कझाकिस्तान येथे होणार्‍या स्पर्धेत भारताचे नेतृत्व करणार

पुणे, दि. २९ डिसेंबर :  जम्मू काश्मीर येथे नुकत्याच पार पडलेल्या‘ राष्ट्रीय सॅम्बो चॅम्पियनशिप २०२२’ स्पर्धेत एमआयटी वर्ल्ड पीस युनिव्हर्सिटीचे कर्मचारी पै. दत्तात्रय शिंदे यांनी सुवर्ण पदक मिळवून महाराष्ट्राला मानाचा तुरा मिळवून दिला आहे.  कझाकिस्तान येथे होणार्‍या जागतिक स्तरावरील स्पर्धेत पै. शिंदे हे भारताचे नेतृत्व करणार आहेत. त्यांच्या या यशाबद्दल एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड व कार्याध्यक्ष राहुल विश्वनाथ कराड यांनी शुभेच्छा दिल्यात.
जम्मू काश्मीर येथे  नॅशनल सॅम्बो चॅम्पियनशिप २०२२ ही स्पर्धा संपन्न झाली. या स्पर्धेत २३ राज्यातील १२४० व महाराष्ट्रातून १३७ खेळाडूंनी सहभाग घेतला होता. यात ७१ से ७९ या वजनगटात पै. दत्तात्रय शिंदे यांनी आपली चपळता, बुद्धिमत्ता व वेगवेगळे डावपेच वापरून पंजाब मधील खेळाडूचा पराभव करून सुवर्ण पदकाचे मानकरी ठरले. त्यांच्या या यशाबद्दल सर्वत्र अभिनंदन होते आहे.
प्रशिक्षक संतोष गलांडे व महाराष्ट्र  पोलिस विभागातील डॉ. सुरेश मारकड यांच्या मार्गदर्शनात पै. दत्ता शिंदे पुढील प्रशिक्षण घेत आहेत. शिंदे यांनी आपल्या यशाचे श्रेय हे सचिव कुमार उगाडे व गुंडिबा मदने यांना दिले आहे.
तसेच एमआयटी डब्ल्यूपीयुच्या क्रिडा विभागाचे संचालक प्रा.डॉ. पी.जी.धनवे आणि राष्ट्रीय कुस्ती प्रशिक्षक विलास कथुरे व एमआयटीतील सर्व कर्मचाऱ्यांनी  त्यांच्या भावी यशासाठी शुभेच्छा दिल्या.

पुणे – वाहतूक कोंडीचा प्रश्न सोडविण्यासाठी शहरातील बीआरटी मार्गावरून खाजगी गाड्यांना जाण्याची परवानगी द्यावी, अशी मागणी आमदार सिद्धार्थ शिरोळे यांनी विधानसभेत लक्षवेधी चर्चेत बोलताना आज (गुरुवारी) केली.

पुणे शहराच्या बीआरटी बाबत ही लक्षवेधी सूचना आमदार सुनील टिंगरे यांनी मांडली होती. या लक्षवेधी चर्चेमध्ये आमदार शिरोळे यांनी सहभाग घेतला.

प्रशासन जर बीआरटी बंद करत नसेल तर ज्या खासगी बसगाड्या व अन्य गाड्या पुण्यातून रांजणगाव, हिंजवडी तसेच उपनगरांमधून राष्ट्रीय महामार्गावर जातात अशा खासगी गाड्यांचे मालक-चालक शुल्क भरायला तयार असून त्यांना शुल्क आकारून बीआरटी मार्गांवरून जाण्यास परवानगी द्यावी, असे आ.शिरोळे यांनी सांगितले.

सध्या पीएमपीएमएल ची बसगाडी दर ५ मिनिटाला एक याप्रमाणे बीआरटी मार्गावरून धावत नाही. तसेच दोन बसगाड्यांच्या वेळेमध्ये अंतर सुद्धा जास्त असते. हे लक्षात घेऊन संगमवाडी बीआरटी मार्ग, हडपसर बीआरटी मार्ग, कात्रज बीआरटी मार्ग या मार्गांवर जर खासगी गाड्यांना परवानगी दिली तर पुणे शहराचा बराचसा वाहतूक कोंडीचा प्रश्न सुटेल. यावर मंत्री महोदयांनी विचार करावा, अशी मागणी चर्चेच्या दरम्यान आ.शिरोळे यांनी केली.

