पुणे : परदेश दौरे करायला पंतप्रधानांकडे वेळ आहे, पण जळणाऱ्या मणिपूरला भेट देण्यासाठी वेळ नाही. चार महिन्यांपासून देशातले हे राज्य हिंसाचार, अत्याचाराने जळते आहे, पण पंतप्रधानांना त्याविषयी संसदेत निवेदन करण्याइतकीही संवेदनशीलता नाही. अशा परिस्थितीत, एका संस्थेचा पुरस्कार स्वीकारण्यासाठी पुण्यात येणाऱ्या पंतप्रधान मोदी यांना काळे झेंडे दाखवून तीव्र निषेधाचे आंदोलन करण्याचा निर्णय इंडिया फ्रंट, पुणे तर्फे घेण्यात आला आहे. १ ऑगस्ट रोजी सकाळी १० वाजता इंडिया फ्रंट, पुणे चे सर्व सहकारी पक्ष, कार्यकर्ते, पदाधिकारी आणि सर्वसामान्य नागरिक , जेष्ठ समाजनेते डॉ. बाबा आढाव यांच्या मार्गदर्शनाखाली आंदोलन करून विरोध दर्शवणार आहेत, अशी माहिती प्रदेश कॉंग्रेस पक्षाचे उपाध्यक्ष माजी आमदार मोहन जोशी यांनी शनिवारी पत्रकारांशी बोलताना दिली.

यावेळी इंडिया फ्रंट, पुणे चे समविचारी असणारे राष्ट्रवादी कॉंग्रेस पक्षाचे शहराध्यक्ष प्रशांत जगताप (शरद पवार गट),  माजी आमदार जयदेव गायकवाड,शिवसेना (ठाकरे गट) शहरप्रमुख संजय मोरे, गजानन थरकुडे, माजी आमदार रमेश बागवे, कम्यूनिस्ट पक्षाचे कॉम्रेड अजीत अभ्यंकर, तसेच नितीन पवार, लता भिसे, मेधा थत्ते, दत्ता पाकिरे, अनिस अहमद, संदीप बर्वे ,इब्राहीम खान,दीपक पाटील, सुरेखा गाडे  आदी उपस्थित होते.

प्रशांत जगताप म्हणाले,‘मणिपूर जळत असताना, पंतप्रधान वाजतगाजत पुरस्कार स्वीकारतात, हे दुर्देवी आहे. देशातले एक राज्य अराजक अनुभवत असताना, पंतप्रधानांना तिथे जावेसे वाटत नाही, याचा तीव्र निषेध करण्यासाठी आम्ही ‘प्राईम मिनिस्टर गो टू मणिपूर, आन्सर टू पार्लमेंट’ असा हॅशटॅग चालवणार आहोत. या पुरस्कार स्वीकारण्याच्या निमित्ताने पंतप्रधानांचा खरा चेहेरा सर्वांसमोर आला आहे. आम्ही इंडिया फ्रंटच्या रूपाने सर्वजण मणिपूरसोबत आहोत,’.

शिवसेना उद्धव बाळासाहेब ठाकरे गटाचे पुणे शहरप्रमुख संजय मोरे म्हणाले कि पंतप्रधान नरेंद्र मोदी ‘मन कि बात’ मध्ये बोलतात, एकटेच बोलतात मात्र संसदेत बोलत नाही ही अधोगती आहे .

अजित अभ्यंकर यांनी ‘कष्टकरी आणि कामगारवर्ग मोदींविरोधी आंदोलनात सहभागी होणार असल्याचे सांगितले. ‘कामगार कायदे उध्वस्त करून, साऱ्यांना कॉर्पोरेट्सच्या ताब्यात देण्याचा कंत्राटी उद्योग चालू देणार नाही. कामगार संघटना संयुक्त कृती समिती थेट रस्त्यावर उतरून आंदोलनात सहभागी होईल, असे ते म्हणाले,

