पुणे, ता. १० : भाजप, शिवसेना (बाळासाहेब ठाकरे), रिपब्लिकन पार्टी ऑफ इंडिया (आठवले गट), शिवसंग्राम, राष्ट्रीय समाज पक्ष, रयत क्रांती संघटना आणि पतित पावन संघटना, महायुतीचे कसबा विधानसभा मतदारसंघातील उमेदवार हेमंत रासने यांनी आज दत्तवाडी परिसरामध्ये पदयात्रेद्वारे मतदारांशी संपर्क साधला.

दांडेकर पुलाजवळील मांगीरबाबा मंदिरापासून पदयात्रेचा प्रारंभ झाला. आमदार भिमराव तापकीर, माजी नगरसेवक धीरज घाटे, स्मिता वस्ते, धनंजय जाधव, रमेश काळे, मंजुषा नागपुरे, आनंद रिठे, दीपक पोटे यांच्यासह राजेंद्र काकडे, अश्विनी कदम, अश्विनी पवार, अमित कंक, राजू कदम, अर्जुन खानापुरे, अक्षय ढमाले, आकाश खरात यांची प्रमुख उपस्थिती होती. गांजवे चौक परिसरात पदयात्रेचा समारोप झाला.

पर्वतीच्या आमदार माधुरी मिसाळ यांच्या प्रयत्नातून पर्वती जल केंद्रात उभारण्यात आलेल्या पाचशे दशलक्ष लिटर प्रतिदीन (एमएलडी) क्षमतेच्या जलशुद्धिकरण केंद्रामुळे सिंहगड रस्ता, दांडेकर पूल आणि मध्यवर्ती पेठांच्या परिसरातील पाणीपुरवठा सुरळीत होण्यास मोठी मदत झाली आहे. या प्रकल्पाच्या पूर्ततेसाठी आवश्यक निधी उपलब्ध करून दिला, असे रासने यांनी समारोप सभेत सांगितले.

आरपीआयची बैठक

महायुतीचे उमेदवार हेमंत रासने यांच्या प्रचाराचे नियोजन करण्यासाठी रिपब्लिकन पार्टी ऑफ इंडियाच्या (आठवले गट) पदाधिकाऱ्यांची बैठक पालकमंत्री चंद्रकांत दादा पाटील यांच्या प्रमुख उपस्थितीत आयोजीत करण्यात आली होती. आरपीआयच्या माध्यमातून घरोघरी संपर्क साधण्यात येणार आहे. पक्षाच्या विविध आघाड्यांचे मेळावे आणि कोपरा सभांचे आयोजन करण्यात येणार आहे. पालकमंत्री चंद्रकांत दादा पाटील निवडणूक प्रमुख माधुरी मिसाळ, राजेश पांडे आणि गणेश बिडकर यांनी मार्गदर्शन केले. आरपीआयचे प्रदेश सचिव बाळासाहेब जानवार, संघटन सचिव परशुराम वाडेकर, अध्यक्ष शैलेंद्र चव्हाण, डॉ. सिद्धार्थ धेंडे, हिमानी कांबळे, ॲड. मंदार जोशी, अशोक कांबळे यांची प्रमुख उपस्थिती होती.

पुणे, दि.१०: उद्योग मंत्री उदय सामंत यांच्या हस्ते कॅपिटालॅंड होप फांऊडेशनच्या सामाजिक उत्तरदायित्व निधीतून भोईरवाडी (ग्रामपंचायत मान) येथे उभारण्यात आलेल्या जिल्हा परिषद प्राथमिक शाळेच्या नूतन इमारतीचे उद्धाटन करण्यात आले.

यावेळी जिल्हा परिषदेचे मुख्य कार्यकारी अधिकारी आयुष प्रसाद, महाराष्ट्र राज्य औद्योगिक विकास महामंडळाचे प्रादेशिक अधिकारी संजीव देशमुख, मुळशीचे गट विकास अधिकारी संदीप जठार, कॅपिटालॅंड होप फाऊंडेशनचे अध्यक्ष सुधांशू दत्त, उपाध्यक्ष मनोज सोमवंशी, शालेय समितीचे अध्यक्ष काशिनाथ भोईर, मुख्याध्यापक रामेश्वर झुळुक आदी उपस्थितीत होते.

श्री. सामंत म्हणाले, कॅपिटालँड होप फाऊंडेशने सामाजिक उत्तर दायित्व निधीतून खासगी शाळेएवढीच उत्तम दर्जाची शाळा उभारुन लहान मुलांच्या भविष्याच्यादृष्टीने मोठे काम केले आहे. खासगी शाळांपेक्षाही अधिकच्या सुविधा या शाळेत उपलब्ध केल्या आहेत. या शाळेतील विद्यार्थी भविष्यात विज्ञान, कला, राजकारण, क्रीडा अशा विविध क्षेत्रात पुढे जातील, असा विश्वास त्यांनी व्यक्त केला.