यावर उत्तर देताना मंत्री महोदय उदय सामंत म्हणाले, आ.शिरोळे यांची सूचना विचारात घेऊन सबंधित अधिकारी व तज्ज्ञांशी चर्चा करून बीआरटी मार्गांवरून खासगी गाड्या जाऊ शकतात का? आणि याचा त्रास जर नागरिकांना होणार नसेल तर, योग्य तो निर्णय घेण्याच्या सूचना संबंधित समितीला देऊ, असे आश्वासन दिले.

पुणे-अल्पवयीन मुलीचे अपहरण करून तिच्यावर सहा जणांनी सामूहिक बलात्कार केल्याची घटना पुण्यात उघडकीस आली. याप्रकरणी पोलिसांनी सर्व आरोपींना अटक केली आहे. ओम राजू तिंबोळे (रा. जय गणेश कॉलनी, विधाते वस्ती, औंध), जय राजू तिंबोळे, अनिल जाधव, सुनील जाधव, शुभम आणि किरण जावळे (सर्व रा. औंध) अशी अटक करण्यात आलेल्या आराेपींची नावे आहेत. चतु:शृंगी पोलिसांकडून याप्रकरणी बाल लैंगिक अत्याचार प्रतिबंध कायदा तसेच अनुसूचित जाती-जमाती अत्याचार अधिनियमानुसार गुन्हा दाखल केला आहे. पोलिसांनी दिलेल्या माहितीनुसार एका १५ वर्षांच्या मुलीला अनिल जाधव याने चाकूचा धाक दाखवून तिचे अपहरण करून तिच्यावर बलात्कार केला. तसेच तिचे छायाचित्र आपल्या मित्रांना पाठवले. त्यानंतर तिला धमकी देऊन वेगवेगळ्या ठिकाणी नेऊन अत्याचार केले. २३ डिसेंबर रोजी दुपारी तिला एके ठिकाणी बोलावून सहा जणांनी तिच्यावर सामूहिक बलात्कार केला. त्यामुळे घाबरलेल्या मुलीने याबाबत आपल्या आईला माहिती दिली. त्यानंतर आईने मुलीला सोबत घेत पोलिसांत तक्रार दिली. याप्रकरणी आरोपींना अटक करण्यात आली.

पुणे–पुण्यातील वाकडेवाडी परिसरात बुधवारी रात्री आठच्या सुमारास पीएमपीएमएलच्या बसचे ब्रेक अचानक फेल झाले. त्यामुळे या बसने चार ते पाच कार आणि काही दुचाकींना धडक दिली.या घटनेमुळे परिसरात गोंधळ उडाला होता. या अपघातात ४ ते ५ नागरिक जखमी झाले असून त्यांना तातडीने जवळील संचेती रुग्णालयात भरती करण्यात आले, अशी माहिती अग्निशामक दलाने आज दिली आहे.

पीएमपीएमएलची एक बस काल पिंपरीहून पुण्याकडे येत होती. यावेळी अचानक या गाडीचे ब्रेक फेल झाले. यामुळे चालकाचे बसवरील नियंत्रन सुटले. ब्रेक फेल झाल्याने बसने तिच्या समोरील अनेक वाहनांना धडक दिली. यात तीन चार चाकी एक टेम्पो, दोन रिक्षा, दोन दुचाकी आणि एक मोठा ट्रक यांचा समावेश आहे. या आपघातांमुळे मोठा गोंधळ उडाला. येथील नगरिकांनी तातडीने घटनास्थळी धाव घेतली. त्यांनी जखमींना उचलून नेत जवळील दावख्यात दाखल केले. कार मधील मागे बसलेल्या महिलेला संचेती येथे उपचारासाठी दाखल केले आहे. तर दुचाकीवरील जखमी व्यक्तीला जहांगीर रुग्णालयात ऍडमिट करण्यात आले आहे. ही धडक एवढी भयंकर होती की, २०० ते ३०० मीटर परिसरात या बसने नेक वाहनांना धडक दिली. शेवटी पुढे ट्रक आल्याने ही बस थांबली.

