श्री शिवाजी मराठा सोसायटीच्या वतीने राज्यस्तरीय आंतर महाविद्यालयीन वक्तृत्व स्पर्धापुणे : श्री शिवाजी मराठा सोसायटीच्या वतीने आयोजित आंतर महाविद्यालयीन राज्यस्तरीय वक्तृत्व स्पर्धेत एचपीटी कला विज्ञान महाविद्यालय नाशिकची श्रुती बोरसे ही देशभक्त केशवराव जेधे करंडकाची मानकरी ठरली. मुंबईच्या बीके बिर्ला महाविद्यालयाच्या यश पाटील याने द्वितीय तर इंदिरा गांधी राष्ट्रीय मुक्त विद्यापीठाचा वृषभ चौधरी याने तृतीय क्रमांक पटकाविला.
स्पर्धेचे उद्घाटन प्रख्यात निवेदक सुधीर गाडगीळ यांच्या हस्ते तर पारितोषिक वितरण माजी मंत्री उल्हास पवार यांच्या हस्ते झाले. शुक्रवार पेठेतील समाजभूषण बाबुराव उर्फ अप्पासाहेब जेधे कला वाणिज्य व विज्ञान महाविद्यालय येथे ही स्पर्धा झाली. यावेळी संस्थेचे मानद सचिव अण्णा थोरात, सहसचिव विकास गोगावले, खजिनदार जगदीश जेधे आणि जेधे कुटुंबीय, महाविद्यालयाच्या प्रभारी प्राचार्य डॉ. दिपाली आर. पाटील. संयोजन समिती सदस्य डाॅ. शिवाजी पाचरणे, प्राध्यापक डॉ. के.डी. गारगोटे, डॉ. अमित गोगावले आणि संयोजन समितीतील सर्व सदस्य उपस्थित होते.
सुधीर गाडगीळ म्हणाले, चढ्या आवाजात बोलत अलंकारीक शब्द प्रयोग करणे म्हणजे वक्तृत्व नाही. चांगले वक्तृत्व करण्यासाठी शब्दसंग्रह चांगला असला पाहिजे, शब्दाची मांडणी नेटकी असली पाहिजे आणि आवाज सामान्य असला पाहिजे. त्याचबरोबर सतर्कता आणि आत्मविश्वास देखील महत्वाचा आहे.
उल्हास पवार म्हणाले, आज समाजात संकुचित वातावरण निर्माण करण्याचा प्रयत्न केला जातोय. नवीन पिढीने स्वातंत्र्याचा इतिहास समजून घेतला पाहिजे. कमी शिकलेले लोक जेव्हा सत्तेत होते तेव्हा जातीवाद कमी होता, परंतु शिकलेले लोक सत्तेत आले तर जातिवाद वाढल्याचे लक्षात येते. समाजाचे भविष्य उज्वल करणे हे तरुणांचे काम आहे. सामाजिक परिवर्तनाची जबाबदारी नवीन पिढीवर आहे, असेही त्यांनी सांगितले.
स्पर्धेत उत्तेजनार्थ पारितोषिके देण्यात आली. यामध्ये चैतन्य बनकर (सावित्रीबाई फुले पुणे विद्यापीठ), चारुदत्त माळी (एस.के. पाटील महाविद्यालय कुरुंवाड), रुचिका चौधरी (अॅग्रीकल्चर कॉलेज लोणी), तेजस पाटील (सावित्रीबाई फुले पुणे विद्यापीठ), पराग बदिरके( यशवंतराव चव्हाण विधि महाविद्यालय पुणे)  हे उत्तेजनार्थ विजेते ठरले. स्पर्धेतील प्रथम क्रमांकाच्या विजेत्याला ७ हजार, द्वितीय क्रमांकाला ५ हजाराला, तृतीय क्रमांकाला ३ हजार आणि उत्तेजनार्थ क्रमांकाला १ हजार रोख आणि स्मृतीचिन्ह आणि प्रमाणपत्र देण्यात आले. 

