प्राचार्य डॉ.सुधाकरराव जाधवर कला, वाणिज्य व विज्ञान महाविद्यालयाच्यावतीने जाधवर करंडक स्पर्धा
पुणे : न-हे येथील प्राचार्य डॉ.सुधाकरराव जाधवर कला, वाणिज्य व विज्ञान महाविद्यालयाच्यावतीने प्रा.डॉ.सुधाकरराव जाधवर करंडक राज्यस्तरीय आंतरमहाविद्यालयीन स्पर्धेत पुण्यातील श्रीमती काशीबाई नवले अभियांत्रिकी महाविद्यालय हे जाधवर करंडक २०२३ चे मानकरी ठरले. यामध्ये वत्कृत्व, निबंध, भारुड आणि वादविवाद अशी राज्यस्तरीय स्पर्धा घेण्यात आली.
स्पर्धेचा पारितोषिक वितरण समारंभ न-हे येथील संस्थेच्या सभागृहात आयोजित करण्यात आला होता. संस्थेचे अध्यक्ष प्राचार्य डॉ.सुधाकर जाधवर, उपाध्यक्ष अ‍ॅड.शार्दुल जाधवर, खजिनदार सुरेखा जाधवर यांसह शिक्षक व इतर मान्यवर उपस्थित होते. सन्मानचिन्ह आणि रोख रक्कम असे पारितोषिकाचे स्वरुप होते.

पथनाटय स्पर्धेत द्वितीय क्रमांक सिंहगड कॉलेज आॅफ इंजिनिअरींग, तृतीय क्रमांक कलावती महाविद्यालय पुणे व उत्तेजनार्थ क्रमांक स.प.महाविद्यालय पुणे यांनी पारितोषिक पटकाविली. वादविवाद स्पर्धेत अमृता वाघमारे, प्रतिक्षा ओंजळे यांनी प्रथम, तेजस पाटील व चैतन्य बनकर यांनी द्वितीय, संकेत पाटील व चारुदत्त माळी यांनी तृतीय क्रमांक पटकाविला. तर, ओमहरी जाधव व रोहन चव्हाण यांना उत्तेजनार्थ पारितोषिक मिळाले.
वत्कृत्व स्पर्धेत संकेत पाटील याने प्रथम, तेजस पाटील द्वितीय, रोहन कवडे हिने तृतीत क्रमांक आणि साक्षी बागुल हिने उत्तेजनार्थ पारितोषिक पटकाविले. भारुड, पोवाडा, भजन  स्पर्धेत श्रेयस साळवी, स्वामिनी खैरे, प्रगती शेवाळे यांनी अनुक्रमे प्रथम, द्वितीय, तृतीय क्रमांक मिळविला. तर, ॠषिराज उपाध्ये याला उत्तेजनार्थ पारितोषिक मिळाले.
अ‍ॅड.शार्दुल जाधवर म्हणाले, युवा शक्तीला योग्य गती व दिशा देण्यासोबतच त्यांच्यामधील सुप्त कलागुणांना वाव देण्याकरीता प्रा.डॉ.सुधाकरराव जाधवर करंडक राज्यस्तरीय आंतरमहाविद्यालयीन स्पर्धेचे आयोजन करण्यात आले होते. वक्तृत्व, भारुड, वादविवाद, पथनाटय या प्रकारांत ही दोन दिवसीय स्पर्धा घेण्यात आली. सर्व स्पर्धा प्रकारांतील प्रथम विज्येत्याला रोख पारितोषिके व चषक प्रदान करण्यात आला.

पुणे, दि. २१ नोव्हेंबर २०२३: पश्चिम महाराष्ट्रातील शहरी व ग्रामीण भागामध्ये वीजतारा तुटणे, झोल पडणे किंवा जमिनीवर लोंबकळणे, फ्यूज पेट्या व फिडर पिलरचे दरवाजे तुटणे किंवा नसणे, खोदाईमुळे भूमिगत केबल उघड्यावर पडणे अशा वीजसुरक्षेला धोका निर्माण करणाऱ्या यंत्रणेची माहिती मोबाईलच्या व्हॉटस् अॅपद्वारे द्यावी असे आवाहन महावितरणकडून करण्यात आले आहे.