या आपघाताची माहिती मिळताच पोलिस घटनास्थळी दाखल झाले. या अपघातात जखमी झालेल्या नागरिकांची नावे समजू शकली नाही. तसेच बस ड्रायव्हर व कंडक्टरचे नाव समजू शकले नाही.शिवाजीनगर पोलिसांनी या प्रकरणी गुन्हा दाखल केला असून याबाबत ते पुढील तपास करत आहे.

नववर्षाच्या पूर्व संध्येला ३० व ३१ डिसेंबर विश्वराजबाग, पुणे येथे

पुणे, दि. २८ डिसेंबर : विश्वशांती केंद्र (आळंदी), माईर्स एमआयटी, पुणे भारत तर्फे शुक्रवार,  दि. ३० व शनिवार, दि. ३१ डिसेंबर २०२२ रोजी सायंकाळी ५.१५ ते रात्री ९.३० वाजेपय विश्वशांती गुरुकुल, विश्वराजबाग, लोणी काळभोर, पुणे येथे ‘एमआयटी सांस्कृतिक संध्या’ संगीत महोत्सवाचे आयोजन करण्यात आले आहे.
दोन दिवस साजरा होणार्‍या ‘एमआयटी सांस्कृतिक संध्या’ संगीत महोत्सवाचे उद्घाटन शुक्रवार, दि. ३० डिसेंबर २०२२ रोजी सायंकाळी ५.१५ वाजता सुप्रसिध्द सूरबहार वादक पुष्पराज कोष्टी यांच्या शुभ हस्ते होणार आहे. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड हे असतील. यावेळी माईर्स एमआयटी पुणेचे अध्यक्ष प्रा.डॉ. मंगेश तु. कराड व कार्यकारी अध्यक्ष राहुल विश्वनाथ कराड देखील उपस्थित राहतील.
अत्यंत निसर्गरम्य व सुंदर अशा परिसरात होणार्‍या या संगीत महोत्सवामध्ये कामिका दत्ता, विनय मुंढे, श्रेयसी पावगी , पं. उद्धवबापू आपेगांवकर, पं.सूर्यकांत गायकवाड, पं. तेजस उपाध्ये, श्रीमती गोदावरीताई मुंडे व पं.उप्रेन्द्र भट तसेच एमआयटी विश्वशांती संगीत कला अकादमीचे आजी माजी विद्यार्थी आपली कला सादर करतील. या कार्यक्रमाची सुरुवात  श्री. तुकाराम दैठणकर यांच्या सनई वादनाने  होईल.
 भारतीय संस्कृती व परंपरेनुसार चैत्र शुध्द प्रतिपदा ‘गुढी पाडवा’ हाच खर्‍या अर्थाने नववर्ष दिन म्हणून ओळखला जातो. तथापि, ३१ डिसेंबरचा दिवस हा नववर्ष दिनाची पूर्वसंध्या म्हणून वेगळ्याच पाश्चात्य स्वरूपातील जल्लोषात भारतात व जगभरात साजरा केला जातो. परंतु, विश्वशांती केंद्र (आळंदी), माईर्स एमआयटी, पुणे आणि विश्वशांती संगीत कला अकादमी, पुणे या संस्थेच्या माध्यमातून आपल्या संपूर्ण समाजामध्ये व विशेष करून तरूण वर्गाच्या मनामध्ये ‘स्वधर्म, स्वाभिमान व स्वत्व’ जागवून खर्‍या अर्थाने ‘भारतीय अस्मिता’ जागविण्याचा संस्थेचा एक विनम्र प्रयत्न आहे. ‘एमआयटी सांस्कृतिक संध्येच्या’ कार्यक्रमातून ‘संगीताच्या साधनेतून ईश्वर दर्शन व शांत रसाची अनुभूती’ देणारा एक आगळावेगळा अलौकिक आविष्कार सर्व जाणकार रसिकांना मंत्रमुग्ध करेल.
        विश्वशांती गुरुकुल येथील विश्वराज बंधार्‍याच्या विस्तीर्ण जलाशयात उभारलेल्या मंदिर स्वरूपी  श्री महासरस्वती, श्री महालक्ष्मी व श्री महाजलदेवता या तीन विशेष मंचावरून शांतरसाची अनुभूती देणारा ‘एमआयटी सांस्कृतिक संध्या’ विशेष कार्यक्रम दरवर्षी ३० व ३१ डिसेंबर रोजी मोठ्या उत्साहात साजरा केला जातो.
दि. १ जानेवारी १९२३ रोजी सुरू होणार्‍या नव्या वर्षाची ही अभिनव सुरूवात भारतीय संस्कृतीला अनुसरून नामवंत, तसेच तरुण गायक व संगीतकार यांच्या सादरीकरणातून होणार आहे. एमआयटी  सांस्कृतिक  संध्येचा  समारोप दि. ३१ डिसेंबरच्या मध्यरात्री, त्याग व  समर्पणाचे  प्रतीक  असलेल्या यज्ञकुंडामध्ये काम, क्रोध, लोभ, मोह, मद व मत्सर, विकार, विकृती व विकल्प सारख्या दुर्गुणांची आहुती देऊन, स्वत:चे आणि संपूर्ण समाजाचे पुढील २०२३ हे वर्ष अत्यंत सुखाने, समाधानाने व शांततेने पार पडावे यासाठी प्रार्थना करून संकल्प सोडला जाईल.
हया अनोख्या संगीत समारोहाची सुरूवात २००७ साली करण्यात आली होते. एमआयटी संगीत संस्थेचे यंदाचे हे १५ वे वर्ष आहे.     या  सांस्कृतिक  संध्येच्या  कार्यक्रमात  सहभागी  होऊन  नादब्रह्मस्वरूपी ‘संगीताच्या साधनेतून ईश्वर दर्शन व शांत रसाची अनुभूती’ घ्यावयाची असेल, त्यांनी  या  कार्यक्रमात  सहभागी व्हावे, असे  विनम्र आवाहन संयोजकांतर्फे करण्यात आले आहे.
     अशी माहिती विश्वशांती संगीत कला अकादमीच्या कार्यकारी संचालिका सौ. ज्योती ढाकणे, सौ. सुनिता कराड आणि महासचिव श्री.आदिनाथ मंगेशकर यांनी दिली.