खेळ, सांस्कृतिक आदी उपक्रमांबरोबरच शैक्षणिक कार्यासाठी सामाजिक उत्तरदायित्त्व निधी योग्यप्रकारे कसा खर्च करावा याचे हे उत्तम उदाहरण आहे. शाळेची देखभाल, स्वच्छता राखण्याची जबाबदारी शाळा आणि ग्रामस्थांची आहे. गावच्या विकासासाठी ग्रामस्थांनी एकजुटीने काम केले पाहिजे, असेही उद्योग मंत्री म्हणाले.

ग्रामस्थांच्या मागण्या लक्षात घेऊन ग्राम दैवत कमलजादेवी मंदिरासमोरील मोकळी जागा उपलब्ध करुन देण्याबाबत, टी.सी.एस कंपनी ते भोईरवाडा नवीन रस्ता बांधणीसाठी रस्त्याबाबत तात्काळ अंदाजपत्रक तयार करण्याचा सूचना संबंधित अधिकाऱ्यांना दिल्या. यासाठी आवश्यक निधी महाराष्ट्र राज्य औद्योगिक विकास महामंडळाकडून देण्यात येईल, असे श्री. सामंत यांनी सांगितले.

श्री. प्रसाद म्हणाले, देशातील शाळांचा मूलभूत आणि गुणवत्तापूर्ण विकास करण्यासाठी राबवण्यात येत असलेल्या ‘प्रधानमंत्री स्कूल फॉर रायझिंग इंडिया’ (पीएमश्री) योजनेत जिल्ह्यातील ४०३ शाळांचा समावेश झाला आहे. या कार्यक्रमाचा भाग म्हणून सामाजिक उत्तरदायित्व निधीतून या शाळेत सुसज्ज इमारत, ग्रंथालय, संगणक कक्ष, अद्ययावत प्रयोगशाळा, शुद्ध पेयजल, स्वच्छ शौचालये, मध्यान्ह भोजन योजना, सौर उर्जा युनिट, बालवाचनालय आदी भौतिक सुविधा उपलब्ध करुन देण्यात आल्या आहेत. या भागातील उद्योजकांनी वेळोवेळी सीएसआरमधून निधी दिला आहे. शिक्षण गुणवत्तापूर्ण व्हावे यासाठी पुणे जिल्हा परिषद प्रयत्न करीत आहेत, असे श्री. प्रसाद यावेळी म्हणाले.

कॅपिटालॅंड होप कंपनीच्यावतीने घेण्यात आलेल्या चित्रकला स्पर्धेत भारतातील ८०० विद्यार्थ्यांनी सहभाग घेतला होता. त्यातून अंतिम निवड झालेल्या १६ पैकी ९ विद्यार्थीं जिल्हा परिषद प्राथमिक शाळा भोईरवाडी शाळेचे आहेत. हे विद्यार्थी व त्यांना मार्गदर्शन करणाऱ्या शिक्षकांचा यावेळी सत्कार करण्यात आला.

जिल्हा परिषद प्राथमिक शाळा भोईरवाडी विषयी माहिती
या शाळेची स्थापना जून १९६० मध्ये करण्यात असून शाळेत इयत्ता पहिली ते आठवीपर्यंत २६१ मुले व २४४ मुली असे एकूण ५०५ विद्यार्थी शिक्षण घेत आहेत. शैक्षणिक गुणवत्ता वाढीसाठी सामान्य ज्ञान प्रश्न, प्रश्न मंजुषा, चित्रकला, शालेय खेळ व क्रीडा, सांस्कृतिक कार्यक्रम, क्षेत्र भेट उपक्रम, गणित दिवस, भाषा दिन, शिष्यवृती परीक्षा आदी उपक्रम घेण्यात येत आहेत.

महाटेक प्रदर्शनाला भेट
या कार्यक्रमापूर्वी उद्योगमंत्री उदय सामंत यांनी कृषि महाविद्यालयाच्या मैदानावर आयोजित ‘महाटेक २०२३’ या लघु व मध्यम उद्योजकांच्या प्रदर्शनाला भेट दिली. शासन लघु व मध्यम उद्योजकांच्या विकासासाठी प्रयत्न करत असल्याचे त्यांनी सांगितले. यावेळी महाटेकचे संचालक विनय मराठे, सुमुख मराठे, प्रकल्प संचालक संतोष नांदगावकर, महाव्यवस्थापक सुधाकर थत्ते, पुणे प्रकल्प संचालक महेन्द्र घारे आदी उपस्थित होते. मंत्री सामंत यांनी विविध दालनांना भेट देऊन माहिती घेतली.