आशा प्रतिष्ठानतर्फे ३५ गरजू विद्यार्थिनींना शालेय शिष्यवृत्ती प्रदानपुणे : “आपल्या ध्येयपूर्तीसाठी सातत्य, परिश्रम व आत्मविश्वास गरजेचा असतो. मोबाईलचा आवश्यकतेप्रमाणे वापर करून विद्यार्थ्यांनी अभ्यासावर लक्ष केंद्रित करावे. मिळालेल्या अर्थसाहाय्यातून चांगल्या रीतीने आपले शिक्षण पूर्ण करावे. समाजाने केलेल्या मदतीची जाण ठेवून त्याची परतफेड करण्याची भावना जोपासावी,” असे प्रतिपादन राष्ट्रपती पदक विजेते पोलीस अधिकारी देविदास घेवारे यांनी केले.
आशा प्रतिष्ठान ट्रस्टच्या वतीने ‘आशा शिष्यवृत्ती सन्मान सोहळा’ पार पडला. ग्रामीण, दुर्गम भागातील, पुण्यातील वाडी-वस्ती भागातील गुणवंत आणि आर्थिक मागास ३५ विद्यार्थिनींना प्रत्येकी ३००० रुपयांची शिष्यवृत्ती प्रदान करण्यात आली. कला-क्रीडा क्षेत्रातील तालुका, जिल्हा, राज्य व राष्ट्रीय स्तरावर यश मिळवणाऱ्या विद्यार्थ्यांना प्रमाणपत्र व सन्मानचिन्ह देऊन गौरविण्यात आले.
पत्रकार भवन येथे झालेल्या सोहळ्यावेळी त्रिशरण एन्लायटनमेंट फाउंडेशनच्या संस्थापिका प्रज्ञा वाघमारे, ‘घे भरारी’ समूहाच्या नीलम उमराणी एदलाबादकर, ‘एसएनडीटी’ महाविद्यालयातील प्रा. डॉ. विजय चव्हाण, आशा प्रतिष्ठानच्या अध्यक्षा अंजली लोणकर, सचिव चंदन डाबी, खजिनदार पुरुषोत्तम डांगी, प्रतीक डांगी, अनुजा निकाते, चंद्रकांत साने यांच्यासह ग्रामीण भागातील शाळांचे मुख्याध्यापक व शिक्षक उपस्थित होते.
प्रज्ञा वाघमारे म्हणाल्या, “सावित्रीबाई फुले यांनी मुलींच्या शिक्षणासाठी आयुष्य वेचले. त्यांच्या मार्गावर चालण्याचे काम आशा प्रतिष्ठान करत आहे. मुलींसाठी अनेक सरकारी योजना, शिष्यवृत्त्या आहेत. त्याची माहिती आपण करून घ्यायला हवी. वंचित, दुर्गम घटकांचा सामाजिक व आर्थिक स्तर उंचावण्यासाठी प्रत्येकाने योगदान द्यायला हवे.”
नीलम उमराणी एदलाबादकर म्हणाल्या, “लहान वयापासूनच छंद जोपासा. चांगला अभ्यास करा. उद्योजकतेचा संस्कार मुलांवर व्हायला हवा. जीवनात अनेक संकटे आली, तरी त्याचा जिद्दीने व आत्मविश्वासाने सामना करायला हवा.”

प्रा. डॉ. विजय चव्हाण यांनी विद्यार्थ्यांना मार्गदर्शन केले. अंजली लोणकर यांनी संस्थेच्या कार्याचा आढावा घेतला. प्रा. गणेश ठाकर व पुरुषोत्तम डांगी यांनी सूत्रसंचालन केले. चंदन डाबी यांनी प्रास्ताविक केले. प्रतीक डांगी यांनी आभार मानले.

पुणे–कर्मयोगिनी विजयाताई लवाटे यांनी एड्स संसर्गित मुलांसाठी केलेले काम हे दीपस्तंभासारखे असून ते पुढे नेण्यासाठी युवकांनी पुढाकार घ्यावा असे आवाहन चिंचवड येथील पुनरुत्थान समरसता गुरुकुलमचे संस्थापक संचालक पद्मश्री गिरीश प्रभुणे यांनी केले. मानव्य संस्थेचा कर्मयोगीनी कै. विजयाताई लवाटे पुरस्कार त्यांच्या १८व्या स्मृतीदिनी प्रयास संस्थेला श्री प्रभुणे यांच्या हस्ते प्रदान करण्यात आला. त्यावेळी ते बोलत होते.अध्यक्षस्थानी ज्येष्ठ रंगकर्मी श्रीराम रानडे होते.

