शिवछत्रपती क्रीडा संकुलात राज्यस्तरीय शालेय मैदानी क्रीडा स्पर्धेचे उद्घाटन

पुणे ता. २९: क्रीडा व युवक सेवा संचालनालय अंतर्गत जिल्हा क्रीडा परिषदेच्यावतीने शिवछत्रपती क्रीडा संकुल येथे २९ ते ३१ जानेवारी २०२३ या कालावधीत आयोजित करण्यात आलेल्या राज्यस्तरीय शालेय मैदानी क्रीडा स्पर्धेचे उद्घाटन ऑलिम्पिक खेळाडू बाळकृष्ण अकोटकर यांच्या हस्ते करण्यात आले.

शालेय स्पर्धेमधून दर्जेदार खेळाडू निर्माण होण्याची प्रक्रीया होत असून यामधून भविष्यातील आंतरराष्ट्रीय खेळाडू घडणार आहेत. स्पर्धेत सहभागी होताना खेळाडूंनी आत्मविश्वासाने स्पर्धेत उतरावे. सातत्यपूर्ण सराव केल्यास स्पर्धेत निश्चितपणे यश मिळेल, असे श्री.अकोटकर यांनी यावेळी सांगितले.

कार्यक्रमाला महाराष्ट्र ॲथलेटिक्स संघटनेच्या तांत्रिक समितीचे चेअरमन किशोर शिंदे, पंच प्रमुख चंद्रकांत पाटील, जिल्हा क्रीडा अधिकारी महादेव कसगावडे, तालुका क्रीडा अधिकारी आमसिद्ध सोलनकर उपस्थित होते.

स्पर्धेच्या प्रारंभी श्री. अकोटकर यांच्या हस्ते स्पर्धेचा ध्वज फडकविण्यात आला. पुणे विभागाच्या राष्ट्रीय खेळाडू दिव्यांका लांडे व साक्षी सलगर यांनी खेळाडूंना शपथ दिली. यांनी उपस्थितांचे आभार मानले.

स्पर्धेमध्ये राज्यातील अमरावती, औरंगाबाद, नागपूर, नाशिक, लातुर, मुंबई, पुणे कोल्हापूर व शिवछत्रपती क्रीडापीठ पुणे अशा एकुण नऊ विभागातून १७ व १९ वर्षाखालील मुले व मुली वयोगटात ११०० खेळाडू, संघव्यवस्थापक, तांत्रिक अधिकारी सहभागी झाले आहेत.

आजचे निकालः-
१७ वर्षाखालील मुलेः-
३ हजार मी. धावणे-१) स्वराज जोशी, कोल्हापूर २) हर्षित कदम, कोल्हापूर ३) सचिन भारद्वाज, पुणे

उंचउडी- १) सार्थक निंबाळकर, शिवछत्रपती क्रीडापीठ २) आदेश धंडाळे, शिवछत्रपती क्रीडापीठ ३) आल्हाद राउत, नागपूर

थाळीफेक- १) स्वराज गायकवाड, पुणे २) पुष्कर माळी, कोल्हापूर ३) सोहम थोरात, कोल्हापूर

१७ वर्षाखालील मुलीः-
थाळीफेक- १) भक्ती गावडे, पुणे २) वेदिका जगताप, पुणे ३) सुनिता दगडे, औरंगाबाद

उंचउडी- १) प्रतिक्षा अडसुळे, कोल्हापूर २) आंचल पाटील, मुंबई ३) दर्शना जाधव, कोल्हापूर

३ हजार मी. धावणे- १) जान्हवी हिरुडकर, नागपूर २) शकीला वसाळे, नाशिक ३) साक्षी भंडारी, पुणे

१९ वर्षाखालील मुलेः-
लांबउडी- १) शहानवाझ खान, मुंबई २) ऋषीकेश देठे, पुणे ३) शुभम गोंडे, पुणे

गोळाफेक- १) सुभाष चव्हाण, अमरावती २) शरद बागडी, कोल्हापूर ३) आर्यन आघाव, औरंगाबाद

३ हजार मी. धावणे- १) सुजित तिकोडे, कोल्हापूर २) आदित्य पाटील, कोल्हापूर ३) कुमार जाधव, पुणे

१९ वर्षाखालील मुलीः-
गोळाफेक- १) राजनंदिनी सोनवणे, कोल्हापूर २) किरन नायर, पुणे ३) सुर्याश्री धोंडरकर, नागपूर

३ हजार मी. धावणे- १) सानिका रुपनर, सांगली २) गायत्री पाटील, मुंबई ३) आरती पावरा, नाशिक

लांबउडी- १) कल्पना माडकामी, औरंगाबाद २) गायत्री कासुल्ला, मुंबई ३) मधुरा खांबे, पुणे

अंदाज होता दक्षिण पुण्यातील तिघांवर कारवाईचा :प्रत्यक्षात कारवाई झाली पिंपरीत ..