९ व्या जागतिक ज्ञान-विज्ञान, अध्यात्म आणि तत्त्वज्ञान परिषदेचा दुसरा दिवस
विश्वधर्मी प्रा.डॉ. विश्वनाथ दा. कराड यांना विश्व शांति विद्यारत्न पुरस्काराने सन्मान

पुणे,१० फेब्रुवारीः विद्या आणि विनयशीलता ही भारताची ओळख आहे. अनेक भाषा, धर्म, जाती, पंथ येथे गुण्या गोविंदाने एकत्र नांदतात. संस्कृती आणि सभ्यता आणि अनेकतेतून एकता यामुळे भारत देश सर्वश्रेष्ठ आहे. असे उद्गार केरळचे राज्यपाल मा. डॉ. आरिफ मोहम्मद खान यांनी काढले.माईर्स एमआयटी वर्ल्ड पीस युनिव्हर्सिटी, पुणे, तर्फे त्र्यंबकेश्वर सभागृह, काशी विश्वनाथ धाम कॉरिडॉर येथे तीन दिवसीय ९व्या जागतिक ज्ञान-विज्ञान, अध्यात्म आणि तत्त्वज्ञान परिषदेत प्रमुख पाहुणे म्हणून ते बोलत होते.  
यावेळी पद्मभूषण आचार्य वशिष्ठ त्रिपाठी, वाराणसी चे श्री काशी विद्वत परिषदचे सचिव डॉ. शुक्रदेव त्रिपाठी,  डॉ. योगेंद्र मिश्रा, माईर्स एमआईटी वर्ल्ड पीस युनिव्हर्सिटी चे संस्थापक अध्यक्ष विश्वधर्मी  प्रा.डॉ. विश्वनाथ दा. कराड, माईर्स एमआयटी ग्रूप ऑफ इन्स्टिट्यूटच्या सचिव प्रा.स्वाती कराड चाटे व  एमआयटी वर्ल्ड पीस युनिव्हर्सिटीचे प्र कुलगुरू डॉ. मिलिंद पांडे उपस्थित होते.  
याप्रसंगी श्री काशी विद्वत परिषदेतर्फे विश्वधर्मी प्रा.डॉ. विश्वनाथ दा. कराड यांना विश्वशांती विद्यारत्न पुरस्काराने सन्मानित करण्यात आले.
डॉ. आरिफ मोहोम्मद खान म्हणाले, प्रत्येक माणसात एक अलौकिक शक्ती आहे. त्यामुळे रंग, रूप, भाषा यांच्याशी काहीच संबंध नसते. प्रत्येकात ब्रम्ह आहे हे माहित असूनही प्रत्येकजण अज्ञानाखाली दडलेला आहे. हे अज्ञान जर दूर केले तर खर्‍या अर्थाने भारतीय परंपरा समजून घेता येईल. प्राचिन भारतात नाविन्य दडलेले आहे. हजारो वर्षांपासून येथे प्रज्ञा पाठ शिकवला जात आहे. इंद्रियांना नियंत्रित करून आत्मज्ञान मिळविता येते. त्यासाठी अज्ञानाचा पडदा दूर केला पाहिजे.पद्मभूषण आचार्य वशिष्ठ त्रिपाठी म्हणाले, काशी या शब्दाचा अर्थच विद्वान हा आहे. येथे आल्यावर सर्वांचेच भाग्य उजळते. ज्या मनुष्याची जशी भावना तसाच त्याचा धर्म असतो. धर्मग्रंथांनी जे चिन्हांकित केलेले असते तोच वास्तवात खरा धर्म. त्याच धर्माच्या आधारावर आपल्याला सिध्दी प्राप्त होते.
विश्वधर्मी  प्रा.डॉ. विश्वनाथ दा. कराड म्हणाले, काशी विश्वनाथ कॉरिडॉर ज्ञानाचे दालन म्हणून उदयास आले पाहिजे. सर्व जगात शांती प्रस्थापित करण्याचे काम येथून होत आहे. धर्माच्या नावाखाली दहशतवाद पसरला आहे. त्याला आळा घालणे आवश्यक आहे. भारत हा असा एकमात्र देश आहे तो जगात सुख, शांती, समाधानाचा मार्ग दाखवू शकतो.  
डॉ. शुक्रदेव त्रिपाठी म्हणाले, प्रत्येक राष्ट्राचे एक चरित्र  असते. तसे पाहिले तर अध्यात्म हे भारताचे चरित्र आहे. अध्यात्म जर भारतापासून दूर झाले, तर येथे काहीच उरणार नाही. येथील सर्व धर्मांचे विचार, प्रार्थना मानवाच्या कल्याणासाठी आहेत. म्हणूनच भारत लवकरच विश्वगुरू बनेल.
डॉ. योगेंद्र मिश्रा व डॉ. मिलिंद पांडे यांनी आपले विचार मांडले.
प्रा.डॉ. गौतम बापट यांनी सूत्रसंचालन केले.
प्रा.स्वाती कराड चाटे यांनी आभार मानले.

