एमटीपीए’तर्फे विविध पुरस्कारांचे वितरण; शर्मा, सोनवणे ‘एमटीपीए मेरूमणी’
पुणे : महाराष्ट्र टॅक्स प्रॅक्टिशनर्स असोसिएशनच्या अर्थात कर सल्लागार संघटनेच्या अध्यक्षपदी कॉस्ट अँड मॅनेजमेंट अकाऊंटंट (सीएमए) श्रीपाद बेदरकर यांची फेरनिवड, तर उपाध्यक्षपदी प्रसाद देशपांडे, सचिवपदी ॲड. अनुरुद्र चव्हाण, खजिनदारपदी मिलिंद हेंद्रे, साहसचिवपदी ॲड. प्रणव शेठ यांची निवड करण्यात आली आहे. संस्थेच्या ‘ज्ञानमंदिर’ सभागृहात नुकत्याच झालेल्या ४३ व्या वार्षिक सर्वसाधारण सभेत २०२३-२४ या वर्षीसाठीची कार्यकारिणी घोषित करण्यात आली. सदस्यपदी सीए स्वप्नील मुनोत, ज्ञानेश्वर नरवडे यांची फेरनिवड, तर नवनियुक्त सदस्यपदी ज्येष्ठ सदस्य कैलास काशीद यांची निवड झाली.

वर्षभरातील योगदानासाठी २०२२-२३ च्या कार्यकारिणीला विविध पुरस्कारांनी गौरविण्यात आले. यासह माजी अध्यक्ष सीएमए ब्रिजमोहन शर्मा व नरेंद्र सोनावणे यांना त्यांच्या भरीव योगदानासाठी ‘एमटीपीए मेरुमणी’ ही उपाधी बहाल करण्यात आली. ज्येष्ठ सभासद सीए सुहास बोरा, माजी अध्यक्ष प्रकाश पटवर्धन आणि ज्येष्ठ सभासद व जीएसटीपीए साताराचे माजी अध्यक्ष राजगोपाल चांडक यांना ‘कृतज्ञता पुरस्कार’ प्रदान करण्यात आला.

उल्लेखनीय कार्यामुळे कर सल्लागार संघटना महाराष्ट्रासह संपूर्ण देशात प्रसिद्ध आहे. संस्थेचे दोन हजाराहून अधिक मान्यवर सभासद असून, वर्षभर कर सल्लागार, सनदी लेखापाल आदींना कर रचनेतील विविध बदल याबाबत मार्गदर्शन, प्रत्यक्ष व अप्रत्यक्ष करांबाबत सरकारच्या विविध योजना यासंदर्भात कार्यक्रम आयोजिले जातात. संघटनेचे हे कार्य नेटाने पुढे नेण्याचा प्रयत्न करणार असल्याचे श्रीपाद बेदरकर यांनी नमूद केले.

वर्षभरातील इतर उपक्रमात योगदान देणाऱ्या कर सल्लागारांचा यावेळी सन्मान करण्यात आला. यामध्ये आयकरासाठीच्या कायदा व निवेदन समितीमधील योगदानासाठी माजी अध्यक्ष व समिती प्रमुख संतोष शर्मा, क्रीडा समितीतील योगदानासाठी समन्वयक उमेश दांगट, ट्रस्ट अनुपालन समितीतील योगदानासाठी माजी अध्यक्ष ॲड. व्ही. जी. शहा व मनोज चितळीकर, सर्टिफिकेट कोर्स इन टॅक्सेशन लॉमधील योगदानासाठी समन्वयक मिलिंद हेंद्रे, टॅक्स ट्रेब्युन या मुखपत्रासाठीच्या योगदानासाठी माजी अध्यक्ष व समिती प्रमुख ॲड. मिलिंद भोंडे, टॅक्स ट्रेब्युन या मुखपत्रासाठी उत्तम लेखक म्हणून ॲड. दिनेश तांबडे यांना गौरविण्यात आले.