पुणे -ईडीच्या तपासात अडथळा आणणाऱ्या तिघांना पिंपरी पोलिसांनी बेड्या ठोकल्या आहेत. शुक्रवारी सेवा विकास बँकेचे माजी चेअरमन अमर मूलचंदानीची चौकशी करण्यासाठी ईडीचे अधिकारी आले तेव्हा त्यांच्या तपासात अमर मूलचंदानीच्या दोन्ही भावाने आणि मुलाने सहकार्य केले नाही. उलट पुरावा नष्ट केला. तपासात अडथळे आणल्याचा ठपका ठेवत रात्री पिंपरी पोलिसांनी अमर मूलचंदानीच्या दोन्ही भावाला आणि भावाच्या एका मुलाला ताब्यात घेतले आहे. तसेच, आणखी दोन महिलांना अटक होण्याची शक्यता आहे. त्यांना रात्री नोटीस बजावून सोडून देण्यात आले होते.

दरम्यान सुमारे २ महिन्यापूर्वीच इडी ची कारवाई पुण्यात होईल असे वाटत असताना दक्षिण पुण्यावर इडी च्या नजरेत तीन नेते आले असल्याची माहिती समजत होती परंतु प्रत्यक्षात आता पिंपरीत कारवाई झाली आहे त्यामुळे यापुढे पुन्हा दक्षिण पुण्यात कारवाई होणार कि नाही ? याबाबत साशंकता असल्याचे सूत्रांकडून समजते आहे .

शुक्रवारी पिंपरी-चिंचवड मधील सेवा विकास बँकेचे माजी अध्यक्ष अमर मूलचंदानींच्या घरावर ईडीने रेड टाकली. मूलचंदानींसह संचालकांवर बनावट कागदपत्रांच्या आधारे १२४ कर्ज वाटप केल्याचे आणि यातून ४०० कोटींहून अधिकचा घोटाळा झाल्याचे समोर आले होते. पिंपरी- चिंचवड पोलिसांनी याप्रकरणी अमर मूलचंदानी सह पाच जणांना अटक ही केली होती. काही महिन्यांपूर्वी मूलचंदानी जामिनावर बाहेर आले आणि शुक्रवारी ईडी ने छापा टाकला. आरबीआयने प्रशासक नेमलेल्या या बँकेत हजारो ठेविदारांच्या कोट्यवधींचा पैसा अडकून आहे. सध्या अमर मूलचंदानी हे पुण्यातील ससून रुग्णालयात उपचार घेत असून ते ईडी ने त्यांना ताब्यात घेतलेले आहे. 

पिंपरीतील दी सेवा विकास सहकारी बँकेत बेकायदा कर्जवाटप आणि आर्थिक गैरव्यवहार प्रकरणी रिझर्व्ह बँक ऑफ इंडियाने (आरबीआय) कारवाई केली होती. आरबीआयने दोन महिन्यांपूर्वी सेवा बँकेचा परवाना रद्द केला होता. बँक गैरव्यवहार प्रकरणी ईडीने कारवाई करण्याची मागणी ठेवीदारांकडून करण्यात आली होती. त्यानंतर शुक्रवारी (२८ जानेवारी) ईडीच्या पथकाने पिंपरीतील अमर मूलचंदानींचे गणेश हाॅटेल; तसेच तपोवन मंदिराजवळील मिस्ट्री पॅलेस या इमारतीतील मूलचंदानी यांच्या निवासस्थानी कारवाई केली. ईडीचे अधिकारी आणि पथक सकाळी साडेसहाच्या सुमारास मूलचंदानी यांच्या निवासस्थानी पाेहचले. तेव्हा सदनिकेचा दरवाजा बंद होता. ईडीच्या अधिकाऱ्यांनी दरवाजा वाजविला. तेव्हा सदनिकेतून प्रतिसाद देण्यात आला नाही. दरवाजा वाजविण्यात आल्यानंतर उघडण्यात आला नाही. अखेर सकाळी सव्वा आठच्या सुमारास पिंपरी पोलीस ठाण्याचे वरिष्ठ पोलीस निरीक्षक शंकर अवताडे यांच्याशी ईडीच्या अधिकाऱ्यांनी संपर्क साधला. तेव्हा पोलिसांचे पथक तेथे पोहोचले. त्यानंतर मूलचंदानी कुटुंबीयांनी दरवाजा उघडला.

