वीज चोरांना 3 वर्षापर्यंत तुरुंगवासाची तरतूद

पुणे : डिसेंबरमध्ये महावितरण पुणे प्रादेशिक विभागात वीज चोरीची 771 प्रकरणे व अनधिकृत वीज वापराची 238 प्रकरणे उघडकीस आलेली आहे. 

मागील महिन्यात वीज चोरीविरुद्ध कडक मोहीम राबविण्यात आलेली असून 7404 वीज जोडण्यांची तपासणी करण्यात आलेली आहे. यात 2 कोटी 55 लाख रुपयांची एकूण 771 वीज चोरीची प्रकरणे उघडकीस आली तर 81 लाख 23 हजार रुपयांची 238 अनधिकृत वीज वापराची प्रकरणे उघडकीस आलेली आहे. यात एकूण 417 प्रकरणात 149 लाख रुपये वसूल करण्यात आलेले आहेत.

पुणे परिमंडळात एकूण दोन हजार 962 वीज जोडण्या तपासण्यात आल्यात. यात अनधिकृत वीज वापराची 144 प्रकरणे व वीज चोरीची 272 प्रकरणे उघडकीस आलेली आहे.

बारामती परिमंडळात एकूण दोन हजार 361 वीज जोडण्या तपासण्यात आल्यात. यात अनधिकृत वीज वापराची 53 प्रकरणे व वीज चोरीची 359 प्रकरणे उघडकीस आलेली आहे.

कोल्हापूर परिमंडळात एकूण दोन हजार 81 वीज जोडण्या तपासण्यात आल्यात. यात अनधिकृत वीज वापराची 41 प्रकरणे व वीज चोरीची 140 प्रकरणे उघडकीस आलेली आहे.

 वीज चोरीविरुद्ध मोहीम अधिक तीव्र करण्याचे निर्देश पुणे प्रादेशिक विभागाचे प्रादेशिक संचालक श्री अंकुश नाळे यांनी दिले आहेत. विद्युत अधिनियम 2003 च्या कलम 135 व 136 नुसार वीज चोरी हा दंडनीय अपराध असून यात आरोपींना 3 वर्षापर्यंत शिक्षेची तरतूद आहे. त्यामुळे ग्राहकांनी वीज चोरीपासून परावृत्त व्हावे, असे महावितरणने आवाहन केले आहे.

पुणे-येत्या ४८ तासांत, नंदुरबार,धुळे जळगाव,नाशिक जिल्ह्यातील काही भागात थंडीची लाट ते तीव्र शीतलहरीची शक्यता असून पुणे,अहमदनगर जिल्ह्यातील काही भागात थंडीची लाट येण्याची दाट शक्यता पुण्याच्या वेधशाळेने वर्तविली आहे, त्याच बरोबर औरंगाबाद,जालना, परभणी,बीड,हिंगोली,नांदेड,लातूर,उस्मानाबाद विदर्भतील काही भागात देखील थंडीची लाट येण्याची शक्यता असल्याचे वेधशाळेचे प्रमुख के एस होसलीकर यांनी म्हटले आहे.

आज सकाळी १० वाजता नोंदविले गेलेले तापमान –

पुणे ८.६, 
बारामती ९.७
औरंगाबाद 5.7
नांदेड 10.2, 
परभणी 9.5
सोलापूर  १२
जळगाव 5 
सांगली 13.1, महाबळेश्वर  11.1, कोल्हापूर  15
सातारा 11.9
उदगीर 10.3
रत्नागिरी 19.5, हरणई 21
नाशिक ८.७
डहाणू 17.3
मालेगाव १२.४
जालना 11
उस्मानाबाद  8.5
मुंबई- 19.4
माथेरान १६.२
ठाणे 21

गोंदीयात मोसमातील सर्वात कमी तापमान

उत्तरेकडून येणाऱ्या थंडगार वाऱ्यांमुळे थंडी परतली आहे. गारठवणाऱ्या थंडीमुळे परत शेकोट्या पेटल्या आहे. गोंदीयात रविवारी या मोसमातील किमान 7.00 अंश सेल्सियस या नीचांकी तापमानाची नोंद करण्यात आली. तर नागपुरात किमान 8.5 अंश सेल्सियस इतके कमी तापमान नोंदवण्यात आले. विदर्भातील तापमानात सरासरी 2 अंशाने घट झाल्याने थंडीने गारठून गेले आहे. मात्र ही थंडी 31 जानेवारीपर्यत राहील. त्या नंतर पूर्वेकडून तसेच दक्षिण-पूर्वेकडून येणाऱ्या वाऱ्यांमुळे थंडी कमी होत जाईल, असे प्रादेशिक हवामान केंद्राच्या सूत्रांनी सांगितले.