यामध्ये सोलापूर व सातारा जिल्ह्यासाठी पूर्वीच्या व्हॉटस् अॅप मोबाईल क्रमांकात बदल झाला आहे. धोकादायक वीजयंत्रणेची माहिती देण्यासाठी सोलापूर जिल्ह्यासाठी ९०२९१४०४५५ हा तर सातारा जिल्ह्यासाठी ९०२९१६८५५४ हा व्हॉटस् अॅप मोबाईल क्रमांक उपलब्ध करून देण्यात आला आहे. यासोबतच २४ तास सुरू असणाऱ्या १८००-२१२-३४३५ किंवा १८००-२३३-३४३५ किंवा १९१२ या महावितरणच्या टोल फ्री क्रमांकावर संपर्क साधता येईल. 

पुणे, दि.२२ नोव्हेंबर: एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे, भारत आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत शुक्रवार, दि. २४ नोव्हेंबर ते गुरूवार, दि. ३० नोव्हेंबर २०२३ या कालावधीत २८वी तत्त्वज्ञ संतश्री ज्ञानेश्वर-तुकाराम स्मृती व्याख्यानमाला एमआयटी वर्ल्ड पीस युनिव्हर्सिटीच्या संतश्री ज्ञानेश्वर सभागृह, कोथरूड, पुणे येथे आयोजित करण्यात आली आहे.
या व्याख्यानमालेचा उद्घाटन समारंभ शुक्रवार, दि. २४ नोव्हेंबर २०२३ रोजी दुपारी ४.०० वा. होणार आहे. या समारंभासाठी बंगलूर येथील पब्लिक युनिव्हर्सिटीच्या इंडियन इन्स्टिट्यूट ऑफ सायन्सचे संचालक प्रा.गोविंदन रंगराजन हे प्रमुख पाहुणे म्हणून उपस्थित राहणार आहे. तसेच, नालंदा विद्यापीठाचे माजी कुलपती व जगविख्यात शास्त्रज्ञ पद्मभूषण डॉ. विजय भटकर हे सन्माननीय पाहुणे असतील. अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड असतील. एमआयटी वर्ल्ड पीस युनिव्हर्सिटीचे कार्यकारी अध्यक्ष राहुल विश्वनाथ कराड हे उपस्थित असतील.
गुरूवार, दि. ३० नोव्हेंबर २०२३ रोजी सकाळी ११.०० वा. व्याख्यानमालेचा समारोप समारंभ होईल. केंद्र सरकारच्या एचआरडी विभागाचे ऑल इंडिया कौन्सिल फॉर टेक्निकल एज्यूकेशनचे उपाध्यक्ष डॉ. अभय जेरे हे प्रमुख पाहुणे असतील. तसेच पद्मभूषण प्रा.डॉ. दीपक धर व हिंदी सल्लागार समितीचे सदस्य प्रा. डॉ. योगेन्द्र मिश्रा हे विशेष अतिथि म्हणून उपस्थित राहतील.
२५ ते २९ नोव्हेंबर २०२३ या कालावधीत दुपारी ४.०० वाजता होणार्‍या व्याख्यानमालेत वैश्विक स्तरावरील व्यावसायिक सल्लागार प्रा.डॉ. रामचरण (विश्व शांतीसाठी नेतृत्व) व डॉ. डी.के. हरी व डॉ. हेमा हरी (ज्ञान आणि जल, शांततेसाठी उत्प्रेरक), प्रसिद्ध चित्रपट निर्माता विवेक अग्निहोत्री (दी रियल स्टोरी ऑफ इंडिया, इंडडिपेंडन्ट अ‍ॅण्ड वर्ल्ड पीस), युनेस्को चेअर फॉर पीसचे डॉ. प्रियंकर उपाध्याय (जागतिक परिवर्तनासाठी शांतीचे शिक्षण), हैदराबाद येथील विवेकानंद इन्स्टीट्यूट ऑफ ह्यमून एक्सलन्सचे संचालक स्वामी बोधमायानंद (भारतीय ज्ञान प्रणाली) आणि सुरभी फाउंडेशनचे संस्थापक अध्यक्ष सिद्धार्थ काक (सुरभी द्वारे भारताची कल्पना) अशा मान्यवरांची व्याख्याने होणार आहेत.
