सहा जणांना नियुक्ती पत्रे तर आणखी सहा जणांची पंधरवड्यात नियुक्ती

पुणे, दि. २७ जानेवारी २०२३:महावितरणच्या मृत कर्मचाऱ्यांच्या कायदेशीर वारसांना अनुकंपा तत्त्वावर नियुक्ती देण्यासाठी पुणे परिमंडलामध्ये विशेष मोहीम सुरू करण्यात आली आहे. यामध्ये गेल्या सहा महिन्यांमध्ये प्राप्त झालेल्या अर्जांवर तातडीने कार्यवाही करीत सहा उमेदवारांना नियुक्ती पत्र देण्यात आले आहे तर आणखी सहा जणांना या महिन्याअखेर सेवानिवृत्त होत असलेल्या कर्मचार्‍यांच्या रिक्त पदी नियुक्ती देण्यात येणार आहे.

महावितरणमध्ये कार्यरत असणार्‍या कर्मचार्‍यांचा मृत्यू झाल्यानंतर त्यांच्या कायदेशीर वारसांना शैक्षणिक पात्रतेनुसार अनुकंपा तत्त्वावर नोकरी देण्याची तरतूद आहे. पुणे परिमंडलामध्ये गेल्या सहा महिन्यांत विविध कारणांमुळे मृत्यू झालेल्या कर्मचार्‍यांच्या १५ कायदेशीर वारसदारांकडून अनुकंपा तत्त्वावरील नोकरीसाठी अर्ज प्राप्त झाले. घरातील कर्त्या व्यक्तीचे निधन झाल्यानंतर सामाजिक बांधिलकीतून अनुकंपा तत्त्वावरील नियुक्ती पत्रांबाबत तातडीने कार्यवाही करण्याचे निर्देश मुख्य अभियंता श्री. राजेंद्र पवार यांनी दिले आहे. त्यानुसार मानव संसाधन विभागाकडून या सर्व वारसांकडून अर्ज भरून घेणे, आवश्यक कागदपत्रांची पूर्तता करणे आदींच्या कार्यवाहीला गती देण्यात आली.

विशेष म्हणजे सर्वच १५ वारसदारांच्या नियुक्तीबाबत प्रशासकीय कार्यवाही पूर्ण करून त्यांची प्रतीक्षायादी तयार करण्यात आली. यामध्ये वर्ग तीनमध्ये निम्न स्तर लिपिक म्हणून सहा जणांना मुख्य अभियंता श्री. राजेंद्र पवार यांच्याहस्ते नुकतेच नियुक्ती पत्र देण्यात आले. यावेळी अधीक्षक अभियंता श्री. सतीश राजदीप, सहायक महाव्यवस्थापक ज्ञानदा निलेकर (मानव संसाधन) व सौ. माधुरी राऊत (लेखा व वित्त), उपमुख्य औद्योगिक संबंध अधिकारी श्री. शिरीष काटकर, कार्यकारी अभियंता श्री. दत्तात्रेय साळी आदींची उपस्थिती होती. यावेळी मुख्य अभियंता श्री. पवार यांनी नवनियुक्त कर्मचाऱ्यांशी संवाद साधला. ते म्हणाले, महावितरण ही सेवा क्षेत्रातील कंपनी आहे. नवनियुक्त कर्मचाऱ्यांनी प्रामाणिकपणे, सकारात्मकतेने सेवा देण्याची जबाबदारी व कर्तव्य बजवावे असे आवाहन श्री. पवार यांनी केले.तसेच पुणे परिमंडल अंतर्गत सर्व विभाग कार्यालयांनी अनुकंपा तत्त्वानुसार वारसांना नोकरी देण्याची कार्यवाही अधिक वेगवान करावी. अर्जांमध्ये काही त्रुटी असल्यास स्वतः पुढाकार घेऊन त्याची पूर्तता करावी असे निर्देश त्यांनी दिले. 

जानेवारीअखेर पुणे परिमंडलातील वर्ग चारचे सहा पदे कर्मचाऱ्यांच्या सेवानिवृत्तीमुळे रिक्त होणार आहे. या रिक्त जागी अनुकंपा तत्त्वावरील उर्वरित ९ पैकी सहा जणांना येत्या पंधरवड्यात नियुक्तिपत्र देण्यात येईल. तसेच उर्वरित आणखी तीन जणांसाठी सध्या पदे रिक्त नसल्याने त्यांना शैक्षणिक पात्रतेनुसार इतर परिमंडलामध्ये रिक्त जागी नियुक्ती पत्र देण्याचा प्रस्ताव वरिष्ठ कार्यालयास सादर करण्यात आला आहे.