सर्टिफिकेट कोर्स इन टॅक्सेशन लॉ (एमटीपीए व वायसीएलसी) साठी ॲड. अमोल माने, राष्ट्रीय कर परिषदेसाठी सीए बिमल जैन, महिला दिनासाठी सपना देव, स्टडी सर्कल व सेमिनारसाठी सीए स्वप्नील मुनोत, तर आउट स्टेशन सेमिनारसाठी ॲड. विद्याधर आपटे यांना उत्तम वक्ता या पुरस्काराने गौरविण्यात आले. सीए योगेश इंगळे यांना सुपरस्टार व नयन निराली यांना ‘रायझिंग स्टार’ या पुरस्काराने गौरविण्यात आले. ‘एमटीपीए बेस्ट फ्रेंड’ म्हणून परभणीचे अध्यक्ष राजकुमार भांबरे, नाशिकचे सुनील देशमुख व मुंबईचे ॲड. आदित्य सुरते यांना सन्मानित करण्यात आले.

यावेळी संघटनेचे माजी अध्यक्ष बी. एम. शर्मा, ॲड. व्हि. जी. शहा, ॲड. दिपक गोडसे, श्री व्ही एन जोशी, सीए अविनाश मुजुमदार, प्रकाश पटवर्धन, ॲड. मिलिंद भोंडे, संतोष शर्मा, ॲड. श्रीकृष्ण दीक्षित, ॲड. सुहास शहा, नरेंद्र सोनवणे, नवनीतलाल बोरा, शरद सूर्यवंशी, मनोज चितळीकर, सीए सुनिल भांडवलकर, ॲड. अभय बोरा आदी मान्यवर उपस्थित होते.

पुणे –     महाराष्ट्र प्रदेश काँग्रेस कमिटीच्या आदेशान्वये पुणे शहर जिल्हा काँग्रेस कमिटीच्या वतीने आज काँग्रेस भवन येथे नवनियुक्त ब्लॉक अध्यक्षांना नियुक्तीची पत्र काँग्रेस पक्षाच्या विविध मान्यवरांच्या हस्ते प्रदान करण्यात आली.

      येरवडा ब्लॉक – रमेश सकट, मार्केट यार्ड ब्लॉक – रमेश सोनकांबळे, भवानी ब्लॉक – सुजित यादव, पुणे कॅन्टोमेंन्ट – आसिफ शेख, शिवाजीनगर ब्लॉक – अजित जाधव, पर्वती ब्लॉक – संतोष पाटोळे, हडपसर ब्लॉक – बळिराम डोळे, बोपोडी ब्लॉक – विशाल जाधव, पं. नेहरू स्टेडियम ब्लॉक – हेमंत राजभोज, कोथरूड ब्लॉक – रविंद्र माझीरे, कसबा ब्लॉक – अक्षय माने आदींना नियुक्ती पत्र प्रदान करण्यात आली.

      यावेळी मार्गदर्शन करताना शहराध्यक्ष अरविंद शिंदे म्हणाले की, ‘‘गेल्या ८ ते १० वर्षांपासून ब्लॉक अध्यक्षांच्या नियुक्त्या रखडल्या होत्या. जयपूर अधिवेशनामध्ये ५ वर्षांपेक्षा अधिक पदांवर असणाऱ्या सर्व पदाधिकाऱ्यांच्या नियुक्त्या रद्द होऊन नविन पदाधिकारी नेमणुकीचा ठराव त्यावेळी करण्यात आला होता. त्यानुसार आज काँग्रेस भवन येथे ह्या नियुक्त्या करण्यात आल्या. तसेच सर्व नवनियुक्त अध्यक्षांकडून आगामी लोकसभा, विधानसभा व महानगरपालिकांच्या निवडणुकांमध्ये मोठी जबाबदारी असल्याचे शहराध्यक्षांनी यावेळी सांगितले तसेच आपापल्या ब्लॉकमध्ये नवीन मतदार नोंदणी, दुरूस्ती अभियान व पक्षाच्या बैठकांचे आयोजन करण्याचे आदेश दिले.’’

      सदर कार्यक्रमांप्रसंगी महाराष्ट्र प्रदेश सरचिटणीस ॲड. अभय छाजेड, माजी मंत्री बाळासाहेब शिवरकर, दिप्ती चवधरी, लता राजगुरू, दत्ता बहिरट, संगीता तिवारी, कमल व्‍यवहारे, बाळासाहेब दाभेकर, मुख्तार शेख, मेहबुब नदाफ, हनुमंत पवार आदी मान्यवरांसोबत सर्व जुने ब्लॉक अध्यक्ष व काँग्रेस पदाधिकारी, कार्यकर्ते मोठ्या संख्येने उपस्थित होते.