पुणे : दो-जांग असोसिएशन आणि आर. बी. होरांगी यांच्या वतीने चंदननगर-खराडी येथे आयोजित पहिल्या खुल्या राष्ट्रीय तायक्वांदो स्पर्धेत सेंट फिलिक्स शाळेच्या विद्यार्थ्यांनी १८ सुवर्ण, २६ रौप्य व २८ कांस्यपदकाची कमाई केली. या स्पर्धेत आंध्रप्रदेश, कर्नाटक, गोवा, तेलंगणा, गुजरात आणि महाराष्ट्र या राज्यातील पंधराशेहून अधिक विद्यार्थ्यांनी सहभाग घेतला होता. ५० पेक्षा अधिक अकॅडमीच्या विद्यार्थ्यांनी यात सहभाग नोंदवला.
सर्व विजेत्या खेळाडूंचे प्राचार्या सिस्टर जेनिफर, सिस्टर अर्सला, सिस्टर मार्था, पर्यवेक्षक सिस्टर एल्सा, सिस्टर लीना पॉल, पीटी शिक्षक सोनाली भोसले, रुपाली बनसोडे, रोहिणी महांकाळे यांनी अभिनंदन केले. तायक्वांदो प्रशिक्षक व आर. बी. होरांगीचे अध्यक्ष मास्टर रवींद्र भंडारी यांनी विद्यार्थ्यांना मार्गदर्शन केले.

पुणे-शहराच्या विकासासाठी आणि सार्वजनिक वाहूतक सुधारण्यासाठी बस रॅपिड ट्रान्झिट (जलद बस वाहतूक) अर्थात बीआरटी आवश्यकआहे आणि ह्याच बी.आर.टी सक्षमीकरणासाठी,विस्तारासाठी आम्ही भर देणार आहोत असे पुणे महानगर परिवहन महामंडळाचे अध्यक्षव व्यवस्थापकीय संचालक ओम प्रकाश बकोरिया यांनी सांगितले.

पीएमपीएमएलकडून बी.आर.टी बाबत २ दिवसीयकार्यशाळा आयोजित करण्यात आली होती, या कार्यशाळेच्या समारोपप्रसंगी ते बोलत होते.
पुणे आणि पिंपरी-चिंचवड शहरामधील मधील बीआरटीचे नेटवर्क सुधारून त्यावर विविध उपाय योजना होण्यासाठी
अस्तित्वात असलेली बी.आर.टी.एस नेटवर्क सुधारण्यासाठी आणि भविष्यातील विस्ताराची योजना ओळखण्यासाठी
पीएमपीएमएलकडून ९ व १० फेब्रुवारी रोजी २ दिवसीय कार्यशाळा आयोजित करण्यात आली होती. शहरातील एनजीओपरिसर, सेव्ह पुणे ट्रॅफिक मूव्हमेंट, सेंटर फॉर एन्व्हायर्नमेंट एज्युकेशन (सीईई), शहरी वाहतूक तज्ज्ञ प्रांजली देशपांडे आणि सर्गडिझाइन स्टुडिओचे योगेश दांडेकर यांच्या तांत्रिक सहाय्याने घोले रोड येथील पंडित जवाहरलाल नेहरू सांस्कृतिक हॉलमध्येकार्यशाळा आयोजित करण्यात आली होती. यावेळी परिसर संस्थेचे पदाधिकारी, पीएमपी प्रवासी मंचचे पदाधिकारी, वाहतूकतज्ञ,पीएमपीएमएल, पुणे व पिंपरी-चिंचवड मनपा, पुणे व पिंपरी चिंचवड वाहतूक विभागाचे अधिकारी/कर्मचारी उपस्थित होते.

पुण्यातील बी.आर.टी कॉरिडॉर दररोज ४ लाखांहून अधिक प्रवाशांना सेवा देतो. बी.आर.टी नेटवर्कचा विस्तार
केल्यास त्यात वाढ होऊ शकते असे मत सर्व उपस्थित तज्ञांकडून व्यक्त करण्यात आले. विद्यमान पिंपरी-चिंचवड कॉरिडॉरशी कनेक्टिव्हिटी सुनिश्चित करण्यासाठी काही कॉरिडॉर पूर्ण करणे आवश्यक आहे असे मत वाहतूक तज्ञांनी यावेळी व्यक्त केले.पुणे व पिंपरी –चिंचवड महानगरपालिकांकडून अपेक्षा याबाबत सहभागी तज्ञांनी सूचना केल्या.