श्रीरंग कलादर्पण फाऊंडेशनतर्फे भव्य रंगावली प्रदर्शन ; दिनांक २६ ते २९ जानेवारी दरम्यान बालगंधर्व कलादालन येथे आयोजन

मॅजिकल,थ्रीडी, हलती रांगोळी प्रदर्शनाचे मुख्य आकर्षण

पुणे : महालक्ष्मी माता वैकुंठ सोडून गेल्यावर त्यांच्या शोधत निघालेले भगवान विष्णू… वारुळात स्थित असलेल्या भगवान विष्णू यांना गायीने दिलेले दूध…व्यंकटेश व पद्मावती मातेच्या भव्य विवाह सोहळ्याची साकारलेली रंगावली… व्यंकटेशाने कुबेराकडून घेतलेले कर्ज…अश्या एकाहून एक सरस रंगावलीतून पुणेकरांनी श्री तिरुपती बालाजी जीवनचरित्र पहायला मिळाले. त्याचबरोबर हलती रांगोळी, ३ डी गॉगल घालून पहायची रांगोळी, २ इन १ रांगोळी, प्रतिबिंब रांगोळी, पाण्यावरची, पाण्याखालची आणि पाण्याच्या मधोमध असलेली रांगोळी प्रदर्शनाचे खास आकर्षण ठरत आहे.

श्रीरंग कलादर्पण फाऊंडेशनच्यावतीने श्री तिरुपती बालाजींच्या चरित्रावर आधारित रंगावली प्रदर्शन बालगंधर्व कलादालनात आयोजित करण्यात आले आहे. प्रदर्शनाचे उद्घाटन अभिनेत्री अक्षया जोशी आणि हार्दिक जोशी यांच्या हस्ते झाले. यावेळी पुण्याचे माजी महापौर मुरलीधर मोहोळ, ज्येष्ठ रांगोळीकार जगदीश चव्हाण, श्रीरंग कलादर्पण फाऊंडेशनचे संस्थापक प्रा. अक्षय शहापूरकर व इतर मान्यवर उपस्थित होते. या प्रदर्शनात तब्बल १०० रंगावली साकारण्यात आल्या आहेत.

प्रदर्शनात सिंधुदुर्गातील रांगोळी कलावंत समीर चांदरकर यांचा श्रीरंग कलागौरव पुरस्काराने सन्मान करण्यात आला. हे प्रदर्शन दिनांक २९ जानेवारी पर्यंत दररोज सकाळी ९ ते रात्री ९ यावेळेत विनामूल्य खुले आहे.

शरीर, मन आणि बुद्धीसाठी खेळ आवश्यक-पालकमंत्री

पुणे दि.२७-महाराष्ट्र मंडळाच्या चंद्रशेखर आगाशे शारीरिक शिक्षण महाविद्यालयात आयोजित आंतरशालेय आणि आंतर महाविद्यालयीन अडथळ्यांचा शर्यतीचे राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांत दादा पाटील यांच्या हस्ते उदघाटन करण्यात आले.

कार्यक्रमाला संस्थेचे सरचिटणीस रोहन दामले, महाविद्यालयाचे प्राचार्य सोपान कांगणे, शिक्षण विभाग संचालिका नेहा दामले उपस्थित होते.

यावेळी बोलताना पालकमंत्री श्री.पाटील म्हणाले, अडथळ्यांचा शर्यतीत भाग घेणे आणि त्यासाठी सराव करणे हे मोठे धाडस आहे. या स्पर्धेसाठी आवश्यक कौशल्य प्राप्त करणे आनंददायी आहे. शरीर, मन आणि बुद्धीसाठी असे खेळ आवश्यक आहेत. खेळ आता कौशल्य, व्यायाम किंवा स्पर्धेपुरता मर्यादित राहिलेला नसून क्रीडा क्षेत्रात करिअर करण्याचीदेखील संधी आहे.