पुणे -डीईएस पूर्व प्राथमिक मुरलीधर लोहिया मातृमंदिर शाळा आणि एनईएमएस शाळेत कागदी पिशवी दिवस साजरा करण्यात आला.

प्लास्टिक कसे घातक असते ते मुलांना समजावून सांगितले. पाठोपाठ शाळेच्या प्रवेशद्वाराजवळ मुले प्लास्टिक वापरु नका असे फलक घेऊन घोषणा दिल्या. मुलांनी पालकांच्या मदतीने कागदापासून वेगवेगळ्या वस्तु तयार करून शाळेत आणुन त्या आकर्षक पद्धतीने मांडण्यात आल्या.

शाळेमध्ये शिक्षिकांनी मुलांकडून कागदापासून पिशव्या तयार करून घेतल्या होत्या. मुलांकडून प्लास्टिक न वापरण्याची शपथ घेतली. दुकानदारांना कागदी पिशव्या वाटण्यात आल्या. मुख्याध्यापिका माधुरी बर्वे आणि मुख्याध्यापिका शिल्पा कुलकर्णी यांनी संयोजन केले.

महावितरणची पुणे परिमंडलामध्ये वेगवान कामगिरी

पुणे, दि. १३ जुलै २०२३: नवीन वीजजोडण्या देण्यास महावितरणने मोठा वेग दिला असून गेल्या दीड वर्षांमध्ये पुणे परिमंडलात सर्व वर्गवारीच्या तब्बल २ लाख ५६ हजार ९५६ नवीन वीजजोडण्या कार्यान्वित करण्यात आल्या आहेत. यात घरगुती ग्राहकांना दिलेल्या सर्वाधिक २ लाख १५ हजार १७६ नवीन वीजजोडण्यांचा समावेश आहे. मागील आर्थिक वर्षांत १ लाख ९५ हजार ९८६ तर विशेष म्हणजे गेल्या एप्रिल ते जूनपर्यंतच्या केवळ तीन महिन्यांत ६० हजार ९७० नवीन वीजजोडण्या देण्यात आल्या आहेत.

राज्याचे उपमुख्यमंत्री ना. श्री. देवेंद्र फडणवीस यांनी ग्राहकसेवा गतीमान करण्यासोबतच नवीन वीजजोडण्यांना वेग देण्याची सूचना केली आहे. महावितरणचे अध्यक्ष व व्यवस्थापकीय संचालक श्री. लोकेश चंद्र यांनी नवीन वीजजोडण्यांचे अर्जांबाबत त्वरित कार्यवाही करण्याचे निर्देश दिले आहेत. सोबतच पुरेशा प्रमाणात नवीन वीजमीटर देखील उपलब्ध करून दिले आहेत. नवीन वीजजोडण्या व वीजमीटरच्या उपलब्धतेबाबत संचालक (संचालन) श्री. संजय ताकसांडे यांच्याकडून सातत्याने आढावा घेण्यात येत आहे.

पुणे परिमंडल अंतर्गत देखील नवीन वीजजोडण्या व आवश्यकतेनुसार वीजमीटरचा पुरवठा व्हावा यासाठी दर आठवड्यामध्ये दोनदा मुख्य अभियंता श्री. राजेंद्र पवार यांच्याकडून विभागनिहाय आढावा घेण्यात येत आहे. त्यामुळे नवीन वीजजोडणी देण्याची प्रक्रिया अधिक गतीमान झाली आहे. त्यामुळे नवीन वीजजोडण्या देण्याची गतीमानता आणखी वाढली असून गेल्या पंधरवड्यात तब्बल १४ हजार ८६६ नवीन वीजजोडण्या कार्यान्वित करण्यात आल्या आहेत. यामध्ये घरगुती-१२ हजार ५९६, वाणिज्यिक- १६३६, औद्योगिक- २३७, कृषी-२५५ व इतर १४२ वीजजोडण्यांचा समावेश आहे.