प्रयास संस्थेचे संस्थापक डॉ. विनय कुलकर्णी आणि संजीवनी कुलकर्णी यांनी हा पुरस्कार स्वीकारला. मानपत्र, रोख रक्कम आणि मानचिन्ह असे पुरस्काराचे स्वरुप आहे. विश्वस्त उज्वला लवाटे, ज्येष्ठ रंगकर्मी श्रीराम रानडे, मानव्य संस्थेचे अध्यक्ष शिरीष लवाटे, विश्वस्तव निवेदिका विनया देसाई व्यासपीठावर होते. या कार्यक्रमात श्री दत्तात्रय काटे, डॉ. अश्विनी देशपांडे, अनिता मदने यांचा विशेष सत्कार करण्यात आला.

प्रभुणे यांनी सांगितले की, विजया ताईंचे जीवन संघर्षमय होते. एका अर्थाने ते आदर्शव्रत असेच आहे. मुळात मानव्य संस्थेचे कार्य हे दिव्यत्व आणि देवत्व दर्शविणारे आहे. जगण्यातला आनंद आणि आनंदाचे जगणे याची शिकवण त्यांनी एड्स संसर्गित मुलांना दिली. त्यांचे हे कार्य पुढे नेण्यासाठी युवकांनी या क्षेत्रात यावे असे आवाहन त्यांनी यावेळी केले.

पुरस्कार स्वीकारल्या नंतर उत्तर देताना प्रयास संस्थेचे डॉ.कुलकर्णी म्हणाले की, मानव्य संस्थेने एड्स संसर्गित मुलांसाठी घर निर्माण केले तर प्रयास संस्थेने अशा मुलांसाठी क्लिनिक, ग्रंथालय सुरु केले आहे. त्याचप्रमाणे संशोधन प्रकल्प सुरु केला आहे. जीवनाकडे आनंदाने पाहण्याचा दृष्टिकोन देण्याचा संस्थेने प्रयत्न केला आहे. खर तर सध्याच्या काळात मानवतेची आवश्यकता आहे. मानव्य आणि प्रयास संस्था एकत्रपणे नेमके हेच काम करीत आहे. आजच्या पुरस्कारामुळे संस्थेच्या पुढील कार्याला नक्कीच प्रेरणा अधिक मिळेल असेही त्यांनी सांगितले.

संजीवनी कुलकर्णी यांनी मनोगतात पुरस्काराबद्दल आनंद व्यक्त केला आणि संस्थेच्या दृष्टीने आनंददायी क्षण असल्याचे सांगितले. तसेच संस्थेच्या विविध प्रकल्प आणि योजना याबाबत माहिती सांगितली.

श्रीराम रानडे यांनी अध्यक्ष पदावरून बोलतांना विजयाताई यांच्या कार्याची सविस्तर माहिती सांगितली. मानव्य संस्थेचे अध्यक्ष शिरीष लवाटे यांनी सांगितले की, संस्थेतील एड्स संसर्गित मुलांना जीवनाकडे सकारात्मकतेने, आनंदाने पाहण्याचा दृष्टिकोन देण्याचा प्रयत्न केला आहे. त्यासाठी मुलांना रोजगाराची संधी निर्माण करुन दिली आहे. तसेच अन्य संस्थांमध्ये कशा प्रकारे काम चालते ते शिकण्यासाठी, अनुभवण्यासाठी विशेष भेटीचे आयोजन, विविध कार्यक्रमांचे आयोजन याबाबत माहिती प्रत्यक्ष दिली. यांचा त्यांना नक्कीच उपयोग होतो आहे.

सुरुवातीला साक्षी केदारीने गणेश वंदना नृत्याच्या सादरीकरणातून सादर केली.विनया देसाई यांनी आभार मानले आणि सूत्र संचालन केले.कार्यक्रमाला मानव्य आणि प्रयास संस्थेचे पदाधिकारी, कार्यकर्ते आणि मुले मोठ्या संख्येने उपस्थित होती.