दोन अंशांनी घट

पाऱ्यात कमालीची घसरण झाल्यामुळे विदर्भ गारठला आहे. विदर्भात सरासरी 2 अंशाने पारा घसरल्याने थंडीने उसळी मारली आहे. थंडी वाढल्याने स्वेटर, मफलर, कानटोप्या, हातमोजे, जर्कीन घातल्याशिवाय लोक बाहेर निघत नाहीत. सायंकाळी 5 नंतर अंधारायला होते आणि थंडीमुळे गारठायला होते. बोचऱ्या वाऱ्यांमुळे दिवसा ऊन असले तरी गारठायला होते. विदर्भातील तापमानात सातत्याने घट होत असून पुढील पाच दिवस पूर्व उत्तर विदर्भात थंडीच्या लाटेचा इशारा हवामान खात्यासह अभ्यासकांनी दिला आहे. अवघ्या 24 तासात किमान तापमानात सुमारे दोन अंश सेल्सिअसने घट झाली आहे.

नागपुरही गारठले

उपराजधानी नागपुरात आठ अंश सेल्सिअस किमान तापमानाची नोंद करण्यात आली असून गोंदियात सर्वाधिक कमी 6.8 अंश सेल्सिअस किमान तापमानाची नोंद करण्यात आली आहे. तर विदर्भातील जवळजवळ सर्वच शहरात किमान तापमान 10 अंश सेल्सिअसच्या आसपास आहे.

विदर्भातील तापमानाची नोंद

अकोला 10.4, अमरावती 9.9, बुलढाणा 10.0, ब्रम्हपुरी 10.4, चंद्रपूर 10.4, गडचिरोली 9.6, वर्धा 9.9, यवतमाळ 8.5 व वाशिम येथे 11.8 अंश सेल्सिअस तापमानाची नोंद करण्यात आली आहे.

पुणे : महाराष्ट्र कुस्तीगीर परिषद व संस्कृती प्रतिष्ठान आयोजित ६५ व्या ‘महाराष्ट्र केसरी’चा थरार उद्यापासून रंगणार आहे. यापूर्वी ‘महाराष्ट्र केसरी’चे मानकरी ठरलेले पृथ्वीराज पाटील, बाला रफिक शेख व हर्षवर्धन सदगीर हे तिघे पुन्हा एकदा ‘महाराष्ट्र केसरी’ होण्यासाठी आखाड्यात उतरणार आहेत. 
प्रतिस्पर्ध्याशी दोन हात करून चुरशीची लढत देणारे हर्षद कोकाटे, सिकंदर शेख, महेंद्र गायकवाड, माउली जमदाडे, किरण भगत, पृथ्वीराज मोहोळ, शिवराज राक्षे, गणेश जगताप हे यंदाच्या ‘महाराष्ट्र केसरी’साठी प्रमुख दावेदार असणार आहेत. त्यामुळे एका पेक्षा एक सरस पैलवानातून ‘महाराष्ट्र केसरी’ची गदा कोण उंचावणार? याकडे राज्यातीलच नव्हे, तर देशभरातील कुस्तीप्रेमी व कुस्ती क्षेत्राचे लक्ष लागले आहे.
या चर्चेतील प्रमुख लढतींसह एकूण १८ वजनी गटात ९५० पैलवान आपली ताकद अजमावणार आहेत. कुस्ती महर्षी स्वर्गीय मामासाहेब मोहोळ क्रीडानगरीत राज्यभरातून पैलवान दाखल झाले असून, स्पर्धेची तयारी अंतिम टप्प्यात आहे. परिसरात लावलेले फलक, स्वागत कमानी यामुळे कोथरूडच्या परिसर कुस्तीमय झाला आहे.
सकाळी ८ वाजल्यापासून वैद्यकीय तपासणी व ‘अ’ गटातील वजने घेण्यास सुरुवात होईल. दुपारी ४ ते ६ या वेळेत ‘अ’ गटातील माती व गादी विभागातील कुस्त्या होणार आहेत. कुस्तीच्या या महासंग्रामाला मंगळवारी (दि. १०) दुपारी ४ वाजल्यापासून सुरुवात होणार असली, तरी स्पर्धेचे मुख्य उद्घाटन पुण्याचे पालकमंत्री चंद्रकांत पाटील, भारतीय जनता पार्टीचे प्रदेशाध्यक्ष चंद्रशेखर बावनकुळे, महाराष्ट्र राज्य कुस्तीगीर परिषदेचे अध्यक्ष खासदार रामदास तडस, ऑलिम्पक पदक विजेता योगेश्वर दत्त यांच्या हस्ते सायंकाळी ६ वाजता होणार आहे.
‘महाराष्ट्र केसरी’चे प्रमुख संयोजक मुरलीधर मोहोळ मैदानावरील प्रत्येक गोष्टींवर, नियोजनावर बारकाईने लक्ष देऊन मेहनत घेत आहेत. पै. संदीप भोंडवे, पै. योगेश दोडके, तात्यासाहेब भिंताडे, आंतरराष्ट्रीय पंच विलास कथुरे यांच्यासह तालीम संघांचे पदाधिकारी व संयोजन समितीतील सदस्य रात्रंदिवस स्पर्धेच्या यशस्वीतेसाठी परिश्रम घेत आहेत.
विलास कथुरे, दिनेश गुंड यांच्यासह १५० ते २०० पंच स्पर्धेचे परीक्षण करतील. शंकर पुजारी यांच्या ओघवत्या शैलीतील समालोचन ऐकन्याची संधी कुस्तीप्रेमींना आहे. त्यांना तरुण फळीतील उमद्या समालोचकांची साथ मिळणार आहे.