पुणे परिमंडलामध्ये दरवर्षी दीड ते पावणेदोन लाख नवीन वीजजोडण्या देण्यात येतात. मात्र सन २०२२-२३ या आर्थिक वर्षांत १ लाख ९५ हजार ९८६ नवीन वीजजोडण्या देण्यात आल्या. यामध्ये घरगुती- १ लाख ६३ हजार १६६, वाणिज्यिक- २१ हजार ९८८, औद्योगिक- ३७४५, कृषी- ३८६७ व इतर ३२२० वीजजोडण्यांचा समावेश आहे. त्यानंतर गेल्या एप्रिलपासून नवीन वीजजोडणी देण्याची प्रक्रिया आणखी वेगवान करण्यात आली आहे. जूनपर्यंतच्या तीन महिन्यात तब्बल ६० हजार ९७० नवीन वीजजोडण्या देण्यात आल्या. यात घरगुती- ५२ हजार १०, वाणिज्यिक- ६८७३, औद्योगिक- ८८०, कृषी- ५६२ व इतर अशा ५४५ वीजजोडण्यांचा समावेश आहे.

पुणे परिमंडलामध्ये मुबलक प्रमाणात नवीन वीजमीटर उपलब्ध आहेत. यासह नवीन वीजजोडणी संदर्भात काही तक्रार असल्यास ग्राहकांनी संबंधित विभागाचे कार्यकारी अभियंता यांच्याशी थेट संपर्क साधावा. वीजग्राहकांना बाजारातून मीटर खरेदी करण्याची आवश्यकता नाही असेही महावितरणकडून स्पष्ट करण्यात आले आहे.

नवीन वीजजोडण्यांच्या प्रक्रियेला विशेष वेग देण्यात आला आहे. त्यासाठी परिमंडल अंतर्गत सर्व विभागांमधील नवीन वीजजोडणी तसेच वीजमीटरच्या उपलब्धतेबाबत दर सोमवारी व गुरुवारी विभागनिहाय आढावा घेण्यात येत आहे.

 श्री. राजेंद्र पवार, मुख्य अभियंता, पुणे परिमंडल

भ्रष्ट भाजपाचा राज्यभर भांडाफोड करून सळो की पळो करुन सोडू :- नाना पटोले

राहुल गांधींवरील कारवाईविरोधातील काँग्रेसच्या मौन सत्याग्रहात राष्ट्रवादी काँग्रेसचाही सहभाग.

मुंबई, दि. १२ जुलै
राहुल गांधी यांच्यावर लावण्यात आलेले आरोप खोटे व चुकीचे आहेत, त्यापाठीमागे भाजपाचा हात आहे हे सर्वांना माहित आहे. राहुल गांधी यांनी कोणताही गंभीर स्वरुपाचा गुन्हा केलेला नसताना केवळ राजकीय द्वेषातून त्यांच्यावर कारवाई करत खासदारकी रद्द केली व त्यांना बेघर करण्यात आले. जनतेची भावना संसदेत मांडणाऱ्या निरपराध राहुल गांधी यांच्यावरील अन्यायाविरोधात मौन सत्याग्रह आंदोलन करण्यात आले. एक दिवसाचे मौन सत्याग्रह संपले आता भ्रष्ट भाजपाचा राज्यभर भांडाफोड करून सळो की पळो करुन सोडू, असा असा इशारा महाराष्ट्र प्रदेश काँग्रेस कमिटीचे अध्यक्ष नाना पटोले यांनी दिला.
मुंबई काँग्रेस व महाराष्ट्र प्रदेश काँग्रेस कमिटीच्या वतीने मंत्रालयाजवळच्या राष्ट्रपिता महात्मा गांधी यांच्या पुतळ्यासमोर सकाळी १० वाजल्यापासून सायंकाळी ५ वाजेपर्यंत मौन सत्याग्रह करण्यात आला. या मौन सत्याग्रह आंदोलनात काँग्रेस प्रदेशाध्यक्ष नाना पटोले, विधिमंडळ काँग्रेस पक्षनेते बाळासाहेब थोरात, विधान परिषदेतील गटनेते सतेज पाटील, मुंबई काँग्रेसच्या अध्यक्षा आ. वर्षा गायकवाड, प्रदेश कार्याध्यक्ष नसीम खान, माजी मंत्री नितीन राऊत, खासदार कुमार केतकर, माजी खासदार हुसेन दलवाई, डॉ. भालचंद्र मुणगेकर, संजय निरुपम, आ. भाई जगताप, आ. वजाहत मिर्झा, आ. अभिजित वंजारी, राजेश राठोड, माजी मंत्री राष्ट्रवादी काँग्रेसचे नेते आमदार जितेंद्र आव्हाड, आमदार रोहित पवार, प्रदेश काँग्रेसचे मुख्य प्रवक्ते अतुल लोंढे, प्रवक्ते डॉ. राजू वाघमारे यांच्यासह शेकडो कार्यकर्ते उपस्थित होते.