पुणे-अखिल भारतीय मराठा शिक्षण परिषदेचे, अनंतराव पवार कॉलेज ऑफ इंजिनिअरिंग अँड रिसर्च महाविद्यालय व सावित्रीबाई फुले पुणे विद्यापीठ यांचे संयुक्त विद्यमाने  राष्ट्रीय शैक्षणिक धोरण  २०२०: इंडस्ट्री इन्स्टिट्यूट लिंकेज  या विषयावर दोन दिवशीय  राष्ट्रीय कार्यशाळेचे आयोजन करण्यात आले होते. या कार्यशाळेचे उद्घाटन डॉ. मुकुल  सुतोने  कुलगुरू सीओईपी टेक्निकल युनिव्हर्सिटी पुणे , डॉ.एन.बी. पासलकर माजी संचालक तंत्रशिक्षण मंडळ,  डॉ.संदिप मेश्राम सीओईपी टेक्निकल युनिव्हर्सिटी, प्रशांत लिखिते जनरल मॅनेजर टीसीएस प्रा.ली., डॉ.रंजन वानखेडे यांचे शुभ हस्ते व अखिल भारतीय मराठा शिक्षण परिषदेचे खजिनदार श्री. विजयसिंह जेधे, प्राचार्य डॉ.सुनिल ठाकरे  यांचे उपस्थित झाले. या वेळी डॉ. सुतोने यांनी बहुशाखीय, आंतरशाखीय आणि अनुशासनात्मक शिक्षण प्रणाली व  त्याची महाविद्यालयीन अंमलबजावणी व त्याचा विद्यार्थ्यांना होणारा फायदा या विषयावर मार्गदर्शन करताना नव्या युगासाठी तंत्रज्ञानाधिष्ठित जागतिक बदलांना देशाला सज्ज करण्यासाठी ‘नवे राष्ट्रीय शिक्षण धोरण २०२० अतिशय उपयोगाचे आहे. विद्यार्थ्याची  बौद्धिक, भावनिक, सामाजिक प्रगती होण्याच्या दृष्टीनं बहुशाखीय शिक्षणप्रणाली यामध्ये प्रस्तावित  असणार आहे. ॲकॅडमीक क्रेडीट बँक, मल्टीपलएन्ट्री, मल्टीपलएक्झिट, क्रेडीट मोबोलीटी मेकॅनिझम आणि ट्रान्सडीसीप्लीनरी शिक्षण पद्धतीचावापर  या घटकांचे नव्या शैक्षणिक धोरणातील महत्व या वेळी पटवून दिले. भारत देशाला जागतिक ज्ञानसत्ता बनविण्यासाठी नवे राष्ट्रीय शैक्षणिक धोरण २०२० हे परिवर्तनाचे साधन ठरणार आहे असे या प्रसंगी उपस्थितांना मार्गदर्शन केले. डॉ. एन.बी. पासलकर यांनी  जॉय फुल लर्निंग विषयी मार्गदर्शन केले. या कार्यशाळेचे प्रास्ताविक समन्वयक डॉ.काशिनाथ मुंडे यांनी केले. प्राचार्य डॉ.सुनिल ठाकरे यांनी महाविद्यालयातून सुरु असलेल्या विविध संशोधन प्रकल्पांची माहितीत दिली.

सदर कार्यक्रमासाठी डॉ. मुकुल  सुतोने, डॉ.संदिप मेश्राम, डॉ.एन.बी. पासलकर , डॉ.रंजन वानखेडे, प्रशांत लिखिते, विजयसिंह जेधे, डॉ.सुनिल ठाकरे, कार्यशाळेचे समन्वयक डॉ. काशिनाथ मुंडे, प्रा.गणेश कोंढाळकर, सर्व विभागप्रमुख, सावित्रीबाई फुले पुणे विद्यापीठाशी संलग्नीत महाविद्यालयातील, महाराष्ट्रातील इतर विद्यापीठ क्षेत्रातील  प्राध्यापक, औद्योगिक क्षेत्रातील प्रतिनिधी बहुसंख्येने  उपस्थित होते. महाविद्यालयाने हि कार्यशाळा आयोजित केल्याबद्दल अखिल भारतीय मराठा शिक्षण परिषदेच्या सरचिटणीस सौ.प्रमिला गायकवाड यांनी सर्वांचे अभिनंदन केले.