पुणे, १२ फेब्रुवारी २०२३: “विधिमंडळ, कार्यकारी मंडळ, न्यायपालिका आणि प्रसारमाध्यमे हे लोकशाहीचे चार आधारस्तंभ आहेत हे आपल्या सर्वांनाच माहिती आहे. त्याचबरोबर समाजातील मूलभूत समस्या जाणून घेत, त्यावर सातत्याने काम करणाऱ्या स्वयंसेवी संस्था या लोकशाहीचा पाचवा आधारस्तंभ आहे”, असे मत राष्ट्रीय सेवा भारती या स्वयंसेवी संस्थांच्या शिखर संघटनेचे संयुक्त महामंत्री विजयराव पुराणिक यांनी व्यक्त केले.

सेवावर्धिनी या सेवाभावी संस्थेच्या रौप्य महोत्सवी वर्षानिमित्त व पं. दीनदयाल उपाध्याय यांच्या स्मृतीदिनाचे औचित्य साधत पुण्यात सेवा तरंग या दोन दिवसीय राज्यस्तरीय स्वयंसेवी संस्था परिषदेचे आयोजन करण्यात आले होते. सेवावर्धिनी, मुकुल माधव फाउंडेशन, पर्सिस्टंट फाउंडेशन आणि प्राज फाउंडेशन यांच्या संयुक्त विद्यमाने वानवडी येथील महात्मा फुले संस्कृतिक भवन येथे ही परिषद संपन्न झाली.  परिषदेच्या समारोपाच्या सत्रात पुराणिक यांनी परिषदेत सहभागी झालेल्या स्वयंसेवी संस्थांच्या प्रतिनिधींना मार्गदर्शन केले. याप्रसंगी सेवावर्धिनी’चे कार्याध्यक्ष किशोर देसाई, कार्यवाह सोमदत्त पटवर्धन उपस्थित होते.
पुराणिक म्हणाले, ” लोकशाहीमध्ये स्वयंसेवी संस्थांची भूमिका अत्यंत महत्त्वाची आहे. कोणताही प्रकल्प पूर्ण होण्यासाठी नागरिकांचा सहभाग अतिशय महत्त्वाचा असतो. हा सहभाग घडवून आणण्यासाठी, लोकांच्या समस्या सोडविण्यासाठी स्वयंसेवी संस्था अतिशय मोलाची भूमिका निभावतात. त्यामुळेच या संस्था लोकशाहीचा पाचवा आधारस्तंभ आहेत, असे मला वाटते.”  
ते पुढे म्हणाले, ” कोणतेही काम करण्यासाठी कौशल्य हवेच, त्याबरोबरच मूल्यांचा विचार होणेही तितकेच गरजेचे आहे. बरेचदा कौशल्याच्या विचार करताना, मूल्याचा विसर पडतो. एखादी व्यक्ती अतिशय चांगला हिशोब लिहू शकते, पण ती व्यक्ती प्रामाणिकपणे तो हिशोब लिहिल हेही तेवढेच महत्त्वाचे. त्यामुळेच स्वयंसेवी संस्थांनी मूल्याधिष्ठीत कुशल कार्यकर्ता जोडणे अधिक महत्त्वाचे असते. “
आपण जे काम करतो आहोत, ते समाजाच्या हितासाठीच करत आहोत, हे लक्षात घेऊन, अहंकार विरहित, एकत्रित आणि विनम्र वृत्तीने आपण काम केले, तर सेवावर्धिनी च्या सुवर्ण महोत्सवाकडे निश्चितच आपण यशस्वी वाटचाल करू असे मला वाटते. त्यामुळे सर्व संस्थांनी याचा विचार करावा, असे आवाहन देखील पुराणिक यांनी यावेळी केले.
तत्पूर्वी, पुण्याचे पालकमंत्री तथा उच्च व तंत्रशिक्षण मंत्री चंद्रकांत पाटील यांनी आज परिषदेत सहभागी होऊन, स्वयंसेवी संस्थांच्या प्रतिनिधींशी संवाद साधला. यावेळी पाटील म्हणाले,” जे काम पूर्वी ऋषी मुनींनी मोठ्या स्तरावर केलं तेच कार्य तुम्ही आपापल्या क्षेत्रात करता आहात. सामाजिक संस्थांना सामजिक बांधिलकीसोबतच आपल्या कामाची मांडणी ही चांगल्याप्रकारे करता आली पाहिजे. त्यादृष्टीने योग्य प्रशिक्षण आणि मार्गदर्शन उपलब्ध होणे आवश्यक आहे. ते सेवावर्धिनी आपण उपलब्ध करून देते.”