लता भिसे सोनावणे यांनी मोदी यांनी देशातील नागरिकांचे संविधानिक हक्कच मोडीत काढल्याची टीका केली. विद्वेषाचे राजकारण करणाऱ्यांचा आम्ही रस्त्यावर उतरून निषेध करणार आहोत. ९३ वर्षांच्या ज्येष्ठ विचारवंत बाबा आढावांना रस्त्यावर उतरावे लागावे, ही नामुष्की मोदींनी आणली आहे, असे त्या म्हणाल्या. मेधा थत्ते म्हणाल्या,‘मणिपूरमध्ये अत्याचार सुरू असताना पंतप्रधान आणि गृहमंत्री काय करत होते, हा प्रश्न सर्वांनी त्यांना विचारला पाहिजे.

यावेळी प्रमुख इंडिया फ्रंट पुणेचे अनेक पधादिकारी व कार्यकर्ते उपस्थित होते.

पुणे- हिंगणे खुर्द भागात बीडीपी झोन असताना रस्ता बनविण्यासाठी तळजाई टेकडीचा भाग फोडून जिल्हाधिकारी कार्यालयातील खनिकर्म विभागाने दिलेल्या पत्राद्वारे जागा मालक आणि विकासकांनी नैसर्गिक नाला बुजवत त्या जागी रस्ता तयार केला आहे. भूमाफियांकडून या परिसराचे सपाटीकरण जोरात सुरु असल्यामुळे हा भाग धोकादायक झालेला असून येथे संभाव्य दुर्घटना टाळण्यासाठी महानगरपालिका व जिल्हाधिकारी कार्यालयाकडून तातडीने उपाययोजना करण्याची गरज निर्माण झाली आहे. माळीण, इर्शाळवाडीसारखी दुर्घटना याठिकाणी घडण्याची भीती व्यक्त करत यासंदर्भात शिवसेनेचे प्रसिद्धीप्रमुख व पर्यावरणप्रेमी अनंत घरत यांनी महापालिका आयुक्त आणि जिल्हाधिकाऱ्यांना पत्र पाठविले. त्यानंतर घरत यांनी महापालिकेकडून माहिती घेतली असता हा पत्रव्यवहार समोर आला. त्यामुळे या प्रकरणी जिल्हाधिकाऱ्यांनी दिलेले हे पत्र तत्काळ रद्द करावे अशी मागणी घरत यांनी केली आहे .

अनंत घरत म्हणाले की, यासंदर्भात बांधकाम विभागाकडून आम्हास मिळालेल्या माहितीनुसार झोन 2 चे अधिकारी यांनी सदर टेकडी फोड ची पाहणी केली असताना विकासकांकडून त्यांना जिल्हाधिकारी यांचे रस्ता बनविण्यासाठी चे पत्र दाखविण्यात आले. त्यामुळे कारवाईत अडथळा निर्माण झाल्याचे त्यांनी सांगितले. यावरून जिल्हाधिकारी कार्यालयाच्या आशीर्वादानेच तळजाई टेकडीचा हिंगणे खुर्द चा भाग फोडण्यात येत असल्याचे स्पष्ट झाले आहे. त्यामुळेच नैसर्गिक नाला बुजविण्याबरोबर अनधिकृत प्लॉटिंग करण्याचे धाडस जागा मालक आणि विकसक करत आहेत. या विरोधात आम्ही जिल्हाधिऱ्यांना तक्रारी आणि पत्रव्यवहार केला आहे. प्रशासनाला या प्रकरणाचे गांभीर्य नसल्यास वेळप्रसंगी आंदोलन करू तसेच न्यायालयात जाणार असल्याचे घरत म्हणाले. 

पुणे, दि. २८: पुणे, कोल्हापूर, सातारा व सांगली या जिल्ह्यातील अनुसूचित जमाती प्रर्वगातील विद्यार्थ्यांनी परदेशात पदवी व पदव्युत्तर अभ्यासक्रमाच्या शिक्षणाकरिता सन २०२३-२४ या शैक्षणिक वर्षासाठी परदेशी शिष्यवृत्ती योजनेसाठी १५ ऑगस्ट पर्यंत अर्ज करण्याचे आवाहन एकात्मिक आदिवासी विकास प्रकल्पाकडून करण्यात आले आहे.

