यक आयुक्त समाज कल्याण पुणे कार्यालयातील अधिकारी, कर्मचारी उपस्थित होते.
0000

पुणे –

कोथरूड पुणे अ.भा. मराठी नाट्य परिषद कोथरूड शाखा व आम्ही कोथरुडकर यांच्या वतीने सोमवार दिनांक ५ डिसेंबर सायंकाळी ५ वाजता विक्रम गोखले याना श्रद्धांजली सभेचे आयोजन अंतरनाद योग केंद्र ,करिष्मा सोसायटी जवळ , हॉटेल वाडेश्वर च्या बाजूला , कर्वेरोड येथे आयोजित करण्यात आली आहे. अशी माहिती कोथरूड नाट्य परिषदेचे अध्यक्ष सुनील महाजन यांनी दिली.
श्रद्धांजली सभेत महाराष्ट्राचे तंत्र व उच्चशिक्षण मंत्री व पुण्याचे पालक मंत्री, आ.श्री. चंद्रकांतदादा पाटील , अभिनेत्री आशा काळे ,विजय फळणीकर , राजस दामले , राज काझी, श्रीराम रानडे , वृषाली गोखले ,अ‍ॅड.अर्चिता मंदार जोशी , निकिता मोघे ,नगरसेविका मंजुश्री संदीप खर्डेकर, आदी मान्यवर मंडळी उपस्थित राहणार आहे.
तरी या श्रद्धांजली सभेत रसिकांनी उपस्थित राहावे असे आव्हान सुनील महाजन, संदीप खर्डेकर , अ‍ॅड मंदार जोशी यांनी केले आहे.

आणखी ३८ महिला भारतात परतण्याच्या वाटेवर

पुणे : आम आदमी पार्टीच्या प्रयत्नामुळे ओमान देशात अडकलेल्या पुणेकर पुजा कसबे यांच्यासह ४२ घरेलू कामगार महिला भारतात परतल्या असल्याची माहिती आम आदमी पक्षाचे राज्य संघटक व पुणे शहर कार्याध्यक्ष विजय कुंभार यांनी आज पत्रकार परिषदेमध्ये दिली.

तसेच अजून ३८ घरकामगार महिलांची भारतात येण्याची प्रक्रिया सुरू असल्याची माहिती देखील त्यांनी दिली. आखाती देशात जाणाऱ्या घर कामगार महिलांची फसवणूक रोखण्यासाठी आम आदमी पार्टी विशेष प्रयत्न करणार असल्याचे देखील विजय कुंभार यांनी सांगितले. या पत्रकार परिषदेला विजय कुंभार यांच्यासोबत आपचे डॉ अभिजीत मोरे, अब्बास खान , निरंजन अडागळे, पूजा कसबे, श्रद्धा गायकवाड यांनी संबोधित केले.

भारतातील एजंटच्या भूलथापांना बळी पडत पुण्यातील पूजा नितीन कसबे या मोठ्या पगाराच्या प्रलोभनाने (महिना ४० हजार रुपये वेतन) ओमान देशात घरकाम करण्यासाठी जुलै २०२२ मध्ये गेल्या. मात्र तिथे गेल्यावर त्यांना त्यांची एजंटने फसवणूक केल्याचे लक्षात आले. महिना ४० हजार रुपयांऐवजी केवळ १०० रियाल म्हणजे सुमारे २०-२१ हजार रुपये प्रति महिना एवढेच वेतन कराराद्वारे ठरल्याची बाब तिथल्या मालकांनी पूजा कसबे यांना सांगितले. या वीस हजार रुपयांच्या बदल्यामध्ये त्यांना कोणतीही विश्रांती अथवा सुट्टीशिवाय दररोज पहाटे ५ ते रात्री ११ वाजेपर्यंत काम करण्यासाठी दबाव टाकला गेला. त्यांचा पासपोर्ट मालकाने जप्त केला. मोठ्या मुश्किलीने ऑगस्ट महिन्यात त्या तेथील मालकाच्या बंगल्यातून पळून भारतीय दूतावासाच्या मस्कत शहरातील एका शेल्टरमध्ये पोहचल्या. या शेल्टरमध्ये त्या तब्बल तीन महिन्याहून अधिक काळ अडकून पडल्या होत्या. या शेल्टरमध्ये सुमारे ८० फसवणूक झालेल्या घरकामगार महिला अडकून पडल्या होत्या. त्यातील काही महिला तर एक- दीड वर्षाहून जास्त काळ अडकल्या होत्या.