आयआयबी-इन्स्पायर’ कार्यक्रमात विद्यार्थ्यांना मार्गदर्शन
पुणे  : “डॉक्टर, इंजिनिअर होण्याचे ध्येय उराशी बाळगून तुम्ही अभ्यास करत आहात. अशा आव्हानात्मक क्षेत्रात यश मिळवायचे असेल, तर ध्येयासक्ती, अभ्यासातील सातत्य व संघर्षाची तयारी असायलाच हवी. इतर विचार सोडून ध्येयावर लक्ष केंद्रित केल्यास आभाळही ठेंगणे होईल,” असे प्रतिपादन प्रेरणादायी वक्ते, इतिहास अभ्यासक प्रा. नितीन बानगुडे पाटील यांनी केले. ‘आयआयबी इन्स्टिटयूट’ सारखा मार्गदर्शक तुमच्यासोबत असल्यावर यश हमखास मिळणार, असा विश्वासही त्यांनी व्यक्त केला.
आयआयबी पुणे शाखेच्या वतीने ‘आयआयबी-इन्स्पायर’ कार्यक्रमात प्रा. नितीन बानगुडे पाटील हजारो विद्यार्थ्यांच्या समुदायाला मार्गदर्शन करत होते. साधारण चार हजार विद्यार्थी व पालकांनी याचा लाभ घेतला. मोरवाडी येथील मैदानावर झालेल्या या कार्यक्रमावेळी आमदार महेशदादा लांडगे, निवृत्त मुख्य न्यायाधीश एन. एस. लोहारे, कामगार नेते सचिन भैया लांडगे, मा. उपमहापौर तुषार भाऊ हिंगे, माजी उपमहापौर नानी घुले, माजी नगरसेवक समीर मासुळकर, माजी नगरसेवक दिनेश यादव, प्रथम श्रेणी वैद्यकीय अधिकारी डॉ. प्रकाश गुरुतवाड, पिंपरी चिंचवड लघु उद्योजक संघटनेचे अध्यक्ष संदीप बेलसरे यांच्यासह सर्व शिक्षक व शिक्षकेत्तर कर्मचारी उपस्थित होते.