राज्यातील अनुसूचित जमातीच्या विद्यार्थ्यांना परदेशात पदवी व पदव्युत्तर अभ्यासक्रमाचे शिक्षण घेता यावे यासाठी आदिवासी विकास विभागाकडून आयुक्तालय स्तरावर परदेशी शिष्यवृत्ती योजना राबविण्यात येते. एमबीए, वैद्यकीय अभ्यासक्रम, बी. टेक, विज्ञान, कृषी व इतर विषयांचे पदवी व पदव्युत्तर अभ्यासक्रमास परदेशातील मान्यताप्राप्त विद्यापीठात प्रवेश मिळालेल्या विद्यार्थ्यांसाठी ही योजना राबविण्यात येते. योजनेच्या लाभासाठी अर्ज करणाऱ्या विद्यार्थ्यांच्या पालकांचे कौटुंबिक कमाल उत्पन्न ६ लाख रुपयांपर्यंत असावे.

परदेशी शिष्यवृत्तीचे विहित नमुन्यातील अर्ज एकात्मिक आदिवासी विकास प्रकल्प घोडेगाव यांच्या कार्यालयात विनामूल्य उपलब्ध आहेत. इच्छुक विद्यार्थ्यांनी एकात्मिक आदिवासी विकास प्रकल्प, घोडेगाव, ता. आंबेगाव, जि. पुणे (दूरध्वनी क्र. 02133-244266) या कार्यालयात संपर्क साधून योजनेचा लाभ घ्यावा, असेही प्रकल्प अधिकारी बळवंत गायकवाड यांनी कळविले आहे.

पुणे, दि. २८: महाराष्ट्र राज्य इतर मागासवर्गीय वित्त विकास महामंडळाकडून राबविण्यात येणाऱ्या स्वयंरोजगारासाठी अर्थसहाय्याच्या विविध योजनांच्या लाभासाठी https://www.msobcfdc.org किंवा https://msobcfdc.in या संकेतस्थळावर ऑनलाईन अर्ज करण्याचे आवाहन करण्यात आले आहे.

महामंडळाकडून इतर मागासवर्गीय प्रवर्गांतील व्यक्तींसाठी २० टक्के बीज भांडवल कर्ज, वैयक्तिक कर्ज व्याज परतावा, गट कर्ज व्याज परतावा, शैक्षणिक कर्ज व्याज परतावा, महिला स्वयंसिद्धी व्याज परतावा, कौशल्य विकास प्रशिक्षण योजना तसेच थेट कर्ज व्याज परतावा (एक लाख रुपयांपर्यंत) अशा विविध योजना राबविण्यात येतात.

२०२३-२०२४ आर्थिक वर्षासाठी पुणे जिल्ह्यात २० टक्के बीज भांडवल कर्ज ४७ लाभार्थ्यांना (एकूण २७ लाख ६५ हजार रुपये), वैयक्तिक कर्ज व्याज परतावा योजनेचा लाभ १२२ लाभार्थ्यांना (एकूण उद्दिष्ट १ कोटी ३५ लाख ६६ हजार रुपये) , गट कर्ज व्याज परताव्याचा १३ लाभार्थ्यांना (एकूण ७० लाख ८५ हजार रुपये), शैक्षणिक कर्ज व्याज परताव्याचा १२ लाभार्थ्यांना (एकूण १८ लाख रुपये) व महिला स्वयंसिद्धी व्याज परतावा योजनेचा १४ हजार ४४४ लाभार्थ्यांना (एकूण १ कोटी ९५ लाख रुपये) लाभ देण्याचे उद्दिष्ट प्राप्त झाले आहे. या योजनांसाठी बँकेकडून कर्ज वितरीत करण्यात येत असून महामंडळाकडून १२ टक्क्यापर्यंत व्याज परतावा रक्कम दिली जाते.