आंदोलनानंतर प्रसार माध्यमांशी बोलताना काँग्रेस प्रदेशाध्यक्ष पुढे म्हणाले की, मौन सत्याग्रहाच्या माध्यमातून महात्मा गांधींनी ब्रिटिश सरकारला नामोहरम करुन सोडले होते. आज त्याच अस्त्राचा वापर काँग्रेसने भाजपा सरकारच्याविरोधात केला आहे. भाजपाच्या भ्रष्ट, अत्याचारी, हुकूमशाही सरकारविरोधात हा लढा सुरु आहे. हा लढा मुंबईसह महाराष्ट्रभर आणखी तीव्र करुन भाजपाचा भांडाफोड करु. राहुल गांधी यांनी जनतेचे प्रश्न संसदेत मांडत असताना अदानी-मोदी संबंध काय आहेत असा सवाल विचारल्यानंतर मोदी सरकार घाबरले व आपले पितळ उघडे पडणार या भितीतून त्यांनी राहुल गांधी यांच्यावर खोटी कारवाई केली आहे. देशातील जनता हे सर्व पहात असून राहुल गांधींना शिक्षा करुन बेघर करणाऱ्या भाजपाविरोधात वणवा पेटला आहे आणि या वणव्यात भाजपाचे सरकार कोसळल्याशिवाय राहणार नाही.
यावेळी प्रसार माध्यमांशी बोलताना विधिमंडळ पक्षनेते बाळासाहेब थोरात म्हणाले की, मौन सत्याग्रह आंदोलन हे राहुल गांधी यांच्या समर्थनासाठी आहे, राहुल गांधींवर ज्या पद्धतीने कारवाई केली त्या अन्यायी कारवाई विरोधात मौन सत्याग्रह आंदोलन आहे. राहुल गांधी असे काय बोलले होते की त्यांची खासदारही रद्द केली. काँग्रेसला न्यायालयाकडून न्यायाची अपेक्षा आहे पण निरपेक्ष यंत्रणेवरही दबाव आहे की काय असे चित्र दिसत आहे. तर देशाचे नाव जगात उज्वल करणाऱ्या खेळाडू मुलींवर लैंगिक अत्याचार करणारा भाजपाचा खासदार ब्रिजभूषण शरणसिंह मोकाट फिरत आहे. एफआयरमध्ये त्याच्यावर गंभीर आरोप आहेत,अशा गुन्हेगाराला भाजपा पाठिशी घालत आहे, त्याच्यावर कारवाई करण्यासंदर्भात भाजपा व पंतप्रधान मौन आहेत, मणिपूर जळत आहे, त्यावरही मौन आहे आणि अदानीच्या २० हजार कोटी रुपयांवरही मौन आहे, हे त्यांचे मौन देशासाठी मात्र घातक आहे. राहुल गांधी यांच्या भारत योडो यात्रेचे जगाने कौतुक केले पण भारतात मात्र त्यांच्यावर अन्याय करण्याचे काम झाले आहे. न्यायालयाकडूनही न्याय न मिळणे दुर्दैवी आहे. काँग्रेस पक्ष ही लढाई लढत आहे, सर्वोच्च न्यायालयात दाद मागू आणि न्याय मिळेल अशी अपेक्षा आहे.
पत्रकारांनी विचारलेल्या प्रश्नाला उत्तर देताना थोरात म्हणाले की, सरकार बनवण्यासाठी तिघे एकत्र आले हे खरे आहे पण त्यात एक मुख्यमंत्री, दुसरा माजी मुख्यमंत्री तर तिसरा मुख्यमंत्रीपदासाठी इच्छुक असणारा असे तीघेजण आहेत, या तिघांचा एकत्र मेळ बसणे अवघड दिसत आहे. एक आमदार म्हणतो मी ११० टक्के मंत्री होणार व पालकमंत्रीही होणारच आणि दुसराच मंत्री होतो आता त्याने लोकांना तोंड कसे दाखवयाचे? असा टोला थोरात यांनी मारला.
मुंबई काँग्रेस अध्यक्ष आमदार वर्षा गायकवाड यावेळी म्हणाल्या की, काँग्रेसची लढाई सत्तेसाठी नाही तर सत्यासाठी आहे. मौनात मोठी ताकद आहे, महात्मा गांधी यांनी दिलेले अहिंसेचे हे मोठे अस्त्र आहे. सत्य, सद्भावना व अहिंसा यावर आम्ही बोलत आहोत तर भाजपा मात्र सत्तेसाठी काहीही करत आहे. लोकांचे प्रश्न घेऊन आम्ही लढत आहोत पण भाजपा,ईडी, सीबीआयचा गैरवापर करून सत्तेसाठी काहीही करत आहेत. काँग्रेस सत्यासाठी तर भाजपा सत्तेसाठी लढत आहे. लोकशाही व संवैधानिक मुल्ये टिकवण्यासाठी आमचा संघर्ष सुरु आहे आणि सर्वांना बरोबर घेऊन हा लढा देत आहोत.
या मौन सत्याग्रह आंदोलनात सहभागी नेते व कार्यकर्त्यांनी काळ्या मुखपट्ट्या बांधून भाजपचा निषेध केला.