या व्याख्यानमालेला जोडूनच सकाळी ८.४५ ते १२.०० पर्यंत कार्यशाळा होणार आहे. यामध्ये विद्यावाचस्पती स्वानंद पुंड, योगाचार्य डॉ ज्ञानेश्वर विद्याअलंकार, दगडुशेठ हलवाई गणपती मंदिरचे विश्वस्त महेश सुर्यवंशी, इन्स्टीट्यूट ऑफ आर्टिफिशिअल इंटेलिजेन्टचे संचालक डॉ. आनंद कुलकर्णी, प्रसिद्ध हदय रोग तज्ञ डॉ. जगदीश हिरेमठ, दुरदर्शनचे माजी संचालक डॉ.मुकेश शर्मा, महाभारतातील युधिष्ठिराची भूमिका साकारणारे डॉ. गजेन्द्र चौहान, डॉ. मुकुंद गोखले, डॉ. महेश थोरवे, प्रसिद्ध गप्पाष्टककार डॉ. संजय उपाध्ये, डॉ. धनंजय गोखले, डॉ. अभिजित सोनावणे, डॉ. रोहिणीताई पटवर्धन, विद्यावाचस्पती ह.भ.प. प्रा.डॉ. यशोधन महाराज साखरे, वरिष्ठ अभियंता विष्णू भिसे, सर्फराज अहमद आणि नागपूर विद्यापिठाचे माजी कुलगुरू डॉ. एस.एन.पठाण या मान्यवरांची विश्वशांती, संस्कृती व प्रबोधन इत्यादी विषयांवर व्याख्यानांची विशेष कार्यशाळाही आयोजित केली आहे.
प्रत्येक व्याख्यानानंतर वक्ता व श्रोते यांच्यामधील प्रश्नोत्तरांचा कार्यक्रम या व्याख्यानमालांचे वैशिष्ट्य आहे. विशेष म्हणजे या मध्ये २५ ते २९ नोव्हेंबर पर्यंत माईर्स एमआयटी विश्वशांती विद्यापीठ संकुलातील शिक्षक-शिक्षकेतर कर्मचार्‍यांसाठी सकाळी ७.०० ते ८.०० या वेळात योगासन वर्गाचेही आयोजन स्कूल ऑफ योग अँड मेडिटेशन चे विभाग प्रमुख  प्रा. निरंजन खैरे व क्रीडा विभागाचे संचालक प्रा.डॉ. पी. जी. धनवे यांच्या मार्गदर्शनाखाली करण्यात आले आहे.
‘विज्ञान व अध्यात्माच्या समन्वयातूनच जगामध्ये शांतता नांदेल’, हे स्वामी विवेकानंदांचे वचन व तत्त्वज्ञ संतश्री ज्ञानेश्वर माऊली व जगद्गुरु संतश्री तुकाराम महाराज यांच्या ज्ञानेश्वरी व गाथेतील ज्ञान-विज्ञानाधिष्ठित तत्त्वदर्शन हा या व्याख्यानमालेचा मुख्य हेतू आहे.
या व्याख्यानमालेसाठी शास्त्रज्ञ, तत्त्वज्ञ, तसेच, साहित्य, सामाजिक, सांस्कृतिक व शैक्षणिक क्षेत्रातील तज्ज्ञ मान्यवरांना निमंत्रित केले असून, मानवी आणि आध्यात्मिक मूल्यांचे या व्याख्यानमालेद्वारे संवर्धन व्हावे, हा या व्याख्यानमालेमागील प्रमुख उद्देश आहे. अशी माहिती एमआयटी वर्ल्ड पीस युनिव्हर्सिटीचे सल्लागार डॉ. संजय उपाध्ये, कुलगुरू डॉ. आर.एम.चिटणीस, २८ व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे  प्रमुख समन्वयक व प्र कुलगुरू डॉ. मिलिंद पांडे, प्रा. मिलिंद पात्रे आणि डॉ. महेश थोरवे यांनी पत्रकार परिषदेत दिली.
ही व्याख्यानमाला सर्वांसाठी खुली ठेवण्यात आली आहे.
ही व्याख्यानमाला माईर्स एमआयटीचे व्यवस्थापकीय विश्वस्त आणि कार्यकारी अध्यक्ष राहुल विश्वनाथ कराड यांच्या नेतृत्वाखाली संपन्न होणार आहे.

– पुण्यात ३ दिवस विविध कार्यक्रम आणि जगभरात अनेक कार्यक्रमांचे आयोजन.