धनकवडी: आयुष्यातल्या असंख्य नानाविध आठवणी जेव्हा एकत्र येतात, आणि हिंदोळ्यावर झुलू लागतात, तेव्हा..नेमके काय वाट्ते याची आल्हाददायी हलकीशी जाणीव आज ऐश्वर्या च्या कट्ट्यावर मोराने फुलवलेल्या मोर पिसांची रंगत जणू निर्माण करून गेली.

निमित्त होते ज्येष्ठांच्या स्नेह मेळाव्याचे अन तिथे कित्येकांच्या आठवणींची पाने उजळली. अनुभवाचे संचित आणि वयाची समृद्धी यांचे देणे किती विलक्षण आणि मार्गदर्शक असते याची प्रचिती आज ऐश्वर्य कट्ट्यावर आली. आजचे निमंत्रित होते दक्षिण पुण्यातील ज्येष्ठ नागरिक संघांचे सर्व अध्यक्ष… सारे आज ऐश्वर्य कट्ट्यावर उपस्थित होते. यामध्ये भारती विद्यापीठ ज्येष्ठ नागरिक संघांचे अध्यक्ष आणि निवृत्त पोलीस निरीक्षक शंकरराव पाटील,धनकवडी ज्येष्ठ नागरिक संघाचे अध्यक्ष बाजीराव गायकवाड, निवृत्त पोलीस निरीक्षक व मोरेबाग ज्येष्ठ नागरिक संघाचे अनंत राजेशिर्के,राजमुद्रा सोसायटीचे अध्यक्ष रसिककुमार दाभाडे,सावंत विहार सोसायटीचे तात्या शिंदे हे उपस्थित होते.
उतारवयात एकटं होऊन जगण्यापेक्षा आपल्याला सर्वांचं होऊन जगता यायला हवे असा संदेश या मान्यवरांनी सर्वाना दिला. आपल्या अनुभवाचे संचित सर्वांसमोर खुले केले.
शंकरराव पाटील यांनी पोलीस दलातील थरारक अनुभव सांगितले. बाजीराव गायकवाड यांनी शिक्षकी पेक्षा ते पत्रकारितेची वाटचाल याचा आढावा घेतला आणि अनेक गमतीशीर अनुभव सांगितले आणि कट्ट्यावर हास्याची कारंजी उडाली. अनंत राजेशिर्के यांनी पोलीस दलातील थरारक अनुभव कथन केले. रसिककुमारजी दाभाडे यांनीही आपली वाटचाल सांगितली आणि अनेक अनुभव सांगितले.
उपस्थित मान्यवरांचे औक्षण करून शिंदेशाही पगडी, शाल मानपत्र देऊन त्यांना सन्मानित केले. यावेळी माझ्यासह वरिष्ठ पत्रकार पराग पोतदार,ॲड दिलीप जगताप,शंकर कडू,सचिन डिंबळे,रवींद्र संचेती, नेमीचंद सोळंकी,मधुकर कोंढरे,आकाश वाडघरे,मंगेश साळूंके,मनोज तोडकर,शिरीष चव्हाण आणि अप्पा रेणुसे मित्र परिवारातील अनेकजण उपस्थित होते.

पुणे दि.11: लोकसेवा हेच खरे अध्यात्म आहे, समाजाचे आपण काहीतरी देणे लागतो यासाठी काम करायला हवे ही शिकवण गुरुमाऊली अण्णासाहेब मोरे यांच्या महासत्संग सोहळ्यातून मिळते. शासनाच्या जनहिताच्या योजना अशा सोहळ्याच्या माध्यमातून जनतेपर्यंत पोहोचतात आणि जनतेला त्याचा लाभ मिळतो, असे प्रतिपादन राज्याचे मुख्यमंत्री एकनाथ शिंदे यांनी केले.