ईडीचे अधिकारी तसेच पथक दोन तास मूलचंदानी यांच्या निवासस्थानसमोर थांबले होते. या काळात मूलचंदानी कुटुंबीयांनी पुरावे नष्ट करुन तपासात असहकार्य केल्याचे ईडीचे अधिकारी श्रीवास्तव यांनी फिर्यादीत म्हटले आहे.

पुणे-महाराष्ट्र राज्य कला संचलनालया तर्फे सन २०२२ मध्ये घेण्यात आलेल्या एलिमेंट्री ड्रॉइंग ग्रेड परीक्षेचा निकाल आजच जाहीर झाला असून गणेशखिंड रोडवरील मॉडर्न हायस्कूल या शाळेचा निकाल शाळेचा  एलिमेंट्री ड्रॉइंग ग्रेड परीक्षेचा निकाल  ९४.६४% इतका लागला आहे.कु. वावरे अनुष्का-९अ व सावंत प्रसाद-९अ हे दोघे A ग्रेड मिळवून उत्तीर्ण झाले असून  अस्वले राजनंदिनी–९अ, बटवाल अवनी- ८अ, गायकवाड कार्तिकी-९अ, जाधव अस्मिता-९अ, काळे स्नेहल-९अ,रानवडे सई-८अ,देशमुख वेदांत-९अ,दहीभाते आकाश-९क,खंडागळे हर्षवर्धन- ९अ,उंडे सत्यजित-८अ हे विद्यार्थी B ग्रेड मिळून उत्तीर्ण झाले आहेत ४१ विद्यार्थी C ग्रेड मिळवून उत्तीर्ण झाले आहेत.      इंटरमिजिएट ड्रॉइंग ग्रेड परीक्षेचा निकाल १००% इतका लागला असून कुमारी बराटे ईश्वरी-९अ, कुमारी सोनवणे सिद्धी -१०ड, कुमारी शिंदे प्रीती-१०ड, यादव महेश-१०ड हे विद्यार्थी A ग्रेड मिळवून उत्तीर्ण झाले असून उबाळे शुभम हा विद्यार्थी बी ग्रेड मिळवून उत्तीर्ण झाला आहे. १० विद्यार्थी C ग्रेड मिळवून उत्तीर्ण झाले आहेत.      विद्यार्थ्यांना या परीक्षेसाठी अधिक मार्गदर्शन  मुख्याध्यापिका श्रीमती सुरेखा कामथे, शाळेतील कलाशिक्षक तथा पर्यवेक्षक शीलरतन बंगाळे यांचे लाभले.  प्रोग्रेसिव्ह एज्युकेशन सोसायटी चे कार्याध्यक्ष गजानन एकबोटे , कार्यवाह शामकांत देशमुख , शाळा समिती अध्यक्ष दीपक मराठे , प्र मुख्याध्यापक चित्तरंजन कांबळे ,मॉडर्न हायस्कूल गणेशखिंड चे समन्वयक उद्धव खरे , उपमुख्याध्यापिका सौ शारदा साबळे यांनी सर्व यशस्वी विद्यार्थ्यांचे अभिनंदन केले. 

सुस्पष्ट परराष्ट्र धोरणामुळे भारताची खंबीरता जगात पोहोचली-उपमुख्यमंत्री

पुणे दि.२८: भारत मार्ग हा आपल्या शाश्वत विचारांवर उभा राहिला असून त्यावर आधारीत सुस्पष्ट आणि कोणाच्याही दबावात नसलेले परराष्ट्र धोरण राबवण्यात येत असल्याने भारताची खंबीरता आणि क्षमता जगात पोहोचली, असे प्रतिपादन उपमुख्यमंत्री देवेंद्र फडणवीस यांनी केले.