प्रा. नितीन बानगुडे पाटील म्हणाले, “तुम्ही कोण आहात, यापेक्षा कोण होणार आहात, याचा विचार करा. कठोर परिश्रम, सातत्यपूर्ण प्रयत्न आणि चांगले मार्गदर्शन घेण्यावर भर द्या. जितके जास्त कष्ट घ्याल, तितकेच मोठे यश मिळते. कुठलेही काम लहान, अवघड नसते. मनातून आपण खंबीर असलो की, सर्वकाही शक्य होते. मनापासून प्रयत्न कराल, तर नक्की यशस्वी व्हाल. मला डॉक्टर व्हायचे होते; पण योग्य मार्गदर्शन मिळाले नाही. तुम्हाला मात्र आज ‘आयआयबी इन्स्टिटयूट’ सारखी ‘डॉक्टर बनवणारी फॅक्टरी’ तुम्हाला मिळाली आहे. त्यामुळे तुमची जिद्द आणि त्यांची साथ एकत्रित झाली, तर देशाला चांगले डॉक्टर मिळतील.”

गुणवत्तापूर्ण शिक्षण देण्यासाठी त्यांचा व्यक्तिमत्व विकास व्हावा, अभ्यासात त्यांना प्रेरणा मिळावी, या उद्देशाने ‘इन्स्पायर’ हा कार्यक्रम राबविला जातो आहे. १०० टक्के निकालाची शाश्वती घेऊन आयआयबीचा प्रवास सुरु असून, चार विद्यार्थ्यांवर सुरु झालेले हे इन्स्टिटयूट आज नांदेडसह लातूर, पुणे व कोल्हापूर येथे यशस्वीपणे ४० हजार विद्यार्थ्यांना मार्गदर्शन करत असून विद्यार्थ्यांचे नुकसान होऊ देणार नाही, असा विश्वास त्यांनी यावेळी उपस्थित विद्यार्थी व पालकांना दिला  असे संस्थापकीय संचालक संचालक दशरथ पाटील यांनी सांगितले.

ऍड. महेश लोहारे यांनी प्रास्ताविकात सांगितले की, आदरणीय गणेश चौगुले सरांनी विद्यार्थी व पालकांना त्यांच्या स्वप्नपूर्तीसाठी २३ वर्षांपूर्वी एक छोटेसे रोपटे लावले, त्याचे आज वटवृक्षात रूपांतर झाले आहे. चौगुले सरांनी निवृत्ती घेत सक्षम टीमची उभारणी करत विद्यार्थी हित जपत सामाजी बांधिलकी ठेऊन वाटचाल करावी अशा सूचना केल्याचे सांगितले. 

या वर्षीची १० वीमधून ११ वी मध्ये जाणाऱ्या विद्यार्थ्यांची शिष्यवृत्ती परीक्षा येत्या २२ जानेवारीला ऑनलाईन पद्धतीने होईल. त्यामधे गुणवत्तेप्रमाणे विद्यार्थ्यांना १०० टक्क्यांपर्यंत शिषवृती मिळेल. ‘आयआयबी महाफास्ट’ या उपक्रमातून शिष्यवृत्ती परीक्षा घेतली जाणार असून, त्यातून यशस्वी, गरीब व होतकरू विद्यार्थ्यांना अर्थसहाय्य केले जाणार आहे, असे संचालक डॉ. महेश पाटील यांनी नमूद केले.
अल्पावधीतच ‘आयआयबी’ महाराष्ट्राचा महाब्रँड म्हणून ओळख मिळाली असल्याचे सांगत पिंपरी चिंचवड पाठोपाठ आता पुण्यातही आयआयबीची द्वितीय शाखा सुरु झाली असून, पुणे शहरातही डॉक्टर होऊ इच्छिणाऱ्या विद्यार्थ्यांना ‘आयआयबी’चे मार्गदर्शन मिळणार असल्याचे प्रा. वाकोडे पाटील यांनी सांगितले.

पुणे / प्रतिनिधी

बेकायदेशीरपणे सुरु असलेल्या टू व्हीलर, टॅक्सी चालविणाऱ्या कंपन्यांनी न्यायालयात याचिका दाखल केली आहे. मात्र देशभरातील आणि महाराष्ट्र राज्यातील रिक्षा चालक, मालकांचे म्हणणे ऐकल्याशिवाय निर्णय घेऊ नये अशी इंटरप्रिटेशन याचिका उच्च न्यायालयात दाखल केली असल्याची माहिती महाराष्ट्र रिक्षा पंचायतचे अध्यक्ष बाबा कांबळे, पुणे रिक्षा फेडरेशनच्या वतीने आनंद तांबे यांनी पुण्यात झालेल्या पत्रकार परिषदेत दिली. मुंबई उच्च न्यायालयाचे वकील अक्षय देशमुख या बाबत कामकाज पाहत असून पुणे शहरातील व महाराष्ट्रातील सर्व रिक्षा संघटना त्यांना सहकार्य करत असल्याचेही कांबळे आणि तांबे यांनी सांगितले.

