अखिल म्हसोबा उत्सव मंडई ट्रस्टच्यावतीने सन्मानाचे आयोजन
पुणे: महिला क्रिकेटमधील धोनी अशी ओळख मिळवलेल्या सोलापूर जिल्ह्यात एका खेड्यातील मुलीची भारतीय महिला क्रिकेट टी२० संघात निवड झाली. आपल्या कर्तृत्त्वाच्या जोरावर सोलापुरातील मिरे ते इंग्लंड असा प्रेरणादायी प्रवास करणाऱ्या महिला क्रिकेटपटू किरण नवगिरे हिचा पुण्यात  सन्मान करण्यात आला.

अखिल म्हसोबा उत्सव मंडई ट्रस्टच्यावतीने महिला क्रिकेटर किरण नवगिरे हिचा सन्मान आझम कॅम्पस येथे करण्यात आला. यावेळी ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव,  नियती जाधव, सुधीर साकोरे, योगेश निकम, शेखर पवार उपस्थित होते. शाल, मानाचा फेटा व सन्मानचिन्ह असे सन्मानाचे स्वरूप होते.

भारतीय महिला क्रिकेट संघ हा इंग्लंड दौऱ्यावर  टी-२० आणि एक दिवसीय सामन्यांची मालिका खेळणार आहे. यामध्ये प्रथमच किरण नवगिरेचा  समावेश करण्यात आला आहे. त्याचबरोबर मार्च २०२३ मध्ये होणाऱ्या आयपीएलमध्ये देखील किरण आपली कामगिरी दाखविणार आहे.

निवृत्ती जाधव म्हणाले, अत्यंत प्रतिकूल परिस्थितीतून वर येऊन महिला क्रिकेट संघात आपली ओळख निर्माण करणाऱ्या किरण नवगिरे या मराठी मुलीला प्रोत्साहन देण्यासाठी या सन्मान सोहळ्याचे आयोजन केले.  किरण नवगिरे यांना पुढील वाटचालीसाठी ट्रस्टच्यावतीने शुभेच्छा.

सन्मानाला उत्तर देताना किरण नवगिरे म्हणाली, छोट्या गावातून आल्यामुळे अडचणी तर येणारच परंतु कुटुंबाचा पाठिंबा असल्यामुळे मला क्रीडा क्षेत्रात करियर करण्यासाठी प्रोत्साहन मिळाले. आता पुणे मुंबई सारख्या शहरात मुलांइतकीच मुलींना देखील खेळण्यासाठी सुविधा मिळते. त्यामुळे मुलींनी देखील सकारात्मक भावना मनात ठेवून क्रीडा क्षेत्राकडे करिअर म्हणून बघितले पाहिजे असेही, त्यांनी सांगितले. करिश्मा शेख यांनी सूत्रसंचालन केले.

पुणे दि. २: संविधान दिनाचे औचित्य साधून पर्यटन विभागाकडून उद्या ३ डिसेंबर सह ७ व ८ डिसेंबर रोजी भारतरत्न डॉ. बाबासाहेब आंबेडकर सर्कीट टूर आयोजन करण्यात येणार आहे. याअंतर्गत पर्यटन संचालनालयाच्या पुणे विभागीय पर्यटन कार्यालयाकडून मोफत सहल, बससेवा उपलब्ध करून देण्यात येणार आहे.

या टूर सर्किटमध्ये सिम्बॉयसिस महविद्यालय येथील डॉ. बाबासाहेब आंबेडकर म्युझियम व मेमोरियल, आगाखान पॅलेस आणि तळेगाव दाभाडे येथील डॉ. बाबासाहेब आंबेडकर निवासस्थान या स्थळांचा समावेश आहे.

या सहलीत सहभागी होणारे पर्यटक, नागरिकांना पर्यटन विभागामार्फत गाईड, चहा व अल्पोपाहार या सुविधा उपलब्ध करुन देण्यात येणार आहेत. इच्छुकांनी नाव नोंदणीसाठी ऑपरेशनल एक्झेक्युटिव्ह अजयकुमार कुलकर्णी- भ्रमणध्वनी क्र. 8080035134 यांच्याशी संपर्क साधावा. या मोफत सहलीचा लाभ घेण्याचे आवाहन विभागीय पर्यटन कार्यालयाच्या सहायक संचालक श्रीमती सुप्रिया करमरकर- दातार यांनी केले आहे.

पुणे, दि. २:- संगणक क्षेत्रात दिवसेंदिवस प्रगती होत असतांना या क्षेत्रातील संभाव्य धोके टाळण्यास डॉ. दीपक शिकारपूर यांनी लिहिलेल्या पुस्तकामुळे मदत होईल, असे प्रतिपादन उच्च व तंत्रशिक्षण मंत्री तथा जिल्ह्याचे पालकमंत्री चंद्रकांतदादा पाटील यांनी केले.