३२०० औद्योगिक ग्राहकांना मिळणार दर्जेदार वीजपुरवठा

पुणे, दि. १० फेब्रुवारी २०२३: चाकण एमआयडीसीमधील औद्योगिक ग्राहकांना आणखी दर्जेदार व सुरळीत वीजपुरवठा करण्यासाठी एमआयडीसी विद्युत सुधार योजनेअंतर्गत मंजूर झालेले तीन नवीन स्विचिंग स्टेशन, एका स्विचिंग स्टेशनची क्षमतावाढ तसेच इतर विविध कामांसह वीजयंत्रणेच्या सक्षमीकरणाला महावितरणकडून सुरवात करण्यात आली आहे.  

चाकण येथे शुक्रवारी (दि. १०) २२/२२ केव्ही किंग्फा स्विचिंग स्टेशन व इतर कामांचे भूमिपूजन पुणे परिमंडलाचे मुख्य अभियंता श्री. राजेंद्र पवार यांच्याहस्ते झाले. यावेळी फेडरेशन ऑफ चाकण इंडस्ट्रीजचे अध्यक्ष श्री. दिलीप बटवाल व पदाधिकारी श्री. विनोद जैन व श्री. नीलेश राठी तसेच कार्यकारी अभियंता श्री. मनीष ठाकरे व श्री. अमीत कुलकर्णी आदींची प्रमुख उपस्थिती होती.

यावेळी मुख्य अभियंता श्री. राजेंद्र पवार म्हणाले की, औद्योगिक ग्राहक महत्त्वाचे असून त्यांना तत्पर सेवा देण्यासह चोवीस तास सुरळीत व दर्जेदार वीजपुरवठा करण्यासाठी महावितरण कटिबद्ध आहे. वीजयंत्रणेच्या सक्षमीकरणाचे कामे वेगाने होतील असा प्रयत्न आहे. तसेच महापारेषणच्या अतिउच्चदाब व महावितरणच्या उच्चदाब उपकेंद्रांमधील पॉवर ट्रान्सफॉर्मरच्या क्षमतावाढीसह विविध कामे प्रस्तावित करण्यात येत असून त्याचाही आराखडा लवकरच तयार होईल. विद्युत सुधार योजनेअंतर्गत सुरु झालेल्या स्विचिंग स्टेशन व इतर कामे येत्या तीन महिन्यांमध्ये पूर्ण करावेत असे निर्देश मुख्य अभियंता श्री. पवार यांनी यावेळी दिले.

विद्युत यंत्रणा सुधारणा योजनेअंतर्गत चाकण एमआयडीसीमध्ये १५ कोटी ४९ लाख रुपये खर्चाचा आराखडा मंजूर झाला आहे. यामध्ये तीन नवीन स्विचिंग स्टेशन्स, एका स्विचिंग स्टेशनची क्षमतावाढ, ३५ किलोमीटर नवीन भूमिगत वाहिन्या, ज्या वीजवाहिन्या अतिभारित आहे त्यांचे विभाजन करून नवीन वीजवाहिन्या टाकणे, सहा नवीन रिंग मेन युनिट आदींचे कामे होणार आहेत. त्यामुळे चाकण एमआयडीसीमधील सुमारे ३२०० औद्योगिक ग्राहकांना आणखी दर्जेदार व सुरळीत वीजपुरवठा उपलब्ध होणार आहे, अशी माहिती यावेळी देण्यात आली.

या कार्यक्रमाला महावितरणचे अतिरिक्त कार्यकारी अभियंता श्री. हरीहर घोटवाड, चाकणचे उपकार्यकारी अभियंता श्री. विजय गारगोटे, सहायक अभियंता श्री. रामप्रसाद नरवाडे, विविध कंपन्यांचे प्रतिनिधी सर्वश्री विवेक ठिगळे, आशिष निचड, विवेक पाचपांडे, आशिष बडनेरकर, प्रशांत डहाके आदींची उपस्थिती होती.

पीटर बर्वाश इंटरनॅशनलने पुण्‍यात निवडक इलेसियम क्‍लब्‍ससोबतच्‍या सहयोगाची घोषणा केली.

पुणे, १० फेब्रुवारी २०२३: पीबीआय उपक्रमाने जागतिक दर्जाच्या टॅलेंटला वाव देण्यासाठी जागतिक दर्जाच्या प्रशिक्षण सेवा दिल्या आहेत. या सहयोगामुळे पुणेकरांना आंतरराष्ट्रीय स्तरावर मान्यताप्राप्त प्रशिक्षकांद्वारे प्रदान केला जाणारा जागतिक स्तरावर प्रसिद्ध टेनिस उपक्रम मिळतो. प्रशिक्षकांना जगभरातील विविध टेनिस संघटनांसाठी विकास धोरणांची अंमलबजावणी करण्यासाठी ग्रँडस्लॅम स्तरावर खेळाचे प्रशिक्षण आयकॉन्सचा विस्तृत अनुभव आहे.