महाराष्ट्र शासनाने खेळांना प्रोत्साहित करण्यासाठी अनेक निर्णय घेतले. खेळाडूंना देण्यात येणाऱ्या आर्थिक मदतीच्या रकमेत मोठ्या प्रमाणात वाढ करण्यात आली आहे, आंतरराष्ट्रीय आणि राष्ट्रीय पातळीवरील यशस्वी खेळाडूंना शासकीय सेवेत थेट सामावून घेतले जात आहे. खेळाडूंना अधिकाधिक प्रोत्साहन देण्याचा शासनाचा प्रयत्न असल्याचे श्री.पाटील म्हणाले.

यावेळी महाविद्यालयाच्या विद्यार्थ्यांनी ‘लहेराओ झंडा’ हे सादरीकरण केले. इंडियन स्कुल ऑफ योगच्या विद्यार्थ्यांनी योगासनांचे आणि महाविद्यालयाच्या विद्यार्थ्यांनी अडथळ्यांचा शर्यतीचे प्रात्यक्षिक सादर केले.

आंतरशालेय स्पर्धेत जिल्ह्यातील १०० शाळा सहभागी होणार असल्याची माहिती यावेळी देण्यात आली.

पुणे :नगरसेवक वसंत मोरे, श्रीनाथ भिमाले यांना आदर्श नगरसेवक पुरस्काराने तर महाराष्ट्र राज्याचे कॅबिनेट मंत्री शंभुराज देसाई, खासदार रामदास तडस, श्रीरंग बारणे, इम्तियाज जलील, रणजितसिंह नाईक निंबाळकर, आमदार संजय रायमुळकर, राजेश पाडवी, सुनिल शेळके, आदिती तटकरे, शहाजीबापू पाटील, भरत गोगावले, निलेश लंके, सरपंच सुनिल जाधवर, रंजना गायकवाड, जिल्हा परिषद सदस्य अंकिता पाटील-ठाकरे, संजय गिराण यांना आदर्श मंत्री, खासदार, आमदार, जिल्हा परिषद सदस्य, सरपंच अशा पुरस्काराने न-हे येथील जाधवर ग्रुप आॅफ इन्स्टिटयूटस् तर्फे सहाव्या युवा संसदेत सन्मानित करण्यात येणार आहे .शाल, मानचिन्ह, मानपत्र आणि पुणेरी पगडी असे पुरस्काराचे स्वरुप असणार आहे.दिनांक २७ व २८ जानेवारी रोजी संस्थेच्या सभागृहात ही संसद होणार आहे. संसदेचे उद््घाटन शुक्रवार, दिनांक २७ जानेवारी रोजी सकाळी ११ वाजता राज्याचे माजी कॅबिनेट मंत्री महादेव जानकर यांच्या हस्ते होणार आहे, अशी माहिती इन्स्टिटयूटस्चे उपाध्यक्ष अ‍ॅड. शार्दुल जाधवर यांनी पत्रकार परिषदेत दिली.

युवा शक्तीला योग्य गती व दिशा देऊन समाजकारण आणि राजकारणामध्ये त्यांचे अधिष्ठान निर्माण करण्याकरीता पुण्यामध्ये सहाव्या युवा संसदेचे आयोजन करण्यात आले आहे

मिडीयाचा खरा मालक कोण?
शुक्रवारी (दि.२७) सकाळी ११ वाजता उद््घाटनप्रसंगी सशक्त युवा, सशक्त राजकारण, सशक्त भारत याविषयावर मान्यवर विचार व्यक्त करणार आहेत. दुपारी ३ वाजता मिडीयाचा खरा मालक कोण? याविषयावर वरिष्ठ पत्रकार राहुल कुलकर्णी, विलास बडे, संजय आवटे आदी मान्यवर आपले विचार मांडणार आहे.

अभिव्यक्ती स्वातंत्र-अतिरेक? गळचेपी?

शनिवारी (दि.२८) सकाळी १० वाजता आयडीया आॅफ इंडिया याविषयावर आमदार गोपिचंद पडळकर, सदाभाऊ खोत हे तरुणाईशी संवाद साधतील. तर, दुपारी १२ वाजता अभिव्यक्ती स्वातंत्र-अतिरेक? गळचेपी? याविषयावर गणराज्य संघाच्या संस्थापक अध्यक्ष सुषमा अंधारे, आमदार अमोल मिटकरी आदी मान्यवर संवाद साधणार आहेत.  