ओमान मधील ज्यांच्या बंगल्यामध्ये पूजा कसबे काम करत होत्या ती तेथील एक प्रभावशाली व्यक्ती होती आणि भारतातून घर कामगार महिला ओमानमध्ये आणण्यासाठी त्यांनी खर्च केलेले १००० रियाल म्हणजे सुमारे २,००,००० रुपये ते २,२५,००० रुपये परत केल्यानंतरच त्यांना भारतात जाता येऊ शकेल असे त्यांनी सांगितल्याने पूजा कसबे यांची मोठी पंचाईत झाली होती. पूजा कसबे यांच्या वहिनी श्रद्धा गायकवाड यांनी आम आदमी पक्षाच्या निरंजन आडागळे व डॉ अभिजीत मोरे यांच्याशी संपर्क साधला. त्यांनी विजय कुंभार यांच्याशी याबाबत चर्चा केली. विजय कुंभार यांनी अब्बास खान यांच्या मदतीने ओमान मधील काही प्रभावशाली भारतीय उद्योजकांशी संपर्क साधून त्यांना मदतीचे आवाहन केले. या आवाहनाला सकारात्मक प्रतिसाद देत त्यांनी ओमान मधील पूजा कसबे यांना नोकरी देणाऱ्या मालकाशी प्रत्यक्ष चर्चा केली. या उद्योजकांनी ओमान देशातील स्थानिक राजकीय नेते, अधिकारी यांच्या माध्यमातून पाठपुरावा केला. परिणामी फलस्वरूप म्हणून केवळ पूजा कसबेच नव्हे तर भारतीय दुतावासाच्या मस्कत येथील शेल्टरमध्ये अडकून पडलेल्या ८० पैकी तब्बल ४२ घरेलू कामगार महिला या महिन्यामध्ये भारतात परतल्या आहेत. अजून ३८ घरेलू कामगार महिलांना भारतामध्ये परत पाठवण्याची प्रक्रिया सुरू आहे.

सोमवारी पूजा कसबे या पुण्यामध्ये पोहोचल्यानंतर त्यांनी मंगळवारी आम आदमी पक्षाच्या नाना पेठ येथील कार्यालयाला कुटुंबीयांसहित भेट देऊन कृतज्ञता व्यक्त केली.

पुणे, दि. 30 ः खासदार प्रकाश जावडेकर यांच्या स्थानिक विकासनिधितून दहा शाळांमध्ये ओपन जिमचे साहित्य बसविण्यात येत आहे. कोथरूड येथील विद्या प्रतिष्ठान संचालित श्री सरस्वती विद्यामंदीर आणि वनाझ परिवार शिक्षण मंडळांच्या शाळांमध्ये ओपन जिमचे उद्घाटन जावडेकरांच्या हस्ते आज करण्यात आले.
यावेळी जावडेकर म्हणाले, ‘पंतप्रधान नरेंद्र मोदी यांच्या खेलो इंडिया आणि तंदुरुस्त रहा या मोहिमांमुळे देशभरात खेळाला पोषक वातावरण निर्माण झाले असून, व्यायामाबाबत जनजागृती होत आहे. तब्येत चांगली करण्यासाठी पैसे लागत नाही, तर इच्छाशक्ती लागते. मुलांमध्ये खेळ आणि व्यायामाची आवड निर्माण करण्याच्या उद्देशाने दहा शाळांमध्ये ओपन जिम उभारण्यात येत आहेत. तेरा प्रकारच्या उपकरणांतून विद्यार्थ्यांना वीस प्रकारचे व्यायाम करता येतील.’
यावेळी प्रा. अनिल कुलकर्णी, अनिल व्यास, नारायण आचार्य, दादा ढवान, सुरेश विसपुते, यशवंत कदम, विनोद सकपाळ यांची यावेळी उपस्थिती होती.