– दि. २३ नोव्हेंबर, साधू वासवानी मिशनतर्फे ५७ व्या वार्षिक रथयात्रेचे आयोजन.

– दि. २४ नोव्हेंबर, सेंट मीरा कॉलेजतर्फे ‘साहिब मेरा एक है’ नाट्य सादरीकरण

– दि. २५ नोव्हेंबर, साधू वासवानी यांचा जन्मदिवस आंतरराष्ट्रीय शाकाहार दिवस म्हणून साजरा केला जाणार

पुणे-आध्यात्मिक मार्गदर्शक, साधू टी. एल. वासवानी यांच्या १४४ व्या वाढदिवसाच्या स्मरणार्थ तीन दिवसीय उत्सव दि. २३ नोव्हेंबर ते २५ नोव्हेंबर या कालावधीत होणार आहे. हे उत्सव पुणे, भारतासह जगभरात साजरे होणार आहेत.

कार्यक्रमाचे प्रमुख आकर्षण म्हणजे वार्षिक रथयात्रा, उत्सवपूर्ण सत्संग आणि आध्यात्मिक मार्गदर्शन सत्र आणि साधू वासवानी यांचा वाढदिवस आंतरराष्ट्रीय शाकाहार दिवस म्हणून साजरा करणे या आणि अन्य उपक्रमांचा यामध्ये समावेश आहे.

दि. २३ नोव्हेंबर २०२३ रोजी साधू वासवानी मिशन येथून रथयात्रा मिरवणूक सायंकाळी ५.०० वाजता सुरू होईल. शहरातील प्रमुख रस्त्यांवरून मार्गस्थ होऊन ही साधू वासवानी यांच्या पवित्र समाधीस्थळी विसर्जित होईल. सन १९६६ मध्ये सुरू करण्यात आलेल्या या वार्षिक तीर्थयात्रेत विविध क्षेत्रांतील मान्यवरांचा सहभाग असतो. त्यामध्ये प्राण्यांबद्दल करुणा निर्माण करणे आणि दयाभावाबद्दल जागृती करण्यात येते.

दि. २५ नोव्हेंबर २०२३ – साधू वासवानी यांचा वाढदिवस आंतरराष्ट्रीय शाकाहार दिन म्हणून जगभरात पाळला जातो. हा दिवस सत्संग, सेवा, आध्यात्मिक मार्गदर्शन आणि लंगरने साजरा केला जाईल.

या उत्सवातील मुख्य कार्यक्रम साधू वासवानी मिशनच्या अधिकृत युट्यूब चॅनल @sadhuvaswanimission वर थेट प्रक्षेपित केले जातील.

या उत्सव काळात साधू वासवानी मिशनशी संलग्न आरोग्यसेवा संस्थांमार्फत सवलतीच्या दरात उपचार देत आहेत. साधू वासवानी यांच्या करुणा आणि मानवतेच्या सेवेच्या शिकवणींना मूर्त स्वरूप देणाऱ्या स्थानिक समुदायांमध्ये व्यापक सेवा उपक्रम आखले जातात.

वाचाहीन प्राण्यांचा आवाज साधू वासवानी यांचे नाव आदराने घेतले जाते. त्यांचा जन्मदिवस जागतिक स्तरावर आंतरराष्ट्रीय शाकाहार दिवस आणि प्राणी हक्क दिन म्हणून साजरा केला जातो. या दिवशी, साधू वासवानी यांनी प्राण्यांसाठी केलेल्या पुरस्काराप्रती आदर म्हणून हिंसक प्रकारच्या अन्नापासून दूर राहण्याची शपथ जगभरातील व्यक्ती घेतात. यातून ते साधू वासवानी यांना श्रद्धांजली अर्पण करतात.

http://sak.org.in/pledge/ या संकेतस्थळावर नोंदणी करून इच्छुकांना आंतरराष्ट्रीय शाकाहार दिनानिमित्त ‘शाकाहारी जगण्याची शपथ’ घेता येईल.