संसदेचा समारोप दुपारी ३ वाजता होणार असून माजी आमदार उल्हास पवार, कॅबिनेट मंत्री गुलाबराव पाटील हे आपले विचार व्यक्त करणार आहेत. संसदेकरीता देशभरातून विविध क्षेत्रातील मान्यवर उपस्थित राहणार असून माजी खासदार राजू शेट्टी हे आयोजन समितीचे अध्यक्ष असणार आहेत. तर सुषमा अंधारे, राजेश पांडे, संजय आवटे, राहुल कराड, प्राचार्य डॉ.सुधाकर जाधवर, अ‍ॅड.शार्दुल जाधवर हे कार्यकारणीमध्ये आहेत.

१५०० विद्यार्थी संसदेत सहभागी होणार
महाराष्ट्र व गोवा येथून सुमारे १५०० विद्यार्थी संसदेत सहभागी होणार आहेत. सावित्रीबाई फुले पुणे विद्यापीठ, नेहरु युवा केंद्र, लायन्स क्लब आॅफ पुणे पर्ल यांच्या माध्यमातून अनेक विद्यार्थी संसदेत सहभागी होणार आहेत. पुणे, सोलापूर, अकोला, कोल्हापूर, मराठवाडा, कोकण यांसह विविध भागांतून विद्यार्थी संसदेकरीता पुण्यामध्ये येणार आहेत. संसदेच्या माध्यमातून युवकांनी राजकारण आणि समाजकारणातील दिग्गजांसोबत संवाद साधावा, हा यामागील मुख्य उद्देश आहे. संसदेकरीता प्रवेश विनामूल्य आहे, तरी तरुणाईने मोठया संख्येने सहभागी व्हावे, असे आवाहनही ट्रस्टतर्फे करण्यात आले.

पुणे दि.२६: भारतीय प्रजासत्ताकाच्या ७३ व्या वर्धापन दिनानिमित्त विधानभवन प्रांगणात विभागीय आयुक्त सौरभ राव यांच्या हस्ते राष्ट्रध्वज फडकवून ध्वजवंदन करण्यात आले.

यावेळी जिल्हाधिकारी डॉ. राजेश देशमुख, अतिरिक्त आयुक्त डॉ. अनिल रामोड, उपायुक्त वर्षा लढ्ढा उंटवाल, राहुल साकोरे, रामचंद्र शिंदे, विविध विभागाचे अधिकारी, कर्मचारी, उपस्थित होते.
000

पुणे दि.२६:-भारतीय प्रजासत्ताकाच्या ७३ व्या वर्धापन दिनानिमित्त जिल्हाधिकारी कार्यालय आणि शनिवारवाडा येथील प्रांगणात जिल्हाधिकारी डॉ. राजेश देशमुख यांच्या हस्ते राष्ट्रध्वज फडकविण्यात येऊन राष्ट्रध्वजास मानवंदना देण्यात आली.

यावेळी अपर जिल्हाधिकारी विजय मोरे, निवासी उपजिल्हाधिकारी हिम्मत खराडे, उपजिल्हाधिकारी अमृत नाटेकर, उपविभागीय अधिकारी संतोषकुमार देशमुख विविध विभागाचे अधिकारी, कर्मचारी उपस्थित होते.

जिल्हाधिकारी डॉ. देशमुख यांनी नागरिकांना प्रजासत्ताक दिनाच्या शुभेच्छा दिल्या.

पुणे दि. २६: भारतीय प्रजासत्ताकाच्या ७३ व्या वर्धापन दिनानिमित्त पुणे जिल्ह्याचे पालकमंत्री चंद्रकांतदादा पाटील यांनी पोलीस परेड मैदान येथे झालेल्या कार्यक्रमात राष्ट्रध्वज फडकावून राष्ट्रध्वजाला मानवंदना दिली.

कार्यक्रमास विभागीय आयुक्त सौरभ राव, पुणे महानगरपालिका आयुक्त विक्रम कुमार, पिंपरी-चिचंवड महानगरपालिका आयुक्त शेखर सिंह, पोलीस आयुक्त रितेश कुमार, विनयकुमार चौबे, जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद आदी उपस्थित होते.

विविध क्षेत्रात उल्लेखनीय कामगिरी करणाऱ्या अधिकारी व कर्मचाऱ्यांना पालकमंत्र्यांच्या हस्ते गौरविण्यात आले.