अमनोरा-पीवायसी एचटीबीए कप बॅडमिंटन स्पर्धा ; हवेली तालुका बॅडमिंटन संघटना आणि पीवायसी  हिंदू जिमखाना क्लब यांच्या संयुक्त विद्यमाने आयोजन
पुणे : हवेली तालुका बॅडमिंटन संघटना (एचटीबीए) आणि पीवायसी हिंदू जिमखाना क्लब यांच्या संयुक्त विद्यमाने आयोजित अमनोरा-पीवायसी एचटीबीए बॅडमिंटन कप अजिंक्यपद स्पर्धेत आद्य पारसनीस, कृष्णा जसूजा, अनन्या गाडगीळ, ओजल रजक यांनी आपापल्या प्रतिस्पर्ध्यावर मात करून १७ वर्षांखालील गटाच्या अंतिम फेरीत प्रवेश केला.
पीवायसी हिंदू जिमखान्याच्या बॅडमिंटन कोर्टवर ही स्पर्धा सुरू आहे. या स्पर्धेतील १७ वर्षांखालील मुलांच्या एकेरीच्या उपांत्य फेरीत दुसऱ्या मानांकित आद्य पारसनीसने क्रिश खटवडला १५-११, १५-१२ असे नमविले. आता आद्यची विजेतेपदासाठी कृष्णा जसूजाविरुद्ध लढत होईल. दुसऱ्या उपांत्य लढतीत कृष्णाने अग्रमानांकित सार्थक पाटणकरला १५-११, ८-१५, १६-१४ असा पराभवाचा धक्का दिला. यानंतर १७ वर्षांखालील मुलींच्या गटाच्या उपांत्य फेरीत अग्रमानांकित अनन्या गाडगीळने सानिका पाटणकरला १५-८, १५-५ असे, तर ओजल रजकने दुसऱ्या मानांकित आंचल जैनला १५-११, १५-७ असे नमविले.