कौशल्य विकास प्रशिक्षण योजनेचा ३३३ लाभार्थ्यांना देण्यात येणार आहे. तर थेट कर्ज व्याज परतावा (१ लाख रुपयांपर्यंत) योजनेचा १२० लाभार्थ्यांना लाभ देण्याचे उद्दिष्ट असून या योजनेसाठी संपूर्ण कर्ज महामंडळाकडून वितरीत केले जाते. याप्रमाणे एकूण १५ हजार ९१ लाभार्थ्यांना एकूण ६ कोटी २३ लाख १६ हजार रुपये इतका आर्थिक लाभ या योजनांच्या माध्यमातून देण्याचे उद्दिष्ट निश्चित करण्यात आले आहे.

योजनांच्या अधिक माहितीसाठी महाराष्ट्र राज्य इतर मागासवर्गीय वित्त विकास महामंडळ, जिल्हा कार्यालय, डॉ. बाबासाहेब आंबेडकर सामाजिक न्याय भवन इमारत क्र. बी, स.नं. १०४/१०५, मेंटल हॉस्पिटल कॉर्नर, पोलीस चौकी समोर, विश्रांतवाडी, येरवडा पुणे येथे समक्ष किंवा कार्यालयाचा दूरध्वनी ०२०-२९५२३०५९ किंवा dmobcpune@gmail.com या ईमेलवर संपर्क साधावा, असे आवाहनही महामंडळाच्या जिल्हा व्यवस्थापकांनी केले आहे.
0000

डॉ. वैशाली जाधव यांना सावित्री पुरस्कार प्रदान

पुणे : विज्ञान आणि तंत्रज्ञानाच्या प्रगतीचे भान जरूर आत्मसात करा, पण मनाचे सामर्थ्य या सर्वांपेक्षा मोठे आहे, हे विसरू नका, असा सल्ला प्रसिद्ध लेखिका वर्षा गजेंद्रगडकर यांनी शुक्रवारी येथे विद्यार्थिनींना दिला. ‘मनाचे सामर्थ्य हे शस्त्र आहे. ते सतत धारदार ठेवा. आपल्या ध्येयाचे शिखर त्यातूनच आपण गाठू शकतो, असेही त्या म्हणाल्या.
सावित्री फोरम आयोजित ‘विद्यानिधी’ उपक्रम आणि ‘सावित्री पुरस्कार’ प्रदान सोहळ्यात त्या प्रमुख पाहुण्या म्हणून बोलत होत्या. याप्रसंगी गजेंद्रगडकर यांच्या हस्ते पुणे महानगरपालिकेच्या सहाय्यक आरोग्य अधिकारी डॉ. वैशाली जाधव यांना पहिला  ‘सावित्री पुरस्कार’ प्रदान करण्यात आला. त्याचप्रमाणे ‘विद्यानिधी’ उपक्रमांतर्गत पुण्यातील व आसपासच्या ग्रामीण भागांतील इयत्ता आठवी ते दहावीच्या हुशार पण गरजू अशा ७५ विद्यार्थिनींना शैक्षणिक १ लाख रु.  मदतनिधीचे वाटप करण्यात आले.
गजेंद्रगडकर म्हणाल्या,‘ज्योतिबा आणि सावित्रीबाई फुले यांनी प्रतिकूल परिस्थितीत स्त्री शिक्षणासाठी योगदान दिले. आता काळ बदलला असला तरी विद्येचे महत्त्व अबाधित आहे, हे जाणून खूप शिका. विद्या आर्थिक दृष्ट्या सक्षम करतेच, पण ती माणूस घडवते. खंबीर बनवते. विचारांच्या कक्षा रुंदावते’.
डॉ. जाधव म्हणाल्या,‘ज्यांनी स्त्रियांच्या कल्याणासाठी आयुष्य वेचले त्या सावित्रीबाईंच्या नावाचा पुरस्कार आनंददायी आहे, पण जबाबदारी वाढवणारा आहे, याची जाणीव आहे. स्त्रीभ्रूणहत्या रोखण्यासाठी आपल्या वैद्यकीय ज्ञानाचा उपयोग करत असताना, मला मोठा संघर्ष करावा लागला आहे. पण या पुरस्काराने पाठबळ दिले आहे. आत्मविश्वास दिला आहे. वैद्यकीय क्षेत्रात आधुनिक तंत्रज्ञानाचा काही वेळा गैरवापर होत असल्याचे गर्भलिंगनिदान तंत्रज्ञानाने समोर आणले. लिंगनिदान चाचणी स्त्री गर्भाच्या जिवावर उठल्याचे दिसून आले. तेव्हा त्याला प्रतिबंध करण्यासाठी कायदा लागू झाला. मात्र, समाजाचा समतोल राखण्यासाठी आपली मानसिकता बदलण्याची नितांत गरज आहे,’.
प्रारंभी दीपप्रज्वलन आणि प्रेरणागीत सादर करण्यात आले. फोरमच्या अध्यक्षा मोनाली कोद्रे यांनी प्रास्ताविक केले. दीपाली पांढरे यांनी आभार मानले. संयोगिता कुदळे आणि गायत्री लडकत यांनी सूत्रसंचालन केले. उत्तराधार्त सावित्री फोरम आयोजित ‘उत्सवरंग’ हा विशेष नृत्यसंरचनांचा कार्यक्रम सादर करण्यात आला.
गुढीपाडवा, आषाढी वारी, श्रावणातले सण, गणेशोत्सव, नवरात्र, दिवाळी, संक्रांत, होळी अशा अनेकविध सणांची माहिती, सांस्कृतिक महत्त्व सांगण्याबरोबरच त्यावर आधारित नृत्यरचना सादर करण्यात आल्या. उत्सवरंग या कार्यक्रमाची संकल्पना, नृत्यरचना आणि सूत्रसंचालक सुप्रिया ताम्हाणे यांचे होते.