राष्ट्रपती पोलीस पदक जाहीर झालेले गुन्हे अन्वेषण विभागाचे अपर पोलीस अधीक्षक सुधाकर काटे आणि पुणे शहराचे सहायक पोलीस उपनिरीक्षक धनंजय बारभाई तसेच केंद्रीय गृहमंत्री पदक प्राप्त पुणे ग्रामीणचे पोलीस निरीक्षक दिलीप पवार, सुरेशकुमार राऊत, सहायक पोलिस निरीक्षक मनोज पवार यांचाही पालकमंत्र्यांच्या हस्ते सन्मान करण्यात आला.

कार्यक्रमानंतर पालकमंत्री श्री.पाटील यांनी उपस्थित स्वातंत्र्य सैनिक, माजी सैनिक, निमंत्रितांची भेट घेऊन प्रजासत्ताक दिनाच्या शुभेच्छा दिल्या. स्वातंत्र्यसैनिक, विविध विभागांचे वरिष्ठ अधिकारी, ज्येष्ठ नागरिक, विद्यार्थी, नागरिक उपस्थित होते.

लोकशाही बळकट करण्यासाठी राज्यघटनेने दिलेल्या अधिकारांचा उपयोग करावा- पालकमंत्र्यांचे आवाहन
पालकमंत्री श्री.पाटील यांनी प्रजासत्ताक दिनानिमित्त केलेल्या भाषणात जिल्ह्यातील नागरिकांना शुभेच्छा दिल्या. लोकशाही बळकट करण्यासाठी भारतीय राज्यघटनेने दिलेल्या अधिकारांचा उपयोग करावा, असे आवाहन त्यांनी केले.

पालकमंत्री म्हणाले, भारतीय राज्यघटनेने सर्वांना समान न्याय, बंधुता आणि सर्वांना समान मूल्य देणारी समता दिली. अनेक देशांना मताचा अधिकार मिळण्यासाठी विशेषतः गरीब, महिलांना संघर्ष करावा लागला. भारतीय राज्यघटनेने मात्र पहिल्या दिवसापासूनच सर्वांना समान मताचा अधिकार दिला. त्यातून सर्वसामान्य माणूस त्याच्या कर्तृत्वाच्या बळावर उच्च पदावर पोहोचू शकतो. नागरिकांनी अधिकारासोबतच कर्तव्य पालनाबाबत सजगता दाखवावी असे आवाहन त्यांनी केले.

यावेळी पालकमंत्री श्री. पाटील यांनी पद्मभूषण पूरस्कार जाहीर झालेले शास्त्रज्ञ डॉ. दीपक धर यांच्यासह राज्यातील पद्म पुरस्कार विजेते, राष्ट्रपती पोलीस पदक विजेते पोलीस दलातील अधिकारी कर्मचारी यांचे आपल्या मनोगतात अभिनंदन केले.

जिल्हाधिकारी डॉ. राजेश देशमुख यांना मतदार नोंदनीसाठी केलेल्या नावीन्यपूर्ण उपक्रमाबद्दल भारत निवडणूक आयोगाचा पुरस्कार मिळाल्याबद्दल अभिनंदन करून नागरिकांनी मतदार नोंदणीसाठी पुढे येण्याचे आवाहन केले.

पोलीस दलाने शानदार संचलन करून राष्ट्रध्वजास मानवंदना दिली. यावेळी राज्य राखीव पोलीस बल गट क्र. २, पुणे शहर पोलीस दलाचे पुरुष पोलीस, महिला पोलीस, पिंपरी चिंचवड पोलीस, लोहमार्ग पोलीस, गृहरक्षक दल, वाहतूक पोलीस, वन, अग्निशामक दल तसेच इमॅन्युएल मार्थोमा स्कूल, भारती विद्याभवन स्कूल या शाळांच्या मुले व मुलींच्या पथकांनी शिस्तबद्ध संचलन केले. तसेच पोलीस वाद्यवृंद, श्वानपथक, वज्र वाहन, जलद प्रतिसाद दल वाहन, वरुण वाहन, अग्निशामक वाहन, रुग्णवाहिका, बालभारतीचा चित्ररथ, महानगरपालिकेची स्वच्छ्ता वाहने यांनीही संचलनात सहभागी होऊन सर्वांचे लक्ष वेधले.