निकाल : १५ वर्षांखालील मुले दुहेरी : उपांत्य फेरी : आदित्य शिंदे – सिद्धार्थ भोसले वि. वि. कृष्णनील गोरे-ओजस जोशी १५-१०, १५-९; कोणार्क इंचेकर-सार्थक पाटणकर वि. वि. ध्रुव निकम-ओजस सोरटे १५-१२, १५-९.

१५ वर्षांखालील मुली दुहेरी : उपांत्य फेरी : जुई जाधव-यशस्वी काळे वि. वि.आर्या कुलकर्णी -सुखदा लोकापुरे १५-६, १५-८; शरयू रांजणे-सोयरा शेलार वि. वि. भक्ती पाटील-नव्या रांका १७-१५, १५-११.

१७ वर्षांखालील मुले दुहेरी : उपांत्य फेरी : आद्य पारसनीस -कृष्णा जसूजा वि. वि. ऋषभ चोरडिया – स्पर्श दुआ १५-९, १५-१३; क्रिश खटवड-वेदांत सरदेशपांडे वि. वि. हर्षित सूर्यवंशी -वेदांत कुंडे १५-७, १५-४.

१७ वर्षांखालील मुली दुहेरी : उपांत्य फेरी : राधा पाठक-सुखदा लोकापुरे वि. वि. सिमरन डिंग्रा-सिया रासकर १५-११, ४-१५, १५-१२; अदिती गावडे-जिज्ञासा चौधरी वि. वि. शरयू रांजणे – सोयरा शेलार १५-८, १५-५.

१७ वर्षांखालील मिश्र दुहेरी : उपांत्य फेरी : व्यास खोंडे-सिमरन धिंग्रा वि. वि. आदित्य कदम-श्राव्या शिंदे १५-६, १५-३; श्लोक डागा-सिया रासकर वि. वि. ओजस जोशी वि. वि. अद्विका जोशी १६-१४, १५-११.

३५ वर्षांवरील पुरुष एकेरी : उपांत्य फेरी : आदित्य काळे वि. वि. स्वप्नील चौधरी १५-२, १५-३; जयंत पारिख वि. वि. आनंद साबू १५-११, १५-९.

महिला दुहेरी : उपांत्य फेरी : सोनिया तापकीर -योगिता साळवे वि. वि. खुशी सुवर्णा -सई नांदुरकर १५-१०, १५-१३; अदिती काळे-रिया कुंजिर वि. वि. अदिती रोडे- लीना ढापरे १५-१३, १५-१०.

मिश्र दुहेरी : उपांत्य फेरी : अजित कुंभार-रिया कुंजिर वि. वि. सोहन नावंदर – सारिका गोखले १५-७, १५-९; नरेंद्र पाटील-सानिया तापकीर वि. वि. नरेंद्र गोगावले – अदिती गायकवाड १५-११, १५-११.