पुणे- गेल्या ५ /६ वर्षात रस्ते करणे , रस्ते दुरुस्त करणे आणि एकूणच रस्ते विषयक च्या कामावर केलेल्या २१०० ते २९०० कोटी रुपयांची तपशीलवार माहिती पारदर्शक पणे वेबसाईट वर अपलोड करून जनतेपुढे मांडावी म्हणजे जनतेलाही कळेल खरेच हे रस्ते महापालिकेने दुरुस्त किंवा तयार केलेत कि नाही.असा मुद्दा घेऊन आता भाजपाचे माजी नगरसेवक उज्वल केसकर,सुहास कुलकर्णी तसेच प्रशांत बधे आता पुढे आले आहेत या तिघांनी या संदर्भात मुख्यमंत्री,उपमुख्यमंत्री यांना जाहीर आवाहन केले आहे.

त्यांनी असे म्हटले आहेकी,’आज पुण्यातली रस्त्यांची अवस्था बघितली तर हे 2100 कोटी रुपये कुठे खर्च झालेत का खर्च झालेच नाहीत? का त्यात काही काम न करता बिल काढली गेली. याबाबत पुणेकर नागरिक शंका उपस्थित करत आहेत. आम्ही कार्यकर्ते म्हणून आमच्या मनामध्ये शंका आहे कि मनपाच्या बजेट पुस्तकामधील
खालील तक्ता बघितला तर
2017-18 मध्ये जवळपास 423 कोटी
2018-19 मध्ये 438 कोटी
2019-20 मध्ये 305 कोटी
2020-21 मध्ये 453 कोटी
2021-22 मध्ये 361 कोटी
2022-23 मध्ये 200 कोटी
तसेच वार्ड व प्रभागासाठी अंदाजे 176 कोटी रूपये रस्त्यासाठी व 300 कोटी रुपये मेंटेनन्स साठी पाच वर्षात असा खर्च झालेला आहे.रस्त्याची कामे झाली का नाही झाली याची तपासणी त्रयस्त यंत्रणेमार्फत केली पाहिजे आणि पुणे महानगरपालिकेच्या वेबसाईटवर प्रत्येक वर्षी जे रस्ते डांबरीकरण केले तसेच सिमेंट काँक्रिटचे केलेत त्यांची यादी देखील प्रसिद्ध केली पाहिजे तसेच प्रत्येक प्रभागाने मेंटेनन्स साठी काय काम केले त्याचा देखील तपशील जाहीर केला पाहिजे.