विचार साधना पुणे आणि महाराष्ट्र एज्युकेशन सोसायटी यांच्या संयुक्त विद्यमाने आयोजित परराष्ट्र मंत्री डॉ. एस. जयशंकर लिखित ‘द इंडिया वे : स्ट्रॅटेजीस फॉर ॲन अनसर्टेन वर्ल्ड’ या मूळ पुस्तकाचा मराठी अनुवाद ‘भारत मार्ग: जगातील अनिश्चितता आणि भारताची रणनीती’ या पुस्तकाच्या प्रकाशन सोहळ्यात ते बोलत होते. कार्यक्रमाला पुस्तकाचे लेखक परराष्ट्रमंत्री डॉ. एस.जयशंकर, विजय चौथाईवाले, भारतीय विचार साधनाचे अध्यक्ष डॉ.गिरीश आफळे, महाराष्ट्र एज्युकेशन सोसायटीच्या नियामक मंडळाचे अध्यक्ष राजीव सहस्रबुद्धे आदी उपस्थित होते.

युरोपचा विचार म्हणजे जगाचा विचार नाही हे सुनावण्याचे काम परराष्ट्रमंत्री डॉ.जयशंकर यांनी केले, ही खंबीरता भारताच्या परराष्ट्र मंत्र्यात अनेक वर्षांनी पहायला मिळाली असे नमूद करून उपमुख्यमंत्री श्री.फडणवीस म्हणाले, पंतप्रधान नरेंद्र मोदी यांनी भारताचे धोरण देशाहिताचा विचार करणारे असून कोणाच्याही दबावात येणारे नाही हे जगाला दाखवून दिले. भारत जगाच्या पाठीवर मजबूत देश म्हणून उभा राहिला आहे आणि त्याचवेळी अमेरिका किंवा रशिया यांच्या दबावात ज्यांना यायचे नाही असे सगळे देश मोदींजींच्या नेतृत्वावर विश्वास ठेवून भारताच्या पाठीशी उभे आहेत. हे भारताच्या परराष्ट्र धोरणाचे यश आहे.

जगातील देशांचा विश्वास हेच आपले यश
जी-२० पूर्वी सव्वाशेपेक्षा अधिक देश पंतप्रधान नरेंद्र मोदी यांच्या नेतृत्वात चर्चा करून आपली भूमिका भारताने मांडावी असे सांगतात तेव्हा आपल्या परराष्ट्र धोरणाने प्राप्त केलेली शक्ती लक्षात येते. कोविडच्या काळातही अमेरिकेने केवळ भारतासाठी आपले धोरण बदलून भारताला आवश्यक कच्ची सामुग्री दिली. यावरून भारताने मिळवलेले यश लक्षात येते. आजच्या परिस्थितीत मजबूत देश म्हणून भारत पुढे येत असताना पंतप्रधानांसोबत आपली क्षमता पणाला लावणाऱ्या डॉ.जयशंकर यांचे विचार पुस्तकाच्या माध्यमातून वाचकांसमोर येणे ही पर्वणी आहे, असे त्यांनी सांगितले.

परराष्ट्र धोरणासंदर्भात भारतीय विचार दर्शविणारे पुस्तक
उपमुख्यमंत्री म्हणाले, पुस्तकात परराष्ट्र धोरणावरील तीन ओझी सांगितली आहेत. पहिले फाळणीचे, दुसरे उशिरा सुरू करण्यात आलेल्या आर्थिक सुधारणांचे आणि तिसरे आण्विकदृष्टया आपण सक्षम असतानाही त्याला पुढे नेण्यात आपण गमावलेला काळ. त्यामुळे परराष्ट्र धोरणावर परिणाम झाल्याचे पुस्तकात मांडण्यात आले आहे. त्यासोबत चीनने रशिया आणि अमेरिकेच्या मदतीने प्रगती साधली असताना आपण का मागे पडलो याचा उल्लेखही पुस्तकात आहे. आत्ताची भूराजकीय परिस्थिती, तंत्रज्ञान आणि कृत्रिम प्रज्ञा यांचा देशावर काय परिणाम होणार आहे याची माहिती पुस्तकात आहे.

अत्यंत सोप्या भाषेत आणि प्रभावीपणे लेखन झालेल्या पुस्तकाचा तितक्याच सोप्या आणि सुंदर भाषेत अनुवाद करण्यात आला आहे. विविध समूहांना भारताचा विचार या पुस्तकातून समजेल. जागतिकीकरणाच्या संपूर्ण परिस्थितीत भारताची भूमिका स्पष्टपणे कळली पाहिजे. परराष्ट्र धोरणाचा परिणाम प्रत्येक व्यक्तीच्या जीवनावर होतो म्हणून त्याची माहिती प्रत्येकाला मिळणे आवश्यक आहे. यादृष्टीने हे पुस्तक महत्वाचे असून ते अधिकाधिक वाचकांपर्यंत पोहोचविण्याचे काम करण्यात येईल, असेही श्री.फडणवीस म्हणाले.