हा उपक्रम तरुणांच्या विकासापासून ते प्रौढ प्रोग्रामिंगपर्यंत सर्व प्रकारच्या व्यक्तींच्‍या गरजांची पूर्तता करतो. पीबीआय सध्या सहज यमलापल्ली, ऋषी रेड्डी, श्रीवल्ली भामिदिपत्ती यांसारख्या काही खेळाडूंसह भारतीय टेनिसच्या भावी पिढीतील टॅलेंटचे नेतृत्व करत आहे. लिएंडर पेस, अँडी रॉडिक, सांचेझ विकारिओ, अबीगेल स्पीयर्स यांसारखे खेळाडूही पीबीआयशी संलग्‍न आहेत. रेने झोंडाग (पीबीआय अध्यक्ष), सेझर मोरालेस (पीबीआय इंडिया टेक्निकल डायरेक्टर), मिलोस मिलुनोविक (पीबीआय पुणे टेक्निकल डायरेक्टर) आणि गुरपवित सिंग (संस्थापक, इलेसियम क्लब्‍स) यांनी या लॉन्चची सह-घोषणा केली.

इलेसियम क्‍लब्‍स, बावधन, पुणे अद्वितीय असण्‍यासह १२.५ एकरहून अधिक जागतिक दर्जाच्‍या क्रिडा पायाभूत सुविधेवर पसरलेले आहे. यामध्‍ये यशस्‍वी पीबीआय उपक्रम राबवण्‍याकरिता सर्व आवश्‍यक जागतिक दर्जाच्‍या पायाभूत सुविधा आहेत, जसे विविध कोर्ट्सपासून प्रशिक्षण सुविधा, स्ट्रेन्‍थ व कंडिशनिंग सुविधा, स्विमिंग पूल्‍स, थेरपी, रिकव्‍हरी रूम्‍स आणि स्‍पोर्ट्स सायन्‍स टीम. पीबीआय व इलेसियम क्‍लब्‍सने यापूर्वीच पुण्‍यातील तीन आणखी इलेसियम क्‍लब्‍स स्‍थानांवर सॉलिटेअर ग्रुपसोबत करार केला आहे आणि मुंबई, सोलापूर व चेन्नईमधील अनेक नवीन क्लब प्रकल्पांमध्ये विस्ताराचा शोध घेत आहेत.

इलेसियम क्लब्‍स अनेक आंतरराष्ट्रीय अकॅडमी आणि ब्रॅण्‍ड भागीदारांसोबत काम करतात. इलेसियम पीबीआय, गॅरी कर्स्टन क्रिकेट इंडिया, एफसी बार्सिलोना, रिकी हॅटन (बॉक्सिंग) आणि मायकेल फेल्प्स स्विमिंग सारखे आंतरराष्ट्रीय अकॅडमी ब्रॅण्‍ड्स, तसेच बॅडमिंटनसाठी पदुकोण स्पोर्ट्स मॅनेजमेंट, चेन्नईयन एफसी, ठाणे सिटी एफसी, पडेल टेनिस फेडरेशन आणि पिकलबॉल असोसिएशन ऑफ इंडिया यांसारख्या अनेक आघाडीच्या भारतीय क्रीडा विकास ब्रॅण्‍ड्सना होस्‍ट करते.

इलेसियम क्‍लब्‍ससोबतच्‍या या नवीन सहयोगाबाबत पीबीआयचे अध्‍यक्ष रेने झोंडाग म्‍हणाले, ‘‘स्पर्धात्मक क्रीडापटू आणि मनोरंजक खेळाडूंना पीबीआय उपक्रम ऑफर करण्यासाठी आम्ही पुण्यासह एका नवीन भौगोलिक स्थानामध्ये प्रवेश करत आहोत, याचा मला आनंद होत आहे. खेळ लोकांना एकत्र आणतो आणि इलेसियम क्‍लब्‍ससोबत या उपक्रमाचा भाग असल्याचा मला अभिमान वाटतो. इलेसियम क्‍लब्‍ससोबत सहयोग केल्याने नवीन शहरे आणि दर्जेदार पायाभूत सुविधांसाठी दरवाजे खुले होतात. मी हा सहयोग अधिक बहरताना आणि सर्व वयोगटातील लोकांना लाभदायी परिणाम देताना पाहण्‍यास अत्यंत उत्सुक आहे.’’

इलेसियम क्‍लब्‍सचे संस्‍थापक गुरपवित सिंग म्‍हणाले, ‘‘मला आमच्‍या शिरपेच्‍यात आणखी एका तुऱ्याची भर करताना अत्‍यंत आनंद होत आहे. प्रगत टेनिस प्रशिक्षण आणि कार्यशाळा आणण्यासाठी आम्ही भागीदारी करू शकणाऱ्या सर्वोत्तम अकॅडमींपैकी एक पीबीआय आहे. आम्‍ही आशा करतो की शिक्षण, कार्यशाळा आणि पायाभूत सुविधांचा वाढलेला स्‍तर भारतातील टेनिस इकोसिस्टमला चालना देण्यासाठी आम्हाला मदत करेल.’’