याशिवाय, साधू वासवानी मिशनने आठवडाभर चालणाऱ्या सेवा उपक्रमांचे आयोजन केले आहे. ज्यामध्ये रेड-लाइट परिसरातील महिला आणि तृतीयपंथी व्यक्तींना कपडे वाटप, दृष्टिहीनांना मदत, बांधकाम मजुरांच्या मुलांना कपडे-फळांचे वाटप अशा उपक्रमांचा यात समावेश आहे. गरजू रुग्णांना, मुलांना आनंदाचे पाकिट आणि गरजू कुटुंबांना धान्य किटदेखील पुरवली जाणार आहेत.

अधिक माहितीसाठी, इच्छुकांनी जनसंपर्क कार्यालयाशी 020-26055640 या क्रमांकावर संपर्क साधावा.

पुणे, दि. २२ नोव्हेंबर २०२३: अत्यंत धकाधकीच्या वीजक्षेत्रात सेवा देणाऱ्या महावितरणचे कर्मचारी रात्रंदिवस कर्तव्य बजावत असतात. त्यांच्यावर प्रत्यक्ष अप्रत्यक्ष मानसिक तणाव येतो. त्याचा परिणाम आरोग्यावरही होतो. त्यामुळे वैद्यकीय उपचारांसाठी कर्मचाऱ्यांना व अवलंबितांना वैद्यकीय उपचारासाठी विम्याचे कवच देण्यात आले आहे. त्याप्रमाणे वैद्यकीय उपचाराच्या खर्चाचे प्रकरणे विमा कंपनीने ताबडतोब निकाली काढावेत असे निर्देश मुख्य अभियंता श्री. राजेंद्र पवार यांनी दिले.

पुणे परिमंडल अंतर्गत वैद्यकीय उपचाराच्या खर्चाचे दावे व इतर मुद्द्यांच्या तक्रार निवारणासाठी रास्तापेठ येथील ‘प्रकाशदूत’ सभागृहात नुकतीच बैठक झाली. तीत मुख्य अभियंता श्री. पवार बोलत होते. यावेळी ओरिएंटल इन्शुरन्स कंपनीच्या वरिष्ठ विभागीय अधिकारी सुनीता भुरेवार, मेडिक्लेम टीपीए मेडिअसिस्ट कंपनीचे महाव्यवस्थापक अमित गायकवाड, उपमुख्य औद्योगिक संबंध अधिकारी शिरीष काटकर यांच्यासह विविध कर्मचारी संघटनांचे परिमंडल अध्यक्ष व सचिवांची उपस्थिती होती.

मुख्य अभियंता श्री. राजेंद्र पवार यांनी या बैठकीत विम्याचे प्रलंबित दावे आणि इतर तक्रारींच्या निराकरणाचा आढावा घेतला. दाव्यांच्या पडताळणीसाठी विलंब होणार नाही याची दक्षता घ्यावी. प्रसंगी जादा कर्मचारी नेमून विम्याच्या दाव्यांची प्रकरणे ताबडतोब निकाली काढावेत. तसेच कर्मचारी किंवा अवलंबित रुग्णांना रुग्णालयात दाखल करताना आणि उपचार घेताना कोणतीही आर्थिक अडचण येणार नाही याची पॉलिसीप्रमाणे विमा कंपनीने काळजी घ्यावी असे निर्देश श्री. पवार यांनी दिले. यावेळी विविध कर्मचारी संघटनांच्या प्रतिनिधींनी वैद्यकीय खर्चाच्या बिलांबाबत व इतर अडचणींबाबत माहिती दिली. त्याचे निराकरण करण्यासाठी तात्काळ कार्यवाही केली जाईल असे विमा कंपनीच्या वतीने सांगण्यात आले.

गावठी पिस्टल, तलवारी, रोख रक्कम, मोटारसायकली जप्त.