या वेळी महाराष्ट्र रिक्षा पंचायत व कृती समितीचे महाराष्ट्र अध्यक्ष बाबा कांबळे, पुणे रिक्षा फेडरेशनचे अध्यक्ष ज्येष्ठ नेते आनंद तांबे, ऍड. वाजिद खान बिडकर, संजय वाल्हेकर मोहन एस के, शिवनेरी रिक्षा संघटनेचे अध्यक्ष अशोक साळेकर, जय महाराष्ट्र रिक्षा संघटनेचे अध्यक्ष गुलाब सय्यद, राष्ट्रवादी रिक्षा संघटनेचे अध्यक्ष विजय रवळे, सावकाश रिक्षा संघटनेचे अध्यक्ष प्रदीप भालेराव, चंद्रकांत गोडबोले प्रकाश झाडे, आप्पा हिरेमठ, अंकुश पवार, दीपक चव्हाण, मुराद भाई काजी, संजय शिंदे या वेळी उपस्थित होते.

यावेळी बाबा कांबळे म्हणाले की, टू व्हीलर टॅक्सी विरोधात पुणे, पिंपरी चिंचवड शहरात सर्व रिक्षा संघटनांच्या वतीने मोठे आंदोलन करण्यात आले. पिंपरी चिंचवड, पुणे शहरात रिक्षा बंद आंदोलन केले. 19 डिसेंबर रोजी पुणे विभागीय आयुक्त कार्यासमोर व महाराष्ट्र सह देशभरात एकाच वेळी धरणे आंदोलन करण्यात आले. आंदोलनानंतर विभागीय आयुक्त सौरभ राव यांच्या सोबत झालेल्या चर्चेनंतर पुणे आरटीओच्या वतीने टू व्हीलर टॅक्सी, रॅपिडो कंपनीवर फसवणुकीचा गुन्हा दाखल केला. त्यांनी टू व्हीलर टॅक्सी परवानगीसाठी मागणी केलेला अर्ज रद्द केला. आता पूर्ण पणे टू व्हीलर टॅक्सी बंद होण्याची वेळ आली असताना टू व्हीलर टॅक्सी कंपनीच्या वतीने मुंबई उच्च न्यायालय मध्ये याचिका दाखल करण्यात आली. मा. उच्च न्यायालय मुंबईमध्ये दाखल झालेल्या याचिकामध्ये न्यायालयाकडून महत्त्वाचे निरीक्षण नोंदवून, सरकारने याबाबत १० तारखेपर्यंत भूमिका स्पष्ट करावे असे आदेश दिले आहेत. याबाबत महाराष्ट्रातील २० लाख रिक्षा चालक-मालकांची भूमिका ऐकल्याशिवाय व रिक्षा चालक मालकांच्या व्यवसायावर कुठल्याही प्रकारे दूरगामी परिणाम करणारे निर्णय घेऊ नये, अशी भूमिका घेत इंटरप्रिटेशन याचिका न्यायालयात दाखल केली आहे. याबाबत 10 जानेवारी रोजी मुंबई उच्च न्यायालयामध्ये निकाल होणार असून यामध्ये आमचे म्हणणे ऐकून घ्यावे असे रिक्षा चालक मालक संघटनांनी याचिकेत नमूद केले आहे. मा. उच्च न्यायालयाच्या महत्त्वपूर्ण निरीक्षणानंतर, रिक्षासह परमिट वाहतूक करणाऱ्या सर्व प्रकारच्या गाड्या त्यामध्ये टुरिस्ट, परवानाधारक, चार चाकी वाहने, बस आदी प्रकारच्या वाहनांमध्ये चिंता निर्माण झाली आहे. नॉन ट्रान्सपोर्ट गाड्यांना वाहतुकीस परवानगी दिली जाईल का काय अशा प्रकारची भावना सर्वांमध्ये निर्माण झाली आहे. यामुळे सर्वच टुरिस्ट व परमिट धारक, चालक मालकांची चिंता वाढली आहे. असे झाल्यास आमच्या व्यवसायाचे काय होईल, असा प्रश्न निर्माण झाला आहे. महाराष्ट्रात २० लाखापेक्षा अधिक टॅक्सी, रिक्षा असून टुरिस्ट परवानाधारक बस टॅक्सी देखील मोठ्या संख्येने आहेत. देशभरातील संख्या 15 कोटी पेक्षा अधिक आहे. नॉन ट्रान्सपोर्ट गाड्यांना परवानगी कोणत्याही प्रकारे मिळणार नाही, यासाठी आम्ही प्रयत्न करत असून आत्तापर्यंत आम्ही रस्त्यावरची लढाई केली आता न्यायालय देखील आम्ही पूर्ण ताकदीनिशी लढु, असे यावेळी बाबा कांबळे म्हणाले.