क्षमता आणि सहकार्याचा भारत मार्गच देशासाठी उपयुक्त-डॉ.एस.जयशंकर
परराष्ट्र मंत्री डॉ.एस.जयशंकर म्हणाले, जागतिकीकरण हे आजची वास्तविकता असेल तर त्याचे दुष्परिणाम कमी करण्यासोबत त्यातील संधींचाही विचार करावा लागेल. पुरवठा साखळी आणि डेटा व्यवस्थापन हे जगात मोठे आव्हान आहे. उद्योगाला प्रोत्साहन देऊन देशात तंत्रज्ञान आणि उत्पादनाची क्षमता वाढविण्याचे प्रयत्न सुरू आहेत. भारत मार्ग जगाच्या आजच्या परिस्थितीत इतरांसाठी उपयुक्त असणारा विचार आहे. प्रगती, क्षमता, राष्ट्रीय आणि आंतरराष्ट्रीय विचार अनुसरणारा आणि विकसनशील देशांचा आवाज बनणारा भारतमार्ग देशासाठी उपयुक्त ठरणार आहे. या मार्गावर पुढे गेल्यास भारत जगाचे नेतृत्व करू शकेल.

परराष्ट्र धोरणासाठी सहा महत्वाची सूत्रे
स्वावलंबन, आत्मविश्वास, विषयानुसार सहकार्य, राष्ट्रीय सुरक्षा, जागतिक अजेंडा, इतर देशातील भारतीयांचा विचार ही परराष्ट्र धोरणाची सहा प्रमुख सूत्रे आहेत. ‘मेक इन इंडिया’ हे देशाच्या प्रगतीचे मुख्य सूत्र आहे. देशांतर्गत पुरवठा साखळीही मजबूत करून जागतिक बाजाराशी जोडले जायला हवे. त्यासाठी सूक्ष्म व मध्यम उद्योगांना प्रोत्साहन द्यावे लागेल. आव्हानात्मक परिस्थितीत देशाच्या हिताचे निर्णय घ्यावे लागतील. युक्रेन युद्धाच्या परिस्थितीत भारताने हेच केले. विविध क्षेत्रात सामंजस्य प्रस्थापित करताना आपल्या आणि जगाच्या हिताचा विचार करणे आवश्यक आहे. ‘वसुधैव कुटुंबकम्’ या भारतीय विचारनुसार जगाच्या कल्याणाचा विचार योग्य ठरतो, हा विचार भारत मार्ग दर्शवतो.

सर्व राज्यांच्या कल्याणाच्या विचार करणारे परराष्ट्र धोरण हवे
चांगले परराष्ट्र धोरणासाठी देशातील राज्यांचाही सहभाग आणि सर्व राज्यांच्या कल्याणाचा विचार असायला हवा. परराष्ट्र धोरण ठरवतानाही सामान्य जनांच्या भावनादेखील लक्षात घेणे गरजेचे आहे. इतिहासापासून आपल्याला शिकायला हवे, लक्षात ठेवायला हवे, त्याची समीक्षा व्हायला हवी. भविष्यात जगाच्या बाबतीत जागरूक रहायला हवे. जग आज आपल्या उंबरठ्यावर पोहोचले आहे. जगात होणाऱ्या घटनांचे परिणाम आपल्या देशावरही होतात. जग बदलत असताना आपल्यालाही त्या वेगाने बदलावे लागेल आणि या पार्श्वभूमीवर येणाऱ्या पिढीला जगाच्या बाबतीत अधिक माहिती असणे आवश्यक आहे.

चीन जागतिक शक्ती असून भविष्यात महाशक्ती बनण्याची शक्यता लक्षात घेता त्या देशासंबंधातील रणनिती तयार करावी लागेल. जपानचे तंत्रज्ञान आणि सुरक्षा व संरक्षण तंत्रज्ञानाचा लाभही घ्यायला हवा. भारताचा प्रभाव आज हिंद महासागराच्या पुढे जावून प्रशांत महासागरापर्यंत पोहोचला आहे. या सर्व बाबींचा विचार करता भारताला आपल्या विचारांवर आधारीत धोरण ठरवावे लागेल असे पुस्तकात मांडण्यात आल्याचे त्यांनी सांगितले.