पुणे- उत्तमनगर येथील वाईन शॉप वर दरोडा घालून ३ लाख ९ हजाराची रोकड आणि ३२ हजाराची दारू लुटून नेणाऱ्या टोळीतील ५ जणांना पोलिसांनी २४ तासाच्या आत पकडले आहे .या संदर्भात पोलिसांनी सांगितले कि,’दिनांक १९/११/२०२३ रोजी रात्रौ २१/२५ वा.चे. सुमारास शिवणे उत्तमनगर येथील आर. आर. वाईन्स शॉप वर ६ जणांनी गावठी पिस्टल, कोयता, तलवारीसह दरोडा टाकुन ३,०९,०००/-रुपये रोख व ३२००/-रु. किंमतीच्या दारुच्या बाटल्याची लुट केली होती. दरोडयाचा थरार दुकानाचे सीसीटीव्हीत चित्रीत झाला होता. आर. आर. वाईन्स शॉपचे कामगार मनोज मोरे यांनी याबाबत उत्तमनगर पोलीस ठाणेत तक्रार दिली होती.
उत्तमनगर पोलीसांनी तात्काळ गुन्हा दाखल करुन २ स्वतंत्र तपासपथके तयार केली व आरोपीच्या शोधकामी रवाना केली होती. आरोपींची गुन्हा करण्याची पध्दत पाहुन रेकॉडवरील गुन्हेगारांनी हा दरोडा टाकला असावा असा पोलीसाचा अदांज होता. उत्तमनगर पोलीस ठाणे व सिहंगड रोड पोलीस ठाणेचे सयुंक्त तपासपथकाने दिनांक २१/११/२०२३ रोजी धायरी, माणिकबाग, सिहंगड रोड भागातुन ५ जणांना ताब्यात घेवून त्यांचेकडे तपास करुन त्यांनी गुन्हा करताना वापरलेला गावठी कट्टा, लोखडी हत्यार, तलवार, सत्तुर व चोरीस गेलेले एकुण ०३ लाख ९० हजार रुपये पैकी ३२,८००/- रुपये रोख रक्कम जप्त करणेत आली आहे. ताब्यात घेतलेले ५ पैकी ४ जण हे अल्पयीन निष्पन्न झाल्याने त्यांना बाल न्यायमंडळ येरवडा येथे हजर करणेत आले असुन तेजस राहुल पिंपळगावकर वय १९ वर्षे रा. पंचशिल अपार्टमेंन्ट, प्लॅट नं.४३, मल्हार हॉटेलजवळ, सिंहगड रोड, माणिकबाग पुणे यास प्रथम वर्ग न्यायदंडाधीकारी कोर्ट नंबर ०३ पुणे येथे हजर केले असता दिनांक २५/११/२०२३ रोजी पर्यन्त पोलीस कस्टडी रिंमाड दिलेला आहे.
वरील कामगीरी ही पोलीस आयुक्त पुणे शहर रितेश कुमार,सह. पोलीस आयुक्त संदीप कर्णिक, अपर पोलीस आयुक्त, पश्चिम प्रादेशिक विभाग प्रविणकुमार पाटील, पोलीस उपायुक्त परी ०३ सुहेल शर्मा, सहा. पोलीस आयुक्त कोथरुड विभाग, भिमराव टेळे यांचे मार्गदर्शनाखाली वरिष्ठ पोलीस निरीक्षक बालवडकर आणि सहायक पोलीस निरीक्षक दादाराजे पवार, उमेश रोकडे, पोलीस अंमलदार समीर पवार, तुषार किंन्द्रे, ज्ञानेश्वर तोडकर, दत्तात्रय मालुसरे, प्रमोद कुमदकर यांनी केली आहे.

पुणे- कोर्टात लढावे अशा पद्धतीने कायदेशीर चालाखी करत महापालिका प्रशासनाने ७००० कामगारांच्या भावनांशी खेळ चालविला असून त्यांचे आर्थिक आणि मानसिक शोषण करण्याचा प्रकार उघडकीस आल्याचे राष्ट्रवादीचे पर्वती विभागातील नेते नितीन कदम यांनी सांगितले, त्यांनी खासदार वंदना चव्हाण यांच्या मार्गदर्शनाखाली कंत्राटी कामगारांच्या दिवाळी बोनसच्या विषयावर मुख्य कामगार अधिकारी नितीन केंजळे यांची भेट घेतली तेव्हा केंजळे यांनी ‘हे आमचे कामगारच नाहीत; अशी भूमिका घेतल्याने दिवाळी बोनस आणि कामगारांच्या हक्कांना तिलांजली देण्याचा प्रकार उघड झाल्याचे स्पष्ट झाले.