अल्पसंख्याक समुदायाच्या, शहराच्या विकासासाठी प्रयत्न करणार; अली दारूवाला यांच्या हस्ते सत्कार
पुणे : भारत सरकार संचालित राष्ट्रीय अल्पसंख्याक आयोगाच्या सल्लागारपदी रुबी हॉल क्लिनिकचे व्यवस्थापकीय विश्वस्त डॉ. परवेझ ग्रांट यांची निवड झाली आहे. डॉ. ग्रांट यांचे वैद्यकीय आणि सामाजिक कार्यातील भरीव योगदान लक्षात घेऊन त्यांची या पदावर निवड करण्यात आली आहे. राष्ट्रीय अल्पसंख्याक आयोगाचे अध्यक्ष इक्बाल सिंह लालपुरा यांनी नुकतेच त्यांच्या निवडीचे पत्र दिले. 
आयोगाच्या सल्लागारपदी निवड झाल्याबद्दल डॉ. ग्रांट यांचा राष्ट्रीय अल्पसंख्याक आयोगाचे सल्लागार व भारतीय जनता पक्षाचे प्रवक्ते अली दारूवाला यांच्या हस्ते सत्कार करण्यात आला. आयोगाचे राष्ट्रीय सल्लागार म्हणून अल्पसंख्याक समाजाची उन्नती, आरोग्यसेवेचे अत्याधुनिकरण आणि वैद्यकीय पर्यटन केंद्र म्हणून पुण्याला ओळख मिळवून देण्याचे उद्दिष्ट्य डॉ. ग्रांट यांनी ठेवले आहे. सर्वसमावेशक आणि समाजहिताचे काम करण्याचे ध्येय आजवर रुबी हॉल क्लिनिकने जपले असून, त्याच ध्येयाने प्रेरित यापुढेही काम सुरु ठेवणार असल्याचा विश्वास डॉ. ग्रांट यांनी सत्कारावेळी व्यक्त केला. यावेळी अल्पसंख्याक समुदायातील समीर पठाण आणि अझीम गोडकूवाला यांच्यासह इतर कार्यकर्त्यांनी भारतीय जनता पक्षामध्ये प्रवेश केला.
डॉ. परवेझ ग्रांट म्हणाले, “राष्ट्रीय अल्पसंख्याक आयोगाच्या सल्लागारपदी काम करण्याची संधी मिळणे ही माझ्यासाठी आनंदाची गोष्ट आहे. माझा ठाम विश्वास आहे की प्रत्येक व्यक्तीला यशस्वी होण्यासाठी आणि भरभराटीसाठी समान संधी मिळण्याचा अधिकार आहे. जैन, शीख, पारसी आणि मुस्लिम यासह इतर अल्पसंख्याक समुदायाच्या समस्या सोडविण्यावर, त्यांना चांगल्या आरोग्य सुविधा, शिक्षणाच्या संधी, कौशल्य विकासाचे कार्यक्रम, उद्योजकता विकासाचे उपक्रम राबविण्यावर भर देणार आहे. पारसी समाजातील अनेक अनिष्ट रूढी, परंपरा दूर करण्याचा प्रयत्न करणार असून, पारसी अग्यारी मध्ये महिलांना प्रवेश मिळावा, यासाठी पुढाकार घेणार आहे.”