मोशी येथे आयोजित महासत्संग सोहळ्यात ते बोलत होते. यावेळी जिल्ह्याचे पालकमंत्री चंद्रकांतदादा पाटील, विधानपरिषदेचे विरोधी पक्षनेते अंबादास दानवे, गुरुमाऊली अण्णासाहेब मोरे, खासदार श्रीरंग बारणे, आमदार महेश लांडगे, संजय शिरसाठ, माजी खासदार शिवाजीराव आढळराव पाटील, देहू संस्थानचे विश्वस्त ह.भ.प. नितीन महाराज मोरे, आळंदी संस्थानचे विश्वस्त ॲड. विशाल ढगे पाटील, जेजुरी संस्थानचे विश्वस्त तुषार साने, पिंपरी चिंचवड संस्थानचे विश्वस्त तांबे महाराज, दगडूशेठ हलवाई ट्रस्टचे ॲड. शिवराज कदम आदी उपस्थित होते.

मुख्यमंत्री म्हणाले, गुरुमाऊलींचे लोककल्याणाचे कार्य अविरतपणे सुरू आहे. दिंडोरी येथे सात दशकापासून सामाजिक सुधारणेसाठी सेवामार्ग, व्यसनमुक्ती, बालसंस्कार, महिला सक्षमीकरण, आयुर्वेद, स्वयंरोजगार, बिना हुंडा सामुहिक विवाह असे अनेक समाजाच्या हिताचे उपक्रम ते राबवितात. सामाजिक विकासाचे व्रत अंगिकारताना हजारो सेवा केंद्राच्या माध्यमातून विश्वशांतीचा संदेश देत भारतीय परंपरा आणि संस्कृतीचा गौरव जगभरात पसरवत आहेत.

गुरुमाऊलींच्या माध्यमातून जनतेच्या हितासाठी शासन जनतेच्या समस्या सोडविण्याचे कार्य केले जाते. इथे येणारा प्रत्येक माणूस प्रत्येकाला काही तरी देऊन जाणारा आहे. म्हणून असा सोहळा ही समाजाची गरज आहे. परमेश्वराशी समाजाच्या उन्नतीसाठी इथे संवाद साधला जात असल्याने हा सोहळा खऱ्या अर्थाने महासत्संग ठरतो, अशा शब्दात श्री.शिंदे यांनी सोहळ्याच्या आयोजनाचे कौतुक केले.

मुख्यमंत्री शिंदे म्हणाले, गुरुमाऊली सांगत असलेला परमार्थ मार्ग जनतेच्या हिताचा, उन्नतीचा मार्ग आहे. दुसऱ्यासाठी जगण्यासाठी वेगळा आनंद असतो ही भावना सोहळ्यात सहभागी होऊन मिळते. आध्यात्माची जोड समाजाच्या उन्नतीसाठी घालण्याचा आदर्श प्रस्तूत करणारे हे कार्य असेच सुरू रहावे, अशा शब्दात त्यांनी सोहळ्याला शुभेच्छा दिल्या.

पालकमंत्री श्री. पाटील म्हणाले, आध्यत्मिकतेचे मूर्तिमंत उदाहरण म्हणून माऊलींकडे बघितले जाते. माणसाची सेवा हाच परमेश्वराकडे जाण्याचा मार्ग असल्याची शिकवण ते देत आहेत. कोरोना काळात त्यांनी केलेल्या सेवाकार्याने याची प्रचिती आली आहे. सत्संगाच्या माध्यमातून युवकांना रोजगार देण्याचे कार्य करण्यात येत आहे.

माऊली अण्णा साहेब मोरे म्हणाले, संतांनी, महापुरुषांनी दुसऱ्यासाठी जगण्याची शिकवण आपल्याला दिली असून ही शिकवण नवीन पिढीपर्यंत पोहचविण्याचे काम करावे. घरातघरात आदर्श नागरिक तयार झाले पाहिजे, निर्व्यसनी पिढी तयार झाली पाहिजे. निसर्गाचे संरक्षण करुन त्यांचे संवर्धन करावे.