जागतिक साक्षरता दिनानिमित्त फर्ग्युसन महाविद्यालयात आयोजित डॉ. दीपक शिकारपूर लिखित ‘डिजीटल तंत्रज्ञानाचे धोके व सावध, सुरक्षित वापर’ पुस्तक प्रकाशन प्रसंगी ते बोलत होते. यावेळी प्रमुख पाहुणे जेष्ठ शास्त्रज्ञ डॉ. विजय भटकर, डेक्कन एज्युकेशन सोसायटीचे अध्यक्ष शरदराव कुंटे, प्रकाशक भालचंद्र कुलकर्णी, फर्ग्युसन महाविद्यालयाच्या उपप्राचार्या स्वाती जोगळेकर आदी उपस्थित होते.

पालकमंत्री पाटील म्हणाले, संगणक युगात प्रगती करीत असतांना तंत्रज्ञानाचे फायद्यासह तोटेदेखील आहेत. राज्यात साध्या गुन्ह्याच्या तुलनेत सायबर गुन्ह्यांचे प्रमाण लक्षणीय आहे. गुन्हे सिद्धतेचे प्रमाणही सायबर गुन्ह्यामध्ये खूपच कमी आहे. संगणक निर्मिती करतांना त्याच्यामध्ये अडचणी निर्माण करण्यामध्ये मेंदू वापरला जातो. या पुस्तकामुळे संगणक युगात निर्माण होणाऱ्या अडचणी कमी करण्यास मदत होईल, असेही श्री. पाटील म्हणाले.

जेष्ठ शास्त्रज्ञ डॉ. भटकर म्हणाले, ‘डिजिटल तंत्रज्ञानाचे धोके व सावध, सुरक्षित वापर’ या पुस्तकामुळे संगणक वापरतांना सावधानता बाळगण्याविषयी माहिती मिळण्यास मदत होईल. संगणक व तंत्रज्ञान या विषयातील शब्द मराठी भाषेतून वृत्तपत्रात आले पाहिजे, या शब्दाचा व्यवहारात वापर केल्यामुळे मराठी भाषा प्रगल्भ होण्यास मदत होईल. संगणक क्रांतीमध्ये अफाट बदल होत असतांना संगणक व तंत्रज्ञान विषयाची माहिती सर्वांना समजेल अशा मायबोली भाषेत उपलब्ध करुन दिल्याबद्दल डॉ. शिकारपूर यांचे त्यांनी अभिनंदन केले.

श्री. कुंटे म्हणाले, आपल्यापुढे सायबर सुरक्षिततेचे गंभीर आवाहन आहे. विद्यार्थ्यांच्या पालकांसोबत बैठक घेवून याविषयी जागृता निर्माण करण्याचे काम फर्ग्युसन महाविद्यालयाच्यावतीने करण्यात येणार आहे. सायबर सुरक्षा विषयाची माहिती शिक्षण क्षेत्रात आणण्याची गरज असल्याचेही त्यांनी सांगितले.

पुणे, दि. २: राज्याचे उच्च व तंत्र शिक्षण मंत्री तथा पुणे जिल्ह्याचे पालकमंत्री चंद्रकांतदादा पाटील यांनी आज पुणे मेट्रो प्रकल्पाला भेट दिली. प्रारंभी शिवाजीनगर येथील भूमिगत मेट्रो स्थानकाची पाहणी केली. नंतर गरवारे कॉलेज मेट्रो स्थानक येथे पाहणी करुन तिकीट घेत वनाज स्थानकापर्यंत मेट्रोने प्रवास केला.

यावेळी आमदार भीमराव तापकीर, माधुरी मिसाळ, सुनील कांबळे, महामेट्रोचे व्यवस्थापकीय संचालक डॉ. ब्रिजेश दीक्षित आदी उपस्थित होते.

पुणे मेट्रोचा पहिला टप्पा मार्च २०२३ पर्यंत पूर्ण होण्याचा पालकमंत्र्यांना विश्वास
पाहणीप्रसंगी श्री. पाटील म्हणाले, शहराची वाढती गरज पाहता आपण रस्ते, उड्डाणपूल आदी प्रकल्प करत आहोत. परंतु, मेट्रोचे काम पूर्ण झाल्यावर शहरातील गर्दी मेट्रोमध्ये स्थलांतरीत होईल. पुणे मेट्रोचे काम गतीने सुरू असून ३३ कि.मी.चा पूर्ण एक टप्पा मार्च २०२३ पर्यंत महामेट्रोकडून पूर्ण करण्यात येईल.