ठेकेदारी पद्धतीने कामगारांची पिळवणूक कशी केली जाते हे महापालिकेने देखील आपल्या वर्तनातून देखील सिद्ध करून महापालिका अशा कायदेशीर पळवाटा काढून चलाखीने कामगारांच्या भावनांशी खेळ खेळत आहेत .पुणे महापालिकेत 7000 कंत्राटी कामगार आहेत. बोनस, सानुग्रह अनुदान इत्यादी विषयासाठी दिवाळी पूर्व हे सर्व विविध राजकीय आधाराखाली आणि नेत्यांच्या आधाराखाली उपोषणाला बसले होते. अशा बोलघेवड्या फसव्या स्वार्थी आणि प्रसिद्धी लोलुप नेत्यांची नाटकी मर्जी राखण्यासाठी महापालिकेच्या अधिकाऱ्यांनी राजकीय पुढार्‍यांनाही लाजवतील असे एकापेक्षा एक आश्वासन दिली. वृत्तपत्रांमध्ये कामगारांची दिवाळी गोड होणार अशा बातम्या झळकल्या. परंतु हि केवळ फसवी प्रसिद्धी ठरली प्रत्यक्षात कामगारांच्या पदरी निराशाच पडली..कोणताही बोनस त्यांना मिळाला नाही.बिचाऱ्या कामगारांसह त्यांच्या कुटुंबियांना खोटी आशा दाखवून त्यांची फसवणूकच केली गेली.त्यांच्या भावनांशी क्रूर खेळ खेळला गेला.

पुणे महापालिकेच्या कंत्राटी कामगारांची एवढी फसवणूक कधीच झाली नव्हती.. हेच ते नितीन केंजळे मुख्य कामगार अधिकारी आणि सोबत दिवाळीच्या वेळेस त्यांनी काढलेले कार्यालयीन पत्रक असे नितीन कदम म्हणाले.खासदार वंदना चव्हाण यांच्या सूचनेनुसार मी या संदर्भात मुख्य कामगार अधिकारी नितीन केंजळे यांची भेट घेऊन जाब विचारला.. या महाशयांनी तर “हे आमचे कामगाराच नाही”अशी भूमिका घेत हात वर केले..अतिरिक्त आयुक्त व आयुक्त उपलब्ध नसल्यामुळे त्यांच्याशी चर्चा होऊ शकली नाही.खासदार वंदनाताई चव्हाण सदर कंत्राटी कामगारांचा प्रश्नासाठी लवकरच आयुक्तांची भेट घेणार आहेत. असेही कदम यांनी सांगितले आहे.

पुणे-राज्याच्या गृह विभागाने भारतीय पोलीस सेवेतील वरिष्ठ पोलीस अधिकाऱ्यांच्या मंगळवारी (दि. 21) बदल्या केल्या. त्यामध्ये पुण्याचे सह पोलीस आयुक्त संदीप कर्णिक यांची नाशिक येथे पोलीस आयुक्त पदावर बदली करण्यात आली आहे.

माजी सह पोलीस आयुक्त डॉ. रवींद्र शिसवे यांची राज्य मानवी हक्क आयोग मुंबई येथे बदली झाली. त्यांच्या जागी संदीप कर्णिक एप्रिल 2022 मध्ये पुणे येथे सह पोलीस आयुक्त म्हणून आले होते. संदीप कर्णिक यांनी पुणे ग्रामीणचे पोलीस अधीक्षक म्हणून पूर्वी काम केले होते. दोन वर्षांची टर्म संपण्यापूर्वीच त्यांची बदली करण्यात आली आहे. त्यांच्याकडे मोठी जबाबदारी देण्यात आली आहे. पुण्याचे सह पोलीस आयुक्त म्हणून अद्याप कोणाची नियुक्ती झालेली नाही.

नाशिकचे पोलीस आयुक्त अंकुश शिंदे यांची राज्य गुप्त वार्ता विभाग व्हीआयपी सुरक्षा विभागाच्या विशेष पोलीस महानिरीक्षक पदी बदली करण्यात आली आहे. त्यांच्या जागी संदीप कर्णिक यांची वर्णी लागली आहे. अंकुश शिंदे यांनी पिंपरी-चिंचवड शहरात पोलीस आयुक्त म्हणून काम केले आहे. पिंपरी-चिंचवड शहरातून त्यांची नाशिकचे पोलीस आयुक्त म्हणून बदली झाली होती.अंकुश शिंदे यांची यांची देखील नाशिक येथील कारकीर्द पूर्ण होण्यापूर्वीच बदली झाली. पिंपरी-चिंचवड शहराचे पोलीस आयुक्त असताना देखील कारकीर्द पूर्ण होण्यापूर्वीच त्यांची बदली झाली होती.