वरील सर्व माहिती ही महानगरपालिकेच्या मुख्य लेखापालांच्या ऑफिसमध्ये उपलब्ध असेल तसेच रोड डिपार्टमेंटकडे आणि वॉर्ड ऑफिसच्या वार्ड ऑफिसरकडे देखील उपलब्ध आहे तर पुढच्या दहा दिवसांमध्ये आपण आदेश देऊन ही माहिती संकलित करून महानगरपालिकेच्या संकेतस्थळावर जाहीर करावी म्हणजे दुध का दुध आणि पाणी का पाणी होऊन जन्तेलाखरे काय ते समजेल .

पुणे, दि. २८: कृषी उत्पादने निर्यात विकास प्राधिकरण (अपेडा), राष्ट्रीय पीक संरक्षण संस्था (एनपीपीओ), महाराष्ट्र राज्य कृषी पणन मंडळ, डाळिंब संशोधन केंद्र, सोलापूर आणि आय.एन.आय फार्म प्रा.लि. यांच्या संयुक्त विद्यमाने कृषी पणन मंडळाच्या वाशी (नवी मुंबई) येथील विकिरण सुविधा केंद्रावरुन अपेडाच्या महाव्यवस्थापक विनिता सुधांशू यांच्या हस्ते प्रायोगिक तत्त्वावर अमेरिकेला डाळिंब निर्यातीचा शुभारंभ करण्यात आला. या निर्यातीनंतर अमेरिकेतील मोठी बाजारपेठ खुली होईल असा विश्वास श्रीमती सुधांशू यांनी यावेळी व्यक्त केला.

कार्यक्रमाला अपेडाचे अध्यक्ष अभिषेक देव, संचालक तरुण बजाज, महाराष्ट्र राज्य कृषी पणन मंडळाचे कार्यकारी संचालक संजय कदम, राष्ट्रीय डाळिंब संशोधन केंद्र सोलापूरचे डॉ. आर. ए. मराठे, अपेडाचे सरव्यवस्थापक यु. के. वत्स, प्लॅंट प्रोटेक्शन ॲडवायजर जे. पी. सिंग, विकिरण सुविधा केंद्राचे प्रमुख सतिश वाघमोडे आदिंसह अधिकारी व निर्यातदार उपस्थित होते.

डाळिंबाच्या दाण्यामध्ये फळमाशीचा प्रादुर्भाव झाल्यामुळे अमेरिका देशाने भारतातून डाळिंबाची आयात करण्यास २०१७-१८ मध्ये बंदी घातली होती. अपेडा व एन.पी.पी.ओ. भारत सरकार यांनी संयुक्तरित्या अमेरिकेच्या कृषी विभागाशी वारंवार चर्चा केली असता मानकांच्या आधारे २०२२ मध्ये निर्यात बंदी उठविण्यात आली.

डाळिंब फळाविषयी निश्चित केलेल्या मानकानुसारच्या महाराष्ट्र राज्य कृषी पणन मंडळाचे भाजीपाला प्रक्रिया केंद्र, वाशी, नवी मुंबई येथील सुविधा केंद्रावरुन डाळिंबाचे १५० खोके (४५० किलो) अमेरिकेतील न्यूयॉर्क येथे हवाईमार्गे पाठविण्यात आल्याची माहिती उपसरव्यवस्थापक मिलिंद जोशी यांनी दिली आहे.