पुढच्या तीन टप्प्यांनाही गती देण्यात येईल. त्यातील २ टप्प्यांचे प्रस्ताव केंद्र शासनाकडे मंजुरीसाठी पाठवण्यात आलेले असून त्याचा स्वत: पाठपुरावा करू असे त्यांनी सांगितले. तसेच तिसऱ्या टप्प्यातील ८५ कि.मी. लांबीच्या मेट्रोचा प्रकल्प अहवाल महानगरपालिका करत आहे. त्यामुळे शहराच्या वाहतूक व्यवस्थेत खूप मोठा सकारात्मक बदल होईल, असेही ते म्हणाले.

प्रवासी वाहतूक गतीने होण्याचे उद्दिष्ट असतानाच प्रत्येक स्टेशन वेगवेगळ्या संकल्पनेनुसार डिझाईन करण्यात आले असल्यामुळे शहराच्या सौंदर्यीकरणातही भर पडेल, असा विश्वास त्यांनी यावेळी व्यक्त केला.

शिवाजीनगर भूमिगत मेट्रो स्थानकाची पाहणी केल्यानंतर पालकमंत्र्यांसमोर डॉ. दीक्षित यांच्यासह पुणे मेट्रोच्या अधिकाऱ्यांनी प्रकल्पाच्या प्रगतीचे संगणकीय सादरीकरण केले.

शिवाजीनगर एसटी बस स्थानकाखाली हे मल्टीमॉडेल एकिकृत भूमिगत स्थानक बनवण्यात आले असून एसटी, रेल्वे स्थानक, पीएमपीएल आणि हिंजेवाडी मेट्रो लाईनशी जोडणी होणार असल्याने प्रवाशांना सर्व वाहतूक सुविधांचा उपयोग घेता येणार आहे. शिवाजीनगर मेट्रो स्थानकाला भेट दिल्यानंतर छत्रपती शिवाजी महाराजांचा काळ आपल्यासमोर उभा राहील अशा संकल्पनेनुसार या स्थानकाचे डिझाईन करण्यात आले आहे. ऐतिहासिक बांधकामांच्या प्रतिकृतीसारख्या वैशिष्ट्यपूर्ण संरचना या बांधकामात वापरण्यात आल्या आहेत, असे यावेळी अधिकाऱ्यांनी सांगितले.

यावेळी पालकमंत्र्यांना या स्थानकातील प्लॅटफॉर्म, मेट्रो लाईन तसेच विविध सब-वे च्या कामांची प्रगती दर्शवण्यात आली. नंतर श्री. पाटील यांनी गरवारे कॉलेज मेट्रो स्थानकाची पाहणी करुन तिकीट घेऊन वनाज स्थानकापर्यंत मेट्रोतून प्रवास केला.

आज मेट्रोच्या प्रगतीचा आढावा घेतल्यानंतर आपण स्वप्नात आहोत असे वाटते, कल्पनेतील मेट्रो व्यवहारात आली असा अभिप्राय त्यांनी वनाज स्थानकावरील नोंदवहीत नोंदवला.

पिंपरी ! प्रतिनिधी

पिंपरी-चिंचवड मध्ये राज्यभरातील सर्व रिक्षा चालक मालकांची संयुक्‍त कृती समिती स्थापन असून या समितीच्या महाराष्ट्र राज्य अध्यक्षपदी महाराष्ट्र रिक्षा पंचायतचे अध्यक्ष कष्टकऱ्यांचे नेते बाबा कांबळे यांची एकमताने सर्वांनी निवड केली आहे. महासचिव पदी कासम मुलाणी, कार्याध्यक्षपदी वैजनाथ देशमुख यांची नियुक्‍ती करण्यात आली आहे.

पिंपरीत राज्यभरातील रिक्षा चालक-मालक संघटनांच्या प्रतिनिधींची परिषद मोठ्या उत्साहात पार पडली. नांदेड येथील वैजनाथ देशमुख परिषदेच्या अध्यक्षस्थानी होते. राज्यभरातून संघटनेचे प्रतिनिधी मोठ्या संख्येने उपस्थित होते. या वेळी अध्यक्षपदासह इतर पदांच्या निवडीचा ठराव करण्यात आला असल्याचे वैजनाथ देशमुख यांनी प्रसिद्धीपत्रकाद्वारे सांगितले.

या वेळी नरेंद्र गायकवाड (नांदेड) गफारभाई नदाफ (कराड) आनंद तांबे ,बापू भावे (पुणे) रामभाऊ पाटील फिरोज मुल्ला,(सांगली) कासम मुलाणी (मुंबई) आनंद चौरे,रवी तेलरंदे, (नागपुर) राहुल कांबळे ( कल्याण डोंबिवली), तानाजी मासलकर, बाळू फाळके (सोलापूर), शिवाजी गोरे, आशिष देशपांडे (ठाणे), बल्लूर स्वामी (इचलकरंजी) सानी हुमने,अब्बास भाई (चंद्रपूर) आदीसह राज्यभरातून विविध संघटनांचे प्रतिनिधी, रिक्षा चालक-मालक उपस्थित होते.