आनंद तांबे म्हणाले की, रिक्षा, टॅक्सी चालक यांचे हातावरचे पोट आहे. रोज व्यवसाय करणे, कमविणे त्यावर आपल्या घरातील चूल पेटली जाते. मात्र चुकीच्या धोरणांमुळे रिक्षा चालकांचे मोठे आर्थिक नुकसान झाले आहे. आता नुसती रस्त्यावरची लढाई करून चालणार नाही, तर कायदेशीर लढा देखील करावा लागणार आहे. त्यासाठी आम्ही सज्ज झालो असून कायदेशीर निर्णय देखील आम्ही जिंकणार, असा विश्वास व्यक्त केला.

पुणे – अखिल भारतीय कॉँग्रेस कमिटीने कर्नाटक विधानसभा निवडणुकीसाठी तयारी सुरू केली असून प्रत्येक जिल्ह्यात लोकसभा मतदार संघ निहाय ज्येष्ठ नेत्यांची निरीक्षक म्हणून नियुक्ती करण्यात आली आहे. कॉँग्रेस अध्यक्ष मल्लिकार्जुन खरगे यांनी प्रदेश कॉँग्रेसचे वरिष्ठ उपाध्यक्ष, माजी आमदार मोहन जोशी यांची  चिकोडी लोकसभा मतदार संघासाठी निरीक्षक म्हणून नियुक्ती केली आहे. तशा आशयाचे पत्र कॉँग्रेस कमिटीचे सरचिटणीस (संघटन) खासदार के. सी. वेणुगोपाल यांनी पाठविले आहे. 

मोहन जोशी यांनी कॉँग्रेस पक्ष संघटनेमध्ये विविध पदांवर काम केले असून आतापर्यंत 12 राज्यांमध्ये पक्ष संघटनेच्या कामांसाठी प्रभारी म्हणून काम पाहिले आहे.

पुणे, दि. ९: जिल्ह्यातील ग्रामीण भागातील दौंड तालुका वगळता उर्वरित १२ तालुक्यांमध्ये २१८ ठिकाणी रास्तभाव दुकान परवाना मंजूर करण्याबाबत जाहीरनामा प्रसिद्ध करण्यात आला असून परवाना मिळण्यासाठी ३१ जानेवारी २०२३ पर्यंत अर्ज सादर करण्याचे आवाहन करण्यात आले आहे.

रास्तभाव दुकान परवाना मंजूर करण्याबाबतचा जाहिरनामा जिल्हाधिकारी कार्यालयाच्या संकेतस्थळावर https://pune.gov.in वर उपलब्ध आहे. या जाहीरनाम्यात सविस्तर अटी व शर्ती, आवश्यक कागदपत्रांचा तपशील, नमुना फॉर्म आदीबाबतची माहिती समाविष्ट असून संबंधीत तहसील कार्यालयाच्या पुरवठा शाखेत याबाबत संपूर्ण तपशील व कोरे अर्ज उपलब्ध आहेत.

तरी इच्छुकांनी विहित मुदतीत अर्ज करावेत; मुदतीनंतर प्राप्त होणाऱ्या अर्जांचा विचार केला जाणार नाही, असे जिल्हा पुरवठा अधिकारी सुरेखा माने यांनी कळवले आहे.
00000

पुणे स्मार्ट सिटीच्या कामांचा घेतला आढावा

पुणे, दि.9: पुणे स्मार्ट सिटीअंतर्गत कामांचा पालकमंत्री चंद्रकांत पाटील यांनी आढावा घेतला. सर्व कामे कालमर्यादेत व गतीने पूर्ण करण्याच्या सूचना दिल्या. शहरात दुमजली (डबल डेकर) बसेस सुरू करण्यासाठी लवकरात लवकर तयारी पूर्ण करा, असे निर्देश पालकमंत्री श्री. पाटील यांनी यावेळी दिले.