“पुण्याला समृद्ध सांस्कृतिक वारसा लाभलेला असून, प्रतिभावान लोकांचे शहर आहे. पुणे शहरातील क्षमतेचा व येथील अल्पसंख्याक समाजाचा मेळ घालून त्यांचे सक्षमीकरण व त्यांच्यासाठीच्या योजनांवर भर दिला जाणार आहे. या प्रतिभेचा उपयोग करत येथे मोठ्या प्रमाणावर संधींची निर्मिती, तसेच आर्थिक विकासात प्रगती होण्यासाठी मोठी गुंतवणूक करण्यास प्रोत्साहन मिळेल. शहराचे सुशोभीकरण, अतिक्रमण मुक्त व खड्डे मुक्त शहर आणि बेकायदेशीर होर्डिंग्ज हटवण्यासह वैद्यकीय पर्यटनासाठी पुण्याला जागतिक स्थळ म्हणून ओळख देण्यावर माझा भर असणार आहे. जागतिक दर्जाच्या आरोग्यसेवा व पायाभूत सुविधा असलेल्या रुबी हॉल क्लिनिकमध्ये कर्करोगाच्या रुग्णांसाठी लवकरच ‘सायबरनाइफ’चा समावेश करण्यात येणार असून, देशांतर्गत व आंतरराष्ट्रीय स्तरावरील रूग्णांना दर्जेदार आरोग्य सेवा प्रदान करण्याला प्राधान्य देणार आहोत,” असेही डॉ. ग्रांट यांनी नमूद केले.
अल्पसंख्याक समुदायांच्या कल्याणासाठी केलेल्या अथक प्रयत्नांबद्दल, तसेच सर्वसमावेशक विकासाला चालना देण्यासाठी पंतप्रधान नरेंद्र मोदी यांनी घेतलेल्या पुढाकाराबद्दल डॉ. परवेज ग्रांट यांनी मोदींच्या कार्याची प्रशंसा केली. स्वच्छ भारत अभियान, आयुष्मान भारत यासह विदेशी धोरण कार्यक्रमातून समाजाच्या सर्वांगीण विकासाला प्रोत्साहन दिले आहे. रुबी हॉल क्लिनिकमध्येही आम्ही सर्वंकष आरोग्यावर भर देत असून, बालकांच्या हृदयविकारावर मोफत उपचार करत आहोत. तसेच वर्षाला २० कोटीहून अधिक निधी आर्थिक मागास वर्गातील रुग्णांसाठी खर्च करतो. मला खात्री आहे की, सरकारच्या साथीने यामध्ये आणखीन प्रभावी काम करून समाजात सकारात्मक बदल घडवून आणता येतील. 

डॉ. ग्रांट यांच्या निवडीबद्दल अली दारूवाला यांनी त्यांचे अभिनंदन केले. डॉ. ग्रांट यांच्या नियुक्तीच्या रूपाने भारत सरकारच्या सर्वसमावेशक व प्रत्येक नागरिकाला समान संधी उपलब्ध करून देण्याच्या वचनबद्धतेचे उदाहरण आहे. डॉ. ग्रांट यांची अल्पसंख्याक आयोगावर निवड झाल्याने सामाजिक आरोग्य चांगले राहण्यास मदत होईल. त्यांच्यातील नेतृत्वगुण, अनुभव आणि सामाजिक कार्याप्रती त्यांची वचनबद्धता अल्पसंख्याक समुदायाच्या विकासामध्ये महत्वपूर्ण ठरेल. समृद्ध भारताच्या निर्मितीसाठी त्यांची निवड सार्थ ठरेल, असे मत अली दारूवाला यांनी व्यक्त केले.