इलेसियम क्‍लब्‍स पुढील तीन वर्षांत क्लब केंद्रांमध्ये १० जागतिक दर्जाचे पीबीआय उपक्रम राबवण्‍याची आणि सहयोगी क्लब्‍समध्ये अनेक आउटरीच कार्यक्रम आयोजित करण्याची योजना आखत आहे. प्राइम लोकेशन्सवर अत्याधुनिक सुविधा देऊन आणि सर्व सुविधांवर आंतरराष्ट्रीय दर्जाच्या सेवा पुरवून भारतात टेनिस खेळण्याचा आनंद पुन्हा जागृत करण्याचा हेतू आहे.

पीबीआयकडे सध्या २०० हून अधिक विद्यार्थी बेंगळुरूमधील मुख्य उच्च-कार्यक्षमता केंद्रात प्रशिक्षण घेत आहेत. एकट्या जीएलसीमधील इलेसियम क्‍लब्‍ससोबत १००० हून अधिक पालक अगोदरपासून संलग्‍न असताना एक मजबूत इकोसिस्टम आधीच अस्तित्वात आहे. ११/१२ फेब्रुवारी २०२३ रोजी पीबीआय कोचिंग पद्धतीचा अनुभव घेण्यासाठी योजनांमध्‍ये प्रौढ आणि मुलांसाठी डेमो सत्रांचा समावेश आहे.

पीबीआय बाबत:  

१९७५ मध्‍ये स्‍थापना करण्‍यात आलेली पीटर बर्वाश इंटरनॅशनल (पीबीआय) ही जगातील प्रमुख टेनिस व्यवस्थापन कंपनी आहे, जी जगभरातील पंचतारांकित रिसॉर्ट्स, हॉटेल्स व टेनिस क्लब्‍ससाठी टेनिस सूचना, कार्यक्रम विकास, विपणन, ऑपरेशन्स आणि दैनंदिन टेनिस क्रियाकलापांमध्ये विशेषज्ञ आहे. पीबीआयचे संस्थापक पीटर बर्वाश हे ४५ वर्षांहून अधिक काळ टेनिस उद्योगातील हॉल ऑफ फेम आयकॉन म्हणून जगप्रसिद्ध प्रशिक्षक, लेखक, टेनिस टीव्ही समालोचक आणि प्रेरक वक्ता आहेत. नाविन्यपूर्ण टेनिस फॉर लाइफ® सूचना आणि अपवादात्मक ग्राहक सेवेसाठी ओळखली जाणारी पीबीआय युनायटेड स्टेट्स, मेक्सिको, हवाई, कॅरिबियन, आशिया, मध्य पूर्व आणि युरोपमधील ५५ विशेष मालमत्तांसाठी टेनिस उपक्रमांचे मार्गदर्शन करते. अधिक माहितीसाठी कृपया भेट द्या: www.pbitennis.com

इलेसियम क्‍लब्‍स बाबत:

इलेसियम क्‍लब्‍स ही एण्‍ड-टू-एण्‍ड रिअल इस्‍टेट सर्विसेस कंपनी आहे, जी जगाला सर्वोत्तम स्‍थान बनवण्‍यासोबत त्‍यामध्‍ये लोकांना सुसज्‍ज करण्‍यावर मिशनवर आहे. आनंदी व आरोग्‍यदायी समुदायांच्‍या निर्मितीसाठी क्रीडा व फिटनेस ही कंपनीची साधने आहेत.

गुरपवित सिंग व अमित गोएल यांच्‍या अभिनव विचारामधून स्‍थापना करण्‍यात आलेली इलेसियम क्‍लब्‍स जीजीसी, एसपीआर ग्रुप, सॉलिटेअर ग्रुप, द वाधवा ग्रुप इत्‍यादींसारख्‍या मोठ्या डेव्‍हलपर्ससाठी सुविधांच्‍या जागांवर आरओआय वितरित करते आणि टाऊनशिप मालमत्ता व्‍यवस्‍थापनात विशेषीकृत आहे. १४ हून अधिक जागतिक दर्जाचे आंतरराष्‍ट्रीय अकॅडमी भागीदार व ब्रॅण्‍ड्स आणि वर्षभरात २०० हून अधिक इव्‍हेण्‍ट्स करणाऱ्या इव्‍हेण्‍ट्स कॅलेंडरसह इलेसियम क्लब्सचा विस्तार संपूर्ण भारतात ४ सक्रिय क्लब्‍स आणि १७ क्लब्‍समध्ये झाला आहे.