यावेळी आमदार माधुरी मिसाळ, सिद्धार्थ शिरोळे, महानगरपालिका आयुक्त विक्रम कुमार, स्मार्ट सिटीचे मुख्य कार्यकारी अधिकारी डॉ.संजय कोलते, महानगपालिकेच्या सहआयुक्त तथा मुख्य लेखा व वित्त अधिकारी उल्का कळसकर उपस्थित होत्या.

पालकमंत्री श्री. पाटील म्हणाले, शहरातील झाडांची उंची लक्षात घेऊन डबल डेकर बस सुरु करण्याबाबत कार्यवाही सुरु करावी. पायाभूत सुविधा विकास कामे दर्जेदार होतील यावर विशेष लक्ष द्यावे. पुणे अभियांत्रिकी महाविद्यालयाकडून (सीओइपी) होणारे परीक्षण (ऑडीट) योग्यरितीने होत असल्याची खात्री करुन अद्याप अपूर्ण असलेली कामे तातडीने पूर्ण करावीत. सकाळच्या वेळेत उद्यानांमध्ये फिरायला येणाऱ्यांना प्रसन्न वाटावे यासाठी त्याठिकाणी मंद आवाजात संगीत लावावे, अशा सूचनाही त्यांनी यावेळी दिल्या.

स्मार्ट सिटी कॉर्पोरेशन कडून राबण्यात येत असलेले संकल्पनाधिष्ठीत अर्थात थीम बेस्ड उपक्रम, ज्येष्ठ नागरिक पार्क, सायन्स पार्क, ऑगमेंटेड रियालिटी पार्क, शहरातील झाडांची देखभाल, वायफाय सुविधा, ईमर्जन्सी कॉलबॉक्स, स्मार्ट ई-बस, स्ट्रीट लाईट, अत्याधुनिक सिग्नल यंत्रणेची (अडाप्टिव्ह ट्रॅफिक मॅनेजमेंट सिस्टिम) कामे आदींच्या कामाचा आढावा घेण्यात आला. तसेच कामांसाठी आवश्क भूसंपादनविषयक बाबी, महामंडळाच्या आर्थिक बाबींविषयक विचारविनिमयदेखील यावेळी करण्यात आला.

पुणे दि. ९ : दौंड येथे अनुसूचित जाती व नवबौद्ध मुलांची निवासी शाळा व वसतिगृह सुरू करण्यात येणार असून त्यासाठी खासगी इमारत भाड्याने देऊ इच्छिणाऱ्या इमारत मालकांना संपर्क साधण्याचे आवाहन करण्यात आले आहे.

निवासी शाळा व वसतीगृहासाठी प्रत्येकी १० हजार चौरस फुट अशी एकूण २० हजार चौरस फूट क्षेत्रफळ असलेल्या एकत्र अथवा वेगवेगळ्या खाजगी इमारतीची आवश्यकता आहे. या प्रत्येक इमारतींमध्ये प्रवेश क्षमतेनुसार २५ ते ३० खोल्या, १० शौचालये, १० स्नानगृहे, वीज, पिण्याचे पाणी, पाणी साठवणुकीची सोय आदी सर्व पायाभूत सुविधा, तसेच इमारतीच्या भोवती संरक्षक भिंत असावी.

दौंड परिसरातील इच्छुकांनी सहायक आयुक्त समाजकल्याण, डॉ. बाबासाहेब आंबेडकर सामाजिक न्याय भवन सर्व्हेक्षण क्रमांक १०४/१०५, विश्रांतवाडी पोलीस ठाण्यासमोर समोर, येरवडा, पुणे-६ (दूरध्वनी ०२०-२९७०६६११) किंवा मुख्याध्यापिका, अनुसूचित जाती व नवबौद्ध मुलांची निवासी शाळा दौंड (८०१०६१५३३६) या भ्रमणध्वनी क्रमांकावर संपर्क साधावा, असे आवाहन समाज कल्याणच्या सहायक आयुक्त संगिता डावखर यांनी केले आहे.
00000