श्री.चौथाईवाले यांनी यावेळी ‘भारत मार्ग’ या पुस्तकाविषयी माहिती दिली. पररराष्ट्र धोरणाविषयी अत्यंत सोप्या शब्दात मांडणी पुस्तकात करण्यात आल्याचे त्यांनी सांगितले.

डॉ.आफळे यांनी कार्यक्रमाचे प्रास्ताविक केले. भारतीय विचार साधनाने आतापर्यंत ६३० पुस्तके प्रकाशित केल्याचे त्यांनी सांगितले. संस्थेला महाराष्ट्र शासनाचा उत्कृष्ट प्रकाशन संस्थेसाठी असलेला श्री. पु. भागवत पुरस्कार मिळाला असल्याची माहिती त्यांनी दिली.

तत्पूर्वी उपमुख्यमंत्री श्री.फडणवीस यांच्या हस्ते पुस्तकाचे प्रकाशन करण्यात आले. पुस्तकाचा मराठीत अनुवाद करणाऱ्या सविता आठवले यांचा परराष्ट्र मंत्र्यांच्या हस्ते सत्कार करण्यात आला.
000

न्याती माहेश्वरी फुटबॉल लीग, महेश सेवा संघ युवा समितीतर्फे आयोजन

पुणे : एमजेएम ग्लॅडिएटर, श्री माव्हरिक्स या संघांनी महेश सेवा संघ युवा समितीतर्फे आयोजित न्याती माहेश्वरी सिक्स-अ-साइड फुटबॉल लीगमध्ये चमकदार कामगिरी करून आपापल्या गटात अव्वल क्रमांक पटकावला.

गरवारे महाविद्यालयाजवळील सेंट्रल मॉलमधील फुटबॉल ग्राउंडवर ही स्पर्धा सुरू आहे. स्पर्धेचे उद्धाटन  महाराष्ट्र विद्या प्रचारक मंडलच्या सचिव सुशीला राठी यांच्या हस्ते झाले. यावेळी महेश सेवा संघ युवा समिती अध्यक्ष विशाल राठी, सचिव केतन जाजू,प्रोजेक्ट चेअरमन आकाश झंवर,प्रोजेक्ट सेक्रेटरी ऋषी भुतडा, वेदांत करवा, महेश सेवा संघ सचिव ओमप्रकाश गट्टानी, उद्योजक गिरिधर काळे, डाॅ. प्राजक्ता काळे उपस्थित होते. 

अ गटात ग्लॅडिएटर संघाने पाच पैकी चार लढती जिंकल्या, तर एक लढत गमावली. ग्लॅडिएटर संघ १२ गुणांसह अव्वल क्रमांकावर आहे. पीपी रॉयल्स संघ दोन लढती जिंकल्या, तर तीन लढती बरोबरीत सोडविल्या. नऊ गुणांसह हा संघ दुस-या क्रमांकावर आहे. रेडिएन्ट रोबेल्स हा संघ ८ गुणांसह तिस-या क्रमांकावर राहिला. 

ब गटात श्री माव्हरिक्स संघाने पाच लढतींपैकी तीन लढती जिंकल्या, तर दोन लढती बरोबरीत सोडविल्या. ११ गुणांसह माव्हरिक्स संघ अव्वल क्रमांकावर आहे. तपाडियाज थंडर संघाने पाच पैकी दोन लढती जिंकल्या, तर दोन लढती बरोबरीत सोडविल्या, एक लढतीत या संघाला पराभव पत्करावा लागला. थंडर संघ आठ गुणांसह दुस-या क्रमांकावर आहे. साई मिरॅकल डिस्ट्रॉयर्स संघ सहा गुणांसह तिस-या क्रमांकावर आहे.निकाल – एनपीएव्ही निंजाज – १ (निराज सोमानी) वि. वि. साई मिरॅकल डिस्ट्रॉयर्स – ०; व्हाइटफिल्ड  वारलॉर्ड्स – ६ (रोहित राठी ४, अभिनंदन बी. १) वि. वि. व्हरटेक्स अससिन्स – १ (यश दरक); 