शालेय विद्यार्थ्यांनी सादर केलेल्या सांस्कृतिक कार्यक्रमांनी सोहळ्याची सांगता झाली .
000

पुणे -“प्रजासत्ताक दिना”च्या पुर्व संध्येस… देशातील न्याय व्यवस्थेच्या स्वायत्ततेच्या समर्थनार्थ व रक्षणार्थ मुक निदर्शने, लाक्षणिक आंदोलन राजीव गांधी स्मारक समितीची तर्फे करण्यात आले. या प्रसंगी राजीव गांधी स्मारक समितीचे संस्थापक अध्यक्ष व काँग्रेस राज्य प्रवक्ते गोपाळ तिवारी, महाराष्ट्र प्रदेश काँग्रेस लिगल सेल उपाध्य ॲड शाहीद अख्तर, ॲड संदीप ताम्हणकर, ॲड मोहनराव वाडेकर, श्री संजयजी चौगुले, ॲड श्रीकांत पाटील, ॲड फैयाझ शेख, ॲड बाळासाहेब बामणे, ॲड आश्विनी गवारे, ॲड सुरेश नांगरे, ॲड केदार गोराडे, ॲड रशीदा शेख, ॲड संतोष म्हस्के, ॲड रेश्मा शिकलगर, ॲड राजश्री अडसुळ, ॲड शाबीर शेख, ॲड बी आर रोकडे, ॲड पुजा जाधव इ सह अनेक जेष्ठ – कनिष्ठ वकील वर्ग, युक्रांद चे संदीप बर्वे इ सह – महीला वर्ग व स्मारक समितीचे सन्माननीय सदस्य सुर्यकांत उर्फ (नाना) मारणे, के डी पवार, माजी पोलीस उपायुक्त मारूतराव देशमुख, रामचंद्र भाऊ शेडगे, भोला वांजळे, धनंजय भिलारे, नितीन पायगुडे, घनश्याम निम्हण, पै शंकर शिर्के, विनायक पाटील, आरिफ कांचवाला, सुरेश ऊकीरंडे, रमाकांत शिंदे, बाळासाहेब बाणखेले, आशीष गुंजाळ, ज्योती परदेशी, संजय अभंग, प्रकाश आरणे, योगीराज नाईक, ऊदय लेले इ. ऊपस्थित होते..
ऊच्च व सर्वोच्च न्यायालयाच्या न्यायाधीशांच्या नेमणुकां बाबत, केंद्र सरकार अनावश्यक मतप्रदर्शन करीत, न्याय संस्थेची विश्वासार्हता व प्रतिमा डागाळण्याचे प्रयत्न करीत आहे..! कोलेजीयम पध्दतीस व न्यायधिशांच्या नेमणुकी बाबत शिफारसी नाकारणे, त्या परतावून लावणे, विलंब व टाळाटाळ करणे व एखाद्या केस मध्ये ‘सरकार विरोधी ताशेरे ओढणाऱ्या’ न्यायधिशाच्या पदोन्नतीस विरोध करणे अशा प्रकारांमुळे देशाच्या न्यायाधीशांच्या नेमणुकीत मोठा खंड पडत असून, न्यायदानास मोठा विलंब होतो आहे.. व त्याचे परीणाम नागरीकांना भोगावे लागत आहेत.. त्यामुळे लोकशाही अबाधित ठेवण्यासाठी, संविधान व नागरी अधिकारांचे संरक्षण करणाऱ्या “न्याय-संस्थेची स्वायतत्ता” जपण्यासाठीच “नागरी स्वाक्षरी आंदोलन व मुक निदर्शने” करण्यात आल्याचे निमंतिरक गोपाळ तिवारी यांनी या प्रसंगी सांगितले.
यामध्ये विविध पक्ष, सामाजिक संस्था, संघटना व प्रमुख्याने वकील वर्ग मोठ्या प्रमाणात सहभागी झाला.
“भारतीय नागरिकांना मूलभूत अधिकार आणि जबाबदाऱ्या देणारे ‘भारतीय संविधान’ हीच आयडिया ऑफ इंडिया असुन, नागरिकांच्या घटनादत्त अधिकारांचे संरक्षण करण्याचे कर्तव्य न्यायसंस्था करते..त्या मुळे न्यायव्यवस्थेची अस्मिता जपली पाहीजे”.. असे मत ॲड संदीप ताम्हणकर यांनी व्यक्त केले. ॲड शहीद अख्तर यांनी आभार प्रदर्शन केले.