या वेळी बाबा कांबळे म्हणाले की, रिक्षा चालक मालकांच्या हक्‍कासाठी संपूर्ण आयुष्यभर मी लढा दिला आहे. पुढेही देत राहणार आहे. रिक्षा चालकांच्या समस्या सुटेपर्यंत रस्त्यावरची लढाई लढणार आहे. रिक्षा चालक-मालक बांधवांना चुकीच्या मार्गाला घेऊन जाणे हे मनाला पटणारे नाही कायद्याच्या चौकटीत राहूनच न्यायासाठी लढा दिला आहे. त्यामुळे अनेकांनी मला साथ दिली आहे. स्वर्गीय शरद राव यांनीही कृती समिती स्थापन केली आहे याचे अध्यक्ष स्वर्गीय शरद राव होते त्यांच्या निधनानंतर हे अध्यक्ष पद मला मिळणार होते परंतु त्यावेळेस ते नाकारले होते,
परंतु आज महाराष्ट्रात निर्माण झालेल्या परिस्थितीमुळे आणि सर्वांनी एकमताने ठराव मंजूर केल्यामुळे मी कृती समितीच्या अध्यक्षपदी माझी निवड केली, स्वर्गीय शरद राव यांच्या स्वप्नातील कृती समिती निर्माण करून त्यांचे राहिलेले गुरुवारी सर्व कार्य या समितीच्या मार्फत संपूर्ण करणार असल्याचे बाबा कांबळे म्हणाले. जबाबदारी वाढली असून रिक्षा चालकांचे प्रश्‍न सोडविण्यासाठी दिवसरात्र मेहनत करणार असल्याचेही कांबळे यांनी सांगितले.

समितीतून काही प्रतिनिधींची हकालपट्टी –

ऑटो रिक्षा चालक-मालक संयुक्त कृती समिती, महाराष्ट्र या वेळी करण्यात आली. पुणे येथे रिक्षा चालकांच्या हितासाठी टू व्हीलर विरोधी समिती स्थापन करण्यात पुढाकार घेतला असे बाबा कांबळे म्हणाले. मात्र या समितीमध्ये, बोगस रिक्षा संघटनांचा प्रवेश झाल्यामुळे, ही समिती बरखास्त करण्याचा निर्णय ठराव मंजूर करण्यात आला असल्याचे बाबा कांबळे यांनी सांगितले. या पुढे पुणे शहरातील रिक्षा संघटनेच्या वतीने कृती समितीच्या माध्यमातून बेकायदेशीर टू व्हीलर विरोधीचा लढा लढला जाणार आहे. याला पुणे, पिंपरी चिंचवड मधील सर्व रिक्षा संघटना व रिक्षा चालक मालकांचा देखील पाठिंबा आहे. महाराष्ट्रात काही चुकीची लोक रिक्षा संघटनांचे प्रतिनिधीत्त्व करत आहेत. ते रिक्षा चालकांची दिशाभूल करत आहेत. टू व्हीलर विरोधी समिती समिती स्थापन करून लोकांची फसवणूक काही लोक करत आहेत. २८ नोव्हेंबर रोजी शांतता मार्गाने सुरू असलेल्या आंदोलनाला हिंसक वळण देत रिक्षा चालकांना भडकविण्याचे कामे केली. या मुळे २ हजार ५०० गोरगरीब रिक्षा चालकांवर गुन्हे दखल झाले आहे. याप्रकरणी दोषी असलेल्या बघतोय रिक्षावाला संघटनेचे अध्यक्ष केशव क्षिरसागर व ईतर काही व्यक्तींची समितीतून हकालपट्टी करण्याचा ठराव देखील यावेळी मंजूर करण्यात आला, आहे. या पुढे केंद्र व राज्य सरकारने पुणे येथील टू व्हीलर बाइक विरोधी कृती समितीशी कोणताही व्यवहार करू नये, असा ठराव देखील करून राज्य सरकारला पाठविण्यात येणार असल्याचे बाबा कांबळे यांनी सांगितले.

समितीच्या बैठकीत हा ठराव झाला –

महाराष्ट्रामध्ये सर्व शहरांमध्ये टू व्हीलर रॅपिडो, ओला-उबेरमुळे रिक्षा वाहतुकीला फटका बसला आहे. त्यामुळे त्या विरोधात आंदोलन करणे. रिक्षा चालक मालकांच्या कल्याणकारी महामंडळ स्थापन करण्यासाठी पाठपुरावा करणे. यासह अनेक मागण्यांचा ठराव करण्यात आला.