श्री माव्हरिक्स – २ (मानस दरक १, अक्षत १) वि. वि. तपाडियाज थंडर – ०; पीपी रॉयल्स – ० बरोबरी वि. सीएनजी राठी रॉयल्स – ०; एमजीएम ग्लॅडिएटर्स – ३ (नवल मालपाणी १, निहार झंवर १, श्लोक झंवर १) वि. वि. रेडिएंट रेबेल्स – १ (नीरज डार्गा १); श्री माव्हरिक्स – २ (पवन १, अंकित मुंदडा १) वि. वि. एनपीएव्ही निंजाज – ०; एमजीएम ग्लॅडिएटर्स – १ (यश तोष्णीवाल १) बरोबरी वि. व्हरटेक्स अससिन्स – १ (निहार झंवर १) ; रेडिएंट रेबेल्स – २ (नीरज डार्गा १, हृषीकेश १) वि. वि. व्हाइटफिल्ड – १ (अभिनंदन बी. १) ; पी. पी. रॉयल्स – १ (धीर मंत्री १) वि. वि. एमजीएम ग्लॅडिएटर्स – ०; श्री माव्हरिक्स – ४ (सर्वेश २, अक्षत २) वि. वि. फँटम -०; पी. पी. रॉयल्स – २ (सागर कारवा १, भाग्येश १) बरोबरी वि. व्हाइटफिल्ड – २ (अभिनंदन बी. १, जय कारवा १) ; तपाडिया थंडर्ज – ३ (वरुण पोरवाल २, वेदांत मालू १) वि. वि. फँटम – ०.   

पुणे,
महाराष्ट्राच्या खेळाडूंनी खेलो इंडिया गेम्स मध्ये अधिकाधिक पदके मिळवावी, पण आपल्याला भारतासाठी खेळावयाचे आहे हे ध्येय डोळ्यासमोर ठेवीत आपल्या क्षमतेच्या शंभर टक्के इतकी कामगिरी करावी, असे आवाहन आंतरराष्ट्रीय खेळाडू शकुंतला खटावकर, शांताराम जाधव व निखिल कानेटकर यांनी केले.
मध्यप्रदेश मध्ये होणाऱ्या खेलो इंडिया युथ गेम्स 2022-23 साठी महाराष्ट्राच्या खेळाडूंचे बालेवाडी येथे शिवछत्रपती क्रीडा नगरीत प्रशिक्षण शिबिर आयोजित करण्यात आले होते. या शिबिरातील सहभागी खेळाडूंना खटावकर, जाधव व कानेटकर यांच्या हस्ते शुभेच्छा देण्यात आल्या. यावेळी जेष्ठ कबड्डी प्रशिक्षक सचिन भोसले, महाराष्ट्राचे पथक प्रमुख चंद्रकांत कांबळे, नोडल अधिकारी अनिल चोरमले तसेच वरिष्ठ अधिकारी सुहास पाटील, व्यवस्थापक अरुण पाटील व श्रीमती अडसूळ आदी यावेळी उपस्थित होते.
खेलो इंडिया गेम्स हे नवीन खेळाडूंसाठी आपले कौशल्य दाखविण्याची हुकमी संधी आहे या संधीचा खेळाडूंनी मनापासून फायदा घेतला पाहिजे. असे सांगून अजून पुरस्कार विजेते कबड्डीपटू व प्रशिक्षक शांताराम जाधव म्हणाले,” क्रीडा क्षेत्रात करिअर करण्यासाठी आता भरपूर संधी उपलब्ध आहेत, हे लक्षात घेऊन खेळाडूंनी या क्षेत्रात सर्वोत्तम करिअर कसे करता येईल हे लक्षात ठेवले पाहिजे. चांगल्या करिअर बरोबरच स्वतःला आदर्श व्यक्ती म्हणून घडवण्यासाठी क्रीडाक्षेत्र हे उत्तम व्यासपीठ आहे याचीही जाणीव खेळाडूंनी ठेवली पाहिजे.”
अर्जुन पुरस्कार विजेत्या कबड्डीपटू व प्रशिक्षिका शकुंतला खटावकर यांनी सांगितले,” खेळाडूंना अतिशय अनुभवी व ज्येष्ठ प्रशिक्षकांकडून सर्वोत्तम प्रशिक्षण मिळाले आहे. स्वतःकडे असलेले कौशल्य पणाला लावून महाराष्ट्राला अधिकाधिक सुवर्णपदके कशी मिळतील असा प्रयत्न खेळाडूंनी केला पाहिजे.”
खेळाडूंनी फक्त महाराष्ट्राला पदके कशी मिळवता येतील याचा विचार न करता आपल्याला येथील पदकांचा फायदा घेत जागतिक स्तरावर करिअर करायचे आहे असे ध्येय डोळ्यासमोर ठेवले पाहिजे. खेळाडूंनी अल्प संतुष्ट न राहता सतत सर्वोच्च यश मिळवण्याची महत्त्वाकांक्षा ठेवली पाहिजे असे आवाहन आंतरराष्ट्रीय बॅडमिंटन प्रशिक्षक निखिल कानेटकर यांनी केले.
खेलो इंडिया युथ गेम्स मध्ये सहभागी होणाऱ्या खेळाडूंचा शुभेच्छा समारंभाप्रसंगी सहसंचालक चंद्रकांत कांबळे व नोडल अधिकारी अनिल चोरमले यांनी खेळाडूंना मार्गदर्शन करून त्यांचा आत्मविश्वास वाढविला. या कार्यक्रमाचे अरुण पाटील यांनी सूत्रसंचालन केले तर श्रीमती अडसूळ यांनी आभार मानले.