उज्वल केसकर यांनी भाजपाला बिनकामाची सूचना करण्याची गरज नाही- माजी नगरसेवक धनंजय जाधव

पुणे- भाजपा शहर उपाध्यक्ष आणि प्रवक्ता असलेल्या माजी नगरसेवक धनंजय जाधव यांनी ‘शहर अध्यक्ष बदला ‘अशी मागणी करणाऱ्या,भाजपच्या माजी विरोधी पक्षनेत्यावर टीकेची झोड उठविली आहे.केसकर यांनी मुरलीधर मोहोळ आणि आमदार शिरोळे या दोहोंची नावे सुचवत यांना भाजपचे शहर अध्यक्ष करा अशी मागणी ‘काही’ माध्यमांद्वारे केली होती धनंजय जाधव यांनी असे म्हटले आहे कि,’.उज्वलजी, भाजपा पुणे शहरात कोणतेही गटबाजी नाही पण काही अल्पसंतुष्ट लोकं गटबाजी असल्याचे लोकांना भासवतात.भारतीय जनता पार्टी कडे अनेक निवडणूक तज्ञ आहेत आपल्या सारख्या स्वयंघोषित नेता आणि निवडणूक विश्लेषकाची गरज नक्कीच नाही.मुळातच उज्वल केसकर आपण भारतीय जनता पार्टीत आहात की नाही हाच प्रश्न आहे.

काही वर्षांपूर्वी केसकर यांच्यावर पक्षाने कारवाई केली होती, मात्र आता कारवीची मुदत संपल्याचे सांगण्यात येते आणि केसकर हे भाजपचे कार्यकर्ते म्हणून पार्टी आणि कार्यक्रमात वावरत आले आहेत.अनेकदा त्यांनी अभ्यासू वृत्तीने महापालिकेच्या आयुक्तांना,प्रशासकांना वेळो वेळी विविध प्रश्नांवर पत्रे दिली आहेत.परंतु अलीकडेच त्यांनी महापालिका जिंकायची असेल तर जगदीश मुळीक यांना शहर अध्यक्ष पदावरून बदलून आमदार शिरोळे किंवा माजी महापौर मुरलीधर मोहोळ यांच्यावर हि जबाबदारी सोपवली पाहिजे असे विधान काही माध्यमांकडे केले.यावरून धनंजय जाधव यांनी हि टीकेची झोड उठविली आहे.

ते म्हणाले,’कोरोनाच्या महामारी मध्ये पुणे शहरांमध्ये भारतीय जनता पार्टीने जगदीश मुळीक त्यांच्या नेतृत्वाखाली अतिशय चांगलं काम केलं.शहरामध्ये होणारे पक्षाचे आंदोलन असो किंवा पक्षाचा मेळावा असो आपल्या नेतृत्व गुणांमुळे यशस्वी करण्याचे काम त्यांनी केलय.आत्तापर्यंत एवढ्या मोठ्या प्रमाणामध्ये पार्टीचं पूर्णवेळ काम करणारा अध्यक्ष हा पुणे शहराला मिळाला नव्हता.तो नेता जगदीश मुळीक यांच्या रूपात भारतीय जनता पार्टी ला अध्यक्ष म्हणून लाभला.
प्रत्येक कार्यकर्त्यांशी संवाद साधून पार्टी वाढवण्याचे काम ते करत आहेत.

भारतीय जनता पार्टी चे अद्यावत आणि भव्य पुणे शहर

कार्यालय त्यांनी सुरू केलं.
येणारी पुणे महानगरपालिका निवडणूक तर उपमुख्यमंत्री देवेंद्र फडणवीस, प्रदेश अध्यक्ष चंद्रशेखर बावनकुळे, पालकमंत्री चंद्रकांतदादा पाटील, खासदार गिरीशभाऊ बापट, खासदार प्रकाश जावडेकर शहरातील सर्व आमदार यांच्या मार्गदर्शनाखाली सर्वांना बरोबर घेउन चालणारे पुणे शहर अध्यक्ष जगदीश मुळीक यांच्या सारख्या नेत्यांच्या नेतृत्वाखाली पुन्हा शंभर पेक्षा जास्त नगरसेवक निवडून येतील आणि पुन्हा भारतीय जनता पार्टीचा महापौर होईल हा विश्वास आहे.
जगदीश मुळीक शहर अध्यक्ष म्हणून नक्कीच हा विजय संपादन करतील.त्यामुळे पुणे शहर भारतीय जनता पार्टीच्या दुधात मिठाचा खडा टाकण्याचा प्रयत्न कोणीही करू नये.