महाराष्ट्राच्या महिला आणि पुरुष खो-खो संघाचे जबलपूर मध्ये आगमन; सोमवारपासून विजयी मोहीम

पुणे
निर्विवाद वर्चस्वासाठी उत्सुक असलेले महाराष्ट्राच्या महिला आणि पुरुष खो खो संघांचे शनिवारी मोठ्या उत्साहात जबलपूर मध्ये आगमन झाले.
प्रचंड मेहनत आणि जिद्दीचे बळावर सुवर्ण क्रांती घडवून जबलपूर मध्ये आपल्या संघाचे यश झगमगण्यासाठी युवा खेळाडू सज्ज झाले आहेत. सोमवार पासून पाचव्या सत्रातील खेलो इंडिया युथ गेम्स ला सुरुवात होत आहे. या स्पर्धेतील खो-खो इव्हेंटचे जबलपूर येथे आयोजन करण्यात आले आहे. त्यामुळे महाराष्ट्राचे संघ दमदार सलामी देत आपल्या किताबाच्या मोहिमेला शानदार सुरुवात करण्यासाठी उद्यापासून मैदानावर उतरणार आहे. राष्ट्रीय स्पर्धेतील सर्वोत्तम कामगिरीचा अनुभव असलेले महाराष्ट्राचे युवा खेळाडू यंदा किताबाची प्रभाव दावेदार मानली जात आहेत. त्यामुळे महाराष्ट्र संघाला सोनेरी यशाची आपली परंपरा कायम ठेवण्याची संधी आहे.
घरच्या मैदानावर कसून सराव
तज्ञ प्रशिक्षक आणि अत्याधुनिक सुविधांनी परिपूर्ण असलेल्या बालेवाडी मध्ये महाराष्ट्राच्या महिला आणि पुरुष खो-खो संघांनी कसून सराव केला आहे. त्यामुळे किताबावरचे आपले वर्चस्व अबाधित ठेवण्यासाठी महाराष्ट्राचे दोन्ही संघ सज्ज झाले आहेत. सर्वोत्तम कामगिरी करण्याच्या इराद्याने दोन्ही संघांनी जय्यत तयारी केली आहे.

राष्ट्रीय स्पर्धेचा अनुभव सरस
महाराष्ट्राच्या महिला आणि पुरुष संघामध्ये यंदा सहभागी असलेल्या युवा खेळाडूंना राष्ट्रीय स्पर्धेतील सर्वोत्तम कामगिरीचा प्रचंड अनुभव आहे. याच अनुभवाच्या बळावर खेलो इंडिया युथ गेम्स स्पर्धा गाजवण्याचा खेळाडूंनी निर्धार केला आहे. त्यामुळे यंदाही महाराष्ट्राला आपला दबदबा कायम ठेवता येणार आहे. नुकत्याच झालेल्या युवा गटाच्या राष्ट्रीय स्पर्धेत महाराष्ट्र खेळाडूंची कामगिरी लक्षवेधी ठरली. यात सोनेरी यशाच्या कामगिरीला उजाळा देण्यासाठी महाराष्ट्राचे संघ उत्सुक आहेत.

विमान वारीने गाठली जबलपूर नगरी
महाराष्ट्र महिला आणि पुरुष खो खो संघांनी खास विमान वारीतून मध्य प्रदेश मधील जबलपूरची नगरी गाठली आहे. दोन्ही संघातील 30 खेळाडू आणि सपोर्ट स्टाफ यांच्यासह 29 जणांना विमानाने जबलपूर मध्ये आगमन करता आले. पुण्यातील कसून सरावानंतर दोन्ही संघ खास बसने मुंबई येथे दाखल झाला होता. त्यानंतर दुपारी एक वाजता मुंबईतून जबलपूर कडे संघाने उड्डाण घेतली.